TAG
paywall
គណៈកម្មការរួមគណបក្សសម្រាប់កែទម្រង់ប្រព័ន្ធបោះឆ្នោត បើកកិច្ចប្រជុំលើកដំបូងនៅព្រឹកនេះ
សមាជិកនៃគណៈកម្មការកែទម្រង់ប្រព័ន្ធបោះឆ្នោត បានឲ្យដឹងកាលពីម្សិលមិញថា គណៈកម្មការថ្មីបង្កើតឡើងអំឡុងកិច្ចប្រជុំមួយរវាងសមាជិកជាន់ខ្ពស់របស់គណបក្សប្រជាជនកម្ពុជាដែលកំពុងកាន់អំណាច និងគណបក្សសង្គ្រោះជាតិកាលពីខែមុននេះ នឹងបើកកិច្ចប្រជុំលើកដំបូងរបស់ខ្លួននៅព្រឹកនេះដើម្បីកំណត់របៀបវារៈ។
ស្ថាប័នថ្មីនេះមានភារកិច្ចរៀបចំកម្មវិធីកែទម្រង់ប្រព័ន្ធបោះឆ្នោតសម្រាប់ការបោះឆ្នោតនៅពេលអនាគត។ គួរបញ្ជាក់ថា មេដឹកនាំគណបក្សសង្គ្រោះជាតិបានលើកឡើងថាពួកគេសង្ឃឹមថា ការបោះឆ្នោតនឹងប្រព្រឹត្តទៅមុនរដ្ឋសភាផុតអាណត្តិបច្ចុប្បន្នរបស់ខ្លួនក្នុងឆ្នាំ២០១៨ ដើម្បីកែតម្រូវនូវអ្វីដែលមេដឹកនាំទាំងនេះលើកឡើងថា ជាការបោះឆ្នោតមានការលួចបន្លំកាលពីក្នុងខែកក្កដា។
លោក ជាម យៀប សមាជិកសភាជាន់ខ្ពស់មកពីគណបក្សប្រជាជនកម្ពុជា ហើយនឹងត្រូវចូលរួមក្នុងកិច្ចប្រជុំនៅព្រឹកនេះដែរ បានពន្យល់ថា វាជាបុព្វសិទ្ធិរបស់គណបក្សសង្គ្រោះជាតិ ដែលអះអាងថា មានបញ្ហានៅក្នុងប្រព័ន្ធបោះឆ្នោតនោះ ក្នុងការសំណូមពរនូវអ្វីដែលនឹងដាក់ក្នុងរបៀបវារៈ។
សំដៅដល់ចំណុចចចាររបស់គណបក្សសង្គ្រោះជាតិនាពេលកន្លងមកដូចជាឲ្យមានយន្តការស៊ើបអង្កេតឯករាជ្យមួយក្នុងការបោះឆ្នោតកាលពីឆ្នាំមុន ឬសេចក្តីអំពាវនាវឲ្យមានការបោះឆ្នោតឡើងវិញ ជាដើមនោះ លោក ជាម យៀប បានមានប្រសាសន៍ថា “អ្វីដែលសំខាន់បំផុត គឺមិនត្រូវចាកប្រធាន ដែលគណបក្សទាំងពីរបានជ្រើសរើស នោះគឺកម្មវិធីកែទម្រង់ប្រព័ន្ធបោះឆ្នោត”។
គណបក្សទាំងពីរបានលើកឡើងថា បញ្ហាទាំងនេះនឹងមិនត្រូវបានលើកយកមកពិភាក្សានៅក្នុងកិច្ចប្រជុំរបស់គណៈកម្មការថ្មីនេះទេ ហើយនឹងតម្រូវឲ្យមានកិច្ចប្រជុំពិសេសមួយរវាងលោកនាយករដ្ឋមន្ត្រី ហ៊ុន សែន និងលោក សម រង្ស៊ី មេដឹកនាំគណបក្សប្រឆាំង។
លោក ជាម យៀប ដែលនឹងចូលរួមជាមួយសមាជិកប្រាំរូបទៀតរបស់គណបក្សប្រជាជនកម្ពុជា ក្នុងកិច្ចប្រជុំនាព្រឹកនេះមានប្រសាសន៍ថា “យើងនឹងរង់ចាំមើល នៅថ្ងៃស្អែកនេះ”។
លោក សុន ឆ័យ ប្រធានក្រុមតំណាងរាស្ត្រគណបក្សសង្គ្រោះជាតិ បានលើកឡើងថា លោកនិងសមាជិកប្រាំរូបទៀតនៃគណៈប្រតិភូរបស់គណបក្សសង្គ្រោះជាតិក្នុងគណៈកម្មការនេះ នឹងស្នើឲ្យមានការផ្តោតលើការសិក្សាអំពីចំណុចបរាជ័យនៃការបោះឆ្នោតចុងក្រោយ ក្នុងការកំណត់ចំណុចដែលត្រូវកែទម្រង់។
លោកបានមានប្រសាសន៍ថា “ការបង្កើតនីតិវិធីប្រតិបត្តិការរបស់គណៈកម្មការរួមនេះនឹងជាចំណុចសំខាន់ ហើយបន្ទាប់មក នឹងបន្តទៅចំណុចសិក្សាអំពីការបោះឆ្នោតលើកមុន”។ លោក សុន ឆ័យ បានពន្យល់ថា “វាជារឿងសំខាន់ដែលយើងនឹងឃើញអំពីភាពពិតរបស់គណបក្សប្រជាជនកម្ពុជា។ ប្រសិនបើពួកគេប្តេជ្ញាកែទម្រង់ ពេលនោះយើងនឹងពិភាក្សាអំពីបញ្ហាសំខាន់ៗដែលអង្គការក្រៅរដ្ឋាភិបាលនានាបានលើកឡើង”។
ដោយឡែក សម្ព័ន្ធអង្គការក្រៅរដ្ឋាភិបាលកែទម្រង់ការបោះឆ្នោត ដែលគេស្គាល់ថាជា “បន្ទប់ស្ថានភាព” (The Situation Room) បានចេញសេចក្តីថ្លែងការណ៍មួយកាលពីថ្ងៃសៅរ៍ដើម្បីអំពាវនាវឲ្យគណៈកម្មការថ្មីនេះ យល់ព្រមឲ្យមានការកែទម្រង់គណៈកម្មាធិការជាតិរៀបចំការបោះឆ្នោតដែលស្ថិតនៅក្រោមឥទ្ធិពលគ្រប ដណ្តប់ដោយសមាជិកគណបក្សប្រជាជនកម្ពុជានោះ កែទម្រង់បញ្ជីឈ្មោះអ្នកបោះឆ្នោតជាតិ ដែលត្រូវបានញាំញីដោយសារការបាត់ឈ្មោះ និងឈ្មោះស្ទួន និងអំពាវនាវឲ្យមានការបោះឆ្នោតជាតិថ្មីនៅចុងឆ្នាំ២០១៥ ពោលគឺនៅពាក់កណ្តាលអាណត្តិនៃការបោះឆ្នោតបច្ចុប្បន្ន៕ ប៊ុននី
ព្រះសង្ឃនិងគណបក្សសង្គ្រោះជាតិចែកអំណោយទៅឲ្យជនរងគ្រោះដោយសារស្នាដៃរដ្ឋាភិបាល
កាលពីថ្ងៃសុក្រព្រះតេជគុណ លួន សុវ៉ាត ដែលជាសកម្មជនជាព្រះសង្ឃដ៏ល្បីឈ្មោះនិងសមាជិកសភាជាប់ឆ្នោតមកពីគណបក្សសង្គ្រោះជាតិមួយរូប បានចែកអង្ករនិងប្រាក់ដែលទទួលបានការឧបត្ថម្ភពីបងប្អូនខ្មែររស់នៅប្រទេសបារាំងនិងប្រទេសកាណាដា ទៅឲ្យក្រុមគ្រួសារដែលរងផលប៉ះពាល់និងជាប់ទាក់ទិននៅជម្លោះដីធ្លីដ៏រុាំរ៉ៃនិងការតវ៉ានៅក្នុងរាជធានីភ្នំពេញ។
ដោយមានសង្ឃដីកានៅក្នុងពិធីមួយក្នុងវត្តសាមគ្គីរង្សី នៅខណ្ឌមានជ័យ រាជធានីភ្នំពេញ ព្រះតេជគុណ លួន សុវ៉ាត បានប្រើព្រឹត្តិការណ៍ នេះដើម្បីរិះគន់គោលនយោបាយដីធ្លីរបស់លោកនាយករដ្ឋមន្ត្រី ហ៊ុន សែន។
ដោយរំឭកអ្នកចូលរួមនៅក្នុងព្រឹត្តិការណ៍នេះកុំឲ្យភ្លេចយុទ្ធនាការឃោសនាបោះឆ្នោត របស់គណបក្សប្រជាជនកម្ពុជាកាលពីឆ្នាំ២០១៣ ដែលបានអំពាវនាវឲ្យអ្នកបោះឆ្នោត “អាណិត ស្រឡាញ់ និង ជឿទុកចិត្ត” លើគណបក្សកាន់អំណាច ព្រះតេជគុណបានមានសង្ឃដីកាបន្ថែមថា “ប្រសិនបើអស់លោកអាណិត និងស្រឡាញ់ខ្ញុំ សូមកុំបាញ់និងរំលោភយកដីធ្លីរបស់ខ្ញុំអី”។
ព្រះតេជគុណ លួន សុវ៉ាត បានមានសង្ឃដីកាទៅកាន់មនុស្សជាង១៧០នាក់ពីសហគមន៍បុរីកីឡា និងសហគមន៍បឹងកក់ព្រមទាំងក្រុមគ្រួសាររបស់មនុស្សទាំង២៣នាក់ដែលត្រូវបានឃុំខ្លួន អំឡុងការតវ៉ារបស់កម្មកររោងចក្រកាត់ដេរកាលពីខែមុនថា “ប្រទេសកម្ពុជាសព្វថ្ងៃ គ្មានច្បាប់រដ្ឋ គ្មានការគោរពសិទ្ធិមនុស្សទេ ព្រោះវាគឺជាលទ្ធិប្រជាធិបតេយ្យក្លែងក្លាយ”។ លុយសុទ្ធនិងអង្ករប្រហែល៤.០០០ដុល្លារ ត្រូវបានចែកនៅក្នុងព្រឹត្តិការណ៍នោះ។
អ្នកស្រី កាន សំនៀង អាយុ២៤ឆ្នាំដែលប្តីរបស់គាត់ឈ្មោះ គឹម ផលលៀម អាយុ ២៦ឆ្នាំត្រូវគ្រាប់ស្លាប់ អំឡុងការតវ៉ានៅផ្លូវវេងស្រេង កាលពីថ្ងៃ៣ ខែមករា ទទួលបានប្រាក់ចំនួន៨០ដុល្លារ។
អ្នកស្រីបាននិយាយថា “ខ្ញុំសប្បាយចិត្តណាស់ដែលបានទទួលអំណោយនេះ ព្រោះខ្ញុំមិនដែលទទួលបានអំណោយពីរដា្ឋភិបាលឡើយ បន្ទាប់ពីប្តីរបស់ខ្ញុំស្លាប់មក”។
លោក ឡុងរី សមាជិកសភាជាប់ឆ្នោតមកពីគណបក្សសង្គ្រោះជាតិ បានចោទប្រកាន់មន្ត្រីរដ្ឋាភិបាលថា “ បានបណ្តេញពលរដ្ឋចេញពីផ្ទះសំបែងនិងបាញ់សម្លាប់មនុស្ស”៕ ស៊ុយឈាង
មនុស្សបីនាក់ត្រូវផ្តន្ទាទោសពីបទជាប់ទាក់ទិនការប៉ះទង្គិចគ្នាជាមួយនគរបាលលើស្ពានព្រះមុនីវង្ស
កាលពីថ្ងៃសុក្រ សាលាដំបូងរាជធានីភ្នំពេញបានផ្តន្ទាទោសជនសង្ស័យបីនាក់ក្នុងចំណោមជនសង្ស័យទាំងប្រាំមួយនាក់ឲ្យជាប់ពន្ធនាគារពីបទជាប់ទាក់ទិននឹងការប៉ះទង្គិចគ្នាកាលពីថ្ងៃទី១៥ ខែកញ្ញា នៅលើស្ពានព្រះមុនីវង្សរវាងនគរបាលនិងយុវជនគប់ដុំថ្មដែលអំឡុងពេលនោះមានបុរសម្នាក់បានស្លាប់និងមនុស្សមួយចំនួនទៀតរបួសដោយការបាញ់ប្រហាររបស់នគរបាល។
នៅពេលប្រកាសសាលក្រមផ្តន្ទាទោសចៅក្រម សេង នាង បានលើកឡើងថា ចុងចោទចំនួនបីនាក់ត្រូវបានរកឃើញថា មានពិរុទ្ធភាពពីបទបង្ករបួសស្នាមដោយចេតនានិងពីបទមានបំណងបង្កការខូចខាតដោយធ្វើឲ្យស្ថានភាពកាន់តែធ្ងន់ធ្ងរ។
តែទោះជាយ៉ាងណា ចៅក្រម សេង នាង បានបន្ធូរបន្ថយទោសជនជាប់ចោទពីរនាក់ក្នុងចំណោមជនជាប់ចោទទាំងបី ហើយបានលើកលែងការចោទប្រកាន់ចុងចោទបីនាក់ផ្សេងទៀតក៏មានវត្តមាននៅក្នុងតុលាការដែរនោះ ពោលគឺមានន័យថា មានតែបុរសជនជាតិវៀតណាមម្នាក់ប៉ុណ្ណោះដែលនឹងត្រូវជាប់ពន្ធនាគារ។
ចៅក្រម សេង នាង បានមានប្រសាសន៍ថា “ តុលាការបានសម្រេចផ្តន្ទាទោស ង្វៀន ទីតេក អាយុ២០ឆ្នាំឲ្យជាប់ពន្ធនាគាររយៈពេលបីឆ្នាំ ប៉ុន្តែជននេះនឹងត្រូវជាប់ពន្ធនាគារតែមួយឆ្នាំប៉ុណ្ណោះ ដោយទោសជាប់ពន្ធនាគារពីរឆ្នាំទៀតត្រូវបានព្យួរ”។
ចៅក្រម សេង នាង បានបន្ថែមថា “ឡាញ់ សាមឿន អាយុ១៩ឆ្នាំ និង វ៉ា នឿន អាយុ៤០ឆ្នាំត្រូវបានផ្តន្ទាទោសឲ្យជាប់ពន្ធនាគាររយៈពេលបីឆ្នាំដែរ ប៉ុន្តែពួកគេត្រូវបានឃុំខ្លួនជាបណ្តោះអាសន្នអស់រយៈពេល៣៧ថ្ងៃរួចមកហើយ មុនពេលត្រូវបានដោះលែងឲ្យនៅក្រៅឃុំកាលពីថ្ងៃទី២២ ខែតុលា ហេតុដូច្នេះទោសដែលនៅសល់ត្រូវបានព្យួរ”។
លោកចៅក្រមបានមានប្រសាសន៍បន្ថែមទៀតថា “ តុលាការបានសម្រេចលើកលែងការចោទប្រកាន់ចំពោះមនុស្សបីនាក់ដែលត្រូវបានចោទប្រកាន់ពីបទប្រើអំពើហិង្សាលើមន្ត្រីនគរបាលក្បែរស្ពានព្រះមុនីវង្ស។ ឯក ចាន់នូ អាយុ១៧ឆ្នាំ តាំង ចុងសេង អាយុ១៩ឆ្នាំ និង សុង និស្ស័យ អាយុ២១ឆ្នាំ សុទ្ធតែត្រូវបានលើកលែងការចោទប្រកាន់”។
លោក យិន សាវ៉ាត មេធាវីតំណាងចុងចោទទាំងប្រាំមួយនាក់បានលើកឡើងថា លោកខកចិត្តយ៉ាងខ្លាំងចំពោះសាលក្រម ហើយលោកបានអះអាងថា កូនក្តីរបស់លោកមិនជាប់ពាក់ព័ន្ធនៅក្នុងការប៉ះទង្គិចគ្នាលើស្ពាននៅយប់នោះឡើយ។ លោក សាវ៉ាត បានឲ្យដឹងថា លោកនឹងពិភាក្សាជាមួយកូនក្តីរបស់លោកថា តើត្រូវប្តឹងឧទ្ធរណ៍ ឬក៏អត់។
ការប៉ះទង្គិចគ្នាដែលបានធ្វើឲ្យនគរបាលបាញ់ស្លាប់អ្នកឈរតាមផ្លូវម្នាក់ឈ្មោះ ម៉ៅ សុខចាន់ បានកើតឡើងនៅពេលបញ្ចប់ថ្ងៃ ទី១នៃមហាបាតុកម្មដែលគណបក្សសង្គ្រោះជាតិបានធ្វើរយៈពេលបីថ្ងៃ ដើម្បីប្រឆាំងនឹងលទ្ធផលនៃការបោះឆ្នោតជាតិ កាលពីខែកក្កដា ឆ្នាំមុន។
បន្ទាប់ពីស្ពានព្រះមុនីវង្ស ត្រូវបានបិទដោយរបាំងរបស់នគរបាលនៅពេលនោះមានការកកស្ទះចរាចរណ៍យ៉ាងខ្លាំងដែលជាហេតុធ្វើឲ្យការប៉ះទង្គិចបានផ្ទុះឡើងរវាងយុវជនគប់ដុំថ្មនិងនគរបាលបង្ក្រាបកុបកម្មប្រដាប់ដោយអាវុធ និងកងរាជអាវុធហត្ថ។
បន្ថែមពីលើការស្លាប់របស់ ម៉ៅ សុខចាន់ដែលត្រូវគ្រាប់ចំក្បាលស្លាប់ មនុស្សមួយចំនួនផ្សេងទៀតក៏បានរងរបួសដោយសារគ្រាប់កាំភ្លើងរបស់នគរបាលដែរ។
នគរបាលបានអះអាងថា ខ្លួនបានធ្វើការស៊ើបអង្កេតលើការបាញ់ប្រហារដោយមន្ត្រីរបស់ខ្លួន ប៉ុន្តែលទ្ធផលដែលបានមកពីការស៊ើបអង្កេតនៅមិនទាន់អាចផ្សព្វផ្សាយជាសាធារណៈនៅឡើយទេ។
លោក អំ សំអាត អ្នកគ្រប់គ្រងបច្ចេកទេសនៅអង្គការសិទ្ធិមនុស្សលីកាដូ បានលើកឡើងថា លោកជឿជាក់ថា មនុស្សគ្មានទោស កំហុសចំនួនបីនាក់ បានបង់ប្រាក់សម្រាប់បទល្មើសដែលពួកគេមិនបានប្រព្រឹត្ត រីឯនគរបាលដែលសម្លាប់និងធ្វើរបួសអ្នកឈរតាមផ្លូវវិញមិនត្រូវបានចាប់មកផ្តន្ទាទោសឡើយ។
លោក អំ សំអាត បានមានប្រសាសន៍ថា “យើងសោកស្តាយណាស់ដែលតុលាការបានផ្តន្ទាទោសចំនួនបីនាក់។ យើងបានឃើញ និងកងរងអាវុធហត្ថបាញ់ប្រហារ ធ្វើស្លាប់និងធ្វើរបួសមនុស្ស ប៉ុន្តែពួកគេមិនដែលត្រូវបានផ្តន្ទាទោសឡើយ។ នេះសបញ្ជាក់ឲ្យឃើញថា ប្រទេសកម្ពុជានៅតែមាននិទណ្ឌភាពនិងវប្បធម៌នៃការប្រើអំពើហិង្សា”៕ស៊ុយឈាង
លោកនាយករដ្ឋមន្ត្រី ហ៊ុន សែន បញ្ជាឲ្យបិទអាជីវកម្មស៊ីសា
កាលពីថ្ងៃសុក្រ លោកនាយករដ្ឋមន្ត្រី ហ៊ុន សែន បានព្រមានម្ចាស់ហាងស៊ីសាឲ្យបញ្ឈប់អាជីវកម្មនេះជាបន្ទាន់ ដោយបានលើកហេតុផលថា ស៊ីសាដែលគេជក់នៅក្នុងរាជធានីភ្នំពេញ មានផ្ទុកថ្នាំញៀន។
លោកបានថ្លែងក្នុងសុន្ទរកថាបិទសន្និបាតរបស់ក្រសួងទេសចរណ៍នៅកោះពេជ្រក្នុងរាជធានីភ្នំពេញថា“ ស៊ីសាមិនមែនត្រូវបានហាមឃាត់ដោយសារមានបម្រាម ទេ តែវាត្រូវបានយកមកធ្វើតេស្ត ហើយយើងបានរកឃើញថា វាមានផ្ទុកថ្នាំញៀនក្នុងកម្រិតខ្ពស់”។
លោក ហ៊ុន សែន បានបន្ថែមថា “ប្រសិនបើមើលឲ្យដិតដល់ ស៊ីសានេះគឺជាអាភៀន គ្រាន់តែថា គេជក់វាដោយវិធីផ្សេងគ្នាតាមបំពង់មួយ។កាលសម័យដើម ត្រូវបានគេដាក់ក្នុងបំពង់ឫស្សីដែលមានគម្របហើយគេជក់វារួមគ្នា”។
លោក ហ៊ុន សែន ដែលគេដឹងជាទូទៅថា ជាអ្នកជក់បារីម្នាក់ដែរនោះ ក៏បានអះអាងផងដែរថា ហាងស៊ីសានេះបានជំរុញឲ្យសិស្សគេចសាលា។
លោកថ្លែងថា “ឪពុកម្ដាយបារម្ភអំពីរឿងនេះ។ ខ្ញុំសូមបញ្ជាក់ថា យើងនឹងមិនបិទហាងទាំងនោះទេ គឺយើងគ្រាន់តែស្នើឲ្យបញ្ឈប់ការផ្ដល់ស៊ីសាសម្រាប់ជក់ប៉ុណ្ណោះ។ប៉ុន្តែប្រសិនបើពួកគេនៅតែរឹងទទឹង យើងនឹងបិទហាងចោលតែម្ដង”។
ជំហររបស់រដ្ឋាភិបាលប្រឆាំងនឹងហាងស៊ីសានេះត្រូវបានប្រកាសដោយលោក បា៉ សុជាតិវង្ស អភិបាលរាជធានីភ្នំពេញ អំឡុងសន្និបាតប្រចាំឆ្នាំរបស់សាលារាជធានី។
អំឡុងសន្និបាតនោះ លោក បា៉ សុជាតិវង្ស បានលើកឡើងថា ស៊ីសានេះគ្មានសារធាតុណាកូទិក ដែលជាប្រភេទគ្រឿងញៀនម្យ៉ាងទេហើយការជក់ស៊ីសានេះក៏គ្មានអ្វីខុសច្បាប់ដែរ ប៉ុន្តែអាជីវកម្មនេះត្រូវបានដាក់ឲ្យនៅក្រៅច្បាប់ ដោយសារផលប៉ះពាល់លើសុខភាពបណ្ដាលមកពីការជក់ស៊ីសានេះ។ លោកបានឲ្យដឹងថា ហាងស៊ីសាចំនួន១៥នៅក្នុងរាជធានីភ្នំពេញ ត្រូវបានបិទគិតត្រឹមថ្ងៃពុធ។
លោក មាស វិរិទ្ធ អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀន ក៏បានលើកឡើងខុសពីលោកនាយករដ្ឋមន្ត្រី ហ៊ុន សែន ផងដែរ ដោយលោកបាននិយាយកាលពីថ្ងៃសុក្រថា ថ្នាំញៀនតែមួយប្រភេទគត់ែដលមាននៅក្នុងស៊ីសានេះ គឺសារធាតុនីកូទីនដែលមាននៅក្នុងបារី។
លោក វីរិទ្ធ បានមានប្រសាសន៍ថា “ គ្មានអាភៀនទេ មានតែនីកូទីនប៉ុណ្ណោះ” ដោយលោកបានបន្ថែមថា គ្មាននរណាម្នាក់ធ្លាប់ត្រូវបានចាប់ខ្លួនជំុវិញបទចោទប្រកាន់ពាក់ព័ន្ធនឹងការជក់ស៊ីសាទេ។
លោកបានបញ្ជាក់ថា “ប៉ុន្តែ ងាយស្រួលប្រើ ដូច្នេះវាអាចនាំឲ្យឈានដល់ការប្រើថ្នាំញៀនបាន ដោយមានប្រសាសន៍ថា “ក្មេងៗដែលប្រើវាគឺខ្ជះខ្ជាយពេលវេលាដែលអាចយកទៅប្រើក្នុងការសិក្សា ដូច្នេះវាគ្មានប្រយោជន៍អ្វីដល់សង្គមទេ”។
លោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រី បានមានប្រសាសន៍ពាក់ព័ន្ធនឹងបម្រាមនេះថា វានឹងធ្វើឲ្យសុខភាពប្រជាពលរដ្ឋមានភាពប្រសើរឡើង។
ក៏ប៉ុន្តែ លោកបានលើកឡើងថា បម្រាមនេះនឹងមិនក្ដោបទាំងទម្រង់ផ្សេងទៀតនៃការប្រើនីកូទីនដូចជាការជក់បារីឡើយ ដោយមានប្រសាសន៍ថា “បម្រាមនេះត្រូវបានដាក់ដោយសម្ដេច ព្រោះស៊ីសាអាចបំផ្លាញសុខភាព និងធ្វើឲ្យប៉ះពាល់ដល់សណ្ដាប់ធ្នាប់សង្គម។ ការជក់បារីមិនធ្វើឲ្យខូចសណ្ដាប់ធ្នាប់សង្គមទេ ប៉ុន្តែវាអាចបង្កឲ្យមានអគ្គិភ័យ”៕ សេរីវុធ
រដ្ឋាភិបាលវាយបកចំពោះលោក សម រង្ស៊ី ដែលប្រៀបធៀបស្ថានភាពនៅកម្ពុជាជាមួយអ៊ុយក្រែន
កាលពីថ្ងៃសុក្រ អង្គភាពព័ត៌មាននិងប្រតិកម្មរហ័សរបស់ទីស្តីការគណៈរដ្ឋមaន្ត្រីបានបញ្ចេញសេចក្តីរិះគន់សុន្ទរកថាមួយធ្វើឡើងដោយលោក សម រង្ស៊ី មេដឹកនាំគណបក្សប្រឆាំងកាលពីសប្តាហ៍មុន។ នៅក្នុងសុន្ទរកថានោះ លោកបានសន្យាចំពោះក្រុមអ្នកគាំទ្ររបស់លោកថា ចលនាផ្លាស់ប្តូរនយោបាយដែលបណ្តេញប្រធានាធិបតីរបស់ប្រទេសអ៊ុយក្រែនចេញពីអំណាច នឹងត្រូវបានគេមើលឃើញនៅក្នុងប្រទេសកម្ពុជានាពេលឆាប់ៗនេះ។
សេចក្តីថ្លែងការណ៍របស់អង្គភាពព័ត៌មាននិងប្រតិកម្មរហ័សបានបញ្ជាក់អំពីភាពខុសគ្នារវាងព្រឹត្តិការណ៍បច្ចុប្បន្ននៅក្នុងប្រទេសកម្ពុជា និងសេចក្តីសម្រេចកាលពីថ្ងៃទី២២ ខែកុម្ភៈ របស់រដ្ឋសភាអ៊ុយក្រែនថា បណ្តេញលោកប្រធានាធិបតី វីកទ័រ យ៉ានូកូវិច (Victor Yanukovich) និងអំពាវនាវឲ្យមានការបោះឆ្នោតមួយ។
សេចក្តីថ្លែងការណ៍នេះមានខ្លឹមសារថា “អ្វីដែលលោក សម រង្ស៊ី និងលោក កឹម សុខា អនុប្រធានគណបក្សសង្គ្រោះជាតិត្រូវយល់គឺថា នៅក្នុងប្រទេសអ៊ុយក្រែន ទោះបីជាប្រធានាធិបតីត្រូវបានគេបណ្តេញចេញក៏ដោយ ក៏ដំណើរការនេះត្រូវបានអនុវត្តតាមច្បាប់នៅក្នុងរដ្ឋសភាដែរ”។
សេចក្តីអត្ថាធិប្បាយរបស់អង្គភាពព័ត៌មាន និងប្រតិកម្មរហ័សមានខ្លឹមសារបន្តទៀតថា “នៅក្នុងប្រទេសកម្ពុជា គណបក្សប្រឆាំងដើរតាមផ្លូវបញ្ច្រាសទៅនឹងប្រទេសអ៊ុយក្រែន គណបក្សនេះបានព្យាយាមម្តងហើយម្តងទៀត ដើម្បីផ្តួលរំលំរដ្ឋាភិបាលជាពិសេសលោកនាយករដ្ឋមន្ត្រី ហ៊ុន សែន ។ ពួកគេធ្វើរឿងនេះដោយអនាធិបតេយ្យនៅតាមផ្លូវ ដោយមិនគោរពរដ្ឋធម្មនុញ្ញ”។
គណបក្សសង្គ្រោះជាតិបាននិងកំពុងធ្វើពហិការអាសនៈរបស់ខ្លួននៅក្នុងរដ្ឋសភានៃប្រទេសកម្ពុជា ចាប់តាំងពីពេលបោះឆ្នោតជ្រើសរើសតំណាងរាស្ត្រដ៏ចម្រូងចម្រាសកាលពីឆ្នាំមុនមក ដោយអះអាងថា ការបោះឆ្នោតនេះមានបញ្ហាដោយសារការលួចបន្លំទូទៅ និងភាពមិនប្រក្រតីយ៉ាងទូលំទូលាយ។
លោក ទិត្យ សុធា អ្នកនាំពាក្យអង្គភាពព័ត៌មាននិងប្រតិកម្មរហ័ស បានឲ្យដឹងថា សេចក្តីប្រកាសនេះត្រូវបានចេញផ្សាយដើម្បីរំលេចចេតនាអាក្រក់នៅពីក្រោយសុន្ទរកថារបស់លោក សម រង្ស៊ី។
លោកបានមានប្រសាសន៍ថា “សេចក្តីប្រកាសនេះត្រូវបានសរសេរ ដើម្បីពន្យល់ឲ្យសាធារណជនយល់ថា អ្វីដែលលោក សម រង្ស៊ី បានលើកឡើង មិនស្របតាមស្ថានភាពពិតទេ”៕ ប៊ុននី
ប្រជាជនដែលរងផលប៉ះពាល់ដោយសារទំនប់វារីអគ្គិសនីចង់ឲ្យក្រុមហ៊ុនផ្ដល់ដីនិងសង់ផ្ទះថ្មី
បន្ទាប់ពីតំណាងក្រុមហ៊ុនចិនដែលមានគម្រោងសាងសង់ទំនប់វារីអគ្គិសនីកម្លាំង១០៨មេហ្គាវ៉ាតនៅស្ទឹងអារ៉ែង ក្នុងខេត្តកោះកុង បានចុះទៅមើលតំបន់នោះ ក្រុមមន្ត្រី និងប្រជាជនមូលដ្ឋាននិយាយថា ពួកគេបារម្ភថា ការសាងសង់គម្រោងដែលតម្រូវឲ្យមានការផ្លាស់ទីលំនៅអ្នកភូមិប្រមាណ១.៥០០នាក់នេះ នឹងចាប់ផ្ដើមនៅពេលឆាប់ៗនេះ។
លោក ទូ សាវុធ អភិបាលស្រុកថ្មបាំងបានមានប្រសាសន៍ថា “កាលពីថ្ងៃទី២៨ ខែកុម្ភៈ ក្រុមហ៊ុននេះបានចុះទៅមើលទំនប់នោះ ដើម្បីធ្វើការសិក្សានិងបានព្យាយាមជួលដីពីអ្នកភូមិដើម្បីដាក់ឧបករណ៍សាងសង់”។
លោក សាវុធ បាននិយាយថា ប្រជាជន៦០០គ្រួសារមកពីឃុំចំនួនបីនឹងរងផលប៉ះពាល់ដោយសារការសាងសង់ទំនប់របស់ក្រុមហ៊ុនចិនឈ្មោះ Guodian Corporation ដែលអាចធ្វើឲ្យជន់លិចផ្ទៃដីជិត២.០០០ហិកតា ដែលដីខ្លះជាដីព្រៃពិសិដ្ឋនៅក្នុងតំបន់ការពារភ្នំក្រវាញ។
អ្នកជំនាញបរិស្ថានបាននិយាយថា ប្រភេទសត្វព្រៃនិងរុក្ខជាតិកម្រនៅក្នុងព្រៃនេះរួមទាំងសត្វក្រពើសៀមដែលជិតផុតពូជផងនោះក៏រងផលប៉ះពាល់អវិជ្ជមានផងដែរដោយសារគម្រោងនេះ។ លោក សាវុធ...
ព័ត៌មានលម្អិតទាក់ទិននឹងការដោះដូរដីរបស់ក្រសួងបរិស្ថាននៅតែស្ថិតក្នុងភាពស្រពេចស្រពិល
កាលពីឆ្នាំ២០១១ ក្រសួងបរិស្ថានបានចុះកិច្ចសន្យាជាមួយក្រុមហ៊ុន Ratana Cooperation and Construction ដើម្បីដោះដូរដីដ៏មានតម្លៃរបស់ខ្លួនទំហំ២.៤០០ ម៉ែត្រក្រឡាដែលមានទីតាំងតាមបណ្តោយមហាវិថីព្រះសីហនុក្នុងសង្កាត់ទន្លេបាសាក់ រាជធានីភ្នំពេញទៅកាន់ដីទំហំ៩.០០០ម៉ែត្រក្រឡាវិញ ដើម្បីសាងសង់អគារថ្មីនៅខណ្ឌមានជ័យដែលមានចម្ងាយពីទីតាំងចាស់២០គីឡូម៉ែត្រ។
ប៉ុន្តែឥឡូវនេះ មន្ត្រីក្រសួងបរិស្ថានបានលើកឡើងថា ខ្លួនបានប្រគល់ដីនិងអគារថ្មីរបស់ខ្លួននៅក្នុងខណ្ឌមានជ័យទៅឲ្យក្រុមហ៊ុន Ratana Cooperation and Construction វិញហើយ។ ស្របពេលនោះដែរ ក្រសួងបរិស្ថាន បានយល់ព្រមឲ្យក្រុមហ៊ុននេះបន្តកាន់កាប់ដីដែលមានទីតាំងនៅតាមបណ្តោយមហាវិថីព្រះសីហនុដដែល។ ដីនេះមានតម្លៃយ៉ាងតិច ១៤, ៤លានដុល្លារ នេះបើយោងតាមតួលេខនៃការវាយតម្លៃអំពីអចលនទ្រព្យកាលពីឆ្នាំ២០១៣។ ហើយឥឡូវនេះ ក្រសួងបរិស្ថានមានគម្រោងចំណាយប្រាក់៥លានដុល្លារដើម្បីសាងសង់អគារថ្មីមួយទៀតនៅលើដីដែលគ្រប់គ្រងដោយរដ្ឋចម្ងាយ១,៥គីឡូម៉ែត្រពីក្រសួងបរិស្ថាននាពេលសព្វថ្ងៃ។
លោក សែម សារឿន អគ្គនាយកនៃអគ្គនាយកដ្ឋានរដ្ឋបាលនៅក្រសួងបរិស្ថានបានមានប្រសាសន៍ថា “ ទីតាំងរបស់ក្រសួងបរិស្ថានដែលស្ថិតនៅតាមបណ្តោយមហាវិថីព្រះសីហនុគឺជាកម្មសិទ្ធិរបស់ក្រុមហ៊ុន Ratana Cooperation and Construction។ ទីតាំងនៃក្រសួងបរិស្ថានដែលស្ថិតនៅតាមបណ្តោយផ្លូវជាតិលេខ១ ក៏ជារបស់ក្រុមហ៊ុននេះដែរ ព្រោះក្រុមហ៊ុនមិនបានប្រគល់អគារនោះមកឲ្យក្រសួងបរិស្ថានវិញឡើយ”។
ដីនៅក្នុងខណ្ឌមានជ័យ ដែលឥឡូវជាកម្មសិទ្ធិរបស់ក្រុមហ៊ុន Ratana Cooperation and Construction គឺមានតម្លៃចន្លោះពី ៣០០ដុល្លារទៅ១.៥០០ដុល្លារក្នុងមួយម៉ែត្រក្រឡា កាលពីឆ្នាំ២០១២ ដោយធ្វើឲ្យដីនេះមានតម្លៃយ៉ាងតិច ២,៧លានដុល្លារ។
មន្ត្រីចំនួនពីររូបនៅក្រសួងបរិស្ថានដែលសុំមិនបញ្ចេញឈ្មោះព្រោះខ្លាចគេធ្វើទុក្ខបុកម្នេញ បានឲ្យដឹងកាលពីម្សិលមិញថា ក្រុមហ៊ុន Ratana Cooperation and Construction បានប្រគល់ប្រាក់ដែលស្ថិតនៅក្នុងកិច្ចសន្យាដោះដូរអំឡុងលោក ម៉ុក ម៉ារ៉េត នៅកាន់តំណែងជារដ្ឋមន្ត្រីក្រសួងបរិស្ថាន។
ពួកគេមិនច្បាស់ទេថា តើការដោះដូរនេះមានចំនួនទឹកប្រាក់ចំនួនប៉ុន្មាននោះ ប៉ុន្តែពួកគេបានឲ្យដឹងថា មន្ត្រីគ្រប់រូបនៅក្នុងក្រសួងនេះមិនសប្បាយចិត្តនោះទេ ព្រោះថា លោក ម៉ុក ម៉ារ៉េត មិនចែករំលែកប្រាក់ខ្លះឲ្យពួកគេឡើយ បន្ទាប់ពីការដោះដូរដីរួច។
ទោះជាយ៉ាងណាក៏ដោយលោកសាយ សំអាល់ រដ្ឋមន្ត្រីក្រសួងបរិស្ថានថ្មីបានចែករំលែកប្រាក់ រ៉ាប់មឺុនដុល្លារទៅឲ្យមន្ត្រីក្រសួងបរិស្ថានដែលមានចំនួនសរុប៥៨៦នាក់។
មន្ត្រីមួយរូបក្នុងចំណោមមន្ត្រីក្រសួងបរិស្ថានទាំងអស់បាននិយាយថា “ រដ្ឋមន្ត្រីថ្មីបានយកប្រាក់ដែលនៅសល់ពីការដោះដូរដីមកចែកឲ្យមន្ត្រីទាំង៥៨៦នាក់ដោយក្នុងម្នាក់ៗទទួលបាន៥០០ដុល្លារ រួមទាំងរដ្ឋមន្ត្រីផងដែរ ហើយមន្ត្រីជាប់កិច្ចសន្យាជាង៣០នាក់ទទួលបាន១០០ដុល្លារក្នុងម្នាក់ៗ”។
មន្ត្រីរូបនេះបានបន្តថា “ មន្ត្រីទាំងអស់សុទ្ធតែពេញចិត្តនឹងទង្វើរបស់រដ្ឋមន្ត្រីថ្មី ព្រោះគាត់ផ្តល់ភាពស្មើគ្នាទៅឲ្យមន្ត្រីទាំងអស់។ប្រសិនបើរដ្ឋមន្ត្រីចាស់នៅតែដឹកនាំក្រសួងនេះវិញ លោកនឹងមិនចែករំលែកប្រាក់់ទៅឲ្យមន្ត្រីណាមួយឡើយ ហើយយើងក៏នឹងត្រូវផ្លាស់ទៅទីតាំងមួយដ៏ឆ្ងាយផងដែរ”។
គេមិនអាចទាក់ទងក្រុមហ៊ុន Ratana Cooperation and Construction បានទេកាលពីម្សិលមិញ។
លោក សៅ សុភាព នាយខុទ្ទកាល័យរបស់លោក សាយ សំអាល់ បានឲ្យដឹងកាលពីម្សិលមិញថា ការសាងសង់អគារថ្មីនៅលើដីទំហំ៥.០០០ម៉ែត្រក្រឡា ក្បែរសណ្ឋាគារនិងកាស៊ីណូ ណាហ្គាវើលនឹងត្រូវចំណាយប្រាក់យ៉ាងតិច៥លានដុល្លារ៕ ស៊ុយឈាង
(រាយការណ៍បន្ថែមដោយ Joshua Wilwohl)
ក្រសួងការងារបដិសេធថា ខ្លួនមិនឈប់ទទួលស្គាល់សហជីពនេះទេ ទោះមានការអះអាងផ្ទុយក៏ដោយ
កាលពីម្សិលមិញ ក្រសួងការងារបានចេញសេចក្តីថ្លែងការណ៍មួយ ដើម្បីបញ្ជាក់ថា សហជីពនៅតែមានសិទ្ធិសេរីភាពចុះបញ្ជីជាអង្គភាពទទួលស្គាល់ដោយរាជរដ្ឋាភិបាល មួយថ្ងៃបន្ទាប់ពីអ្នកនាំពាក្យមួយរូបនៅក្រសួងនេះបានលើកឡើងថា ដំណើរការចុះបញ្ជីសហជីពត្រូវបានផ្អាកជាផ្លូវការ ដោយមិនមានពេលវេលាកំណត់ច្បាស់លាស់ទេ។
លោក ជា មុនី ប្រធានសហជីពសេរីកម្មករ បានអះអាងកាលពីថ្ងៃពុធថា ក្រសួងការងារបានបដិសេធសំណើរបស់លោកសុំចុះបញ្ជីសាខាថ្មីចំនួន១០កន្លែងនៅតាមរោងចក្រកាត់ដេរក្នុងប្រទេសកម្ពុជា។
លោកបានថ្លែងថា មន្ត្រីមួយរូបនៅនាយកដ្ឋានចុះបញ្ជីនៃក្រសួងការងារបានប្រាប់លោកកាលពីសប្តាហ៍មុនថា លោក អិុត សំហេង រដ្ឋមន្ត្រីក្រសួងការងារ បានផ្អាកការចេញអាជ្ញាប័ណ្ណឲ្យសហជីព។ លោកក៏បានផ្ញើលិខិតមួយច្បាប់ទៅលោកនាយករដ្ឋមន្ត្រី ដើម្បីតវ៉ាដែរ។
លោក ហេង សួរ អ្នកនាំពាក្យក្រសួងការងារក៏បានឲ្យដឹងកាលពីថ្ងៃពុធផងដែរថា សហជីពនឹងត្រូវបានអនុញ្ញាតឲ្យបើកសាខាថ្មីលុះត្រាតែរដ្ឋាភិបាលព្រាង និងបន្ទាប់មកអនុម័តច្បាប់គ្រប់គ្រងសហជីពនៅពេលណាមួយក្នុងអនាគតកាល។
ក្នុងពេលមានការរិះគន់ថា រដ្ឋាភិបាលបានព្យួរសិទ្ធិបើកសហជីព ដែលត្រូវបានការពារដោយសិទ្ធិសេរីភាពបង្កើតសមាគមក្នុងរដ្ឋធម្មនុញ្ញ ក្រសួងការងារក៏បានចេញសេចក្តីបដិសេធជាលាយលក្ខណ៍អក្សរ។
សេចក្តីថ្លែងការណ៍នោះមានខ្លឹមសារថា “ ក្រសួងកំពុងពង្រឹងយន្តការចុះបញ្ជីអង្គការទាំងអស់ឲ្យមានប្រសិទ្ធភាព និងឲ្យទាន់ពេលវេលាប្រកបដោយតម្លាភាពស្របតាមច្បាប់។ ដូច្នេះ សូមអង្គការទាំងអស់រៀបចំឯកសារចុះបញ្ជីស្របច្បាប់ទៅតាមច្បាប់កំណត់”។
លោក ហេង សួរ អ្នកនាំពាក្យក្រសួងការងារ និងជាអ្នកដែលបានបញ្ជាក់កាលពីដំបូងអំពីការព្យួរកិច្ចការចុះបញ្ជីសហជីពកាលពីថ្ងៃពុធនោះ បានបកស្រាយតបវិញ ដោយបានអះអាងថា ក្រសួងការងារមិនបានឈប់ចុះបញ្ជីសហជីពទេ។ លោកបានថ្លែងថា “ ក្រសួងបានចេញសេចក្តីថ្លែងការណ៍ដើម្បីឆ្លើយតបទៅនឹងអង្គការមួយចំនួន ដូចជា លោក ជា មុនី ជាដើម ដែលបានចោទក្រសួងថា មិនចុះបញ្ជីអង្គការរបស់ពួកគេ។ វាមិនមែនជារឿងត្រឹមត្រូវទេ ពីព្រោះក្រសួងមិនដែលមិនព្រមចុះបញ្ជីអង្គការណាមួយទេឲ្យតែអង្គការនោះគោរពតាមច្បាប់”។
នៅពេលសួរថា តើមូលហេតុអ្វីបានជាមានសេចក្តីអះអាងផ្ទុយគ្នា ទាក់ទងទៅនឹងការផ្អាកដំណើរការចុះបញ្ជីសហជីព លោក ហេង សួរ បានលើកឡើងថា ប្រធានរបស់លោកខឹងលោក បន្ទាប់ពីបានអានសម្តីរបស់លោកនៅក្នុងកាសែត។ លោក ហេង សួរ ក៏បានមិនព្រមនិយាយថា តើអ្វីដែលលោកបាននិយាយកាលពីថ្ងៃពុធ នៅពេលលោកបញ្ជាក់ពីការផ្អាកដំណើរការចុះបញ្ជីសហជីព គឺជារឿងត្រឹមត្រូវ ឬមិនត្រឹមត្រូវទេ។ លោកថ្លែង ថា “ឯកឧត្តមរដ្ឋមន្ត្រីបន្ទោសខ្ញុំ។ ខ្ញុំគ្រាន់តែចង់ប្រាប់អ្នកថា បើខ្ញុំផ្តល់ចម្លើយត្រឹមត្រូវឲ្យប្រព័ន្ធផ្សព្វផ្សាយ ខ្ញុំនឹងមិនត្រូវមាត់អ៊ីចឹងទេ ប៉ុន្តែ ពេលខ្ញុំផ្តល់ចម្លើយខុស ការងារខ្ញុំនឹងមានបញ្ហាធំ”។
លោក ជា មុនី ប្រធានសហជីពសេរីកម្មករបានលើកឡើងថា លោកមិនជឿសេចក្តីថ្លែងការណ៍កាលពីម្សិលមិញរបស់ក្រសួងការងារទេ។ លោកបានបន្ថែមទៀតថា លោកជឿថា បម្រាមមិនឲ្យចុះបញ្ជីសហជីពនៅតែកំពុងត្រូវបានអនុវត្ត។
សាខាថ្មីទាំង១០របស់សហជីពសេរីកម្មករដែលបន្ទាន់ត្រូវបានចុះបញ្ជីការងារនោះនឹងចាប់ផ្តើមធ្វើប្រតិបត្តិការ ទោះបីជាមាន ឬគ្មានសេចក្តីយល់ព្រមពីក្រសួងការងារក៏ដោយ នេះបើយោងតាមប្រសាសន៍របស់លោក ជា មុនី ។ លោកបានមានប្រសាសន៍ថា “ យើងមិនត្រូវការដាក់ពាក្យសុំម្តងទៀតទេ ពីព្រោះពាក្យសុំរបស់យើងស្របច្បាប់រួចទៅហើយ។ យោងតាមច្បាប់ ប្រសិនបើយើងដាក់ឯកសារស្នើសុំរួចហើយ ហើយក្នុងរយៈពេលពីរខែក្រសួងមិនចុះបញ្ជីឲ្យយើងទេនោះ យើងអាចធ្វើប្រតិបត្តិការបានដោយស្របច្បាប់”។
សហជីពមិនគាំទ្ររដ្ឋាភិបាលជាច្រើន និងសមាជិករបស់ពួកគេ រួមទាំងសហជីពសេរីកម្មករផងដែរនោះ បានចាប់ផ្តើមធ្វើពហិការមិនធ្វើការបន្ថែមម៉ោងនៅតាមរោងចក្រនានា ហើយកំពុងរៀបចំផែនការធ្វើកូដកម្មទូទាំងប្រទេស ដោយចាប់ផ្តើមនៅថ្ងៃទី១២ ខែមីនា ដើម្បីទាមទារឲ្យមានការដំឡើងប្រាក់ឈ្នួលអប្បបរមានៅក្នុងវិស័យកាត់ដេរ ឲ្យកើនឡើងដល់១៦០ដុល្លារក្នុងមួយខែ៕ សុធា
តំណាងសហជីពត្រូវបានឃាត់ខ្លួនដោយសារចែកចាយខិត្តប័ណ្ណធ្វើកូដកម្មនៅខែក្រោយនេះ
តំណាងសហជីពពីររូបឲ្យដឹងថា ពួកគេត្រូវបានឃាត់ខ្លួននិងអប់រំកាលពីម្សិលមិញដោយសារចែកចាយខិត្តប័ណ្ណអំពាវនាវឲ្យកម្មករចូលរួមក្នុងមហាបាតុកម្មមួយនៅទូទាំងប្រទេសនៅខែក្រោយនេះ។
លោក យិន សារឿន អគ្គលេខាធិការសម្ព័ន្ធសហជីពជាតិ បានមានប្រសាសន៍ថា នគរបាលបានឃាត់ខ្លួនលោក និងសហការីរបស់លោក ឈ្មោះ ជួប នឿក នៅម៉ោងប្រហែល១១ព្រឹក បន្ទាប់ពីពួកគាត់បានចែកចាយខិត្តប័ណ្ណធ្វើកូដកម្មនៅខាងក្រៅរោងចក្រកាត់ដេរ Everygreen ក្នុងខណ្ឌឫស្សីកែវ។
ពួកគាត់ត្រូវបាននាំខ្លួនទៅប៉ុស្តិ៍នគរបាលឫស្សីកែវ ហើយត្រូវបានដោះលែងបន្ទាប់ពីពួកគាត់បានផ្តិតមេដៃ ដោយសន្យាថា ឈប់ចែកចាយខិត្តប័ណ្ណនេះហើយ។
លោក សារឿន បានឲ្យដឹងថា “យើងត្រូវបានពួកគេគំរាមថា ប្រសិនបើពួកគាត់មិនធ្វើតាមបញ្ជា ពួកគេបានដកហូតរបស់របររបស់យើង”។ លោកបានបន្ថែមថា លោកនិង លោក ជួប នឿក ត្រូវបានឃាត់ខ្លួនរយៈពេលជិតមួយម៉ោង។ លោកបានបន្ថែមថា “ពួកគេគ្មានសិទ្ធិចាប់ខ្លួនយើងទេ ពីព្រោះគ្មានច្បាប់ចែងថា ការចែកខិត្តប័ណ្ណ ខុសច្បាប់ទេ។ យើងគ្រាន់តែចែកចាយខិត្តប័ណ្ណដើម្បីផ្សព្វផ្សាយ និងឲ្យកម្មករដឹងពីការទាមទាររបស់យើង”។
លោក ហ្វា សាលី ប្រធានសហជីពនេះបានឲ្យដឹងថា ការចែកចាយខិត្តប័ណ្ណនេះនឹងនៅតែបន្ត បើទោះជាមានការអន្តរាគមន៍ពីអាជ្ញាធរក៏ដោយ។ លោក សាលី មានប្រសាសន៍ថា “ពួកគេបានឃាត់ខ្លួនបុគ្គលិករបស់ខ្ញុំដូចជាចោរប្លន់និងឆែកឆេរការបូបរបស់ពួកគេ និងសាកសួរពួកគេដោយគ្មានដីការ។ យើងនឹងចែកចាយនៅទីនោះទៀត”។
លោក ស៊ុន កាណារ៉េត នាយប៉ុស្តិ៍សង្កាត់ ឫស្សីកែវ ខណ្ឌឫស្សីកែវ បានមានប្រសាសន៍ថា ការឃាត់ខ្លួននេះ ត្រឹមត្រូវហើយ ពីព្រោះអ្នកទាំងពីរធ្វើឲ្យប៉ះពាល់ដល់សណ្តាប់ធ្នាប់សាធារណៈ។
លោកបានឲ្យដឹងថា “ការចែកចាយខិត្តប័ណ្ណនឹងធ្វើឲ្យប៉ះពាល់ដល់សណ្តាប់ធ្នាប់សាធារណៈ ហើយពួកគេគួរតែស្នើសុំការអនុញ្ញាតពីអាជ្ញាធរ មុនពេលពួកគេចែកចាយខិត្តប័ណ្ណ។ យើងគ្រាន់តែអនុវត្តច្បាប់ ប៉ុណ្ណោះ”។
សហជីពទាំងនេះកំពុងតែអំពាវនាវឲ្យកម្មករចូលរួមក្នុងកូដកម្មដែលចាប់ផ្តើមនៅថ្ងៃទី១២ ខែមីនា។ ក្នុងចំណោមការទាមទាររបស់ពួកគេ គឺការដោះលែងអ្នកតវ៉ាចំនួន២១នាក់ ដែលត្រូវបានចាប់ខ្លួនកាលពីក្នុងខែមករា និងទាមទារឲ្យផ្តន្ទាទោសនគរបាលដែលបានសម្លាប់កូដករចំនួនប្រាំនាក់ អំឡុងពេលមានការបង្ក្រាបទៅលើការតវ៉ារបស់កម្មករកាត់ដេរកាលពីខែមុន។ពួកគេក៏បានទាមទារប្រាក់ឈ្នួលអប្បបរមា១៦០ដុល្លារក្នុងមួយខែសម្រាប់កម្មករកាត់ដេរផងដែរ។
កាលពីម្សិលមិញ សហជីពនិងសមាគមចំនួន១៧បានចុះហត្ថលេខារួមលើលិខិតមួយច្បាប់ ដែលផ្ញើជូនសមាគមរោងចក្រកាត់ដេរក្នុងកម្ពុជាក្រសួងការងារ ទីស្តីការគណៈរដ្ឋមន្ត្រី អង្គការពលកម្មអន្តរជាតិ សាលារាជធានីនិងអ្នកទិញ ដោយជូនដំណឹងប្រាប់ពួកគេអំពីផែនការរៀបចំធ្វើកូដកម្មនៅថ្ងៃទី១២ ខែ មីនា និងបំណងរបស់ពួកគេក្នុងការបង្កើតវេទិកាសាធារណៈមួយស្តីពីប្រាក់ឈ្នួលអប្បបរមានៅថ្ងៃទី៨ ខែមីនា។
លិខិតនេះមានខ្លឹមសារថា “និយោជិតទទួលប្រាក់ចំណេញច្រើនពីវិស័យនេះ...។ ដូច្នេះ យើងសូមជម្រាបដល់អស់លោកអ្នកអំពីកូដកម្ម ដើម្បីរុញឲ្យរដ្ឋាភិបាល និងនិយោជកដោះស្រាយការទាមទារប្រាំពីរចំណុចរបស់យើង”។
លោក ឡុង ឌីម៉ង់ អ្នកនំាពាក្យសាលារាជធានីភ្នំពេញបានបញ្ជាក់អំពីខ្លឹមសារនៃលិខិតនេះនិងបានឲ្យដឹងថា លិខិតនេះនឹងបញ្ជូនទៅលោក ប៉ា សុជាតិវង្ស អភិបាលរាជធានីភ្នំពេញដើម្បីពិចារណា៕ ប៊ុននី
នគរបាលចាប់ខ្លួនប្តីប្រពន្ធពីរនាក់ពីបទសម្លាប់ក្មួយរបស់ខ្លួនដោយសារជំពាក់ប្រាក់ប្រាំមឺុនរៀល
នគរបាលបានឲ្យដឹងកាលពីម្សិលមិញថា ប្តីប្រពន្ធពីរនាក់ត្រូវបានចាប់ខ្លួនកាលពីថ្ងៃអង្គារក្នុងខេត្តក្រចេះ ដោយជាប់សង្ស័យពីបទសម្លាប់ក្មួយប្រុសរបស់ខ្លួន ដើម្បីគេចវេះមិនសងបំណុលប្រហែល៥០.០០០ រៀល។
ជនរងគ្រោះឈ្មោះ ហ៊ាប យឿន អាយុ៣៧ឆ្នាំ គឺជាកម្មករជីករ៉ែមាសខ្នាតតូចម្នាក់ដែលបានឲ្យប្រាក់ម្តាយមីង និងឪពុកមារបស់ខ្លួនខ្ចីចំនួន៥០.០០០រៀល ប៉ុន្តែ គាត់បានទាមទារឲ្យពួកគាត់ទាំងពីរនាក់សងប្រាក់ខ្លួនវិញ។
យោងតាមលោកមេឃុំ ឈិត ណន បានឲ្យដឹងថា កាលពីល្ងាចថ្ងៃច័ន្ទ ជនរងគ្រោះ ហ៊ាប យឿន បានទៅផ្ទះរបស់ពួកគាត់ដែល ស្ថិតក្នុងភូមិកំពង់ចាម ស្រុកសំបូរ ដើម្បីទារប្រាក់ម្តងទៀត ហើយនៅពេលពួកគាត់មិនព្រមសង គាត់បានសម្រេចចិត្តដេកនៅទី នោះ មួយយប់ដោយដេកក្នុងអង្រឹងក្រោមផ្ទះ។
នៅពេលដែលជនរងគ្រោះដេកលក់ ឪពុកមាឈ្មោះ មាស រ៉ូម អាយុ៦៤ឆ្នាំ និងម្តាយមីងឈ្មោះ ទិត្យ...
Latest news
© 2021, ដេលី. All rights reserved.