TAG
paywall
ក្រសួងបរិស្ថានសម្រេចផ្លាស់ប្តូរទីតាំងថ្មីរបស់ខ្លួនម្តងទៀតទៅក្បែរកាស៊ីណូនិងសណ្ឋាគារ ណាហ្គាវើល
កាលពីម្សិលមិញ មន្ត្រីម្នាក់បានឲ្យដឹងថា ក្រសួងបរិស្ថាននឹងផ្លាស់ប្ដូរការិយាល័យរបស់ខ្លួនទៅកាន់ដីមួយកន្លែងក្បែរកាស៊ីណូនិងសណ្ឋាគារណាហ្គាវើលក្នុងខណ្ឌចំការមន រាជធានីភ្នំពេញ បន្ទាប់ពីរដ្ឋមន្ត្រីក្រសួងបរិស្ថានថ្មីបានលើកឡើងថា ទីស្នាក់ការថ្មីរបស់ខ្លួនដែលគ្រោងនឹងសាងសង់នៅខណ្ឌមានជ័យ ស្ថិតនៅឆ្ងាយពីកណ្តាលរាជធានីពេក។
ក្រសួងបរិស្ថានសព្វថ្ងៃមានទីតាំងនៅតាមបណ្តោយមហាវិថីព្រះសីហនុនៅក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ប៉ុន្តែត្រូវបានគេគ្រោងផ្លាស់ទៅដីមួយកន្លែងទំហំ៩.០០០ ម៉ែត្រការ៉េនៅតាមបណ្តោយផ្លូវជាតិលេខ១ក្នុងខណ្ឌមានជ័យ បន្ទាប់ពីក្រសួងនេះបានដោះដូរដីជាមួយក្រុមហ៊ុនមួយដែលគេមិនស្គាល់ឈ្មោះ។
ឥឡូវ ក្រសួងនេះបានសម្រេចផ្លាស់ប្តូរមកកាន់ដីមួយកន្លែងទំហំ៥.០០០ម៉ែត្រក្រឡាចម្ងាយទីតាំងចាស់ប្រហែល១,៥គីឡូម៉ែត្រ នេះបើយោងតាមលោក សៅ សុភាព នាយកខុទ្ទកាល័យរបស់លោក សាយ សំអាល់ រដ្ឋមន្ត្រីក្រសួងបរិស្ថានដែលទើបតែងតាំងថ្មី។
លោក សុភាព បានមានប្រសាសន៍ថា “ក្រសួងបរិស្ថាននឹងចាប់ផ្តើមសាងសង់ទីតាំងរបស់ខ្លួននៅខែក្រោយតាមបណ្តោយទន្លេបាសាក់ក្បែរកោះពេជ្រ”។ លោក សុភាព បានលើកឡើងថា ការផ្លាស់ប្តូរនេះគឺពីព្រោះលោក សំអាល់ គិតថា ការិយាល័យថ្មីនៅតាមបណ្តោយផ្លូវជាតិលេខ១ វាឆ្ងាយពេកសម្រាប់មន្ត្រីរបស់ក្រសួងបរិស្ថាន។
លោក សុភាព បានមានប្រសាសន៍បន្តថា “វាមិនមែនជាមូលហេតុធំនោះទេ។ រដ្ឋមន្ត្រីគិតថា ទីតាំងដំបូងរបស់ក្រសួងស្ថិតនៅឆ្ងាយពេក ហើយវាមានការលំបាកនៅពេលធ្វើដំណើរទៅធ្វើការ ខណៈមានការកកស្ទះចរាចរណ៍នោះ។ទីតាំងថ្មីនៅក្បែរកោះពេជ្រ គឺវាផ្តល់ភាពងាយស្រួលក្នុងការទាក់ទងជាមួយដៃគូរបស់យើង ហើយវាងាយស្រួលសម្រាប់មន្ត្រីក្រសួងរបស់យើងក្នុងការធ្វើដំណើរទៅធ្វើការ” ។
លោ សុភាព បានឲ្យដឹងថា ក្រសួងបានប្រគល់អគារដែលមិនទាន់សាងសង់ចប់រួចរាល់នៅតាមបណ្តោយផ្លូវជាតិលេខ១ឲ្យទៅក្រុមហ៊ុន Ratana Cooperation and Constuction ជាក្រុមហ៊ុនមួយដែលបានចុះកិច្ចសន្យាទទួលសាងសង់អគាររបស់ក្រសួងបរិស្ថាន។ លោកបានមានប្រសាសន៍ថា “យើងបានប្រគល់អគារដំបូង ទៅឲ្យក្រុមហ៊ុន Ratana Cooperation and Constuction ”។
លោក សុភាព បានបដិសេធមិនផ្តល់ព័ត៌មានលម្អិតទាក់ទិននឹងការផ្លាស់ប្តូរទីតាំងចុងក្រោយរបស់ក្រសួងបរិស្ថានឡើយ។
លោកបានប្រសាសន៍ដោយបដិសេធមិនប្រាប់ពីការចំណាយចំពោះការសាងសង់អគារថ្មីនេះថា “វាមិនមែន ទេដែលនឹងសាងសង់អាគារថ្មីនេះ។ ឥឡូវនេះយើងកំពុងចរចាជាមួយក្រុមហ៊ុនសំណង់ថ្មី ហេតុដូច្នេះខ្ញុំមិនអាចប្រាប់ឈ្មោះក្រុមហ៊ុនសំណង់ថ្មីនេះបានទេ”។
លោក ខាត់ ណារិទ្ធិ ចៅសង្កាត់ទន្លេបាសាក់ បានបញ្ជាក់ពីទីតាំងថ្មីរបស់ក្រសួងបរិស្ថានថ្មីនេះ ប៉ុន្តែលោកបានបដិសេធមិនរៀបរាប់ពីការផ្លាស់ប្តូរនេះឡើយ។ លោក ខាត់ ណារិទ្ធិ បានមានប្រសាសន៍ថា “មន្ត្រីក្រសួងបរិស្ថាននិងក្រុមហ៊ុនសំណង់ បានចុះទៅសិក្សានៅដីនោះហើយកាលពីខែមករា”។
ទីតាំងនោះគឺឆ្លងមួយផ្លូវពីកាស៊ីណូនិងសណ្ឋាគារណាហ្គាវើល ហើយសព្វថ្ងៃគឺជាចំណតរថយន្តរបស់ណាហ្គាវើល។
និយាយទាក់ទិននឹងអគារ និងដីនៅខណ្ឌមានជ័យ រាជធានីភ្នំពេញវិញ លោក ឃ្លាំង សុឃឿន អតីតអ្នកគ្រប់គ្រងក្រុមហ៊ុន Ratana Cooperation and Constuction បានឲ្យដឹងកាលពីម្សិលមិញថា ការសាងសង់ត្រូវបញ្ឈប់កាលពីខែកញ្ញា ដោយសារបញ្ហាប្រាក់និងទីតាំង។
លោកបានមានប្រសាសន៍ថា “ខ្ញុំទទួលបានដំណឹងថា គ្មានប្រាក់សម្រាប់សាងសង់អគារនេះទេ។ ស្របពេលនឹង រដ្ឋមន្ត្រីក្រសួងបរិស្ថានថ្មី ត្រូវបានតែងតាំង ហើយខ្ញុំក៏ទទួលបានដំណឹងថា រដ្ឋមន្ត្រីក្រសួងបរិស្ថានថ្មីមិនចង់បានទីតាំងនេះ”។
បន្ទាប់ពីការផ្លាស់ប្តូរទីតាំងទៅខណ្ឌមានជ័យត្រូវបានប្រកាស មន្ត្រីនៅក្រសួងបរិស្ថានបានរអ៊ូរទាំថា ទីតាំងនោះស្ថិតនៅឆ្ងាយពីកណ្តាលរាជធានីពេក ហើយបាននាំគ្នាឆ្ងល់ថា តើហេតុអ្វីបានជាពួកគេមិនត្រូវបានបន្ថែមប្រាក់សម្រាប់ចំណាយលើការធ្វើដំណើរ ព្រោះរដ្ឋាភិបាលត្រូវបានគេរំពឹងថា នឹងទទួលបានប្រាក់យ៉ាងច្រើនពីការផ្លាស់ប្តូរទីតាំងនេះ។
ហើយទន្ទឹមនឹងនោះដែរ កាលពីឆ្នាំ២០១២ ទីតាំងចាស់របស់ក្រសួងបរិស្ថានដែលស្ថិតនៅតាមបណ្តោយមហាវិថីព្រះសីហនុ គឺមានតម្លៃចន្លោះពី៩,៦លានដុល្លារដល់១២លានដុល្លារ។ គេនៅមិនទាន់ដឹងច្បាស់នៅឡើយទេកាលពីម្សិលមិញ ថាតើអ្វីនឹងកើតឡើងចំពោះទីតាំងចាស់នេះ នៅពេលក្រសួងត្រូវផ្លាស់ប្តូរទៅក្បែរណាហ្គាវើល៕ ស៊ុយឈាង
(រាយការណ៍បន្ថែមដោយ Joshua Wilwohl)
សាលាដំបូងរាជធានីភ្នំពេញផ្តន្ទាទោសបុរសម្នាក់ឲ្យជាប់ពន្ធនាគារ៧ឆ្នាំពីបទចាប់រំលោភកូនចុង
បុរសម្នាក់ដែលត្រូវបានរកឃើញពិរុទ្ធភាពពីបទចាប់រំលោភកូនចុងអាយុ១៣ឆ្នាំរបស់ខ្លួននោះត្រូវបានផ្តន្ទាទោសឲ្យជាប់ពន្ធនាគាររយៈពេលប្រាំពីរឆ្នាំ និងពិន័យជាប្រាក់ចំនួន២លានរៀល។
លោក ម៉េង តូនី ចៅក្រមនៅសាលាដំបូងរាជធានីភ្នំពេញបានសម្រេចផ្តន្ទាទោសបុរសឈ្មោះ ធុច សុខា អាយុ៣៣ឆ្នាំកាលពីម្សិលមិញ។ ដំបូងបុរសឈ្មោះ សុខា សារភាពថា គាត់បានប៉ះពាល់ក្មេងស្រីនេះតែប៉ុណ្ណោះ ប៉ុន្តែបានបដិសេធថា គាត់មិនបានចាប់រំលោភនាងទេ។
ជីដូនរបស់ក្មេងស្រីរូបនេះបានដាក់ពាក្យបណ្តឹងទៅតុលាការ។ជីដូនរូបនេះចង់បានក្មេងស្រីនេះមកចិញ្ចឹមបីបាច់បន្ទាប់ពីកូនប្រុសរបស់គាត់ដែលត្រូវជាឪពុករបស់ក្មេងស្រីនេះបានស្លាប់អស់រយៈពេលច្រើនឆ្នាំមកហើយនោះ។
ស្ត្រីជាម្តាយរបស់ក្មេងស្រីដែលនឹងទទួលប្រាក់សំណងដោយសារក្មេងស្រីនេះជាអនីតិជននោះ បានផ្តល់សក្ខីកម្មប្រឆាំងប្តីរបស់គាត់នៅតុលាការ។
លោក នាង ហៃ មេធាវីការពារជនរងគ្រោះបានមានប្រសាសន៍ថា ការផ្តន្ទាទោសបែបនេះគឺមិនទាន់ធ្ងន់ធ្ងរគ្រប់គ្រាន់នោះទេ ហើយបុរសជាឪពុកចុងរូបនេះសមនឹងទទួលទោសធ្ងន់បំផុត។
លោក នាង ហៃ បានមានប្រសាសន៍ថា “ចំពោះករណីនេះ គាត់គួរត្រូវផ្តន្ទាទោសឲ្យជាប់ពន្ធនាគារពី៧ ទៅ១៥ឆ្នាំ”។ លោក ម៉ន វិមានចំប៉ា មេធាវីការពារចុងចោទក៏បានមានប្រសាសន៍ផងដែរថា លោកគិតថា សាលក្រមនេះមិនយុត្តិធម៌ទេ ហើយលោកនឹងប្តឹងឧទ្ធរណ៍៕សារុន
ព្រះអង្គម្ចាស់ នរោត្តម រណឫទ្ធិ នឹងចូលប្រឡូកក្នុងឆាកនយោបាយវិញ
យោងតាមប្រធានខុទ្ទកាល័យរបស់ព្រះអង្គម្ចាស់ នរោត្តម រណឫទ្ធិ បានឲ្យដឹងថា ព្រះអង្គម្ចាស់ នរោត្តម រណឫទ្ធិ ដែលធ្លាប់ជានាយករដ្ឋមន្ត្រីទី១នៃព្រះរាជាណាចក្រកម្ពុជា បន្ទាប់ពីមានការបោះឆ្នោតគាំទ្រដោយអង្គការសហប្រជាជាតិក្នុងឆ្នាំ១៩៩៣នោះ នឹងបង្កើតគណបក្សថ្មីមួយ និងចូលប្រឡូកក្នុងឆាកនយោបាយវិញ។
លោក នរ៉ាណឫទ្ធិ អានន្ទដាយ៉ាត ប្រធានខុទ្ទកាល័យរបស់ព្រះអង្គម្ចាស់ រណឫទ្ធិ បានមានប្រសាសន៍ថា “ព្រះអង្គគ្រោងនឹងបង្កើត គណបក្សថ្មីមួយ”។
លោកបានឲ្យដឹងថា គណបក្សនេះនឹងមានឈ្មោះថា សហគមន៍នៃគណបក្សអ្នករាជានិយម។ លោកបន្ថែមថា ព្រះអង្គម្ចាស់ រណឫទ្ធិ ព្រះជន្ម៧០វស្សា មានបំណងចូលប្រឡូកក្នុងនយោបាយវិញ ដោយសារ “បញ្ហាជាច្រើន” រវាងគណបក្សប្រជាជនកម្ពុជាដែលកំពុងកាន់អំណាច និងគណបក្សសង្គ្រោះជាតិ ចាប់តាំងពីការបោះឆ្នោតជ្រើសតាំងតំណាងរាស្ត្រកាលពីក្នុងខែកក្កដា។
លោក នរ៉ាណឫទ្ធិ អានន្ទដាយ៉ាត បានមានប្រសាសន៍ថា “ មានមូលហេតុច្រើនណាស់ដែលជំរុញឲ្យព្រះអង្គបង្កើតគណបក្សនេះ”។
បន្ទាប់ពីត្រូវបានបណ្តេញចេញពីតំណែងជានាយករដ្ឋមន្ត្រីទី១កាលពីឆ្នាំ១៩៩៧ អំឡុងការវាយប្រហារគ្នាជាមួយកងកម្លាំងដែលស្មោះស្ម័គ្រនឹងនាយករដ្ឋមន្ត្រី ហ៊ុន សែន ព្រះអង្គម្ចាស់ នរោត្តម រណឫទ្ធិ បានជួបការលំបាកក្នុងការរក្សាកម្លាំងនយោបាយរបស់ព្រះអង្គ។
ព្រះបានចាកចេញពីតំណែងជាប្រធានគណបក្សហ៊្វុនស៊ីនប៉ិច កាលពីឆ្នាំ២០០៦ ហើយបានបន្តបង្កើតគណបក្សនរោត្តម រណឫទ្ធិ ដែលទទួលបានពីរអាសនៈនៅក្នុងរដ្ឋសភាអំឡុងព្រឹតិ្តការណ៍បោះឆ្នោតជ្រើសតាំងតំណាងរាស្រ្តឆ្នាំ២០០៨។
គណបក្ស នរោត្តម រណឫទ្ធិ បានឈប់ធ្វើសកម្មភាពមុនព្រឹតិ្តការណ៍បោះឆ្នោតជ្រើសតាំងតំណាងរាស្ត្រលើកចុងក្រោយ។ ព្រះអង្គម្ចាស់ នរោត្តម រណឫទ្ធិ បច្ចុប្បន្នកំពុងបំពេញតួនាទីជាទីប្រឹក្សារបស់ព្រះមហាក្សត្រ នរោត្តម សីហមុនី នៃព្រះរាជាណាចក្រកម្ពុជា៕ប៊ុននី
ក្រុមហ៊ុន UDG រងការចោទប្រកាន់ថា បានដាំដំឡូងមី និងដូងប្រេងជំនួសឲ្យការបង្កើតរមណីយដ្ឋាន
សមាជិកសភាជាប់ឆ្នោតមួយរូបមកពីគណបក្សសង្គ្រោះជាតិបានឲ្យដឹងកាលពីម្សិលមិញថា ក្រុមហ៊ុនអភិវឌ្ឍន៍ Union Development Group (UDG) ដែលគ្រប់គ្រងដោយចិនក្នុងខេត្តកោះកុង កំពុងឈូសឆាយដីសម្បទានរបស់ខ្លួនដែលដំបូងឡើយត្រូវបានគ្រោងធ្វើជារមណីយដ្ឋានទេសចរណ៍ដ៏ធំមួយ ដើម្បីដាំដំឡូងមី និងដើមដូងប្រេងជំនួសវិញ។
លោក សុន ឆ័យ សមាជិកសភាជាប់ឆ្នោតនិងជាប្រធានក្រុមតំណាងរាស្ត្រមកពីគណបក្សសង្គ្រោះជាតិបានចុះទៅតំបន់នោះកាលពីម្សិលមិញ ដើម្បីជួបជាមួយគ្រួសារដែលផ្ទះសំបែងរបស់ពួកគាត់ត្រូវបានដុតកម្ទេចដោយក្រុមហ៊ុនអភិវឌ្ឍន៍ចិនUDG កាលពីខែមករា និងដែលបាននាំគ្នាតវ៉ាកាលពីដើមខែនេះដើម្បីទាមទារឲ្យមានដំណោះស្រាយចំពោះវិវាទដីធ្លីដ៏រំារ៉ៃនេះ។
លោក សុន ឆ័យ បានមានប្រសាសន៍តាមទូរស័ព្ទថា “យើ់ងបានជួបជាមួយអ្នកភូមិប្រហែល១០០គ្រួសារ ហើយតំណាងក្រុមហ៊ុនម្នាក់បានមកដល់”។
លោក សុន ឆ័យ បន្តថា “យើងគិតថាវានឹងគ្មានប្រយោជន៍អ្វីទេក្នុងការជួបជាមួយក្រុមហ៊ុនចិន ព្រោះយើងដឹងហើយថា ដីសម្បទានទាំងអស់នេះសុទ្ធតែខុសច្បាប់ទាំងស្រុង។វាមិនចាំបាច់ត្រូវធ្វើការជាមួយនឹងកិច្ចសន្យាដែលបានលើកឡើងនោះទេ។ បានលើកឡើងថា ខ្លួននឹងអភិវឌ្ឍសណ្ឋាគារលំដាប់ខ្ពស់ ប៉ុន្តែឥឡូវ នេះយើងឃើញថា ពួកគេកំពុងតែយកដីទំហំដ៏ធំនេះទៅដាំដំឡូងមីទៅវិញ”។
ក្រុមហ៊ុនអភិវឌ្ឍន៍ចិនUDG ត្រូវបានរដ្ឋាភិបាលផ្តល់ដីសម្បទានទំហំ ៤៥.០០០ហិកតានៅក្នុងព្រំដែននៃឧទ្យានជាតិបទុមសាគរ កាលពីឆ្នាំ២០០៨ ហើយក្រុមហ៊ុននេះបានលើកឡើងថា ខ្លួនមានបំណងបង្កើតរមណីយដ្ឋានទេសចរណ៍ដ៏ធំមួយក្នុងទឹកប្រាក់ទំហំ ៣,៨ពាន់លានដុល្លារដោយមានការសាងសង់សណ្ឋាគារ កន្លែងវាយកូន ហ្គុលហ៍្វ និងអាកាសយានដ្ឋានឯកជនមួយ។ ការផ្តល់ដីសម្បទាននេះបានធ្វើឲ្យប៉ះពាល់អ្នកភូមិជាច្រើនគ្រួសារដែលរស់នៅក្នុងស្រុកបទុមសាគរនិងស្រុកមួយទៀតក្បែរនោះ គឺ ស្រុកគិរីសាគរ។
លោក សុន ឆ័យ បានអះអាងថា “ ពួកគេបានប្តូរកិច្ចសន្យាពីអ្វីដែលខ្លួនបានសន្យា គឺពីគោលបំណងសាងសង់រមណីយដ្ឋានទេសចរណ៍ទៅជាអ្វីផ្សេង”។
លោក សុន ឆ័យ បន្ថែមថា “ គ្មានភ័ស្តុតាងបង្ហាញពីតំបន់រមណីយដ្ឋានទេ។ នេះគឺជាការចាប់យកដីនិងអំពើពុករលួយ។ ខ្ញុំបាននិយាយទៅកាន់មន្ត្រីម្នាក់ក្នុងចំណោមមន្ត្រីមួយចំនួនរបស់ក្រុមហ៊ុនចិន ដែលស្លៀកពាក់ឯកសណ្ឋានយោធានិងដែលទទួលខុសត្រូវចំពោះការឈូសឆាយដីសម្រាប់ដាំដំឡូងមី។ គាត់បាននិយាយថា ពួកគេបានយកត្រាក់ ទ័រថ្មីចំនួន៥០គ្រឿងមកដើម្បីឈូសឆាយដីសម្រាប់ដាំដំឡូងមី”។
អ្នកភូមិម្នាក់ឈ្មោះ ស៊ុន គឹមសឿន អាយុ៥៨ឆ្នាំដែលមកពីឃុំតានួន ស្រុកបទុមសាគរបានអះអាងថា នគរបាលបានដាក់ខ្នោះអ្នកស្រីអស់រយៈពេលបីម៉ោងកាលពីថ្ងៃទី២១ ខែមករា ខណៈផ្ទះបណ្តោះអាសន្នទំហំ៥គុណ៦ម៉ែត្ររបស់អ្នកស្រីកំពុងត្រូវបានគេដុតកម្ទេច។ អ្នកស្រីនៅមិនទាន់ទទួលបានប្រាក់សំណងនៅឡើយទេ។
អ្នកស្រីនិយាយថា “ ពួកគេមានគម្រោងដាំដំឡូងមីនិងដាំដើមដូងប្រេង”។ អ្នកស្រីបានបន្ថែមថា ក្រុមហ៊ុនបានដាំដំឡូងមីនិងដើមដូងប្រេងចាប់តាំងពីផ្ទះសំបែងត្រូវដុតកម្ទេចមកម្លេះ។ អ្នកស្រីបាននិយាយបន្ថែមទៀតថា “ពួកគេមិនបានសាងសង់ក្រុងទេសចរណ៍នោះទេ”។
រីឯអ្នកម្នាក់ទៀតឈ្មោះ ឡាយ គៀត បានលើកឡើងថា អ្នកស្រីក៏បានឃើញក្រុមហ៊ុនកំពុងដាំដំឡុងមីនិងដើមដូងប្រេងដែរ។ អ្នកស្រីនិយាយថា “ពួកគេកំពុងដាំដំឡូងមីនិងដើមដូងប្រេង ហើយកំពុងឈូសឆាយ ដីស្រែរបស់ពលរដ្ឋ។ ពួកគេមិនទាន់ចាប់ផ្តើមដាំដំឡូងមីនិងដើមដូងប្រេងនៅឡើងទេ ប៉ុន្តែពួកគេកំពុងឈូសដើមដូងនិងដើមស្វាយនិងកំពុងឈូសកម្ទេចភ្លឺស្រែចោល”។
លោក អ៊ិន គង់ចិត្រ អ្នកសម្របសម្រួលរបស់អង្គការសិទ្ធិមនុស្សលីកាដូប្រចាំខេត្តកោះកុងបានលើកឡើងថា លោកបានដឹងថា ក្រុមហ៊ុនអភិវឌ្ឍន៍ចិនUDG បានដាំដំឡូងមីមួយឆ្នាំមកហើយនៅលើដីសម្បទានទំហំ៣០០ហិកតា ជាតំបន់ ដែលអ្នកភូមិត្រូវបានគេប្រាប់ថា គេនឹងសាងសង់អាកាសយានដ្ឋានមួយនៅទីនេះ។
លោក អន ភារៈ អភិបាលស្រុកបទុមសាគរបានបញ្ជាក់ថា ក្រុមហ៊ុនអភិវឌ្ឍន៍ចិនUDGកំពុងដាំដំណាំ ប៉ុន្តែដំណាំទាំងនេះគឺគ្រាន់តែសម្រាប់តែលម្អសោភ័ណភាពក្រុងរបស់ពួកគេប៉ុណ្ណោះ។ លោកបានលើកឡើងថា រាល់សំណួរទាក់ទិនលទ្ធភាពដែលក្រុមហ៊ុនអភិវឌ្ឍន៍ចិនUDG អាចនឹងផ្លាស់ប្តូរគោលបំណងរបស់ខ្លួនសម្រាប់ការធ្វើអ្វីៗលើដីនេះគឺសួរទៅក្រុមហ៊ុនទៅ។ រីឯគណៈគ្រប់គ្រងរបស់ក្រុមហ៊ុននេះមិនអាចទាក់ទងបានឡើយ៕ស៊ុយឈាង
មានសំឡេងរិះគន់កាន់តែច្រើនទៅលើផែនការអ្នកស្វែងរកសិទ្ធិជ្រកកោនចូលទៅប្រទេសអូស្ត្រាលី
កាលពីម្សិលមិញ រដ្ឋាភិបាលអូស្ត្រាលីបានបន្តរងសំឡេងរិះគន់នៅក្នុងប្រទេសរបស់ខ្លួន ជុំវិញការស្នើឲ្យកម្ពុជា ដែលស្ថិតក្នុងចំណោមប្រទេសក្រីក្របំផុតនៅក្នុងតំបន់ ទទួលអ្នកស្វែងរកសិទ្ធិជ្រកកោនមួយចំនួនក្នុងចំណោមអ្នកស្វែងរកសិទ្ធិជ្រកកោនរាប់ពាន់នាក់ដែលបានព្យាយាមចូលទៅរស់ នៅប្រទេសអូស្ត្រាលី។
លោកស្រី ជូលី ប៊ីសប់ (Julie Bishop) រដ្ឋមន្ត្រីក្រសួងការបរទេសអូស្ត្រាលី បានដាក់សំណើ នេះជូនលោកនាយករដ្ឋមន្ត្រី ហ៊ុន សែន អំឡុងកិច្ចប្រជុំឯកជនមួយនៅក្នុងរាជធានីភ្នំពេញ កាលពីថ្ងៃសៅរ៍ ហើយលោក ហោ ណាំហុង រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ នៃប្រទេសកម្ពុជាបានឲ្យដឹងថា រដ្ឋាភិបាលនឹងពិចារណាដោយយក ចិត្តទុកដាក់ចំពោះសំណើនេះ។
នៅក្នុងប្រទេសអូស្ត្រាលី លោក គ្រីស្ទីន មីលន័រ (Christine Milne) មេដឹកនាំគណបក្សប្រឆាំងបៃតង (Greens) កាលពីថ្ងៃច័ន្ទ បានចោទប្រកាន់គណបក្សសេរីនិយម (Liberals) ដែលកំពុងគ្រប់គ្រងអំណាចម្ដងទៀតថា បានគាំទ្ររបបមួយពាក់ព័ន្ធក្នុងការរំលោភសិទ្ធិមនុស្ស នេះបើយោងតាមសារព័ត៌មាន ឌឹ វ៉េស អូស្ត្រាលៀន (The West Australian) ។
សារព័ត៌មានដដែលនេះបានរាយការណ៍ថា លោក ខេលវិន ថមសុន (Kelvin Thomson) សមាជិកសភាមកពីគណបក្សការងារក៏បានចោទប្រកាន់គណបក្សសេរីនិយមនផងដែរថា បានឆ្លៀតឱកាសនិយមនយោបាយ និងមានល្បិចលាក់ពុតមួយចំនួន បន្ទាប់ពីបានរារាំងកិច្ចប្រឹងប្រែងរបស់រដ្ឋាភិបាលក្នុងការដោះដូរមនុស្សជាមួយប្រទេសម៉ាឡេស៊ី នៅពេលខ្លួននៅជាគណបក្សប្រឆាំង។
យោងតាមសេចក្ដីរាយការណ៍មួយនៅក្នុងសារព័ត៌មាន ស៊ីដនី ម៉នីង ហឺរ៉ាល់( Sydney Morning Herald) កាលពីម្សិលមិញ បានឲ្យដឹងថា លោក រីឆាដ ម៉ាឡេស (Richard Marles) អ្នកនាំពាក្យផ្នែកអន្តោប្រវេសន៍របស់គណបក្សប្រឆាំង បានរិះគន់ថា ជនជាតិអូស្ត្រាលីកំពុងស្វែងយល់បន្ថែមទៀតអំពីសំណើរបស់លោកស្រី ប៊ីសប់ តាមរយៈប្រព័ន្ធផ្សព្វផ្សាយបរទេសច្រើនជាងតាមរយៈក្រសួងការបរទេសអូស្ត្រាលី។
គិតមកទល់ពេលនេះ មានតែមន្ត្រីកម្ពុជាប៉ុណ្ណោះបានធ្វើអត្ថាធិប្បាយអំពីសំណើរបស់ប្រទេសអូស្ត្រាលី។ លោកស្រី ប៊ីសប់ បានបដិសេធមិនឆ្លើយតបនឹងសំណួរនៅក្នុងសន្និសីទសារព័ត៌មាន ក្នុងរាជធានីភ្នំពេញ កាលពីថ្ងៃសៅរ៍ ហើយក្រសួងការបរទេសនៃប្រទេសអូស្ត្រាលីមិនទាន់ចេញសេចក្ដីថ្លែងការណ៍ណាមួយទាក់ទងនឹងសំណើនេះនៅឡើយទេ។
សេចក្ដីថ្លែងការណ៍មួយដែលស្ថានទូតអូស្ត្រាលីប្រចាំរាជធានីភ្នំពេញបានចេញផ្សាយភ្លាមៗក្រោយពីដំណើរទស្សនកិច្ចរបស់លោកស្រី ប៊ីសប់ គ្រាន់តែមានសេចក្តីបញ្ជាក់ថា លោកស្រីបាននិយាយជាមួយមន្ត្រី កម្ពុជា អំពីការតាមចាប់អ្នករត់ពន្ធ និងធ្វើចំណាកស្រុកតាមផ្លូវទឹកដោយខុសច្បាប់ក្នុងចំណោមប្រធានបទជាច្រើនទៀត។
នៅពេលត្រូវបានស្នើសុំព័ត៌មានលម្អិតបន្ថែមទៀត អ្នកនាំពាក្យស្ថានទូតអូស្ត្រាលីមួយរូបបានណែនាំឲ្យទៅពិនិត្យមើលសេចក្ដីថ្លែងការណ៍ចេញផ្សាយកាលពីថ្ងៃអាទិត្យ ក៏ប៉ុន្តែ អ្នកនាំពាក្យរូបនោះមិនបានឆ្លើយតបឡើយកាលពីម្សិលមិញ។
អូស្ត្រាលីបានរងនូវសំឡេងរិះគន់យ៉ាងច្រើន ដោយសារតែការប្រព្រឹត្តរបស់ខ្លួនទៅលើអ្នកស្វែងរកសិទ្ធិជ្រកកោនដែលបច្ចុប្បន្នខ្លួនបានបញ្ជូនទៅមណ្ឌលឃុំខ្លួននៅប្រទេសប៉ាពូអាស៊ីនូវែលហ្គីណេនិងប្រទេសណូរូ។
កាលពីម្សិលមិញ ប្រជាជនអូស្ត្រាលីជាច្រើនពាន់នាក់ត្រូវបានរាយការណ៍ថា បានប្រមូលផ្តុំគ្នាតវ៉ានៅទូទាំងប្រទេសជុំវិញករណីសម្លាប់អ្នកស្វែងរកសិទ្ធិជ្រកកោនជនជាតិអីុរ៉ង់ម្នាក់ អំឡុងកុបកម្មនៅមណ្ឌលឃុំឃាំងមួយនៅប្រទេសប៉ាពូអាស៊ីនូវែលហ្គីណេកាលពីដើមខែនេះ។ អង្គការឧត្តមស្នងការសហប្រជាជាតិទទួលបន្ទុកជនភៀសខ្លួន (United Nations High Commissioner for Refugees) ហៅកាត់ថា UNHCR បានឲ្យដឹងថា មណ្ឌលនោះគួរតែត្រូវបានបិទលែងឲ្យដំណើរការ។
លោកស្រី វីវៀន តាន់ (Vivian Tan) អ្នកនាំពាក្យការិយាល័យប្រចាំតំបន់របស់អង្គការ UNHCR នៅទីក្រុងបាងកក បានបដិសេធមិនធ្វើអត្ថាធិប្បាយទាក់ទងនឹងសំណើថ្មីរបស់ប្រទេសអូស្ត្រាលី ហើយប្រទេសកម្ពុជាទទួលយកអ្នកស្វែងរកសិទ្ធិជ្រកកោនដែលចូលទៅប្រទេសខ្លួន។
លោកស្រីបានមានប្រសាសន៍ថា “ អង្គការ UNHCR មិនបានចូលរួមក្នុងកិច្ចពិភាក្សាទ្វេភាគីទេកាលពីចុងសប្តាហ៍មុន ហើយមិនអាចអត្ថាធិប្បាយអំពីអ្វីដែលត្រូវបានពិភាក្សា និងឯកភាពគ្នាទេ។ យើងនឹងស្វែងរកព័ត៌មានបន្ថែមទៀតទាក់ទងទៅនឹងរឿងនេះ”។
អង្គការ UNHCR បានបិទការិយាល័យរបស់ខ្លួននៅក្នុងប្រទេសកម្ពុជា បន្ទាប់ពីបានប្រគល់ភារកិច្ចចាត់ចែងជនភៀសខ្លួនទាំងអស់ឲ្យរដ្ឋាភិបាលកាលពីឆ្នាំ២០១១។
លោក ហ្វីល រ៉ូបឺតសុន (Phil Robertson) នាយករងអង្គការឃ្លាំមើលសិទ្ធិមនុស្សប្រចាំតំបន់អាស៊ី (Human Rights Watch) ដែលបានរិះគន់ប្រទេសកម្ពុជាជុំវិញការប្រព្រឹត្តរបស់
ប្រទេសនេះទៅលើអ្នកស្វែងរកសិទ្ធិជ្រកកោនមកពីប្រទេសចិន និងប្រទេសវៀតណាម ក្នុងរយៈពេលប៉ុន្មានឆ្នាំកន្លងមកនេះ នេះបើយោងតាមសំណើថ្មីរបស់ប្រទេសអូស្ត្រាលីដែលសមនឹងទទួលរងការរិះគន់។
លោក ហ្វីល រ៉ូបឺតសុន បានលើកឡើងនៅក្នុងអីុម៉េលថា “ រដ្ឋមន្ត្រីការបរទេសអូស្ត្រាលី ប៊ីសប់ បានកំណត់កម្រិតថ្មីមួយនៅក្នុងសំណើដែលរំលោភសិទ្ធិ និងធ្វើឲ្យខូចកិត្តិយសនេះ”។
លោក ហ្វីល រ៉ូបឺតសុន មានប្រសាសន៍ឲ្យដឹងបន្ថែមទៀតថា “ ដោយមិនជំរុញឲ្យមេដឹកនាំប្រទេសកម្ពុជាបញ្ឈប់សកម្មភាពរំលោភសិទ្ធិមនុស្ស លោកស្រីបែរជាឲ្យមេដឹកនាំទាំងនោះជួយក្នុងការគេចវេសពីកាតព្វកិច្ចរបស់អូស្ត្រាលី ចំពោះអ្នកស្វែងរកសិទ្ធិជ្រកកោន”៕ សុធា
លោក ហ៊ុន សែន ជួបពិភាក្សាជាមួយអនុរដ្ឋមន្ត្រីបក្សកុម្មុយនីស្តចិន
កាលពីម្សិលមិញ លោកនាយករដ្ឋមន្ត្រី ហ៊ុន សែន បានជួបជាមួយលោក Chen Fengxiang អនុរដ្ឋមន្ត្រីទទួលបន្ទុកកិច្ចការទំនាក់ទំនងអន្តរជាតិនៃគណៈកម្មាធិការកណ្តាលបក្សកុម្មុយនីស្តចិនដើម្បីពិភាក្សារកវិធីពង្រឹងទំនាក់ទំនងរវាងប្រទេសទាំងពីរ។
លោក អៀង សុផាល្លែត ជំនួយការផ្ទាល់របស់លោក ហ៊ុន សែន បានមានប្រសាសន៍ថា លោកទាំងពីរបានពិភាក្សាគ្នាពីបញ្ហាទូទៅដូចជាការអភិវឌ្ឍ និងទំនាក់ទំនងនយោបាយរវាងកម្ពុជា និងចិនជាដើម។
លោក សុផាល្លែត បានមានប្រសាសន៍បន្ថែមដោយមិនលើកឡើងលម្អិតថា “សម្តេច ហ៊ុន សែន បានមានប្រសាសន៍ថា កិច្ចសហប្រតិបត្តិការរវាងប្រទេសទាំងពីរត្រូវតែវិវឌ្ឍទៅមុខ ជាពិសេសបញ្ហាដែលមេដឹកនាំនៃប្រទេសទាំងពីរបានព្រមព្រៀងគ្នារួចហើយនោះ”។
អំឡុងពេលមកបំពេញទស្សនកិច្ចនៅប្រទេសកម្ពុជា លោក Chen ក៏បានជួបពិភាក្សាការងារជាមួយលោក សាយ ឈុំ អនុប្រធានព្រឹទ្ធសភាផងដែរ។
លោក សុផាល្លែត បានមានប្រសាសន៍ថា លោកទាំងពីរបានពិភាក្សារិះរកវិធី “ជំរុញឲ្យមានការផ្លាស់ប្តូរយោបល់ឲ្យបានច្រើនដើម្បីធ្វើឲ្យគណបក្សប្រជាជនកម្ពុជា និងបក្សកុម្មុយនីស្តចិនមានទំនាក់ទំនងកាន់តែជិតស្និទ្ធថែមទៀត”៕សារុន
បុរសជនជាតិកាណាដាម្នាក់ដែលត្រូវបានចាប់ខ្លួនពីបទរំលោភផ្លូវភេទកុមារ ប៉ុនប៉ងធ្វើអត្តឃាតក្នុងបន្ទប់ផ្ទះជួល
នគរបាលបានឲ្យដឹងកាលពីម្សិលមិញថាជនជាតិកាណាដាអាយុ៧០ឆ្នាំម្នាក់ បានយកកាំបិតស្លាចាក់ខ្លួនឯងជាច្រើនកន្លែងកាលពីថ្ងៃអាទិត្យនៅក្នុងបន្ទប់ផ្ទះជួលមួយនៅក្នុងក្រុងសៀមរាប ខណៈដែលនគរបាលបានទៅដល់ផ្ទះសំណាក់របស់គាត់ដើម្បីចាប់ខ្លួនគាត់ ដោយសារបទល្មើសរួមភេទជាមួយកុមារ។
នគរបាលបានទម្លាយទ្វារផ្ទះ និងដណ្តើមយកកាំបិតពីឈ្មោះ ព្យ័រ ដេស្លូរីយ័រ (Pierre Deslauriers) មុនពេលបញ្ជូនគាត់ទៅមន្ទីរពេទ្យខេត្តដើម្បីព្យាបាល និងចាប់ខ្លួនគាត់តាមការចោទប្រកាន់ពីបទរំលោភផ្លូវភេទក្មេងប្រុសចំនួនប្រាំនាក់អាយុក្រោម១៤ឆ្នាំ នេះបើយោងតាមលោក ម៉ីវុឌ្ឍី នាយរងនគរបាលប្រឆាំងការជួញដូរមនុស្សខេត្តសៀមរាប។
លោកវរសេនីយ៍ត្រី វុឌ្ឍី បានឲ្យដឹងថា “ជនសង្ស័យ គឺលោក ដេស្លូរីយ័រ បានដឹងថា នគរបាលប្រឆាំងការជួញដូរមនុស្សរបស់យើងកំពុងតាមចាប់គាត់ ហើយជននេះបានលាក់ខ្លួនក្នុងបន្ទប់ផ្ទះជួលដោយគ្មានសម្លៀកបំពាក់ និងបានព្យាយាមធ្វើអត្តឃាត”។
លោកបានបន្ថែមថា នគរបាលបានទទួលពាក្យបណ្តឹងពីក្រុមគ្រួសារជនរងគ្រោះ និងបានចំណាយពេលពីរថ្ងៃ តាមដានលោក ដេស្លូរីយ័រ មុនពេលឈានទៅរកការចាប់ខ្លួនគាត់។ ក្មេងប្រុសទាំងនោះបានអះអាងថា ដេស្លូរីយ័រ បានឲ្យប្រាក់ពួកគេម្នាក់ៗ២ឬ៣ដុល្លារដើម្បីរួមភេទជាមួយពួកគេ។
លោកវរសេនីយ៍ត្រី ម៉ី វុទ្ធី បានឲ្យដឹងទៀតថា ជនសង្ស័យឈ្មោះ ដេស្លូរីយ័រ បានចាក់ពោះខ្លួនឯង និងកាត់ដៃ និងកដៃរបស់ខ្លួន ក៏ប៉ុន្តែ របួសរបស់ជនសង្ស័យនេះមិនបានគំរាមកំហែងអាយុជីវិតទេ។
ក្នុងសេចក្តីប្រកាសព័ត៌មានចេញផ្សាយកាលពីម្សិលមិញ អង្គការសកម្មភាពដើម្បី កុមារបានលើកឡើងថា ខ្លួនបានទទួលដំណឹងកាលពីថ្ងៃទី២០ ខែកុម្ភៈ ពីអង្គការដៃគូរបស់ខ្លួនមួយនៅខេត្តសៀមរាប ទាក់ទងទៅនឹងបុរសម្នាក់ត្រូវបានសង្ស័យថា បានរំលោភបំពានលើកុមារាពីរនាក់។ អង្គការនេះបានបញ្ជូនដំណឹងនេះបន្តទៅនគរបាលខេត្តសៀមរាប និងស្នើឲ្យនគរបាលធ្វើអន្តរាគមន៍ អំឡុងពេលកំពុងតាមដានជនសង្ស័យឈ្មោះ ដេស្លូរីយ័រ គួរបញ្ជាក់ថា អង្គការនេះបានស៊ើបអង្កេត និងជំរុញឲ្យមានការនាំជនសង្ស័យទៅផ្តន្ទាទោសពីបទល្មើសផ្លូវភេទលើកុមារនៅក្នុងប្រទេសកម្ពុជា។
អង្គការសកម្មភាពដើម្បី កុមារ បានឲ្យដឹងទៀតថា ភ្នាក់ងាររបស់ខ្លួនបានឃើញជនសង្ស័យនាំក្មេងប្រុសបួននាក់ចូលទៅក្នុងព្រៃ ហើយបន្ទាប់មកនគរបាលបានសួរនាំក្មេងប្រុសទាំងនោះ ហើយពួកគេ និយាយ ថា ពួកគេត្រូវបានគេរំលោភបំពាន។ សេចក្តីប្រកាសព័ត៌មាននោះមានខ្លឹមសារថា “ដោយមានជំនួយពីអង្គការសកម្មភាពដើម្បី កុមារ បច្ចុប្បន្ន នគរបាលកំពុងកំណត់អត្តសញ្ញាណជនរងគ្រោះច្រើននាក់ទៀត ដើម្បីនាំពួកគេមកសម្ភាស”៕ ប៊ុននី
មន្ត្រីបណ្តឹងសាជីវកម្មហិរញ្ញវត្ថុអន្តរជាតិនឹងជួយដោះស្រាយវិវាទដីធ្លីនៅឯអាកាសយានដ្ឋាន
តំណាងប្រជាជនរាប់រយគ្រួសារដែលប្រឈមនឹងការបណ្តេញចេញពីទីលំនៅដ្ឋាន នៅជុំវិញអាកាសយានដ្ឋានអន្តរជាតិភ្នំពេញ បានយល់ព្រមអនុញ្ញាតឲ្យមន្ត្រីទទួលបន្ទុកអង្កេតបណ្តឹងប្រជាជន របស់សាជីវកម្មហិរញ្ញវត្ថុអន្តរជាតិ ដែលហៅកាត់ថា IFC សម្របសម្រួលក្នុងការដោះស្រាយជម្លោះដីធ្លីជាមួយរដ្ឋាភិបាល និងក្រុមហ៊ុនគ្រប់គ្រងអាកាសយានដ្ឋាននេះ។ គួរបញ្ជាក់ថា សាជីវកម្ម IFC ជាសេនាធិការវិនិយោគឯកជនរបស់ធនាគារពិភពលោក (World Bank)។
នៅក្នុងរបាយការណ៍ចុះខែមករា ដែលត្រូវបានចេញផ្សាយកាលពីសប្តាហ៍មុន បានឲ្យដឹងថា មន្ត្រីទទួលបន្ទុកអង្កេតបណ្តឹងប្រជាជនរបស់សាជីវកម្ម IFC បានលើកឡើងថា រដ្ឋាភិបាល និងក្រុមហ៊ុនអាកាសយានដ្ឋានកម្ពុជា ជាក្រុមហ៊ុនឯកជនគ្រប់គ្រងអាកាសយានដ្ឋាននេះ ក៏បានអនុញ្ញាតឲ្យមន្ត្រីទាំងនេះចូលរួមសម្របសម្រួលក្នុងកិច្ចចរចាក៏ប៉ុន្តែ ពួកគេមិនបានបញ្ជាក់ពីកាលបរិច្ឆេទ ឬក៏គម្រោងពេលវេលាសម្រាប់ដំណើរការនៃការដោះស្រាយវិវាទនេះទេ។
ប្រជាជន៥៩គ្រួសារបានដាក់ពាក្យបណ្តឹងទៅមន្ត្រីទទួលបន្ទុកអង្កេតបណ្តឹងប្រជាជនរបស់សាជីវកម្ម IFC កាលពីខែមិថុនា បន្ទាប់ពីអាជ្ញាធរមូលដ្ឋានបានគំរាមបណ្តេញប្រជាជនជិត៤០០គ្រួសារ កាលពីចុងឆ្នាំ២០១២ មុនពេលមេដឹកនាំមកពីទូទាំងពិភពលោកមកដល់រាជធានីភ្នំពេញ ដើម្បីចូលរួមក្នុងកិច្ចប្រជុំកំពូលថ្នាក់តំបន់ចំនួនពីរ។
ចំណុចដែលធ្វើឲ្យសាជីវកម្ម IFC មានការពាក់ព័ន្ធក្នុងការដោះស្រាយវិវាទនេះគឺដោយសារតែសាជីវកម្មនេះបានផ្តល់ប្រាក់កម្ចី១០លានដុល្លារដល់គម្រោងអភិវឌ្ឍន៍អាកាសយានដ្ឋានបីនៅក្នុងប្រទេសកម្ពុជា ដោយត្រូវចំណាយប្រាក់៧២លានដុល្លារ។ គួរបញ្ជាក់ផងដែរថា អាកាសយានដ្ឋានទាំងនេះសុទ្ធតែស្ថិតក្រោមការគ្រប់គ្រងរបស់ក្រុមហ៊ុនអាកាសយានដ្ឋានកម្ពុជា ហើយគម្រោងនេះមានសកម្មភាពអភិវឌ្ឍន៍ជាច្រើន ដូចជា ការបង្កើតផ្លូវយន្តហោះឡើងចុះវែងជាងមុនមួយ ក្នុងរាជធានីភ្នំពេញ ដើម្បីប្រតិបត្តិការរបស់យន្តហោះដែលមានទំហំធំជាងមុន។
ប្រជាជនជាច្រើនគ្រួសារដែលរស់នៅជុំវិញបរិវេណនៃអាកាសយានដ្ឋានអន្តរជាតិភ្នំពេញអះអាងថា អាជ្ញាធរមូលដ្ឋានផ្តល់ការអនុញ្ញាតផ្លូវការឲ្យពួកគាត់រស់នៅ និងសង់លំនៅដ្ឋាននៅលើដីនោះ ក៏ប៉ុន្តែ ឥឡូវនេះសិទ្ធិដីធ្លីរបស់ពួកគាត់ត្រូវបានគេបំពាន តាមរយៈការព្យាយាមបង្ខំឲ្យពួកគាត់ចាកចេញ។ រដ្ឋាភិបាលបានចោទប្រកាន់ប្រជាជនទាំងនោះថា បានរស់នៅខុសច្បាប់លើដីនោះ។
របាយការណ៍របស់មន្ត្រីទទួលបន្ទុកអង្កេតបណ្តឹងប្រជាជនរបស់សាជីវកម្ម IFC បានបង្ហាញមូលដ្ឋាននៃជម្លោះនេះ និងបានកត់សម្គាល់ថា ភាគីទាំងអស់ដែលរួមមានគ្រួសារ ប្រជាជន រដ្ឋាភិបាល និងក្រុមហ៊ុនអាកាសយានដ្ឋានកម្ពុជា បានឯកភាពគ្នាអនុញ្ញាតឲ្យមន្ត្រីទទួលបន្ទុកអង្កេតបណ្តឹងប្រជាជន ចូលខ្លួនសម្របសម្រួលក្នុងកិច្ចចរចានានា។
របាយការណ៍នេះមានខ្លឹមសារថា “នៅក្នុងដំណើរការនៃការដោះស្រាយរបស់មន្ត្រីទទួលបន្ទុកអង្កេតបណ្តឹងប្រជាជន ក្នុងវិវាទនេះ មន្ត្រីរូបនោះផ្តល់នូវការសម្របសម្រួលដោយប្រកាន់ខ្ជាប់នៅជំហរអព្យាក្រឹត និងរៀបចំកិច្ចប្រជុំដាច់ដោយឡែកពីគ្នា និងកិច្ចប្រជុំរួមគ្នាទៅតាមស្ថានភាពចាំបាច់។ មន្ត្រីទទួលបន្ទុកអង្កេតបណ្តឹងប្រជាជន នឹងធ្វើការជាមួយភាគីទាំងអស់ ដើម្បីជួយពួកគេឲ្យឯកភាពគ្នាលើរយៈពេល ដំណើរការ និងគម្រោងពេលវេលាសម្រាប់កិច្ចប្រជុំទាំងនោះ”។
អ្នកសម្របសម្រួលជាតិរបស់មន្ត្រីទទួលបន្ទុកអង្កេតបណ្តឹងប្រជាជន គឺលោកមេធាវី គង់ ផលលាក់ មិនបានឆ្លើយតបទៅនឹងសំណើសំុធ្វើសេចក្តីអត្ថាធិប្បាយទេ។
អ្នកស្រី ច្រាយ នីម ជាប្រជាជនម្នាក់នៅក្នុងចំណោមប្រជាជនដែលកំពុងប្រឈមនឹងការបណ្តេញចេញ បានឲ្យដឹងកាលពីម្សិលមិញថា អ្នកស្រីសង្ឃឹមថា មន្ត្រីទទួលបន្ទុកអង្កេតបណ្តឹងប្រជាជននឹងអាចជួយបាន។
អ្នកស្រីបាននិយាយថា “រដ្ឋាភិបាលបានសន្យាផ្តល់ប្រាក់សំណងតាមតម្លៃទីផ្សារ អំឡុងកិច្ចប្រជុំកាលពីសប្តាហ៍មុន ក៏ប៉ុន្តែ យើងមិនជឿថា ពួកគេអាចដោះស្រាយបញ្ហានេះឲ្យយើងទាំងអស់គ្នាទេ ដោយសារតែប្រជាជនរាប់ពាន់គ្រួសារបានបាត់បង់ដីធ្លីរបស់ខ្លួន ដោយសារគម្រោងអភិវឌ្ឍន៍របស់រដ្ឋាភិបាល”។
លោក យិន គា ប្រធានរដ្ឋបាលខណ្ឌពោធិ៍សែនជ័យ បានឲ្យដឹងថា ចំនួនគ្រួសារប្រជាជនដែលនឹងត្រូវបណ្តេញចេញ និងចំនួនប្រាក់សំណងពិតប្រាកដដែលពួកគាត់នឹងទទួលបាន មិនត្រូវបានលើកទៅពិភាក្សានៅក្នុងកិច្ចប្រជុំកាលពីសប្តាហ៍មុនទេ ហើយបញ្ហាទាំងនេះប្រហែលជាមិនអាចមានការសម្រេចបានទេ ដរាបណាដីបន្ថែមទៀតដែលចាំបាច់សម្រាប់ពង្រីកផ្លូវយន្តហោះឡើងចុះ នឹងត្រូវបានបោះបង្គោលព្រំដែនគ្រប់ចំណុចទេនោះ។
លោកបាននិយាយថា “យើងមិនទាន់ដឹងថា ប្រតិបត្តិការបណ្តេញចេញនឹងចាប់ផ្តើមនៅពេលណា ឬក៏ប្រាក់សំណងប៉ុន្មានដែលយើងនឹងផ្តល់ឲ្យទេ ក៏ប៉ុន្តែ គម្រោងនេះនឹងចាប់ផ្តើមនាពេលឆាប់នេះ។ យើងនឹងចរចាបន្ទាប់ពីយើងកំណត់ចំនួនគ្រួសារដែលរងផលប៉ះពាល់ដោយគម្រោងនេះ”។
លោក សាយ សុខាន់ អនុរដ្ឋលេខាធិការលេខាធិការដ្ឋានអាកាសចរណ៍ស៊ីវិល បានឲ្យដឹងថា មន្ត្រីនានានឹងជួបប្រជុំគ្នានៅសប្តាហ៍ក្រោយ ដើម្បីកំណត់កាលបរិច្ឆេទសម្រាប់ចាប់ផ្តើមបោះបង្គោលលើដីដែលចាំបាច់ក្នុងការពង្រីកផ្លូវសម្រាប់យន្តហោះឡើងចុះ។
លោក ខែក នរិនដា អ្នកនាំពាក្យក្រុមហ៊ុនអាកាសយានដ្ឋានកម្ពុជា បានលើកឡើងថា ក្រុមហ៊ុនរបស់លោក សង្ឃឹមថា ខ្លួនអាចដោះស្រាយវិវាទនេះដោយសន្តិវិធី ពីព្រោះក្រុមហ៊ុននេះបានធ្វើការជាមួយគ្រួសារប្រជាជនដែលជាប់ពាក់ព័ន្ធនៅក្នុងវិវាទដីធ្លីប្រហាក់ប្រហែលគ្នាមួយ នៅជុំវិញអាកាសយានដ្ឋានក្នុងខេត្តព្រះសីហនុ ដែលមន្ត្រីទទួលបន្ទុកអង្កេតបណ្តឹងប្រជាជនរបស់សាជីវកម្ម IFC បានជួយដោះស្រាយផងដែរ។
លោកបានមានប្រសាសន៍ថា “ដោយមានការសម្របសម្រួលរបស់មន្ត្រីទទួលបន្ទុកអង្កេតបណ្តឹងប្រជាជន នឹងមានឱកាសដោះស្រាយប្រកបដោយផ្លែផ្កា ដូចគ្នានឹងលទ្ធផលសម្រេចបាននៅអាកាសយានដ្ឋានខេត្តព្រះសីហនុផងដែរ”៕ សុធា
សាលាដំបូងរាជធានីសម្រេចឲ្យស៊ើបអង្កេតឡើងវិញលើរឿងក្តីជួញដូរក្មេងស្រីគថ្លង់ទៅផ្ទះបន
កាលពីម្សិលមិញ សាលាដំបូងរាជធានីភ្នំពេញ បានសម្រេចបញ្ជូនរឿងក្ដីមនុស្សពីរនាក់ដែលជាប់ចោទពីបទជួញដូរក្មេងស្រីគថ្លង់ និងមានផ្ទុកមេរោគអេដស៍អាយុ១៣ឆ្នាំម្នាក់ទៅផ្ទះបន ទៅឲ្យចៅក្រមស៊ើបសួរវិញ ដើម្បីឲ្យគាត់ពិនិត្យមើលរូបភាពវីដេអូដែលជនសង្ស័យម្នាក់អះអាងថា គាត់មិននៅកន្លែងកើតហេតុទេ ពេលបទឧក្រិដ្ឋនោះកើតឡើង។
ឯម សុភា អាយុ៤៤ឆ្នាំ និង ឡុញ ចាន់ អាយុ២៨ឆ្នាំ ត្រូវបានផ្ដន្ទាទោសកាលពីដើមខែនេះ ហើយដំបូងតុលាការគ្រោងនឹងចេញសាលក្រមនៅថ្ងៃម្សិលមិញនេះ។
ប៉ុន្តែលោក តែ សំអាង ចៅក្រមប្រធានក្រុមប្រឹក្សាជំនុំជម្រះបានពន្យារពេលចេញសាលក្រម ពីព្រោះស្ត្រីឈ្មោះ សុភា បានអះអាងថា គាត់បាននិងកំពុងលេងល្បែងនៅពេលមានការប្រព្រឹត្តបទឧក្រិដ្ឋដូចដែលបានចោទប្រកាន់នោះ។
លោកចៅក្រម តែ សំអាង បានលើកឡើងនៅក្នុងតុលាការថា “ តុលាការបានសម្រេចបញ្ជូនរឿងក្ដីនេះទៅឲ្យចៅក្រមស៊ើបសួរធ្វើការស៊ើបអង្កេតឡើងវិញ និងពិនិត្យមើលកាមេរ៉ាសុវត្ថិភាពនៅកាស៊ីណូ ណាហ្គាវើល”។
ស្ត្រីឈ្មោះ សុភា បានបញ្ជាក់ថា គាត់មិនបាននៅផ្ទះទេកាលពីខែមិថុនានោះ ដែលនៅពេលនោះ មានការអះអាងថា ក្មេងស្រីរងគ្រោះគឺជាកុមារកំព្រាមានផ្ទុកមេរោគអេដស៏ ដែលរស់នៅអង្គការក្ដីសង្ឃឹមថ្មីនៃកុមារកម្ពុជា ជាអង្គការក្រៅរដ្ឋាភិបាលនៅក្នុងខេត្តកំពង់ស្ពឺ បានទៅលេងជាមួយកូនស្រីរបស់ស្ត្រីឈ្មោះ សុភា ជាមិត្តភក្ដិរៀន ជាមួយគ្នានៅផ្ទះរបស់គាត់មុនពេលនាងបាត់ខ្លួនរយៈពេលពីរថ្ងៃ។
ពេលនាងត្រឡប់មកដល់អង្គការក្រៅរដ្ឋាភិបាលវិញ ក្មេងស្រីរូបនេះបានប្រាប់បុគ្គលិកថា នាងត្រូវបានគេនាំទៅផ្ទះបនមួយកន្លែងស្ថិតក្នុងសង្កាត់ទន្លេបាសាក់ រាជធានីភ្នំពេញ ហើយត្រូវបានគេរំលោភ ដែលក្រោយមកមានការបញ្ជាក់តាមរយៈការធ្វើកោសល្យវិច័យ។
ស្ត្រីឈ្មោះ សុភា បានប្រាប់តុលាការថា “ខ្ញុំមិននៅផ្ទះទេ នៅពេលក្មេងស្រីរងគ្រោះត្រូវគេនាំទៅទីនោះ។ ខ្ញុំកំពុងលេងល្បែងនៅកាស៊ីណូណាហ្គាវើល”។ តាមច្បាប់ប្រទេសកម្ពុជា វាជាការខុសច្បាប់ការ ដែលពលរដ្ឋខ្មែរទៅលេងល្បែងនៅកាស៊ីណូ។
លោក សុខ ផល្លា...
លោក ឱម យ៉ិនទៀង ត្រូវជនអនាមិកដាស់តឿនឲ្យបន្តតាមដានរឿងក្ដីពុករលួយរបស់មន្ត្រីពន្ធដារ
លោក ឱម យ៉ិនទៀង ប្រធានអង្គភាពប្រឆាំងអំពើពុករលួយរបស់រដ្ឋាភិបាលត្រូវបានជនអនាមិករំឭក ដាស់តឿននៅក្នុងលិខិតគ្មានកាលបរិច្ឆេទមួយឲ្យបន្តតាមដានការចោទប្រកាន់ពីបទពុករលួយប្រព្រឹត្តដោយមន្ត្រីពន្ធដារខណ្ឌមានជ័យ រាជធានីភ្នំពេញ ដែលបានបែកធ្លាយកាលពីឆ្នាំ២០១២ ប៉ុន្តែរហូតមកទល់ពេលនេះមិនទាន់មានវិធានការដាក់ទណ្ឌកម្មណាមួយនៅឡើយទេ។
ខណៈពេលដែលលិខិតនេះត្រូវបានបង្ហោះតាមគេហទំព័ររបស់អង្គភាពប្រឆាំងអំពើពុករលួយកាលពីថ្ងៃសុក្រ អង្គភាពនេះក៏បានបង្ហោះសេចក្ដីថ្លែងការណ៍អមមួយព្រមានស្ថាប័នប្រព័ន្ធផ្សព្វផ្សាយកុំឲ្យចុះផ្សាយលិខិតនេះម្ដងទៀត។
អង្គភាពប្រឆាំងអំពើពុករលួយបានសរសេរនៅក្នុងសេចក្ដីថ្លែងការណ៍របស់ខ្លួនលើកឡើងពីអ្នកសរសេរលិខិតអនាមិកនេះថា “អង្គភាពប្រឆាំងអំពើពុករលួយបានទទួលលិខិតមួយដែលរិះគន់ខ្ញុំ (ឱម យ៉ិនទៀង) ហើយអង្គភាពប្រឆាំងអំពើពុករលួយសុំជួយអ្នកសរសេរផ្សព្វផ្សាយលិខិតនេះ ដើម្បីកុំឲ្យអ្នកឯង រំខានយកលិខិតនេះទៅទូរទស្សន៍ហង្សមាស ដែលអាចបណ្ដាលឲ្យមានអ្នកដាក់ពាក្យប្ដឹងអ្នកឯង”។
អង្គភាពប្រឆាំងអំពើពុករលួយបានលើកឡើងនៅចុងបញ្ចប់នៃសេចក្ដីថ្លែងការណ៍របស់ខ្លួនថា “កុំផ្សព្វផ្សាយវាឡើងវិញ។ អ្នកដែលផ្សព្វផ្សាយវាឡើងវិញត្រូវទទួលខុសត្រូវដោយខ្លួនឯង”។
លិខិតនេះដែលចោទប្រកាន់លោក ឱម យ៉ិនទៀង ដឹងថា មន្ត្រីនៅការិយាល័យពន្ធដារខណ្ឌមានជ័យជាប់ពាក់ព័ន្ធនឹងអំពើពុករលួយនៅតាមស្ថានីយ៍ប្រេងឥន្ទនៈនានា ប៉ុន្តែមិនបានចាត់វិធានការតាមផ្លូវច្បាប់ទេ។
លិខិតនេះចោទប្រកាន់លោក...
Latest news
© 2021, ដេលី. All rights reserved.