TAG
paywall
សាលាដំបូងរាជធានីបើកសវនាការលើករណីចោទប្រកាន់នាយកក្រុមហ៊ុនពីបទរំលោភសេចក្តីទុកចិត្ត
កាលពីម្សិលមិញ សាលាដំបូងរាជធានីភ្នំពេញ បានចាប់ផ្តើមបើកសវនាការលើករណីចោទប្រកាន់នាយកក្រុមហ៊ុនមួយរូបពីបទរំលោភសេចក្តីទុកចិត្ត បន្ទាប់ពីបានប្រើប្រាស់ឈ្មោះរបស់ក្រុមហ៊ុនយកទៅដកប្រាក់កម្ចីពីធនាគារ។
ជនសង្ស័យឈ្មោះ គឹម មុំហេង អាយុ៤៨ឆ្នាំត្រូវបានចោទប្រកាន់ថា បានយកប្រាក់កម្ចីដោយប្រើឈ្មោះក្រុមហ៊ុនអាត្លង់ទិក ត្រេឌីន ខូអិលធីឌី (Atlantic Trading Co., Ltd.) ដែលជាក្រុមហ៊ុនមួយមានមូលដ្ឋាននៅប្រទេសអេមីរ៉ាតអារ៉ាប់រួម និងមានអាជីវកម្មលក់ប្រេងរំអិលរថយន្ត ហើយថែមទាំងបានយកប្រាក់ទាំងនោះទៅទិញរថយន្តមួយគ្រឿងដែលមានតម្លៃ១៥.០០០ដុល្លារ ដោយមិនបានជូនដំណឹងដល់សមាជិកក្រុមប្រឹក្សាភិបាលដទៃទៀតទេ។ ជនសង្ស័យឈ្មោះ មុំហេង បាននិយាយថា “ខ្ញុំសូមបដិសេធការចោទប្រកាន់នេះ ពីព្រោះខ្ញុំមិនបានធ្វើអ្វីខុសទេ”។
លោក ស វាសនា និងលោក អឹុង វណ្ណារិទ្ធ អនុប្រធានក្រុមប្រឹក្សាភិបាលក្រុមហ៊ុននេះបានដាក់ពាក្យបណ្តឹងទៅសាលាដំបូងរាជធានីភ្នំពេញ កាលពីថ្ងៃទី៣ ខែមីនា។ លោក វាសនា បានប្រាប់តុលាការថា លោកដឹងថា លោក មុំហេង បានបន្លំប្រើឈ្មោះរបស់ក្រុមហ៊ុន និងប្រើឯកសារក្រុមហ៊ុនដែលត្រូវបានគេលួចយកចេញ។
លោក វាសនា បានមានប្រសាសន៍ថា “យើងទាមទារសំណង២៣០.០០០ដុល្លារ ហើយសូមឲ្យតុលាការផ្តន្ទាទោសគាត់...។ គាត់បានប្រើក្រុមហ៊ុនដើម្បីទទួលបានប្រាក់កម្ចីពីធនាគារ ដើម្បីយកទៅទិញរថយន្ត គឺវាជាអំពើរំលោភបំពានលើគោលការណ៍របស់ក្រុមហ៊ុន”។
ប្រសិនបើរកឃើញថា ឈ្មោះ មុំហេង ពិតជាជាប់ពិរុទ្ធភាពមែននោះ ជនសង្ស័យរូបនេះត្រូវបានផ្តន្ទាទោសឲ្យជាប់ពន្ធនាគាររយៈពេលពីរឆ្នាំទៅប្រាំឆ្នាំ។ សាលក្រមនឹងត្រូវបានប្រកាសនៅថ្ងៃទី៦ ខែមីនា៕ សុធា
លោក សម រង្ស៊ី ចុះទៅជួបសំណេះសំណាលជាមួយអាជីវករនិងអ្នកគាំទ្របក្សនៅផ្សារទួលទំពូង
លោក សម រង្ស៊ី មេដឹកនាំគណបក្សសង្គ្រោះ ជាតិ បានចុះទៅជួបសំណេះសំណាល ជាមួយ អាជីវករនៅផ្សារទួលទំពូងស្ថិតក្នុងខណ្ឌចំការមន រាជធានីភ្នំពេញដ៏គួរឲ្យភ្ញាក់ផ្អើលកាលពីម្សិលមិញ ដោយលោកបានទិញត្រី និងបានផ្ដល់ប្រាក់ចំនួន២៥ដុល្លារដល់ស្ត្រីចំណាស់លក់សណ្ដែកដីម្នាក់ ដើម្បីជួយដល់មុខរបរតូចតាចរបស់គាត់។
លោក សម រង្ស៊ី បានមានប្រសាសន៍បន្ទាប់ពីការចុះទៅជួបសំណេះសំណាលនោះថា “ ខ្ញុំចង់ចុះទៅជួបសំណេះសំណាល ជាមួយអាជីវករដើម្បីស្វែងយល់ពីស្ថានភាពសេដ្ឋកិច្ច និងជីវភាពរស់នៅរបស់ពួកគាត់ ពីព្រោះពួកគាត់គឺជាអ្នកគាំទ្រគណបក្សសង្គ្រោះជាតិ”។
លោកបានមានប្រសាសន៍បន្ថែមថា “ ខ្ញុំមិនបានប្រាប់អាជ្ញាធរមូលដ្ឋានថា ខ្ញុំមានគម្រោងទៅទេ ពីព្រោះខ្ញុំបារម្ភថា ពួកគេនឹងព្យាយាមរារាំងខ្ញុំមិនឲ្យជួបជាមួយអ្នកគាំទ្រ។ ជារឿយៗពួកគេបានរំខានពួកយើងនៅពេលពួកយើងព្យាយាមជួបប្រជាពលរដ្ឋ”។
ទោះជាយ៉ាងណា ថ្វីបើមានកងកម្លាំងសន្តិសុខត្រូវបានដាក់ពង្រាយនៅច្រកចូលផ្សារក៏ដោយ ក៏លោក សម រង្ស៊ី បានជួបសំណេះសំណាលជាមួយអាជីវករដោយគ្មានបញ្ហាអ្វីឡើយ។
រូបភាពវីដេអូស្ដីពីការចុះទៅសំណេះសំណាលដែលបានបង្ហោះនៅក្នុងទំព័រហ្វេសប៊ុករបស់លោក សម រង្ស៊ី បង្ហាញពីមេដឹកនាំគណបក្សប្រឆាំងរូបេនះត្រូវអម ការពារដោយអង្គរក្សមួយចំនួន ឈរថតរូបជាមួយ អាជីវករដែលមានទឹកមុខញញឹម និយាយជាមួយទារក ស្វាគមន៍ភ្ញៀវទេសចរដែលមានការភ្ញាក់ផ្អើល ហើយបានសាកសួរអំពីតម្លៃលក់ត្រីទៀតផង។
អ្នកស្រី តុល ភិន អាយុ៧៥ឆ្នាំ ដែលលក់សណ្ដែកដីមួយកញ្ច្រែងនៅផ្សារទួលទំពូងបាននិយាយថា លោក សម រង្ស៊ី បានឲ្យប្រាក់ខ្ញុំ២៥ដុល្លារដើម្បីពង្រីកមុខរបររបស់ខ្ញុំ។
អ្នកស្រីបាននិយាយថា “ខ្ញុំបានស្វាគមន៍រូបលោកនៅពេលលោកចុះមកទីនេះ ហើយខ្ញុំបានជូនពរឲ្យលោកមានអាយុវែង និងសូមឲ្យលោកជួយប្រជាពលរដ្ឋក្រីក្រ និងសង្គ្រោះប្រទេសជាតិ”។
កាលពីសប្ដាហ៍មុន លោក...
អ្នកភូមិមួយក្រុមព្រួតគ្នាវាយមន្ត្រីបីនាក់ដោយសារជម្លោះដីធ្លីនៅក្នុងស្រុកថ្មពួក ខេត្តបន្ទាយមានជ័យ
អ្នកភូមិមួយក្រុមមានគ្នា៥០នាក់ដែលពាក់ព័ន្ធក្នុងជម្លោះដីធ្លីមួយនៅក្នុងស្រុកថ្មពួកខេត្តបន្ទាយមានជ័យ បានយកដំបងវាយមន្ត្រីបីនាក់ និងហែកអាវរបស់ពួកគាត់កាលពីថ្ងៃព្រហស្បតិ៍ ពីព្រោះមន្ត្រីទាំងនេះបានធ្វើការរៀបចំសាងសង់ការិយាល័យមួយនៅលើដីមានជម្លោះនេះ។
លោក ផ្លេក វ៉ារី អភិបាលស្រុកបានមានប្រសាសន៍ថា អ្នកស្រុកទាំងនេះ ស្ថិតក្នុងចំណោមអ្នកស្រុក១០០គ្រួសារដែលបាននិងកំពុងតែមានជម្លោះជាមួយនិងក្រុមហ៊ុនមួយឈ្មោះក្រុមហ៊ុន លាង ប៊ូ ដែលត្រូវបានផ្តល់ដីសម្បទាន១.៨០០ហិកតាក្នុងឆ្នាំ២០០៦ដើម្បីធ្វើចម្ការដំឡូងមីមួយកន្លែង។ លោកបានឲ្យដឹងថា អាជ្ញាធរខេត្តថ្មីៗនេះបានបង្កើតក្រុមការងារមួយដើម្បីដោះស្រាយជម្លោះ និងបានចុះទៅដល់តំបន់នេះ ដើម្បីសាងសង់ការិយាល័យមួយសម្រាប់ខ្លួន។
លោក វ៉ារី បានមានប្រសាសន៍ថា “ នៅពេលយើងទៅរៀបចំការិយាល័យមួយសម្រាប់ក្រុមការងារដើម្បីធ្វើការជាមួយគ្រួសារអ្នកភូមិដែលរងប៉ះពាល់ អ្នកភូមិព្រួយបារម្ភ ពីព្រោះគេគិតថា យើងសាងសង់ការិយាល័យមួយសម្រាប់ក្រុមហ៊ុន”។ លោកឲ្យដឹងថា ការភាន់ច្រឡំនេះទីបំផុតកើតឡើង ពីព្រោះមន្ត្រីទាំងនេះត្រូវបានហែហមដោយបុគ្គលិកក្រុមហ៊ុន។
លោកបានថ្លែងថា អ្នកភូមិ៥០នាក់បានចាប់ផ្តើមឈ្លោះប្រកែកជាមួយមន្ត្រីបីរូបនេះកាលពីថ្ងៃព្រហស្បតិ៍ បន្ទាប់មកបានចាប់ផ្តើមយកដំបងវាយលើពួកគេ និងហែកអាវរបស់ពួកគេ។
លោកបានបន្ថែមថា “យើងគ្រោងនឹងបង្កើតជំនួបមួយនៅថ្ងៃស្អែករវាងប្រជាជនទាំងនោះ និងអភិបាលខេត្តដើម្បីពន្យល់ប្រាប់ពួកគេកំុឲ្យវាយអាជ្ញាធរទៀត”។
លោក កូ ស៊ុំ សារឿត អភិបាលខេត្តបានមានប្រសាសន៍ថា មន្ត្រីបរិស្ថានខេត្តពីររូបរងរបួសស្រាល បន្ទាប់ពីត្រូវបានវាយនឹងដំបង និងបានដាក់ពាក្យបណ្តឹងប្តឹងអ្នកភូមិទាំងនោះទៅនគរបាលរួចរាល់ហើយ។ លោកបានឲ្យដឹងថា “ខ្ញុំបានស្នើនគរបាលខេត្តកុំអាលបញ្ជូនពាក្យបណ្តឹងទៅតុលាការអី ពីព្រោះយើងនឹងត្រូវចរចាជាមួយអ្នកភូមិនៅថ្ងៃស្អែក”។
លោក ស៊ុំ សារឿត បានបន្ថែមថា ក្រុមហ៊ុន លាងប៊ូ ថ្មីៗនេះបានលក់ដីសម្បទានទៅឲ្យក្រុមហ៊ុនមួយទៀត ឈ្មោះ សិរីសោភ័ណ មានជ័យ។
អ្នកស្រី ទិញ សុភា អាយុ៤៤ឆ្នាំ ជាអ្នកភូមិម្នាក់ក្នុងចំណោមអ្នកភូមិដែលពាក់ព័ន្ធក្នុងជម្លោះនេះបានមានប្រសាសន៍ថា អ្នកស្រីបានកាន់កាប់ដីទទឹង២០មែ៉ត្រ និងបណ្តោយ២៤០ម៉ែត្ររបស់អ្នកស្រីចាប់តាំងពីឆ្នាំ១៩៩១មក ហើយក្រោយមកបានចំណាយប្រាក់៣២៥ដុល្លារដើម្បីឲ្យគេបោសសម្អាតគ្រាប់មីន។
អ្នកស្រី សុភា បានឲ្យដឹងថា អ្នកស្រុកមានមន្ទិលចំពោះការអះអាងថា ការសាងសង់ការិយាល័យនេះមានបំណងសម្រាប់ការប្រើប្រាស់របស់មន្ត្រីរដ្ឋាភិបាល។ អ្នកស្រី ទិញ សុភា បានមានប្រសាសន៍បន្ថែមទៀតថា “ នៅពេលនេះក្រុមហ៊ុនកំពុងតែប្រើអាជ្ញាធរដើម្បីផ្តល់សន្តិសុខ ដោយឲ្យពួកគេសាងសង់ការិយាល័យនៅលើដីមានជម្លោះនេះ ក៏ប៉ុន្តែ អ្នកស្រុកផ្សេងទៀតនិងខ្ញុំបានជំទាស់នឹងការសាងសង់នេះ៕
ប៊ុននី
អាជ្ញាធរចាប់ខ្លួនបុរសម្នាក់ពីបទព្យាយាមនាំពលករខ្មែរ១៥នាក់ទៅធ្វើការខុសច្បាប់នៅប្រទេសថៃ
នគរបាលប្រឆាំងការជួញដូរមនុស្សបានឲ្យដឹងកាលពីម្សិលមិញថា បុរសអាយុ៥០ឆ្នាំម្នាក់ត្រូវបានចាប់ខ្លួនក្នុងរាជធានីភ្នំពេញកាលពីថ្ងៃសៅរ៍ បន្ទាប់ពីបុរសរូបនេះបានព្យាយាមនាំមនុស្ស១៥នាក់ឆ្លងដែនទៅធ្វើការនៅក្នុងប្រទេសថៃ។
លោក កែវ ធា នាយនគរបាលប្រឆាំងការជួញដូរមនុស្សរាជធានីមានប្រសាសន៍ថា ហៃ សេង ត្រូវបានចាប់ខ្លួននៅពេលធ្វើដំណើរតាមរថយន្តវ៉ែនត្រង់ចំណុចផ្សារដើមគរ កន្លែងដែលគាត់ហៀបនឹងបញ្ជូនជនរងគ្រោះទាំងនោះពីរាជធានីភ្នំពេញទៅក្រុងប៉ោយប៉ែត ក្នុងខេត្តបន្ទាយមានជ័យ មុនពេលពួកគេទៅស្វែងរកការងារធ្វើដោយខុសច្បាប់នៅក្នុងទីក្រុងបាងកក។
ជនរងគ្រោះទាំងអស់ដែលមកពីខេត្តកំពង់ចាមនោះ បានចំណាយប្រាក់ឲ្យបុរសឈ្មោះ សេង នេះចំនួន ១៥០ដុល្លារដើម្បីនាំពួកគេទៅធ្វើការនៅក្រុមហ៊ុនស្ករសមួយ។ លោក កែវ ធា បានមានប្រសាសន៍ថា ជនរងគ្រោះទាំងអស់នេះត្រូវបានគេនាំទៅធ្វើការដោយខុសច្បាប់ ពីព្រោះពួកគេមិនឃើញមានឯកសារដែលអនុញ្ញាតឲ្យពួកគេចូលទៅរកការងារធ្វើនៅក្នុងប្រទេសថៃឡើយ។
លោក កែវ ធា មានប្រសាសន៍ថា “នគរបាលបានរកឃើញថា ជនរងគ្រោះទាំងនេះមិនមានសូម្បីតែលិខិតឆ្លងដែន ឬឯកសារផ្សេងៗទៀតឡើយ”។ លោកបានបន្ថែមថា “យើងនឹងបញ្ជូនបុរសឈ្មោះ សេង នេះទៅសាលាដំបូងរាជធានីភ្នំពេញនៅថ្ងៃច័ន្ទ ដើម្បីធ្វើការសាកសួរ...
ព្រឹត្តិការណ៍យុវជនដោយឡែកពីគ្នាពីរ ដែលស្វែងរកសន្តិភាព ត្រូវបានអាជ្ញាធរមូលដ្ឋានរារាំង
កាលពីព្រឹកថ្ងៃសៅរ៍ ក្រុមមន្ត្រីមូលដ្ឋាននៅក្នុងខណ្ឌ៧មករា បានឃាត់ខ្លួនយុវជនមួយក្រុមមានគ្នាប្រាំពីរនាក់ ដែលប៉ុនប៉ងធ្វើនូវអ្វីដែលពួកគេហៅថា “ការដើរក្បួនដើម្បីសន្តិភាព” មួយនៅតាមផ្លូវក្នុងរាជធានី។
ស្ត្រីចំនួនពីរនាក់ និងបុរសប្រាំនាក់ស្លៀកពាក់ស គឺជាសមាជិករបស់អង្គការមួយឈ្មោះថា ក្លឹបយុវជនខ្មែរមហានគរ ដែលផ្សព្វផ្សាយអំពីការគាំទ្រយុវជន និងយុត្តិធម៌សង្គម។
ពួកគេត្រូវបានចាប់ខ្លួន ខណៈដែលកំពុងដើរក្បួននៅក្នុងសង្កាត់បឹងព្រលិត នេះបើយោងតាមលោកស្រី តៅ មន្ថាចៅសង្កាត់បឹងព្រលិត ដែលបានឲ្យដឹងថា ពួកគេមិនបានស្វែងរកនិងទទួលបានការអនុញ្ញាតត្រឹមត្រូវពីអាជ្ញាធរមុនពេលចាប់ផ្តើមដង្ហែក្បួន។ លោកស្រីថ្លែងថា “ពួកគេបាននិយាយថា ពួកគេចង់ដើរក្បួនដូច្នោះដើម្បីស្វែងរកសន្តិភាព និងទប់ស្កាត់ការតវ៉ាមិនឲ្យកើតឡើង”។
លោកស្រីមានប្រសាសន៍ថា ពួកគេត្រូវបានដោះងវិញនៅព្រឹកថ្ងៃសៅរ៍នោះផងដែរ បន្ទាប់ពីអាជ្ញាធរមូលដ្ឋានធ្វើការអប់រំ និងឲ្យពួកគេចុះហត្ថលេខាលើឯកសារ ដោយសន្យាថាឈប់ដើរក្បួនដោយគ្មានការអនុញ្ញាតនៅពេលអនាគត។
លោក មឿន តុលា ប្រធានកម្មវិធីការងារនៅមជ្ឈមណ្ឌលអប់រំច្បាប់សម្រាប់សហគមន៍បានលើកឡើងថា យុវជនទាំងនេះមិនបានធ្វើអ្វីខុសទេ ហើយថា អាជ្ញាធររំលោភសិទ្ធិរបស់ពួកគេក្នុងការដើរដោយសេរីនៅក្នុងរាជធានី និងសម្តែងមតិរបស់ខ្លួន។
ក្នុងព្រឹត្តិការណ៍ដោយឡែកមួយកាលពីម្សិលមិញ យុវជនមួយក្រុមមានគ្នាប្រមាណ១៥០នាក់មកពីអង្គ ការក្រៅរដ្ឋាភិបាលឈ្មោះ កម្មវិធី អភិវឌ្ឍន៍ធនធានយុវជនបានធ្វើការតវ៉ាដោយមានការរាំច្រៀងមួយនៅតាមទីតាំងបីកន្លែងជុំវិញរាជធានីភ្នំពេញ ក៏មានឈ្មោះ សន្តិភាព ដែរ។
យុវជន អ៊ឹន ហេង អាយុ២២ឆ្នាំ បានរៀបចំយុវជនចំនួន៥០នាក់ដើម្បីរាំនៅទល់មុខវត្តបទុម។ ក្រុមផ្សេងទៀតទៅវត្តឧណ្ណាលោម និង ណាហ្គា ប្រ៊ិច (Naga Bridge) ក្បែរទីលានប្រជាធិបតេយ្យ។
យុវជន អ៊ឹនហេង ដែលមិនព្រមប្រាប់ឈ្មោះត្រកូល ដោយសារខ្លាចមានការសងសឹក ឲ្យដឹងថា ដំបូងនគរបាលនិងសន្តិសុខបានព្យាយាមបញ្ឈប់ក្រុមនេះមិនឲ្យរាំ ក៏ប៉ុន្តែត្រូវបានបញ្ចុះបញ្ចូលអនុញ្ញាតឲ្យពួកគេបន្តការរាំទៀត។
យុវជនរូបនេះបានឲ្យដឹងថា “ពួកគេមិនអនុញ្ញាតឲ្យយើងរាំនៅទីនេះទេ ពីព្រោះពួកគេនិយាយថា ប៉ះពាល់ដល់សណ្តាប់ធ្នាប់សាធារណៈ ប៉ុន្តែយើងព្យាយាមបញ្ចុះបញ្ចូលពួកគេថា យើងនឹងមិនធ្វើឲ្យប៉ះពាល់ដល់សណ្តាប់ធ្នាប់សាធារណៈទេ ហើយយើងគ្រាន់តែចង់ធ្វើលំហាត់ប្រាណប៉ុណ្ណោះហើយពួកគេក៏អនុញ្ញាត”។ ក្រុមដែលព្យាយាមរ៉ានៅណាហ្គាប្រ៊ីច មិនមានសំណាងដូច្នេះឡើយ។
លោក លី ប៊ុនធា អាយុ៣១ឆ្នាំ ដែលបានរៀបចំក្រុមរាំនៅទីនោះឲ្យដឹងថា អាជ្ញាធរបានប្រាប់ពួក គេថា ពួកគេកំពុងរំលោភការហាមប្រាមរបស់រដ្ឋាភិបាលមិនឲ្យមានការប្រមូលផ្តុំគ្នា។ លោក ប៊ុនធា បានបន្តថា “ពួកគេនិយាយថា ប្រសិនបើពួកយើងនៅតែបន្តរាំទៀតពួកគេនឹងចាប់ពួកយើងដាក់ក្នុងរថយន្តរបស់ពួកគេ”៕ ប៊ុននី
សហជីពគ្រោងនឹងចាប់ផ្តើមអនុវត្តដំណាក់កាលដំបូងនៃកូដកម្មទូទាំងប្រទេសនៅក្នុងថ្ងៃនេះ
យោងតាមមេដឹកនាំសហជីព បានឲ្យដឹងថា នៅថ្ងៃនេះ សម្ព័ន្ធសហជីព និងសមាគមសរុបចំនួន១៨ គ្រោងនឹងចាប់ផ្តើមដំណាក់កាលដំបូងនៃកូដកម្មទូទាំងប្រទេស នៅក្នុងវិស័យកាត់ដេរ ដោយបានអំពាវនាវឲ្យកម្មករនៅរោងចក្រប្រហែល១០០ឲ្យធ្វើពហិការមិនធ្វើការងារបន្ថែមម៉ោង។
ទោះបីជាមានការខិតខំប្រឹងប្រែងរបស់រដ្ឋាភិបាលក្នុងការទប់ស្កាត់កូដកម្មក៏ដោយ មេដឹកនាំសហជីពនានាដែលអះអាងថា ខ្លួនតំណាងឲ្យកម្មករជាង៣០០.០០០នាក់នៅក្នុងវិស័យកាត់ដេរ បានលើកឡើងថា ខ្លួននឹងបន្តចែកចាយខិតប័ណ្ណដើម្បីជូនដំណឹងដល់កម្មករថា កូដកម្មដែលរងការគំរាមកំហែងនេះនឹងត្រូវបានធ្វើឡើងនៅពាក់កណ្តាលខែមីនាឆ្នាំនេះ។
លោក អាត់ ធន ប្រធានសម្ព័ន្ធសហជីពប្រជាធិបតេយ្យកម្មកររោងចក្រកាត់ដេរនៅកម្ពុជា បានមានប្រសាសន៍ថា “យើងរំពឹងថា នឹងមានរោងចក្រប្រហែល១០០ នឹងចូលរួមធ្វើកូដកម្មនៅថ្ងៃស្អែក ដោយមិនធ្វើការងារបន្ថែមម៉ោង ខណៈដែលយើងកំពុងចែកចាយខិតប័ណ្ណ”។
លោក អាត់ ធន បានលើកឡើងបន្តទៀតថា ទោះបីជាអាជ្ញាធរមូលដ្ឋាន បានប៉ុនប៉ងទប់ស្កាត់សកម្ម ភាពចែកចាយខិតប័ណ្ណនៅក្រៅរោងចក្រមួយចំនួនក៏ដោយ ក៏សារនេះនៅតែត្រូវបានដឹងឮយ៉ាងច្រើនដែរ។
លោកបានមានប្រសាសន៍បន្ថែមទៀតថា “ទោះបីជាយើងប្រឈមនឹងបញ្ហាមួយចំនួន និងការរំខានពីអាជ្ញាធរក្នុងពេលកំពុងចែកចាយខិតប័ណ្ណក៏ដោយ ខិតប័ណ្ណទាំងនោះត្រូវបានចែកដល់ដៃកម្មករដោយជោគជ័យ”។ លោកបានបន្តថា “កម្មករមួយចំនួនបានទទួលសាររបស់យើងតាមរយៈហ្វេសប៊ុក វិទ្យុ និងប្រព័ន្ធផ្សព្វផ្សាយផ្សេងៗទៀត”។
កូដកម្មធ្វើឡើងដោយកម្មកររោងចក្រកាត់ដេរនៅលើកចុងក្រោយ ដែលបានចាប់ផ្តើមកាលពីខែធ្នូ និងបានចូលរួមជាមួយសកម្មភាពដើរហែក្បួនតវ៉ា និងបាតុកម្មនៅខាងក្រៅរោងចក្រនានានោះ ត្រូវបានបង្ក្រាបដោយហិង្សាពីសំណាក់កងកម្លាំងសន្តិសុខជាតិ កាលពីខែមករាឆ្នាំនេះ។ កម្លាំងកងរាជអាវុធហត្ថបានបាញ់អ្នកតវ៉ាប្រាំនាក់ឲ្យបាត់បង់ជីវិតកាលពីថ្ងៃទី៣ ខែមករា ហើយអ្នកតវ៉ា២១នាក់ផ្សេងទៀតនៅតែជាប់ឃុំនៅក្នុងពន្ធនាគារដែលមានការរឹតបន្តឹងសន្តិសុខ នៅខេត្តកំពង់ចាម។
មេដឹកនាំសហជីពបានឲ្យដឹងបន្ថែមទៀតថា ខ្លួនចង់បញ្ចប់សកម្មភាពចែកខិតប័ណ្ណយ៉ាងតិច២០០.០០០ សន្លឹកដល់កម្មករនៅទូទាំងប្រទេសនៅថ្ងៃស្អែក។ កាលពីសប្តាហ៍មុន សហជីពត្រូវបានពន្យារពេល បន្ទាប់ពីពួកគេជួបការលំបាកក្នុងការស្វែងរករោងពុម្ពដែលចង់បោះខិតប័ណ្ណទាំងនេះ។
ចំណុចទាមទារដែលត្រូវបានបញ្ជាក់នៅក្នុងញត្តិរបស់សហជីព រួមមានការដោះលែងទណ្ឌិត២១នាក់ ប្រាក់ឈ្នួលអប្បបរមា១៦០ដុល្លារ ការចាប់ខ្លួនកម្លាំងសន្តិសុខរបស់រដ្ឋដែលបានបាញ់សម្លាប់កូដករទាំងប្រាំនាក់ និងការលែងឲ្យមានបម្រាបរដ្ឋាភិបាលមិនឲ្យធ្វើបាតុកម្ម។
លោក វណ្ណ ស៊ូអៀង ប្រធានសមាគមរោងចក្រកាត់ដេរនៅកម្ពុជា ហៅកាត់ថា GMAC ត្រូវបានដកស្រង់សម្តីដែលបានលើកឡើងនៅក្នុងប្រព័ន្ធផ្សព្វផ្សាយក្នុងស្រុកកាលពីថ្ងៃសុក្រថា កូដកម្មដែលត្រូវបានគ្រោងនឹងធ្វើនៅខែក្រោយអាចបណ្តាលឲ្យរោងចក្រ៨០ភាគរយនៅក្នុងប្រទេសកម្ពុជាបិទទ្វារ ឬក៏ផ្លាស់ទីតាំងទៅក្រៅប្រទេស។
លោក វណ្ណ ស៊ូអៀង ត្រូវបានដកស្រង់សម្តីផ្ទាល់ដោយគេហទំព័រសារព័ត៌មាន ខេមបូឌា ហើរ៉ាល់ (Cambodia Herald) ដែលបានលើកឡើងថា “ប្រសិនបើក្រុមសហជីពនៅតែដឹកនាំសកម្មភាពតវ៉ា ដើម្បីទាមទារប្រាក់ឈ្នួលអប្បបរមាចំនួន១៦០ដុល្លារក្នុងមួយខែ សម្រាប់កម្មករ... រោងចក្រ៨០ភាគរយ នឹងបិទទ្វារ ហើយរោងចក្រមួយចំនួនទៀតនឹងផ្លាស់ទីតាំងទៅប្រទេសផ្សេងៗទៀត”។
លោក កែន លូ អគ្គលេខាធិការសមាគម GMAC បានបដិសេធមិនធ្វើអត្ថាធិប្បាយអំពីការព្យាកររបស់លោក វណ្ណ ស៊ូអៀង ក៏ប៉ុន្តែ លោកបានលើកឡើងថា កូដកម្មនៅខែមីនា នឹងជាការពិសោធន៍មួយទៅលើស្មារតីប្តេជ្ញារបស់ពួកគេ ក្នុងការចូលរួមក្នុងសកម្មភាពសមូ ហភាពដើម្បីទាមទារឲ្យមានការដំឡើងប្រាក់ឈ្នួលអប្បបរមា។ គួរបញ្ជាក់ថា ក្នុងកូដកម្ម កម្មករត្រូវបានគេប្រាប់ឲ្យនៅផ្ទះ។
លោក កែន លូ បានមានប្រសាសន៍ដូច្នេះថា “សហជីពអះអាងថា កម្មករទាំងអស់មិនសប្បាយចិត្ត និងគាំទ្រសហជីពឲ្យទាមទារប្រាក់ឈ្នួលអប្បបរមាខ្ពស់ជាងមុន។ យើងអះអាងថា ភាគច្រើននៃកម្មករពេញចិត្តនឹងអ្វីដែលពួកគេមាននាពេលបច្ចុប្បន្ន”។
លោកបន្ថែមទៀតថា “ដូច្នេះ ការនៅផ្ទះនឹងជាការពិសោធន៍ពិតប្រាកដមួយ។ វានឹងពិតជាធ្វើឲ្យអ្នករាល់គ្នាឃើញច្បាស់នៅអ្វីដែលកម្មករភាគច្រើនចង់បាន។ ហើយយើងក៏ព្រួយបារម្ភដែរ ប៉ុន្តែ នេះក៏ជាការពិសោធន៍ដ៏ល្អមួយដែលនឹងបញ្ជាក់ឲ្យឃើញថា ការពិត នរណាជាអ្នកទាមទាររឿងទាំងនេះ”។
អ្នកស្រី អ៊ុក សុខម៉ាលី អាយុ៤៣ឆ្នាំជាកម្មកររោងចក្រកាត់ដេរមកពីខេត្តស្វាយរៀង បានលើកឡើងអំឡុងពេលសម្រាកទទួលទានអាហារថ្ងៃត្រង់នៅខាងក្រៅសួនឧស្សាហកម្មកាណាឌីយ៉ា ក្នុងរាជធានីភ្នំពេញកាលពីម្សិលមិញថា កម្មករពិតជាត្រូវការប្រាក់ខែខ្ពស់ជាងមុន ដើម្បីឆ្លើយតបទៅនឹងបញ្ហាអតិផរណាដែលចេះតែកើនឡើង។
អ្នកស្រីបាននិយាយថា “យើងអាចធ្វើកូដកម្មរយៈពេលបីខែដោយមិនចាំបាច់ទៅធ្វើការ ពីព្រោះយើងមិនអាចរស់ក្នុងស្ថានភាពដែលតម្លៃទំនិញ និងថ្លៃជួលផ្ទះកើនឡើងយ៉ាងលឿនបែបនេះបានទេ”។ អ្នកស្រី សុខម៉ាលី បាននិយាយបន្តទៀតថា “ទោះជាអាជ្ញាធរគំរាមធ្វើបាបយើងក៏ដោយក៏ពួកគេមិនអាចមកបាញ់យើងនៅផ្ទះរបស់យើងបានឡើយ”៕ សុធា
(រាយការណ៍បន្ថែមដោយ ឃី សុវុឌ្ឍី និង Colin Meyn)
អ្នកស្រី ជា ខេង យល់ព្រមឲ្យបង្កើតគណៈកម្មការស៊ើបអង្កេតវិវាទដីធ្លី
យោងតាមអង្គការសិទ្ធិមនុស្សក្នុងស្រុកអាដហុក បានឲ្យដឹងថា អ្នកស្រី ជា ខេង ភរិយារបស់លោក ស៊ុយ សែម រដ្ឋមន្ត្រីក្រសួងរ៉ែ និងថាមពល បានយល់ព្រមលើការបង្កើតគណៈកម្មការមួយដើម្បីស៊ើបអង្កេតអំពីកម្មសិទ្ធិដីទំហំ១៤៥ហិកតានៅក្នុងខេត្តកំពង់ឆ្នាំង ដែលមានវិវាទចាប់តាំងពីឆ្នាំ២០០៧មក។
យោងតាមលោក សំ ចាន់គា អ្នកសម្របសម្រួលអង្គការសិទ្ធិមនុស្សអាដហុកប្រចាំខេត្តកំពង់ឆ្នាំង បានឲ្យដឹងថា អំឡុងកិច្ចប្រជុំជាមួយអង្គការសិទ្ធិមនុស្សអាដហុក កាលពីថ្ងៃទី៧ ខែកុម្ភៈ អ្នកស្រី ជា ខេង បានផ្ដល់ឯកសារជាច្រើនដោយបង្ហាញថា ក្រុមហ៊ុន KDC International ជាក្រុមហ៊ុនកសិពាណិជ្ជកម្មដែលអ្នកស្រីបានកាន់កាប់នោះបានចំណាយប្រាក់៧០.០០០ដុល្លារកាលពីឆ្នាំ២០០៧ សម្រាប់ដីទំហំជាង៦០០ហិកតា នៅក្នុងឃុំតាជេស ស្រុកកំពង់ត្រឡាច ដែលរួមទាំងតំបន់ដែលមានវិវាទនេះផង។
លោក សំ ចាន់គា បានមានប្រសាសន៍ថា “អំឡុងកិច្ចប្រជុំដែលសម្របសម្រួលដោយ លោកមេឃុំ អ្នកស្រី ជា ខេង បានបង្ហាញឯកសារទាំងអស់ដល់ពួកយើងដើម្បីបញ្ជាក់ពីកម្មសិទ្ធិស្របច្បាប់របស់អ្នកស្រីលើដីដែលមានវិវាទនេះ។ លោក សំ ចាន់គា បានមានប្រសាសន៍បន្ថែមទៀតថា អ្នកស្រី ជា ខេង អះអាងថា អ្នកស្រី បានបរិច្ចាគដីទំហំ១០០ហិកតាដល់គ្រួសារក្រីក្ររួចហើយ។ លោកបានមានប្រសាសន៍ថា “ប៉ុន្តែអ្នកស្រីមិនយល់ថា តើហេតុអ្វីបានជាដីនេះនៅតែមានវិវាទ”។
លោកបានបន្ថែមថា អ្នកស្រី ជា ខេង បានយល់ព្រមជាគោលការណ៍ចំពោះការបង្កើតគណៈកម្មការពិសេសដើម្បីកំណត់ថា អ្នកណាមានសិទ្ធិស្របច្បាប់លើដីដែលមានវិវាទនេះ។ គេមិនអាចទាក់ទងអ្នកស្រី ជា ខេង ដើម្បីសុំការអត្ថាធិប្បាយបានទេ។
លោក សួស ស៊ីផៃ មេឃុំតាជេស បានសម្ដែងសុទិដ្ឋិនិយមថា គណៈកម្មការថ្មីនេះប្រហែលជាអាចដោះស្រាយវិវាទដែលមានរយៈពេលប្រាំពីរឆ្នាំមកហើយនេះរវាងក្រុមហ៊ុន KDC International និងអ្នកភូមិ៥២គ្រួសារដែលរស់នៅក្នុងភូមិឡពាង។
លោក សួស ស៊ីផៃ បានមានប្រសាសន៍ថា “ខ្ញុំសង្ឃឹមថា កិច្ចព្រមព្រៀងនេះនឹងឈានដល់ចំណុចរួម។ក្រុមហ៊ុននេះមានឯកសាររឹងមាំផ្នែកច្បាប់ ប៉ុន្តែក្រុមអ្នកភូមិបានរស់នៅ និងធ្វើស្រែចម្ការនៅលើដីនេះ ដូច្នេះហើយបានជាបង្កើតគណៈកម្មការរួមមួយដើម្បីស៊ើបអង្កេត”។
លោក សួស ស៊ីផៃ បានមានប្រសាសន៍ថា អាជ្ញាធរខេត្តមិនទាន់បានយល់ព្រមលើការបង្កើតគណៈកម្មការ ដែលរួមមានតំណាងមកពីក្រុមហ៊ុន KDC អ្នកភូមិដែលត្រូវបានបណ្ដេញចេញ អាជ្ញាធរមូលដ្ឋាន និងអង្គការអាដហុកនេះនៅឡើយទេ។
វិវាទរវាងអ្នកស្រី ជា ខេង និងក្រុមអ្នកភូមិឡពាង បានតានតឹងខ្លាំងកាលពីខែមីនា ឆ្នាំមុន ដែលនៅពេលនោះអ្នកភូមិបានដុតជម្រកសង់អំពីឈើនៅលើដីដែលមានវិវាទនេះដែលពួកគាត់អះអាងថា សាងសង់សម្រាប់ទាហានបីនាក់ដែលក្រុមហ៊ុន KDC Interna-tional បានដាក់ឲ្យយាមដីនោះ។ មន្ត្រីយោធានៅពេលនោះ បានបដិសេធថា មិនបានបញ្ជូនទាហានទៅតំបន់ដែលមានវិវាទនោះទេ។
អ្នកស្រី ណាក់ កេន អាយុ២៩ឆ្នាំដែលបានបាត់បង់ដីស្រែទំហំជាង១ហិកតាទៅលើក្រុមហ៊ុន KDC នេះបាននិយាយថា ក្រុមអ្នកភូមិបានជ្រើសរើសតំណាងឲ្យចូលរួមនៅក្នុងគណៈកម្មការស៊ើបអង្កេតនោះហើយ។ អ្នកស្រីនិយាយថា “ប្រសិនបើវិវាទដីធ្លីនេះត្រូវបានដោះស្រាយក្រៅប្រព័ន្ធតុលាការដោយសន្តិវិធី វាជាការល្អប្រសើរបំផុត”។
សាលាដំបូងខេត្តកំពង់ឆ្នាំង បានបដិសេធម្ដងហើយម្ដងទៀតមិនធ្វើការស៊ើបអង្កេតពាក្យបណ្ដឹងដែលអ្នកភូមិរងការបណ្ដេញចេញបានប្ដឹងនោះទេ។ កាលពីឆ្នាំ២០១២ សាលាដំបូងខេត្តបានបង្គាប់ឲ្យលោក ចាត បាត អាយុ៧០ឆ្នាំបង់សំណងចំនួន២.៥០០ដុល្លារទៅឲ្យក្រុមហ៊ុនKDC ចំពោះការមិនបានឈប់ធ្វើស្រែចម្ការលើដីដែលមានវិវាទនេះ៕ សារុន
គ្រួសារជាច្រើនសុំជំនួយឲ្យនាំកូនស្រីរបស់ខ្លួនពីប្រទេសចិនមកវិញ
សាច់ញាតិរបស់ស្ត្រីខ្មែរវ័យក្មេងចំនួនបីនាក់ ដែលត្រូវគេជួញដូរក្នុងរូបភាពរៀប អាពាហ៍ពិពាហ៍ទៅប្រទេសចិន បានទាក់ទងមកអង្គការសិទ្ធិមនុស្សអាដហុកកាលពីថ្ងៃសុក្រ ដើម្បីសុំឲ្យជួយនាំកូនស្រីរបស់ពួកគាត់ដែលគេរំលោភបំពានមកវិញ នេះបើតាមការឲ្យដឹងពីអង្គការសិទ្ធិមនុស្សអាដហុក និងក្រុមគ្រួសារស្ត្រីរងគ្រោះ។
ស្ត្រីវ័យក្មេងទាំងបីនាក់ដែលសុទ្ធតែមក ពីស្រុកត្រាំកក់ ខេត្តតាកែវ ហើយក្នុងនោះមានពីរនាក់ជាបងប្អូនបង្កើតនឹងគ្នា បានធ្វើការនៅក្នុងរោងចក្រកាត់ដេរក្នុងរាជធានីភ្នំពេញ នៅពេលជនជួញដូរមនុស្សបានមកទាក់ទងពួកគេ ដោយសន្យាថា នឹងផ្តល់លក្ខខណ្ឌការងារល្អ និងប្រាក់ខែខ្ពស់នៅរោងចក្រមួយក្នុងប្រទេសចិន ឬក៏រៀបការជាមួយបុរសជនជាតិចិន។
លោក ម៉ក់ ដុប ឪពុករបស់ស្ត្រីរងគ្រោះម្នាក់ដែលមានឈ្មោះថា ជី រំដួល អាយុ២២ឆ្នាំក្នុងចំណោមស្ត្រីរងគ្រោះទាំងបីបានឲ្យដឹងថា គាត់ធ្លាប់ជំទាស់នឹងគម្រោងរបស់កូនស្រីគាត់ដែលមានបំណងទៅប្រទេសចិនកាលពីខែតុលា ដែរ ប៉ុន្តែ គាត់មិននឹកស្មានថា នាងត្រូវទទួលរងការរំលោភបំពានដោយសារប្តីជនជាតិចិនរបស់នាងសោះ។
លោក ម៉ក់ ដុប បាននិយាយថា “នាងបាននិយាយថា នាងត្រូវគេរំលោភបំពាន ដូចជាមិនអនុញ្ញាតឲ្យចេញក្រៅ ហើយត្រូវគេចាត់ទុកដូចជាអ្នកបម្រើអ៊ីចឹង”។ លោក ម៉ក់ ដុប បានលើកឡើងថា នៅពេល រំដួល ចាកចេញទៅប្រទេសចិនកាលពីខែតុលា នាងបានធ្វើដំណើរតាមយន្តហោះជាមួយស្ត្រីបួននាក់ផ្សេងទៀត។ ហើយក្រោយ មកនាងបានហៅទូរស័ព្ទពីប្រទេសចិនមកគាត់ដោយប្រាប់ថា នាងត្រូវគេធ្វើបាប។
លោកបាននិយាយថា “នាងយំហើយប្រាប់ខ្ញុំថា មេខ្លោងបាននាំពួកនាងទៅកាន់ផ្ទះមួយក្នុងប្រទេសចិន ជាទីដែលបុរសៗជនជាតិចិនបានឈាងចូលមើល ហើយនាំស្ត្រីម្នាក់ក្នុងចំណោមស្ត្រីទាំងអស់ទៅ”។លោកបានបន្ថែមថា លោកមិនដឹងថា កូនស្រីរបស់គាត់រស់នៅទីណាទេក្នុងប្រទេសចិន ហើយក៏មិនដឹងថា វាសនាស្ត្រីជនរងគ្រោះបួននាក់ផ្សេងទៀតទៅជាយ៉ាងណាដែរ។
លោក ម៉ក់ ដុប ក៏បាននិយាយដែរថា គាត់ជឿជាក់ថា កូនស្រីរបស់គាត់អាចត្រូវគេរំលោភបំពានលើសពីនេះទៅទៀត។ លោកបាននិយាយថា “ នាងបានអង្វរខ្ញុំឲ្យជួយនាំនាងមកវិញជាងមួយខែហើយ។ខ្ញុំគិតថា នាងត្រូវគេវាយដំ ឬក៏ត្រូវគេធ្វើបាបលើលពីនេះទៅទៀត បើមិនអ៊ីចឹងនាងមិនអង្វរឲ្យខ្ញុំជួយនាំនាងមកវិញឡើយ”។
នៅពេលដែលលោក ម៉ក់ ដុប បានទៅជូនដំណើរ កូនស្រីរបស់គាត់នៅឯអាកាសយានដ្ឋានអន្តរជាតិភ្នំពេញនាងបានយកប្រាក់៥០០ដុល្លារពីមេខ្លោងដែលជាស្ត្រីខ្មែរឲ្យទៅគាត់។ នៅក្នុងករណីដាច់ដោយឡែកមួយទៀតឪពុកម្តាយរបស់បងប្អូនស្រីពីរនាក់ ក្នុងនោះមានម្នាក់ឈ្មោះ ចន ស្រីអូន អាយុ២៥ឆ្នាំ និងម្នាក់ទៀតឈ្មោះ ចន សុខុម អាយុ២១ក៏បានមកសុំជំនួយពីអង្គការអាដហុកដែរដើម្បីឲ្យជួយនាំកូនស្រីដែលរៀបការជាមួយប្តីជន ជាតិចិនមកពីប្រទេសចិនវិញ។
ដំណើររឿងរបស់ជនរងគ្រោះទាំងនេះគឺវាស្រដៀងគ្នា។ ស្ត្រីជនរងគ្រោះទាំងពីរនាក់នេះត្រូវបានគេមកទាក់ទងនៅពេលកំពុងធ្វើការក្នុងរោងចក្រកាត់ដេរក្នុងរាជធានីភ្នំពេញ ហើយស្ត្រីរងគ្រោះទាំងពីរនាក់នេះបានឲ្យប្រាក់ចំនួន៥០០ដុល្លារក្នុងម្នាក់ទៅឲ្យឪពុកម្តាយរបស់ពួកគេពេលឡើងយន្តហោះទៅប្រ ទេសចិន។
អ្នកស្រី សែន ហៀង ម្តាយរបស់ជនរងគ្រោះទាំងពីរបាននិយាយកាលពីថ្ងៃសុក្រថា “កូនស្រីរបស់ខ្ញុំត្រូវអ្នករួមការងារក្នុងរោងចក្រ នៅរាជធានីភ្នំពេញលួងលោមឲ្យទៅប្រទេសចិន ព្រោះគេគេប្រាប់ថា នៅទីនោះនឹងមានការងារល្អ”។
អ្្នកស្រី ហៀង បាននិយាយបន្ថែមថា “ពួក គេទាំងពីរនាក់ចង់ត្រឡប់មកប្រទេសកម្ពុជាវិញ។ កូនស្រីបងត្រូវគេចាក់សោជាប់ក្នុងផ្ទះ ហើយកូនស្រីប្អូនត្រូវប្តីរបស់នាងយកប្រាក់ខែទាំងអស់ ហើយចាត់ទុកនាងដូចទាសករអ៊ីចឹង”។
គ្រួសាររបស់ជនរងគ្រោះទាំងពីរបានទាក់ទងអង្គការសិទ្ធិមនុស្សអាដហុកនៅក្នុងខេត្តរតនគិរី បន្ទាប់ពីបានឃើញសេចក្តីរាយការណ៍របស់កាសែតក្នុងស្រុក ដែលចុះផ្សាយអំពីស្ត្រីម្នាក់ដែលត្រូវគេជួញដូរឲ្យទៅរៀបការជាមួយប្តីជនជាតិចិន។
លោក អំ សំអាត អ្នកគ្រប់គ្រងបច្ចេកទេសនៃអង្គការសិទ្ធិមនុស្សក្នុងស្រុកលីកាដូបានឲ្យដឹងថា អង្គការរបស់លោកក៏រកឃើញ ថា ការជួញដូរមនុស្សទៅប្រទេសចិនមានចំនួនកើនឡើងដែរ។ លោក អំ សំអាត បានមានប្រសាសន៍ថា “ យើងបានរកឃើញថា ការជួញដូរស្ត្រីខ្មែរឲ្យទៅរៀបការជាមួយប្តីជនជាតិចិនមានការកើនឡើយខ្លាំងនៅក្នុងរយៈពេលពីរខែចុងក្រោយនេះ”។
លោក អំ សំអាត បានលើកឡើងថា ស្ត្រីខ្មែរវ័យក្មេងមកពីគ្រួសារអ្នកក្រីក្រជាធម្មតាតែងតែត្រូវគេលួងលោមឲ្យទៅប្រទេស ចិន ព្រោះគេសន្យាថា នឹងផ្តល់ការងារដែលមានប្រាក់ខែខ្ពស់នៅក្នុងវិស័យកាត់ដេរ ឬក៏ត្រូវរៀបការជាមួយបុរសជនជាតិចិនដែលមានទ្រព្យសម្បត្តិច្រើន អាចជួយពួកគេឲ្យមានលទ្ធភាពចិញ្ចឹមគ្រួសារទាំងមូលរបស់ពួកគេនៅក្នុងប្រទេសកម្ពុជា។
លោកបានមានប្រសាសន៍ថា “បន្ទាប់ពីរៀបការរួច ជនរងគ្រោះភាគច្រើនតែងតែរងទារុណកម្ម និងត្រូវប្តីជនជាតិចិនរបស់ពួកគេរំលោភបំពានផ្លូវភេទ ហើយនៅក្នុងករណីខ្លះស្ត្រីជនរងគ្រោះត្រូវបានគេជួញដូរឲ្យធ្វើជាស្ត្រីបម្រើផ្លូវភេទទៀតផង”។
ក្រសួងមហាផ្ទៃបានចាប់ខ្លួនជនជួញដូរមនុស្ស២០នាក់ ហើយបានជួយសង្គ្រោះ ជនរងគ្រោះដែលគេជួញដូរទៅប្រទេសចិនបាន ៣៥នាក់ កាលពីឆ្នាំ២០១៣ ៕ ស៊ុយឈាង
ផ្ទុះគ្រាប់កាំភ្លើងត្បាល់មួយគ្រាប់នៅក្នុងស្រុកបវេលខេត្តបាត់ដំបងបណ្តាលឲ្យកុមារពីរនាក់ស្លាប់
នគរបាលបាននិយាយកាលពីម្សិលមិញថា កុមារពីរនាក់បានស្លាប់នៅក្នុងស្រុកបវេល ខេត្តបាត់ដំបង កាលពីថ្ងៃសុក្រ នៅពេលគ្រាប់កាំភ្លើងត្បាល់មួយគ្រាប់ដែលពួកគេកំពុងលេងនោះបានផ្ទុះ។
លោក ម៉ី គឹមសាន នាយនគរបាលព្រហ្មទណ្ឌស្រុកបវេល បានមានប្រសាសន៍ថា ក្មេងប្រុសឈ្មោះ រឿន រិទ្ធ និងក្មេងស្រីឈ្មោះ ហ៊ុន ណារិន ដែលមានអាយុ៧ឆ្នាំដូចគ្នា បានឃើញគ្រាប់កាំភ្លើងត្បាល់កប់ក្នុងដីនៅក្នុងឃុំខ្នាចរមាស ហើយបានស្លាប់ភ្លាមៗនៅពេលគ្រាប់នេះផ្ទុះឡើង។
លោកបានបន្ថែមថា “សាកសពរបស់ជនរងគ្រោះត្រូវបានឆេះរោលពេញខ្លួន”។ លោកបានមានប្រសាសន៍ថា ជារឿយៗក្មេងៗតែងតែរត់លេងនៅក្នុងតំបន់នោះ ដែលគេមានគម្រោងអភិវឌ្ឍជាច្រើនឆ្នាំមកហើយ ប៉ុន្តែបន្ទាប់មកតំបន់នោះត្រូវទុកឲ្យនៅទំនេរ។
លោក គឹមសាន បានមានប្រសាសន៍ថា “យើងកំពុងព្យាយាមស្វែងរកថា តើគ្រាប់កំាភ្លើងត្បាល់នេះមានប្រភពមកពីណា”។ យោងតាមមេឃុំអូរអណ្ដូង បានឲ្យដឹងថា នៅក្នុងករណីដាច់ដោយឡែកមួយទៀតនៅក្នុងខេត្តប៉ៃលិន កសិករម្នាក់បានរងរបួសនៅក្នុងការផ្ទុះមីនប្រឆាំងរថក្រោះនៅក្នុងស្រុកសាលាក្រៅកាលពីថ្ងៃសុក្រ។
លោកមេឃុំ ហ៊ឹង ក្លឿ បានមានប្រសាសន៍ថា “ ជុំ សុខលី អាយុ២៩ឆ្នាំកំពុងភ្ជួរស្រែរបស់គាត់នៅម៉ោងប្រហែល១០និង៣០នាទីព្រឹកថ្ងៃសុក្រ ស្រាប់តែគាត់បានប៉ះមីនប្រឆាំងរថក្រោះ”។ លោក ហុឹង ក្លឿ បាន មានប្រសាសន៍ថា “អំបែងគ្រាប់បានត្រូវគាត់ចំកញ្ចឹងកនិងដៃផ្នែកខាងក្រោយ”។ លោកបានបន្ថែមថា កសិកររូបនេះត្រូវបានបញ្ជូនទៅព្យាបាលនៅមន្ទីរពេទ្យបង្អែកខេត្ត។
លោក កែវ ពូ អ្នកសម្របសម្រួលមជ្ឈមណ្ឌលសកម្មភាពកំចាត់មីនកម្ពុជាប្រចាំខេត្តប៉ៃលិនបានមានប្រសាសន៍ថា បន្ទាប់ពីលោកឮហេតុការណ៍នេះលោកបានបញ្ជូនបុគ្គលិកមួយក្រុមឲ្យទៅពិនិត្យមើលតំបន់ដែលមានឧបទ្ទវហេតុកើតឡើងនោះ។
លោកបានមានប្រសាសន៍ថា “មន្ត្រីរបស់យើងបានរកឃើញយុទ្ធភណ្ឌមិនទាន់ផ្ទុះប្រាំគ្រាប់ទៀត”។ លោ កបានបន្ថែមថា រហូតមកទល់ពេលនេះនៅឆ្នាំនេះ មនុស្សប្រាំបីនាក់ហើយបានរងរបួសដោយសារយុទ្ធភណ្ឌមិនទាន់ផ្ទុះនៅក្នុងខេត្តនេះ។
យោងតាមតួលេខរបស់មជ្ឈមណ្ឌលសកម្មភាពកំចាត់មីនកម្ពុជាបង្ហាញថា មនុស្ស២២នាក់បានស្លាប់និង១១១នាក់រងរបួសដោយសារគ្រាប់មីន និងយុទ្ធភណ្ឌមិនទាន់ផ្ទុះកាលពីឆ្នាំមុន ។ ចាប់តាំងពីការដួលរលំរបបខ្មែរក្រហមក្នុងឆ្នាំ១៩៧៩មក គ្រាប់មីននិងយុទ្ធភណ្ឌមិនទាន់ផ្ទុះបានសម្លាប់ប្រជាជនខ្មែរជាង១៩.០០០នាក់ និងរបួសប្រហែល៤៥.០០០នាក់”៕ សារុន
ក្រឡាបញ្ជីតុលាការខេត្តស្វាយរៀង ត្រូវបានចាប់ខ្លួននិងចោទប្រកាន់
ព្រះរាជអាជ្ញាឲ្យដឹងកាលពីម្សិលមិញថាសាលាដំបូងខេត្តស្វាយរៀងបានចោទប្រកាន់និយោជិតមា្នក់ក្នុងចំណោមនិយោជិតរបស់ខ្លួនពីបទប្រព្រឹត្តអំពើពុករលួយ បន្ទាប់ពីការស៊ើបអង្កេតក្រឡាបញ្ជីតុលាការម្នាក់ ដោយអង្គភាពប្រឆាំងអំពើពុករលួយរបស់រដ្ឋាភិបាល។
លោក ហ៊ឹង ប៊ុនជា ព្រះរាជអាជ្ញាអមសាលាដំបូងខេត្តបានមានប្រសាសន៍ថា ឈ្មោះម៉ុញ សារ៉ែន អាយុ៤៨ឆ្នាំ ត្រូវបានអង្គភាពប្រឆាំងអំពើពុករលួយចាប់ខ្លួនកាលពីថ្ងៃទី១៨ ខែ កុម្ភៈ និងត្រូវបានចោទប្រកាន់ពីបទទទួលសំណូកជិត២.០០០ដុល្លារពីអ្នកជួញដូរគ្រឿងញៀនម្នាក់ ជាថ្នូរនឹងការដោះលែង
រូបខ្លួន។
លោក ប៊ុនជា បានឲ្យដឹងថា “យើងបានចោទប្រកាន់គាត់ពីបទប្រព្រឹត្តអំពើពុករលួយពីព្រោះគាត់បានទទួលប្រាក់សំណូកចំនួន១.៩០០ដុល្លារពីអ្នកជួញដូរគ្រឿងញៀនម្នាក់ និងបានដោះលែងជនល្មើស”។ លោកមិនអាចផ្តល់សេចក្តីលម្អិតអំពីអ្នកជួញដូរគ្រឿងញៀន ឬករណីរបស់ជននេះឡើយ។
លោក សួស សាក់ហូ នាយនគរបាលពន្ធនាគារខេត្តបញ្ជាក់ថា លោក សារ៉ែន ពេលនេះកំពុងត្រូវឃុំខ្លួនជាបណ្តោះអាសន្នរង់ចាំការកាត់ក្តី។ យើងបានទទួលគាត់កាលពីថ្ងៃសុក្រ ម៉ោងប្រហែល៥ល្ងាច ជាមួយនឹងឯកសារចោទប្រកាន់គាត់ពីបទទទួលសំណូក”។
កាលពីខែតុលា លោក ឱម យ៉ិនទៀង ប្រធានអង្គភាពប្រឆាំងអំពើពុករលួយបានត្អូញត្អែរថា អង្គភាពប្រឆាំងអំពើពុករលួយត្រូវបានរិះគន់ជានិច្ចថាមិនបានពិនិត្យមើលរឿងក្តីឲ្យបានហ្មត់ចត់ ដោយលើកឡើងថា វាស្រេចតែតុលាការទេ ជាអ្នកចាត់ការ៕ ប៊ុននី
Latest news
© 2021, ដេលី. All rights reserved.