លោកនាយករដ្ឋមន្ត្រី ហ៊ុន សែន បានមានប្រសាសន៍ថ្ងៃនេះថា លោកចង់ឲ្យនំអន្សមយក្សដែលផលិតឡើងដើម្បីអបអរសាទរក្នុងពិធីអង្គរសង្ក្រាន្តក្នុងខេត្តសៀមរាប កត់ត្រាចូលក្នុងកំណត់ត្រាពិភពលោក។
ថ្លែងក្នុងពិធីបើកការដ្ឋានស្ថាបនាផ្លូវជាតិលេខ៥៨ ដែលភ្ជាប់ពីទីក្រុងប៉ោយប៉ែត ខេត្តបន្ទាយមានជ័យទៅកាន់ខេត្តឧត្តរមានជ័យ នៅក្នុងខេត្តបន្ទាយមានជ័យ លោក ហ៊ុន សែន បានមានប្រសាសន៍ថា “ឆ្នាំទៅ២តោន៨ ឥឡូវនេះគ្រោងធ្វើ៣តោន២ អន្សមយក្ស ប្រហែលជាត្រូវអញ្ជើញពួកខាងហ្គីនណេស ពួកអ្នកកំណត់ត្រាពិពភលោកមកពិនិត្យមើល ហើយឲ្យគាត់មកពិនិត្យមើលនៅកម្ពុជា ថៃ ឡាវ វៀតណាម និងចិន។ ពួកស៊ីអន្សមជ្រូក តើអន្សមណាធំជាងគេ ចូលហ្គិនណេស ប៊ុក បានឬអត់”។
កាលពីឆ្នាំមុន ចុងភៅប្រើពេលប្រហែលមួយសប្តាហ៍ដើម្បីវេចនំអន្សមយក្សមួយដែលដាក់តាំងនៅក្នុងក្រុងសៀមរាប។
លោក ហ៊ុន សែន បានមានប្រសាសន៍ថា លោកនឹងចូលរួមក្នុងពិធីបើកអង្គរសង្ក្រាន្តដែលប្រារព្ធឡើងពីថ្ងៃទី១៤ដល់ថ្ងៃទី១៦ខែមេសាក្នុងខេត្តសៀមរាប៕