ពលរដ្ឋថៃជិត ៣០០០នាក់ ចូលទស្សនាប្រាសាទតាក្របី និងភ្នំ៣៥០ មុនការបិទជាបណ្តោះអាសន្ន 

អាជ្ញាធរថៃបានអនុញ្ញាតឱ្យពលរដ្ឋជិត ៣០០០នាក់ ចូលទស្សនាប្រាសាទតាក្របី និងតំបន់ភ្នំ៣៥០ កាលពីថ្ងៃទី១៣ ខែមិថុនា ឆ្នាំ២០២៦ មុនពេលប្រកាសបិទទីតាំងទាំងពីរជាបណ្តោះអាសន្ន ដើម្បីវាយតម្លៃស្ថានភាពសន្តិសុខតាមព្រំដែន។ 

យោងតាមប្រព័ន្ធផ្សព្វផ្សាយក្នុងស្រុករបស់ថៃ ភ្ញៀវទេសចរចំនួន ២,៩២៨នាក់ បានចុះឈ្មោះចូលទស្សនាតំបន់ទាំងពីរនៅថ្ងៃសៅរ៍។ នេះជាលើកទីពីរហើយដែលអាជ្ញាធរថៃអនុញ្ញាតឱ្យពលរដ្ឋរបស់ខ្លួនចូលទៅកាន់តំបន់នោះ បន្ទាប់ពីការបើកឱ្យចូលទស្សនាកាលពីថ្ងៃទី៦ និងទី៧ ខែមិថុនា។ 

សារព័ត៌មានថៃបានរាយការណ៍ថា ភ្ញៀវទេសចរមួយចំនួនបានយកកម្រងផ្កាទៅដាក់ឧទ្ទិសដល់ទាហានដែលបានបាត់បង់ជីវិតនៅតាមខ្សែបន្ទាត់ព្រំដែន។ 

អាជ្ញាធរថៃបានប្រកាសថា នឹងបិទការចូលទស្សនាប្រាសាទតាក្របី និងភ្នំ៣៥០ ចាប់ពីថ្ងៃទី១៤ ខែមិថុនា តទៅ ដើម្បីពិនិត្យ និងវាយតម្លៃស្ថានភាពនៅតំបន់ព្រំដែន។ អាជ្ញាធរបានបញ្ជាក់ថា នឹងជូនដំណឹងជាថ្មីនៅពេលដែលវាយតម្លៃថា ទីតាំងទាំងនោះមានសុវត្ថិភាពគ្រប់គ្រាន់សម្រាប់សាធារណជន។ 

កាលពីសប្តាហ៍មុន អាជ្ញាធរនៅខេត្តសុរិន្ទរបស់ថៃ ក៏បានបើកឱ្យភ្ញៀវទេសចរចូលទស្សនាតំបន់ទាំងពីរនេះផងដែរ។ ភាគីថៃបានអះអាងថា មានពលរដ្ឋជាង ១,០០០នាក់ បានទៅទស្សនាក្រោយពីកងទ័ពថៃគ្រប់គ្រងតំបន់នោះ បន្ទាប់ពីការប៉ះទង្គិចប្រដាប់អាវុធនៅតាមព្រំដែន។ 

ជុំវិញសកម្មភាពនេះ ក្រសួងវប្បធម៌ និងវិចិត្រសិល្បៈកម្ពុជា បានចេញសេចក្តីថ្លែងការណ៍ថ្កោលទោសការរៀបចំសកម្មភាពទេសចរណ៍របស់អាជ្ញាធរថៃនៅលើទីតាំងដែលកម្ពុជាចាត់ទុកថា ស្ថិតក្នុងដែនអធិបតេយ្យរបស់ខ្លួន។ 

ក្រសួងបានលើកឡើងថា ការរៀបចំសកម្មភាពសាធារណៈ ការទទួលភ្ញៀវទេសចរ និងការប្រមូលថ្លៃចូលទស្សនានៅប្រាសាទតាក្របី គឺជាការអនុវត្តអំណាចដោយខុសច្បាប់លើទឹកដីកម្ពុជា និងជាការរំលោភធ្ងន់ធ្ងរលើអធិបតេយ្យភាព និងបូរណភាពទឹកដីរបស់កម្ពុជា។ 

ក្រសួងវប្បធម៌ និងវិចិត្រសិល្បៈ ក៏បានអំពាវនាវឱ្យរដ្ឋាភិបាលថៃបញ្ឈប់ជាបន្ទាន់នូវសកម្មភាពទាំងអស់ដែលពាក់ព័ន្ធនឹងការរៀបចំទេសចរណ៍នៅតំបន់នោះ រួមទាំងការលក់សំបុត្រចូលទស្សនា និងសកម្មភាពផ្សេងៗ ដែលអាចបង្កផលប៉ះពាល់ដល់ទីតាំងបេតិកភណ្ឌវប្បធម៌ដែលកម្ពុជាអះអាងថាស្ថិតក្នុងដែនដីរបស់ខ្លួន។ 

បញ្ហានេះកើតឡើងចំពេលដែលភាពតានតឹងជុំវិញតំបន់ព្រំដែនរវាងកម្ពុជា និងថៃ នៅតែបន្តជាប្រធានបទរសើបសម្រាប់ភាគីទាំងពីរ។ 

© 2026, ឌឹ ខេមបូឌា ដេលី. All rights reserved.