 ចំនួន ១៧៩១ក្បាលដី ព្រមទាំងសម្រេចឃុំខ្លួនជនត្រូវចោទចំនួន ១០នាក់ និងចេញដីកាបង្គាប់ឱ្យចាប់ខ្លួនជនត្រូវចោទចំនួន ៩នាក់ផ្សេងទៀត។){kind=link}
តុលាការខេត្តកំពត សម្រេចបង្កកទ្រព្យរបស់ក្រុមហ៊ុន ជា សារ៉ន ឈ្មោះ «រៀលធី ឯ.ក» ដែលរួមមានគណនីធនាគារ និងគ្រឹះស្ថានមីក្រូហិរញ្ញវត្ថុចំនួន ៩៥គណនី និងអចលនវត្ថុ (ដី) ចំនួន ១៧៩១ក្បាលដី ព្រមទាំងសម្រេចឃុំខ្លួនជនត្រូវចោទចំនួន ១០នាក់ និងចេញដីកាបង្គាប់ឱ្យចាប់ខ្លួនជនត្រូវចោទចំនួន ៩នាក់ផ្សេងទៀត។
បើតាមសេចក្តីប្រកាសព័ត៌មានរបស់សាលាដំបូងខេត្តកំពត នៅថ្ងៃទី២៥ មេសា ឱ្យដឹងថា តុលាការសម្រេចបង្កកទ្រព្យរបស់ក្រុមហ៊ុន ជា សារ៉ន រៀលធី ឯ.ក ដែលរួមមាន គណនីធនាគារ និងគ្រឹះស្ថានមីក្រូហិរញ្ញវត្ថុចំនួន ៩៥គណនី និងអចលនវត្ថុ (ដី) ចំនួន ១៧៩១ក្បាលដី។
តុលាការក៏បានសម្រេចឃុំខ្លួនជនត្រូវចោទចំនួន ១០នាក់ និងបានចេញដីកាបង្គាប់ឱ្យចាប់ខ្លួនជនត្រូវចោទចំនួន ៩នាក់ ប៉ុន្តែមកដល់ពេលនេះ សមត្ថកិច្ចពុំទាន់ចាប់ខ្លួនបានជនត្រូវចោទទាំង ៩នាក់នោះនៅឡើយទេ។
ប្រភពដដែលបានលើកឡើងថា តុលាការក៏បានចេញដីកាបង្គាប់ឱ្យនាំខ្លួនជនត្រូវចោទចំនួន ៤០នាក់ទៀត និងបានចេញដីកាបង្គាប់ឱ្យចូលខ្លួនលើជនត្រូវចោទចំនួន ១០នាក់ ដោយកំណត់ឱ្យចូលខ្លួនគិតចាប់ពីថ្ងៃទី២៩ ខែមេសា ឆ្នាំ២០២៤ ដល់ថ្ងៃទី០៩ ខែឧសភា ឆ្នាំ២០២៤។
សេចក្តីប្រកាសព័ត៌មានដដែលនេះឲ្យដឹងថា មុនឈានដល់ការសម្រេចបែបនេះ ចៅក្រមស៊ើបសួរ និងក្រឡាបញ្ជី បានទៅស្តាប់ចម្លើយ និងធ្វើកំណត់ហេតុស្ដីពីការតាំងខ្លួនជាដើមបណ្ដឹងរដ្ឋប្បវេណីលើជនរងគ្រោះដល់មូលដ្ឋានទាំង ៩ក្រុង-ស្រុកនៃខេត្តកំពត និងការស្តាប់ចម្លើយរបស់ជនរងគ្រោះដែលនៅក្រៅខេត្តកំពត សរុប ៥៦៨០នាក់ និងសាក្សីជាអាជ្ញាធរចំនួន ២៤៩នាក់។
សមត្ថកិច្ចខេត្តកំពត បានចាប់ខ្លួនឧកញ៉ា ជា សារ៉ន ប្រធានក្រុមហ៊ុន ជា សារ៉ន និងបក្ខពួកមួយចំនួនទៀត ហើយតុលាការបានឃុំជាបណ្ដោះអាសន្នពីបទឆបោកមានស្ថានទម្ងន់ទោសកាលពីខែមេសា ឆ្នាំ២០២៣។
ក្រោយពេលចាប់ខ្លួនឧកញ៉ា ជា សារ៉ន ហើយ ពលរដ្ឋរាប់ពាន់នាក់ដាក់ពាក្យប្តឹងទាមទារឱ្យអាជ្ញាធរជួយអន្តរាគមន៍ទារលុយពីក្រុមហ៊ុន ប្រគល់ឱ្យពួកគាត់វិញ ដើម្បីយកទៅបង់សងធនាគារវិញ ព្រោះពលរដ្ឋបានដាក់លុយវិនិយោគជាមួយក្រុមហ៊ុននេះម្នាក់ៗចន្លោះពី ១ម៉ឺនទៅជិត ១០ម៉ឺនដុល្លារ។
ទម្រង់អាជីវកម្មក្រុមហ៊ុននេះ គឺឱ្យពលរដ្ឋទិញដី ឬដាក់លុយឱ្យក្រុមហ៊ុនខ្ចី ដើម្បីទទួលបានការប្រាក់ ឬប្រាក់ចំណេញចន្លោះពី ៣% ទៅ ៤% នៃចំនួនលុយដែលបានដាក់។
របាយការណ៍បឋមរបស់អាជ្ញាធរខេត្តកំពត ឱ្យដឹងថា ពលរដ្ឋជាង ២ពាន់នាក់ប្តឹងក្រុមហ៊ុន ជា សារ៉ន ទាមទារប្រាក់សរុបប្រមាណ ៤០លានដុល្លារ។
អ្នកស្រាវជ្រាវផ្នែកអភិវឌ្ឍន៍ផ្នត់គំនិត សេក សុជាតិ ប្រាប់សារព័ត៌មាន The Cambodia Daily កន្លងមកថា លោកអំពាវនាវឱ្យរដ្ឋាភិបាលពិនិត្យសមាសភាពបុគ្គលដែលទទួលបានគោរមងារជាឧកញ៉ា អ្នកឧកញ៉ា កន្លងមកឡើងវិញ ព្រោះថាបុគ្គលមួយចំនួនកំពុងប្រើប្រាស់គោរមងារដ៏ថ្លៃថ្នូរនេះ ប្រព្រឹត្តទង្វើស្មោកគ្រោក ដែលនាំឱ្យអាប់ឱនដល់កិត្តិយសព្រះមហាក្សត្រ និងរាជរដ្ឋាភិបាលយ៉ាងធ្ងន់ធ្ងរ។
លោក សេក សុជាតិ បន្តថា ផ្អែកតាមរយៈបទពិសោធន៍ជាបន្តបន្ទាប់ដែលក្រុមឧកញ៉ាមួយចំនួនបានប្រព្រឹត្ត ដូចជា ការបោកប្រាស់លុយពលរដ្ឋតាមរយៈក្រុមហ៊ុនអចលនទ្រព្យ និងការបណ្ដាក់ទុន ឬការប្រព្រឹត្តទង្វើឧក្រិដ្ឋផ្សេងៗ បានបង្ហាញពីកម្សោយរបស់រដ្ឋាភិបាលនៅលើឆាកអន្តរជាតិយ៉ាងខ្លាំង ក្នុងការវាយតម្លៃលក្ខណៈរបស់បុគ្គលដែលស័ក្តិសមនឹងទទួលបានគោរមងារជាឧកញ៉ាពីព្រះមហាក្សត្រ។
ប្រភពដដែលត្អូញត្អែរថា រដ្ឋាភិបាលមិនគួរបណ្តែតបណ្តោយឱ្យទឹកលុយខ្មៅងងឹតរបស់ឧកញ៉ាមួយចំនួន បំផ្លាញកិត្តិយស និងសេចក្តីថ្លៃថ្នូររបស់ព្រះមហាក្សត្រ និងរាជរដ្ឋាភិបាលបន្តទៀតឡើយ ព្រោះថាការស្នើសុំទៅព្រះមហាក្សត្រឱ្យផ្តល់គោរមងារជាឧកញ៉ាដល់បុគ្គលណាម្នាក់ មិនមែនផ្អែកតែទៅលើចំនួនទឹកប្រាក់ដែលរាជរដ្ឋាភិបាលបានកំណត់តែមួយមុខនោះទេ ប៉ុន្តែគួរតែផ្ដោតលើស្នាដៃក្នុងការជួយប្រទេសជាតិ កិត្តិនាមដែលពលរដ្ឋទទួលស្គាល់ និងអត្តចរិតឫកពាររបស់បុគ្គលនោះផ្ទាល់ផងដែរ៕