CATEGORY
ព័ត៌មានជាតិ
នគរបាលខេត្តបាត់ដំបងបានលើកឡើងថា ពួកគេបានជួបប្រជុំជាមួយអ្នកជំនាញមកពីរដ្ឋាភិបាលអាមេរិកកាលពីថ្ងៃព្រហស្បតិ៍ដើម្បីពិភាក្សាពីការបន្តស៊ើបអង្កេតលុយជាង៧លានដុល្លារ ជាអ្វីដែលគេជឿថា ជារូបិប័ណ្ណអាមេរិកក្លែងក្លាយដែលរឹបអូសបានពីជនជាតិថៃបីនាក់នៅក្នុងខេត្តនេះកាលពីខែមុន។
កាលពីថ្ងៃទី១៩ ខែកញ្ញា នគរបាលបានចាប់ខ្លួន ចំរ៉ាស ពុងសាត អាយុ៥២ឆ្នាំ ប្រាមុត រ៉ៃស៊ីរី អាយុ៤៨ឆ្នាំ និង កិត្តិថាម៉េត មិត្តិគុលសាវ៉ាត អាយុ៤៧ឆ្នាំ ខណៈដែលពួកគេទាំងបីបានព្យាយាមដោះដូរក្នុងទឹកប្រាក់ ៧.១៦០.០០០ដុល្លារ ដែលសុទ្ធតែជាក្រដាស១០០ដុល្លារ ជាមួយមន្ត្រីកម្ពុជាសម្ងាត់របស់យើងបន្ទាប់ពីឆ្លងចូលតាមច្រកព្រំដែនអូររំដួលក្នុងស្រុកភ្នំព្រឹកបានបន្តិច ។
ប្រាមុត និង កិត្តិថាម៉េត ត្រូវបានចោទប្រកាន់ពីបទដឹកជញ្ជូនរូបិយប័ណ្ណក្លែងក្លាយនេះ
និងបានបញ្ជូនទៅឃុំខ្លួនបណ្តោះអាសន្ននៅពន្ធនាគារខេត្ត។
លោក ពុងសាត វរនាវីឯកកងទ័ពជើងទឹកថៃ ត្រូវបានដោះលែងបន្ទាប់ពីនគរបាលបានសម្រេចថា ជននេះមិនជាប់ពាក់ព័ន្ធក្នុងប្រតិបត្តិការនោះ បើទោះជាមានវត្តមាននៅពេលការដោះដូរនោះក៏ដោយ។
លោក អូន ហៃ នាយការិយាល័យនគរបាលព្រហ្មទណ្ឌកម្រិតធ្ងន់ខេត្តបានមានប្រសាសន៍ថា នគរបាលជាន់ខ្ពស់ក្នុងខេត្តនេះបានជួបប្រជុំកាលពីថ្ងៃព្រហស្បតិ៍ជាមួយក្រុមអ្នកជំនាញអាមេរិកដែលមានមូលដ្ឋានក្នុងទីក្រុងបាងកក មន្ត្រីពីរនាក់មកពីស្ថានទូតអាមេរិកក្នុងរាជធានីភ្នំពេញនិងមន្ត្រីថៃ។
លោក ហៃ បានមានប្រសាសន៍ថា "ក្រុមអ្នកជំនាញបានប្រាប់យើងថា ពួកគេបានតាមដានការចរាចរលុយខុសច្បាប់នេះជាងពីរឆ្នាំមកហើយ។ ពួកគេបាននិយាយថា លុយនេះត្រូវបានបោះពុម្ពដោយប្រើប្រាស់មា៉ាស៊ីនបោះពុម្ពកម្រិតលេខ១ពីសហរដ្ឋអាមេរិក"។
លោក ចិត្រ វណ្ណី ស្នងការរងនគរបាលខេត្តបានមានប្រសាសន៍ថា ក្រុមអ្នកជំនាញមានតម្រុយតិចតួចក្នុង ការស៊ើបអង្កេតរកមេខ្លោងពាក់ព័ន្ធក្រដាសប្រាក់ក្លែងក្លាយនេះ។
លោក វណ្ណី បានមានប្រសាសន៍ថា " ក្រុមអ្នកជំនាញបានប្រាប់យើងថា លុយនេះមិនត្រូវបានយកដកពីធនាគារទេ ប៉ុន្តែត្រូវបានបោះពុម្ពក្នុងប្រទេសថៃ"។ លោកបានបន្ថែមថា ក្រុមអ្នកស៊ើបអង្កេតអាមេរិកបានលើកឡើងថា លុយនេះត្រូវបានបោះពុម្ពដោយប្រើវិធីសាស្ត្រទំនើបដែលត្រូវគេប្រើដើម្បីបោះពុម្ពរូបិយប័ណ្ណអាមេរិកក្លែងក្លាយ ដែលត្រូវបានរឹបអូសក្នុងប្រទេសម៉ាឡេស៊ីផងដែរ ។
លោក វណ្ណី បានមានប្រសាសន៍ថា " ក្រុមអ្នកជំនាញមិនបានប្រាប់យើងអំពីព័ត៌មានលម្អិតបន្ថែមទៀតអំពីលុយនេះទេ ប៉ុន្តែពួកគេបានប្រាប់យើងថា ជនទាំងនេះបានចំណាយពេលយ៉ាងតិចក៏ពីរខែដើម្បីបោះពុម្ពរូបិយប័ណ្ណនេះ"។
ស្ថានទូតអាមេរិកប្រចាំរាជធានីភ្នំពេញមិនបានឆ្លើយតបចំពោះសំណើសុំអត្ថាធិប្បាយឡើយ៕ សារុន
ក្រុមអ្នកតវ៉ាគំរាមដុតស្ថានទូតវៀតណាម
អ្នកតវ៉ាដែលនៅតែមានកំហឹងចំពោះការលើកឡើងដោយអតីតអ្នកនាំពាក្យស្ថានទូតវៀតណាមម្នាក់កាលពីបួនខែកន្លងទៅ បានបន្តធ្វើបាតុកម្មកាលពីចុងសប្ដាហ៍ដើម្បីទាមទារឲ្យមានការសូមអភ័យទោស ដោយបានដុតទង់ជាតិវៀតណាម និងគំរាមដុតស្ថានទូតវៀតណាមថែមទៀត។
អំឡុងកិច្ចសម្ភាសតាមវិទ្យុកាលពីខែមិថុនា លោក ត្រាន វ៉ានថុង អ្នកនាំពាក្យ និងជាលេខាទី១ស្ថានទូតវៀតណាមនៅពេលនោះ...
តំណាងសមាគមគ្រូបង្រៀនដ៏ធំបំផុតក្នុងប្រទេសកម្ពុជាដែលបានដាក់ញត្តិទៅក្រសួងអប់រំកាលពីម្សិលមិញ ទាមទារឲ្យគ្រូបង្រៀនទទួលបានប្រាក់ខែគោលចំនួន១លានរៀល បន្ទាប់ពីអ្នកតវ៉ាជាង៣០០នាក់បានព្យាយាមហែក្បួនកាត់តាមរាជធានីភ្នំពេញ ដើម្បីរំឭកដល់ទិវាគ្រូបង្រៀនពិភពលោកនោះ ត្រូវបានរារាំងដោយកងរាជអាវុធហត្ថប្រដាប់អាវុធមួយក្រុមធំ។
សមាជិកសមាគមគ្រូបង្រៀនកម្ពុជាឯករាជ្យ រួមមាននិស្សិត ព្រះសង្ឃ សកម្មជនសិទ្ធិដីធ្លី សមាជិកសភាគណបក្សសង្គ្រោះជាតិ...
មេធាវីមួយក្រុមតំណាងឲ្យលោក ស៊ុម វុទ្ធី សមាជិកក្រុមប្រឹក្សាខណ្ឌគណបក្សសង្គ្រោះជាតិដែលជាប់ពន្ធនាគារ បានដាក់សំណើសុំដោះលែងនៅក្រៅឃុំទៅសាលាដំបូងរាជធានីភ្នំពេញកាលពីម្សិលមិញ ដោយលើកឡើងថា មន្ត្រីគណបក្សសង្គ្រោះជាតិ១១នាក់ផ្សេងទៀតដែលជាប់ចោទជាមួយលោក វុទ្ធី ត្រូវបានដោះលែងឲ្យមានសេរីភាពក្នុងពេលពួកគេកំពុងរង់ចាំការកាត់ក្តីដែលមិនទាន់កំណត់ពេលនៅឡើយ។
យោងតាមលោក សំ សុគង់ ជាមេធាវីម្នាក់ក្នុងចំណោមបីនាក់របស់លោក វុទ្ធី បានឲ្យដឹងថា កាលពីព្រឹកថ្ងៃច័ន្ទ លោក វុទ្ធី ជាសមាជិកក្រុមប្រឹក្សាខណ្ឌច្បារអំពៅ ត្រូវបាននគរបាលចាប់ខ្លួនពេលកំពុងជិះម៉ូតូ។ លោក សុគង់ បានមានប្រសាសន៍ថា តុលាការបានចោទកូនក្តីរបស់លោកថា បានចូលរួមក្នុងកុបកម្ម ប្រឆាំងមន្ត្រីសាធារណៈ និងប្រើអំពើហិង្សាដោយចេតនាមានស្ថានទម្ងន់ទោស ចំពោះតួនាទីរបស់លោកក្នុងបាតុកម្មរបស់គណបក្សប្រឆាំងកាលពីថ្ងៃទី១៥ ខែកក្កដា ដែលបានប្រែក្លាយជាហិង្សា នៅពេលអ្នកតវ៉ាបានវាយបកវិញយ៉ាងចាស់ដៃលើក្រុមសន្តិសុខដែលត្រូវគេបញ្ជូនឲ្យទៅបំបែកការតវ៉ានោះ។
លោក សុគង់ បានមានប្រសាសន៍ថា "យើងបានដាក់សំណើមួយសុំឲ្យដោះលែងរូបគាត់នៅក្រៅឃុំ ពីព្រោះគាត់ជាប់ចោទពីបទប្រើអំពើហិង្សាក្នុងហេតុការណ៍ប៉ះទង្គិចគ្នាកាលពីថ្ងៃទី១៥ ខែកក្កដា ដែលធ្វើឲ្យមន្ត្រី និងសកម្មជនយុវជនគណបក្សសង្គ្រោះជាតិផ្សេងទៀតត្រូវបានគេចោទ ដាក់ពន្ធនាគារ ហើយឥឡូវនេះកំពុងនៅក្រៅឃុំ"។
សមាជិកសភាប្រាំពីររូបស្ថិតក្នុងចំណោមមន្ត្រីគណបក្សសង្គ្រោះជាតិមួយក្រុមដែលកំពុងប្រឈមនឹងបទចោទនៅឡើយ ដែលអាចមានទោសជាប់ពន្ធនាគារដល់ទៅ៣០ឆ្នាំ៕មានិត
ជនជាតិវៀតណាមជាង១៦០នាក់ត្រូវនិរទេសទៅស្រុកកំណើតវិញ
យោងតាមមន្ត្រីម្នាក់នៅនាយកដ្ឋានអន្តោប្រវេសន៍បានឲ្យដឹងថា ជនជាតិវៀតណាមជាង១៦០នាក់ ដែលរស់នៅខុសច្បាប់ក្នុងប្រទេសកម្ពុជា ត្រូវបាននិរទេសត្រឡប់ទៅប្រទេសកំណើតរបស់ខ្លួនវិញចាប់តាំងពីជំរឿនលើជនបរទេសបានចាប់ផ្តើមកាលពីដើមឆ្នាំនេះមក។
លោក ម៉ម ស្រីុមវណ្ណា អគ្គនាយករងនៃអគ្គនាយកដ្ឋានអន្តោប្រវេសន៍ក្រសួងមហាផ្ទៃបានមានប្រសាសន៍កាលពីម្សិលមិញថា ជនជាតិវៀតណាម១៦៤នាក់ ត្រូវបាននិរទេសចេញពីខេត្តស្វាយរៀង ខេត្តព្រៃវែង និងខេត្តតាកែវ តាំងពីថ្ងៃទី៣០ ខែកក្កដាមក។
ជនអន្តោប្រវេសន៍ខុសច្បាប់ដ៏ច្រើន សរុបមាន១៥២នាក់ កំពុងរស់នៅក្នុងខេត្តស្វាយរៀង។ ជនអន្តោប្រវេសន៍ប្រាំមួយនាក់ទៀតត្រូវបានរកឃើញនៅខេត្តតាកែវ និងប្រាំមួយនាក់ផ្សេងទៀតនៅខេត្តព្រៃវែង។
លោក ស្រីុមវណ្ណា បានមានប្រសាសន៍ថា "ក្រៅពីប្រជាជនវៀតណាម ក៏មានជនជាតិបរទេសផ្សេងទៀតដែរ ដែលត្រូវបានរកឃើញកំពុងស្នាក់នៅដោយខុសច្បាប់ក្នុងប្រទេសកម្ពុជា"។ លោកបានមានប្រសាសន៍ថា រហូតដល់ពេលនេះ មនុស្សជាង២០០នាក់ ត្រូវបាននិរទេសចេញពីប្រទេសកម្ពុជា ជាផ្នែកមួយនៃការធ្វើជំរឿននេះ។
លោកបានឲ្យដឹងទៀតថា "ឥឡូវនេះ យើងកំពុងបន្តការធ្វើជំរឿននៅឡើយ ដូច្នេះយើងអាចរកឃើញជនបរទេសខុសច្បាប់ច្រើនទៀត"។
ជំរឿន ដែលក្រុមមន្ត្រីសន្យាថា នឹងមានលក្ខណទូលំទូលាយនិងមានប្រសិទ្ធភាពជាងលើកមុនៗនោះ បានផ្តោតលើជនជាតិមកពីប្រទេសចិន ឥណ្ឌា រុស្សី និងប្រទេសនីហ្សេរីយ៉ា ដែលត្រូវបានបញ្ជូនត្រឡប់ទៅប្រទេសកំណើតរបស់ពួកគេវិញ បន្ទាប់ពីត្រូវបានរកឃើញថា កំពុងស្នាក់នៅដោយខុសច្បាប់ក្នុងប្រទេសកម្ពុជា៕មានិត
ក្រុមមន្ត្រីនគរបាលបាននាំគ្នានិយាយលេងសើច និងជល់កែវផឹកស៊ីយ៉ាងសប្បាយនៅអធិការដ្ឋានខណ្ឌមានជ័យកាលពីរសៀលថ្ងៃសុក្រ ពោលគឺតែប៉ុន្មានម៉ោងប៉ុណ្ណោះក្រោយពីអធិការ ហ៊ី ណារិន ដែលជាមេកើយរបស់ពួកគេ ត្រូវបានចោទប្រកាន់ពីបទកឹបកេងប្រាក់ និងកេងប្រវ័ញ្ច ហើយត្រូវបញ្ជូនខ្លួនទៅពន្ធនាគារព្រៃស។
សម្បកកេសស្រាបៀរចំនួនប្រាំពីរកេសត្រូវបានដាក់គរលើគ្នា ហើយកំប៉ុងស្រាបៀរត្រូវគេបោះចោលរាយប៉ាយនៅលើឥដ្ឋ ខណៈបុរសប្រហែលជាង១០នាក់ ដែលស្លៀកពាក់ឯកសណ្ឋាននគរបាលមកពីអង្គភាពខុសៗគ្នាអង្គុយជុំវិញតុដែកមួយ។
លោក ជឹម ស៊ីថា ដែលត្រូវបានដំឡើងតំណែងជាអធិការស្តីទីកាលពីថ្ងៃព្រហស្បតិ៍ បន្ទាប់ពីលោក ហ៊ី ណារិន ត្រូវបានចោទប្រកាន់ពីបទកឹបកេងលុយជាង ៦០០.០០០ដុល្លារក្នុងរយៈពេលប្រាំបីឆ្នាំមកនេះ បានមានប្រសាសន៍ថា ពិធីផឹកស៊ីនេះ គឺធ្វើឡើងដើម្បីអបអរការសម្ពោធអធិការដ្ឋានថ្មី។
លោកបានមានប្រសាសន៍ថា "យើងធ្វើពិធីប្រោះព្រំ ដើម្បីសែនដល់ម្ចាស់ទឹកម្ចាស់ដីនេះពីព្រោះយើងបានរើមកទីនេះជាងមួយខែមកហើយ។ អ្នកភូមិបានយកស្រាបៀរនេះមកជូនពួកយើង ពីព្រោះពួកគាត់ស្រឡាញ់ចូលចិត្តប៉ូលីស"។
លោក ហ៊ី ណារិន ត្រូវបានអង្គភាពប្រឆាំងអំពើពុករលួយចាប់ខ្លួនកាលពីថ្ងៃអង្គារ ហើយត្រូវបានចោទប្រកាន់ជាច្រើនករណីពាក់ព័ន្ធនឹងផែនការអាក្រក់ និងក្រុមជំរិតទារប្រាក់ ដែលគាត់បានប្រើប្រាស់ដើម្បីធ្វើឲ្យខ្លួនឯងមានបាន អំឡុងពេលលោកកាន់មុខតំណែងជាអធិការអស់រយៈពេលជិតមួយទសវត្សរ៍។
ក្នុងចំណោមការចោទប្រកាន់ទាំងនោះមានការអះអាងថា គាត់បានបញ្ចូលឈ្មោះបុគ្គលិកខ្មោចទៅក្នុងបញ្ជីបើកប្រាក់ខែរបស់ខ្លួន ហើយបើកយកប្រាក់ខែរបស់ពួកគេ កេងយកប្រាក់ឧបត្ថម្ភសម្រាប់កូនចៅរបស់ខ្លួន។ ក៏មានការលើកឡើងដែរថា គាត់បានជំរិតទារប្រាក់ពីជនរងគ្រោះក្នុងហេតុការណ៍គ្រោះថ្នាក់ចរាចរណ៍ អាជីវកម្ម រោងចក្រនិងកន្លែងលេងល្បែងខុសច្បាប់នានា។ យោងតាមពាក្យបណ្ដឹងរបស់អង្គភាពប្រឆាំងអំពើពុករលួយបង្ហាញថា ប្រាក់សរុបដែលគាត់បានប្រមូលបានពីអំពើពុករលួយរបស់ខ្លួន មានចំនួន៦៧៨.០៥៩ដុល្លារ។
យោងតាមក្រឡាបញ្ជី យឹម ជេដ្ឋា បានឲ្យដឹងថា លោក យូ ប៊ុណ្ណា ចៅក្រមសើុបសួរទទួលបន្ទុកសំណុំរឿងនេះនៅសាលាដំបូងរាជធានីភ្នំពេញ បានធ្វើការចោទប្រកាន់លោក ហ៊ី ណារិន កាលពីថ្ងៃសុក្រ បន្ទាប់ពីការសាកសួរអស់រយៈពេលបីថ្ងៃ។
លោកបានមានប្រសាសន៍ទៀតថា "ហ៊ី ណារិន ត្រូវបានចោទប្រកាន់ពីបទកេងប្រវ័ញ្ចប្រព្រឹត្តដោយមន្ត្រីសាធារណៈ និងបទកេងប្រវ័ញ្ចថវិការដ្ឋដោយគ្មានច្បាប់ទម្លាប់។ គាត់ត្រូវបានបញ្ជូនខ្លួនទៅកាន់ពន្ធនាគារហើយ"។
បទចោទប្រកាន់ទាំងនោះអាចនឹងធ្វើឲ្យលោក ហ៊ី ណារិន ជាប់ពន្ធនាគាររហូតដល់ទៅ១៥ឆ្នាំ។ ការចោទប្រកាន់ពីបទកឹបកេងក៏ត្រូវទទួលការពិន័យ "ទ្វេដងនៃចំនួនប្រាក់ ឬតម្លៃអចលនទ្រព្យដែលត្រូវបានកឹបកេង" ផងដែរ។
លោក ជឹម ស៊ីថា អធិការស្តីទីថ្មីនៃខណ្ឌមានជ័យបានមានប្រសាសន៍ថា លោកបានធ្វើការក្រោមលោក ហ៊ី ណារិន អស់រយៈពេលប្រហែល១០ឆ្នាំមកហើយ ប៉ុន្តែ បានអះអាងថា គាត់មិនដឹងច្បាស់ពីមូលហេតុ ដែលអង្គភាពប្រឆាំងអំពើពុករលួយបានចាត់វិធានការលើអតីតចៅហ្វាយនាយរបស់លោកទេ។
លោកបានមានប្រសាសន៍ទៀតថា "ខ្ញុំគិតថា អ្នកដែលស្និទ្ធនឹងលោក ណារិន បានតវ៉ាប្រឆាំងរូបគាត់។ មនុស្សមួយចំនួនតូចដែលស្និទ្ធនឹងលោក ណារិន កំពុងត្រូវអង្គភាពប្រឆាំងអំពើពុករលួយសាកសួរ"។
ខណៈដែលនគរបាលផ្សេងៗទៀតដែលអង្គុយពីក្រោយគាត់កំពុងផឹកស្រាបៀរ លោក ជឹម ស៊ីថា បានមានប្រសាសន៍ថា លោកមានគម្រោងស្តារកេរ្តិ៍ឈ្មោះឡើងវិញធ្វើយ៉ាងណាឲ្យសាធារណជនមានការជឿទុកចិត្តលើអង្គភាពរបស់លោក ក្រោយពីការចាប់ខ្លួនអធិការខណ្ឌនេះ។
លោកមានប្រសាសន៍ថា "ជំហានដំបូងគឺយើងនឹងមិនយកប្រាក់ពីអាជីវករទៀតទេ"។ លោកក៏បានលើកឡើងដែរថា មន្ត្រីនគរបាលនឹងត្រូវបញ្ជូនជាប្រចាំទៅកាន់តំបន់"ស្មុគស្មាញ" នានានៅក្នុងខណ្ឌនេះ ដែលមានរោងចក្ររាប់រយ និងជាកន្លែងកើតមានបាតុកម្មជាច្រើនក្នុងវិស័យកាត់ដេរកាលពីខែធ្នូ និងខែមករា ដោយបាតុកម្មមួយចំនួនក្នុងចំណោមនោះបានបញ្ចប់ដោយអំពើហិង្សា។
លោកបានមានប្រសាសន៍ទៀតថា "យើងមានគម្រោងបញ្ជូនកងកម្លាំងរបស់យើងឲ្យចុះល្បាតតាមកន្លែងស្មុគស្មាញ។ យើងក៏មានខ្សែទូរស័ព្ទពិសេស២៤ម៉ោងមួយដែរសម្រាប់ទទួលយកបញ្ហាផ្សេងៗ"។
លោក ព្រាប កុល នាយកប្រតិបត្តិអង្គការតម្លាភាពកម្ពុជាដែលប្រឆាំងអំពើពុករលួយបានព្យាករថា ការចោទប្រកាន់លើលោក ហ៊ី ណារិន គឺគ្រាន់តែជាឧទាហរណ៍តូចមួយប៉ុណ្ណោះស្តីពីអំពើពុករលួយក្នុងខណ្ឌមានជ័យ។
លោកបានលើកឡើងថា "លោក ណារិន ទំនងជាមិនអាចប្រមូលប្រាក់យ៉ាងច្រើនបែបនោះតែម្នាក់ឯងបានទេ បើគិតពីបណ្ដាញដែលគាត់ធ្វើការ។ ខ្ញុំសង្ស័យថា មានមនុស្សប៉ុន្មាននាក់ទៀតបានជាប់ពាក់ព័ន្ធ"។
លោក ព្រាប កុល ដែលអង្គការរបស់លោកបានដាក់ចំណាត់ថ្នាក់ប្រទេសកម្ពុជាឲ្យជាប់លេខ១៦០ក្នុងចំណោមប្រទេសចំនួន១៧៧នៅក្នុងសន្ទស្សន៍ទស្សនវិស័យអំពើពុករលួយឆ្នាំ២០១៤របស់ខ្លួន ក៏បានលើកឡើងថា ការចោទប្រកាន់លើនគរបាលមួយរូបក្នុងចំណោមនគរបាលដែលមានមុខតំណែងកំពូលនៅក្នុងរាជធានីភ្នំពេញ គឺជាការព្រមានដល់នគរបាលទូទាំងប្រទេស។
លោកបានមានប្រសាសន៍បន្តទៀតថា "ឥរិយាបថនេះគឺធម្មតាណាស់។ នេះគ្រាន់តែជាករណីមួយប៉ុណ្ណោះក្នុងចំណោមករណីជាច្រើន ដែលកើតឡើងទូទាំងប្រទេស។ រដ្ឋាភិបាលមិនអាចចាប់ពួកគេដាក់ពន្ធនាគារទាំងអស់បានទេ ព្រោះគ្មានកន្លែងគ្រប់គ្រាន់ឡើយ។ដូច្នេះការចោទប្រកាន់លើលោក ហ៊ី ណារិន គឺជាសារមួយពីរដ្ឋាភិបាលផ្ញើទៅនគរបាលគ្រប់ជាន់ថ្នាក់ឲ្យបានដឹងថា ពួកគេត្រូវតែកែប្រែ ហើយថា និទណ្ឌភាពដែលពួកគេទទួលបានជាយូរមកហើយនោះ បានបញ្ចប់ហើយ"៕សុខុម
ព្រះសង្ឃរាប់រយអង្គបានហែក្បួននៅក្នុងរាជធានីភ្នំពេញកាលពីថ្ងៃសុក្រ ដើម្បីទាមទារឲ្យបញ្ឈប់ការសាងសង់នៅក្នុង និងជុំវិញវិទ្យាស្ថានពុទ្ធសាសនបណ្ឌិត្យ ដែលកំពុងត្រូវបានហ៊ុមព័ទ្ធយ៉ាងឆាប់រហ័សដោយសំណង់ និងការដ្ឋានសាងសង់របស់ក្រុមហ៊ុន Naga Corp។
កាលពីខែឧសភា ក្លោងទ្វារមុខនៃពុទ្ធសាសនបណ្ឌិត្យត្រូវបានបំផ្លាញចោលដើម្បីបើកផ្លូវសម្រាប់ការស្ថាបនាផ្លូវក្រោមដី ហើយនៅក្នុងពេលថ្មីៗនេះក្រុមហ៊ុនសាងសង់ឯកជនមួយបានចាក់ក្រាលបេតុងលើដីទំហំ៣០ម៉ែត្រគុណ១០០ម៉ែត្រនៅចំកណ្ដាលបរិវេណវិទ្យាស្ថាននេះ បណ្ដាលឲ្យមានការព្រួយបារម្ភកាន់តែខ្លាំងឡើងថា ដីនេះត្រូវបានលក់សម្រាប់ការអភិវឌ្ឍ។
ព្រះសង្ឃប្រហែល២០០អង្គ ដែលនិមន្តមកពីបណ្ដាញព្រះសង្ឃឯករាជ្យដើម្បីយុត្តិធម៌សង្គមបានព្យាយាមដាក់ញត្តិទៅព្រះបរមរាជវាំងកាលពីម្សិលមិញ ដើម្បីស្នើសុំឲ្យព្រះមហាក្សត្រនរោត្តម សីហមុនី ធានារក្សាទុកវិទ្យាស្ថានពុទ្ធសាសនបណ្ឌិត្យឲ្យនៅដដែល ប៉ុន្តែ ត្រូវបានរារាំងដោយនគរបាលប្រឆាំងបាតុកម្មប្រហែល៥០នាក់ ដែលឈរជើងជិតព្រះបរមរាជវាំង។
ព្រះតេជគុណ ប៊ុត ប៊ុនទិញ ប្រធានបណ្តាញព្រះសង្ឃឯករាជ្យដើម្បីយុត្តិធម៌សង្គមបានមានសង្ឃដីកាថា "យើងបានស្នើឲ្យព្រះមហាក្សត្របញ្ជាឲ្យបញ្ឈប់ការជួលដីនៅក្នុងវិទ្យាស្ថានពុទ្ធសាសនបណ្ឌិត្យ។ មន្ត្រីមួយចំនួនបានលក់ទ្រព្យសម្បត្តិរបស់ព្រះមហាក្សត្រ ហើយគ្មាននរណាម្នាក់ចាត់វិធានការទេ។ តើនេះគឺជាការគោរពព្រះមហាក្សត្រឬ?”។
នៅទីបំផុតមន្ត្រីព្រះបរមរាជវាំងមួយរូបបានចេញមកជួបព្រះសង្ឃតវ៉ាទាំងនេះ ហើយបានទទួលយកញត្តិរបស់ព្រះអង្គ ដែលអំពាវនាវឲ្យបញ្ឈប់ការសាងសង់លើបរិវេណដីវិទ្យាស្ថាននេះ និងដកចេញនូវសំណង់បេតុង ដែលពេលនេះកំពុងស្ថិតនៅចំកណ្ដាលនៃបរិវេណវិទ្យាស្ថានពុទ្ធសាសនបណ្ឌិត្យ។
នៅឯរដ្ឋសភា ជាកន្លែងបន្ទាប់ដែលត្រូវឈប់នៅក្នុងហែក្បួននេះ ព្រះសង្ឃទាំងនេះបានជួបជាមួយលោក យ៉ែម បុញ្ញប្ញទ្ធិ តំណាងរាស្ត្រគណបក្សប្រឆាំង ដែលជាប្រធានគណៈកម្មការអប់រំ យុវជន និងកីឡា និងកិច្ចការសាសនា។
លោក យ៉ែម បុញ្ញប្ញទ្ធិ បានប្រាប់ព្រះសង្ឃទាំងនេះថា "យើងនឹងអញ្ជើញឯកឧត្ដម មិន ឃិន រដ្ឋមន្ត្រីក្រសួងធម្មការ និងសាសនា ដើម្បីឆ្លើយសំណួរនៅរសៀលថ្ងៃទី៩ ពាក់ព័ន្ធនឹងវិទ្យាស្ថានពុទ្ធសាសនបណ្ឌិត្យ"។
លោក សេង សុមុនី អ្នកនាំពាក្យក្រសួងធម្មការ និងសាសនាបានបដិសេធមិនធ្វើអត្ថាធិប្បាយអំពីស្ថានភាពនៃវិទ្យាស្ថានពុទ្ធសាសនបណ្ឌិត្យឡើយ។
លោក ស សុខនី ប្រធានស្តីទីនៃវិទ្យាស្ថានពុទ្ធសាសនបណ្ឌិត្យ ក៏បានបដិសេធមិនធ្វើអត្ថាធិប្បាយដែរ ដោយប្រាប់ឲ្យអ្នកយកព័ត៌មានទៅមើលសេចក្តីប្រកាសមួយរបស់ក្រសួងធម្មការ និងសាសនា ដែលបានចេញកាលពីដើមឆ្នាំនេះដែលលើកឡើងថា ការសាងសង់នៅក្នុងបរិវេណវិទ្យាស្ថាននេះគឺគ្រាន់តែធ្វើឡើងជាលក្ខណៈបណ្តោះអាសន្នប៉ុណ្ណោះ ហើយថា ដីនោះមិនត្រូវបានលក់ដូរទេ៕សុខុម
ជនជាតិខ្មែរអាមេរិកបីនាក់ត្រូវគេតាមចាប់ពីបទគំរាមសម្លាប់មេដឹកនាំខ្មែរ
ដីកាចាប់ខ្លួនអន្តរជាតិត្រូវបានចេញដើម្បីចាប់ពលរដ្ឋខ្មែរអាមេរិក៣នាក់ ដែលរដ្ឋាភិបាលចោទថា បានគំរាមសម្លាប់មេដឹកនាំខ្មែរជាច្រើននាក់។
នគរបាលអន្តរជាតិអាំងទែប៉ូលបានបន្ថែមឈ្មោះ បូណា ប៊ុនផាត់ អាយុ៤៤ឆ្នាំ ម៉ៅ ឃឿន អាយុ៥០ឆ្នាំ...
កាលពីម្សិលមិញ អង្គការមិនមែនរដ្ឋាភិបាលមួយចំនួនបានលើកឡើងថា បទបញ្ជាផ្ទៃក្នុងថ្មីៗដ៏តឹងរ៉ឹងដែលលោក ហេង សំរិន ប្រធានរដ្ឋសភាបានចេញជាបន្តបន្ទាប់កាលពីសប្ដាហ៍មុន បានរំលោភបំពានរដ្ឋធម្មនុញ្ញ និងបទបញ្ជាផ្ទៃក្នុងរបស់រដ្ឋសភា ហើយបានអំពាវនាវឲ្យតំណាងរាស្ត្រដែលមានភក្ដីភាពចំពោះគណបក្សកាន់អំណាចលុបចោលបទបញ្ជានេះ។
នៅក្នុងសារាចរមួយចុះថ្ងៃទី១២...
រដ្ឋាភិបាលប្រាប់ប្រទេសថៃថា សកម្មជនដែលរត់គេចខ្លួនមិនស្ថិត នៅក្នុងប្រទេសកម្ពុជាទេ
កាលពីម្សិលមិញប្រទេសថៃបានអះអាងថា ខ្លួនបានស្នើឲ្យកម្ពុជាធ្វើមាតុភូមិនិវត្តសកម្មជននិស្សិតថៃម្នាក់ ដែលគេចង់ចាប់ខ្លួនតាមចោទពីបទនិយាយប៉ះពាល់ដល់រាជវង្សានុវង្ស ប៉ុន្តែបានលើកឡើងថា គេបានប្រាប់ថា និស្សិតដែលរត់គេចខ្លួនរូបនេះមិនស្ថិតនៅក្នុងប្រទេសកម្ពុជាទេ។
របបយោធាដែលបានកាន់កាប់ប្រទេសថៃចាប់តាំងពីការផ្ដួលរំលំរដ្ឋាភិបាលជាប់ឆ្នោតកាលពីខែឧសភានោះ ចោទប្រកាន់ ឯកភព ឡូរ៉ា...