37 C
Phnom Penh

ឪពុក​ម្ដាយ​របស់​លោក ថោង សារ៉ាត់ ត្រូវ​បាន​បញ្ជូន​ត្រឡប់​ទៅ​ពន្ធនាគារ​វិញ​

ដោយ ឌឹ ខេមបូឌា ដេលី

បទវិភាគ

ក្រុម​មន្ត្រី​បាន​ឲ្យ​ដឹង​ថា កាលពី​យប់​ថ្ងៃ​អាទិត្យ​នគរ​បាល​​ខេត្ត​ស្វាយ​រៀង​​បាន​ចាប់​ខ្លួន​ឪពុក​ម្ដាយ​របស់​​ឧត្ដម​សេនីយ៍​ទោ​ ថោង សារ៉ាត់ ដែល​កំពុង​រត់​គេច​ខ្លួន​ និង​ដែល​​នគរ​បាល​កំពុង​តាម​ចាប់​ខ្លួន​ពីបទ​​​រៀបចំ​​​ផែន​ការ​ធ្វើ​ឃាត​លោក​ អុឹង ម៉េងជឺ កាលពី​ខែ​វិច្ឆិកា ខណៈ​​ពួក​គាត់​ទាំងពីរ​នាក់​ប៉ុន​ប៉ង​រត់គេច​ទៅ​ប្រទេស​វៀតណាម​តាម​រយៈ​រថយន្ត​សង្គ្រោះ​បន្ទាន់។front

យោង​តាម​មេធាវី​របស់​ឪពុក​ម្ដាយ​លោក ថោង សារ៉ាត់ បាន​ឲ្យ​ដឹង​ថា កាលពី​ម្សិលមិញ សាលា​ដំបូង​រាជធានី​​ភ្នំពេញ​​​បាន​បញ្ជូន​ឪពុក​ម្ដាយ​របស់​លោក ថោង សារ៉ាត់ ត្រឡប់​ទៅ​ពន្ធនាគារ​វិញ​​ពីបទ​រំលោភ​លើ​លក្ខខណ្ឌ​​សុំ​នៅ​ក្រៅឃុំ​។ ដំបូង​ឡើយ ​ពួកគាត់​ទាំងពីរ​នាក់​ត្រូវ​បាន​បញ្ជូន​ទៅ​ពន្ធនាគារ​ពីបទ​រក្សា​ទុក​អាវុធ​​កាលពី​ថ្ងៃទី៧ ខែ​ធ្នូ ក្រោយ​ពេល​នគរ​បាល​​បាន​ឆ្មក់​ចូល​ភូមគ្រឹះ​​​របស់​គ្រួសារ​ពួកគាត់​នៅ​ក្នុង​​រាជធានី​ភ្នំពេញ ដោយ​រក​ឃើញ​អាវុធ​ខុស​ច្បាប់​មួយ​ចំនួន​។

​បន្ទាប់ពី​ការ​ដោះ​លែង​ឲ្យ​នៅ​ក្រៅ​ឃុំ​កាលពី​ថ្ងៃទី៧ ខែ​កុម្ភៈ លោក ថោង ចំរើន និង​អ្នកស្រី កែវ សាវី ជា​ឪពុក​ម្ដាយ​របស់​លោក ថោង សារ៉ាត់ ត្រូវ​បាន​បង្គាប់​មិន​ឲ្យ​ចាក​ចេញ​ពី​ប្រទេស​ឡើយ​ប្រសិន​បើ​គ្មាន​មេធាវី​របស់​ខ្លួន​​ដែល​ត្រូវ​ស្នើ​សុំ​ការ​អនុញ្ញាត​ពី​តុលាការ​ទៅ​ជាមួយ​ទេនោះ។

លោក​ ស៊ី សត្យា មេធាវី​របស់​ឪពុក​ម្ដាយ​លោក ថោង សារ៉ាត់ បាន​មាន​ប្រសាសន៍​បន្ទាប់​ពី​លោក ថោង ចំរើន និង​អ្នកស្រី​ កែវ សាវី ត្រូវ​ចៅក្រម​ស៊ើបសួរ​ លី សុខឡេង សាកសួរ​​កាលពី​ព្រឹក​ម្សិលមិញ​ថា “តុលាការ​បាន​សម្រេច​ឃុំខ្លួន​ពួកគាត់​ ព្រោះ​តុលាការ​​អះអាង​ថា ពួកគាត់​រំលោភ​សេចក្ដី​បង្គាប់​របស់​តុលាការ​។ ពួកគាត់​​គ្មាន​បំណង​រត់​គេច​ខ្លួន​ឡើយ”។ លោក​​បាន​ពន្យល់​ថា ឪពុក​ម្ដាយ​របស់​លោក ថោង សារ៉ាត់ បាន​ជិះ​រថយន្ត​សង្គ្រោះ​បន្ទាន់​ទៅ​កាន់​មន្ទីរ​ពេទ្យ​កាល់ម៉ែត​ក្នុង​រាជធានី​ភ្នំពេញ​។

តែ​ទោះ​ជាយ៉ាង​ណា លោក អេង​ សោភា នាយ​ការិយាល័យ​នគរ​បាល​ព្រហ្មទណ្ឌ​រាជធានី​បាន​លើក​ឡើង​ថា នគរ​បាល​ខេត្ត​ព្រៃវែង​​បាន​ចាប់​ខ្លួន​​ឪពុក​ម្ដាយ​របស់​លោក ថោង សារ៉ាត់ ខណៈពួកគាត់​កំពុង​ធ្វើ​ដំណើរ​ទៅ​កាន់​ព្រំដែន​វៀតណាម​។

លោក​បាន​មាន​ប្រសាសន៍​ថា “យើង​បាន​ចាប់​ខ្លួន​ពួកគាត់​ ខណៈ​ពួកគាត់​កំពុង​ធ្វើ​ដំណើរ​ទៅ​វៀតណាម​។ គាត់​​ [លោក ថោង ចំរើន​] ចង់​ទៅ​​ព្យាបាល​ជំងឺ​នៅ​ប្រទេស​វៀតណាម​។ វា​មិន​ដូច​ទៅ​នឹង​អ្វី​ដែល​មេធាវី​បាន​និយាយ​ឡើយ​”។

លោក សេង ពន្លក អធិការ​នគរ​បាល​ស្រុក​ពាមរក៍​​ ខេត្តព្រៃវែង បាន​លើក​ឡើង​ថា មន្ត្រី​របស់​លោក​បាន​ចាប់​ខ្លួន​​ឪពុក​ម្ដាយ​របស់​លោក ថោង សារ៉ាត់ នៅ​តាម​បណ្ដោយ​ផ្លូវ​ជាតិ​លេខ១ នៅ​ក្នុង​ឃុំ​អ្នក​លឿង ខណៈ​រថយន្ត​សង្គ្រោះ​បន្ទាន់​កំពុង​ធ្វើ​ដំណើរ​ចាក​ចេញពី​រាជ​ធានី​ភ្នំពេញ​។

លោក​បានមាន​ប្រសាសន៍​ថា “ខ្ញុំ​បាន​ចាប់​ខ្លួន​​ប្ដី​ប្រពន្ធ​ទាំង​ពីរ​នាក់​នេះ​នៅ​ម៉ោង​​៩និង៣០​យប់​កាលពី​ម្សិលមិញ​​តាម​បទបញ្ជា​ពី​ស្នង​ការ​​នគរ​​បាល​ខេត្ត​ព្រៃវែង”។ លោក​បាន​​បន្ថែម​ថា អ្នក​បើក​បរ​ម្នាក់ និង​ស្ត្រី​ម្នាក់​​ដែល​ស្ថិត​ក្នុង​ឯកសណ្ឋាន​​ជា​គិលានុបដ្ឋាយិកា​ក៏ស្ថិត​នៅ​ក្នុង​រថយន្ត​នេះ​ដែរ​​។

លោក ពន្លក បាន​លើក​ឡើង​ទៀត​ថា ​ឪពុក​ម្ដាយ​របស់​លោក ថោង សារ៉ាត់ បាន​ជិះ​រថយន្ត​សង្គ្រោះ​បន្ទាន់​របស់​គ្លីនិក​ឯកជន​ ប៉ុន្តែ​ថា លោក​មិន​​បាន​សរសេរ​ឈ្មោះ​គ្លីនិក​នេះ​នៅ​ក្នុង​របាយការណ៍​របស់​លោក​ឡើយ​។ លោក​បានមាន​ប្រសាសន៍​បន្ថែម​ទៀត​ថា “បន្ទាប់ពី​យើង​បាន​ចាប់​ខ្លួន​ពួកគាត់​ យើង​បាន​ប្រគល់​ពួកគាត់​​ទៅ​ឲ្យ​​កង​កម្លាំង​នគរ​បាល​រាជធានី​ភ្នំពេញ​”។

លោក ជួន ណារិន ស្នង​ការ​​រង​នគរ​បាល​រាជធានី​​បាន​បដិសេធ​មិន​ធ្វើ​អត្ថាធិប្បាយ​ឡើយ។

បញ្ហា​សុខភាព​របស់​លោក ថោង ចំរើន​ គឺ​ជា​មូលហេតុ​ដែល​ធ្វើ​ឲ្យ​សាលា​ដំបូង​រាជធានី​​សម្រេច​ដោះ​លែង​ពួកគាត់​​ឲ្យ​នៅ​ក្រៅឃុំ​កាលពី​ដើម​ខែ​នេះ​ ហើយ​លោក សត្យា បាន​លើក​ឡើង​ថា សុខភាព​របស់​លោក ថោង ចំរើន​ នៅ​តែ​​គួរ​ឲ្យ​ព្រួយបារម្ភ។

លោក​បាន​មាន​ប្រសាសន៍​ថា “ប្រសិន​បើ​តុលាការ​បន្ត​ឃុំខ្លួន​គាត់ វា​អាច​ប៉ះពាល់​យ៉ាង​ធ្ងន់​ធ្ងរ​ដល់​សុខភាព​របស់​គាត់​។ គាត់​អាច​ស្លាប់​ព្រោះ​ជំងឺ​ថ្លើម​របស់​គាត់​ធ្ងន់ធ្ងរ​ណាស់​”។

នៅ​ពេល​​ចូល​ទៅ​ក្នុង​តុលាការ​កាលពី​​ម្សិលមិញ លោក ថោង ចំរើន ​ដែល​មាន​ឧបករណ៍​ជំនួយ​បេះដូង​​ជាប់​ខ្លួន​ និង​អ្នកស្រី កែវ សាវី មិន​​ខ្វាយ​ខ្វល់​នឹង​សំណួរ​របស់​អ្នក​យកព័ត៌មាន​ឡើយ។

ឧត្ដមសេនីយ៍​ទោ ថោង សារ៉ាត់ ដែល​ត្រូវ​បាន​ចោទ​ប្រកាន់ពីបទ​បញ្ជា​ឲ្យ​អង្គរក្ស​ចំនួន​បួន​នាក់​របស់​ខ្លួន​ធ្វើ​ឃាត​លោក អុឹង ម៉េងជឺ កំពុង​រត់​គេច​ខ្លួន​នៅ​ឡើយ​។ អង្គរក្សទាំង​បួន​នាក់​នេះ​​កំពុង​ត្រូវ​បាន​ឃុំខ្លួន​នៅក្នុង​ពន្ធនាគារ​​ជាមួយ​អង្គរក្ស​ទី៥​ម្នាក់​ ដែល​ត្រូវ​បាន​ចាប់​ខ្លួន​កាលពី​ខែ​មុន​ពីបទ​ឲ្យ​ម៉ូតូ​របស់​ខ្លួន​​ទៅ​ពួកគេ[អង្គរក្សទាំង​បួន​]ខ្ចី៕ ស៊ុយឈាង​​​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស