ក្រសួងការពារជាតិ បដិសេធការផ្សព្វផ្សាយរបស់ភាគីថៃ ដែលថាកម្ពុជាបង្ខាំងពលរដ្ឋថៃ មិនឱ្យឆ្លងដែន គឺជាព័ត៌មានបំភ្លៃខុសការពិតពីភាគីថៃ។
អ្នកនាំពាក្យក្រសួងការពារជាតិ អ្នកស្រី ម៉ាលី សុជាតា ចេញសេចក្តីប្រកាសព័ត៌មាននៅថ្ងៃទី១៥ ធ្នូ នេះថា រាជរដ្ឋាភិបាលកម្ពុជា បានផ្អាកការធ្វើដំណើរចេញ-ចូលទាំងស្រុងនៅតាមច្រកទ្វារព្រំដែនគោក និងផ្លូវទឹកជាប់ព្រំដែនកម្ពុជា-ថៃ ដែលកំពុងមានអរិភាពតែប៉ុណ្ណោះ។
ប្រភពដដែលអះអាងថា ការសម្រេចផ្អាកបែបនេះ គឺក្នុងគោលបំណងដើម្បីការពារអាយុជីវិត និងការរងរបួសរបស់ជនស៊ីវិលពីការបាញ់ប្រហារដោយអនាធិបតេយ្យនៅតាមបណ្ដោយព្រំដែនពីសំណាក់យោធាថៃ នាពេលនេះ ប៉ុន្តែការផ្អាកនេះមិនរាប់បញ្ចូលការធ្វើដំណើរតាមផ្លូវអាកាស និងច្រកទ្វារព្រំដែនដែលគ្មានភាពតានតឹង ឬតាមច្រកទ្វារព្រំដែនកម្ពុជាជាប់ជាមួយប្រទេសផ្សេងៗឡើយ។
អ្នកស្រី ម៉ាលី សុជាតា បញ្ជាក់ថា ក្នុងនាមជាប្រទេសដែលមានការទទួលខុសត្រូវខ្ពស់ កម្ពុជាតែងតែគោរព និងអនុវត្តយ៉ាងខ្ជាប់ខ្ជួននូវច្បាប់មនុស្សធម៌អន្តរជាតិ ព្រមទាំងចាត់ទុកកាតព្វកិច្ចក្នុងការថែរក្សាសុខសុវត្ថិភាព ការការពារអាយុជីវិតរបស់ជនស៊ីវិលជាអាទិភាពខ្ពស់បំផុត មិនថាជាពលរដ្ឋខ្មែរ និងជនបរទេស រួមទាំងប្រជាជនថៃ ដែលកំពុងមានវត្តមាននៅក្នុងប្រទេសកម្ពុជា ផងដែរ។
ក្រសួងការពារជាតិកម្ពុជា ប្ដេជ្ញាចិត្តយ៉ាងខ្ជាប់ខ្ជួនក្នុងការគោរព និងអនុវត្តតាមលក្ខខណ្ឌនៃបទឈប់បាញ់ សេចក្តីថ្លែងការណ៍រួមស្ដីពីកិច្ចព្រមព្រៀងសន្តិភាពរវាងកម្ពុជា-ថៃ ប្រកបដោយសុច្ឆន្ទៈ និងការទទួលខុសត្រូវខ្ពស់បំផុត ស្របតាមច្បាប់អន្តរជាតិ ក៏ដូចជាសន្ធិសញ្ញា អនុសញ្ញា និងកិច្ចព្រមព្រៀងដែលមានស្រាប់ សំដៅស្វែងរកដំណោះស្រាយមួយដែលយុត្តិធម៌ ត្រឹមត្រូវ យូរអង្វែង និងស្របតាមច្បាប់អន្តរជាតិ។
ការអះអាងនេះ ធ្វើឡើងបន្ទាប់ពីភាគីថៃ បានចេញមុខចោទប្រកាន់លើកម្ពុជា ជុំវិញការសម្រេចបិទព្រំដែនគោករវាងកម្ពុជា-ថៃ ដែលកំពុងរងការវាយប្រហារពីយោធាថៃ ដោយមិនរើសទីតាំងនាពេលនេះ។
កាលពីថ្ងៃទី១៣ ខែធ្នូ ឆ្នាំ២០២៥ មេដឹកនាំបក្សកាន់អំណាច លោក ហ៊ុន សែន បានស្នើឱ្យរាជរដ្ឋាភិបាលកម្ពុជា ពិចារណាផ្អាករាល់ការធ្វើដំណើររបស់ពលរដ្ឋខ្មែរ និងពលរដ្ឋថៃ ឆ្លងកាត់ព្រំដែនរវាងប្រទេសទាំងពីរ ក្រោមហេតុផលថា កងទ័ពថៃ បានឈ្លានពានវាយប្រហារ និងសម្លាប់ប្រជាជនកម្ពុជា ដោយគ្មានការរើសមុខ និងរើសទីកន្លែងឡើយ សូម្បីតែស្ពាន ថ្នល់ សាលារៀន វត្តអារាម ក្នុងរយៈពេលប៉ុន្មានថ្ងៃចុងក្រោយនេះ។
យ៉ាងណាក៏ដោយ ក្រោយការស្នើនេះ កាសែតថៃ The Nation បានស្រង់សម្ដីអតីតទីប្រឹក្សាលេខាធិការដ្ឋានការពារជាតិថៃ លោក គ្រីសាណា បូវនរតនារ៉ាក់ (Krissana Bowornratanarak)កាលពីថ្ងៃទី១៤ ធ្នូ ថា ការលើកឡើងរបស់លោក ហ៊ុន សែន គឺជាការរំលោភលើអនុសញ្ញាទីក្រុងហ្សឺណែវ ដោយចាប់ជនស៊ីវិលធ្វើជាចំណាប់ខ្មាំង។
ប្រភពដដែលចោទថា លោក ហ៊ុន សែន បានបញ្ជាឲ្យមន្ត្រីក្រោមឱវាទរារាំងមិនឲ្យជនជាតិថៃ ឆ្លងកាត់តាមច្រកទ្វារព្រំដែនប៉ោយប៉ែត ចូលប្រទេសថៃ វិញ ដែលជាហេតុធ្វើឲ្យមនុស្សជាច្រើនជាប់គាំងក្នុងប្រទេសកម្ពុជា។
បន្ទាប់ពីមានការចោទប្រកាន់ពីសំណាក់ភាគីថៃ ប្រធានព្រឹទ្ធសភាកម្ពុជា លោក ហ៊ុន សែន បានសរសេរលើទំព័រហ្វេសប៊ុករបស់ខ្លួនទាំងយប់កាលពីថ្ងៃទី១៤ ធ្នូ ថា ការស្នើឱ្យមានការផ្អាកធ្វើដំណើរត្រូវធ្វើឡើងតែតាមផ្លូវគោកប៉ុណ្ណោះ ទោះតំបន់សមុទ្រកំពុងត្រូវរងការឈ្លានពានមួយផ្នែកដោយភាគីថៃ ក្នុងពេលនេះក៏ដោយ។
លោក ហ៊ុន សែន អះអាងថា សម្រាប់ការធ្វើដំណើរតាមផ្លូវអាកាស នៅតែអាចធ្វើដំណើរបានធម្មតា ព្រោះគ្មានការប្រយុទ្ធនៅព្រលានយន្តហោះទេ ដូច្នេះប្រជាជនថៃ ដែលកំពុងរស់នៅកម្ពុជា អាចចាកចេញពីកម្ពុជា តាមផ្លូវអាកាសនៅភ្នំពេញ ឬនៅសៀមរាប បាន។ រីឯប្រជាជនថៃ ដែលកំពុងធ្វើការនៅជិតព្រំដែនប្រទេសវៀតណាម អាចចេញទៅតាមប្រទេសវៀតណាម និងរកវិធីធ្វើដំណើរទៅកាន់ប្រទេសថៃ វិញដោយគ្មានការហាមឃាត់ទេ។ ចំណែកប្រជាជនកម្ពុជា ប្រសិនបើចង់វិលត្រឡប់មកប្រទេសកម្ពុជា វិញ ក៏ត្រូវធ្វើតាមផ្លូវអាកាសនៅទីកន្លែងដែលមានជើងហោះហើរមកកម្ពុជា ដែរ។
មេដឹកនាំខ្មែររូបនេះបញ្ជាក់ថា លោកមិនបានហាមឃាត់ការធ្វើដំណើររបស់ប្រជាជនកម្ពុជា និងប្រជាជនថៃ ឡើយ ប៉ុន្តែការស្នើឱ្យផ្អាកនេះ ត្រូវធ្វើឡើងសម្រាប់ការធ្វើដំណើរតាមផ្លូវគោកដែលជាចំណុចគ្រោះថ្នាក់ដល់ជីវិតប្រជាជនប៉ុណ្ណោះ ដូច្នេះភាគីថៃ មិនត្រូវយកបំណងល្អរបស់លោកក្នុងការការពារអាយុជីវិតមនុស្ស ទាំងជនជាតិខ្មែរ និងជនជាតិថៃ មកវាយប្រហារលើរូបលោកបែបនេះឡើយ៕
© 2025, ឌឹ ខេមបូឌា ដេលី. All rights reserved.