TAG
second
អង្គការមិនមែនរដ្ឋាភិបាលការពារសកម្មជនដែលត្រូវបានបដិសេធមិនបន្តទិដ្ឋាការ
កាលពីម្សិលមិញ អង្គការមិនមែនរដ្ឋាភិបាលក្នុងមូលដ្ឋាន និងសហជីពមួយចំនួនបានថ្កោលទោសសេចក្តីសម្រេចរបស់រដ្ឋាភិបាលក្នុងការមិនបន្តទិដ្ឋាការឲ្យលោក អាឡិច កុងហ្សាឡេស ដាវីដសុន (Alex Gonzalez-Davidson) សកម្មជនការពារបរិស្ថានដែលនិយាយឥតសំចៃ ហើយបានជំរុញឲ្យអាជ្ញាធរកែប្រែសេចក្តីសម្រេចេនះ។
អង្គការសិទ្ធិមនុស្ស សហជីព សហគមន៍ និងសមាគមចំនួន៣១បានចេញសេចក្តីថ្លែងការណ៍រួមមួយលើកឡើងពីការបដិសេធរបស់ក្រសួងមហាផ្ទៃមិនបន្តទិដ្ឋាការដល់ជនជាតិអេស្ប៉ាញរូបនេះ ដែលអស់សុពលភាពកាលពីថ្ងៃសុក្រ ថាជាការវាយប្រហារច្បាស់ក្រឡែតទៅលើអ្នកប្រឆាំងស្របច្បាប់ ដើម្បីផលប្រយោជន៍គ្រួសារមួយក្នុងចំណោមគ្រួសារមានអំណាចបំផុតនៅក្នុងប្រទេស។
ឪពុកម្ដាយរបស់លោក ថោង សារ៉ាត់ ត្រូវបានបញ្ជូនត្រឡប់ទៅពន្ធនាគារវិញ
ក្រុមមន្ត្រីបានឲ្យដឹងថា កាលពីយប់ថ្ងៃអាទិត្យនគរបាលខេត្តស្វាយរៀងបានចាប់ខ្លួនឪពុកម្ដាយរបស់ឧត្ដមសេនីយ៍ទោ ថោង សារ៉ាត់ ដែលកំពុងរត់គេចខ្លួន និងដែលនគរបាលកំពុងតាមចាប់ខ្លួនពីបទរៀបចំផែនការធ្វើឃាតលោក អុឹង ម៉េងជឺ កាលពីខែវិច្ឆិកា ខណៈពួកគាត់ទាំងពីរនាក់ប៉ុនប៉ងរត់គេចទៅប្រទេសវៀតណាមតាមរយៈរថយន្តសង្គ្រោះបន្ទាន់។
យោងតាមមេធាវីរបស់ឪពុកម្ដាយលោក ថោង សារ៉ាត់ បានឲ្យដឹងថា កាលពីម្សិលមិញ សាលាដំបូងរាជធានីភ្នំពេញបានបញ្ជូនឪពុកម្ដាយរបស់លោក ថោង សារ៉ាត់ ត្រឡប់ទៅពន្ធនាគារវិញពីបទរំលោភលើលក្ខខណ្ឌសុំនៅក្រៅឃុំ។ ដំបូងឡើយ ពួកគាត់ទាំងពីរនាក់ត្រូវបានបញ្ជូនទៅពន្ធនាគារពីបទរក្សាទុកអាវុធកាលពីថ្ងៃទី៧ ខែធ្នូ ក្រោយពេលនគរបាលបានឆ្មក់ចូលភូមគ្រឹះរបស់គ្រួសារពួកគាត់នៅក្នុងរាជធានីភ្នំពេញ ដោយរកឃើញអាវុធខុសច្បាប់មួយចំនួន។
ជនជាតិរុស្ស៊ីពីរនាក់ត្រូវបានចាប់ខ្លួនបន្ទាប់ពីហេតុការណ៍វាយតប់គ្នាជុំវិញប្រាក់ចំណេញបានពីការប្រគុំតន្ត្រី
ក្រុមមន្ត្រីបានឲ្យដឹងកាលពីម្សិលមិញថា នគរបាលបានចាប់ខ្លួនបុរសជនជាតិរុស្ស៊ីពីរនាក់នៅក្នុងវីឡាជួលមួយក្នុងក្រុងព្រះសីហនុ កាលពីថ្ងៃសៅរ៍ បន្ទាប់ពីបុរសជនជាតិម៉ុលដាវីម្នាក់បានរងរបួសនៅក្នុងការវាយតប់គ្នាមួយ ដែលកើតឡើងនៅពេលភាគីម្ខាងបានទាមទារចំណែកនៃប្រាក់ចំណេញបានមកពីការប្រគុំតន្ត្រី Kazantip ដែលនឹងធ្វើឡើងនាពេលឆាប់ៗ។
លោក ម៉ែន វន្នី នាយការិយាល័យនគរបាលព្រហ្មទណ្ឌកម្រិតស្រាលខេត្តនេះបានលើកឡើងថា ការវាយតប់គ្នាបានចាប់ផ្ដើមកើតឡើងនៅម៉ោង៨និង៣០នាទីយប់ថ្ងៃសុក្រ នៅសណ្ឋាគារ និងកាស៊ីណូ Queenco ក្នុងសង្កាត់លេខ៣ នៅពេលបុរសមួយក្រុមមានគ្នាប្រាំមួយនាក់ដើរសំដៅទៅកាន់ក្រុមមួយទៀតដែលមានគ្នាបួននាក់។
កម្មករកាត់ដេរទទួលបានការដំឡើងប្រាក់ខែ ប៉ុន្តែ ការងារបន្ថែមម៉ោងធ្លាក់ចុះ
កម្មកររោងចក្រកាត់ដេរនៅទូទាំងប្រទេសបានចាប់ផ្តើមទទួលយកក្រដាសសម្រាប់បើកប្រាក់ខែរបស់ខ្លួននៅក្នុងខែនេះដោយមានការដំឡើង២៨ដុល្លារជាលើកដំបូង បន្ទាប់ពីរដ្ឋាភិបាលបានសម្រេចបន្ថែមពីលើប្រាក់ខែគោលចំនួន១០០ដុល្លារនៅក្នុងវិស័យនេះ។ ប៉ុន្តែ នៅពេលការងារបន្ថែមម៉ោងបានធ្លាក់ចុះ ក្ដីសង្ឃឹមចំពោះការដំឡើងប្រាក់ខែថ្មីនេះត្រូវរលាយសាបសូន្យទៅវិញ។
នៅខាងក្រៅរោងចក្រមួយចំនួននៅទូទាំងរាជធានីភ្នំពេញកាលពីពីរថ្ងៃកន្លងមកនេះ កម្មករនាំគ្នាលើកឡើងថា ការឡើងថ្លៃផ្សេងៗនិងការងារបន្ថែមម៉ោងថយចុះបានធ្វើឲ្យពួកគាត់អាចសល់ប្រាក់ផ្ញើទៅឲ្យក្រុមគ្រួសារតិចជាងមុនពេលមិនទាន់ត្រូវបានដំឡើងបន្ថែមចំនួន២៨ដុល្លារទៅទៀតកាលពីខែមុន។
អ្នកខ្លះបាននិយាយថា ពួកគាត់ទទួលបានប្រាក់ប្រចាំខែតិចជាងមុនពេលមិនទាន់ត្រូវបានដំឡើងប្រាក់ខែទៅទៀត។
កម្មការិនីម្នាក់ ឈ្មោះ សែម ពៅ ដែលបានធ្វើការងារក្រៅម៉ោងជាជាងអ៊ុតសក់ បន្ទាប់ពីឈប់សម្រាកពីការងារនៅរោងចក្រ Bright Sky ក្នុងខណ្ឌពោធិ៍សែនជ័យបានលើកឡើងថា គាត់ទទួលបានក្រដាសសម្រាប់បើកប្រាក់ខែកាលពីថ្ងៃព្រហស្បតិ៍ ហើយថា ប្រាក់ខែដែលទទួលបានចំនួន២១៥ដុល្លារ គឺលើសពីខែមុនត្រឹមតែប្រហែល១០ដុល្លារ ប៉ុណ្ណោះ។
កម្មការិនីរូបនេះបាននិយាយថា "ប្រាក់ខែរបស់យើងត្រូវបានដំឡើងនៅខែនេះ ប៉ុន្តែ វាស្ទើរតែដូចទៅនឹងខែមុន ព្រោះយើងគ្មានការងារបន្ថែមម៉ោងធ្វើ។ ពីមុនយើងអាចធ្វើបន្ថែមម៉ោងបាន ប៉ុន្តែ ឥឡូវនេះគេមិនហៅឲ្យទៅធ្វើការងារបន្ថែមទៀតទេ ព្រោះការបញ្ជាទិញធ្លាក់ចុះ"។
ម្ចាស់ផ្ទះ និងអ្នកលក់ដូរនៅជុំវិញរោងចក្របានដំឡើងថ្លៃផ្ទះ និងថ្លៃទំនិញនានា នៅពេលណារោងចក្រដំឡើងប្រាក់ខែឲ្យកម្មករ ហើយសម្រាប់ សែម ពៅ បាននិយាយថា លើកនេះក៏ដូចជាលើកមុនៗដែរ។
សែម ពៅ បាននិយាយបន្ថែមថា "ពីមុនយើងចំណាយ១៨.០០០រៀល ក្នុងមួយថ្ងៃសម្រាប់អាហារ ហើយឥឡូវនេះយើងចំណាយប្រហែល២០.០០០រៀល ក្នុងមួយថ្ងៃ។ យើងធ្លាប់ចំណាយ៣៥ដុល្លារក្នុងមួយខែសម្រាប់ជួលផ្ទះ ប៉ុន្តែ ឥឡូវត្រូវចំណាយដល់ទៅ៤០ដុល្លារ"។
នៅឯរោងចក្រ Cambo Kotop ក្នុងខណ្ឌពោធិ៍សែនជ័យ កម្មការិនីម្នាក់ឈ្មោះ ហៀន ចិន្តា បានលើកឡើងថា គាត់ទទួលបានប្រាក់ខែច្រើនជាងមុនកាលពីខែមករា ដោយមានទាំងប្រាក់បន្ថែមម៉ោងខ្លះៗផងដែរ។
ហៀន ចិន្តា បាននិយាយថា "វានៅតែមិនទាន់គ្រប់គ្រាន់សម្រាប់ការងាររបស់យើងព្រោះអ្វីៗគ្រប់យ៉ាងចេះតែឡើងថ្លៃ"។
ក្នុងពេលថ្មីៗនេះ រដ្ឋាភិបាលបានចាប់ផ្តើមផែនការមួយ ដើម្បីជួយឲ្យកម្មកររោងចក្រកាត់ដេរទទួលបានទឹក និងអគ្គិសនីប្រើប្រាស់ក្នុងតម្លៃថោកជាងមុន ទោះជាយ៉ាងណា ផែនការនេះនឹងត្រូវចំណាយពេលរាប់ខែទៀតដើម្បីបញ្ចប់។
កម្មការិនីម្នាក់ផ្សេងទៀតឈ្មោះ ឈិន ភារម្យ ដែលធ្វើការនៅរោងចក្រកាត់ដេរ Makalot ក្នុងខណ្ឌមានជ័យបានលើកឡើងថា គាត់ទទួលបានប្រាក់ប្រចាំខែចំនួន១៨០ដុល្លារនៅក្នុងខែនេះ នៅពេលគាត់ទៅទទួលយកក្រដាសសម្រាប់បើកប្រាក់ខែកាលពីថ្ងៃសៅរ៍ ពោលគឺតិចជាងពេលធម្មតា២០ដុល្លារ។
ឈិន ភារម្យ បាននិយាយថា "ឥឡូវនេះយើងមានពេលសម្រាកច្រើន ព្រោះពុំសូវមានការងារច្រើនធ្វើដូចមុន"។
ប៉ុន្តែ កម្មការិនីរូបនេះបានលើកឡើងថា វាមានន័យថា គាត់អាចផ្ញើប្រាក់បានតិចជាងរាល់ដងដែលគាត់ផ្ញើទៅឲ្យក្រុមគ្រួសារក្នុងមួយខែៗចំនួន៧០ដុល្លារនោះ។
កម្មកររោងចក្រភាគច្រើនក្នុងចំណោមកម្មករប្រមាណ៦០០.០០០នាក់នៅទូទាំងប្រទេសបានចាកចេញពីស្រុកកំណើតដើម្បីស្វែងរកការងារធ្វើ ហើយពួកគេបានផ្ញើរប្រាក់ខែមួយផ្នែកទៅឲ្យក្រុមគ្រួសារជារៀងរាល់ខែ។
ប៉ុន្តែ រោងចក្រភាគច្រើននៅក្នុងចំណោមរោងចក្រប្រហែល៥០០ បានលើកឡើងថា ការបញ្ជាទិញពីក្រៅប្រទេសមានការធ្លាក់ចុះគួរឲ្យគត់សម្គាល់អំឡុងកន្លះឆ្នាំចុងក្រោយកាលពីឆ្នាំមុន ដែលជាហេតុធ្វើឲ្យពួកគេត្រូវកាត់បន្ថយការងារបន្ថែមម៉ោង។
រោងចក្របានបន្ទោសលើការតវ៉ាទូទាំងប្រទេសកាលពីចុងឆ្នាំ២០១៣ និងដើមឆ្នាំ២០១៤ និងការធ្វើកូដកម្មជាបន្តបន្ទាប់ទៀត ចំពោះការធ្វើឲ្យការបញ្ជាទិញធ្លាក់ចុះនេះដោយធ្វើឲ្យអ្នកបញ្ជាទិញបាត់បង់ជំនឿចិត្តមកលើប្រទេសកម្ពុជា។ ប្រាក់ខែគោលថ្មីក៏ធ្វើឲ្យវិស័យកាត់ដេរនៅក្នុងប្រទេសកម្ពុជាមិនអាចប្រកួតប្រជែងនឹងដៃគូក្នុងតំបន់របស់ខ្លួន រួមមានដូចជាប្រទេសបង់ក្លាដែស ដែលសព្វថ្ងៃប្រាក់ខែគោលសម្រាប់កម្មករគឺ ៦៨ដុល្លារក្នុងមួយខែនោះផងដែរ៕ស៊ុយឈាង
វត្តសាមគ្គីរង្សីដែលសម្បូរដោយបញ្ហា កៀងគរការគាំទ្រតាម Skype
ព្រះសង្ឃនៅវត្តមួយក្នុងរាជធានីភ្នំពេញ ដែលសាលារាជធានីគំរាមបិទចោលជុំវិញការចោទប្រកាន់ពីបទបង្កអំពើហិង្សាយ៉ាងរាលដាល និង "សកម្មភាពប្រឆាំងរដ្ឋាភិបាល" បានរៀបចំវីដេអូខុនហ្វើរិនមួយជាមួយអ្នកគាំទ្រនៅក្នុងប្រទេសកាណាដា និងប្រទេសអូស្ត្រាលីកាលពីម្សិលមិញ ដើម្បីកៀងគរការគាំទ្រ ហើយជាថ្មីម្ដងទៀតបានច្រានចោលការចោទប្រកាន់របស់សាលារាជធានី។
កាលពីសប្ដាហ៍មុន សាលារាជធានីបានប្រកាសថា ខ្លួននឹងចាប់ផ្ដើមការស៊ើបអង្កេតនៅវត្តសាមគ្គីរង្សី ដើម្បីសិក្សាស្រាវជ្រាវថា តើវត្តនេះត្រូវបានទទួលស្គាល់ដោយរដ្ឋាភិបាល និងថាតើព្រះសង្ឃក្នុងវត្តនេះត្រូវបានបំបួសជាផ្លូវការឬយ៉ាងណា។
ព្រះសង្ឃជាថ្នាក់ដឹកនាំគង់នៅវត្តសាមគ្គីរង្សីបានមានសង្ឃដីកាថា រដ្ឋាភិបាលចង់បិទវត្តនេះចោលដោយសារតែនេះជាវត្តមួយក្នុងចំណោមវត្តមួយចំនួនតូចនៅក្នុងប្រទេស ដែលហ៊ានក្រោកឈរការពារគ្រួសារដែលប្រឈមការបណ្ដេញចេញពីសំណាក់ក្រុមហ៊ុនអភិវឌ្ឍន៍ឯកជន។
កាលពីម្សិលមិញ វត្តនេះបានរៀបចំវីដេអូខុនហ្វើរិនមួយសម្រាប់ព្រះសង្ឃក្នុងវត្តនេះជាមួយអ្នកឧបត្ថម្ភគាំទ្រសំខាន់ចំនួនពីររូបរបស់វត្តនេះ គឺលោក ថាច់ ង៉ុកថាច់ ប្រធានសហព័ន្ធខ្មែរកម្ពុជាក្រោម មកពីប្រទេសកាណាដា និងព្រះតេជគុណ លីវ ពៅ...
តុលាការបដិសេធតំណាងរាស្ត្រគណបក្សសង្គ្រោះជាតិ មិនឲ្យចូលស្ដាប់សវនាការ
កាលពីម្សិលមិញ មេធាវីការពារសកម្មជនគណបក្សសង្គ្រោះជាតិ១១រូប ដែលកំពុងប្រឈមការចោទប្រកាន់ពីបទកុបកម្ម បានដើរចេញពីសាលាដំបូងរាជធានីភ្នំពេញ ជាការតវ៉ា បន្ទាប់ពីចៅក្រមមិនអនុញ្ញាតឲ្យតំណាងរាស្ត្រគណបក្សសង្គ្រោះជាតិបីរូប ដែលប្រឈមបទចោទប្រកាន់ដូចគ្នា ចូលស្ដាប់សវនាការមួយថ្ងៃពេញនៅថ្ងៃដំបូង។
សរុប សកម្មជន១១រូប និងតំណាងរាស្ត្រប្រាំពីររូបត្រូវបានចោទប្រកាន់ពីបទដឹកនាំ ឬចូលរួមក្នុងកុបកម្ម ក្រោយពីមានបាតុកម្មមួយកាលពីថ្ងៃទី១៥ ខែកក្កដា នៅទីលានប្រជាធិបតេយ្យ ដែលអំឡុងពេលនោះសន្តិសុខខណ្ឌដូនពេញ មួយចំនួនបានរងរបួស ដោយយ៉ាងហោចណាស់ប្រាំនាក់រងការវាយដំធ្ងន់ធ្ងរនៅក្នុងហេតុការណ៍ប៉ះទង្គិចគ្នាជាមួយអ្នកតវ៉ា។ ប្រាំរូបក្នុងចំណោមសកម្មជនទាំងនោះកំពុងជាប់ឃុំឃាំងនៅឡើយ។
ខណៈសវនាការកាលពីម្សិលមិញកំពុងប្រព្រឹត្តទៅ មេធាវីការពារដើមចោទទាំង៣៩នាក់នៅក្នុងសំណុំរឿងនេះ បានស្នើសុំឲ្យអង្គចៅក្រមបីរូបបញ្ជាតំណាងរាស្ត្រជាប់ចោទ ដែលមិនប្រឈមការជំនុំជម្រះ ប៉ុន្តែបង្ហាញមុខដើម្បីឃ្លាំមើលដំណើរការកាត់ក្ដី ឲ្យចាកចេញពីបន្ទប់សវនាការ។
បន្ទាប់ពីពិចារណារយៈពេលប្រហែល២០នាទី អង្គចៅក្រមបានយល់ព្រមតាមសំណើនេះ។...
Latest news
© 2021, ដេលី. All rights reserved.