CATEGORY
ប័ណ្ណសារ
អ្នកថតរូបត្រូវបានហាមឃាត់មិនឱ្យចូលក្នុងសាលាដំបូងរាជធានី
អ្នកថតរូប និងអ្នកថតវីដេអូត្រូវបានហាមឃាត់មិនឱ្យចូលក្នុងបរិវេណសាលាដំបូងរាជធានីភ្នំពេញ ជាចំណាត់ការមួយដែលមន្ត្រីម្នាក់លើកឡើងថា ធ្វើឡើងក្នុងបំណងដើម្បីបញ្ឈប់អ្នកសារព័ត៌មានពីការចោទប្រកាន់មិនត្រឹមត្រូវលើស្ថាប័ននេះ។
គោលការណ៍ថ្មីនេះដែលតាមលក្ខណៈបច្ចេកទេសបានចូលជាធរមានកាលពីថ្ងៃច័ន្ទនោះ ក៏តម្រូវឱ្យអ្នកយកព័ត៌មានទាំងអស់ដាក់ពាក្យសុំការអនុញ្ញាតចូលទៅក្នុងបរិវេណពីនាយកដ្ឋានរដ្ឋបាលរបស់តុលាការ និងហាមឃាត់មិនឱ្យពួកគេដើរត្រេតត្រតនៅក្នុងរបងតុលាការឡើយ។
លោក លី សុផាន់ណា អ្នកនាំពាក្យព្រះរាជអាជ្ញាអមសាលាដំបូងមានប្រសាសន៍ថា វិធានថ្មីនេះត្រូវបានអនុវត្តជាសំខាន់ដើម្បីធ្វើឱ្យសន្តិសុខកាន់តែប្រសើរឡើង ស្របតាមបទដ្ឋានអន្តរជាតិ ប៉ុន្តែក៏នឹងប្រើដើម្បីកាត់បន្ថយការធ្វើសេចក្តីរាយការណ៍នាំឲ្យយល់ខុសផងដែរ។
លោក លី សុផាន់ណា...
កាលពីម្សិលមិញ គណបក្សសង្គ្រោះជាតិបានលើកឡើងថា តំណាងរាស្ត្ររបស់ខ្លួននឹងមិនធ្វើតាមការកោះហៅសម្រាប់ការសាកសួរពាក់ព័ន្ធរឿងអាស្រូវផ្លូវភេទរបស់មេដឹកនាំបក្សឡើយ ខណៈ លោក ឱម យ៉ិនទៀង ប្រធានអង្គភាពប្រឆាំងអំពើ់ពុករលួយ ដែលជាអ្នកដឹកនាំការស៊ើបអង្កេតរបស់រដ្ឋាភិបាល បាននិយាយការពារការស៊ើបអង្កេតនេះតាមកញ្ចក់ទូរទស្សន៍ក្នុងស្រុកមួយ ហើយបានព្រមានអំពីការចាប់ខ្លួនបន្ថែមទៀត។
កាលពីថ្ងៃច័ន្ទ សាលាដំបូងរាជធានីភ្នំពេញបានដាក់ការចោទប្រកាន់ពីបទសូកប៉ាន់លើលោក...
ជនភៀសខ្លួនពីរនាក់ទៀតនៅកោះណូរូស្ម័គ្រចិត្តមកប្រទេសកម្ពុជា
មន្ត្រីអន្តោប្រវេសន៍ម្នាក់បាននិយាយកាលពីម្សិលមិញថា ជនភៀសខ្លួនពីរនាក់ទៀត ដែលឃាត់ទុកដោយប្រទេសអូស្ត្រាលីនៅមណ្ឌលឃាត់ខ្លួនក្នុងសមុទ្រ បានស្ម័គ្រចិត្តមកតាំងទីលំនៅថ្មីនៅប្រទេសកម្ពុជា ជាសញ្ញាមួយបង្ហាញឲ្យឃើញថា កិច្ចព្រមព្រៀងតាំងលំនៅជាថ្មីដ៏ចម្រូងចម្រាសររវាងប្រទេសទាំងពីរមានដំណើរការជាធម្មតានៅឡើយ។
លោក កែម សារិន ប្រធាននាយកដ្ឋានជនភៀសខ្លួននៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ បាននិយាយថា អ្នកស្ម័គ្រចិត្តពីរនាក់ថ្មីមកពីជំរំជនភៀសខ្លួននៅប្រទេសកោះណូរូនៃមហាសមុទ្រប៉ាស៊ីហ្វិកខាងត្បូងមិនបានដាក់ពាក្យសុំជាផ្លូវការនៅឡើយទេ។ ព័ត៌មាននេះលេចឮឡើងបន្ទាប់ពីមានរបាយការណ៍ថា ជនភៀសខ្លួនពីរនាក់នៅប្រទេសណូរូបានដុតសម្លាប់ខ្លួនឯងកាលពីសប្តាហ៍មុន។
ប្រសិនបើទទួលបានការយល់ព្រម អ្នកទាំងពីរនឹងចូលរួមជាមួយមនុស្សពីរនាក់ផ្សេងទៀត ដែលបានចាកចេញពីប្រទេសណូរូមកក្រុងភ្នំពេញ និងបានស្នាក់នៅ ចាប់តាំងពីប្រទេសកម្ពុជាបានទទួលយកកញ្ចប់ជំនួយ៣០លានដុល្លារពីប្រទេសអូស្ត្រាលីកាលពីខែកញ្ញាឆ្នាំ២០១៤ ជាថ្នូរនឹងការទទួលយកជនភៀសខ្លួនច្រើនរយនាក់នៅលើប្រទេសកូនកោះនេះ។
លោក សារិន បាននិយាយកាលពីម្សិលមិញថា "ប្រទេសអូស្ត្រាលីបានជូនព័ត៌មានដល់យើងថា មនុស្សពីរនាក់ទៀតបានស្ម័គ្រចិត្តមកប្រទេសកម្ពុជា"។
លោកនិយាយថា "នេះគ្រាន់តែជាព័ត៌មានមិនផ្លូវការពីប្រទេសអូស្ត្រាលី ហើយយើងមិនទាន់បានទទួលលិខិតផ្លូវការណាមួយនៅឡើយទេ។ យើងនឹងពិនិត្យមើលឯកសារសំណើសុំតាំងទីលំនៅថ្មីរបស់ជនភៀសខ្លួនស្ម័គ្រចិត្ត និងដាក់សំណើនោះទៅរដ្ឋមន្ត្រីដើម្បីសុំសេចក្តីសម្រេច"។
លោក សារិន បាននិយាយថា លោកមិនបានដឹងអំពីភេទ អាយុ ឬសញ្ជាតិនៃអ្នកស្ម័គ្រចិត្តពីរនាក់នោះ ឬថាតើពួកគេជាប់សាច់ញាតិគ្នាឬយ៉ាងណានោះឡើយ។
អ្នកនាំពាក្យការិយាល័យនៃក្រសួងអន្តោប្រវេសន៍អូស្ត្រាលី លោក ភីធើ ដាត់ថុន មិនបានឆ្លើយតបនឹងសំណើសុំការពន្យល់ទេ។
មានតែប្រាំនាក់ប៉ុណ្ណោះក្នុងចំណោមជនភៀសខ្លួនលើកោះណូរូបានផ្លាស់មករស់នៅក្រុងភ្នំពេញ ចាប់តាំងពីមន្ត្រីកម្ពុជានិងអូស្ត្រាលីបានសម្រេចកិច្ចព្រមព្រៀងតាំងលំនៅថ្មីនេះដោយមានការអបអរនៅក្រសួងមហាផ្ទៃជាងមួយឆ្នាំកន្លះមកហើយ។ ប៉ុន្តែ មនុស្សបីនាក់ក្នុងចំណោមពួកគេ គឺបុរសម្នាក់មកពីប្រទេសភូមា និងប្តីប្រពន្ធមួយគូមកពីប្រទេសអីុរ៉ង់ ចាប់តាំងពីពេលនោះមកបានសម្រេចចិត្តត្រឡប់ទៅស្រុកវិញ ជាជាងស្នាក់នៅក្នុងប្រទេសកម្ពុជា។
លោក អៀន រីនថូល អ្នកនាំពាក្យអង្គការសម្ព័ន្ធសកម្មភាពជនភៀសខ្លួន មានមូលដ្ឋាននៅក្រុងស៊ីដនី បាននិយាយថា ជនភៀសខ្លួនមួយចំនួននៅប្រទេសណូរូ អាចនៅតែយល់ឃើញថាប្រទេសកម្ពុជាជាដំណាក់មួយឆ្ពោះទៅរកប្រទេសប្រសើរជាងនេះ បើទោះជាប្រទេសអូស្ត្រាលីបានបញ្ជាក់ច្បាស់ថា ប្រទេសរបស់ខ្លួនមិនអាចទៅដល់បានយ៉ាងណាក៏ដោយ។
លោកបាននិយាយថា ការដុតសម្លាប់ខ្លួននៃជនភៀសខ្លួនម្នាក់លើកោះណូរូ កាលពីថ្ងៃច័ន្ទ ជាលើកទីពីរក្នុងពេលមួយសប្តាហ៍ ក៏អាចបង្ខំឲ្យមនុស្សមួយចំនួនពិចារណាអំពីប្រទេសកម្ពុជាដែរ ប៉ុន្តែនៅតែមានមន្ទិលថា ការបញ្ជូននឹងអាចជាកិច្ចកលច្រើនជាង។
លោកបាននិយាយថា "អំពើឃោរឃៅនិងភាពរន្ធត់នៃអ្វីដែលបានកើតឡើងនាពេលថ្មីៗនេះនៅណូរូ អាចជំរុញឲ្យមនុស្សមួយចំនួនតូចពិចារណាថាប្រទេសកម្ពុជាជាជម្រើសមួយ។ យើងក៏មានការខំប្រឹងប្រែងថ្មីៗនេះរបស់រដ្ឋាភិបាលអូស្ត្រាលីបញ្ជាក់ថា មិនមានជម្រើសណាផ្សេងក្រៅពីប្រទេសកម្ពុជា។ អ្វីដែលសម្រេចបាន គឺថា មនុស្សមួយចំនួនតូចប៉ុណ្ណោះសុខចិត្តពិចារណាអំពីប្រទេសកម្ពុជាថ្វីបើស្ថានការណ៍កំពុងដុនដាបនៅកោះណូរូក៏ដោយ"។
លោកបាននិយាយបន្ថែមថា "ខ្ញុំមិនជឿថានឹងមានមនុស្សច្រើនដែលអាចត្រូវជំរុញឲ្យពិចារណាមកប្រទេសកម្ពុជាទេ។ វាច្បាស់ណាស់ថា ដំណោះស្រាយកម្ពុជាដែលស្នើឡើងដោយរដ្ឋាភិបាលអូស្ត្រាលីជារឿងលេងសើចដែលចំណាយច្រើន"។
បើទោះជាមានប្រយោជន៍តិចតួចនៅកម្ពុជាក៏ដោយ ក៏លោក ដាត់ថុន បានបន្តការពារកិច្ចព្រមព្រៀងនេះ ព្រោះជាការរារាំងដ៏មានប្រសិទ្ធភាពមួយទប់ស្កាត់ការប៉ុនប៉ងដោយអ្នកបម្រុងនឹងក្លាយជាអ្នកស្វែងរកសិទ្ធិជ្រកកោនមិនឲ្យមកកាន់ប្រទេសអូស្ត្រាលី។ ប៉ុន្តែក្រុមសិទ្ធិមនុស្សនិងសមាជិកសភាបក្សប្រឆាំងនៅប្រទេសទាំងពីរបានចោទប្រទេសអូស្ត្រាលីថាបានគេចចេញពីកាតព្វកិច្ចរបស់ខ្លួនចំពោះជនភៀសខ្លួនក្រោមច្បាប់អន្តរជាតិ ដោយស្វះស្វែងបញ្ជូនពួកគេចេញទៅប្រទេសមួយក្នុងចំណោមប្រទេសក្រីក្របំផុតនិងពុករលួយបំផុតនៅក្នុងតំបន់៕ និត
ពន្ធនាគារគឺពោរពេញទៅដោយអ្នករិះគន់គណបក្សកាន់អំណាច
វាមិនមែនជាពេលល្អប្រសើរសម្រាប់អ្នករិះគន់លើរដ្ឋាភិបាលកម្ពុជាទេ។ឆ្នាំកន្លងមកនេះ មានអ្នករិះគន់ជាង២០នាក់កំពុងជាប់ពន្ធនាគារ ហើយបញ្ជីឈ្មោះនៃអ្នកដែលជាប់ពន្ធនាគារមានចាប់តាំងពីតំណាងរាស្ត្រនិងអ្នកប្រើហ្វេសប៊ុករហូតដល់អ្នកឃ្លាំមើលសិទ្ធិមនុស្ស និងមន្ត្រីគណៈកម្មាធិការជាតិរៀបចំការបោះឆ្នោតជាន់ខ្ពស់មួយរូប។
នៅក្នុងយុទ្ធនាការបោសសម្អាតជាក់ស្តែងប្រឆាំងនឹងអ្នកដែលរំខានលោកនាយករដ្ឋមន្ត្រី ហ៊ុន សែន ដែលកាន់អំណាច៣១ឆ្នាំ ឬអ្នកដែលឆាឆៅគម្រោងរបស់លោកនៅតែកាន់អំណាចក្រោយពីការបោះឆ្នោតជាតិនាឆ្នាំ២០១៨នោះ អាជ្ញាធរថែមទាំងចោទប្រកាន់មន្ត្រីអង្គការសហប្រជាជាតិមួយរូបដែរ។
លោក ហ៊ុន សែន បានគំរាមបុរសម្នាក់កាលពីថ្ងៃអាទិត្យ ដោយបញ្ជាក់ថា អភ័យឯកសិទ្ធិរបស់គាត់ជាមន្ត្រីសហប្រជាជាតិ នឹងមិនអាចការពារគាត់ពីការអះអាងថា គាត់បានជួយបញ្ចុះបញ្ចូលស្ត្រីមួយរូបឲ្យបដិសេធរឿងស្នេហាជាមួយលោក កឹម សុខា អនុប្រធានគណបក្សប្រឆាំងថា "អ្នកឯងសូកប៉ាន់សាក្សី អ្នកឯងគាបសង្កត់ពួកគេ"។
មេឃុំមួយរូបរបស់គណបក្សប្រឆាំងកំពុងជាប់ពន្ធនាគារពីការអះអាងដូចគ្នានេះ ហើយមានអ្នកចូលជាប់ពន្ធនាគារជាមួយគាត់នៅសប្តាហ៍នេះ គឺបុគ្គលិកសមាគមសិទ្ធិមនុស្សអាដហុកជាន់ខ្ពស់បួនរូប និងអគ្គលេខាធិការរងគណៈកម្មាធិការជាតិរៀបចំការបោះឆ្នោតមួយរូប គឺលោក នី ចរិយា។
រហូតមកដល់ពេលនេះ គ្មានភ័ស្តុតាងណាមួយត្រូវបានបង្ហាញឲ្យដឹងជាសាធារណៈដើម្បីបញ្ជាក់ថា មន្ត្រីណាមួយក្នុងបណ្តាមន្ត្រីទាំងប្រាំមួយនាក់ពិតជាប៉ុនប៉ងសូកប៉ាន់ស្រីកំណាន់ ឬក៏មានហេតុផលអ្វីនោះទេ។
ប៉ុន្តែ រឿងនោះមិនបានបញ្ឈប់តុលាការពីការផ្តន្ទាទោសអ្នករិះគន់រដ្ឋាភិបាលកាលពីមុនបានទេ។
មន្ត្រីគណបក្សប្រឆាំងបីរូបត្រូវបានកាត់ទោសឲ្យជាប់ពន្ធនាគាររយៈពេល២០ឆ្នាំកាលពីឆ្នាំមុនពីបទដឹកនាំកុបកម្ម ដោយសារតែពួកគេមានវត្តមាននៅឯការតវ៉ាមួយដែលក្លាយទៅជាការប្រវាយប្រតប់គ្នារវាងអ្នកតវ៉ានិងក្រុមសន្តិសុខរដ្ឋដែលល្បីខាងប្រើហិង្សា។
គ្មានភ័ស្តុតាងណាមួយត្រូវបានបង្ហាញនៅក្នុងតុលាការ ដើម្បីបញ្ជាក់ថា មន្ត្រីទាំងនោះបានញុះញង់ឲ្យមានអំពើហិង្សា ឬបញ្ជាឲ្យមានហិង្សាទេ។សកម្មជនគណបក្សសង្គ្រោះជាតិប្រាំបីរូបផ្សេងទៀតក៏ជាប់ពន្ធនាគាររយៈពេលប្រាំពីរឆ្នាំដែរ ដោយសារតែការតវ៉ានេះ។ សកម្មជនបីរូបទៀតកំពុងជាប់ពន្ធនាគារចាប់តាំងពីលោក ហ៊ុន សែន បានបញ្ជាឲ្យចាប់ខ្លួនពួកគេកាលពីខែសីហា។
ក្នុងបញ្ជីឈ្មោះកាន់តែវែង ពួកគេចូលរួមជាប់ក្នុងពន្ធនាគារព្រៃសក្នុងក្រុងភ្នំពេញ ដោយមានតំណាងរាស្ត្រគណបក្សសង្គ្រោះជាតិ គឺលោក អ៊ុំ សំអាន និងសមាជិកព្រឹទ្ធសភា គឺលោក ហុង សុខហួរ ដែលត្រូវនគរបាលចាប់ខ្លួនដោយសារតែការបង្ហោះតាមហ្វេសប៊ុកកាលពីខែមុន និងក្នុងខែសីហា ទោះបីជាពួកគេមានអភ័យឯកសិទ្ធិតាមរដ្ឋធម្មនុញ្ញដែលរួចផុតពីការចាប់ខ្លួនក៏ដោយ។
គង់ យ៉ារ៉ា និស្សិតផ្នែកវិទ្យាសាស្ត្រនយោបាយអាយុ២៥ឆ្នាំ ដែលបានបង្ហោះតាមហ្វេសប៊ុក ដោយអំពាវនាវឲ្យមានបដិវត្តន៍ពណ៌ដើម្បីនាំប្រជាធិបតេយ្យមកប្រទេសកម្ពុជា គឺកំពុងតែអនុវត្តទោសរយៈពេល១៨ខែពីបទញុះញង់ដែរ។
លោក ចន ខាហ្វក្លែន អ្នកស្រាវជ្រាវអង្គការលើកលែងទោសអន្តរជាតិសម្រាប់កម្ពុជាបានមានប្រសាសន៍ថា "នេះគឺជាយុទ្ធនាការបោសសម្អាត ដើម្បីរំលាយចោលគណបក្សប្រឆាំង និងធ្វើលែងឲ្យមានប្រសិទ្ធភាពលើការងារដ៏មានតម្លៃរបស់ក្រុមសិទ្ធិមនុស្សឯករាជ្យរបស់ប្រទេសនេះ"។
អ្នកស្រាវជ្រាវអង្គការលើកលែងទោសអន្តរជាតិសម្រាប់កម្ពុជារូបនេះបានមានប្រសាសន៍ថា "ដោយពឹងផ្អែកលើតុលាការ អាជ្ញាធរកំពុងព្យាយាមផ្តល់ភាពស្របច្បាប់ដល់យុទ្ធនាការមួយដែលជារឿងនយោបាយសុទ្ធសាធនិងខុសច្បាប់ទាំងស្រុង"។
បញ្ជីឈ្មោះនៃអ្នកប្រឆាំងរដ្ឋាភិបាលដែលស្ថិតក្រោមគំនាបនៃប្រព័ន្ធច្បាប់ គឺរឹតតែវែងទៅទៀត ប្រសិនបើអ្នកដែលប្រឈមមុខនឹងការចាប់ខ្លួនត្រូវគេរាប់បញ្ចូល គឺមានតំណាងរាស្ត្រគណបក្សសង្គ្រោះជាតិពីររូប ឥឡូវនេះត្រូវកោះហៅមកបំភ្លឺទាក់ទងនឹងពេស្យាចាររបស់លោក សុខា អនុប្រធានគណបក្សប្រឆាំង។ លោក សុខា ក៏ត្រូវតុលាការកោះហៅកាលពីម្សិលមិញដែរ ដើម្បីបំភ្លឺការអះអាងដ៏ចម្លែកដែលថា លោកបានបរិហារកេរ្តិ៍សកម្មជនវ័យក្មេងគឺ ធី សុវណ្ណថា ក្នុងពេលសាសងតាមទូរស័ព្ទជាលក្ខណៈឯកជនជាមួយស្ត្រីម្នាក់ដែលគេចោទថាជាស្រីកំណាន់ ជាសំឡេងខ្សែអាត់ដែលបែកធ្លាយបង្ហោះតាមអ៊ិនធឺណែតកាលពីខែមុន ដោយបង្កឲ្យរឿងអាស្រូវផ្ទុះឡើង។
ការកាត់ឲ្យជាប់ពន្ធនាគាររយៈពេលពីរឆ្នាំចំពោះមេដឹកនាំគណបក្សប្រឆាំង គឺលោក សម រង្ស៊ី ក៏ត្រូវលាតត្រដាងភ្លាមៗមួយរំពេចដោយក្រុមមន្ត្រីក្នុងខែវិច្ឆិកា។ លោក រង្ស៊ី បានភៀសខ្លួនទៅកាន់ប្រទេសបារាំង ដែលលោកទទួលរងបទចោទប្រកាន់ព្រហ្មទណ្ឌថ្មីៗមួយចំនួនដែលអាចធ្វើឲ្យលោកជាប់ពន្ធនាគារពីរទសវត្សរ៍។តំណាងរាស្ត្រគណបក្សសង្គ្រោះជាតិប្រាំពីររូបផ្សេងទៀត គឺមាន អ្នកស្រី មួរ សុខហួរ លោក កែវ ភីរម្យ លោក ម៉ែន សុថាវរិន្រ្ទ លោក ហូរ វ៉ាន់ លោក រៀល...
លោកនាយករដ្ឋមន្ត្រី ហ៊ុន សែន បានប្រកាសតាមហ្វេសប៊ុកកាលពីម្សិលមិញថា រថយន្ត រថយន្តទេសចរណ៍ និងយានយន្តផ្សេងទៀតដែលធ្វើចរាចរនឹងត្រូវហាមមិនឲ្យធ្វើដំណើរតាមកំណាត់ផ្លូវត្រង់ទៅមុខប្រាសាទអង្គរវត្ត ដែលជាកន្លែងទាក់ទាញភ្ញៀវទេសចរដ៏ល្បីបំផុតរបស់ប្រទេសកម្ពុជា។
លោក ហ៊ុន សែន បានសរសេរថា "ចាប់ពីពេលនេះតទៅ គឺមានតែអ្នកទេសចរថ្មើរជើង និងអ្នកជិះកង់ប៉ុណ្ណោះ នឹងទទួលបានការអនុញ្ញាតឲ្យធ្វើដំណើរត្រង់ទៅមុខប្រាសាទអង្គរវត្តបាន។ គ្មានរថយន្តណានឹងអនុញ្ញាតឲ្យបើកឆ្លងកាត់ផ្លូវនេះទេ ក្នុងករណីបន្ទាន់ផ្សេងៗដូចជារថយន្តពន្លត់អគ្គិភ័យ និងរថយន្តសង្គ្រោះបន្ទាន់ប៉ុណ្ណោះដែលអនុញ្ញាតឲ្យធ្វើដំណើរត្រង់ទៅមុខប្រាសាទអង្គរវត្តបាន”។
យោងតាមអ្នកនាំពាក្យលោកស្រី ចៅ ស៊ុនកិរិយា បានឲ្យដឹងថា អាជ្ញាធរអប្សរា ដែលគ្រប់គ្រងរមណីយដ្ឋានអង្គរ បានចាប់ផ្តើមអនុវត្តបម្រាមនៅដើមខែនេះ។
លោកស្រីបាននិយាយថា "បម្រាមនេះ...ត្រូវបានដាក់ឲ្យប្រើប្រហែលប្រាំ ឬប្រាំមួយឆ្នាំមកហើយ ប៉ុន្តែវាមិនត្រូវបានអនុវត្ត"។
"គោលបំណងនៃបម្រាមនេះគឺដើម្បីរៀបចំតំបន់នៅមុខអង្គរវត្ត ដោះស្រាយការកកស្ទះចរាចរណ៍ ធ្វើយ៉ាងណាយកចិត្តទុកដាក់សុវត្ថិភាពភ្ញៀវទេសចរ និងទប់ស្កាត់ការបំផ្លាញប្រាសាទ នៅពេលដែលយានយន្តជាច្រើនគ្រឿងបើកឆ្លងកាត់ និងចតក្នុងតំបន់នោះរាល់ថ្ងៃ"។
ស្ត្រីអ្នកនាំពាក្យរូបនេះនិយាយថា ចំណាត់ការនេះត្រូវបានទទួលយកយ៉ាងរាក់ទាក់ពីសំណាក់ភ្ញៀវទេសចរ មគ្គុទ្ទេសក៍ទេសចរ និងអ្នករត់រ៉ឺម៉កម៉ូតូទេសចរ។ លោកស្រី ចៅ ស៊ុនកិរិយា បាននិយាយថា "វាមិនប៉ះពាល់ដល់ចំនួនភ្ញៀវទេសចរដែលមកទស្សនាអង្គរវត្ត ទេ ហើយនឹងមិនប៉ះពាល់ឡើយ"។ លោកស្រីបាននិយាយបន្ថែមថា អ្នកនាំភ្ញៀវទេសចរ និងអ្នករត់រ៉ឺម៉កម៉ូតូទេសចរបានចូលរួមក្នុងការពិភាក្សាអំពីការកែប្រែនេះ ហើយ "សប្បាយចិត្តនឹងការរៀបចំដែលធ្វើឡើងដោយអាជ្ញាធរអប្សរា"។
លោក ឃុត ខេមរា ភ្នាក់ងារទេសចរម្នាក់នៅក្រុមហ៊ុន About Asia Services ក្នុងខេត្តសៀមរាប និយាយថា បម្រាមនេះគឺគ្រាន់តែជាការលំបាកតិចតួចដល់ភ្ញៀវមកទស្សនាអង្គរវត្ត ដែលនឹងត្រូវចុះនៅកន្លែងមួយចំនួន នៅខាងក្រៅប្រហែល១០០ម៉ែត្រពីផ្លូវដែលបិទ។
លោកបាននិយាយថា "មានពីរបីកន្លែងផ្សេងគ្នា ដែលភ្ញៀវទេសចរនឹងត្រូវចុះពីរថយន្ត ហើយពួកគេនឹងត្រូវចំណាយពេលដើរតែប្រហែលប្រាំនាទីប៉ុណ្ណោះពីកន្លែងចុះនីមួយៗទៅកាន់ប្រាសាទ"។
លោក ខេមរា បាននិយាយថា ស្ថានភាពពីមុនគឺច្របូកច្របល់និងគ្រោះថ្នាក់ ដោយរថយន្តបើកគេចចុះគេចឡើងកាត់ក្រុមអ្នកថ្មើរជើង។
លោកបាននិយាយថា "វាធ្វើឲ្យតំបន់នៅមុខអង្គរវត្តមានសណ្ដាប់ធ្នាប់ល្អថែមទៀត ហើយឥឡូវកាន់តែមានសុវត្ថិភាពសម្រាប់ភ្ញៀវឆ្លងកាត់ផ្លូវ"៕និត
គ.ជ.ប. សម្រេចមិនស្វែងរកការធានាលោក នី ចរិយា ឲ្យនៅក្រៅឃុំ
គណៈកម្មាធិការជាតិរៀបចំការបោះឆ្នោត (គ.ជ.ប.) បានសម្រេចកាលពីម្សិលមិញថា ខ្លួននឹងមិនព្យាយាមអន្តរាគមន៍ជួសមុខឲ្យលោក នី ចរិយា អគ្គលេខាធិការរងរបស់ខ្លួនដែលបានជាប់ពន្ធនាគារកាលពីថ្ងៃច័ន្ទ ពីបទសូកប៉ាន់ដែលជាប់ទាក់ទងនឹងការស៊ើបអង្កេតរបស់រដ្ឋាភិបាលលើរឿងអាស្រូវផ្លូវភេទពាក់ព័ន្ធលោក កឹម សុខា...
សាលាដំបូងរាជធានីកោះហៅលោក កឹម សុខា មកសាកសួរពាក់ព័ន្ធរឿងអាស្រូវផ្លូវភេទ
បន្ទាប់ពីការកោះហៅ ការសាកសួរ និងការចាប់ខ្លួនមនុស្សមួយចំនួនដែលទំនងជាមិនជាប់ពាក់ព័ន្ធនឹងរឿងអាស្រូវផ្លូវភេទរបស់លោក កឹម សុខា អនុប្រធានគណបក្សសង្គ្រោះជាតិបានប៉ុន្មានសប្តាហ៍រួចមក សាលាដំបូងរាជធានីភ្នំពេញ កាលពីម្សិលមិញបានចាត់វិធានការដោយផ្ទាល់ជាលើកដំបូងមកលើអនុប្រធានគណបក្សប្រឆាំងរូបនេះ ដោយកោះហៅឱ្យគាត់មកបង្ហាញខ្លួនជុំវិញបណ្តឹងបរិហារកេរ្តិ៍។
តំណាងរាស្ត្រគណបក្សសង្គ្រោះជាតិពីររូបផ្សេងទៀតក៏ត្រូវបានកោះហៅដែរក្នុងនាមជា "ជនសង្ស័យ"...
នាយករដ្ឋមន្ត្រីដៀមដាមបក្សប្រឆាំងស្តីពីការឆ្លើយតបគ្រោះរាំងស្ងួត
ដោយបន្តធ្វើអត្ថាធិប្បាយអំពីថា តើគណបក្សសង្គ្រោះជាតិគួរចូលរួមក្នុងការខិតខំប្រឹងប្រែងដើម្បីឆ្លើយតបចំពោះគ្រោះរាំងស្ងួតដែលកំពុងកើតឡើងដូចម្តេចនោះ កាលពីម្សិលមិញ លោកនាយករដ្ឋមន្ត្រី ហ៊ុន សែន បានព្រមានគូបដិបក្ខនយោបាយរបស់លោកកុំឱ្យធ្វើការសន្យាខ្យល់ឱ្យសោះ។
លោក ហ៊ុន សែន បានលើកឡើងនៅក្នុងសារបង្ហោះតាមទំព័រហ្វេសប៊ុករបស់លោកថា "ចំពោះអ្នកដែលនិយាយថា ស្រឡាញ់ជាតិ និងពលរដ្ឋគឺមានច្រើន រួមទាំងអ្នកដែលកំពុងសន្យាតាមសំឡេងខ្យល់មួយចំនួនផងដែរ"។
រដ្ឋាភិបាលយល់ព្រមលើអគារកម្ពស់១៣៣ជាន់
អ្នកនាំពាក្យក្រសួងរៀបចំដែនដីនិយាយកាលពីថ្ងៃច័ន្ទថា រដ្ឋាភិបាលបានផ្តល់ការយល់ព្រមចុងក្រោយសម្រាប់សាងសង់អគារភ្លោះកម្ពស់១៣៣ជាន់ដែលគិតជាទឹកប្រាក់អស់៣ពាន់លានដុល្លារដែលក្រុមហ៊ុនអភិវឌ្ឍន៍អះអាងថានឹងសាងសង់ចប់នៅឆ្នាំ២០១៨។
អ្នកនាំពាក្យក្រសួង លោក ជៀម សុផលមករា បានបញ្ជាក់ថាក្រុមហ៊ុនថៃប៊ុនរុ៉ង គ្រុប បានទទួលការយល់ព្រមលើគម្រោងរួចហើយ ដែលមានសណ្ឋាគារមួយ ការិយាល័យនិងអគារផ្ទះល្វែង ហើយថា ក្រុមហ៊ុនអភិវឌ្ឍន៍មានបំណងបញ្ចប់ការសាងសង់នៅឆ្នាំ២០១៨។
លោក សុផលមករាបាននិយាយថា "ខ្ញុំបានសួរមន្ត្រីនៅច្រកចេញចូលតែមួយនៅក្រសួង ហើយគេប្រាប់ខ្ញុំថា គម្រោងនេះត្រូវបានចុះហត្ថលេខាយល់ព្រមរួចហើយ ប៉ុន្តែខ្ញុំមិនដឹងថ្ងៃចុះហត្ថលេខាទេ"។
មណ្ឌលពាណិជ្ជកម្មភ្លោះក្រុមហ៊ុនថៃប៊ុនរ៉ុងនឹងសាងសង់នៅលើផ្ទៃដី៥ហិកតាទល់មុខកាស៊ីណូ ណាហ្គាវើល ហើយស្ថិតក្នុងបណ្តាអគារខ្ពស់បំផុតនៅលើពិភពលោក នៅពេលដែលសាងសង់រួច"។
ក្រុមហ៊ុនថៃប៊ុនរ៉ុងកាន់កាប់សណ្ឋាគារ អ៊ិនធឺខុនធីណែនថលក្នុងក្រុងភ្នំពេញ ហើយជាកម្មសិទ្ធិរបស់លោក ថេង ប៊ុនម៉ា ជាសេដ្ឋីលាក់មុខដែលមានប្រវត្តិដកកាំភ្លើងបាញ់ពេលមានជម្លោះ ដែលតាមការចោទប្រកាន់គឺមានទ្រព្យធនបានមកពីជួញដូរគ្រឿងញៀន។
គម្រោងនេះមានកើតឡើងក្នុងពេលដែលទីផ្សារអចលនទ្រព្យនៅក្រុងភ្នំពេញកំពុងតែបង្ហាញនូវសញ្ញាហូរហៀរ។
ក្នុងរបាយការណ៍នាពេលថ្មីៗបំផុតនេះដែលគ្របដណ្តប់លើឆមាសទីពីរនៃឆ្នាំ២០១៥ ទីប្រឹក្សាអចលនទ្រព្យ ណៃ ហ្វ្រែង និយាយថា គម្រោងការិយាល័យ លក់រាយនិងអគារផ្ទះល្វែងបានកើនឡើងយ៉ាងគំហុក ដោយមានការផ្តល់ខុនដូដែលនឹងកើនឡើង៦៤១ភាគរយនៅឆ្នាំ២០១៨។
របាយការណ៍ដែលមិនបញ្ចូលមណ្ឌលថៃប៊ុនរ៉ុង និយាយថា វិស័យខុនដូរំពឹងថានឹងទទួលរងសម្ពាធធ្លាក់ចុះក្រោមខ្លាំង ដោយសារតែការប្រកួតប្រជែងហួសហេតុពីឆ្នាំ២០១៧តទៅ ហើយព្យាករណ៍ថា ការិយាយល័យនៅទំនេរនឹងឡើងដល់៣៧ភាគរយនៅឆ្នាំ២០១៨។
អគារខ្ពស់បំផុតក្នុងប្រទេស ពោលគឺអគារវឌ្ឍនៈ កាពីថល កម្ពស់៣៩ជាន់អាចឆ្លុះបញ្ចាំងឲ្យឃើញនូវវាសនារបស់អគារភ្លោះនេះ។
អ្នកចាត់ការជួលជាន់ខ្ពស់របស់ក្រុមហ៊ុនបានប្រាប់កាសែត ឌឹ ហ្កាដៀនកាលពីខែកក្កដា ថា សាងសង់ចប់ក្នុងឆ្នាំ២០១៤ អគារនេះទទួលបានអត្រាចូលនៅប្រហែល៣០ភាគរយនៅពាក់កណ្តាលឆ្នាំ២០១៥។
លោក សឹង ប៊ុណ្ណា ប្រធានក្រុមហ៊ុនអចលនទ្រព្យប៊ុណ្ណា រៀលធី គ្រុប កាលពីមុនស្មានថា គម្រោងអគារភ្លោះនេះនឹងប្រើរយៈពេលយ៉ាងហោចណាស់បីទៅបួនឆ្នាំ ដើម្បីសាងសង់រួច ប៉ុន្តែបានបដិសេធមិនស្មានកាលពីថ្ងៃច័ន្ទ ដោយសារមិនបានឃើញគម្រោងសាងសង់ពិស្តារ៕
អ្នកជំនាញសម្រេចថាការស្លាប់មន្ត្រីព្រំដែនជាការធ្វើអត្តឃាត
សមត្ថកិច្ចបានសម្រេចថា ការបាញ់ស្លាប់គួរឲ្យសង្ស័យនៃមន្ត្រីនគរបាលព្រំដែនម្នាក់នៅខេត្តកោះកុងកាលពីសប្តាហ៍មុន គឺជាការធ្វើអត្តឃាត បន្ទាប់ពីមានការស៊ើបអង្កេតដោយអ្នកជំនាញកោសល្យវិច័យ។
លោក ហិន គឹមហុង អនុប្រធានប៉ុស្តិ៍ច្រកអន្តរជាតិចាំយាម ខេត្តកោះកុង ជាប់ព្រំដែនថៃ ត្រូវបានគេប្រទះឃើញស្លាប់នៅថ្ងៃទី២៦ខែមេសាមានកាំភ្លើងខ្លីមួយដើមលើទ្រូងរបស់គាត់ និងស្នាមគ្រាប់កាំភ្លើងធ្លុះក្បាលរបស់គាត់។
បើទោះជាការធ្វើអត្តឃាតត្រូវបានគេចាត់ទុកថា ជាហេតុផលមួយពីដើមដំបូងក៏ដោយ ក៏នគរបាលកំពុងពិចារណាថា វាអាច ជាឃាតកម្មដែរ។
កាលពីម្សិលមិញ លោក ឡាយ ទីរ៉ូ នាយរងការិយាល័យព្រហ្មទណ្ឌកម្រិតធ្ងន់ខេត្តកោះកុង បាននិយាយថា ក្រសួងមហាផ្ទៃបានបញ្ជូនក្រុមមន្ត្រីកោសល្យវិច័យមកដើម្បីស៊ើបអង្កេតកន្លែងកើតហេតុ ហើយថាពួកគេបានសម្រេចថាការស្លាប់នេះជាការធ្វើអត្តឃាត។
លោកបាននិយាយថា "ហេតុការណ៍នេះត្រូវបានគេសន្និដ្ឋានថា ដៃជនរងគ្រោះនៅលើទ្រូងរបស់គាត់ជាមួយនឹងកាំភ្លើង ពីព្រោះបន្ទាប់ពីគាត់បានធ្វើអត្តឃាត ខ្លួនរបស់គាត់បានធ្វើចលនាចុងក្រោយ។ ដៃស្តាំរបស់គាត់មានរំសេវ ពីព្រោះនៅពេលគាត់បាញ់សម្លាប់ខ្លួនឯង គាត់បានប្រើដៃស្តាំរបស់គាត់"។
លោក អ៊ុក ណារិន អនុប្រធាននគរបាលបច្ចេកទេស និងវិទ្យាសាស្រ្តក្រសួងមហាផ្ទៃ...
ព័ត៌មានថ្មីៗ
© 2021, ដេលី. All rights reserved.