CATEGORY
ព័ត៌មានជាតិ
សាលាដំបូងខេត្តព្រះសីហនុបណ្ដេញអ្នកភូមិចេញពីដីមានវិវាទ
មន្ត្រីនិងសកម្មជនការពារសិទ្ធិមនុស្សបានឲ្យដឹងថា កាលពីម្សិលមិញ កម្មករបានចុះរុះរើផ្ទះចំនួន៦២ខ្នងនៅក្នុងស្រុកស្ទឹងហាវ ខេត្តព្រះសីហនុ ហើយបានបណ្ដេញអ្នកភូមិប្រហែល៧០គ្រួសារ បន្ទាប់ពីសាលាដំបូងខេត្តបានសម្រេចអនុវត្តសាលក្រមដែលបានចេញជាយូរមកហើយនិងដែលបានចាត់ទុកគ្រួសារទាំងនេះថា បានរស់នៅលើដីរបស់ខ្លួនដោយខុសច្បាប់នោះ។
លោក ម៉ុង មុនីចរិយា...
ច្បាប់បោះឆ្នោតដ៏ចម្រូងចម្រាសត្រូវបានអនុម័តដោយសភា
កាលពីម្សិលមិញ រដ្ឋសភាបានអនុម័តច្បាប់បោះឆ្នោតថ្មីចំនួនពីរជាឯកច្ឆ័ន្ទ ដោយបើកផ្លូវឲ្យមានការបង្កើតគណៈកម្មាធិការជាតិរៀបចំការបោះឆ្នោតថ្មី (គ.ជ.ប.) ដែលមានសមាជិកមកពីគណបក្សទាំងពីរចូលរួមនៅមុនថ្ងៃចូលឆ្នាំខ្មែរនាពាក់កណ្ដាលខែមេសា។
បន្ទាប់ពីកិច្ចពិភាក្សារយៈពេល៧ខែធ្វើសេចក្ដីព្រាងច្បាប់ដើម្បីបង្កើត គ.ជ.ប.ថ្មី និងដើម្បីធ្វើវិសោធនកម្មច្បាប់បោះឆ្នោតចាស់ សមាជិកសភាចំនួន១០៣រូបក្នុងចំណោមសមាជិកសភាចំនួន១២៣រូប បានចូលរួមសម័យប្រជុំសភាពិសេសមួយកាលពីម្សិលមិញ...
ការស្ទង់មតិរកឃើញថា យុវជនកម្ពុជាទទួលយកអំពើពុករលួយដោយស្ម័គ្រចិត្ត
យោងតាមលទ្ធផលនៃការស្រាវជ្រាវដែលចេញកាលពីថ្ងៃពុធដោយអង្គការតម្លាភាពកម្ពុជា (TIC) បានឲ្យដឹងថា ពលរដ្ឋកម្ពុជាភាគច្រើនបំផុតអាយុចន្លោះ១៥ឆ្នាំទៅ៣០ឆ្នាំ ត្រៀមខ្លួនសូកប៉ាន់ដើម្បីសម្រេចកិច្ចការ ហើយជាច្រើននាក់ជឿថា ពួកគេអាចចូលរួមក្នុងអំពើពុករលួយដោយមិនបាត់បង់សុចរិតភាពរបស់ខ្លួនទៀតផង។
ក្នុងចំណោម "យុវជន" ១.២០០នាក់ដែលអង្គការនេះបានសម្ភាសនៅទូទាំងប្រទេសកាលពីឆ្នាំមុន...
លោកនាយករដ្ឋមន្ត្រី ហ៊ុន សែន បានព្រមានថានឹងចាប់លោក កឹម សុខា អនុប្រធានគណបក្សសង្គ្រោះជាតិ ប្រសិនបើលោកហ៊ានដឹកនាំបាតុកម្មដើម្បីរំដោះមន្ត្រីព័ត៌មានគណបក្សសង្គោះជាតិ លោក មាជ សុវណ្ណរ៉ា ដែលកំពុងជាប់ពន្ធនាគារ។
លោក ហ៊ុន សែន បានមានប្រសាសន៍កាលពីព្រឹកមិញក្នុងពិធីប្រគល់ប័ណ្ណជ័យលាភីអាហារូបករណ៍ដល់និស្សិត នៅឯវិទ្យាស្ថានជាតិអប់រំថា "ឥឡូវខ្ញុំសួរសំណួរទៅលោក បើសិនជាលោក មាជ សុវណ្ណរ៉ា មិនអាចចេញពីគុកក្រោយចូលឆ្នាំ តើលោកនឹងធ្វើអ្វី? លោកនឹងដឹកនាំមនុស្សតាមចិញ្ចើមថ្នល់ទៀត ឬអី? ធាតុផ្សំកំពុងរង់ចាំលោកហើយ អាវុធហត្ថ នគរបាល ត្រៀមខ្លួន ខ្នោះលាបពណ៌ឲ្យស្អាតបន្តិច"។
លោក ហ៊ុន សែន បានមានប្រសាសន៍បន្តថា "ឥឡូវខ្ញុំចង់សួរលោកឯង លោកឯងត្រៀមធ្វើអ្វី ព្រោះលោកឯងកំពុងតែស្ថិតក្នុងពិរុទ្ធភាពជាមេដឹកនាំនៃការផ្តួលរំលំរដ្ឋាភិបាលស្របច្បាប់។ ឥឡូវបើសិនជាលោកឯងដឹកនាំបាតុកម្មដើម្បី ឬក៏ដឹកនាំទៅរំដោះអ្នកទោស ឬលោកឯងធ្វើអីទៀត?"។
កាលពីសប្តាហ៍មុន លោក កឹម សុខា អនុប្រធានគណបក្សសង្គ្រោះជាតិ បានជួបសួរសុខទុក្ខលោក សុវណ្ណារ៉ា នៅឯពន្ធនាគារព្រៃស ដែលត្រូវបានចាប់ខ្លួនពាក់ព័ន្ធនឹងហេតុការណ៍ប៉ះទង្គិចហិង្សាមួយនៅទីលានប្រជាធិបតេយ្យកាលពីថ្ងៃទី ១៥ ខែកក្កដា ឆ្នាំមុន។ នៅពេលនោះលោក សុខា បានមានប្រសាសន៍ថា លោកសង្ឃឹមថា លោក សុវណ្ណារ៉ា នឹងត្រូវដោះលែងពីពន្ធនាគារ នៅពេលដែលច្បាប់បោះឆ្នោត និងច្បាប់រៀបចំគណៈកម្មាធិការជាតិរៀបចំការបោះឆ្នោត ត្រូវបានអនុម័តនោះ។
គណបក្សប្រឆាំង បានអះអាងថា ការចាប់ខ្លួនរបស់លោក សុវណ្ណារ៉ា គឺពាក់ព័ន្ធនឹងរឿងនយោបាយ៕
លោក ហ៊ុន សែន គំរាមចាត់ការលោក កឹម សុខា តាមផ្លូវច្បាប់
ក្នុងខួប៤៥ឆ្នាំនៃការបណ្តេញព្រះអង្គម្ចាស់ នរោត្តម សីហនុ ចេញពីអំណាចនៅក្នុងឆ្នាំ១៩៧០ពីសំណាក់លោក លន់ នល់ ដែលមានការគំាទ្រពីសហរដ្ឋអាមេរិក លោកនាយករដ្ឋមន្ត្រី ហ៊ុន សែន បានចោទប្រកាន់គណបក្សសង្គ្រោះជាតិជាសាធារណៈកាលពីម្សិលមិញ ថា បានប៉ុនប៉ងផ្តួលរំលំរដ្ឋាភិបាលលោក។
លោក កឹម សុខា អនុប្រធានគណបក្សសង្គ្រោះជាតិ បានថ្លែងទៅកាន់ក្រុមអ្នកគាំទ្រនៅក្នុងសហរដ្ឋអាេមរិកកាលពីសប្តាហ៍មុនថា លោកមានការសោកស្តាយដែលគណបក្សប្រឆាំងមិនអាចបណ្តេញគណបក្សប្រជាជនកម្ពុជាចេញពីអំណាចបាន ក្រោយពីការបោះឆ្នោតជាតិក្នុងឆ្នាំ២០១៣ ហើយបានចាត់ទុកកិច្ចព្រមព្រៀងនយោបាយក្រោយការបោះឆ្នោតថា ជាការសម្របសម្រួលទាំងមិនពេញចិត្ត។
អំឡុងសុន្ទរកថាធ្វើឡើងនៅក្នុងក្រុងប៉ោយប៉ែត ខេត្តបន្ទាយមានជ័យកាលពីម្សិលមិញ លោក ហ៊ុន សែន បានរិះគន់ការអត្ថាធិប្បាយទាំងនេះខ្លាំងៗថាជាភ័ស្តុតាងបង្ហាញថា គណបក្សសង្គ្រោះជាតិមានបំណងផ្តួលរំលំរដ្ឋាភិបាល ក្រោយការបោះឆ្នោតជាតិដ៏ចម្រូងចម្រាស។
លោក ហ៊ុន សែន បានលើកឡើងអំឡុងពិធីបើកការដ្ឋានស្ថាបនាផ្លូវថ្មីមួយខ្សែក្នុងក្រុងប៉ោយប៉ែតថា អាចនឹងមានការចាត់វិធានការផ្លូវច្បាប់ប្រឆាំងលោក កឹម សុខា ដោយសារ តែ"ការសារភាព" របស់លោក។
លោកបានមានប្រសាសន៍យ៉ាងដូច្នេះថា “ឥឡូវបែរជាមានអ្នកចេញមកសារភាពថា គេបានប្រឹងប្រែងផ្តួលរដ្ឋាភិបាល ផ្តួលគណបក្សប្រជាជន តែមិនបានសម្រេច។ គេបរាជ័យ ហើយសុំទោសប្រជាពលរដ្ឋនៅអាមេរិក។អញ្ចឹងយើងចាត់ការតាមផ្លូវច្បាប់បែបណា? បើមេចោរសារភាពហើយ មេចោរសារភាពហើយ តើចាត់ការផ្លូវច្បាប់យ៉ាងណា? អញ្ចឹងអ្នកខូចខាតទ្រព្យសម្បត្តិទាំងប៉ុន្មានទៅរកតែម្នាក់ហ្នឹងទៅ។ ចាប់យកមកទារលុយទៅ អាហ្នឹងត្រូវហើយ អត់ខុសទេ។ ពេលនេះចោរបានចាប់ផ្តើមបង្ហាញមុខហើយ មេខ្លោងដែលចង់ផ្តួលរដ្ឋាភិបាល។ ខ្ញុំសង្ឃឹមថា តុលាការមិនល្ងង់ទេ ពីព្រោះពួកគេគួរតែកត់ត្រាអ្វីដែលបាននិយាយ ពីព្រោះ ក៏ត្រូវបានកោះហៅទៅសាកសួរដែរ"។
លោក កឹម សុខា និងលោក សម រង្ស៊ី ប្រធានគណបក្សសង្គ្រោះជាតិ ត្រូវបានកោះហៅទៅសាកសួរនៅសាលាដំបូងរាជធានីភ្នំពេញកាលពីខែមករាឆ្នាំ២០១៤ ជុំវិញការពាក់ព័ន្ធរបស់លោកទាំងពីរនៅក្នុងការតវ៉ាក្នុងវិស័យការងារ ដែលបានបញ្ចប់ទៅដោយការបង្ហូរឈាមកាលពីដើមខែនោះ ដោយកម្មករប្រាំនាក់ត្រូវបានកងរាជអាវុធហត្ថបាញ់ស្លាប់។
ការតវ៉ារបស់គណបក្សសង្គ្រោះជាតិចន្លោះពីខែកញ្ញា ឆ្នាំ២០១៣ដល់ខែមករាឆ្នាំ២០១៤ បង្ហាញយ៉ាងច្បាស់ថា គណបក្សនេះមានបំណងបណ្តេញលោក ហ៊ុន សែន ចេញពីអំណាច ដោយដឹកនាំប្រជាពលរដ្ឋរាប់មឺុននាក់ហែរក្បួនពាសពេញរាជធានីភ្នំពេញដោយស្រែកថា "ហ៊ុន សែន អើយចុះចេញទៅ" និងទាមទារឲ្យមានការបោះឆ្នោតឡើយវិញ។
ទាំងលោក កឹម សុខា និងលោក សម រង្ស៊ី បានសន្យាម្តងហើយម្តងទៀតអំឡុងការតវ៉ាថា នឹងមិនចូលសភាឡើយ ប្រសិនបើគ្មានការបោះឆ្នោតមុនអាណត្តិដែលយុត្តិធម៌ជាងមុន និងដែលលោកទាំងពីរលើកឡើងថា នឹងធានាការបណ្តេញលោក ហ៊ុន សែន ចេញពីអំណាចទេនោះ។
ថ្លែងទៅកាន់ក្រុមអ្នកគាំទ្រគណបក្សសង្គ្រោះជាតិនៅក្នុងរដ្ឋកាលីហ្វ័រញ៉ា កាលពីថ្ងៃសុក្រ លោក កឹម សុខា បានសូមទោសដែលគណបក្សរបស់លោកមិនអាចសម្រេចការផ្លាស់ប្តូរ "ឲ្យបានល្អ ឲ្យបានលឿន និងឲ្យបានពេញលេញ" អំឡុងការតវ៉ា ហើយបែរជាងាកទៅចរចាជាមួយគណបក្សប្រជាជនកម្ពុជាទៅវិញ។
លោក កឹម សុខា បានមានប្រសាសន៍ថា "យើងមានបំណងផ្លាស់ប្តូរឲ្យបានទាំងស្រុង ប៉ុន្តែ យើងដឹងហើយថា ការវិវឌ្ឍខាងនយោបាយគឺមិនដូចការចង់បានរបស់យើងគ្រប់ពេលទេ។ ពេលខ្លះ យើងមិនអាចអនុវត្ត បាន១០០ភាគរយឡើយ ពីព្រោះយើងមិនមែនធ្វើបដិវត្តន៍នោះទេ។ សូម្បីរដ្ឋាភិបាលសហរដ្ឋអាមេរិក នៅពេលយើងធ្វើបាតុកម្ម គេបានសុំឲ្យយើងកុំចេញទៅតវ៉ាតាមដងផ្លូវ ព្រោះវាអាចមានអំពើហិង្សា ហើយគេតែងតែចង់ឲ្យយើងចរចា ហើយគេនិយាយថា ' ហេតុអីអ្នកឯងមិនទៅចរចា?'”។
ការអត្ថាធិប្បាយរបស់លោក កឹម សុខា ក៏បណ្តាលឲ្យមានប្រតិកម្មយ៉ាងខ្លាំងដែរកាលពីម្សិលមិញ ពីសំណាក់លោក ឈាង វុន តំណាងរាស្ត្រគណបក្សប្រជាជនកម្ពុជា និងជាអ្នកនាំពាក្យរដ្ឋសភា ដែលពីមុនកាន់តំណែងជាឯកអគ្គរាជទូតកម្ពុជាប្រចាំប្រទេសអូស្ត្រាលី។
នៅឯសន្និសីទកាសែតមួយធ្វើឡើងនៅក្នុងរាជធានីភ្នំពេញក្រោយសុន្ទរកថារបស់លោក ហ៊ុន សែន កាលពីម្សិលមិញ លោក ឈាង វុន បានមានប្រសាសន៍ថា ការអត្ថាធិប្បាយរបស់លោក កឹម សុខា អំពីការទម្លាក់គណបក្សប្រជាជនកម្ពុជាចេញពីអំណាច គឺស្របគ្នាទៅនឹងព័ត៌មានសើុបការណ៍សម្ងាត់ដែលលោកទទួលបានកាលពីចុងឆ្នាំ២០១៣ ពាក់ព័ន្ធនឹងបាតុកម្មរបស់គណបក្សប្រឆាំង។
លោក ឈាង វុន បានមានប្រសាសន៍ទៀតថា លោកទទួលបានលិខិត "សម្ងាត់បំផុត"មួយច្បាប់ពីប្រភពមួយដែលលោកសុំមិនបញ្ចេញ ដែលបានលើកឡើងថា ពលរដ្ឋអាមេរិកមួយរូបឈ្មោះ វីលៀម បាត់ឃើស (William Butkus) មន្ត្រីរបស់អង្គការលើកលែងទោសអន្តរជាតិ (Amnesty International) បានលាតត្រដាងថា សមាជិកសភាមួយរូបរបស់សហរដ្ឋអាមេរិកបានណែនាំគណបក្សសង្គ្រោះជាតិពីរបៀបរៀបចំការតវ៉ារបស់ខ្លួនក្រោយការបោះឆ្នោត។
តំណាងរាស្ត្រគណបក្សប្រជាជនកម្ពុជារូបនេះបានលើកឡើងទៀតថា សមាជិកសភាសហរដ្ឋអាមេរិក លោក ស្ទីវ ឆាបូត (Steve Chabot) ដែលជាប្រធានអនុគណៈកម្មាធិការកិច្ចការបរទេស បានណែនាំលោក សម រង្ស៊ី ពីរបៀបបណ្តេញលោក ហ៊ុន សែន ចេញពីអំណាចតាមរយៈបាតុកម្មតាមដងផ្លូវ រហូតដល់សមាជិកព្រឹទ្ធសភាសហរដ្ឋអាមេរិក លោក ឌីក ដឺប៊ែន (Dick Durban) បានអន្តរាគមន៍ឲ្យបញ្ឈប់ការប្រឹងប្រែងនេះ។
លោក ឈាង វុន បានមានប្រសាសន៍ថា "យោងតាមលោក បាត់ឃើស បានឲ្យដឹងថា លោក ឌីក ដឺប៊ែន បានស្នើសុំឲ្យលោក ស្ទីវ ឆាបូត បង្អង់ ការផ្លាស់ប្តូរនៅកម្ពុជាតាមរយៈការញុះញុង និងជួយលោក សម រង្ស៊ី ឲ្យដណ្តើមអំណាច។ លោក ស្ទីវ ឆាបូត ជាអ្នកទទួលខុសត្រូវលើបញ្ហានេះ"។
លោក ឈាង វុន បានបន្តថា លោក ស្ទីវ ឆាបូត បានណែនាំលោក សម រង្ស៊ី ពីរបៀប"ផ្តួលគណបក្សប្រជាជន ផ្តួលសម្តេច ហ៊ុន សែន តាមរយៈអំណាចប្រជាពលរដ្ឋដើរតាមចិញ្ចើមថ្នល់" នេះបើយោងតាមលិខិតសម្ងាត់ដែលលោកទទួលបាន។
ទោះជាយ៉ាងណា លោក ចេយ៍ រ៉ាមែន (Jay Raman) អ្នកនាំពាក្យស្ថានទូតសហរដ្ឋអាមេរិកប្រចាំកម្ពុជាបានមានប្រសាសន៍ថា ស្ថានទូតមិនដឹងអំពីការទំនាក់ទំនងណាមួយរវាងសមាជិកសភាសហរដ្ឋអាមេរិក និងគណបក្សសង្គ្រោះជាតិទេជុំវិញការតវ៉ារបស់គណបក្សនេះ។ លោកបានលើកឡើងនៅក្នុងអីុម៉េលមួយថា "យើងគ្មានព័ត៌មានអំពីការចោទប្រកាន់នេះទេ"។
ទាំងលោក សម រង្ស៊ី និងលោក យឹម សុវណ្ណ ដែលជាអ្នកនាំពាក្យគណបក្សប្រឆាំង មិនអាចទាក់ទងសុំការបំភ្លឺបានទេកាលពីម្សិលមិញ ពាក់ព័ន្ធនឹងបញ្ហានេះ៕សុខុម (រាយការណ៍បន្ថែមដោយ Alex Willemyns)
សាលារាជធានីផ្ដល់ជម្រើសថ្មីសម្រាប់គ្រួសារនៅជ្រោយចង្វា
កាលពីម្សិលមិញ គ្រួសារដែលរស់នៅលើដីមានវិវាទក្នុងតំបន់ជ្រោយចង្វា រាជធានីភ្នំពេញ ត្រូវបានផ្ដល់ឲ្យនូវជម្រើសថ្មីមួយដោយលោក ប៉ា សុជាតិវង្ស អភិបាលរាជធានីភ្នំពេញ គឺបោះបង់ចោលដី៩០ភាគរយរបស់ខ្លួន ហើយរស់នៅលើដីដែលនៅសេសសល់...
ច្បាប់បោះឆ្នោតថ្មីដ៏ចម្រូងចម្រាសនឹងត្រូវបានអនុម័តដោយគ្មានការកែប្រែ
កាលពីម្សិលមិញ លោក ឈាង វុន អ្នកនាំពាក្យរដ្ឋសភាបានលើកឡើងថា ការគាំទ្រពីគណបក្សទាំងពីរសម្រាប់ច្បាប់បោះឆ្នោតថ្មីចំនួនពីរនឹងធានាបានថា ច្បាប់ទាំងពីរនេះនឹងត្រូវអនុម័តដោយរដ្ឋសភាដោយមានការពិភាក្សាដេញដោលតិចតួចនៅថ្ងៃនេះ ទោះបីជាសាធារណជនមួយចំនួនធំព្រួយបារម្ភអំពីខ្លឹមសារនៃច្បាប់បោះឆ្នោតថ្មីនេះក៏ដោយ។
អង្គការសង្គមស៊ីវិលបានរិះគន់បទប្បញ្ញត្តិនៅក្នុងច្បាប់ថ្មីនេះ ដែលរួមមានដូចជាការពិន័យដ៏ធ្ងន់ធ្ងរចំពោះអង្គការមិនមែនរដ្ឋាភិបាលដែលមិនរក្សា "អព្យាក្រឹតភាព" នយោបាយ និងចំពោះអ្នកអង្កេតការណ៍បោះឆ្នោតដែល "រំខាន" មន្ត្រីបោះឆ្នោត។
ក្មេងជំទង់ម្នាក់ត្រូវបានចាប់ខ្លួនពីបទរំលោភក្មេងស្រីជាច្រើននាក់នៅខេត្តស្ទឹងត្រែង
យោងតាមនគរបាលបានឲ្យដឹងថា កាលពីម្សិលមិញ ក្មេងប្រុសជំទង់ម្នាក់ត្រូវបានចាប់ខ្លួននៅក្នុងខេត្តស្ទឹងត្រែង ពីបទសង្ស័យថា បានរំលោភក្មេងស្រីចំនួនពីរនាក់ម្ដងហើយម្ដងទៀតក្នុងរយៈពេលប្រហែល៣ខែ។ នគរបាលក៏បានសង្ស័យផងដែរថា អាចមានជនរងគ្រោះច្រើនជាងនេះ។
យោងតាមលោក ឡុង សាវ៉េត...
មន្ត្រីមួយរូបបាននិយាយថា កាលពីម្សិលមិញ កងរាជអាវុធហត្ថរាជធានីភ្នំពេញ បានចាប់ខ្លួនបុរសអ្នកបើកបររថយន្តក្រុងវ័យ៣៥ឆ្នាំម្នាក់នៅក្នុងខណ្ឌជ្រោយចង្វា បន្ទាប់ពីត្រូវមិត្តស្រីប្តឹងថា ខ្លួនបានដាក់ថ្នាំនាង រួចលួចថតសកម្មភាពរួមរ័ករបស់ពួកគេ ហើយបន្ទាប់មកយកវីដេអូនោះមកគំរាមនាង។
លោក ផាន់ តារាវុធ មេបញ្ជាការរងកងរាជអាវុធហត្ថរាជធានីបានមានប្រសាសន៍ថា ស្ត្រីវ័យ៣២ឆ្នាំរូបនេះបានប្រាប់កងរាជអាវុធហត្ថថា នាងបានស្គាល់គ្នាជាមួយបុរសឈ្មោះ ម៉ុល សីហា លើកដំបូងនៅក្នុងឆ្នាំ២០១៣ ហើយមិនយូរប៉ុន្មានពួកគេក៏ចាប់ផ្តើមដេកជាមួយគ្នា។ ប៉ុន្តែ ជនរងគ្រោះបានអះអាងថា មានមួយលើកនោះមិត្តប្រុសរបស់នាងបានដាក់ថ្នាំនាង ហើយថតសកម្មភាពខ្លួនរួមរ័កជាមួយនាង។
លោកបានមានប្រសាសន៍ទៀតថា "ទី១ ឈ្មោះសីហា ត្រូវបានចោទប្រកាន់ពីបទចាប់រំលោភជនរងគ្រោះដោយការដាក់ថ្នាំក្នុងភេសជ្ជៈរបស់នាង ហើយថតសកម្មភាពខ្លួនរួមរ័កជាមួយនាង។ ទី២ជននេះត្រូវបានចោទប្រកាន់ពីបទគំរាមជំរិតទារប្រាក់។ នាងមិនបានដឹងថា ជននេះលួចថតនាងទេ ប៉ុន្តែជននេះបានលាក់វាទុក ហើយក្រោយមកបានយកវាមកគំរាមទារប្រាក់ពីនាង"។
ជនរងគ្រោះបានប្រាប់កងរាជអាវុធហត្ថថា នាងបានធ្វើតាមការគំរាមកំហែងរបស់បុរសឈ្មោះ ម៉ុល សីហា ចំនួនប្រាំលើកដែលគំរាមបញ្ចេញវីដេអូនោះជាសាធារណៈ ហើយបានឲ្យប្រាក់ទៅជននេះក្នុងមួយលើកៗចន្លោះពី១.០០០ដុល្លារទៅ៥.០០០ដុល្លារ។ ប៉ុន្តែ នៅពេលជននេះប៉ុនប៉ងជំរិតទារប្រាក់លើកចុងក្រោយចំនួន៨០.០០០ដុល្លារ នាងក៏បង្ខំចិត្តប្តឹងសមត្ថកិច្ច។
លោក ផាន តារាវុធ បានមានប្រសាសន៍ថា "លើកចុងក្រោយ ជននេះគំរាមទារប្រាក់៨០.០០០ដុល្លារពីស្ត្រីរងគ្រោះ ជាហេតុធ្វើឲ្យនាងគ្មានជម្រើសក្រៅពីប្តឹងមកកងរាជអាវុធហត្ថរបស់យើង"។
កងរាជអាវុធហត្ថបានសុំឲ្យជនរងគ្រោះរៀបចំណាត់ជួបជាមួយឈ្មោះ ម៉ុល សីហា នៅក្បែរផ្ទះរបស់នាងក្នុងសង្កាត់ជ្រោយចង្វា ហើយនៅពេល ជននេះបង្ហាញមុខ សមត្ថកិច្ចក៏ធ្វើការចាប់ខ្លួនតែម្តង។
លោក ផាន់ តារាវុធ បានមានប្រសាសន៍ថា ជនសង្ស័យដែលបច្ចុប្បន្នជាអ្នកបើកបរឲ្យក្រុមហ៊ុនរថយន្តក្រុងទេសចរណ៍មួយនៅក្នុងរាជធានីភ្នំពេញរូបនេះនឹងត្រូវបញ្ជូនខ្លួនទៅកាន់សាលាដំបូងរាជធានីនៅព្រឹកនេះដើម្បីធ្វើការចោទប្រកាន់ពីបទដាក់ថ្នាំ ចាប់រំលោភ លួចថតវីដេអូ និងជំរិតទារប្រាក់៕សុខុម
លោកនាយករដ្ឋមន្ត្រី ហ៊ុន សែន បានមានប្រសាសន៍ថ្ងៃនេះថា លោកចង់ឲ្យនំអន្សមយក្សដែលផលិតឡើងដើម្បីអបអរសាទរក្នុងពិធីអង្គរសង្ក្រាន្តក្នុងខេត្តសៀមរាប កត់ត្រាចូលក្នុងកំណត់ត្រាពិភពលោក។
ថ្លែងក្នុងពិធីបើកការដ្ឋានស្ថាបនាផ្លូវជាតិលេខ៥៨ ដែលភ្ជាប់ពីទីក្រុងប៉ោយប៉ែត ខេត្តបន្ទាយមានជ័យទៅកាន់ខេត្តឧត្តរមានជ័យ នៅក្នុងខេត្តបន្ទាយមានជ័យ លោក ហ៊ុន សែន បានមានប្រសាសន៍ថា "ឆ្នាំទៅ២តោន៨ ឥឡូវនេះគ្រោងធ្វើ៣តោន២ អន្សមយក្ស ប្រហែលជាត្រូវអញ្ជើញពួកខាងហ្គីនណេស ពួកអ្នកកំណត់ត្រាពិពភលោកមកពិនិត្យមើល ហើយឲ្យគាត់មកពិនិត្យមើលនៅកម្ពុជា ថៃ ឡាវ វៀតណាម និងចិន។ ពួកស៊ីអន្សមជ្រូក តើអន្សមណាធំជាងគេ ចូលហ្គិនណេស ប៊ុក បានឬអត់"។
កាលពីឆ្នាំមុន ចុងភៅប្រើពេលប្រហែលមួយសប្តាហ៍ដើម្បីវេចនំអន្សមយក្សមួយដែលដាក់តាំងនៅក្នុងក្រុងសៀមរាប។
លោក ហ៊ុន សែន បានមានប្រសាសន៍ថា លោកនឹងចូលរួមក្នុងពិធីបើកអង្គរសង្ក្រាន្តដែលប្រារព្ធឡើងពីថ្ងៃទី១៤ដល់ថ្ងៃទី១៦ខែមេសាក្នុងខេត្តសៀមរាប៕