TAG
សួន សេរីរដ្ឋា
និស្សិតទទូចឲ្យចៀសវាងអំពើហិង្សាអំឡុងពេលធ្វើបាតុកម្ម
និស្សិតនិងអ្នកគាំទ្រគណបក្សប្រឆាំងជាង២០០នាក់បានដង្ហែក្បួនជុំវិញវត្តភ្នំក្នុងទីក្រុងភ្នំពេញកាលពីម្សិលមិញ និងមានកាន់ផ្កានៅក្នុងដៃផង ដោយទទូចឲ្យគ្រប់ភាគីចៀសវាងអំពើហិង្សា អំឡុងការធ្វើបាតុកម្មនៅថ្ងៃសៅរ៍នេះ ប្រឆាំងនឹងលទ្ធផលនៃការបោះឆ្នោតជាតិដ៏ចម្រូងចម្រាសកាលពីខែមុន និងទទូចឲ្យលើកលែងការចោទប្រកាន់ពីបទញុះញង់នាពេលថ្មីៗនេះ។
ការដង្ហែក្បួនកាលពីព្រឹកថ្ងៃម្សិលមិញដែលរៀបចំឡើងដោយក្រុមមិត្តភក្តិតាមបណ្ដាញសង្គមហ្វេសប៊ុកធ្វើឡើងចំពេលគណបក្សសង្គ្រោះជាតិ ជាគណបក្សប្រឆាំងត្រៀមធ្វើមហាបាតុកម្មនៅថ្ងៃទី៧ខែកញ្ញានេះ គឺមួយថ្ងៃមុន គ.ជ.ប. គ្រោងប្រកាសលទ្ធផលផ្លូវការ ដែលសឹងតែបង្ហាញយ៉ាងច្បាស់ថា គណបក្សប្រជាជនកម្ពុជាដែលកំពុងកាន់អំណាចឈ្នះការបោះឆ្នោតនេះ។
គណបក្សប្រឆាំងបានឲ្យដឹងថា ខ្លួននឹងធ្វើមហាបាតុកម្ម ប្រសិនបើរដ្ឋាភិបាលមិនព្រមបង្កើតគណៈកម្មាធិការស៊ើបអង្កេតឯករាជ្យមួយដើម្បីស៊ើបអង្កេតលទ្ធផលនៃការបោះឆ្នោតនេះដែលគណបក្សទាំងពីរសុទ្ធតែបានប្រកាសឈ្នះរៀងៗខ្លួន ប៉ុន្តែមានសេចក្តីរាយការណ៍អំពីភាពមិនប្រក្រតីច្រើន។
រដ្ឋាភិបាលបានដាក់បញ្ចូនកងទ័ពរាប់រយនាក់មករាជធានីភ្នំពេញ ហើយរៀបចំការហ្វឹកហាត់សមជាលក្ខណៈពិសេសសម្រាប់កម្លាំងសន្តិសុខទាំងនេះមុនការតវ៉ានេះ ហើយបានព្រមានគណបក្សសង្គ្រោះជាតិថា នឹងទទួលខុសត្រូវចំពោះអំពើហិង្សាជាយថាហេតុណាមួយ។
លោក ហេង សំណាង ជាអ្នករៀបចំម្នាក់នៅក្នុងអ្នករៀបចំការដង្ហែក្បួនកាលពីម្សិលមិញនេះរំពឹងថា បាតុកម្មនេះនឹងធ្វើឡើងដោយសន្តិវិធី ប៉ុន្តែបារម្ភថា រដ្ឋាភិបាលនឹងបង្កប់មនុស្សនៅក្នុងក្រុមបាតុករដើម្បីបង្កបញ្ហា។ លោកបាននិយាយដល់ការធ្វើបាតុកម្មនាពេលខាងមុខនេះថា...
ក្តីបារម្ភអំពីរដ្ឋប្រហារជាការបំផ្លើសដែលមានបំណងបង្កការភ័យខ្លាច
រយៈពេលជាងមួយសប្តាហ៍បន្ទាប់ពីប្រជាពលរដ្ឋកម្ពុជា បាននាំគ្នាទៅបោះឆ្នោតកាលពីថ្ងៃទី២៨ ខែកក្កដា គ្រាប់បែកមួយបានផ្ទុះនៅខាងក្រៅសាលាដំបូងរាជធានីភ្នំេពញនៅវេលាទៀបភ្លឺនាថ្ងៃមួយ ដោយបំផ្លាញបង្អួចធនាគារមួយនៅក្បែរនោះ ប៉ុន្តែ មិនបានបណ្តាលឲ្យនរណាម្នាក់រង់របួសទេ។
នៅថ្ងៃបន្ទាប់ គឺនៅថ្ងៃទី៨ ខែសីហា គ្រាប់បែក M381 ចំនួនពីរគ្រាប់ត្រូវបានប្រទះឃើញនៅមាត់បង្អួចនៃផ្ទះមួយក្នុងខណ្ឌទួលគោករាជធានីភ្នំពេញ។ បន្ទាប់មកនៅថ្ងៃទី១៤ ខែសីហា គ្រាប់បែកមួយកែច្នៃពីម្សៅតេអិនតេ បានផ្ទុះនៅខាងក្រៅទីស្នាក់ការរបស់គណបក្សប្រជាជនកម្ពុជា កំពុងកាន់អំណាចក្នុងខេត្តកំពង់ស្ពឺ។ ប៉ុន្តែ ដូចលើកមុនអ៊ីចឹងដែរ គឺហេតុការណ៍នេះមិនបង្កគ្រោះថ្នាក់ធ្ងន់ទេ ដោយគ្រាន់តែធ្វើឲ្យជញ្ជាំងទីស្នាក់ការគណបក្សនេះរងការខូចខាតបន្តិចបន្តួចប៉ុណ្ណោះ។
សរុបមក ហេតុការណ៍ទាំងបីនេះគ្មាននរណាម្នាក់រងរបួសទេ ហើយពេលវេលានៃការផ្ទុះទាំងពីរលើកសុទ្ធតែបានកើតឡើងនៅពេលយប់ ដែលហាក់ដូចជាបង្ហាញថា ករណីនេះគ្មានគោលដៅវាយប្រហារច្បាស់លាស់ទេ។ប៉ុន្តែនៅសប្តាហ៍នេះក្រសួងមហាផ្ទៃបានប្រើប្រាស់ហេតុការណ៍ទាំងនេះដើម្បីពន្យល់ស្ថានទូតជាង៤០ ព្រមទាំងអង្គការក្រៅរដ្ឋាភិបាលមួយចំនួនផងដែរថា គណបក្សសង្គ្រោះអាចនឹងអនុវត្តផែនការផ្តួលរំលំរដ្ឋាភិបាល ប្រសិនបើគណបក្សសង្គ្រោះជាតិបន្តធ្វើមហាបាតុកម្មទូទាំងប្រទេសនៅថ្ងៃទី៧ ខែកញ្ញា។
កាលពីថ្ងៃពុធ បញ្ជាការដ្ឋានអចិន្ត្រៃយ៍ទទួលបន្ទុកសន្តិសុខពេលបោះឆ្នោតនៃក្រសួងមហាផ្ទៃបានផ្ញើកញ្ចប់ឯកសារឌីវីឌីដែលរួមមានទាំងសុន្ទរកថារបស់លោក សម រង្ស៊ី និងលោក កឹម សុខា មេដឹកនាំគណបក្សប្រឆាំងនៅមុនការបោះឆ្នោតផង ដែលអំពាវនាវឲ្យប្រជាពលរដ្ឋធ្វើបាតុកម្មប្រសិនបើគណបក្សសង្គ្រោះជាតិចាញ់ឆ្នោត។ ក្រសួងមហាផ្ទៃបានកត់ត្រាករណីផ្ទុះទាំងពីរ និងករណីគ្រាប់បែកដែលត្រូវបានរកឃើញ និងដែលរួមទាំងលិខិតចំហមួយដែលលោក សួន សេរីរដ្ឋា មេដឹកនាំចលនាអំណាចពលរដ្ឋខ្មែរផ្ញើទៅយោធា និងកងកម្លាំងនគរបាល ជំរុញឲ្យពួកគេបែរកាណុងកាំភ្លើងរបស់ខ្លួនដាក់លោកនាយករដ្ឋមន្ត្រី ហ៊ុន សែន ផងដែរ។
ជាការពិតណាស់ ការចងចាំព្រឹត្តិការណ៍ក្រោយការបោះឆ្នោតក្នុងឆ្នាំ១៩៩៨នៅថ្មីៗនៅឡើយនៅក្នុងចិត្តរបស់ប្រជាពលរដ្ឋជាច្រើន។ នៅក្រោយការបោះឆ្នោតតែងតែមានការតវ៉ាហិង្សាពីសំណាក់អ្នកគាំទ្រគណបក្សប្រឆាំង ហើយលោកនាយករដ្ឋមន្ត្រី ហ៊ុន សែន បានអះអាងកាលពីខែកញ្ញាឆ្នាំនោះថា លោកជាគោលដៅនៃការបំផ្ទុះគ្រាប់បែកបង្កៃតាមផ្លូវក្នុងក្រុងសៀមរាប។ ខណៈពេលដែលលោកនាយករដ្ឋមន្ត្រី និងតំណាងរាស្ត្រថ្មីៗកំពុងធ្វើដំណើរទៅចូលរួមបើកសម័យប្រជុំសភា គ្រាប់រ៉ុកកែត B40មួយគ្រាប់បានផ្ទុះនៅក្បែរក្បួនរថយន្តរបស់ពួកលោក ធ្វើឲ្យខូចចាប់ផ្តើមសម័យប្រជុំសភា។
បណ្តាបុគ្គលិកអង្គការសិទ្ធិមនុស្ស និងអ្នកវិភាគនិយាយថា ការព្រមានរបស់គណបក្សប្រឆាំងនៅពេលថ្មីៗនេះអំពីរដ្ឋប្រហារជាសញ្ញាមួយបង្ហាញថា រដ្ឋាភិបាលមានការសង្ស័យកាន់តែខ្លាំងឡើងនិងបង្ហាញពីការគំរាមយ៉ាងច្បាស់ដើម្បីបំភិតបំភ័យប្រជាពលរដ្ឋកុំឲ្យចូលរួមបាតុកម្ម។
លោក នីកូឡាស អាហ្គោស្ទីនី (Nicolas Agostini) ដែលធ្លាប់បម្រើការងារជាទីប្រឹក្សាច្បាប់ផ្នែកសិទ្ធិដីធ្លីនៅអង្គការអាដហុក និងដែលបច្ចុប្បន្នជាប្រតិភូមួយរូបប្រចាំនៅអង្គការសហប្រជាតិ តំណាងឲ្យអង្គការសហព័ន្ធអន្តរជាតិដើម្បីសិទ្ធិមនុស្ស (International Federation for Human Rights) នៅក្នុងទីក្រុងហ្សឺណែវ បានមានប្រសាសន៍ថា “ ទោះបីជាឥរិយាបថមិនសមទំនងប្រហែលជាដើរតួនាទីយ៉ាងសំខាន់នៅក្នុងនយោបាយក្រោយការបោះឆ្នោតក៏ដោយ ក៏កម្រិតនៃការធ្វើសេចក្តីសម្រេចពាក់ព័ន្ធនឹងការចោទប្រកាន់ទាំងនេះចំពោះគណបក្សសង្គ្រោះជាតិបង្ហាញថា វាជាផ្នែកមួយនៃយុទ្ធសាស្ត្ររបស់គណបក្សប្រជាជនកម្ពុជា ដែលត្រូវបានសម្រេចនៅថ្នាក់កំពូលដើម្បីបង្កការភ័យខ្លាចក្នុងចំណោមប្រជាពលរដ្ឋ”។
លោកបានលើកឡើងនៅក្នុងអ៊ីម៉េលមួយថា “ មូលដ្ឋានអំណាចរបស់គណបក្សប្រជាជនកម្ពុជា គឺនៅតាមជនបទ ហើយមនុស្សចាស់ជំនាន់មុនដែលទទួលបានព័ត៌មានតិចតួច ទំនងជាភ័យខ្លាចចំពោះអស្ថិរភាពជាងអ្នកគាំទ្រគណបក្សសង្គ្រោះជាតិនៅតំបន់ក្រុងដែលមានវ័យក្មេងជាងនិងមានការអប់រំច្រើនជាង”។ លោកបានពន្យល់ថា សមាជិកទាំងនេះនៃសង្គមទំនងជាចងចាំច្រើនជាងនូវហេតុការណ៍នានាដូចជា ការប្រយុទ្ធគ្នាក្នុងឆ្នាំ១៩៩៧ជាដើម ហេតុដូច្នេះពួកគេទំនងជាច្រានចោលយុទ្ធសាស្ត្រនយោបាយដែលផ្អែកលើអំពើហិង្សាច្រើនជាង”។
លោក ដេវីដ ឆាណ្ឌល័រ ប្រវតិ្តវិទូអាមេរិកដែលបានសរសេរឯកសារស្រាវជ្រាវជាច្រើនស្តីពីប្រទេសកម្ពុជា សម័យទំនើបបានមានប្រសាសន៍ថា ឯកសារដែលរដ្ឋាភិបាលផ្ញើទៅស្ថានទូត និងអង្គការក្រៅរដ្ឋាភិបាលនានាជាសញ្ញាមួយបង្ហាញថា គណបក្សកំពុងកាន់អំណាចភ័យខ្លាចចំពោះអ្នកតវ៉ាតាមដងផ្លូវដែលសម្តែងការមិនពេញចិត្តរបស់ខ្លួនចំពោះលទ្ធផលនៃការបោះឆ្នោតនៅក្នុងប្រទេសកម្ពុជា។ លោកបានមានប្រសាសន៍ថា “ ពួកគេមានអារម្មណ៍ច្របូកច្របល់ជាខ្លាំង។ ពួកគេមិនចង់ឲ្យមានបាតុកម្មនៅខែកញ្ញាទេ ដូច្នេះពួកគេកំពុងតែព្យាយាមបំភិតបំភ័យប្រជាពលរដ្ឋមិនឲ្យចូលរួមការធ្វើបាតុកម្មនៅតាមផ្លូវ”។
តែទោះជាយ៉ាងណា ខណៈពេលហេតុការណ៍ដូចក្នុងឆ្នាំ១៩៩៨ ដែលនៅពេលនោះកងកម្លាំងសន្តិសុខបានបំបែកក្រុមបាតុករគណបក្សប្រឆាំងដោយហិង្សា ក្រោយការបោះឆ្នោតនៅឆ្នាំនោះទំនងជាមិនកើតឡើងនោះ អំពើហិង្សាអាចនឹងកើតមានឡើង ប្រសិនបើមហាបាតុកម្មកើតឡើង។
លោក ដេវីដ ឆាណ្ឌល័រ មានប្រសាសន៍ ថា “ វាពិតជាអាចទៅរួច ដែលអ្នកគាំទ្រគណបក្សសង្គ្រោះជាតិមួយចំនួនដែលមានការខកចិត្តអាចនឹងបំផ្ទុះគ្រាប់បែក ឬធ្វើអ្វីម្យ៉ាងពីព្រោះពួកគេមានកំហឹងចំពោះលទ្ធផលនៃការបោះឆ្នោត”។ លោកបានមានប្រសាសន៍ទៀតថា ទោះជាយ៉ាងណា ការប៉ុនប៉ងផ្តួលរំលំរដ្ឋាភិបាលទំនងជាមិនកើតមានឡើងទេ ដោយសារតែគណបក្សប្រឆាំងខ្វះអាវុធ។
លោកបានមានប្រសាសន៍ថា គណបក្សសង្គ្រោះជាតិពិតជាបានក្រោកឈរឡើងដើម្បីទទួលផលប្រយោជន៍តិចតួចពីការធ្វើបាតុកម្ម ហើយគណបក្សប្រឆាំងនឹងព្យាយាមបង្កើនប្រជាប្រិយភាពរបស់ខ្លួននៅក្នុងរដ្ឋសភាជាតិ។ លោកបានមានប្រសាសន៍ទៀតថា “ វាជាដំណោះស្រាយសមហេតុផលតែមួយគត់។ពួកគេមិនអាចរត់ចូលទៅក្នុងព្រៃទាំងងងឹតងងុលបានទេ ពីព្រោះពួកគេត្រូវទទួលការផ្តន្ទទោសដោយសារតែរឿងនោះ។ជំហរល្អបំផុតគឺត្រូវចូលរដ្ឋសភាដើម្បីធ្វើទឡ្ហីករណ៍ និងលើកឡើងពីបញ្ហានានាដូចជា អំពើពុករលួយជាដើម។ លោក ហ៊ុន សែន ប្រាកដជាមិនដឹងត្រូវធ្វើយ៉ាងណាឡើយចំពោះរឿងនោះ។ ពួកគេនឹងមានជ័យជម្នះកាន់តែច្រើន”។
មន្ត្រីការទូតជាន់ខ្ពស់មួយរូបនៅកម្ពុជាបានមានប្រសាសន៍ក្នុងលក្ខខណ្ឌអនាមិកថាឯកសាររបស់រដ្ឋាភិបាលដែលផ្ញើទៅឲ្យស្ថានទូតនិងបណ្តាអង្គការក្រៅរដ្ឋាភិបាល ក៏អាចជាកល្បិចយុទ្ធសាស្ត្ររបស់គណបក្សប្រជាជនកម្ពុជាដែរ ដើម្បីជំរុញឲ្យស្ថានទូតបរទេសនានាបញ្ចុះបញ្ចូលគណបក្សប្រឆាំងថា មហាបាតុកម្មមិនមែនជាវិធីល្អបំផុតសម្រាប់ដោះស្រាយស្ថានភាពជាប់គាំងផ្នែកនយោបាយនាពេលបច្ចុប្បន្នទេ។ជាយូរមកហើយដែលគណបក្សប្រជាជនកម្ពុជា បានប្រើប្រាស់ក្រុម “ ភេរវករ” និងអំពើហិង្សា ដើម្បីបង្ខូចកេរ្តិ៍ឈ្មោះគណបក្សប្រឆាំង។ កាលពីខែឧសភា នគរបាលជាតិបានបង្ហោះរូបលោក សុន ឆ័យ តំណាងរាស្ត្រគណបក្សប្រឆាំងអមជាមួយលោក សួន សេរីរដ្ឋា ដែលបាននិយាយម្តងហើយម្តងទៀតអំពីការផ្តួលរំលំរដ្ឋាភិបាល។
លោក ដេវីដ ឆាណ្ឌល័រ មានប្រសាសន៍ថា យុទ្ធសាស្ត្របែបនេះ គឺចាស់គំរឹលណាស់នៅក្នុងប្រទេសកម្ពុជា និងរបបមុនៗក្នុងប្រទេសនេះធ្លាប់បានប្រើប្រាស់។
ប៉ុន្តែ យុទ្ធសាស្ត្របែបនេះទំនងជាមិនបានផលឡើយលើប្រជាពលរដ្ឋវ័យក្មេងដែលមានការអប់រំនិងមានការយល់ដឹងច្រើនជាង។ លោក ដេវីដ ឆាណ្ឌល័រ បានមានប្រសាសន៍ថា “ ខ្ញុំគិតថា គេស្គាល់ល្បិចចាស់គំរឹលរបស់គណបក្សប្រជាជនកម្ពុជាហើយ ហើយពេលនេះពួកគេត្រូវតែប្តូរវាចេញ”។
លោក យ៉ុង គឹមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍និងសន្តិភាពជាអង្គការក្នុងស្រុកមួយតស៊ូមតិដើម្បីលទ្ធិប្រជាធិបតេយ្យ និងសិទ្ធិមនុស្ស បានមានប្រសាសន៍ថា អំពើហិង្សាអាចនឹងកើតមានតិចតួច ប្រសិនបើបាតុកម្មកើតឡើង។
លោកបានមានប្រសាសន៍ថា “ យោងតាមអ្វីដែលគណបក្សប្រឆាំងប្រកាស ពួកគេនិយាយថា ពួកគេនឹងគ្រាន់តែធ្វើបាតុកម្មអហិង្សាប៉ុណ្ណោះ។ ពួកគេគ្រាន់តែចង់បានដំណោះស្រាយ។ ពួកគេមិនប្រឆាំងនឹងរដ្ឋាភិបាលទេ ហើយក៏មិនចង់ផ្តួលរំលំរដ្ឋាភិបាលដែរ”។
លោកបានមានប្រសាសន៍ថា គណបក្សសង្គ្រោះជាតិមានសិទ្ធិគ្រប់យ៉ាងក្នុងការធ្វើបាតុកម្ម ប្រសិនបើនោះជាអ្វីដែលអ្នកគាំទ្រគណបក្សនេះយល់ថាចាំបាច់និងគ្មានការពាក់ព័ន្ធគ្នារវាងចលនាអំណាចពលរដ្ឋខ្មែរនិងការផ្ទុះគ្រាប់បែកក្រោយការបោះឆ្នោត។
លោកបានមានប្រសាសន៍ថា “ ខ្ញុំគិតថា នៅក្នុងប្រទេសកម្ពុជា គណបក្សនយោបាយមិនចង់មានការពាក់ព័ន្ធជាមួយលោក សួន សេរីរដ្ឋា ទេ ហើយខ្ញុំបានឮថា គណបក្សសង្គ្រោះជាតិបានប្រកាសថា ខ្លួនមិនពាក់ព័ន្ធនឹងគាត់ឡើយ។ ខ្ញុំគិតថា វាមិនមែនជាការពិតទេ។ ខ្ញុំមិនដឹងថា ពួកគេ មានព័ត៌មានអ្វីទេ ប៉ុន្តែ ពួកគេគួរតែឃើញការពិត”។
ប៉ុន្តែ រដ្ឋាភិបាលដឹងច្បាស់ក្នុងចិត្តណាស់ថា បាតុកម្មទូទាំងប្រទេសអាចនឹងបង្កគ្រោះមហន្តរាយ។កាលពីថ្ងៃសុក្រ ទោះបីជាមន្ត្រីនៅក្រសួងមហាផ្ទៃបានបដិសេធមិនធ្វើអត្ថាធិប្បាយ ឬក៏មិនអាចទាក់បានក៏ដោយ ក៏លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីបានមានប្រសាសន៍ថា វោហារសាស្ត្រនៃពាក្យថា “ ដូរ” ចេញពីគណបក្សសង្គ្រោះជាតិជាមូលហេតុដែលនាំមានការព្រួយបារម្ភ។ លោកបានមានប្រសាសន៍សំដៅដល់កុបកម្មមួយដែលបានកើតឡើងនៅ ខាងក្រៅការិយាល័យបោះឆ្នោតមួយក្នុងថ្ងៃបោះឆ្នោត បន្ទាប់ពីអ្នកបោះឆ្នោតយល់ថា សិទ្ធិបោះឆ្នោតរបស់ខ្លួនត្រូវបានដកហូត ហើយបន្ទាប់មកបានដុតរថយន្តកងរាជអាវុធហត្ថចំនួនពីរគ្រឿងថា “ គណបក្សសង្គ្រោះជាតិបានដុតរថយន្តពីរគ្រឿង និងមានករណីមួយចំនួនកើតឡើង។ ខ្ញុំគិតថា វោហារសាស្ត្ររបស់មេដឹកនាំទាំងនេះគ្រាន់តែញុះញង់ប្រជាពលរដ្ឋប៉ុណ្ណោះ ហើយល្បែងដែលពួកគេលេង គឺជាភេរវកម្មនយោបាយ”។
លោក ផៃ ស៊ីផាន ក៏បានគូសបញ្ជាក់ដែរពីហានិភ័យទាក់ទិននឹងវោហារសាស្ត្ររបស់គណបក្សសង្គ្រោះជាតិប្រឆាំងវៀតណាម ដែលត្រូវបានប្រើប្រាស់យ៉ាងខ្លាំងក្លានៅមុនការបោះឆ្នោត។ ទោះបីជាគណបក្សប្រឆាំងបានគូសបញ្ជាក់ម្តងហើយម្តងទៀតថា ខ្លួនមិនជំរុញឲ្យមានការស្អប់ខ្ពើមជនបរទេស និងគ្មានទស្សនប្រឆាំងជនជាតិវៀតណាមក៏ដោយ ក៏លោក ផៃ ស៊ីផាន បានមានប្រសាសន៍ថា មហាបាតុកម្មអាចឈានដល់ការសម្លាប់ប្រជាជនវៀតណាម នៅតាមផ្លូវ។
លោកបានចោទសួរថា “ការប្រកាន់ពូជសាសន៍ប្រឆាំងជនជាតិវៀតណាម អាចនឹងធ្វើឲ្យមានការបណ្តេញជាតិពន្ធចេញពីប្រទេស។ រឿងបែបនេះអាចនឹងកើតមានឡើង យើងធ្លាប់មានមេរៀនពីរឿងនោះនៅក្នុងទសវត្សរ៍ឆ្នាំ១៩៧០។ជនជាតិវៀតណាមរាប់សែននាក់ត្រូវបានសម្លាប់ ហើយក្រោយមកខ្មែរក្រហមបានចូលមកសម្លាប់ជនជាតិវៀតណាម។ តើនឹងមានអ្វីកើតឡើង ប្រសិនបើរឿងនោះកើតឡើងនៅក្នុងប្រទេស?”
លោក នីកូឡា អាហ្គោស្ទីនី មកពីអង្គការសហព័ន្ធអន្តរជាតិដើម្បីសិទ្ធិមនុស្ស បានមានប្រសាសន៍ថា ប្រសិនបើអំពើហិង្សាកើតមានឡើង វាអាចជាកំហុសរបស់ភាគីសងខាង។
លោកបានមានប្រសាសន៍ថា “ វាពិតជាគួរឲ្យព្រួយបារម្ភណាស់ ពីព្រោះការប្រើអំពើហិង្សាជាជម្រើសចុងក្រោយ ឬការគំរាមប្រើអំពើហិង្សាទំនងជានៅតែជាយុទ្ធសាស្ត្រនយោបាយស្របច្បាប់របស់គណបក្សប្រជាជនកម្ពុជា។ ប៉ុន្តែ វាក៏គួរឲ្យព្រួយបារម្ភដែរថា ការស្អប់ខ្ពើមជាតិពន្ធជាពិសេសប្រឆាំងនឹងជនជាតិវៀតណាម ទំនងជានៅតែជាយុទ្ធសាស្ត្រស្របច្បាប់របស់គណបក្សប្រឆាំង”៕
ប្រែសម្រួលដោយ តែម សុខុម
រដ្ឋាភិបាលភ្ជាប់គណបក្សសង្គ្រោះជាតិទៅនឹងភេរវជន
ឯកសារ និងឌីវីឌីមួយកញ្ចប់ដែលក្រសួងមហាផ្ទៃផ្ញើជូនស្ថានទូតបរទេសនិងអង្គការក្រៅរដ្ឋាភិបាលនៅសប្តាហ៍នេះ បានដកស្រង់សម្តីរបស់លោក សម រង្ស៊ី និងលោក កឹម សុខា មេដឹកនាំគណបក្សប្រឆាំង ជាសកម្មភាពព្រហ្មទណ្ឌដែលបានកើតឡើងចាប់តាំងពីការបោះឆ្នោតមក និងក្រុមភេរវករនៅអាមេរិកដើម្បីបង្ហាញពីលទ្ធផលហិង្សាដែលកើតចេញពីការតវ៉ាទូទាំងប្រទេសរបស់គណបក្សសង្គ្រោះជាតិ។
កញ្ចប់នោះមានឌីវីឌីថតសំឡេងរបស់លោក សម រង្ស៊ី និងលោក កឹម សុខា ដែលបាននិយាយនៅពេលថ្មីៗនេះរួមជាមួយនឹងប្រតិចារឹកជាភាសាអង់គ្លេសនៃពាក្យសម្តីប្រឆាំងគណបក្សប្រជាជនកម្ពុជា ការប្រមូលផ្តុំសារគាំទ្រគណបក្សសង្គ្រោះជាតិនៅតាមហ្វេសប៊ុក លិខិតរបស់លោក សួន សេរីរដ្ឋា ដែលត្រូវបានរដ្ឋាភិបាលចាត់ទុកថា ជាភេរវករ និងរបាយការណ៍សង្ខេបស្តីពីការផ្ទុះគ្រាប់បែកដែលបានកើតឡើងចាប់តាំងពីការបោះឆ្នោតជាតិនេះមក។
ក្នុងឯកសារមួយក្នុងកញ្ចប់ដែលត្រូវបានបញ្ជូនចេញពីបញ្ជាការដ្ឋានអចិន្ត្រៃយ៍ទទួលបន្ទុកសន្តិសុខពេលបោះឆ្នោតនៃក្រសួងមហាផ្ទៃ និងចុះកាលបរិច្ឆេទថ្ងៃទី២១ខែសីហាបានស្នើសុំឲ្យអ្នកទទួលជួយរដ្ឋាភិបាលក្នុងការធ្វើឲ្យប្រាកដថា ការនិយាយប្រឆាំងរដ្ឋាភិបាល ដែលគណបក្សសង្គ្រោះជាតិយកមកប្រើនោះមិនបណ្តាលឲ្យមានការរំខានដល់សន្តិភាព។
លិខិតនោះលើកឡើងថា “គណៈបញ្ជាការអចិន្ត្រៃយ៍ទទួលបន្ទុកសន្តិសុខពេលបោះឆ្នោតមានក្តីសោមនស្សរីករាយក្នុងការដាក់ជូនសារញុះញង់ជាច្រើនដែលត្រូវបានគណបក្សសង្គ្រោះជាតិបង្កើតឡើងដោយចេតនា”។ លិខិតនេះបន្តទៀតថា “គណៈបញ្ជាការសូមឆ្លៀតឱកាសនេះសំដែងនូវការអរគុណដ៏ស្មោះត្រង់ចំពោះកិច្ចខិតខំប្រឹងប្រែង និងការប្តេជ្ញាចិត្តរបស់ឯកឧត្តម និងលោកជំទាវដែលធានាឲ្យមានឥរិយាបថអហិង្សាក្នុងការបោះឆ្នោតក្នុងពេលថ្មីៗនេះ”។
ក្នុងចំណោមពាក្យដកស្រង់ចេញពីសម្តីរបស់ប្រធាន និងអនុប្រធានគណបក្សសង្គ្រោះជាតិនៅក្រោយពេលការបោះឆ្នោតនេះ គឺពាក្យសម្តីដែលលោក សម រង្ស៊ី បាននិយាយទៅកាន់ប្រជាពលរដ្ឋនៅក្នុងខេត្តកណ្តាល។
គេបានដកស្រង់សម្តីរបស់លោក សម រង្ស៊ី ថា “តើបងប្អូនសុខចិត្តឲ្យគេលួចជ័យជម្នះរបស់យើងទេ? តើបងប្អូនទាំងអស់គ្នាហ៊ានតវ៉ាជាមួយគណបក្សសង្គ្រោះជាតិទេ?ធ្វើបាតុកម្មឲ្យដូចរញ្ជួយផែនដី”។ ពេលថ្លែងសុន្ទរកថាក្នុងខេត្តព្រៃវែង លោក កឹម សុខា ត្រូវបានដកស្រង់សម្តីដែលនិយាយអំពីគំនិតស្រដៀងគ្នានេះ។
គេបានដកស្រង់សម្តីលោក កឹម សុខា ថា “បងប្អូនប្រុសស្រីបោះឆ្នោតឲ្យយើងឈ្នះ យើងពិតជាឈ្នះមែន ដូច្នេះយើងមិនអនុញ្ញាតឲ្យសំឡេងឆ្នោតបានទៅលើចោរទេ។ប្រសិនបើយើងចាញ់ យើងនឹងធ្វើបាតុកម្មជាមួយគ្នា។ តើបងប្អូនទាំងអស់គ្នាហ៊ានធ្វើបាតុកម្មទេ?។ ក្នុងចំណោមសារតាមបណ្តាញទំនាក់ទំនងសង្គមហ្វេសប៊ុកដែលគេបានយកមកថតចម្លង និងធ្វើប្រតិចារឹកនោះគឺសាររបស់លោក សម រង្ស៊ី ផ្ញើជូនយោធាកម្ពុជាឲ្យចូលរួមជាមួយគណបក្សសង្គ្រោះជាតិ។លោក សម រង្ស៊ី បានសរសេរកាលពីថ្ងៃទី៩ ខែសីហាថា “ ខ្ញុំសូមអំពាវនាវដល់កងកម្លាំងប្រដាប់អាវុធឲ្យរួបរួមគ្នាជាមួយប្រជាជន និងអំណាចយុវជនដើម្បីផ្លាស់ប្តូរមេដឹកនាំ”។
សារតាមហ្វេសប៊ុកមួយទៀតមកពីអ្នកប្រើប្រាស់ហ្វេសប៊ុកឈ្មោះ Love Honor។ អ្នកប្រើប្រាស់ហ្វេសប៊ុករូបនេះបានសរសេរថា “នៅក្នុងខេត្តក្រុងចំនួន២៣ត្រូវបានគេស្នើសុំឲ្យប្រមូលផ្តុំគ្នាឲ្យបាន២០.០០០នាក់ដើម្បីចាប់ខ្លួន ហ៊ុន សែន ជានាយករដ្ឋមន្ត្រីចោរ”។
នៅចុងបញ្ចប់នៃការអត្ថាធិប្បាយបង្កបញ្ហារបស់មេដឹកនាំគណបក្សសង្គ្រោះជាតិ និងអ្នកគាំទ្ររបស់ខ្លួននៅតាមហ្វេសប៊ុកនោះបង្ហាញពីបទល្មើសចំនួនបីករណីដែលគេបានប្រព្រឹត្តនៅខែនេះក្រោមចំណងជើងថា “ ការបង្កៃគ្រាប់បែក និងសកម្មភាពបំផ្ទុះ”។
ដោយសង្កេតឃើញថា ទង្វើទាំងអស់ត្រូវបានប្រព្រឹត្តឡើងដោយជនល្មើសមិនស្គាល់ឈ្មោះនោះ ឯកសារនេះរាយការណ៍ពីការបំផ្ទុះគ្រាប់បែកកាលពីថ្ងៃទី៧ ខែសីហានៅជិតសាលាដំបូងរាជធានីភ្នំពេញ ការរកឃើញគ្រាប់ M79 ពីរគ្រាប់ដែលគេយកទៅដាក់នៅលើធ្នើរបង្អួចនៃផ្ទះមួយនៅក្នុងខណ្ឌទួលគោកក៏កើតឡើងនៅថ្ងៃទី៧ ខែសីហាដែរ និងការគប់គ្រាប់បែកនៅទីស្នាក់ការគណបក្សប្រជាជនក្នុងខេត្តកំពង់ស្ពឺ កាលពីថ្ងៃទី១៤ ខែសីហា។
កញ្ចប់របស់ក្រសួងមហាផ្ទៃនេះ ក៏មានលិខិតចំហមួយដែលលោក សួន សេរីរដ្ឋា ប្រធានចលនាអំណាចពលរដ្ឋខ្មែរ បានផ្ញើជូនយោធា និងកងកម្លាំងនគរបាលកម្ពុជា ហើយលោកត្រូវបានរដ្ឋាភិបាលកម្ពុជាចាត់ទុកថា ជាក្រុមភេរវករដែលមានទំនាក់ទំនងជាមួយគណបក្សសង្គ្រោះជាតិ។គណបក្សសង្គ្រោះជាតិបដិសេធថា មិនមានទំនាក់ទំនងណាមួយជាមួយលោក សួន សេរីរដ្ឋា ដែលនគរបាលមានដីកាចាប់ខ្លួននោះទេ។
លោក សួន សេរីរដ្ឋា ត្រូវបានដកស្រង់សម្តីយកមកសរសេរនៅក្នុងលិខិតមួយចុះ ថ្ងៃទី១៤ ខែសីហាថា “ខ្ញុំសូមអំពាវនាវដល់ទាហាន នគរបាល កងរាជអាវុធហត្ថ និងកងកម្លាំងប្រដាប់អាវុធកម្ពុជាទាំងអស់ឲ្យបែរ កាណុងកាំភ្លើងរបស់ខ្លួនទៅរកជនផ្តាច់ការញៀនសង្គ្រាម ដែលជាមេដឹកនាំសង្គ្រាម និងគំរាមបង្កសង្គ្រាម ដើម្បីសម្លាប់ពូជសាសន៍ខ្លួនឯង”។
ទោះបីជាឯកសារទាំងនេះមិនភ្ជាប់លោក សួន សេរីរដ្ឋា និងការគប់គ្រាប់បែកនេះដោយច្បាស់លាស់ទៅនឹងគណបក្សសង្គ្រោះជាតិ ក៏ពួកគេធ្វើឲ្យមានទំនាក់ទំនងរវាងឧប្បត្តិហេតុទាំងនេះ និងគោលបំណងរបស់គណបក្សប្រឆាំងដែរ ប្រសិនបើពួកគេធ្វើការតវ៉ាទូទាំងប្រទេស។ រដ្ឋាភិបាលកំពុងព្យាយាមធ្វើឲ្យមានការសន្និដ្ឋានដោយមិនច្បាស់លាស់ថា គណបក្សសង្គ្រោះជាតិគំរាមធ្វើមហាបាតុកម្ម មានន័យថា គណបក្សប្រឆាំងចង់ផ្តួលរំលំរដ្ឋាភិបាល ហើយបន្ទាប់មកភ្ជាប់រឿងនោះទៅនឹងលោក សួន សេរីរដ្ឋា ក្នុងការផ្ទុះគ្រាប់ែបក គឺធ្វើឲ្យរឿងទាំងអស់នេះហាក់ដូចជាមានទំនាក់ទំនងនឹងគ្នា។
ដូច្នេះពួកគេកំពុងព្យាយាមធ្វើការសន្និដ្ឋានថា មហាបាតុកម្មនឹងនាំឲ្យមានបញ្ហានានាដូចជា ការបំផ្ទុះគ្រាប់បែកនៅសាលាដំបូងរាជធានីភ្នំពេញ នេះបើតាមប្រសាសន៍របស់លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជាដែលស្ថិតក្នុងចំណោមអង្គការក្រៅរដ្ឋាភិបាលដែលបានទទួលកញ្ចប់នោះ។ “ខ្ញុំមិនគិតថា វានឹងធ្វើឲ្យអ្នកទទួលបានកញ្ចប់នោះជឿទេពីព្រោះអ្វីដែលពួកគាត់ និយាយនោះមិនខុសច្បាប់ទេ។ មនុស្សដែលជាគោលដៅ គឺអ្នកជាប់ពាក់ព័ន្ធខ្លាំង។ អ្វីៗគ្រប់យ៉ាងអាចមើលឃើញជាសាធារណៈ”។
លោកបាននិយាយថា ការដែលក្រសួងមហាផ្ទៃបញ្ចុះបញ្ចូលអង្គការក្រៅរដ្ឋាភិបាលនោះគឺជាការល្អ។ ពួកគេពិតជាខ្វល់អំពី យោបល់របស់សហគមន៍អន្តរជាតិ និងយោបល់របស់សង្គមស៊ីវិល”។ លោកឧត្តមសេនីយ៍ឯក ខៀវ សុភ័គ អ្នកនាំពាក្យក្រសួងមហាផ្ទៃបានមានប្រសាសន៍ថា លិខិតនោះធ្វើឡើងដោយសង្ឃឹមថា តំណាង ស្ថានទូត និងអង្គការក្រៅរដ្ឋាភិបាលនឹងផ្ញើសារនេះទៅឲ្យគណបក្សប្រឆាំងថា គណបក្សនេះត្រូវបន្ថយវោហារសាស្ត្ររបស់ខ្លួនដើម្បីចៀសវាងពីជម្លោះជាមួយរដ្ឋាភិបាល។
លោកបានមានប្រសាសន៍ថា “គោលបំណងរបស់យើងក្នុងការផ្ញើឯកសារទាំងនេះទៅឲ្យស្ថានទូតនោះ គឺដើម្បីឲ្យស្ថានទូតទាំងនោះជួយយើងក្នុងការកាត់បន្ថយវោហារសាស្ត្ររបស់លោក សម រង្ស៊ី មេដឹកនាំគណបក្សប្រឆាំង កាត់បន្ថយពាក្យសម្តីរបស់លោកកុំឲ្យញុះញង់ប្រជាជនឲ្យធ្វើបាតុកម្មផ្តួលរំលំ និងផ្លាស់ប្តូររដ្ឋាភិបាល”។
លោកឧត្តមសេនីយ៍ឯក ខៀវ សុភ័គ បានមានប្រសាសន៍បន្ថែមទៀតថា “មេដឹកនាំគណបក្សសង្គ្រោះជាតិមិនស្តាប់រដ្ឋាភិបាលទេ ដូច្នេះយើងត្រូវការស្ថានទូតឲ្យជួយនិយាយជាមួយពួកគេ។ការធ្វើបាតុកម្មផ្តួលរំលំ និងផ្លាស់ប្តូរនេះគឺជាការបះបោរ ហើយយើងមិនចង់បានទេ។ វានឹងធ្វើឲ្យជាតិធ្លាក់ចូលក្នុងភាពចលាចល”។
ប៉ុន្តែ លោក យឹម សុវណ្ណ អ្នកនាំពាក្យគណបក្សសង្គ្រោះជាតិបានមានប្រសាសន៍ថា ឯកសារទាំងនោះមានបំណងបង្ខូចកេរ្តិ៍ឈ្មោះគណបក្សប្រឆាំង។ “ពួកគេចង់បង្ខូចកេរ្តិ៍ឈ្មោះយើង។ ពួកគេចង់ភ្ជាប់ការធ្វើបាតុកម្មអហិង្សារបស់យើងទៅនឹងបាតុកម្មហិង្សា។ នេះគឺជាការគំរាមថា ពួកគេនឹងបង្ក្រាប ប៉ុន្តែ ខ្ញុំគិតថា អ្នកការទូត និងឯកអគ្គរដ្ឋទូតយល់ច្បាស់ណាស់។យើងមិនជាប់ពាក់ព័ន្ធជាមួយចលនារបស់លោក សួន សេរីរដ្ឋា ទេ”៕
ប្រែសម្រួលដោយ មូល គឹមហឿន
លោក សួន សេរីរដ្ឋា គ្រោងនឹងវិលត្រឡប់មកកម្ពុជាវិញ
អ្នកប្រឆាំងជាជនជាតិខ្មែរម្នាក់កំពុងរស់នៅសហរដ្ឋអាមេរិកដែលសកម្មភាពរបស់លោកបានបណ្តាលឲ្យមានការចាប់ខ្លួនមនុស្សប្រាំពីរនាក់ចាប់តាំងពីខែមុនមកនោះបាននិយាយថា លោកនឹងធ្វើដំណើរមកព្រំដែនកម្ពុជា-ថៃ ដើម្បីជួបជាមួយសកម្មជន ហើយនឹងចូលមកប្រទេសកម្ពុជា “ដើម្បីដឹកនាំការតស៊ូដើម្បីសេរីភាពរបស់ពលរដ្ឋខ្ញុំ”។
អាជ្ញាធរមូលដ្ឋានបាននិយាយថា ពួកគេនឹងចាប់ខ្លួន សួន សេរីរដ្ឋា ដែលត្រូវបានចោទប្រកាន់ពីបទញុះញង់ឲ្យមានការគាំទ្រចលនាបះបោរបែបបដិវត្តន៍អារ៉ាប់ស្ព្រីងប្រឆាំងលោកនាយករដ្ឋមន្ត្រី ហ៊ុន សែន ប្រសិនបើគាត់ត្រឡប់មកវិញ។ ទោះបីជាលោក សួន សេរីរដ្ឋា និងចលនាអំណាចពលរដ្ឋខ្មែររបស់លោកបានថ្កោលទោសការប្រើប្រាស់អំពើហិង្សា ដើម្បីសម្រេចគោលបំណងរបស់ពួកគេក៏ដោយ ក៏រដ្ឋាភិបាលបានចាត់ទុកពួកគាត់ថា ជាភេរវជនដែរ។
ដោយត្រូវបានទាក់ទងកាលពីថ្ងៃច័ន្ទ តាមអ៊ីម៉េល លោក សេរីរដ្ឋា បាននិយាយថា លោកនឹងចាកចេញពីសហរដ្ឋអាមេរិកនៅថ្ងៃណាមួយមកកាន់ក្រុងបាងកក ដែលលោកគ្រោងនឹងធ្វើដំណើរមកកាន់ព្រំដែនកម្ពុជា-ថៃនៅល្ងាចថ្ងៃអង្គារ ដើម្បីជួបជាមួយសកម្មជនចលនាអំណាចពលរដ្ឋខ្មែរ ហើយពិភាក្សាពីចលនាបន្ទាប់របស់ក្រុមនេះ។
ទោះបីជាលោកបាននិយាយថា លោក នឹងចូលមកប្រទេសកម្ពុជាក្តី ក៏លោកបានបដិសេធមិនប្រាប់ថា ចូលមកកន្លែងណា ឬនៅពេលណានោះទេ ពីព្រោះលោកស្ថិតនៅក្នុងការតាមដានរបស់រដ្ឋាភិបាល។ លោកបាននិយាយបន្ថែមថា “ខ្ញុំមិនចេះខ្លាចទេ”។ ប៉ុន្តែ លោក សេរីរដ្ឋា បាននិយាយថា លោកបានលួចចេញចូលប្រទេសកម្ពុជាចាប់តាំងពីលោកចាកចេញទៅសហរដ្ឋអាមេរិកកាលពីឆ្នាំ២០០៧មក ហើយលោកបាននិយាយថា នៅពេលនេះលោកប្រហែលជាធ្វើបាតុកម្មជាសាធារណៈមួយដែលជាផ្នែកមួយនៃផែនការរបស់លោក “ដើម្បីដឹកនាំការតស៊ូដើម្បីសេរីភាព យុត្តិធម៌ និងការផ្លាស់ប្តូររបស់ពលរដ្ឋខ្ញុំ”។
លោកឧត្តមសេនីយ៍ឯក គៀត ច័ន្ទថារិទ្ធ អ្នកនាំពាក្យនគរបាលជាតិបានមានប្រសាសន៍ថា លោក សេរីរដ្ឋា នឹងត្រូវចាប់ខ្លួនប្រសិនបើលោកបានឆ្លងកាត់ព្រំដែននោះ។ លោកបានមានប្រសាសន៍ថា “យើងគ្មានជម្រើសអ្វីក្រៅពីការអនុវត្តច្បាប់ឡើយ។ តុលាការបានចេញដីកាចាប់ខ្លួនគាត់ហើយ”។
លោកស្រី ចាំង ស៊ីណាត ចៅក្រមសាលាដំបូងរាជធានីភ្នំពេញដែលទទួលបន្ទុករឿងក្តី របស់លោក សេរីរដ្ឋា មិនអាចទាក់ទងបានទេ។
លោក មាស...
មនុស្សបួននាក់ត្រូវចាប់ខ្លួនពីបទប៉ុនប៉ងធ្វើបដិវត្តផ្កាកុលាប
នគរបាលបានឲ្យដឹងកាលពីម្សិលមិញថា ខ្លួនបានចាប់មនុស្សបួននាក់ដែលសង្ស័យថា បានជាប់ពាក់ព័ន្ធនៅក្នុងការរួមគំនិតមួយបង្កើតឡើងដោយក្រុមប្រឆាំងដែលជាខ្មែរអាមេរិកមួយក្រុមដែលបានរៀបចំផែនការផ្តួលរំលំរដ្ឋាភិបាលរបស់លោកនាយករដ្ឋមន្ត្រី ហ៊ុន សែន។
នគរបាលជាតិបានលើកឡើងនៅក្នុងសេចក្តីប្រកាសព័ត៌មានមួយកាលពីថ្ងៃសៅរ៍ ថា បុរសពីរនាក់ និងស្ត្រីពីរនាក់ត្រូវបានចាប់ខ្លួនកាលពីថ្ងៃព្រហស្បតិ៍ ជាប់សង្ស័យពីបទចែកផ្កាកុលាបលឿងចំនួន១.០០០ទងទៅឲ្យទាហាន និងនគរបាលនៅទូទាំងរាជធានីរួមជាមួយនឹងខិត្តប័ណ្ណដែលជំរុញឲ្យពួកគេ ងាកអាវុធរបស់ខ្លួន “ប្រឆាំងជនផ្តាច់ការ” ។
យុទ្ធនាការនេះត្រូវបានរៀបចំឡើងដោយចលនាអំណាចពលរដ្ឋខែ្មរ ជាក្រុមមានមូលដ្ឋាននៅអាមេរិកដូចគ្នាដែលបានបញ្ជាឲ្យមានការបោះពុម្ពអាវយឺតរាប់ពាន់ដើម្បីជំរុញប្រជាជនខ្មែរកុំឲ្យទៅបោះឆ្នោតនៅក្នុងការបោះឆ្នោតជាតិកាលពីខែមុន ហើយដោយសារហេតុផលនេះមនុស្សបីនាក់ផ្សេងទៀតកំពុងជាប់ឃុំបណ្តោះអាសន្ននៅឡើយ។
រដ្ឋាភិបាលតែងតែចោទក្រុមនេះពីបទប៉ុនប៉ងបង្កើតកងទ័ពដាច់ដោយឡែកមួយដើម្បីផ្តួលរំលំរបបនេះ ប៉ុន្តែ រដ្ឋាភិបាលមិនទាន់បានផ្តល់ភ័ស្តុតាងណាមួយទេ។
នគរបាលជាតិបានលើកឡើងក្នុងសេចក្តីប្រកាសព័ត៌មាននោះថា “កាលពីថ្ងៃទី១៥ខែសីហា អាជ្ញាធរមានសមត្ថកិច្ចបានចាប់ខ្លួនជនសង្ស័យបួននាក់ដែលបានផលិត និងចែកចាយខិត្តប័ណ្ណជាច្រើនរយសន្លឹក ដែលមានខ្លឹមសារញ៉ុះញង់ឲ្យមានអំពើហិង្សាប្រដាប់អាវុធ ដើម្បីផ្តួលរំលំរាជរដ្ឋាភិបាល”។
សេចក្តីប្រកាសព័ត៌មាននោះលើកឡើងទៀតថា ជនសង្ស័យ “បានចែកចាយខិត្តប័ណ្ណ...
នគរបាលផ្សាយរូបថតសមាជិកសភាជាប់ពាក់ព័ន្ធនឹងក្រុមភេរវករ
ក្នុងគេហទំព័ររបស់ខ្លួន កាលពីម្សិលមិញនគរបាលជាតិបានបង្ហោះរូបថតលោក សុន ឆ័យ សមាជិកសភាមកពីគណបក្ស សម រង្ស៊ី និងជាបេក្ខជនតំណាងរាស្ត្រនៅថ្ងៃអនាគតមកពីគណបក្សសង្គ្រោះជាតិ ជួបជុំជាមួយសកម្មជននៅក្នុងសហរដ្ឋអាមេរិក ដែលគណបក្សកាន់អំណាច គឺគណបក្សប្រជាជនកម្ពុជាបានចោទប្រកាន់ពីបទរៀបផែនការផ្ដួលរំលំរដ្ឋាភិបាល និងរបបរាជានិយម។
រូបថតចំនួនបួនសន្លឹកដែលលោកនាយករដ្ឋមន្ត្រី ហ៊ុន សែន បានបញ្ជាដោយផ្ទាល់ឲ្យនគរបាលបង្ហោះកាលពីថ្ងៃច័ន្ទ អំឡុងពេលថ្លែងសុន្ទរកថា បង្ហាញពីលោក សុន ឆ័យ ចូលរួមក្នុងព្រឹត្តិការណ៍មួយជាមួយលោក សួន សេរីរដ្ឋា ប្រធានចលនាអំណាចពលរដ្ឋខ្មែរ ដែលមានមូលដ្ឋាននៅទីក្រុងវ៉ាស៊ីនតោន។
ទោះបីជារដ្ឋាភិបាលបានចាត់ទុកចលនាអំណាចពលរដ្ឋខ្មែរជាក្រុមភេរវករ ដែលប្តេជ្ញាផ្តួលរំលំរដ្ឋាភិបាលម្ដងហើយម្ដងទៀតក៏ដោយ ក៏ក្រុមនេះមិនបានធ្វើអ្វីក្រៅពីការរិះគន់ការកាន់អំណាចដ៏យូររបស់លោក ហ៊ុន សែន តាមរយៈអុីម៉េល និងនៅពេលជួបជុំគ្នានៅឯសហរដ្ឋអាមេរិកដែរ។
គេហទំព័ររបស់ក្រុមនេះបានបង្ហោះពាក្យថា ផ្លាស់ប្ដូររបបដឹកនាំរបស់លោក ហ៊ុន សែនប៉ុន្ដែ ហៅខ្លួនឯងថា...
ម្ចាស់វិទ្យុសម្បុកឃ្មុំត្រូវបានចាប់ខ្លួនពីបទបង្កើតតំបន់អបគមន៍
លោក ម៉មសូណង់ដូម្ចាស់វិទ្យុសម្បុកឃ្មុំ ដែលជាស្ថានីយវិទ្យុឯករាជ្យ ត្រូវបានចាប់ខ្លួនកាលពីព្រឹកម្សិលមិញ នៅឯផ្ទះរបស់លោក ក្នុងរាជធានីភ្នំពេញ ទាក់ទងទៅនឹងបទចោទប្រកាន់មួយចំនួន ដែលគេហៅថា ចលនាអបគមន៍ដែលអាជ្ញាធរបានបំបែកនៅក្នុងខេត្តក្រចេះ នៅមុននេះក្នុងឆ្នាំនេះ។
មាននគរបាលស្លៀកពាក់ឯកសណ្ឋាន និងស៊ីវិលជាច្រើននាក់បានសម្រុកចូលផ្ទះរបស់លោក ម៉ម សូណង់ដូ ដែលប្រើជាទីស្នាក់ការសមាគមអ្នកប្រជាធិបតេយ្យរបស់លោកនិងជាការិយាល័យស្ថានីយវិទ្យុសម្បុកឃ្មុំផងដែរ ហើយបានបញ្ជូនលោកទៅឃុំខ្លួននៅក្នុងក្រសួងមហាផ្ទៃ ហើយលោកនៅតែត្រូវឃុំខ្លួននៅទីនោះដដែលរហូតមកដល់ល្ងាចថ្ងៃម្សិលមិញនេះ។
លោកឧត្ដមសេនីយ៍ឯកខៀវសុភ័គ អ្នកនាំពាក្យក្រសួងមហាផ្ទៃបានថ្លែង កាលពីម្សិលមិញថា “ មិនមែនចាប់ខ្លួនគាត់មកសាកសួរនោះទេ ប៉ុន្ដែតាមដីកាចាប់ខ្លួន យើងបានបង្គាប់ឲ្យអាជ្ញាធរសាធារណៈបញ្ជូនគាត់ទៅពន្ធនាគារ។យើងត្រៀមបញ្ជូនគាត់ទៅពន្ធនាគារ ហើយយើងកំពុងរៀបចំឯកសារ”។
លោកឧត្តមសេនីយ៍ឯក ខៀវ សុភ័គ បានមានប្រសាសន៍បន្ថែមទៀតថា លោកមិនច្បាស់ថាលោក ម៉មសូណង់ដូនឹងត្រូវបញ្ជូនទៅពន្ធនាគារនៅពេលណានោះទេយើងកំពុងអនុវត្តដីកាចាប់ខ្លួន។ ថ្ងៃនេះ ឬថ្ងៃស្អែក ត្រូវតែបញ្ជូនដូចគ្នា។
វិទ្យុសម្បុកឃ្មុំបានបញ្ចេញរូបភាពវីដេអូពីកាមេរ៉ាសុវត្ថិភាព ដែលនៅក្នុងវីដេអូនោះគេឃើញមន្ត្រីនគរបាលចាប់ខ្លួនលោក ម៉មសូណង់ដូ លឿនៗបញ្ចូលទៅក្នុងរថយន្ដម៉ាក មីតស៊ូប៊ីហ្សុីប៉ាហ្សេរូ៉ មួយគ្រឿង។
លោកស្រី ឌឹមផាន់ណារ៉ាជាភរិយារបស់លោក ម៉មសូណង់ដូបាននិយាយថា“ មនុស្សប្រាំមួយនាក់ស្លៀកពាក់ស៊ីវិល និងនគរបាលស្លៀកពាក់ឯកសណ្ឋាន១៣នាក់ ព្រមទាំងអ្នកបើកបររថយន្ដម្នាក់បានចូលទៅក្នុងបន្ទប់ដេករបស់ប្ដីខ្ញុំ នៅព្រឹកនេះ។នៅពេលគាត់ចេញមកពីបន្ទប់ ពួកគេបានអានដីកាចាប់ខ្លួន និងបានចាប់ខ្លួនគាត់តែម្ដង។ ខ្ញុំមិនអាចទាក់ទងគាត់បានទេ ប៉ុន្ដែខ្ញុំឮថា គេបញ្ជូនគាត់ទៅ ក្រសួងមហាផ្ទៃ”។
កាលពីខែឧសភា អាជ្ញាធរបានអះអាងថាការបណ្ដេញចេញដ៏ហិង្សានៅខេត្តក្រចេះ ដែលបណ្ដាលឲ្យក្មេងស្រីអាយុ១៤ឆ្នាំម្នាក់ស្លាប់នោះ ជាការចាំបាច់ ដើម្បីបំបែកចលនាអបគមន៍។ បុរសម្នាក់ដែលគេហៅថាជាមេដឹកនាំនៃចលនានេះ គឺឈ្មោះ ប៊ុនរដ្ឋាបានរត់គេចខ្លួនចាប់តាំងពីពេលនោះមក។ ក្រោយមកអាជ្ញាធរបានភ្ជាប់លោក ប៊ុនរដ្ឋាទៅនឹងលោកម៉មសូណង់ដូបន្ទាប់ពីគេបានបង្ហើបប្រាប់ថាពួកគេធ្លាប់ធ្វើការជាមួយគ្នា។ លោកឧត្ដមសេនីយ៍ឯក...
Latest news
© 2021, ដេលី. All rights reserved.