នាយករដ្ឋមន្ត្រីតពូជថ្មីលោក ហ៊ុន ម៉ាណែត ចាត់ទុកការលើកឡើងរបស់អតីតមេដឹកនាំបក្សប្រឆាំងលោក សម រង្ស៊ី ជុំវិញការសាងសង់ព្រែកជីកហ្វូណន ថាជាទង្វើប្រឆាំងនឹងសមិទ្ធផលជាតិខ្មែរ។
លោក ហ៊ុន ម៉ាណែត បានសរសេរលើទំព័រហ្វេសប៊ុករបស់ខ្លួននៅថ្ងៃទី២៦ មេសា នេះថា លោក សម រង្ស៊ី ជាមេដឹកនាំនយោបាយប្រឆាំងចាស់វស្សាមួយរូបដែរ ប៉ុន្តែគ្រាន់តែជាមេដឹកនាំដែលប្រឆាំងដើម្បីតែប្រឆាំងប៉ុណ្ណោះ ព្រោះថាលោក សម រង្ស៊ី ប្រឆាំងនឹងរដ្ឋាភិបាលកម្ពុជាមិនរើសប្រធានបទនោះទេ សូម្បីការកសាងព្រែកជីកហ្វូណនដែលជាសមិទ្ធផលរបស់ជាតិខ្មែរ ដែលក្រោមកិច្ចខិតខំប្រឹងប្រែងរបស់រដ្ឋាភិបាលកម្ពុជារហូតមក ក៏មេបក្សប្រឆាំងរូបនេះប្រឆាំងដែរ។
លោក ហ៊ុន ម៉ាណែត លើកជាសំណួរថា តើលោក សម រង្ស៊ី ជាមនុស្សល្ងង់ពិតប្រាកដ ឬជាមនុស្សចេះ ធ្វើល្ងង់ ព្រោះថាប្រជាជនកម្ពុជាមួយប្រទេសបានយល់អំពីអត្ថប្រយោជន៍ចំពោះសេដ្ឋកិច្ច និងសង្គមជាតិ ដែលគម្រោងព្រែកជីកហ្វូណននេះថានឹងផ្ដល់ប្រយោជន៍សម្រាប់ប្រទេសជាតិ និងពលរដ្ឋខ្មែរគ្រប់ៗគ្នាទៅហើយ ប៉ុន្តែបែរជាលោក សម រង្ស៊ី ដែលជាអ្នកនយោបាយចាស់វស្សាម្នាក់ និងតាំងខ្លួនជាអ្នកស្រឡាញ់ជាតិនោះ មិនមានសមត្ថភាពមើលឃើញ ឬទទួលស្គាល់នូវអ្វីដែលល្អសម្រាប់ខ្មែរទៅវិញ។
លោក ហ៊ុន ម៉ាណែត អះអាងថា សូម្បីតែភូមិសាស្ត្រពាក់ព័ន្ធនឹងខេត្តដែលគម្រោងនឹងសាងសង់ព្រែកជីកនេះ ក៏គាត់និយាយមិនត្រូវផង ដូច្នេះតើគាត់ជាមនុស្សល្ងង់ពិតប្រាកដ ឬជាមនុស្សចេះ ប៉ុន្តែគាត់ជាមនុស្សល្ងង់ទៅវិញទេ នៅពេលដែលគាត់ប្រឆាំងសូម្បីតែសមិទ្ធផលសម្រាប់ជាតិ និងប្រជាជនខ្មែរខ្លួនឯងបែបនេះនោះ។
កាលពីថ្ងៃទី២៥ ខែមេសា ឆ្នាំ២០២៤ អតីតមេដឹកនាំបក្សប្រឆាំងលោក សម រង្ស៊ី ចោទថាគម្រោងព្រែកជីកហ្វូណន ជាគម្រោងបម្រើឱ្យផលប្រយោជន៍ចិនកុម្មុយនីស្ត ហើយព្រែកជីកនេះក៏អាចនាំមកនូវគ្រោះថ្នាក់ដ៏ធ្ងន់ធ្ងរដល់បរិស្ថាន និងជីវភាពរស់នៅពលរដ្ឋខ្មែរដែរ។
លោក សម រង្ស៊ី លើកឡើងថា រដ្ឋាភិបាលខ្មែរដែលស្ថិតក្រោមបង្គាប់លោក ហ៊ុន សែន បានសម្រេចសាងសង់ព្រែកជីកនេះតាមសំណើចិនកុម្មុយនីស្តយ៉ាងតក់ក្រហល់ ដោយគ្មានស្មារតីទទួលខុសត្រូវឡើយ ព្រោះថារដ្ឋាភិបាលកម្ពុជាមិនទាន់បានធ្វើការសិក្សាស្រាវជ្រាវឱ្យបានស៊ីជម្រៅ និងគ្រប់ជ្រុងជ្រោយពីគុណប្រយោជន៍ និងផលប៉ះពាល់អំពីបញ្ហាសេដ្ឋកិច្ច និងភូមិសាស្ត្រនយោបាយរបស់ព្រែកជីកនេះនៅឡើយទេ។
អតីតមេដឹកនាំបក្សប្រឆាំងរូបនេះលើកឡើងថា បំណងធំបំផុតនៃការសាងសង់ព្រែកជីកនេះ មិនមែនដើម្បីបម្រើផលប្រយោជន៍សេដ្ឋកិច្ចប្រទេសកម្ពុជាទេ ប៉ុន្តែដើម្បីបម្រើផលប្រយោជន៍យុទ្ធសាស្ត្ររបស់មហាអំណាចកុម្មុយនីស្តចិន ដែលត្រូវការពង្រឹងឥទ្ធិពលរបស់ខ្លួនឱ្យដល់ឈូងសមុទ្រថៃ ដោយឆ្លងកាត់ប្រទេសឡាវ និងប្រទេសកម្ពុជា ដែលស្ថិតក្រោមឥទ្ធិពលប្រទេសចិន សព្វថ្ងៃនេះ។
ទាក់ទិននឹងបញ្ហានេះ ប្រធានវិទ្យាស្ថានទំនាក់ទំនងអន្តរជាតិនៃកម្ពុជា បណ្ឌិត គិន ភា លើកឡើងថា ការលើកឡើងរបស់លោក សម រង្ស៊ី គឺបង្ហាញពីអំពើក្បត់ទាំងស្រុងទៅនឹងផលប្រយោជន៍ជាយុទ្ធសាស្ត្ររបស់ប្រទេសកម្ពុជាធ្ងន់ធ្ងរ។
បណ្ឌិត គិន ភា បញ្ជាក់ថា បរទេសជិតខាងខ្លះធ្លាប់បានប្រើប្រាស់រួចហើយនូវយុទ្ធសាស្ត្រខ្ចីដែកកេះរបស់កូនយើង ឱ្យយកមកដុតផ្ទះយើង ហើយកម្ពុជាក៏ធ្លាប់រងគ្រោះដោយយុទ្ធសាស្ត្រដែកកេះនេះយ៉ាងធ្ងន់ធ្ងរដែរពីអតីតកាល ដូច្នេះមកដល់ពេលនេះ ខ្មែរគ្រប់រូបល្មមយល់ហើយពីយុទ្ធសាស្ត្ររបស់បរទេស និងត្រូវឈ្វេងយល់ពីភាពបត់បែននៃភូមិសាស្ត្រនយោបាយដែរ មិនត្រូវឱ្យបរទេសខ្ចីដៃប្រើប្រាស់ដោយអំពើក្បត់នឹងផលប្រយោជន៍ជាតិខ្លួនបន្តទៀតនោះទេ។
យ៉ាងណាក៏ដោយ ប្រធានវិទ្យាស្ថានប្រជាធិបតេយ្យកម្ពុជាលោក ប៉ា ចន្ទរឿន សរសេរលើគណនីហ្វេសប៊ុករបស់ខ្លួននៅថ្ងៃទី២៦ មេសា នេះថា បញ្ហាព្រែកជីកហ្វូណននៅពេលនេះអាចជាការជំរុញឲ្យមានការផ្សះផ្សានយោបាយខ្មែរ ដែលកំពុងមានវិបត្តិសព្វថ្ងៃនេះដែរ។
លោកអះអាងថា អ្នកនយោបាយគួរចេះចាប់ឱកាសដើម្បីពង្រឹងសាមគ្គីភាព និងឯកភាពជាតិដើម្បីប្រយោជន៍វែងឆ្ងាយរបស់ជាតិ ព្រោះនៅក្នុងសង្គមប្រជាធិបតេយ្យសេរី គណបក្សប្រឆាំងមានតួនាទីសំខាន់ដើម្បីធ្វើឱ្យមានការត្រួតពិនិត្យ និងតុល្យភាពនៃអំណាច ប៉ុន្តែមិនមែនប្រឆាំងបែបអវិជ្ជមានឡើយ។
ប្រធានវិទ្យាស្ថានប្រជាធិបតេយ្យកម្ពុជារូបនេះបញ្ជាក់ថា អ្នកនយោបាយនៅក្នុងសង្គមប្រជាធិបតេយ្យសេរីជឿនលឿន ត្រូវតែចេះបែងចែកជម្លោះ និងការសម្រុះសម្រួលគ្នាដើម្បីប្រយោជន៍រួមរបស់ជាតិ។ ឧទាហរណ៍ជាក់ស្តែង នៅសហរដ្ឋអាមេរិក គណបក្សប្រជាធិបតេយ្យ និងគណបក្សសាធារណរដ្ឋ ក៏មានការជំទាស់គ្នាដ៏ស្រួចស្រាល់ដែរ ប៉ុន្តែពួកគេនៅតែអាចរកការឯកភាពគ្នា និងគាំទ្រគ្នាលើបញ្ហាដែលទាក់ទងនឹងសន្តិសុខ និងប្រយោជន៍រួមរបស់សហរដ្ឋអាមេរិក។
គម្រោងផ្លូវនាវាចរណ៍ និងប្រព័ន្ធភស្តុភារកម្មទន្លេបាសាក់ ឬ ព្រែកជីកហ្វូណនតេជោ គ្រោងនឹងបើកការដ្ឋានសាងសង់នៅអំឡុងខែមិថុនា ឬខែកក្កដា ឆ្នាំ២០២៤ នេះ ក្រោមកិច្ចព្រមព្រៀងជាមួយក្រុមហ៊ុនឯកជនចិន China Road and Bridge Corporation (CRBC) ឬ សាជីវកម្មថ្នល់ និងស្ពានចិន ក្នុងទម្រង់ BOT ដែលមានន័យថា ក្រុមហ៊ុនចិននឹងគ្រប់គ្រងមុន ខណៈរដ្ឋាភិបាលកម្ពុជានឹងគ្រប់គ្រងតាមក្រោយ៕