31 C
Phnom Penh

និស្សិតទទូច​ឲ្យ​ចៀសវាង​​​អំពើ​​​ហិង្សាអំឡុង​​​ពេល​​​ធ្វើ​​​បាតុកម្ម​​​

ដោយ ឌឹ ខេមបូឌា ដេលី

បទវិភាគ

​​​និស្សិតនិង​អ្នក​គាំទ្រ​គណបក្ស​​ប្រឆាំង​ជាង​២០០នាក់​បា​នដង្ហែ​ក្បួនជុំវិញ​វត្តភ្នំ​ក្នុង​ទី​ក្រុង​ភ្នំ​ពេញកាលពី​ម្សិល​មិញ​ និង​មាន​កាន់ផ្កា​នៅ​ក្នុង​ដៃ​ផង ដោយ​ទទូច​ឲ្យ​គ្រប់​​​​ភាគី​ចៀស​​​វាង​​អំពើ​ហិង្សា​ អំឡុង​ការ​ធ្វើ​​​បាតុ​​​កម្ម​​​​​​​នៅ​​​ថ្ងៃ​​​សៅរ៍នេះ ប្រឆាំង​នឹង​លទ្ធផល​នៃ​ការ​បោះ​ឆ្នោត​ជាតិ​ដ៏​ចម្រូង​ចម្រាសកាលពី​ខែ​មុន​​​ និង​ទទូច​ឲ្យលើកលែង​​ការ​ចោទ​ប្រកាន់​ពី​បទ​ញុះ​ញង់​នា​ពេល​ថ្មី​ៗនេះ​​​។


ការដង្ហែក្បួនកាលពី​​ព្រឹក​ថ្ងៃម្សិល​មិញ​ដែ​ល​រៀប​ចំ​ឡើង​ដោយ​ក្រុម​មិត្ត​ភក្តិ​​​​តាម​​​បណ្ដាញ​​​​​​​សង្គម​ហ្វេសប៊ុក​​​​​ធ្វើ​ឡើង​ចំពេល​គណ​បក្ស​សង្គ្រោះ​ជាតិ​ ជា​គណបក្ស​ប្រឆាំង​ត្រៀម​ធ្វើ​មហា​បាតុ​កម្ម​​​​​នៅ​ថ្ងៃ​ទី​៧​ខែ​កញ្ញា​នេះ គឺ​មួយ​ថ្ងៃ​មុន គ.ជ.ប. គ្រោង​​ប្រកាស​លទ្ធ​​​ផល​ផ្លូវ​ការ ដែល​​​សឹង​​​តែ​​​​បង្ហាញ​យ៉ាង​​​​​​​ច្បាស់​ថា គណបក្ស​ប្រជា​​​​​​​ជន​កម្ពុជា​ដែល​កំពុង​កាន់​អំណាច​ឈ្នះ​ការ​បោះ​ឆ្នោត​នេះ។

គណបក្សប្រឆាំង​បាន​ឲ្យ​ដឹង​ថា ខ្លួន​នឹង​ធ្វើ​មហាបាតុកម្ម​ ប្រសិន​បើ​រដ្ឋាភិ​បា​ល​មិន​​ព្រម​បង្កើត​គណៈកម្មាធិការស៊ើប​អង្កេត​ឯករាជ្យ​មួយ​ដើម្បី​ស៊ើប​អង្កេត​លទ្ធ​ផល​នៃ​ការ​បោះ​ឆ្នោត​នេះ​ដែល​គណបក្ស​ទាំងពីរ​សុទ្ធតែបាន​ប្រកាសឈ្នះ​រៀង​ៗ​ខ្លួន ប៉ុន្តែ​មាន​សេចក្តី​រាយ​​​ការណ៍​អំពី​ភាព​មិន​ប្រ​ក្រ​តី​ច្រើន​។

រដ្ឋាភិបាល​បាន​ដាក់​បញ្ចូន​កងទ័ព​រាប់​រយ​នាក់​មករាជធានី​​ភ្នំពេញ​ ហើយ​រៀបចំ​ការ​ហ្វឹក​​​​​​​ហាត់​សម​ជា​លក្ខណៈពិសេ​ស​សម្រាប់​កម្លាំង​សន្តិសុខ​ទាំង​នេះ​​មុន​ការ​តវ៉ានេះ ហើយ​បាន​ព្រមាន​គណ​បក្ស​សង្គ្រោះ​ជាតិ​ថា​​​ នឹង​ទទួល​ខុស​ត្រូវ​ចំពោះ​អំពើ​ហិង្សាជាយថា​ហេតុ​​​ណាមួយ​។

លោក ហេង សំណាង​ ជា​អ្នក​រៀប​ចំ​ម្នាក់​នៅ​ក្នុង​អ្នក​រៀប​ចំ​ការ​ដង្ហែ​ក្បួន​កាល​ពី​ម្សិល​មិញ​នេះ​រំពឹង​ថា បាតុកម្ម​នេះ​​នឹង​ធ្វើ​ឡើង​ដោយ​សន្តិវិធី​ ប៉ុន្តែ​បារម្ភ​ថា រដ្ឋាភិ​បា​ល​នឹង​​បង្កប់​​មនុស្ស​នៅ​ក្នុង​ក្រុម​បាតុករ​​ដើម្បី​បង្ក​បញ្ហា។ លោក​បាន​និយាយដល់​ការ​ធ្វើ​បាតុ​កម្ម​នាពេល​ខាង​មុខ​នេះ​ថា “ យើង​មិន​បារម្ភ​ទេ ហើយ​យើង​នឹង​ធ្វើ​អ្វី​ៗស្រប​​ទៅ​តាម​ច្បាប់​។​ប៉ុន្តែ​យើង​បារម្ភ​ខ្លាច​មាន​នរណា​ម្នាក់​ជ្រៀត​​​ចូល​ហើយ​បង្ក​បញ្ហា”។

លោក ហេង សំណាង​ ជា​និស្សិត​ច្បាប់​នៅ​​​​សាកល​វិទ្យា​ល័យ​ជាតិ​គ្រប់​គ្រង​បាន​និយាយ​​​ថា ក្រុម​នេះ​មាន​គម្រោង​ផ្សព្វ​ផ្សាយ​​​អហិង្សា​​​របស់​ខ្លួន​ តាម​រយៈ​ការ​ជូន​ផ្កា​ឈូក​ដល់​នគរបាល​​​​និង​ទាហាន​នៅ​ជុំវិញ​ទីក្រុង​ភ្នំ​ពេញ​នៅ​ពីរបី​ថ្ងៃ​បន្ទាប់​នេះ។

សកម្មភាព​ស្រដៀង​គ្នា​នេះ​បាន​បណ្ថា​ល​ឲ្យ​មនុស្ស​បួន​នាក់​ត្រូវ​បាន​ចាប់​ខ្លួន​កាល​ពី​ថ្ងៃទី​១៥​ខែ​សីហា​​ដែល​ក្នុង​នោះមាន​​និស្សិត​​​ពីរ​នាក់​ផង។បើទោះ​ជា​អ្នក​ទាំង​បួ​ន​​ត្រូវ​បាន​ដោះ​លែង​នៅ​ក្រៅ​ឃុំ​បណ្តោះ​អាសន្ន​ភ្លាម​ៗ​ក៏​ដោយ ក៏​ពួកគេ​នៅ​ជាប់​ចោទ​ពីបទ​ញុះ​​​ញង់​នៅ​ឡើយ​។

រដ្ឋាភិបាលចោទ​ប្រកាន់​ពួក​គេ​ថា មាន​ទំនាក់​ទំនង​ជាមួយ​ពលរដ្ឋអាមេរិក​ដើ​ម​​​កំណើត​ខ្មែរមួយ​ក្រុម​ជាក្រុម​ប្រឆាំង​ដែ​ល​​​មូល​ដ្ឋាន​នៅ​សហរដ្ឋ​អាមេរិក ហើយដែ​ល​រដ្ឋាភិបាល​បាន​ចាត់​ទុក​ជា​ភេរវករនោះ​ ប៉ុន្តែ​ក្រុម​សង្គម​ស៊ីវិល​និង​អ្នក​ច្បាប់​និយាយថា ខ្លួន​មិន​បាន​រក​ឃើញ​​ភ័ស្តុតាង​ស្តីពី​ឥរិយាបថ​ឬ​​​គោល​បំណងប្រ​ព្រឹត្តអំពើ​​ឧក្រិដ្ឋ​ណាមួយ​ទេ។

លោក ហិន ឌីឡែន ដែល​បាន​ចូល​រួម​ការ​ដង្ហែ​​ក្បួន​កាលពី​ម្សិលមិញ​បាន​និយា​យថា ពួក​​​គេ​​សង្ឃឹម​ថា នឹង​រៃអង្គាសប្រាក់​និង​ប្រមូល​អ្នក​គាំទ្រ​បន្ថែម​ទៀតមុន​ពេល​ធ្វើ​ការ​ចែ​ក​ផ្កា​។
លោក​បាន​និយាយថា “ វាក៏​អាស្រ័យ​លើ​​​បរិយាកាស​នយោបាយផងដែរ​។​វាប្រ​ហែល​ជា​រសើបខ្លាំង​ណាស់​​នៅពេល​នេះ​។​ប៉ុន្តែ​ប្រាកដ​ណា​ស់​យើង​នឹង​ធ្វើ​”។

នៅ​ចុង​បញ្ចប់​នៃ​ការដង្ហែ​ក្បួន​ដែ​លមាន​​​​​​​​​​រយៈពេល​កន្លះម៉ោង​នេះ ក្រុម​នេះ​​​ប្រមូល​ហត្ថលេខានិង​ស្នាម​មេដៃមាន​​ខៀវ​និង​​​ក្រហម​​​​ នៅ​លើញត្តិ​មួយ​​ ស្នើ​ឲ្យលើកលែង​​ការ​ចោទ​ប្រកាន់​ពី​បទ​ញុះ​ញង់​មកលើ​និស្សិតទាំង​​ពីររូប​ឈ្មោះ ទត់ ចាន់​បញ្ញា​ និង​សុខ ដាលីស ចេញ​វិញ​។ លោក ហ៊ិន ឌីឡែន បាន​និយាយ​​​ថា ពួកគេ​គ្រោង​នឹង​ដាក់​ញត្តិ​​ទៅ​សាលា​​​ដំបូង​​​​រាជធា​នី​ភ្នំពេញ​នៅ​ថ្ងៃ​នេះ។

និស្សិត​ទាំងពីរ​រូបនេះ​ត្រូវ​បាន​ចាប់​ខ្លួន​ ខណៈពេល​កំពុង​វេចខ្ចប់​ផ្កាកុលាប​ពណ៌​លឿង​ចំនួន​១.០០០ទង ដែល​លោក សួន​ សេរីរដ្ឋា ជា​ប្រធាន​ក្រុមប្រឆាំង​​ដែល​មាន​មូល​ដ្ឋាន​នៅ​សហរដ្ឋ​អាមេរិក​បាន​រៀ​ប​ចំនិង​ចំណាយ​ប្រាក់ទិញ​។

ក្រុម​អង្គការ​សិទ្ធិ​មនុស្សហៅ​ការ​ចោ​ទ​ប្រកាន់​អ្នក​ទាំងបួននេះ​​ថា  គ្មានមូល​ដ្ឋាន ហើយ​ទទូច​ឲ្យ​អាជ្ញា​ធរ​លើក​លែង​ការ​ចោទ​ប្រកាន់​មក​លើ​ពួកគេ​។

អ្នក​ស្រី ជីវ វួចថេង ដែល​កូន​ស្រី​​ទាំង​ពីរ​របស់​អ្នក​ស្រី​បាន​ដើរ​តាម​ពី​ក្រោយ​អ្នក​ស្រី​ ជុំ​វិញ​វត្តភ្នំ​នោះ​បាន​និយាយថា អ្នក​ស្រី​ពិត​ជា​ ចង់​​ចូ​ល​រួម​នៅ​ក្នុង​ការ​តវ៉ា​នាពេល​ខាង​មុខ​នេះ​ បើទោះ​មាន​ការ​បារម្ភ​ពី​អំពី​ហិង្សា​ក៏​ដោយ។

អ្នក​ស្រី​បាន​និយាយថា “ ប្រសិន​បើ​គ្មាន​ដំណោះ​ស្រាយ​ទេ ខ្ញុំ​នឹង​ចូល​រួម​មហា​បាតុ​កម្ម​។មុន​និង​ក្រោយ​ យើង​នឹង​ស្លាប់​​ ដូច្នេះ​យើង​មិន​ខ្លាច​នឹង​ចូល​រួម​ទេ។​យើង​នឹង​ចូល​រួមដើម្បី​ភាព​រុងរឿង​និង​ការ​អភិ​វឌ្ឍ​ប្រទេស​របស់​យើង​”៕

ប្រែសម្រួលដោយ អ៊ូច សូនី​​​
​​​​​​​​​​​​
​​​​​​​​​​​​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស