ឌឹ ខេមបូឌា ដេលី

គណៈកម្មាធិការព្រំដែនកម្ពុជាដែលមានមូលដ្ឋានក្នុងប្រទេសបារាំង ទាមទារឲ្យរដ្ឋាភិបាលកម្ពុជាលប់ចោលទាំងអស់នូវកិច្ចព្រមព្រៀង នយោបាយនិងទឹកដីជាមួយប្រទេសវៀតណាមដែលធ្វើឡើងកាលពី ឆ្នាំ១៩៧៩ដល់ឆ្នាំ១៩៨៩ដើម្បីការពារអធិបតេយ្យរបស់កម្ពុជា មិនឲ្យបាត់បង់ទៅប្រទេសវៀតណាម។

អតីប្រធានគណបក្សសង្គ្រោះជាតិលោកសម រង្ស៊ី ដែលកំពុងមានវត្តមាននៅទីក្រុងហ្សាកាតាប្រទេសឥណ្ឌូណេស៊ីដើម្បីស្វែងរក ដំណោះស្រាយនយោបាយនៅកម្ពុជាព្រមានថា ចលនាបះបោរមួយនឹងកើតមានឡើងក្នុងប្រទេសកម្ពុជា ប្រសិនបើពុំមានវត្តមានរបស់គណបក្សប្រឆាំងនៅក្នុងការបោះឆ្នោតជាតិ ខែកក្កដាខាងមុខនេះ។

អតីតមន្ត្រីនគរបាលនៃក្រសួងសន្តិសុខសាធារណៈរបស់ប្រទេសវៀតណាមម្នាក់ត្រូវបានតុលាការនៃប្រទេសកុម្មុយនីសមួយនេះ កាលពីថ្ងៃច័ន្ទបានកាត់ទោសឱ្យជាប់គុករយៈពេល៨ឆ្នាំពីបទចារកម្មលក់ឯកសារសំងាត់របស់រដ្ឋាភិបាលវៀតណាមទៅឲ្យស្ថានទូតចិននៅកម្ពុជានិងទៅឲ្យវិទ្យុអាស៊ីសេរី។

ក្រសួងទេសចរណ៍កម្ពុជាបានធ្វើការប៉ាន់ប្រមាណថាក្នុងរយៈពេលបួនថ្ងៃនៃពិធីបុណ្យចូលឆ្នាំខ្មែររយៈពេលបួនថ្ងៃនេះ យ៉ាងហោចណាស់មានភ្ញៀវទេសចរ ជិត២លាននាក់ បាននាំគ្នាទៅលេងនៅតំបន់អង្គរខេត្តសៀមរាប។

ប្រទេសអូស្រ្តាលីប្តេជ្ញាប្រយុទ្ធប្រឆាំងការធ្វើដំណើរទេសចរណ៍ មណ្ឌលកុមារកំព្រាដើម្បីទប់ស្កាត់ការជួយដូរកុមារនៅតាមប្រទេសក្នុងតំបន់អាស៊ីអាគ្នេយ៍ រួមទាំងប្រទេសកម្ពុជាផងដែរ។

ពលរដ្ឋខ្មែរអាមេរិកាំងនៅទីក្រុងឡុងប៊ិច រដ្ឋកាលីហ្វ័រញ៉ានឹងរៀបចំប្រារព្ធខួបលើកទី៤៣ ឆ្នាំ នៃរបបវាលពិឃាតខ្មែក្រហម នៅថ្ងៃអង្គារទី១៧ ខែមេសានេះដើម្បីកាន់មរណទុក្ខ និងចងចាំចំពោះការបាត់បង់ពលរដ្ឋខ្មែរជិតពីរលាននាក់ដែលបានស្លាប់ក្នុងរបបកម្ពុជា ប្រជាធិបតេយ្យនៅចន្លោះឆ្នាំ១៩៧៥ដល់ឆ្នាំ១៩៧៨។

សមត្ថកិច្ចទីក្រុងបានបង្ក្រាបបទល្មើសជួញដូរ និងប្រើប្រាស់គ្រឿងញៀនទូទាំងប្រទេសចំនួន១០ករណីក្នុងរយៈពេល៣ថ្ងៃ ចាប់ពីថ្ងៃទី ១៤ដល់១៦ខែមេសាម្សិលម៉ិញនេះ។

ក្រសួងការងារកម្ពុជានិងក្រសួងមុខរបរ និងការងាររបស់ប្រទេសកូរ៉េខាងត្បូងកាលពីម្សិលម៉ិញបានចុះកិច្ចព្រមព្រៀងលើវិស័យការងារតាមប្រព័ន្ធអ៊ិនធឺណែត(Internet)ឬហៅកាត់ថា វើក ណេត(WorkNet) ដើម្បីសហការលើវិស័យការងារនិងបណ្តុះបណ្តាលវិជ្ជាជីវៈ។

ក្រសួងធនធានទឹក និងឧត្តុនិយមកាលពីថ្ងៃម្សិលម៉ិញបានប្រកាសឲ្យពលរដ្ឋប្រុងប្រយ័ត្នចំពោះបាតុភូតផ្គរ រន្ទះ និងខ្យល់កន្ត្រាក់ នៅពេលមេឃជិតធ្លាក់ភ្លៀងគឺចាប់ពីថ្ងៃទី១៥ដល់ថ្ងៃទី១៧ មេសានេះ។

របាយការណ៍របស់អគ្គស្នងការដ្ឋាននគរបាលជាតិ អោយដឹងថាគ្រោះថ្នាក់ចរាចរណ៍រយៈពេល៣ថ្ងៃ ក្នុងឱកាសពិធីបុណ្យចូលឆ្នាំថ្មីប្រពៃណីជាតិនៅទូទាំងប្រទេសចាប់ពីថ្ងៃទី១៤ ដល់ថ្ងៃទី១៦ មេសា ម្សិលម៉ិញនេះមានចំនួន៥៥ករណីក្នុងនោះបណ្តាលឲ្យមនុស្សស្លាប់ ២៦នាក់និងរបួសធ្ងន់ស្រាល៨១នាក់។