CATEGORY
ពាណិជ្ជកម្ម
ក្រុមហ៊ុនតូយ៉ូតាបញ្ជាក់ថា ម៉ូដែលរថយន្តដែលត្រូវប្រមូលមកវិញគឺម៉ូដែលហ៊ីលុច
បុត្រសម្ព័ន្ធរបស់ក្រុមហ៊ុនតូយ៉ូតានៅក្នុងប្រទេសកម្ពុជាបានបញ្ជាក់កាលពីម្សិលមិញថា រថយន្តដែលត្រូវប្រមូលមកក្រុមហ៊ុនវិញតាមសេចក្ដីប្រកាសកាលពីដើមខែនេះគឺរថយន្តម៉ូដែលហ៊ីលុច ដែលត្រូវបានលក់លើទីផ្សារក្នុងស្រុក ក្នុងចន្លោះពេលពីខែកុម្ភៈ ឆ្នាំ២០០៥ដល់ខែមីនា ឆ្នាំ២០១០។
ក្រុមហ៊ុនតូយ៉ូតា (ខេមបូឌា) បានឲ្យដឹងតាមរយៈអុីម៉ែលថា បច្ចុប្បន្នអតិថិជនកំពុងត្រូវបានទាក់ទងឲ្យយករថយន្តរបស់ខ្លួនមកពិនិត្យនៅផ្នែករ៉ឺស័របាញ់ពោងខ្យល់សម្រាប់កន្លែងអ្នកបើកបរក្នុងរថយន្តម៉ូដែលហ៊ីលុច ដែលអាចបង្ករគ្រោះថ្នាក់ដល់មនុស្ស។
រថយន្តជាង១០០គ្រឿងត្រូវបានប្រមូលមកក្រុមហ៊ុនវិញ តាំងពីសេចក្ដីប្រកាសប្រមូលរថយន្តទូទាំងពិភពលោកក្នុងម៉ូដែលនេះត្រូវបានផ្សព្វផ្សាយកាលពីថ្ងៃទី៩ ខែមេសា ឆ្នាំនេះមក។
អុីម៉េលរបស់ក្រុមហ៊ុនតូយ៉ូតាមានខ្លឹមសារថា “ពោងខ្យល់សម្រាប់អ្នកបើកបរនៅក្នុងរថយន្តម៉ូដែលនេះត្រូវបានភ្ជាប់ទៅនឹងគ្រោងរ៉ឺស័រ ដែលមានភ្ជាប់ចរន្តអគ្គិសនីនឹងអាចខូចនៅពេលកាច់ចង្កូត”។
អុីម៉េលដដែលមានខ្លឹមសារបន្តទៀតថា “ប្រសិនបើមានរឿងនេះកើតឡើង អំពូលព្រមានសម្រាប់បញ្ចេញពោងខ្យល់នឹងបញ្ចេញពន្លឺ។ ជាងនេះទៀតពោងខ្យល់សម្រាប់អ្នកបើកបរអាចលែងដំណើរការ ជាេហតុបណ្ដាលឲ្យគ្រោះថ្នាក់អាចកើតឡើងដល់កម្រិតធ្ងន់”។
លោក កែវ វឌ្ឍនៈ ប្រធានផ្នែកសេវាកម្មអតិថិជននៅក្រុមហ៊ុនតូយ៉ូតា បានប៉ាន់ស្មានកាលពីម្សិលមិញថា ចំនួនរថយន្តដែលនឹងត្រូវបានប្រមូលនៅក្នុងប្រទេសកម្ពុជាអាចនឹងកើនឡើងដល់ខ្ទង់រយ ក៏ប៉ុន្តែលោកបានសង្កត់ធ្ងន់ថា បញ្ហាមានកម្រិតខុសគ្នាទៅតាមរថយន្តគ្រប់ម៉ូដែលដែលត្រូវបានផលិតក្នុងឆ្នាំតែមួយ៕ សុធា
ក្រុមហ៊ុនតូយូតាប្រមូលរថយន្តជាង១០០គ្រឿងនៅកម្ពុជា ដើម្បីត្រួតពិនិត្យបច្ចេកទេស
ក្រុមហ៊ុនតូុយូតា បានប្រមូលរថយន្តជាង១០០គ្រឿងនៅក្នុងប្រទេសកម្ពុជា ជាផ្នែកនៃការប្រមូលរថយន្តចំនួន៦,៤លានគ្រឿងទូទាំងសាកលលោករបស់ក្រុមហ៊ុនផលិតរថយន្តជប៉ុន ដោយសារបញ្ហាបច្ចេកទេស។
ប៉ុន្តែអ្នកចែកចាយរថយន្តបន្តបានឲ្យដឹងថា បញ្ញត្តិធូរលុងលើរថយន្តនាំចូលក្នុងប្រទេសនេះនឹងធ្វើឲ្យប៉ះពាល់ដល់ការខិតខំប្រឹងប្រែងយករថយន្តគ្មានសុវត្ថិភាពចេញពីផ្លូវ។
លោក លី ប៊ុនហៃ អគ្គនាយករបស់ក្រុមហ៊ុន Toyota (Cambodia) Co.Ltd . ចាប់តាំងពីក្រុមហ៊ុនតូយូតា បានប្រកាសកាលពីថ្ងៃទី៩ខែមេសាថា រថយន្តរាប់លានគ្រឿងរបស់ខ្លួននឹងត្រូវប្រមូលមកវិញដើម្បីពិនិត្យមើលបញ្ហាដែលអាចកើតមានជាមួយពោងខ្យល់ចង្កូត និងកៅអីមក សាខាក្នុងស្រុកប្រមូលបានជាង១០០គ្រឿងហើយ។
អ្នកចាត់ការម្នាក់នៅក្នុងការិយាល័យសេវាអតិថិជនរបស់ក្រុមហ៊ុនតូយូតា បានឲ្យដឹងថា រថយន្តទំនើបដែលត្រូវប្រមូលនោះគឺរថយន្តតូយូតា Hilux ចាប់ពីឆ្នាំ២០០៦។
ប៉ុន្តែការដឹងច្បាស់តើរថយន្តតូយូតាមិនប្រក្រតីចំនួនប៉ុន្មានគ្រឿងបើកនៅលើផ្លូវ នៅតែមានបញ្ហា ដោយសារតែទីផ្សារងងឹតនៅក្នុងប្រទេសកម្ពុជា ដែលក្នុងនោះរថយន្តភាគច្រើនត្រូវបាននាំចូលតាមច្រកមិនផ្លូវការ។
លោក ប៊ុនហៃ បានមានប្រសាសន៍ថា “វាលំបាកណាស់ក្នុងការតាមដានរថយន្តនៅទីនេះក្នុងប្រទេសកម្ពុជាសម្រាប់ម៉ាក ពីព្រោះស្លាកលេខផ្លូវការនៅលើរថយន្តថ្មីនិងប្រើប្រាស់ហើយ មិនច្បាស់លាស់...ដូច្នេះវាពិបាកនឹងកំណត់អ្វីដែលមិនប្រក្រតីនោះ”។
លោកបានបន្ថែមថា ក្រុមហ៊ុនតូយូតាកាន់កាប់ទីផ្សាររថយន្តធុនស្រាល៧០ភាគរយនៅក្នុងប្រទេសកម្ពុជា ប៉ុន្តែថា មានតែរថយន្តប្រហែល១០ភាគរយប៉ុណ្ណោះត្រូវបានទិញពីអ្នកចែកចាយបន្ត។
លោក ពីលី វង់ អនុប្រធានសហព័ន្ធរថយន្តកម្ពុជាបានមានប្រសាសន៍ថា បញ្ញត្តិរបស់កម្ពុជាលើការនាំចូល នៅមានការធូរលុងខ្លះនៅអាស៊ី។លោកបានបន្តថា “អ្នកដែលអាចនាំរថយន្តមួយគ្រឿងចូលក្នុងប្រទេស ដរាបណាវាមិនចាស់ហួសរយៈពេលប្រាំបីឆ្នាំ និងចង្កូតឆ្វេង”។ “កម្ពុជាជាមួយប្រទេសភូមា ជាទីផ្សាររថយន្តមានការរឹតបន្តឹងតិចតួចនៅអាស៊ាន”។
លោក វង់ បានឲ្យដឹងថា រថយន្តភាគច្រើន ដែលចូលក្នុងប្រទេសនេះ មកពីអាមេរិកនិង មជ្ឈិមបូពា៌ ដូច្នេះវាមិនស្របនឹងការបើកបរក្នុងលក្ខខណ្ឌអាកាសធាតុនិងស្ថានភាពផ្លូវ ថ្នល់ក្នុងប្រទេសកម្ពុជាទេ។
លោកបានបន្តថា “ចាប់តាំងពីអ្នកចែកចាយបន្តផ្លូវការមិនដឹងថា រថយន្តទាំងនោះនៅទីនេះ គ្មានការចាត់វិធានការដោះស្រាយបញ្ហានេះឡើយ ដូច្នេះវាធ្វើឲ្យមានគ្រោះថ្នាក់ដល់មនុស្សជាច្រេើននៅលើផ្លូវថ្នល់”។
ទោះជាយ៉ាងណា លោក ព្រាប ចាន់វិបុល ប្រធាននាយកដ្ឋានដឹកជញ្ជូនផ្លូវគោកនៅក្រសួងសាធារណការនិងដឹកជញ្ជូន បានមានប្រសាសន៍ថា រដ្ឋាភិបាលត្រួតពិនិត្យរថយន្តទាំងអស់ មុនពេលចុះបញ្ជី និងផ្តល់ស្លាកលេខ។
លោកបានឲ្យដឹងទៀតថា “ ការត្រួតពិនិត្យធ្វើឡើងដើ់ម្បីធានាម៉ាស៊ីនដំណើរការបានល្អ រួមទាំងការត្រួតពិនិត្យហ្វ្រាំង និងកុងទ័រ។ ប្រសិនបើវាដំណើរការមិនបានត្រឹមត្រូវ រថយន្តទាំងនេះនឹងត្រូវបញ្ជូនទៅកាន់យានដ្ឋាន”។
ប៉ុន្តែលោកបានបន្ថែមថា ប្រទេសនេះចាំបាច់ត្រូវបង្កើតច្បាប់ស្តីពីសុវត្ថិភាពផ្លូវគោកតាមស្តង់ដារបច្ចេកទេសច្បាស់លាស់ តាមរយៈអ្នកវាយតម្លៃមានជំនាញច្បាស់លាស់ ដែលអាចស្គាល់ពីគុណប្រយោជន៍រថយន្តបើកបរលើផ្លូវ។
លោកបានមានប្រសាសន៍ថា “យើងគ្មានបញ្ញត្តិសុវត្ថិភាពលម្អិតនៅឡើយទេ ហើយក៏គ្មានគណៈកម្មាធិការបច្ចេកទេសដើម្បីត្រួតពិនិត្យបច្ចេកទេសរថយន្តដែរ។ យើងត្រូវបណ្តុះបណ្តាលនិងពិនិត្យក្នុងបច្ចេកទេសបែបនេះ”៕ ប៊ុននី
តួលេខផ្លូវការបង្ហាញថា ទម្ងន់ទំនិញឆ្លងកាត់កំពង់ផែស្វយ័តក្រុងព្រះសីហនុកើនឡើង១៣ភាគរយ
យោងតាមតួលេខផ្លូវការរបស់កំពង់ផែស្វយ័តក្រុងព្រះសីហនុបានបង្ហាញថា ទម្ងន់ទំនិញសរុបដែលត្រូវបានដឹកជញ្ជូនតាមកំពង់ផែនេះ សម្រាប់រយៈពេលបីដំបូងនៃឆ្នាំនេះ បានកើនឡើង១៣,៤៩ភាគរយ បើធៀបជាមួយរយៈពេលដូចគ្នាកាលពីឆ្នាំមុន។ បើគិតពីខែមករាដល់ចុងខែមីនា ទំនិញ៨៦២.៣៧៥តោនបានឆ្លងកាត់កំពង់ផែនេះបើធៀបនឹងឆ្នាំមុនមាន៧៥៩.៨៩៧តោន។
លោក ជា សម្បត្តិ ប្រធាននាយកដ្ឋានផែនការនិងស្ថិតិនៃកំពង់ផែស្វយ័តក្រុងព្រះសីហនុ បានលើកឡើងផងដែរថា កំណើននៃទម្ងន់ទំនិញនេះគឺមានការចូលរួមចំណែកពីកំណើនបរិមាណទំនិញ ដូចជាប្រេងនាំចូល ដែលបានកើនឡើង៨,១៥ភាគរយដល់២៨២.៤២០តោន បរិមាណដំឡូងមីនាំចេញ ដែល បាន កើនឡើងជាង២០.០០០តោន ដល់២៩,១៥៨តោន។
លោកបានបន្ថែមទៀតថា ទំនិញប្រភេទសម្លៀកបំពាក់និងអង្ករ ដែលជាទំនិញពីរក្នុងចំណោមទំនិញនាំចេញសំខាន់ៗរបស់ប្រទេសកម្ពុជា ក៏បានជួយចូលរួមចំណែកក្នុងកំណើននេះផងដែរ។
ទំនិញសម្លៀកបំពាក់កាត់ដេរបានកើនឡើង៣០,៧ភាគរយដល់១៦.៥៥១តោនក្នុងមួយឆ្នាំ បើធៀបនឹងឆ្នាំមុន ចំណែកទំនិញអង្ករកើនឡើង១១ភាគរយដល់៧៧.៩៣៦តោន៕ ប៊ុននី
ក្រុមហ៊ុន Emaxx បោះបង់គម្រោងតូចៗដើម្បីផ្តោតសំខាន់លើគម្រោងហេដ្ឋារចនាសម្ពន្ធគមនាគមន៍
ក្រុមហ៊ុនផ្តល់សេវាបណ្តាញអីុនធើណិតក្នុងឧបករណ៍ចល័ត Emaxx បានដកខ្លួនចេញពីទីផ្សារសេវាអីុនធើណិតខ្នាតតូច ទៅចូលប្រឡូកក្នុងទីផ្សារហេដ្ឋារចនាសម្ពន្ធគមនាគមន៍នៅក្នុងប្រទេសកម្ពុជា ដោយសហការជាមួយក្រុមហ៊ុនហុងកុងមួយ ក្នុងគម្រោងវិនិយោគដែលត្រូវចំណាយប្រាក់១៤៨លានដុល្លារសហរដ្ឋអាមេរិក។
ថ្នាក់ដឹកនាំក្រុមហ៊ុន Emaxx បានប្រកាសនៅក្នុងសន្និសីទសារព័ត៌មានមួយកាលពីម្សិលមិញ អំពីគោលបំណងដ៏សំខាន់របស់ខ្លួនក្នុងការផ្តល់សេវាអីុនធើណិតល្បឿនមហាលឿនដល់ប្រជាជន៨០ភាគរយនៃចំនួនប្រជាជនសរុបក្នុងប្រទេសកម្ពុជា។
ក្រុមហ៊ុន Emaxx បានប្រកាសថា ក្រុមហ៊ុន KeyBridge International Co. បានទិញភាគហ៊ុន៦៥ភាគរយនៅក្នុងក្រុមហ៊ុនទូរគមនាគមន៍កម្ពុជាមួយនេះ ដើម្បីបង្កើតគម្រោងវិនិយោគរួមគ្នាថ្មីមួយ ដែលគ្រោងនឹងចាប់ផ្តើមដំណើរការក្នុងខែតុលា។
លោក យ៉េ គីង (Ye Qiong) ប្រធានថ្មីក្រុមហ៊ុន Emaxx បានមានប្រសាសន៍ថា “យើងនឹងបង្កើតបណ្តាញធំមួយដែលមានសមត្ថភាពផ្គត់ផ្គង់អីុនធើណិត៤០០Gb ក្នុងមួយវិនាទី គ្របដណ្តប់លើប្រព័ន្ធទំនាក់ទំនងតាមខ្សែហ្វាយប៊័រ អុបទិកនៅក្នុងប្រទេសកម្ពុជាទាំងមូល”។
លោក គីង បានឲ្យដឹងទៀតថា ក្រុមហ៊ុន Emaxx នឹងវិនិយោគ និងដំឡើងស្ថានីយមូលដ្ឋានមួយដែលមានសមត្ថភាពផ្គត់ផ្គង់៦០០ 4G សម្រាប់ទំនាក់ទំនងតាមប្រព័ន្ធឥតខ្សែដែលមានល្បឿនលឿនសម្រាប់ទូរស័ព្ទដៃ។
ស្ថានីយទាំងនោះនឹងត្រូវបានសាងសង់នៅទីក្រុងធំៗចំនួនប្រាំមួយមានដែលរួមមានទាំងរាជធានីភ្នំពេញ សៀមរាប និងខេត្តព្រះសីហនុ ផងដែរ។
លោក គីង បានលើកឡើងបន្ថែមទៀតថា ក្រុមហ៊ុនផ្សេងៗទៀត នឹងទទួលបានផលប្រយោជន៍ពីការផ្តោតសំខាន់ទៅលើហេដ្ឋារចនាសម្ពន្ធបណ្តាញអីុនធើណិត។ លោកបានមានប្រសាសន៍ថា “ដោយដកខ្លួនចេញពីទីផ្សារ ក្រុមហ៊ុនផ្សេងទៀតនឹងមិនត្រូវចំណាយប្រាក់លើការអភិវឌ្ឍតាមបណ្តាញចាស់របស់ខ្លួន ដែលនឹងផ្តល់ប្រយោជន៍ដល់អតិថិជនដោយតម្លៃថោកជាងនេះនិងសេវាមានប្រសិទ្ធភាពបន្ថែមទៀត”។
ក្រុមហ៊ុន Emaxx បានចូលទីផ្សារទូរស័ព្ទចល័តកម្ពុជាក្នុងឆ្នាំ២០១១ ដែលនៅពេលនោះប្រធានប្រតិបត្តិការ លោក ហ៊្វ្រែង ម៉េ (Frank May) បានប្រកាសថា ក្រុមហ៊ុននឹងបង្កើតប្រព័ន្ធ 4G ដែលអាចឲ្យអ្នកប្រើប្រាស់ទាញយកទិន្នន័យលឿនជាងឧបករណ៍3G ដល់ទៅ១០ដង។
ក៏ប៉ុន្តែផែនការនេះមិនដែលបានទទួលលទ្ធផលជាផ្លែផ្កានោះទេ ហើយលោក ម៉េបានជាប់ក្នុងពន្ធនាគារក្នុងឆ្នាំ២០១២ ជុំវិញការចោទប្រកាន់ពីបទលួចបន្លំ និងប្រើឯកសារក្លែងក្លាយ។
លោក ថូម៉ាស់ ហ៊ុន (Thomas Hundt) ធ្វើការនៅក្រុមហ៊ុន ស្មាត ម៉ូបាល (Smart Mobile) បានមានប្រសាសន៍កាលពីម្សិលមិញថា ក្រុមហ៊ុនរបស់លោកនៅមានបណ្តាញនៅឡើយក្នុងការផ្តល់សេវា 4G ក្នុងប្រទេសកម្ពុជា ដោយបន្ថែមថា លោកមិនដឹងអំពីគម្រោងរបស់ក្រុមហ៊ុន Emaxx។ លោកថ្លែងថា “យើងមានបំណងស្តាប់គម្រោងរបស់ Emaxx ប៉ុន្តែយើងនៅតែធ្វើវិនិយោគក្នុងបណ្តាញរបស់យើង”៕ សុធា
ឧស្សាហកម្មផលិតកង់នៅកម្ពុជាប្រឈមបញ្ហាពីសហភាពអឺរ៉ុប
គណៈប្រតិភូរបស់សហភាពអឺរ៉ុបមកកាន់កម្ពុជាបាននិយាយកាលពីម្សិលមិញថា ឧស្សាហកម្មកង់ដ៏ក្មេងខ្ចីរបស់កម្ពុជាកំពុងរងការគំរាមកំហែងបន្ទាប់ពីមានការកែប្រែថ្មីៗលើផែនការលើកទឹកចិត្តពាណិជ្ជកម្មរួចពន្ធរបស់សហភាពអឺរ៉ុប។
ដោយចាប់ផ្ដើមកាលពីខែមករា សហភាពអឺរ៉ុបបានពិនិត្យផ្ទៀងផ្ទាត់ប្រព័ន្ធអនុគ្រោះសាកល (GSP) របស់ខ្លួន ដែលអនុញ្ញាតឲ្យបណ្ដាលប្រទេសកំពុងអភិវឌ្ឍន៍បង់ពន្ធទាប ឬមិនបង់ពន្ធសោះលើទំនិញនាំចេញរបស់ខ្លួនទៅកាន់សហភាពអឺរ៉ុប។ គោលបំណងនេះ គឺដើម្បីផ្ដោតការអនុគ្រោះពាណិជ្ជកម្មឡើងវិញលើប្រទេសដែលត្រូវការវាបំផុត។
កំណែទម្រង់នេះនឹងធ្វើឲ្យប្រទេសម៉ាឡេស៊ីនិងប្រទេសសិង្ហបុរី...
ក្រុមហ៊ុនរថយន្តស្ព័រ Porsche ចាប់ផ្តើមសកម្មភាពសាងសង់មជ្ឈមណ្ឌលនៅក្នុងរាជធានីភ្នំពេញ
ក្រុមហ៊ុន Porsche ដែលជាក្រុមហ៊ុនផលិតរថយន្តស្ព័រដ៏ធំមួយនៅប្រទេសអាល្លឺម៉ង់បានចូលមកទីផ្សារប្រទេសកម្ពុជាជាផ្លូវការហើយ កាលពីម្សិលមិញ ដោយមានពិធីចាប់ផ្តើមសកម្មភាពសាងសង់មជ្ឈមណ្ឌលរថយន្ត Porsche ភ្នំពេញ (Porsche Center Phnom Penh) ជាហេតុនាំឲ្យចំនួនក្រុមហ៊ុនផ្គត់ផ្គង់រថយន្តទំនើបៗកើនឡើង ជាការឆ្លើយតបទៅនឹងតម្រូវការអ្នកប្រើប្រាស់ដែលមានទ្រព្យធនច្រើននៅក្នុងប្រទេសនេះ។
សាលតាំងលក់រថយន្តថ្មីដែលស្ថិតនៅទល់មុខអាកាសយានដ្ឋានភ្នំពេញនេះ នឹងមានទំហំជិត២.០០០ម៉ែត្រក្រឡា នៅពេលសកម្មភាពសាងសង់ចប់សព្វគ្រប់ ដោយត្រូវចំណាយប្រាក់ពីរលានដុល្លារ។
ក្នុងពេលដែលសាលតំាងលក់រថយន្តនេះមិនទាន់សាងសង់រួចរាល់រហូតដល់ខែតុលា ក្រុមហ៊ុន Porsche នៅរំពឹងថា ខ្លួននឹងអាចលក់រថយន្តថ្មីរបស់ខ្លួនបានយ៉ាងតិច៣០គ្រឿង ក្នុងឆ្នាំនេះ នេះបើយោងតាមលោក ហ្គ្រេម៉េ ហាន់ធ័រ (Graeme Hunter) អគ្គនាយកក្រុមហ៊ុន Precision Cars (Cambodia) ដែលនឹងតំណាងឲ្យក្រុមហ៊ុន Porsche នៅកម្ពុជា។
លោក ហាន់ធ័រ បានមានប្រសាសន៍ក្នុងពិធីបញ្ចុះបឋមសិលាកាលពីម្សិលមិញថា “ក្រុមហ៊ុន Porsche មិនមែនជាក្រុមហ៊ុនទ្រង់ទ្រាយធំមួយទេ ពោលគឺយើងលក់រថយន្តប្រហែល២០០.០០០គ្រឿងក្នុងមួយឆ្នាំ បើធៀបជាមួយក្រុមហ៊ុនតូយ៉ូតា ដែលលក់រថយន្តប្រាំមួយលានគ្រឿង”។
លោកបានមានប្រសាសន៍បន្ថែមទៀតថា “ ឆ្នាំនេះនៅលើទីផ្សារកម្ពុជា យើងមិនមានមជ្ឈមណ្ឌលរថយន្ត Porsche ទេ ប៉ុន្តែយើងកំពុងតែធ្វើប្រតិបត្តិការនៅក្រៅអគារសាលតាំងលក់ ដូច្នេះយើងរំពឹងថា យើងនឹងលក់បានប្រហែល៣០គ្រឿង ក៏ប៉ុន្តែ នៅពេលដែលយើងមានសាលតំាងលក់ត្រឹមត្រូវយើងនឹងបង្កើនបរិមាណលក់ឲ្យកើនឡើងដល់៨៥គ្រឿងយ៉ាងយូរក្នុងឆ្នាំ២០១៧”។
លោក ហាន់ធ័រ បានលើកឡើងថា ក្រុមហ៊ុន Porsche នៅលើទីផ្សារកម្ពុជា និងផ្តោតសំខាន់ទៅលើរថយន្តប្រភេទ SUV ដែលជារថយន្តទំនើបជាងមុនក្នុងការប្រើប្រាស់នៅតាមស្ថានភាពផ្លូវមិនសូវល្អនៅក្នុងប្រទេសនេះ។ លោកបានមានប្រសាសន៍បន្តទៀតថា “ ៩១១គឺជារថយន្តស្ព័រដ៏ទំនើប ក៏ប៉ុន្តែ រថយន្ត Cayenne គឺជារថយន្តប្រភេទ SUV ហើយវាមានសមត្ថភាពធ្វើប្រតិបត្តិការនៅលើដងផ្លូវ និងនៅទីកន្លែងផ្សេងៗដែលមិនមែនជាផ្លូវបាន ពោលគឺនៅតំបន់ដែលមានស្ថានភាពលំបាកបត់បែន”។
លោក ហាន់ធ័រ បានលើកឡើងបន្តទៀតថា ដើម្បីឲ្យទីផ្សាររថយន្តរបស់ក្រុមហ៊ុន Porsche នៅលើទីផ្សារកម្ពុជាចាប់ផ្តើមស្ទុះឡើង និងមានស្ថានភាពល្អប្រសើរជាងមុនផ្នែករចនាសម្ព័ន្ធ ទីផ្សារនេះប្រហែលជាត្រូវការពេលវេលាពីរបីឆ្នាំ។
នៅពេលក្រុមហ៊ុន Porsche បានប្រកាសកាលពីឆ្នាំ២០០២ថា ខ្លួនបានអភិវឌ្ឍរថយន្តប្រភេទ SUV មានការលើកឡើងយ៉ាងច្រើនពីសំណាក់អ្នកនិយមរថយន្តរបស់ក្រុមហ៊ុន Porsche សុទ្ធថា ការឈានជើងចូលទីផ្សាររថយន្តប្រភេទ SUV ជាសញ្ញាបង្ហាញពីការបាត់បង់ទីផ្សាររថយន្តទំនើបៗ ប៉ុន្តែ យុទ្ធសាស្ត្រនេះមានប្រសិទ្ធភាព ហើយរថយន្ត Cayenne ត្រូវបានលក់ដាច់យ៉ាងច្រើន ដោយសារតែក្រុមហ៊ុន Porsche លក់រថយន្តប្រភេទ SUV បានច្រើនជាងរថយន្តស្ព័រគ្រប់ប្រភេទរបស់ខ្លួន។
នៅលើទីផ្សារកម្ពុជាក្រុមហ៊ុន Porsche សង្ឃឹមថា ខ្លួននឹងដណ្តើមបានចំណែកទីផ្សារយ៉ាងធំ ទោះបីជាទីផ្សារនេះត្រូវបានគ្របដណ្តប់ដោយក្រុមហ៊ុនតូយ៉ូតា និងក្រុមហ៊ុនរថយន្តឡិចសីុស ក៏ប៉ុន្តែ ក្នុងពេលបច្ចុប្បន្ន ទីផ្សារនេះមានក្រុមហ៊ុនរថយន្តកាន់តែច្រើន ដូចជា ក្រុមហ៊ុនរថយន្ត Land Rover រថយន្ត Mercedes និងក្រុមហ៊ុន BMW ជាដើមដែលបច្ចុប្បន្នបានបើកសាខាចែកចាយនៅលើទីផ្សារនេះ ហើយក្រុមហ៊ុនរថយន្ត Audi គ្រោងនឹងបើកដំណើរការក្នុងឆ្នាំនេះ។
លោក ហាន់ធ័រ បានលើកឡើងបន្ថែមទៀតថា ក្រុមហ៊ុន Porsche មិនមានការលំបាកក្នុងការបង្ហាញចំណុចផ្សេងគ្នានៃផលិតផលរបស់ខ្លួនពីផលិតផលក្រុមហ៊ុនដទៃដែលប្រជែងគ្នានៅលើទីផ្សារកម្ពុជាទេ។
លោកបានមានប្រសាសន៍បន្ថែមទៀតថា “ បើកសាកល្បងមួយទៅ នោះអ្នកនឹងដឹងថា រថយន្តរបស់ក្រុមហ៊ុន Porsche មានចំណុចខុសគ្នាត្រង់ណាពីរថយន្តដទៃ”៕សុធា
ក្រុមហ៊ុន ហ្គ្រេន ធ្វីន អីុនធើណេសិនណល (ខេមបូឌា) ខូអិលធីឌី ដែលជាក្រុមហ៊ុនផលិតសម្លៀកបំពាក់សម្រាប់ផ្គត់ផ្គង់ឲ្យក្រុមហ៊ុនកីឡានៅសហរដ្ឋអាមេរិក បានប្រកាស កាលពីម្សិលមិញថា ខ្លួននឹងចុះបញ្ជីជាផ្លូវការនៅផ្សារមូលបត្រកម្ពុជា នៅក្រោយពិធីបុណ្យចូលឆ្នាំថ្មី ជាហេតុនាំឲ្យក្រុមហ៊ុននេះក្លាយជាក្រុមហ៊ុនជួញដូរភាគហ៊ុនឯកជនដំបូងគេបង្អស់ ដែលមានវត្តមានលើផ្សារមូលបត្រកម្ពុជា និងជាក្រុមហ៊ុនទី២ដែលធ្វើប្រតិបត្តិការបែបនេះ។
នៅពេលចុះបញ្ជីនៅថ្ងៃទី៨ ខែឧសភា ក្រុមហ៊ុននេះមានគម្រោងប្រកាសលក់ជាសាធារណៈលើកដំបូងនូវប័ណ្ណភាគហ៊ុនចំនួន៨.០០០.០០០ហ៊ុនក្នុងតម្លៃចាប់ពី៧.៤០០រៀល ឬ១,៨៥ដុល្លារទៅ១៤.០០០រៀល ឬប្រហែល៣,៥០ដុល្លារក្នុងមួយហ៊ុន នេះបើយោងតាមនាយកប្រតិបត្តិក្រុមហ៊ុន ហ្គ្រេន ធ្វីន ដែលបានបង្ហាញផែនការនេះកាលពីម្សិលមិញ ក្នុងពិធីមួយនៅសណ្ឋាគារសូហ្វីតែលក្នុងរាជធានីភ្នំពេញ។
លោក លាវ ជុងតេ (Liao Chung Te) ប្រធាននាយកប្រតិបត្តិក្រុមហ៊ុន ហ្គ្រេន ធ្វីន បានប្រាប់អ្នកជំនួញប្រុសស្រីជាង២០០នាក់ថា “ក្រុមហ៊ុន ហ្គ្រេន ធ្វីន គឺជាក្រុមហ៊ុនឯកជនដំបូងគេដែលបានបោះផ្សាយលក់ភាគហ៊ុនជាសាធារណៈនៅក្នុងប្រទេសកម្ពុជា។ ខ្ញុំមានទំនុកចិត្តថា ដោយមានការគាំទ្ររបស់លោក លោកស្រីចំពោះភាគហ៊ុនប្រកាសលក់ជាសាធារណៈលើកដំបូងរបស់យើងខ្ញុំ ក្រុមហ៊ុន ហ្គ្រេន ធ្វីន នឹងគ្រាន់តែប្រើប្រាស់វិនិយោគទុនរបស់យើងឲ្យបានកាន់តែច្រើន និងកាន់តែរឹងមាំប៉ុណ្ណោះទេ ក៏ប៉ុន្តែ ថែមទាំងពង្រឹងប្រតិបត្តិការគ្រប់គ្រងផ្ទៃក្នុងរបស់យើង និងការអនុវត្តច្បាប់ ដើម្បីស្វែងរកប្រាក់ចំណេញសម្រាប់វិនិយោគិនទាំងអស់”។
ក្នុងពេលបច្ចុប្បន្ន មានតែរដា្ឋករទឹកស្វយ័តក្រុងភ្នំពេញដែលជាសហគ្រាសរដ្ឋប៉ុណ្ណោះ ដែលកំពុងធ្វើប្រតិបត្តិការជួញដូរភាគហ៊ុននៅផ្សារមូលបត្រកម្ពុជា។ គួរបញ្ជាក់ថា ក្រុមហ៊ុនរដ្ឋមួយនេះបានចាប់ផ្តើមប្រតិបត្តិការជួញដូរភាគហ៊ុនរបស់ខ្លួននៅពេលផ្សារមូលបត្រចាប់ផ្តើមដំណើរការកាលពីខែមេសាឆ្នាំ២០១២។
យោងតាមរបាយការណ៍មួយដែលត្រូវបានបង្ហាញកាលពីម្សិលមិញ ដោយក្រុមហ៊ុន ហ្គ្រេន ធ្វីន បានបង្ហាញថា ក្រុមហ៊ុននេះរំពឹងថា ប្រាក់ចំណូលរបស់ខ្លួននឹងកើនឡើង១២,៥ភាគរយដល់៤០លានដុល្លារក្នុងឆ្នាំ២០១៥ ពោលគឺកើនឡើងពី៣០លានដុល្លារដែលក្រុមហ៊ុននេះបានព្យាករថា ខ្លួននឹងសម្រេចបានក្នុងឆ្នាំនេះ។ របាយការណ៍នេះបានបង្ហាញទៀតថា ប្រាក់ចំណេញសុទ្ធរបស់ក្រុមហ៊ុន ហ្គ្រេន ធ្វីន បានកើនឡើងដល់៨,៧លានដុល្លារក្នុងឆ្នាំ២០១២ ដោយមានប្រាក់ចំណូលចំនួន២៥លានដុល្លារ។
ក៏ប៉ុន្តែ មុនពេលក្រុមហ៊ុន ហ្គ្រេន ធ្វីន អាចចុះបញ្ជីបាន ក្រុមហ៊ុននេះត្រូវឆ្លងកាត់ដំណើរការប៊ុកបៀលឌីងជាមុនសិន ពោលគឺក្រុមហ៊ុននេះនឹងចាប់ផ្តើមកត់ត្រាតម្រូវការវិនិយោគិន ដើម្បីកំណត់តម្លៃភាគហ៊ុនសម្រាប់ប្រកាសលក់ជាសាធារណៈលើកដំបូង។
សេចក្តីប្រកាសព័ត៌មានមួយនៅលើគេហទំព័ររបស់ក្រុមហ៊ុនមូលបត្រភ្នំពេញ បានបង្ហាញថា ក្រុមហ៊ុន ហ្គ្រេន ធ្វីន នឹងចាប់ផ្តើមដំណើរការនេះនៅថ្ងៃច័ន្ទ និងបញ្ជប់នៅថ្ងៃទី២៥ ខែមីនា ហើយលទ្ធផលនឹងត្រូវបានប្រកាសនៅថ្ងៃទី៣ ខែមេសា។ ដំណើរការប៊ុកបៀលឌីងមួយទៀតគ្រោងនឹងចាប់ផ្តើមពីថ្ងៃទី២១ខែមេសា ដល់ថ្ងៃទី២៥ ខែមេសា។
ក្រុមហ៊ុន ហ្គ្រេន ធ្វីន ជាក្រុមហ៊ុនផលិតសម្លៀកបំពាក់សម្រាប់ផ្គត់ផ្គង់ឲ្យក្រុមហ៊ុនសម្ភារកីឡាអាមេរិកដូចជា អាឌីដាស (Adidas) និង រីបុក (Reebok)។
លោក ហុង សុខហួរ ប្រធាននាយកប្រតិបត្តិផ្សារមូលបត្រកម្ពុជា បានប្រាប់ក្រុមអ្នកសារព័ត៌មាននៅក្នុងពិធីនេះកាលពីម្សិលមិញថា មានក្រុមហ៊ុនជាច្រើនទៀតដែលមានផែនការចុះបញ្ជីនៅលើផ្សារមូលបត្រកម្ពុជា បន្ទាប់ពីក្រុមហ៊ុន ហ្គ្រេន ធ្វីន ក៏ប៉ុន្តែលោកបានបដិសេធមិនប្រាប់ឈ្មោះក្រុមហ៊ុនទាំងនោះ ឬមិននិយាយថា តើក្រុមហ៊ុនទាំងនោះជាក្រុមហ៊ុនឯកជន ឬរដ្ឋទេ។
លោកបានមានប្រសាសន៍ថា “មានក្រុមហ៊ុនពីរ ឬបីដែលកំពុងខិតខំរៀបចំឯកសារ ប៉ុន្តែខ្ញុំមិនដឹងថា តើក្រុមហ៊ុនមួយឬពីរក្នុងចំណោមទាំងនោះត្រៀមរួចរាល់ឬយ៉ាងណាទេ”។
គេហទំព័ររបស់ផ្សារមូលបត្រកម្ពុជាផ្តល់រយៈពេលកំណត់យ៉ាងតិចមួយឆ្នាំបន្ទាប់ពីដាក់សំណុំឯកសារជូនគណៈកម្មការមូលបត្រកម្ពុជា។ កាលពីឆ្នាំមុន លើកលែងតែក្រុមហ៊ុន ហ្គ្រេន ធ្វីន ភាគច្រើនជាក្រុមហ៊ុនរបស់រដ្ឋ ដូចជា កំពង់ផែស្វយ័តព្រះសីហនុ និង ទូរគមនាគមន៍កម្ពុជា ជាដើម បានសម្តែងការចាប់អារម្មណ៍របស់ខ្លួនក្នុងការចុះបញ្ជីនៅផ្សារមូលបត្រកម្ពុជា៕ សុធា
របាយការណ៍ចុះស្រង់ទិន្នន័យបង្ហាញថា តម្លៃអចលនទ្រព្យក្នុងរាជធានីភ្នំពេញនៅតែបន្តកើនឡើង
លទ្ធផលចុះស្រង់ទិន្នន័យដែលត្រូវបានចេញផ្សាយកាលពីម្សិលមិញ បានបង្ហាញថា តម្លៃដីក្នុងរាជធានីភ្នំពេញ បាននិងកំពុងកើនឡើង តាំងពីទីផ្សារអចលនទ្រព្យក្នុងប្រទេសកម្ពុជា បានស្ទុះឡើងហើយស្រុតចុះវិញ កាលពីជាងប្រាំឆ្នាំមុន ក៏ប៉ុន្តែអ្នកជំនាញការបានលើកឡើងថា ករណីបំប៉ោងទីផ្សារប្រហាក់ប្រហែលគ្នានេះ មិនទំនងជាកើតឡើងក្នុងពេលអនាគតដ៏ខ្លីខាងមុខនេះទេ។
លទ្ធផលនៃសកម្មភាពចុះស្រង់ទិន្នន័យរបស់ក្រុមហ៊ុន វីត្រាស់ ប្រូភើធី ខូអិលធីឌី ផ្អែកលើតម្លៃដីក្នុងត្រីមាសទី៤ នៃឆ្នាំមុន ក្នុងខណ្ឌទាំងប្រាំបួនរបស់រាជធានីភ្នំពេញ ដែលមាន៩៦សង្កាត់។
លទ្ធផលចុះស្រង់ទិន្នន័យនេះ បានបង្ហាញទៀតថា តម្លៃប្រកាសលក់ដីនៅក្នុងរាជធានីភ្នំពេញមាន១.៤៤០ដុល្លារក្នុងមួយម៉ែត្រក្រឡា។ តម្លៃទាបបំផុតគឺប្រហែល១០ដុល្លារក្នុងមួយម៉ែត្រក្រឡាក្នុងសង្កាត់ពញាពន្ធ ក្នុងខណ្ឌសែនសុខ។ ចំណែកឯតម្លៃខ្ពស់បំផុត គឺ៥.៩០០ដុល្លារក្នុងមួយម៉ែត្រក្រឡានៅក្នុងសង្កាត់បឹងកេងកង១ ខណ្ឌចំការមន។
តម្លៃមធ្យមក្នុងមួយម៉ែត្រក្រឡានៃផ្ទៃដីបានប្រែប្រួលយ៉ាងច្រើន បើប្រៀបធៀបតម្លៃមធ្យមក្នុងខណ្ឌទាំងប្រាំបួន។ តម្លៃមធ្យមខ្ពស់បំផុត គឺមានប្រហែល៣.៦៣០ដុល្លារ ហើយ តម្លៃមធ្យមទាបបំផុត គឺមាន១៦០ដុល្លារ នេះបើយោងតាមលទ្ធផលចុះស្រង់ទិន្នន័យដដែលនេះ។
តម្លៃមធ្យមខ្ពស់ៗបំផុតមាននៅខណ្ឌដូនពេញ ៧មករា ចំការមន និងខណ្ឌទូលគោក។ ក្នុងខណ្ឌដូនពេញ តម្លៃមធ្យមខ្ពស់បំផុតមាន៤.២០០ដុល្លារក្នុងសង្កាត់ជ័យជម្នះ។
ក្នុងខណ្ឌដែលស្ថិតនៅចំណុចកណ្ដាលនៃរាជធានីភ្នំពេញនេះមានតម្លៃមធ្យមក្នុងមួយម៉ែត្រក្រ ឡា៣.៦២៨ដុល្លារ ខណៈដែលតម្លៃទាបបំផុតមាន១.០៤២ដុល្លារ ខណៈដែលតម្លៃខ្ពស់បំផុតមាន៥.៨៣០ដុល្លារ។
ក្នុងខណ្ឌ៧មករា តម្លៃមធ្យមក្នុងមួយម៉ែត្រក្រឡាមាន២.៧០០ដុល្លារ។ តម្លៃទាបបំផុតមាន១.០១០ដុល្លារ និងតម្លៃខ្ពស់បំផុតមាន៥.១៥០ដុល្លារ។ តម្លៃមធ្យមខ្ពស់បំផុតសម្រាប់ខណ្ឌនេះគឺ៣.២០០ដុល្លារក្នុងមួយម៉ែត្រក្រឡា នៅសង្កាត់មនោរម្យ។
ក្នុងខណ្ឌចំការមន តម្លៃមធ្យមមាន២.៣៦០ដុល្លារ។ តម្លៃទាបបំផុតមាន១.០១០ដុល្លារ និងតម្លៃខ្ពស់បំផុតមាន៥.៩០០ដុល្លារ។ តម្លៃមធ្យមខ្ពស់បំផុតក្នុងខណ្ឌនេះមាន៣.៣០០ដុល្លារនៅក្នុងសង្កាត់បឹងកេងកង១។
ក្នុងខណ្ឌទួលគោក តម្លៃមធ្យមមាន២.២៦០ដុល្លារ។ តម្លៃទាបបំផុតមាន១.០០០ដុល្លារ និងតម្លៃខ្ពស់បំផុតមាន៥.៣៤០ដុល្លារ។ តម្លៃមធ្យមខ្ពស់បំផុតមាន២.៨១០ដុល្លារនៅក្នុងសង្កាត់ផ្សារដេប៉ូ២។
តម្លៃដីទាបជាងគេបំផុតនៅក្នុងចំណោមខណ្ឌទាំងនេះមានជាមធ្យមនៅខណ្ឌដង្កោ និងខណ្ឌពោធិ៍សែនជ័យ។
ក្នុងខណ្ឌដង្កោ តម្លៃមធ្យមមាន១៦០ដុល្លារក្នុងមួយម៉ែត្រក្រឡា។ តម្លៃខ្ពស់បំផុតមាន៩២០ដុល្លារ ខណៈដែលតម្លៃទាបបំផុត២០ដុល្លារ។ តម្លៃមធ្យមខ្ពស់បំផុតមាន៤៥០ដុល្លារក្នុងសង្កាត់ដង្កោ។
ក្នុងខណ្ឌពោធិ៍សែនជ័យ តម្លៃមធ្យមមាន២៧០ដុល្លារ។ តម្លៃទាបបំផុតមាន២០ដុល្លារ ខណៈដែលតម្លៃខ្ពស់បំផុតមាន១.៨១០ដុល្លារហើយតម្លៃមធ្យមខ្ពស់បំផុតមាន៧២០ដុល្លារក្នុងសង្កាត់ចោមចៅ។
កត្តាដែលជំរុញឲ្យតម្លៃដីកើនឡើងបែបនេះរួមមានទំហំដីសម្រាប់លក់ ប្រភេទអគារ និងទីតាំងដី។
ក្នុងពេលដែលលទ្ធផលចុះស្រង់ទិន្នន័យបង្ហាញពីកំណើនជាបន្តបន្ទាប់ បើធៀបនឹងតម្លៃអចលនទ្រព្យកាលពីពេលទីផ្សារនេះបានស្រុតចុះក្នុងឆ្នាំ២០០៩មក ថ្នាក់ដឹកនាំក្រុមហ៊ុនវីត្រាស បានលើកឡើងកាលពីម្សិលមិញក្នុងសន្និសីទសារព័ត៌មានថា មានការបារម្ភបន្តិចបន្តួចអំពីករណីទីផ្សារស្ទុះឡើងហើយស្រុតចុះវិញ។
លោក អុីន ស៊ីថា នាយកគ្រប់គ្រងក្រុមហុ៊នវីត្រាស រៀលធី ខូអីលធីឌី បានមានប្រសាសន៍ថា “ដរាបណាសេដ្ឋកិច្ច និងនយោបាយមានស្ថានភាពល្អ តម្លៃទាំងនេះនឹងកើនឡើងជាលំដាប់។ ក្នុងរយៈពេល៥១០ ឬ១៥ឆ្នាំខាងមុខ តម្លៃទីផ្សារនឹងបន្តកើនឡើង ប៉ុន្តែមិនមែនជាតម្លៃបំប៉ោងទេ”។
លោក ហ្គ្រែន ណាកគី (Grant Knuckey) ប្រធាននាយកប្រតិបត្តិធនាគារ ANZ Royal លើកឡើងកាលពីម្សិលមិញថា កម្ចីអចលនទ្រព្យនៅធនាគារ ANZ Royal បានកើនឡើងប្រហែល៣៥ភាគរយបើគិតតាមទំហំហិរញ្ញវត្ថុកាលពីឆ្នាំមុន ក៏ប៉ុន្តែករណីបំប៉ោងទីផ្សារអចលនទ្រព្យប្រហែលជាស្ថិតនៅផ្លូវដ៏វែងឆ្ងាយនៅពេលខាងមុខដ៏យូរ។
លោកបានមានប្រសាសន៍ថា “យើងមិនបានឃើញប្រជាជនខ្ចីប្រាក់ច្រើនជាងតម្លៃរបស់លំនៅដ្ឋានទេ។ ពួកគាត់បានអនុវត្តផែនការសងបានយ៉ាងល្អប្រសើរ។ ទីផ្សារមានស្ថិរភាព...ហើយបន្តទៅមុខរយៈពេលជាច្រើនឆ្នាំទៀត”។
សកម្មភាពចុះស្រង់ទិន្នន័យរបស់ក្រុមហ៊ុនវីត្រាស ត្រូវបានអនុវត្តដោយកំណត់យកសំណាកចំនួន៦៦០នាក់សម្រាប់សម្ភាសតាមទូរស័ព្ទ និងសម្ភាសដោយផ្ទាល់។ គួរបញ្ជាក់ថា អ្នកដែលបានចូលរួមសម្ភាសគឺជាអ្្នកដែលស្ថិតក្នុងដំណើរការលក់អចលនទ្រព្យរបស់ខ្លួននៅក្នុងរាជធានីភ្នំពេញ៕សុធា
រ៉ឺម៉កម៉ូតូកង់បីរាងដូចសណ្តែកសៀងកំពុងទទួលបានការចាប់អារម្មណ៍ក្នុងរាជធានីភ្នំពេញ
អ្នករត់រ៉ឺម៉កម៉ូតូកង់បីជាច្រើនបានប្រជែងគ្នាដើម្បីដណ្តើមអតិថិជន ប៉ុន្តែសម្រាប់លោក ហួង ហួរ វិញទទួលបានអតិថិជនដោយមិនចាំបាច់ខំប្រឹង។
ខណៈពេលលោក ហួង ហួរ ឈរនៅលើចិញ្ចើមផ្លូវក្បែរមាត់ទន្លេ មានភ្ញៀវទេសចរជាច្រើនក្រុមបានចង្អុលមកកាន់រ៉ឺម៉កម៉ូតូកង់បីពណ៌លឿងចាស់ដ៏ភ្លឺចាំងរបស់លោក។ រ៉ឺម៉កម៉ូតូពណ៌លឿងចាស់ដ៏ភ្លឺរលោងរបស់លោក ហួង ហួរ មានរាងដូចជាគ្រាប់សណ្តែកសៀង ហើយវាខុសពីរ៉ឺម៉កម៉ូតូកង់បីស៊េរីចាស់ដែលធ្វើអំពីឈើឆ្ងាយណាស់។
រ៉ឺម៉កម៉ូតូកង់បីរាងមូលដូចសណ្តែកសៀងនេះបានមកដល់រាជធានីភ្នំពេញកាលពីខែវិច្ឆិកា ដោយសារលោក ប៊្រូណូ ប៊្រុនណឺ (Bruno Brunner) ជាជនជាតិស្វ៊ីសដែលបើកក្រុមហ៊ុនជួលម៉ូតូ។
លោក ប៊្រុនណឺ បានមានប្រសាសន៍ថា “ធុក ធុក នេះទំនើប ហើយវាស័ក្តិសមសម្រាប់ឆ្នាំ២០១៤។រីឯអ្នកធ្វើដំណើរវិញក៏ចូលចិត្តធុក ធុក នេះដែរ”។ រូបរាងថ្មីនេះគឺវាមានភាពខុសគ្នាពីរ៉ឺម៉កម៉ូតូកង់បីសព្វថ្ងៃដែលមានចំនួនជាង៦.០០០ គ្រឿងក្នុងរាជធានីភ្នំពេញយ៉ាងខ្លាំង នេះបើយោងតាមសមាគមប្រជាធិតេយ្យឯករាជ្យនៃសេដ្ឋកិច្ចក្រៅប្រព័ន្ធ(IDEA) ជាសហជីពដែលតំណាងឲ្យអ្នករត់រ៉ឺម៉កម៉ូតូកង់បី។
លោក ប៉ុក សំណាង ប្រធានសមាគមមគ្គទេសក៍ទេសចរកម្ពុជាបានឲ្យដឹងថា ដោយទទួលឥទ្ធិពលដំបូងពីឆៃកែវរបស់ប្រទេសចិនរ៉ឺម៉កម៉ូតូបានមានវត្តមានជាលើកដំបូងនៅក្នុងប្រទេសកម្ពុជានៅមុនសម័យខ្មែរក្រហម។ កាលពីឆ្នាំ១៩៨០ រ៉ឺម៉កម៉ូតូបានមានវត្តមានជាថ្មីម្តងទៀតដោយមានប្រវែង៥ម៉ែត្រ ហើយអាចដឹកមនុស្សពី២០ទៅ៣០នាក់ ក៏ដូចជាទំនិញផ្សេងៗរបស់អ្នកដំណើរផងដែរ។
តែទោះជាយ៉ាងណា លោក ហេង សាម៉ុន អគ្គលេខាធិការនៃសមាគមប្រជាធិតេយ្យឯករាជនៃសេដ្ឋកិច្ចក្រៅប្រព័ន្ធបានលើកឡើងថា រ៉ឺម៉កដែលមានប្រវែងយ៉ាងវែងបែបនេះ គឺវាលំបាកខ្លាំងណាស់នៅពេលបើកបរតាមផ្លូវដែលមានមនុស្សយ៉ាងច្រើនក្នុងរាជធានីភ្នំពេញ។
លោក សាម៉ុន បានមានប្រសាសន៍ថា “រ៉ឺម៉កប្រភេទនេះធ្វើឲ្យមានការកកស្ទះចរាចរណ៍ក្នុងរាជធានី ហេតុដូច្នេះទើបច្បាប់ចរាចរណ៍មិនអនុញ្ញាតឲ្យរ៉ឺម៉កបែបនេះចូលក្នុងរាជធានី”។
ដំណោះស្រាយដើម្បីដោះស្រាយការកកស្ទះចរាចរណ៍បានកើតឡើងអំឡុងឆ្នាំ២០០០។ ហើយដោយសារតែភ្ញៀវទេសចរបានសម្រុកមកលេងប្រទេសកម្ពុជាយ៉ាងច្រើននោះ ពលរដ្ឋខ្មែរនៅខេត្តសៀមរាប បានទទួលឥទ្ធិពលពីធុក ធុក របស់ប្រទេសថៃ ដោយពួកគាត់បានបង្កើតរ៉ឺម៉កម៉ូតូកង់បីខ្លីជាងមុន និងមានពូកសម្រាប់អង្គុយនៅខាងក្រោយ។
លោក ប៉ុក សំណាង បានមានប្រសាសន៍ថា “ រ៉ឺម៉កម៉ូតូទាំងនេះបានដឹកភ្ញៀវទេសចរនៅក្នុងក្រុងសៀមរាបនិងតំបន់អង្គរ។វាទទួលបានការចាប់អារម្មណ៍ច្រើនឡើងៗ ហើយបន្ទាប់មកវាក៏ត្រូវបានគេចាប់ផ្តើមប្រើប្រាស់ច្រើនឡើងៗផងដែរ”។
ហើយឥឡូវនេះរ៉ឺម៉កម៉ូតូទាំងនេះគឺត្រូវបានគេប្រើប្រាស់យ៉ាងច្រើនក្នុងរាជធានីភ្នំពេញពោលគឺពេលភ្ញៀវទេសចរ ឬអ្នករស់នៅក្នុងរាជធានីភ្នំពេញដើរទៅណាមកណាគឺសុទ្ធតែឃើញរ៉ឺម៉កម៉ូតូកង់ទាំងនេះ ដែលជាហេតុធ្វើឲ្យអ្នកថ្មើរជើងជាច្រើនមានការព្រួយបារម្ភពីសុវត្ថិភាពរបស់ខ្លួន។
ចំណែកឯពាក្យទាក់ទិននឹងរ៉ឺម៉កម៉ូតូកង់បីនេះក៏មានការពិភាក្សាដេញដោលគ្នាយ៉ាងខ្លាំងផងដែរ។ លោក ប្រាក់ វុទ្ធី ប្រធានគ្រប់គ្រងទីផ្សារទទួលបន្ទុកប្រទេសតំបន់អាស៊ាននៅក្រសួងទេសចរណ៍បានមានប្រសាសន៍ថា “យើងហៅវាថា រ៉ឺម៉កម៉ូតូកង់បី”។ លោកបានបញ្ជាក់ថា ពាក្យ ធុក ធុក នេះគឺជាពាក្យមកពីប្រទេសថៃ។
លោក ប៉ុក សំណាង បានលើកឡើងថា គេអាចហៅម្យ៉ាងទៀតថា ជា “រ៉ឺម៉ក” ក៏បានដែរព្រោះពាក្យរ៉ឺម៉កនេះគឺជាពាក្យបារាំងដែលនៅពេលមួយត្រូវបានគេប្រើប្រាស់ជាទូទៅដើម្បីសំដៅលើធុក ធុក នេះឯង។ តែទោះជាយ៉ាងណា នៅមានអ្នកខ្លះបានការពារពាក្យ “ធុក ធុក” នេះដោយពួកគេបានលើកឡើងថា នៅពេលប្រើពាក្យថា ធុកធុក គឺវាស្តាប់មើលទៅទំនងជាង។
លោក ប៊្រុនណឺ មិនបានជំទាស់អ្វីទេចំពោះការហៅរ៉ឺម៉កម៉ូតូកង់បីថ្មីរបស់លោកថា ធុក ធុក នោះ ព្រោះលោកចង់ឲ្យមុខជំនួញរបស់លោកដំណើរការប៉ុណ្ណោះ។ ទោះបីជាមានអ្នកទិញចាប់អារម្មណ៍ច្រើនក៏ដោយ ក៏លោកនៅតែជួលរ៉ឺម៉កម៉ូតូកង់បីរបស់លោក ក្នុងតម្លៃ៨០ដុល្លារក្នុងមួយខែហើយប្រសិនបើមានការផ្សព្វផ្សាយពាណិជ្ជកម្មលើរ៉ឺម៉កម៉ូតូនេះ លោកយកតម្លៃ៣០ដុល្លារប៉ុណ្ណោះ។
លោក ភាព ភព ដែលបានចាប់ផ្តើមប្រើប្រាស់រ៉ឺម៉កម៉ូតូកង់បីរាងដូចសណ្តែកនេះអស់រយៈពេលជាបីខែមកហើយ មិនទទួលបានប្រាក់ចំណេញច្រើនប៉ុន្មានទេ បើធៀបទៅនឹងរ៉ឺម៉កម៉ូតូចាស់របស់គាត់ ដែលគាត់បានទិញក្នុងតម្លៃ៨០០ដុល្លារនោះ។ ប៉ុន្តែគាត់ចំណាយត្រឹមតែមួយដុល្លារក្នុងមួយថ្ងៃប៉ុណ្ណោះលើថ្លៃជួលរ៉ឺម៉កម៉ូតូកង់បីថ្មីរបស់គាត់ដែលមានផ្សាយពាណិជ្ជកម្មឲ្យក្រុមហ៊ុន Ezecom នោះ ហេតុដូច្នេះគាត់ពេញចិត្តនឹងរ៉ឺម៉កម៉ូតូកង់បីដែលមានរូបរាងថ្មីនេះ។ លោក ភាព ភព បាននិយាយថា “ខ្ញុំមិនចាំបាច់ត្រូវចំណាយច្រើននោះទេ។ រ៉ឺម៉កម៉ូតូនេះទទួលបានការចាប់អារម្មណ៍ច្រើនពីភ្ញៀវទេសចរ”៕ ស៊ុយឈាង
សហគ្រិនវ័យក្មេងបីនាក់ដែលមានគំនិតជំរុញឲ្យប្រជាជនដាំបន្លែដោយខ្លួនឯងនៅផ្ទះបានឈរនៅចំណាត់ថ្នាក់លេខ១ និងទទួលបានប្រាក់៣.០០០ដុល្លារក្នុងកម្មវិធីប្រកួតប្រជែងថ្នាក់ជាតិមួយ កាលពីថ្ងៃសៅរ៍។ គួរបញ្ជាក់ថា កម្មវិធីនេះមានគោលបំណងជំរុញឲ្យមានការបំផុសគំនិតថ្មីៗ និងការធ្វើពិពិធកម្មសេដ្ឋកិច្ច។
កញ្ញា រ៉េត មុន្នីនាថ យុវជន យ៉ា ស័ក និងកញ្ញា ជា ចេតនា ដែលជាម្ចាស់គម្រោងអាជីវកម្មសួនដាំ បន្លែធម្មជាតិខ្នាតតូច បានយកឈ្នះក្រុមយុវជនដទៃទៀតនៅក្នុងកម្មវិធីប្រកួតប្រជែងគំរូអាជីវក ម្មខ្នាតតូច និងមធ្យមថ្នាក់ជាតិឆ្នាំ២០១៤ ដោយសារតែពួកគេមានគំនិតលក់ស៊ុមដាំបន្លែដំឡើងទុកមុនក្នុងតម្លៃ២៥ទៅ៩០ដុល្លារ ហើយនៅក្នុងស៊ុំនោះមានដី និងគ្រាប់ពូជដើម្បីឲ្យប្រជាជនអាចដាំបន្លែនៅផ្ទះដោយខ្លួនឯងបាន ដូចជា ត្រកួន ប៉េងប៉ោះ និងផ្សិតជាដើម។
គោលគំនិតនេះកើតចេញពីអារម្មណ៍ចង់ឲ្យប្រជាជនកម្ពុជាដែលរស់នៅក្នុងទីក្រុងមានសុខភាពល្អជាងមុន និងមានសកម្មភាពដាំបន្លែ ក្នុងរាជធានីភ្នំពេញ នេះបើយោងតាមសម្ដីរបស់កញ្ញា មុន្នីនាថ ដែលជានិស្សិតឆ្នាំទី២ ផ្នែកប្រព័ន្ធផ្សព្វផ្សាយនៅសាកលវិទ្យាល័យភូមិន្ទភ្នំពេញ។
កញ្ញាបាននិយាយថា “គោលគំនិតនេះគឺសាមញ្ញទេ។ ប៉ាខ្ញុំកម្រហូបបន្លែណាស់ ព្រោះគាត់តែងតែត្អូញថា បន្លែលក់ទៅលើទីផ្សារមិនមែនជាបន្លែស្រស់ទេ ហើយភាគច្រើនត្រូវបាននាំចូលពីប្រទេសថៃ និងវៀតណាម ដោយមានបាញ់សារធាតុគីមី”។
និស្សិតរូបនេះបានលើកឡើងបន្តទៀតថា ផ្លែឈើ និងបន្លែមានតម្លៃខ្ពស់នៅក្នុងប្រទេសកម្ពុជា ដោយសារតែខ្វះរបៀបដាំដែលមានលក្ខណៈស្មុគស្មាញ ជាហេតុនាំឲ្យមានទិន្នផលតិច ហើយតម្លៃក៏ឡើងខ្ពស់។
កញ្ញាបាននិយាយបន្តទៀតថា “អ៊ីចឹងហើយបានជាយើងនាំគ្នាគិតថា ហេតុអ្វីបានជាប្រជាជនមិនដាំបន្លែដោយខ្លួនឯង? នៅខែមីនាខាងមុខ ក្រុមនិស្សិតនេះ និងក្រុមនិស្សិតដែលជាប់ចំណាត់ថ្នាក់លេខ២ នឹងបន្តទៅប្រកួតប្រជែងជាមួយនិស្សិតមកពីប្រទេសឡាវ ភូមា ថៃ វៀតណាម និងខេត្តយូណានប្រទេសចិន នៅទីក្រុងវៀងចន្ទន៍។ ប្រសិនបើពួកគេទទួលជោគជ័យ ពួកគេនឹងបន្តដំណើរទៅប្រកួតប្រជែងក្នុងកម្មវិធីប្រកួតប្រជែងគំរូអាជីវកម្មអន្តរជាតិនៅសហរដ្ឋអាមេរិក។
កម្មវិធីប្រកួតប្រជែងគំរូអាជីវកម្មដែលត្រូវបានបែងចែកជាបីផ្នែកផ្សេងគ្នា គឺអាជីវកម្មទូទៅបច្ចេក វិទ្យា និងកសិកម្មនេះ មានគោលបំណងលើកកម្ពស់សហគ្រិនភាពក្នុងចំណោមប្រជាជនខ្មែរវ័យក្មេង និងចលនាបង្កើតអាជីវកម្មធម្មតា ក៏ដូចជាអាជីវកម្មជួយសង្គមផងដែរ។ ក្នុងចំណោមគំនិតអាជីវកម្មផ្សេងៗទៀតមានដូចជា ការផលិតគ្រឿងសង្ហារិមចេញពីស្លឹកចេក និងទស្សនាវដ្ដីជួយរកការងារឲ្យយុវជនធ្វើ។
លោក ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានមានប្រសាសន៍នៅក្នុងកម្មវិធីប្រកួតប្រជែងកាលពីថ្ងៃសៅរ៍ថា “នៅពេលវិនិយោគិនមកប្រទេសកម្ពុជាពួកគេមិនអាចរកកម្លាំងធនធានមនុស្សគ្រប់គ្រាន់ និងមានលក្ខណៈសម្បត្តិគ្រប់គ្រាន់បានទេ” ។ លោកបានលើកឡើងថា លោកមានសង្ឃឹមថា កម្មវិធីប្រកួតប្រជែងបែបនេះនឹងជួយផ្ដល់ជំនាញបច្ចេកទេស និងជំនាញសហគ្រិនភាពដល់ប្រជាជនខ្មែរវ័យក្មេងកាន់តែច្រើន ដែលជាកត្តាជួយជំរុញឲ្យមានការបំផុសគំនិតថ្មីៗ និងជួយធ្វើពិពិធកម្មសេដ្ឋកិច្ច។
កម្មវិធីប្រកួតប្រជែងនេះត្រូវបានរៀបចំឡើងដោយមូលនិធិគាំទ្រវិស័យអប់រំអន្តរជាតិ ក្រោមកិច្ចសហប្រតិបត្តិការជាមួយវិទ្យាស្ថាន និងសាកលវិទ្យាល័យនៅក្នុងប្រទេសកម្ពុជា និងសាកលវិទ្យាល័យវ៉េស្ដា (Waseda University) នៅប្រទេសជប៉ុន៕ សុធា