35 C
Phnom Penh

ព្រះ​អង្គម្ចាស់ក្សត្រីយ៍ថៃយាង​ទៅកាន់​ខេត្ត​រតនគិរី​ដើម្បី​ចូលរួម​ពិធី​​​សម្ពោធ​មណ្ឌល​សុខភាព​

ដោយ ឌឹ ខេមបូឌា ដេលី

បទវិភាគ

ព្រះ​អង្គម្ចាស់ក្សត្រីយ៍ថៃ មហាចក្រី សិរិន្ទថន បាន​យាង​ចេញ​ពី​រាជធានី​ភ្នំពេញ​ទៅ​កាន់​ខេត្ត​រតនគិរី និង​យាងទៅ​​ជាថ្មី​ម្តង​ទៀត​​​​កាលពី​ម្សិលមិញ​ ដោយទ្រង់​សោយ​ព្រះ​ក្រយា​ថ្ងៃត្រង់ក្បែរ​​​មាត់​​​បឹង​​​​ និង​​យាង​ចូលរួម​សម្ពោធ​​មណ្ឌល​សុខភាព​នៅ​ថ្ងៃដំបូង​នៃ​ព្រះរាជដំណើរ​បំពេញ​ទស្សន​កិច្ច​រយៈ​ពេល​​បីថ្ងៃមក​កាន់ប្រទេស​កម្ពុជា។

បន្ទាប់ពី​ជួប​ពិភាក្សាការ​ងារ​រយៈពេល​​​មួយ​ម៉ោង​ជាមួយ​លោក​នាយក​រដ្ឋមន្ត្រី ហ៊ុន សែន​នៅ​អគារ​ការិយាល័យ​របស់លោក​ ព្រះ​អង្គម្ចាស់​ក្សត្រីយ៍ សិរិន្ទថន​ បាន​យាង​តាម​ឧទ្ធម្ភាគ​ចក្រ​ទៅ​កាន់បឹង​យក្ខឡោម​ដ៏ពេញ​និយមស្ថិត​ក្នុង​ក្រុង​បាន​លុង​ ទីដែល​បង្គន់​អនាម័យ​​ដ៏​ទំនើប​​មួយ​​ត្រូវ​បាន​សាងសង់​​តាម​​​សំណើរបស់​ព្រះ​អង្គ ហើយ​តាម​ការ​ប៉ាន់​ប្រមាណគឺ​​ចំណាយ​ទឹក​ប្រាក់អស់ចំនួន​​​​​ជាង​ ៤០.០០០​​​ដុល្លារ​។ ប៉ុន្តែ​ ព្រះ​អង្គម្ចាស់​​​ក្សត្រីយ៍​អង្គនេះ​មិន​បានប្រើ​ប្រាស់​​​បង្គន់​អនាម័យ​នេះឡើយអំឡុង​ដំណើរ​ឈប់​សំចត​រយៈពេល​ខ្លី​របស់​ព្រះ​អង្គ។

ព្រះអង្គម្ចាស់​​​ក្សត្រីយ៍  មហាចក្រី​​​ សិរិន្ទថន​​​ យាងពី​​​មុខ​​​លោក​​​នាយក​​​​​​រដ្ឋមន្ត្រី​​​ ហ៊ុន សែន​​​ ក្រោយពី​​​ជួប​​​ប្រជុំ​​​នៅឯ​​​ការិយាល័យ​​​លោក​​​នាយករដ្ឋ​​​មន្ត្រី​​​ក្នុង​​​ក្រុង​​​ភ្នំពេញ កាលពី​​​ម្សិលមិញ។ រូបថតៈ ស៊ីវ ចាន់ណា​​​/The Cambodia Daily

លោក ញ៉ែម សំអឿន អភិបាល​រង​ខេត្ត​បានមាន​ប្រសាសន៍​ថា “​ព្រះ​អង្គម្ចាស់ក្សត្រីយ៍​ មិន​បាន​ប្រើ​បង្គន់អនាម័យ​នេះទេ…​ ប៉ុន្តែ​​ព្រះ​អង្គបាន​យាង​ទៅ​ទត​​បង្គន់​អនាម័យ​នេះ។ នៅ​ពេល​ព្រះ​អង្គយាង​ត្រឡប់ទៅ​រាជធានី​ភ្នំពេញ​វិញ ពួកគេ​បាន​រុះបង្គន់អនាម័យ​ដ៏​ទំនើប​នេះ​”។

បង្គន់អនាម័យ​ដែល​សាងសង់​ឡើង​ប្រើ​ពេល​១៩ថ្ងៃ​ដោយ​កម្មករ​ថៃ​មួយ​ក្រុម​​ដែល​ជួល​ដោយ​​ក្រុមហ៊ុន Siam Cement Group (SCG) ​​​មាន​មូលដ្ឋាន​នៅទីក្រុង​បាងកក​ បាន​ធ្វើ​ឱ្យ​អន្តរជាតិ​បាន​ការ​ចាប់​អារម្មណ៍​កាល​ពី​ចុង​សប្តាហ៍។ នៅក្នុង​បទ​សម្ភាសន៍​កាលពី​ថ្ងៃ​​​សុក្រ​ លោក Andrew MacGregor បាន​ចាត់ទុក​​សំណង់នេះ​ថាជា “ការ​ប្រមាថដល់​ពលរដ្ឋ​កម្ពុជា”។ លោក សំអឿ​ន បាន​ថ្លែងថា ដោយ​មិន​មាន​បង្គន់​អនាម័យ​ អគារ​ទំហំ​៨ម៉ែត្រ​ក្រឡា​នេះ​នឹង​ត្រូវ​ទុក​ឲ្យ​​​សហគមន៍​យក្ខ​​​ឡោមប្រើ​ប្រាស់។

យោង​តាមលោក ប៉ាក សុន អភិបាល​ខណ្ឌ​បាន​ឱ្យ​ដឹង​ថា ខណៈពេល​ស្ថិត​នៅក្នុង​ខេត្ត​រតនគិរី ព្រះ​អង្គ​ម្ចាស់ក្សត្រីយ៍ បាន​យាង​ចូលរួម​ជា​អធិបតី​ក្នុង​ពិធី​កាត់ខ្សែបូ​សម្ពោធ​មណ្ឌលសុខ​ភាព​សាធារណៈ​​មួយ​ក្នុង​សង្កាត់​អូរ​ជុំ​ដែល​ជា​ព្រ​ះ​រាជ​អំណោយ​របស់​ព្រះ​រាជ​វង្ស​ថៃ​។

លោក​បាន​ថ្លែង​ថា “ឥឡូវ​នេះ ប្រជាពល​រដ្ឋ​រស់នៅ​ក្បែរ​មណ្ឌលសុខភាព​នោះ​អាច​ទៅ​រក​សេវា​សុខាភិបាលបាន​​ដោយ​ស្រួល​”។

យោង​តាម​លោក អ៊ុង រតនា ប្រធានមន្ទីរ​សុខាភិបាល​ខេត្ត​បានឱ្យ​ដឹង​ថា មណ្ឌល​​​សុខ​​​ភាព​នេះ​ត្រូវ​បាន​សាងសង់​កាលពី​ឆ្នាំមុន​ និង​​ចំណាយ​ទឹក​ប្រាក់​អស់​ជាង​២៦០.០០០​​​ដុល្លារ​ ហើយ​មានគិលានុប្បដ្ឋាក៦នាក់​ និង​បុគ្គលិក​គាំពារ​សុខ​ភាព​ផ្សេង​ទៀត”។

លោក កៅ គឹមហួន រដ្ឋមន្ត្រី​អម​នាយក​រដ្ឋមន្ត្រីបានមាន​ប្រសាសន៍​ថា ក្នុង​រយៈពេល​ពីរ​ថ្ងៃ​ក្រោយ ព្រះ​អង្គម្ចាស់ក្សត្រីយ៍ សិរិន្ទថន នឹង​យាង​ទៅពិនិត្យ​មើល​គម្រោង​ទាក់ទង​នឹង​ចំណាប់​អាម្មណ៍​របស់​ព្រះ​អង្គគឺ​ បច្ចេកវិទ្យា។

លោក​បាន​ថ្លែង​ថា ព្រះ​អង្គ​ម្ចាស់​ក្សត្រីយ៍​នឹង​យាង​ចូល​រួមបើក​ការដ្ឋាន​សាងសង់​​វិទ្យាស្ថានបច្ចេក​វិទ្យា​នៅ​ខេត្ត​កំពង់ស្ពឺ​ ដែល​ក៏ជា​ព្រះ​រាជ​អំណោយ​របស់​ព្រះ​រាជវង្ស​ថៃ​ផងដែរ​នៅ​ថ្ងៃអង្គារ និង​យាង​ទៅ​កាន់​វិទ្យា​​​ស្ថាន​បច្ចេកវិទ្យា​​កំពង់​ឈើទាលក្នុង​ខេត្ត​កំពង់​ធំ​នៅ​ថ្ងៃពុធ។

លោក កៅ គឹមហួន បាន​ថ្លែង​ថា អំឡុង​ជំនួប​ជាមួយ​ព្រះ​អង្គម្ចាស់ក្សត្រីយ៍​កាលពី​ព្រឹក​ម្សិលមិញ លោក ហ៊ុន សែន បាន​ថ្លែង​អំណរគុណ​​ដល់​ព្រះ​អង្គម្ចាស់ក្សត្រីយ៍​ចំពោះ​ការ​រួម​ចំណែក​ជួយ​ដល់វិស័យ​អប់រំ និង​សុខា​​​ភិបាល​ នៅ​​​កម្ពុជា​​​។

លោក​​​បាន​​​មាន​​​ប្រសាសន៍​​​ថា “លោក ហ៊ុន​​​ សែន បាន​ថ្លែង​អំណរគុណ​​ដល់​ព្រះ​អង្គ​​​ម្ចាស់​​​ក្សត្រីយ៍​ចំពោះ​ការ​រួម​ចំណែក​ជួយ​ដល់​​​វិស័យ​​​​អប់រំ និង​សុខា​​​ភិបាល​ ជា​ពិសេស​​ទាក់​ទង​​វិទ្យាស្ថាន​បច្ចេក​វិទ្យា”៕សារុន​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស