លោក ម៉មសូណង់ដូម្ចាស់វិទ្យុសម្បុកឃ្មុំ ដែលជាស្ថានីយវិទ្យុឯករាជ្យ ត្រូវបានចាប់ខ្លួនកាលពីព្រឹកម្សិលមិញ នៅឯផ្ទះរបស់លោក ក្នុងរាជធានីភ្នំពេញ ទាក់ទងទៅនឹងបទចោទប្រកាន់មួយចំនួន ដែលគេហៅថា ចលនាអបគមន៍ដែលអាជ្ញាធរបានបំបែកនៅក្នុងខេត្តក្រចេះ នៅមុននេះក្នុងឆ្នាំនេះ។
មាននគរបាលស្លៀកពាក់ឯកសណ្ឋាន និងស៊ីវិលជាច្រើននាក់បានសម្រុកចូលផ្ទះរបស់លោក ម៉ម សូណង់ដូ ដែលប្រើជាទីស្នាក់ការសមាគមអ្នកប្រជាធិបតេយ្យរបស់លោកនិងជាការិយាល័យស្ថានីយវិទ្យុសម្បុកឃ្មុំផងដែរ ហើយបានបញ្ជូនលោកទៅឃុំខ្លួននៅក្នុងក្រសួងមហាផ្ទៃ ហើយលោកនៅតែត្រូវឃុំខ្លួននៅទីនោះដដែលរហូតមកដល់ល្ងាចថ្ងៃម្សិលមិញនេះ។
លោកឧត្ដមសេនីយ៍ឯកខៀវសុភ័គ អ្នកនាំពាក្យក្រសួងមហាផ្ទៃបានថ្លែង កាលពីម្សិលមិញថា “ មិនមែនចាប់ខ្លួនគាត់មកសាកសួរនោះទេ ប៉ុន្ដែតាមដីកាចាប់ខ្លួន យើងបានបង្គាប់ឲ្យអាជ្ញាធរសាធារណៈបញ្ជូនគាត់ទៅពន្ធនាគារ។យើងត្រៀមបញ្ជូនគាត់ទៅពន្ធនាគារ ហើយយើងកំពុងរៀបចំឯកសារ”។
លោកឧត្តមសេនីយ៍ឯក ខៀវ សុភ័គ បានមានប្រសាសន៍បន្ថែមទៀតថា លោកមិនច្បាស់ថាលោក ម៉មសូណង់ដូនឹងត្រូវបញ្ជូនទៅពន្ធនាគារនៅពេលណានោះទេយើងកំពុងអនុវត្តដីកាចាប់ខ្លួន។ ថ្ងៃនេះ ឬថ្ងៃស្អែក ត្រូវតែបញ្ជូនដូចគ្នា។
វិទ្យុសម្បុកឃ្មុំបានបញ្ចេញរូបភាពវីដេអូពីកាមេរ៉ាសុវត្ថិភាព ដែលនៅក្នុងវីដេអូនោះគេឃើញមន្ត្រីនគរបាលចាប់ខ្លួនលោក ម៉មសូណង់ដូ លឿនៗបញ្ចូលទៅក្នុងរថយន្ដម៉ាក មីតស៊ូប៊ីហ្សុីប៉ាហ្សេរូ៉ មួយគ្រឿង។
លោកស្រី ឌឹមផាន់ណារ៉ាជាភរិយារបស់លោក ម៉មសូណង់ដូបាននិយាយថា“ មនុស្សប្រាំមួយនាក់ស្លៀកពាក់ស៊ីវិល និងនគរបាលស្លៀកពាក់ឯកសណ្ឋាន១៣នាក់ ព្រមទាំងអ្នកបើកបររថយន្ដម្នាក់បានចូលទៅក្នុងបន្ទប់ដេករបស់ប្ដីខ្ញុំ នៅព្រឹកនេះ។នៅពេលគាត់ចេញមកពីបន្ទប់ ពួកគេបានអានដីកាចាប់ខ្លួន និងបានចាប់ខ្លួនគាត់តែម្ដង។ ខ្ញុំមិនអាចទាក់ទងគាត់បានទេ ប៉ុន្ដែខ្ញុំឮថា គេបញ្ជូនគាត់ទៅ ក្រសួងមហាផ្ទៃ”។
កាលពីខែឧសភា អាជ្ញាធរបានអះអាងថាការបណ្ដេញចេញដ៏ហិង្សានៅខេត្តក្រចេះ ដែលបណ្ដាលឲ្យក្មេងស្រីអាយុ១៤ឆ្នាំម្នាក់ស្លាប់នោះ ជាការចាំបាច់ ដើម្បីបំបែកចលនាអបគមន៍។ បុរសម្នាក់ដែលគេហៅថាជាមេដឹកនាំនៃចលនានេះ គឺឈ្មោះ ប៊ុនរដ្ឋាបានរត់គេចខ្លួនចាប់តាំងពីពេលនោះមក។ ក្រោយមកអាជ្ញាធរបានភ្ជាប់លោក ប៊ុនរដ្ឋាទៅនឹងលោកម៉មសូណង់ដូបន្ទាប់ពីគេបានបង្ហើបប្រាប់ថាពួកគេធ្លាប់ធ្វើការជាមួយគ្នា។ លោកឧត្ដមសេនីយ៍ឯក ខៀវសុភ័គបានបញ្ជាក់ថាមានភស្ដុតាងបញ្ជាក់ថាលោក ម៉មសូណង់ដូជាអ្នកគាំទ្រចលនាអបគមន៍នេះ។
លោកបានមានប្រសាសន៍បន្ថែមថា “ ខ្ញុំសូមទោស ខ្ញុំមិនអាចបញ្ជាក់ឈ្មោះមនុស្សទាំងនោះបានទេ ប៉ុន្ដែ គេបានប្រាប់ថា គឺលោកម៉មសូណង់ដូ បានបញ្ជាពួកគេឲ្យធ្វើដូច្នេះ។ អាជ្ញាធរមានឯកសារគ្រប់គ្រាន់ ដើម្បីបង្ហាញតុលាការ”។ នៅក្នុងខេត្តក្រចេះ លោកស្រីចាតសួរស្មីព្រះរាជអាជ្ញាសាលាដំបូងខេត្តបានបញ្ជាក់ថាមានដីកាចាប់ខ្លួនលោកម៉មសូណង់ដូ ពីតុលាការមែន ប៉ុន្ដែបានបង្វែរសំណួរផ្សេងទៀតទៅចៅក្រមស៊ើបអង្កេត ចុកងួនដែលមិនអាចទាក់ទងបាន។
លោកសុកសំអឿនមេធាវីរបស់លោកម៉មសូណង់ដូ មានប្រសាសន៍ថាដីកាចាប់ខ្លួនចេញនៅដើមខែនេះ មានបទចោទប្រកាន់ លោក សូណង់ដូចំនួនបួនករណី។ករណីមួយដែលធ្ងន់ធ្ងរបំផុតនោះ គឺការដឹកនាំចលនាបះបោរ ហើយលោក ម៉មសូណង់ដូអាចមាន ទោសជាប់ពន្ធនាគាររហូតដល់២០ឆ្នាំ។
លោកបានមានប្រសាសន៍ថា “ គាត់នៅក្រៅប្រទេស គាត់ស្ម័គ្រចិត្តវិលត្រឡប់មកវិញ [ដើម្បីឲ្យគេសាកសួរ] ប៉ុន្ដែបញ្ហានៅត្រង់ថា គាត់ត្រូវបានចោទប្រកាន់ពីបទបះបោរ ដែលជាបទឧក្រិដ្ឋ ហើយគេត្រូវតែចាប់ខ្លួនគាត់”។ លោក សុកសំអឿន បានបន្ថែមថា “ បើសិនជាពួកគេចោទប្រកាន់ពីបទបះបោរ ខ្ញុំគិតថាវាជារឿងនយោបាយ”។
កាលពីចុងខែមិថុនាលោកនាយករដ្ឋមន្ដ្រី ហ៊ុនសែនបានប្រកាសជាសាធារណៈភ្ជាប់លោកម៉មសូណង់ដូ ទៅនឹងចលនាអបគមន៍ដោយហៅគាត់ថា ជាមេដឹកនាំនៃចលនានេះដែលបាន “ បង្កើតរដ្ឋនៅក្នុងរដ្ឋមួយហើយបានលុបចោលភូមិមួយ”។ប៉ុន្មានថ្ងៃក្រោយមក សាលាដំបូងខេត្តក្រចេះ បានចេញដីកាចាប់ខ្លួនលោកម៉មសូណង់ដូ។
ខណៈពេលរដ្ឋាភិបាលបានអះអាងថាខ្លួនកំពុងលុបបំបាត់ចលនាអបគមន៍បន្ទាប់ពីខ្លួនបានបញ្ជូនកម្លាំងប្រដាប់អាវុធចំនួន២០០នាក់ទៅភូមិប្រមានោះក្រុមអង្គការសិទ្ធិមនុស្ស និងអ្នកភូមិបានបដិសេធការចោទប្រកាន់នេះ ដោយបានហៅការចោទប្រកាន់នេះថាជាលេសមួយដើម្បីបង្ក្រាបគ្រួសារ ដែលជាប់ពាក់ព័ន្ធនឹងជម្លោះដីធ្លីដ៏យូរមួយជាមួយនឹងក្រុមហ៊ុនចម្ការកៅស៊ូ។ បន្ថែមពីលើលោក ម៉មសូណង់ដូលោកហ៊ុនសែន បានភ្ជាប់លោកសួនសេរីរដ្ឋាមេចលនាអំណាចប្រជាជនខ្មែរ ដែលកាលពីខែឧសភា បានដាក់ពាក្យបណ្ដឹងទៅតុលាការឧក្រិដ្ឋកម្មអន្ដរជាតិ ចោទប្រកាន់លោកនាយករដ្ឋមន្ត្រីហ៊ុនសែន ពីបទឧក្រិដ្ឋកម្មប្រឆាំងមនុស្សជាតិ។
ថ្លែងតាមវីដេអូរខន់ហ្វើរិនក្នុងអំឡុងពេលធ្វើសន្និសីទកាសែតនៅស្ថានីយ៍វិទ្យុសម្បុកឃ្មុំ ទាំងលោកសេរីរដ្ឋានិងលោករដ្ឋា បដិសេធចំពោះការអះអាងអំពីចលនាអបគមន៍នេះ។
ហ៊ួនផាណ្ណារីប្រធានរដ្ឋបាលសមាគមន៍អ្នកប្រជាធិបតេយ្យមានប្រសាសន៍ថា“លោកម៉មសូណង់ដូព្យាយាម… និយាយដោយសេរី។នោះជាហេតុផលពិត ដែលគេចាប់ខ្លួនគាត់។ គាត់ចង់និយាយដោយសេរី ហើយពួកគេចាប់ខ្លួនគាត់ចំនួនបីដងមកហើយ។មិនមានសេរីភាពនៅក្នុងប្រទេសកម្ពុជាទាល់តែសោះ”។
គណបក្សប្រឆាំង គឺគណបក្សសិទ្ធិមនុស្ស និងគណបក្ស សមរង្ស៊ីបានចេញសេចក្ដីថ្លែងការណ៍ថ្កោលទោសការចាប់ខ្លួននេះថាជារឿងនយោបាយ៕
ប្រែសម្រួលដោយឃិនណៃ