TAG
features2
លោកនាយករដ្ឋមន្ត្រី ហ៊ុន សែន គូសបញ្ជាក់ថា មិនត្រូវការ “មន្ត្រីមុខថ្មី” នៅក្នុងជួរគណៈរដ្ឋមន្ត្រី
កាលពីម្សិលមិញ លោកនាយករដ្ឋមន្ត្រី ហ៊ុន សែន បានវាយបកទៅលើអ្នកដែលរិះគន់ការរុះរើគណៈរដ្ឋមន្ត្រីរបស់លោកកាលពីពេលថ្មីៗនេះចំពោះការគ្មានសេចក្តីក្លាហានគ្រប់គ្រាន់ ហើយបានចោទក្រុមអ្នកធ្វើអត្ថាធិប្បាយនយោបាយក្នុងប្រទេសកម្ពុជាថា "មុខដដែលៗ" ខ្លួនឯង។
លោកនាយករដ្ឋមន្ត្រីបានប្រកាសកាលពីសប្ដាហ៍មុនថា ក្រសួងចំនួនប្រាំបីនឹងប្ដូរដៃគ្នា ប៉ុន្តែខណៈចំណាត់ការនេះត្រូវបានចាត់ទុកជាវិធីមួយដើម្បីធ្វើឲ្យស្ថាប័នរដ្ឋដែលគ្មានប្រសិទ្ធភាពក្លាយជាមានប្រសិទ្ធភាពឡើងវិញ អ្នកសង្កេតការណ៍ និងឥស្សរជនគណបក្សប្រឆាំងមួយចំនួនបញ្ជាក់ថា មន្ត្រីជាច្រើនដែលជាប់ពាក់ព័ន្ធគ្រាន់តែប្ដូរកន្លែងគ្នា ហើយរក្សាតំណែងរដ្ឋមន្ត្រីដដែលប៉ុណ្ណោះ។
នៅឯសន្និសីទស្ដីពីហិរញ្ញវត្ថុសាធារណៈក្នុងរាជធានីភ្នំពេញកាលពីម្សិលមិញ លោក ហ៊ុន សែន បានរិះគន់ឥរិយាបថនេះថាខ្វះការគិតគូរវែងឆ្ងាយ។ លោកមានប្រសាសន៍ថា “ខ្ញុំសុំផ្ញើសារទៅអ្នកធ្វើអត្ថាធិប្បាយខ្លះដែលនិយាយថាមុខដដែលៗ។ ខ្ញុំគ្រាន់តែផ្តាំទៅអ្នក អ្នកក៏មុខដដែលៗដែរអាអ្នកនិយាយណុង។ ម៉េចក៏ចាំបាច់ថាគេមុខដដែលៗ? ឱ្យគ្នាយកមុខទៅទុកនៅឯណា បើមុខវានៅហ្នឹង ហើយលោកឯងអាអ្នកនិយាយហ្នឹង អាខ្លះប្រឆាំង មេបក្សប្រឆាំងស្អីហ្នឹង វាក៏មុខដដែលហ្នឹង វានិយាយហ្អាស អ្នកធ្វើអត្ថាធិប្បាយហ្នឹងក៏មុខដដែល វានិយាយដដែល វាតែប៉ុណ្ណឹង...
នាយករដ្ឋមន្ត្រីអួតពីរូបថតនិងព័ត៌មានឯកជនរបស់លោក កឹម សុខា
កាលពីម្សិលមិញ លោកនាយករដ្ឋមន្ត្រី ហ៊ុន សែន បានបញ្ចេញឲ្យដឹងថា លោកទទួលបានព័ត៌មានបុគ្គលយ៉ាងច្រើនទាក់ទិននឹងស្រីកំណាន់ ដែលគេថាជារបស់លោក កឹម សុខា អនុប្រធានគណបក្សប្រឆាំង ក្នុងនោះមានព័ត៌មានលម្អិតនៃលិខិតឆ្លងដែនរបស់នាង រូបថតនៃការធ្វើដំណើររបស់នាងជាមួយលោក កឹម សុខា និងភ័ស្តុតាងផ្សេងទៀតនៃរឿងស្នេហារបស់ពួកគេ។
ក្នុងសុន្ទរកថានៅពិធីចែកសញ្ញាបត្រមួយនៅរាជធានីភ្នំពេញ លោក ហ៊ុន សែន បានសំដៅលើស្ត្រីម្នាក់ គឺ ខឹម ចាន់ដារ៉ាទី អាយុ២៥ឆ្នាំ ជាអ្នកកាត់សក់ ដែលបានបដិសេធថា នាងមិនជាប់ពាក់ព័ន្ធជាមួយលោក កឹម សុខា...
សាលាក្តីដាក់ តា អាន ឲ្យស្ថិតក្រោមការពិនិត្យបទប្រល័យពូជសាសន៍
ជិតមួយឆ្នាំបន្ទាប់ពីអង្គជំនុំជម្រះវិសាមញ្ញក្នុងតុលាការកម្ពុជាបានចោទប្រកាន់ អោ អាន អតីតកម្មាភិបាលខ្មែរក្រហម ដែលមានឈ្មោះបដិវត្តន៍ថា តា អាន បទឧក្រិដ្ឋប្រឆាំងមនុស្សជាតិនោះ សាលាក្តីនេះ កាលពីម្សិលមិញបានដាក់ជនសង្ស័យវ័យចំណាស់រូបនេះឱ្យស្ថិតក្រោមការពិនិត្យពីបទឧក្រិដ្ឋថ្មីមួយចំនួនទៀត រួមមានដូចជាអំពើប្រល័យពូជសាសន៍ជាដើម។
តា អាន អាយុ៨៣ឆ្នាំត្រូវបានលោក ម៉ៃឃើល បូឡែនឌ័រ (Michael Bohlander) សហចៅក្រមស៊ើបអង្កេតអន្តរជាតិដាក់ឱ្យស្ថិតនៅក្រោមការពិនិត្យពីបទប្រព្រឹត្តអំពើប្រលួ័យពូជាសាសន៍លើជនជាតិចាមជាមួយនឹងបទឧក្រិដ្ឋប្រឆាំងមនុស្សជាតិនៅតំបន់ជាច្រើនអំឡុងគាត់មានតំណែងជាលេខារងនៃភូមិភាគកណ្តាលរបស់របបកម្ពុជាប្រជាធិបតេយ្យ។
បទឧក្រិដ្ឋប្រឆាំងមនុស្សជាតិនេះរួមមានការធ្វើទុក្ខបុកម្នេញអតីតទាហាន លន់ នល់ និងការបោសសម្អាតខ្មាំងផ្ទៃក្នុង ព្រមទាំងគ្រួសាររបស់ពួកគេនៅភូមិភាគកណ្តាលនិងបូពា៌។ គាត់ក៏ប្រឈមនឹងការចោទប្រកាន់ពីបទប្រព្រឹត្តអំពើអមនុស្សធម៌ដទៃទៀតរួមមានអាពាហ៍ពិពាហ៍ដោយបង្ខំ ការរំលោភផ្លូវភេទ និងការបាត់ខ្លួនដោយបង្ខំជាដើមផងដែរ។
ការចោទប្រកាន់ថ្មីបំផុតនេះ នឹងត្រូវបន្ថែមពីលើការចោទប្រកាន់ដែលមានស្រាប់ពីបទមនុស្សឃាតមានផែនការទុកជាមុន និងបទឧក្រិដ្ឋប្រឆាំងមនុស្សជាតិរួមមានការធ្វើមនុស្សឃាត ការសម្លាប់រង្គាល និងការធ្វើទុក្ខបុកម្នេញផ្នែកនយោបាយនិងសាសនាជាដើម។
តំបន់ដែលកើតមានបទឧក្រិដ្ឋទាំងនេះ រួមមានមន្ទីរសន្តិសុខវត្តអូរត្រកួន ជាកន្លែងដែលគេគិតថា មានមនុស្សប្រហែល៣០.០០០នាក់ត្រូវបានសម្លាប់ចោល។...
បន្ទាប់ពីសាកសួរស្ត្រីដែលគេចោទថាជាស្រីកំណាន់លោក សុខា នគរបាលថានឹងពង្រីកការស៊ើបអង្កេត
បន្ទាប់ពីសាកសួរស្ត្រីដែលគេចោទថាជាស្រីស្នេហ៍របស់លោក កឹម សុខា អនុប្រធានគណបក្សប្រឆាំង អស់រយៈពេល៤ម៉ោងកាលពីថ្ងៃសុក្រ នគរបាលប្រឆាំងភេរវកម្មនិយាយថា ខ្លួនអាចនឹងកោះហៅលោក សុខា ក្នុងពេលដែលនគរបាលជំរុញការស៊ើបអង្កេតលើសំឡេងខ្សែអាត់ជាចំណុចនៃពាក្យបណ្តឹងបរិហារកេរ្តិ៍។
សំឡេងខ្សែអាត់ដែលគេបង្ហោះតាមហ្វេសប៊ុកកាលពីដើមខែនេះត្រូវគេអះអាងថាជាការសន្ទនារវាងលោក សុខា និង ខឹម ចាន់ដារាទី ដែលគេស្គាល់ជាទូទៅតាមហ្វេសប៊ុកថា ម៉ុនស្រី ដែលនៅក្នុងសំឡេងនោះ អ្នកទាំងពីរពិភាក្សាគ្នាអំពីការមានផ្ទៃពោះ និងនិយាយសំដៅលើការរួមសង្វាស។
និយាយទៅកាន់អ្នកយកព័ត៌មានបន្ទាប់ពីសាកសួរនៅឯក្រសួងមហាផ្ទៃ កញ្ញា ចាន់ដារាទី បាននិយាយថា នគរបាលបានចាក់សំឡេងខ្សែអាត់ដែលមានមួយចំនួនបានបង្ហោះលើទំព័រហ្វេសប៊ុករបស់នាង ហើយបានសួរនាងអំពីទំនាក់ទំនងជាមួយលោក សុខា។
កញ្ញារូបនេះបាននិយាយនៅឯការិយាល័យគណៈកម្មាធិការប្រព្រឹត្តិកម្មនៃអង្គការ-សមាគមការពារសិទ្ធិមនុស្សកម្ពុជាក្នុងក្រុងភ្នំពេញថា "ខ្ញុំបានប្រាប់ប៉ូលិសថា ខ្ញុំសូមបដិសេធថាមិនមានទំនាក់ទំនងស្នេហាជាមួយគាត់ទេ ហើយសំឡេងខ្សែអាត់ទាំងនោះមិនមែនជាសំឡេងខ្ញុំទេ"។
កញ្ញា ចាន់ដារាទី បាននិយាយបន្ថែមថា នាងបាននិយាយជាមួយលោក សុខា តែម្តងប៉ុណ្ណោះគឺនៅពេលដែលគាត់បានហៅទូរស័ព្ទមកហាងកាត់សក់ ដែលនៅទីនោះនាងបានធ្វើការ ដោយសួរថាជាងកាត់សក់ទំនេរឬទេ។
កញ្ញា ចាន់ដារាទី បាននិយាយថា នគរបាលក៏បានសួរនាងអំពីកញ្ញា ធី សុវណ្ណថា សកម្មជនប្រឆាំងរដ្ឋាភិបាលដ៏លេចធ្លោ ដែលបានដាក់ពាក្យបណ្តឹងបរិហារកេរ្តិ៍ ដែលនាំឲ្យនគរបាលបើកការស៊ើបអង្កេតលើខ្សែអាត់សំឡេងនោះ។ ក្នុងខ្សែអាត់សំឡេង ស្ត្រីនោះបានសួរបុរសដែលគេអះអាងថាជាលោក សុខា ទាក់ទងនឹងពាក្យចចាមអារ៉ាមថា លោកមានស្នេហាជាមួយកញ្ញា សុវណ្ណថា ដែលលោកបដិសេធ ដោយអះអាងថាសកម្មជនរូបនោះពីមុនបានប្រើគណបក្សសង្គ្រោះជាតិ ដើម្បីរកប្រាក់កាស់។។
កញ្ញា ចាន់ដារាទី បាននិយាយថា "ប៉ូលិសក៏បានចាក់សំឡេងខ្សែអាត់ទាក់ទងនឹងការចោទថា ខ្ញុំបរិហារកេរ្តិ៍កញ្ញា ធី សុវណ្ណថា។ បន្ទាប់មកខ្ញុំប្រាប់ប៉ូលិសថា៖ តើខ្ញុំបរិហារកេរ្តិ៍នាងយ៉ាងម៉េចកើត បើខ្ញុំមិនស្គាល់ថា ធី សុវណ្ណថា ជានរណាផងនោះ ហើយខ្ញុំក៏មិនដែលជួបនាងដែរ?”
កញ្ញា ចាន់ដារាទី ដែលនិយាយថាគណនីហ្វេសប៊ុកនាងត្រូវគេលួចចូលមើល បានស្វែងរកការជួយពីអង្គការសិទ្ធិមនុស្សអាដហុកកាលពីដើមសប្តាហ៍នេះ ដោយសារតែនាងព្រួយបារម្ភអំពីការកោះហៅដោយនគរបាល។កញ្ញារូបនេះបាននិយាយថា នាងបានស្នើសុំឲ្យនគរបាលកាលពីថ្ងៃសុក្រ ដើម្បីស្វែងរកអ្នកដែលទទួលខុសត្រូវចំពោះរឿងនេះ។
កញ្ញា ចាន់ដារាទី បាននិយាយថា "ខ្ញុំស្នើសុំឲ្យប៉ូលិសជួយធានាសន្តិសុខខ្ញុំ ហើយសុំជួយរកយុត្តិធម៌ឲ្យខ្ញុំ ហើយសុំស្វែងរកអ្នកដែលលួចចូលគណនីខ្ញុំ ហើយបង្ហោះលើហ្វេសប៊ុក"។
លោក អ៊ី សុខឃី ប្រធាននាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែនបានមានប្រសាសន៍ថា លោកពេញចិត្តនឹងការសហការរបស់កញ្ញា ចាន់ដារាទី ក្នុងពេលសាកសួរនោះ។
លោក សុខឃី បានមានប្រសាសន៍ថា "ប៉ុន្តែ ខ្ញុំសូមរក្សាសិទ្ធិមិនឆ្លើយសំណួរ ពីព្រោះការស៊ើបអង្កេតកំពុងបន្ត"។ លោកបាននិយាយបន្ថែមថា វាអាចថានគរបាលនឹងកោះហៅលោក សុខា ទាក់ទងនឹងសំឡេងខ្សែអាត់។
លោក សុខឃី បានមានប្រសាសន៍ថា "ខ្ញុំគិតថា យើងត្រូវការចម្លើយ ប្រសិនបើចាំបាច់។ យើងនឹងស្រាវជ្រាវ និងស៊ើបអង្កេតបញ្ហាទាំងអស់"។
សួរថាហេតុអ្វីបានជានាយកដ្ឋានរបស់លោកធ្វើការស៊ើបអង្កេតសំឡេងខ្សែអាត់នោះ ឧត្តមសេនីយ៍ឯក សុខឃី បានមានប្រសាសន៍ត្រឹមតែថា មានការចាត់ឲ្យធ្វើដោយអគ្គស្នងការនគរបាលជាតិ បន្ទាប់ពីមានបទបញ្ជាឲ្យស៊ើបអង្កេតដោយព្រះរាជអាជ្ញារងតុលាការក្រុងភ្នំពេញមួយរូប៕
រឿងអាស្រូវលោក កឹម សុខា រាលដាលធំ ដោយតំណាងរាស្ត្រ មួយរូបទៀតរបស់ CNRP រងការគំរាម
តំណាងរាស្ត្រជាន់ខ្ពស់មួយរូបរបស់គណបក្សសង្គ្រោះជាតិបានមានប្រសាសន៍កាលពីម្សិលមិញថា លោកបានរងការគំរាមហែកកេរ្តិ៍ទាក់ទិនរឿងអាស្រូវផ្លូវភេទ ពោលគឺមួយសប្ដាហ៍បន្ទាប់ពីបែកធ្លាយខ្សែអាត់សំឡេងជាបន្តបន្ទាប់ដែលគេអះអាងថា ជាការសន្ទនាគ្នារវាងលោក កឹម សុខា អនុប្រធានគណបក្សប្រឆាំង និងស្រីកំណាន់របស់លោក។
លោក អេង ឆៃអ៊ាង អតីតអគ្គលេខាធិការនៃគណបក្ស សម រង្ស៊ី បានមានប្រសាសន៍ថា លោកទទួលការគំរាមនេះតាមរយៈកញ្ចប់មួយដែលគេយកទៅប្រគល់ឲ្យដល់ផ្ទះរបស់លោកនៅជិតពហុកីឡាដ្ឋានអូឡាំពិក ក្នុងរាជធានីភ្នំពេញ កាលពីយប់ថ្ងៃច័ន្ទ។
លោកបានលើកឡើងថា "ខ្ញុំបានសួរសមាជិកគ្រួសារខ្ញុំថាតើមានរឿងអីកើតឡើង ហើយគេប្រាប់ខ្ញុំថា មានក្មេងជំទង់ម្នាក់យកស្រោមសំបុត្របិទជិតមួយមកដល់គេហដ្ឋានរបស់ខ្ញុំនៅម៉ោង៧យប់ ហើយប្រគល់វាឲ្យទៅម្ដាយក្មេកខ្ញុំដែលគេប្រាប់ថា ស្រោមសំបុត្រនេះសំខាន់ណាស់ ហើយត្រូវតែប្រគល់ឲ្យខ្ញុំភ្លាមពេលខ្ញុំមកដល់ផ្ទះ។ ខ្ញុំមិនដឹងថា មានរឿងអីកើតឡើងទេ ដូច្នេះហើយខ្ញុំក៏បើកកញ្ចប់នោះ ពេលនោះខ្ញុំឃើញស៊ីឌីមួយ និងលិខិតពីរច្បាប់ ដោយលិខិតមួយច្បាប់ជាការព្រមានខ្ញុំដែលខ្ញុំបង្ហោះសារតាមទំព័រហ្វេសប៊ុក ហើយលិខិតទី២ជាបញ្ជីរាយនាមពីអ្វីដែលគេចោទថាខ្ញុំបាននិយាយជាមួយស្រីកំណាន់"។
លិខិតទី១ ដែលតំណាងរាស្ត្ររូបនេះបានបង្ហោះលើទំព័រហ្វេសប៊ុករបស់ខ្លួនកាលពីយប់ថ្ងៃច័ន្ទ បានទាមទារលក្ខខណ្ឌមួយចំនួនពី លោក អេង ឆៃអ៊ាង...
យុវជនតវ៉ានៅទីស្នាក់ការគណបក្សសង្គ្រោះជាតិទាក់ទិននឹងរឿងអាស្រូវស្រីស្នេហ៍
និស្សិត និងយុវជនរាប់សិបនាក់បានតវ៉ានៅខាងក្រៅទីស្នាក់ការគណបក្សប្រឆាំងក្នុងក្រុងភ្នំពេញកាលពីថ្ងៃសុក្រ ស្នើសុំឲ្យលោក កឹម សុខា អនុប្រធានគណបក្សសង្គ្រោះជាតិចេញមុខបកស្រាយឲ្យច្បាស់ទាក់ទិននឹងសារសំឡេងដែលបានផ្សព្វផ្សាយតាមអីុនធឺណិតនៅសប្តាហ៍នេះ ដែលគេអះអាងថា ជាសំឡេងរបស់លោកនិយាយជាមួយស្រីស្នេហ៍អំពីរឿងស្នេហា និងការមានផ្ទៃពោះដែរ។
យុវជនមួយក្រុមមានគ្នាប្រហែល៦០នាក់ ដែលបានអះអាងថា មិនជាប់ពាក់ព័ន្ធនឹងគណបក្សនយោបាយណាមួយនោះ បានដាក់ញត្តិស្នើសុំឲ្យលោក កឹម សុខា ដោះស្រាយកង្វល់របស់ពួកគេ បើពុំនោះទេនឹងមានការតវ៉ាទៀត។
និស្សិត ប៉េង ភីរេន អាយុ២៤ឆ្នាំនៅសាកលវិទ្យាល័យច្បាប់ និងសេដ្ឋកិច្ច ដែលស្ថិតក្នុងចំណោមមេដឹកនាំតវ៉ាដែរ បាននិយាយថា "យើងមិនដឹងថា តើវាពិតជាសំឡេងរបស់ឯកឧត្តម កឹម សុខា ឬមិនមែននោះទេ។ ដូច្នេះហើយយើងមកទីនេះដើម្បីស្វែងរកការពិត"។
និស្សិតរូបនេះបានប្រាប់អ្នកយកព័ត៌មានថា "យើង ជានិស្សិត មានចម្ងល់អំពីរឿងនេះ ដូច្នេះយើងត្រូវការចម្លើយ"។
លោក ភីរេន បានបដិសេធថា យុវជនមិនធ្វើជាប្រយោជន៍របស់គណបក្សប្រជាជនកម្ពុជាកាន់អំណាច ឬមានការពាក់ព័ន្ធនយោបាយណាមួយទេ ដោយលោកពន្យល់ថា ពួកគេគ្រាន់តែចង់ដឹងការពិត។
លោកបាននិយាយថា "បំណងដាក់ញត្តិគឺដើម្បីទាមទារឲ្យឯកឧត្តម កឹម សុខា ពន្យល់អំពីទំនាក់ទំនងរបស់គាត់ទៅនឹងសារសំឡេងលេចធ្លាយនាពេលថ្មីៗពាក់ព័ន្ធនឹងរឿងអាស្រូវស្នេហារបស់គាត់ជាមួយនឹងស្រីស្នេហ៍"។
បន្ទាប់ពីមកដល់ខាងក្រៅស្នាក់ការរបស់គណបក្សសង្គ្រោះជាតិនៅខណ្ឌមានជ័យភ្លាម តំណាងបីនាក់របស់សកម្មជននិស្សិតត្រូវបានអញ្ជើញឲ្យចូលក្នុងដើម្បីជួបលោក ហួរ វ៉ាន់ សមាជិកសភាគណបក្សប្រឆាំង ដើម្បីដាក់ញត្តិរបស់ពួកគេ។
និស្សិត ស៊ុន សំបួ៊ អាយុ២១ឆ្នាំ មកពីវិទ្យាស្ថានពាណិជ្ជកម្មអន្តរជាតិ បានស្នើឲ្យលោក កឹម សុខា ជួបជាមួយអ្នកតវ៉ា និងនិយាយដោយផ្ទាល់អំពីសារសំឡេងនេះ។
លោកបានបន្ថែមថា " ពីព្រោះវាធ្វើឲ្យខូចកេរ្តិ៍ឈ្មោះ និងសីលធម៌របស់គាត់ក្នុងនាមជាមេដឹកនាំម្នាក់របស់គណបក្សនយោបាយមួយ ហើយគាត់ជាមនុស្សគំរូសម្រាប់យុវជន។ បើគាត់ធ្វើរឿងនេះ វានឹងប៉ះពាល់ដល់យើង និងធ្វើឲ្យយើងបាត់បង់ការជឿទុកចិត្តលើគាត់"។
លោក សំប៊ួ បាននិយាយអំពីគម្រោងប្រជុំរបស់គណបក្សសង្គ្រោះជាតិនៅក្នុងខេត្តថ្ងៃេនះថា "គាត់ត្រូវនិយាយពន្យល់រឿងនេះ បើមិនដូច្នេះទេយើងនឹងតាមគាត់ដល់វេទិកាសាធារណៈរបស់គាត់ក្នុងខេត្តព្រះសីហនុ"។
លោក កឹម សុខា មិនបានបង្ហាញមុខនៅទីស្នាក់ការនោះទេ ហើយលោក ហូរ វ៉ាន់ បានបដិសេធមិននិយាយជាមួយអ្នកកាសែតទេ។
ថ្លែងតាមទូរស័ព្ទក្រោយពីការតវ៉ា ដែលមានរយៈពេលជាង១ម៉ោង លោក ភីរេន បាននិយាយថា យុវជនប្រហែល១០០នាក់នឹងធ្វើដំណើរទៅស្រុកព្រៃនប់ខេត្តព្រះសីហនុនៅថ្ងៃនេះដើម្បី បន្តទាមទាររកចម្លើយពីលោក កឹម សុខា។
លោកបាននិយាយថា "គាត់មិនអាចគេចមិនប្រាប់យើងនូវការពិតបានទេ ពីព្រោះយើងនឹងសួរគាត់នៅវេទិកាសាធារណៈរបស់គាត់ដើម្បីបញ្ជាក់ថា តើសារសំឡេងអំពីរឿងអាស្រូវស្នេហានេះជារបស់គាត់ ឬមិនមែន ពីព្រោះយើងក៏ជាពលរដ្ឋដែរគឺមានសិទ្ធិលើកសំណួរនៅឯវេទិការបស់គាត់"។
លោក យ៉ែម បុញ្ញឫទ្ធិ អ្នកនាំពាក្យគណបក្សប្រឆាំងបាននិយាយកាលពីម្សិលមិញថា ញត្តិរបស់យុវជននោះនឹងត្រូវប្រគល់ទៅថ្នាក់ដឹកនាំបក្សដើម្បីពិនិត្យ។
លោកបាននិយាយថា " មន្ត្រីរបស់យើងបានទទួលញត្តិនោះរួចហើយ ហើយនឹងបញ្ជូនវាទៅថ្នាក់ដឹកនាំដើម្បីពិនិត្យពិចារណា" ។លោកបានបន្ថែមថា លោកមិនចង់គិតស្មានអំពីការពាក់ព័ន្ធនយោបាយរបស់ក្រុមអ្នកតវ៉ាទេ។
ទោះជាយ៉ាងនេះក្តី លោកបាននិយាយថា ពួកគេនឹងមិនទទួលបានការស្វាគមន៍នៅវេទិកាថ្ងៃនេះឡើយ។
លោកបាននិយាយថា "វាជាការប្រជុំផ្ទៃក្នុងរបស់គណបក្សដើម្បីបញ្ជូនសារនយោបាយទៅថ្នាក់ដឹកនាំបក្ស និងពិនិត្យរចនាសម្ព័ន្ធ ដូច្នេះអ្នកខាងក្រៅមិនអាចចូលរួមបានឡើយ"។
លោក កឹម សុខា មិនបានឆ្លើយតបជាសាធារណៈទៅនឹងសារសំឡេង ដែលវគ្គដំបូងបានបង្ហោះកាលពីថ្ងៃច័ន្ទលើទំព័រហ្វេសប៊ុកទើបបង្កើតថ្មី របស់ស្រីស្នេហ៍របស់គាត់ឈ្មោះ "ស្រី ម៉ុន " ។ តាំងពីថ្ងៃនោះមកវគ្គជាច្រើនទៀតត្រូវបានបង្ហោះតាមរយៈគណនីហ្វេសប៊ុកឈ្មោះ "រឿងពិត CNRP” ។ បន្ទាប់ពីការជួបជាមួយសកម្មជនគណបក្សកាលពីថ្ងៃព្រហស្បតិ៍ លោក កឹម សុខា បាននិយាយថា អ្នកគាំទ្រគួរផ្តោតលើគោលដៅនយោបាយរបស់គណបក្សសង្គ្រោះជាតិ ហើយកុំខ្វល់នឹងការបង្កហេតុ។
នៅពេលដែលក្រុមមន្ត្រីគណបក្សប្រឆាំងបាននិយាយម្តងហើយម្តងទៀតថា ពួកគេមិនខ្វល់នឹងសារសំឡេងនោះ ក្រុមអ្នកតាមដានបានលើកឡើងនូវការព្រួយបារម្ភអំពីរបៀប និងមូលហេតុដែលការសន្ទនាជាលក្ខណៈឯកជនត្រូវបានគេថត និងផ្សព្វផ្សាយបែបនេះ។
លោក អំ សំអាត អ្នកគ្រប់គ្រងបច្ចេកទេសនៅអង្គការសិទ្ធិមនុស្សលីកាដូ ដែលបានចូលរួមឃ្លាំមើលការតវ៉ាកាលពីថ្ងៃសុក្រ បាននិយាយថា ក្រៅតែពីបន្លប់មនុស្សឲ្យងាកចេញពីបញ្ហានយោបាយសំខាន់ៗនោះ ការបញ្ចេញសំឡេងបែបនេះគឺខុសច្បាប់។
លោក អំ សំអាត បាននិយាយថា "ទី១ចំពោះការលេចធ្លាយសារសំឡេង វាក៏មានសរសេរក្នុងច្បាប់ព្រហ្មទណ្ឌត្រង់មាត្រា៣០១ ដែលចែងថា អំពើលួចស្តាប់ និងថតការនិយាយជាឯកជនដោយគ្មានការអនុញ្ញាត គឺមានទោសជាប់ពន្ធនាគារពី១ខែដល់១ឆ្នាំ"។
លោកបាននិយាយថា "ម្យ៉ាងវិញទៀត បើសារសំឡេងនេះបញ្ចេញដោយក្រុមហ៊ុនទូរស័ព្ទ ក្រុមហ៊ុនទូរស័ព្ទត្រូវទទួលខុសត្រូវចំពោះរឿងនេះ ពីព្រោះវាធ្វើឲ្យអតិថិជនបាត់សេចក្តីទុកចិត្ត ព្រោះបញ្ហាសម្ងាត់របស់ពួកគេលេចធ្លាយដោយងាយៗ"។
ទោះជាយ៉ាងនេះក្តី អ្នកប្រើនៅពីក្រោយគណនីហ្វេសប៊ុក រឿងពិត CNRP ទំនងជាមិនញញើតទេ ដោយបង្ហោះសារមួយលើទំព័រហ្វេសប៊ុកនៅយប់ថ្ងៃព្រហស្បតិ៍ សន្យាថា នឹងបញ្ចេញឃ្លីបអាត់សំឡេងច្រើនទៀតរបស់មេដឹកនាំគណបក្សសង្គ្រោះជាតិផ្សេងទៀតដែលនិយាយទៅកាន់ស្រីកំណាន់របស់ពួកគេ។
ដោយជួនកាលប្រើពាក្យប្រមាថលើវៀតណាម សារនោះសរសេរថា "ខ្ញុំសូមជម្រាបមន្ត្រីជាន់ខ្ពស់មួយចំនួនផ្សេងទៀតក្នុងគណបក្សសង្គ្រោះជាតិថា ទាក់ទងនឹងរឿងអាស្រូវស្នេហារបស់លោក កឹម សុខា ដែលមានសហាយជាមួយទាំងប្រពន្ធចុងខ្មែរ ទាំងយួនក៏ដូចជាស្រីកំណាន់ជាច្រើននាក់ផ្សេងទៀត ខ្ញុំមានខ្សែអាត់សំឡេង និងឯកសារជាច្រើន"។
“ហេតុដូច្នេះគួរនៅឲ្យស្ងៀម ហើយទុកឲ្យលោក កឹម សុខា ទទួលខុសត្រូវតែម្នាក់ឯង ពីព្រោះមេដឹកនាំជាន់ខ្ពស់ផ្សេងទៀតក្នុងគណបក្សសង្គ្រោះជាតិ ក៏មានពាក់ព័ន្ធក្នុងរឿងអាស្រូវជាច្រើន ដែលខ្ញុំ (រឿងពិត CNRP) មិនទាន់បានបញ្ចេញឲ្យដឹងនៅឡើយទេ!”៕និត
ឯកអគ្គរដ្ឋទូតចុះទៅកន្លែងកើតហេតុនៃការចាប់រំលោភលើកោះថៃ
យោងតាមមន្ត្រីក្រសួងការបរទេសឲ្យដឹងថា ឯកអគ្គរដ្ឋទូតខ្មែរប្រចាំប្រទេសថៃបានធ្វើដំណើរតាមឧទ្ធម្ភាគចក្រទៅកាន់កោះគុតកាលពីថ្ងៃចន្ទ ដើម្បីស៊ើបអង្កេតករណីចាប់រំលោភស្ត្រីជនជាតិបារាំងម្នាក់ និងកូនស្រីគាត់ដោយអ្នកនេសាទជនជាតិខ្មែរចំនួន៥នាក់កាលពីល្ងាចថ្ងៃសៅរ៍ ហើយរំពឹងថា នឹងបញ្ជូនរបាយការណ៍លម្អិតមកក្រសួងការបរទេសនៅថ្ងៃនេះ។
សារព័ត៌មាន Associated Press បានរាយការណ៍ថា បុរសអ្នកនេសាទទាំងប្រាំនាក់ត្រូវនគរបាលចាប់ខ្លួនកាលពីថ្ងៃអាទិត្យ បន្ទាប់ពីវាយប្រហារទេសចរជនជាតិបារាំងបួននាក់នឹងកាំបិតនៅលើកោះរមណីយដ្ឋាននៅក្នុងខេត្តត្រាតភាគខាងកើតប្រទេសថៃ ហើយក៏ចាប់រំលោភស្ត្រីទេសចរពីរនាក់។
យោងតាមលោក ជុំ សុន្ទរី ឲ្យដឹងថា តាមបទបញ្ជារបស់លោក ហោ ណាំហុង រដ្ឋមន្ត្រីក្រសួងការបរទេស ឯកអគ្គរដ្ឋទូត លោកស្រី អ៊ាត សុភា បានធ្វើដំណើរកាលពីថ្ងៃចន្ទពីក្រុងបាងកកទៅកាន់កោះគុតក្នុងបេសកកម្មសែ្វងរកការណ៍ពិតរយៈពេលមួយថ្ងៃ។
លោក ជុំ សុន្ទរី បានមានប្រសាសន៍ "ឯកឧត្តមបានប្រាប់ឯកអគ្គរដ្ឋទូតខ្មែរប្រចាំប្រទេសថៃឲ្យស៊ើបអង្កេតរឿងនោះ ហើយព្រឹកមិញ គាត់បានធ្វើដំណើរតាមឧទ្ធម្ភាគចក្រជាមួយអាជ្ញាធរថៃ"។ លោកបានពន្យល់ថា ក្រសួងការបរទេសបានដឹងអំពីករណីរំលោភពីរបាយការណ៍ប្រព័ន្ធផ្សព្វផ្សាយថៃប៉ុណ្ណោះ។
អ្នកនាំពាក្យរូបនេះបាននិយាយថា លោកមិនបានដឹងព័ត៌មានពិស្តារស្តីពីការស៊ើបអង្កេតរបស់លោកស្រី សុភា ទេ ប៉ុន្តែលោកស្រីនឹងបញ្ជូនរបាយការណ៍មកក្រសួងនៅព្រឹកនេះ។
ដកស្រង់សម្តីស្នងការនគរបាលខេត្តត្រាត លោក ណុបផារ៉ាត រិនតាផល កាសែតបាងកក ប៉ុស្ត៍ បានរាយការណ៍កាលពីថ្ងៃចន្ទថា បុរសទាំងប្រាំនាក់បានធ្វើការនៅលើទូកនេសាទឈ្មោះ ចុក កាំម៉ុលវ៉ាន ដែលចតនៅកោះគុតកាលពីថ្ងៃសៅរ៍ ដោយសារតែរលកសមុទ្ទធំៗពេក។
កាសែតបានសរសេរថា ក្រោយពីផឹកស្រាស្រវឹងនៅលើទូក អ្នកនេសាទជនជាតិខ្មែរទាំងប្រាំនាក់បានពាក់អាវហែលទឹក ហើយក៏ហែលមករកគោក ដើម្បីរកទិញស្រាបន្ថែមទៀត បន្ទាប់មកក៏បានប្រទះនឹងទេសចរជនជាតិបារាំង។ តាមសេចក្តីរាយការណ៍ បុរសជនជាតិបារាំងម្នាក់បានប្រាប់នគរបាលថា ក្រោយពីវាយប្រហារជនជាតិបារាំង៤នាក់នឹងកាំបិត និងដំបងរួចមក អ្នកនេសាទក៏បានចាប់រំលោភស្ត្រីម្នាក់មានអាយុ២៨ឆ្នាំ និងម្នាក់ទៀតអាយុ៥៧ឆ្នាំ រហូតដល់បុរសជនជាតិបារាំងម្នាក់បានប្រាប់ឲ្យដឹងអំពីគ្រោះថ្នាក់នៅឯរមណីយដ្ឋាននោះ។
កាសែតបាងកក ប៉ុស្ត៍ បានបង្ហាញអត្តសញ្ញាណជនសង្ស័យបីនាក់មានឈ្មោះថា យីម អាយុ២៥ឆ្នាំ ផៃ អាយុ២២ឆ្នាំ និងចឺន អាយុ២៥ឆ្នាំ ដែលត្រូវនគរបាលចាប់ខ្លួនពេលកំពុងលាក់ខ្លួនក្នុងព្រៃនៅលើកោះនៅម៉ោងប្រហែល៥ព្រឹក ចំណែកឯជនសង្ស័យពីរនាក់ទៀតឈ្មោះ ធី និងប៊ុត ម៉ាន ទាំងពីរនាក់មានអាយុ២០ឆ្នាំ ត្រូវនគរបាលចាប់ខ្លួនពេលព្យាយាមឆ្លងចូលប្រទេសកម្ពុជាវិញនៅឯច្រកព្រំដែនចាំយាម ដែលបានចាកចេញពីទូកនេសាទមកគោក។ កាសែតបានសរសរថា ក្នុងពេលធ្វើត្រាប់ឡើងវិញកាលពីថ្ងៃចន្ទ អ្នកនេសាទបានបង្ហាញប្រាប់នគរបាលថាពួកគេបានបែងចែកគ្នាជាពីរក្រុម វាយប្រហារ ហើយក៏ចាប់រំលោភស្ត្រីពីរនាក់ដាច់ដោយឡែកពីរគ្នា។ កាសែតបានសរសេរបន្តថា ទោះបីជាមានវត្តមាននគរបាល និងសន្តិសុខផ្សេងទៀតក៏ដោយ ក៏មានអ្នកស្រុកម្នាក់ដែលផ្ទុះកំហឹងបានដាល់ត្រូវជនសង្ស័យម្នាក់។
ក្នុងអត្ថបទមួយផ្សាយកាលពីយប់មិញ សារព័ត៌មាន អេភី បានរាយការណ៍ថា នគរបាលថៃបានចោទពួកគេពីបទរំលោភ និងរួមគំនិតប្រព្រឹត្តការវាយប្រហារ ហើយពួកគេក៏បានសារភាពថាបានប្រព្រឹត្តបទល្មើសដែរ។
អត្ថបទក៏រៀបរាប់អំពីរបួសរបស់ជនរងគ្រោះ ពោលគឺស្ត្រីជាម្តាយ កូនស្រី សាច់ញាតិប្រុស និងមិត្តភក្តិដែលបានចូលព្យាបាលនៅមន្ទីរពេទ្យក្នុងខេត្តត្រាតនៅយប់ថ្ងៃវាយប្រហារនោះ។ ដកស្រង់សម្តីមន្ត្រីមន្ទីរពេទ្យ សារព័ត៌មានសរសេរថា មានម្នាក់របួសបាក់ក្តោងច្រមុះ និងម្នាក់ទៀតបាក់ដៃម្ខាង។ សារព័ត៌មានសរសេរថា សមាជិកទី៣នៃទេសចរកំពុងទទួលរងការហូរឈាមខួរក្បាលដោយសារតែការវាយចំក្បាល។
កាលពីខែកញ្ញា ឆ្នាំ២០១៤ មានទេសចរជនជាតិអង់គ្លេសពីរនាក់ត្រូវគេធ្វើឃាតយ៉ាងឃោរឃៅ ពេលកំពុងដើរលំហែតាមឆ្នេរខ្សាច់នៅលើកោះថៃមួយទៀតគឺ កោះតាវ។ មានទេសចរម្នាក់គឺឈ្មោះ ហាន់ណា វិដឺរីត អាយុ២៣ឆ្នាំក៏ត្រូវគេរំលោភដែរ។ ក្នុងពេលដែលបុគ្គលិកបារជនជាតិភូមាពីរនាក់ត្រូវតុលាការផ្តន្ទាទោសពីបទឧក្រិដ្ឋកម្មក្នុងខែធ្នូ ហើយក៏កាត់ទោសប្រហារជីវិតនោះ ក្រុមសិទ្ធិមនុស្សអន្តរជាតិបានរិះគន់ចំពោះសាលក្រមនោះ ដោយមានការចោទប្រកាន់ថា ចម្លើយសារភាពរបស់ពួកគេទទួលបានដោយសារតែធ្វើទារុណកម្ម៕រើន
ព្រះអង្គម្ចាស់ក្សត្រីយ៍ថៃយាងទៅកាន់ខេត្តរតនគិរីដើម្បីចូលរួមពិធីសម្ពោធមណ្ឌលសុខភាព
ព្រះអង្គម្ចាស់ក្សត្រីយ៍ថៃ មហាចក្រី សិរិន្ទថន បានយាងចេញពីរាជធានីភ្នំពេញទៅកាន់ខេត្តរតនគិរី និងយាងទៅជាថ្មីម្តងទៀតកាលពីម្សិលមិញ ដោយទ្រង់សោយព្រះក្រយាថ្ងៃត្រង់ក្បែរមាត់បឹង និងយាងចូលរួមសម្ពោធមណ្ឌលសុខភាពនៅថ្ងៃដំបូងនៃព្រះរាជដំណើរបំពេញទស្សនកិច្ចរយៈពេលបីថ្ងៃមកកាន់ប្រទេសកម្ពុជា។
បន្ទាប់ពីជួបពិភាក្សាការងាររយៈពេលមួយម៉ោងជាមួយលោកនាយករដ្ឋមន្ត្រី ហ៊ុន សែននៅអគារការិយាល័យរបស់លោក ព្រះអង្គម្ចាស់ក្សត្រីយ៍ សិរិន្ទថន បានយាងតាមឧទ្ធម្ភាគចក្រទៅកាន់បឹងយក្ខឡោមដ៏ពេញនិយមស្ថិតក្នុងក្រុងបានលុង ទីដែលបង្គន់អនាម័យដ៏ទំនើបមួយត្រូវបានសាងសង់តាមសំណើរបស់ព្រះអង្គ ហើយតាមការប៉ាន់ប្រមាណគឺចំណាយទឹកប្រាក់អស់ចំនួនជាង ៤០.០០០ដុល្លារ។ ប៉ុន្តែ ព្រះអង្គម្ចាស់ក្សត្រីយ៍អង្គនេះមិនបានប្រើប្រាស់បង្គន់អនាម័យនេះឡើយអំឡុងដំណើរឈប់សំចតរយៈពេលខ្លីរបស់ព្រះអង្គ។
លោក ញ៉ែម សំអឿន អភិបាលរងខេត្តបានមានប្រសាសន៍ថា "ព្រះអង្គម្ចាស់ក្សត្រីយ៍ មិនបានប្រើបង្គន់អនាម័យនេះទេ... ប៉ុន្តែព្រះអង្គបានយាងទៅទតបង្គន់អនាម័យនេះ។ នៅពេលព្រះអង្គយាងត្រឡប់ទៅរាជធានីភ្នំពេញវិញ ពួកគេបានរុះបង្គន់អនាម័យដ៏ទំនើបនេះ"។
បង្គន់អនាម័យដែលសាងសង់ឡើងប្រើពេល១៩ថ្ងៃដោយកម្មករថៃមួយក្រុមដែលជួលដោយក្រុមហ៊ុន Siam...
អតីតប្រធានតុលាការអបយសជាប់គុក២ឆ្នាំ រួចផុតពីបទចោទកេងបន្លំ
ក្រុងតាខ្មៅ, ខេត្តកណ្ដាល- កាលពីថ្ងៃសុក្រ អតីតប្រធានតុលាការក្រុងភ្នំពេញលោក អាំង មាលតី ត្រូវបានតុលាការសម្រេចផ្ដន្ទាទោសឲ្យជាប់ពន្ធនាគារ២ឆ្នាំ ពីបទយកមកប្រើប្រាស់ផ្ទាល់ខ្លួននូវរថយន្ត Audi SUV ដែលរឹបអូសបានពីឈ្មួញចែកចាយគ្រឿងញៀនម្នាក់នៅក្នុងឆ្នាំ២០១៤ ដោយបានរួចផុតពីបទចោទកេងបន្លំដ៏ធ្ងន់ គឺជាករណីមួយដែលអ្នកនាំពាក្យរដ្ឋាភិបាលបានចាត់ទុកថា ពោរពេញទៅដោយ "ភាពមិនប្រក្រតីជាច្រើន"។
លោក អាំង មាលតី ដែលត្រូវបានដកចេញពីតំណែងជាប្រធានសាលាដំបូងរាជធានីភ្នំពេញកាលពីឆ្នាំមុនក្នុងពេលមានការចោទប្រកាន់ពីបទពុករលួយធ្ងន់ធ្ងរនៅតុលាការក្រុង ដែលរិះគន់ដោយលោកនាយករដ្ឋមន្ត្រី ហ៊ុន សែន បានសារភាពអំឡុងសវនាការរបស់លោកថា បានប្រើរថយន្តនោះដើម្បីធ្វើដំណើរទៅមកធ្វើការ និងដឹកគ្រួសាររបស់គាត់នៅថ្ងៃឈប់សម្រាក...
កងរាជអាវុធហត្ថឃាត់ខ្លួនអ្នកកាសែតពាក់ព័ន្ធការផ្សាយរឿងកាប់ឈើ
អ្នកកាសែតម្នាក់ដែលចោទប្រកាន់មេបញ្ជាការកងរាជអាវុធហត្ថមួយរូបថា បានទទួលសំណូកពីអ្នកកាប់ឈើខុសច្បាប់នៅក្នុងខេត្តមណ្ឌលគិរីត្រូវបានចាប់និងឃុំខ្លួនក្នុងរយៈពេលខ្លីកាលពីម្សិលមិញ តាមបទបញ្ជារបស់មេបញ្ជាការរូបនេះ ជាចំណាត់ការមួយដែលត្រូវបានរិះគន់ដោយក្រសួងព័ត៌មាន។
អ្នកកាសែតរូបនេះដែលមានឈ្មោះ វ៉ាន់ ទិត្យ គឺជាអ្នកឆ្លើយឆ្លងព័ត៌មានប្រចាំខេត្តនេះឲ្យស្ថានីយទូរទស្សន៍ខ្មែរប៉ុស្តិ៍លេខ៩ (TV9)។ កាលពីល្ងាចថ្ងៃពុធ អំឡុងម៉ោងព័ត៌មានស្ថានីយទូរទស្សន៍នេះ បានផ្សាយអត្ថបទព័ត៌មានមួយដែលអ្នកកាសែតរូបនេះជាអ្នកសរសេរដោយអះអាងថា លោក សាក់ សារ៉ាង មេបញ្ជាការកងរាជអាវុធហត្ថខេត្តយកប្រាក់ពីអ្នកកាប់ឈើខុសច្បាប់ដើម្បីអនុញ្ញាតឲ្យពួកគេធ្វើការនៅក្នុងតំបន់អភិរក្សជីវចម្រុះសីមា។
លុះដល់ព្រឹកឡើង មន្ត្រីកងរាជអាវុធហត្ថបួននាក់បានមកដល់ផ្ទះរបស់លោក វ៉ាន់ ទិត្យក្នុងស្រុកកែវសីមា ហើយបានបញ្ជាឲ្យគាត់ចូលរថយន្តយោធា ដែលដឹកគាត់ទៅកាន់ទីបញ្ជាការដ្ឋានកងរាជអាវុធហត្ថស្រុក ហើយបន្ទាប់មកបញ្ជូនបន្តទៅកាន់ទីបញ្ជាការ ដ្ឋានកងរាជអាវុធហត្ថខេត្ត នេះបើតាមលោក វង្ស រចនា នាយការិយាល័យកងរាជអាវុធហត្ថព្រហ្មទណ្ឌខេត្ត។
លោកបានលើកឡើងថា "យើងបានឃាត់ខ្លួនគាត់ ព្រោះគាត់សរសេររឿងដោយគ្មានការពិត។ វាប៉ះពាល់ដល់កិត្តិយសរបស់មេបញ្ជាការយើង។ មេបញ្ជាការបានបញ្ជាឲ្យយើងនាំគាត់មកដើម្បីបញ្ជាក់ថា តើគាត់បានសរសេរអ្វីខ្លះ"។
ទោះបីជាលោក វង្ស រចនា ទទួលស្គាល់ថា កងរាជអាវុធហត្ថគ្មានដីកាចាប់ខ្លួនអ្នកកាសែតរូបនេះក៏ដោយ ក៏លោកបានលើកឡើងថា បទបញ្ជាឲ្យឃាត់ខ្លួនលោក វ៉ាន់ ទិត្យ គឺចេញពីឧត្តមសេនីយ៍ សាក់ សារ៉ាង ដោយផ្ទាល់ដែរ។
លោកបានថ្លែងថា "ថ្នាក់លើរបស់ខ្ញុំបានអនុញ្ញាតឲ្យពួកគេធ្វើសេចក្តីរាយការណ៍ព័ត៌មាន ប៉ុន្តែ ត្រូវតែច្បាស់លាស់។...