កាលពីម្សិលមិញ អង្គការមិនមែនរដ្ឋាភិបាលក្នុងមូលដ្ឋាន និងសហជីពមួយចំនួនបានថ្កោលទោសសេចក្តីសម្រេចរបស់រដ្ឋាភិបាលក្នុងការមិនបន្តទិដ្ឋាការឲ្យលោក អាឡិច កុងហ្សាឡេស ដាវីដសុន (Alex Gonzalez-Davidson) សកម្មជនការពារបរិស្ថានដែលនិយាយឥតសំចៃ ហើយបានជំរុញឲ្យអាជ្ញាធរកែប្រែសេចក្តីសម្រេចេនះ។
អង្គការសិទ្ធិមនុស្ស សហជីព សហគមន៍ និងសមាគមចំនួន៣១បានចេញសេចក្តីថ្លែងការណ៍រួមមួយលើកឡើងពីការបដិសេធរបស់ក្រសួងមហាផ្ទៃមិនបន្តទិដ្ឋាការដល់ជនជាតិអេស្ប៉ាញរូបនេះ ដែលអស់សុពលភាពកាលពីថ្ងៃសុក្រ ថាជាការវាយប្រហារច្បាស់ក្រឡែតទៅលើអ្នកប្រឆាំងស្របច្បាប់ ដើម្បីផលប្រយោជន៍គ្រួសារមួយក្នុងចំណោមគ្រួសារមានអំណាចបំផុតនៅក្នុងប្រទេស។
សេចក្តីថ្លែងការណ៍ដដែលនេះលើកឡើងថា “យើងជំរុញឲ្យរដ្ឋាភិបាលកម្ពុជាពិចារណាសេចក្តីសម្រេចរបស់ខ្លួនឡើងវិញ ហើយអនុញ្ញាតឲ្យលោក កុងហ្សាឡេស ដាវីដសុន បន្តធ្វើការងារដើម្បីគាំទ្រដល់សហគមន៍មូលដ្ឋាន”។
លោក កុងហ្សាឡេស ដាវីដសុន និងអង្គការ Mother Nature ជាអង្គការមិនមែនរដ្ឋាភិបាលដែលលោកជាសហស្ថាបនិក បានជំទាស់ចំពោះគម្រោងសាងសង់ទំនប់វារីអគ្គិសនីនៅតំបន់ជ្រលងអារ៉ែងក្នុងខេត្តកោះកុងដែលគាំទ្រដោយលោក ឡាវ ម៉េងឃិន សមាជិកព្រឹទ្ធសភាគណបក្សប្រជាជនកម្ពុជា និងភរិយារបស់លោក ដែលមានដីយ៉ាងច្រើន នៅក្នុងប្រទេសកម្ពុជា ដែលក្នុងនោះ ប្រជាជនរាប់ពាន់គ្រួសារត្រូវបានបណ្តេញចេញដោយបង្ខំ។
ទំនប់វារីអគ្គិសនីស្ទឹងឆាយអារ៉ែង ប្រសិនបើត្រូវបានអនុញ្ញាតឲ្យសាងសង់ នឹងបង្ខំឲ្យអ្នកភូមិជនជាតិដើមភាគតិច៣០០គ្រួសារទៀតចាកចេញពីដីដូនតារបស់ខ្លួន ហើយធ្វើឲ្យជន់លិចជម្រកសត្វមួយចំនួន ដែលរងការគំរាមកំហែង។
ក្រសួងមហាផ្ទៃ បានលើកឡើងថា ខ្លួនបដិសេធមិនផ្តល់ទិដ្ឋាការដល់លោក កុងហ្សាឡេស ដាវីដសុន ដោយសារការបិទផ្លូវដែលគាត់ និងអង្គការមិនមែនរដ្ឋាភិបាលរបស់គាត់បានបិទផ្លូវដ៏សំខាន់ឆ្ពោះទៅតំបន់គម្រោងដែលធ្វើឲ្យក្បួនរថយន្តរបស់មន្ត្រីរដ្ឋាភិបាលទៅកាន់តំបន់ជ្រលងនោះជាប់គាំងរយៈពេលខ្លីកាលពីខែកញ្ញា។
អ្នកដែលបានចុះហត្ថលេខាលើសេចក្តីថ្លែងការណ៍កាលពីម្សិលមិញ លើកឡើងថា រដ្ឋាភិបាលចង់ឲ្យ លោក កុងហ្សាឡេស ដាវីដសុនចាកចេញដើម្បីឲ្យគម្រោងសាងសង់ទំនប់វារីអគ្គិសនីនេះដំណើរការទៅមុខ។
លោកស្រី ណាលី ពីឡូក ប្រធានអង្គការសិទ្ធិមនុស្សលីកាដូ បានលើកឡើងនៅក្នុងសេចក្តីថ្លែងការណ៍នោះថា សេចក្តីសម្រេចរបស់រដ្ឋាភិបាលបដិសេធមិនបន្តទិដ្ឋាការដល់ លោក កុងហ្សាឡេស ដាវីដសុន គឺជាឧទាហរណ៍ច្បាស់ក្រឡែតនៃការប៉ុនប៉ងរបស់រដ្ឋាភិបាលច្រានចោលការតស៊ូមតិរបស់ថ្នាក់ក្រោម និងបំបិទមាត់អ្នកប្រឆាំង”។
លោក អែ សារុំ នាយកប្រតិបត្តិសមាគមធាងត្នោត ជាអង្គការមិនមែនរដ្ឋាភិបាលផ្នែកសិទ្ធិលំនៅដ្ឋានបានលើកឡើងថា ការបង្ខំឲ្យសកម្មជនរូបនេះចាកចេញពីប្រទេសកម្ពុជាមិនអាចដោះស្រាយទុក្ខលំបាករបស់ជនជាតិដើមភាគតិចជងដែលប្រឈមការបណ្តេញចេញបានឡើយ។
លោកបានលើកឡើងថា “ជំនួសឲ្យការបណ្តេញគាត់ចេញ យកល្អអាជ្ញាធរគួរពិភាក្សាអំពីបញ្ហានេះជាមួយអង្គការ Mother Nature និង សហគមន៍មូលដ្ឋានដោយពិចារណាឲ្យបានល្អិុតល្អន់ពីបញ្ហានេះ។
កាលពីថ្ងៃច័ន្ទ លោក សម រង្ស៊ី ប្រធានគណបក្សសង្គ្រោះជាតិបានផ្ញើលិខិតមួយច្បាប់ជូនលោក ស ខេង រដ្ឋមន្ត្រីក្រសួងមហាផ្ទៃ ជំរុញឲ្យរូបលោកបន្តទិដ្ឋាការដល់លោក កុងហ្សាឡេស ដាវីដសុន ។
នៅពេលត្រូវបានទាក់ទងកាលពីម្សិលមិញ លោក សម រង្ស៊ី បានមានប្រសាសន៍ថា លោកមិនទាន់បានទទួលបានការឆ្លើយតបនៅឡើយទេ។ លោកបានមានប្រសាសន៍ថា “គ្មានហេតុផល មានហេតុផលមិនគ្រប់គ្រាន់ក្នុងការបង្ខំឲ្យលោក អាឡិច ចាកចេញពីប្រទេសដោយការមិនបន្តទិដ្ឋាការដល់រូបគាត់។ ខ្ញុំមិនគិតថា ហេតុផលដែលរដ្ឋាភិបាលធ្វើនេះត្រឹមត្រូវឡើយ”។
លោក សុខ ផល អគ្គនាយកនៃអគ្គនាយកដ្ឋានអន្តោប្រវេសន៍មិនអាចទាក់ទងសុំការអត្ថាធិប្បាយបានទេ ប៉ុន្តែ ពីមុនលោកធ្លាប់បដិសេធការដែលថា មានហេតុផលនយោបាយណាមួយពាក់ព័ន្ធសេចក្តីសម្រេចពីទិដ្ឋាការនេះ។
លោក សុខ វាសនា ប្រធានការិយាល័យអន្តោប្រវេសន៍បានមានប្រសាសន៍ថា លោក កុងហ្សាឡេស ដាវីដសុន នឹងត្រូវអនុញ្ញាតឲ្យដាក់ពាក្យសុំទិដ្ឋាការថ្មី ប្រសិនបើគាត់ចាកចេញពីប្រទេសកម្ពុជាដោយស្ម័គ្រចិត្ត ប៉ុន្តែ លោក មិនធ្វើអត្ថាធិប្បាយថា តើការដាក់ពាក្យសុំនោះនឹងត្រូវអនុម័តយល់ព្រម ឬយ៉ាងណានោះឡើយ។ លោកបានមានប្រសាសន៍ “វាអាស្រ័យលើសេចក្តីសម្រេចរបស់ក្រសួងមហាផ្ទៃ ។ យើងទទួលបានបទបញ្ជាកុំឲ្យបន្តទិដ្ឋាការដល់គាត់។ យើងមិនមានបទបញ្ជាហាមឃាត់រូបគាត់មិនឲ្យមកកាន់ប្រទេសកម្ពុជាវិញនោះឡើយ”។
លោក កុងហ្សាឡេស ដាវីដសុន បានលើកឡើងថា លោកនឹងមិនចាកចេញពីប្រទេសកម្ពុជាដោយស្ម័គ្រចិត្តឡើយ ហើយនឹងត្រូវបង្ខំឲ្យចាកចេញប្រសិនបើទិដ្ឋាការរបស់លោកមិនត្រូវបន្តត្រឹមថ្ងៃសុក្រ”៕សារុន