TAG
paywall
អាស៊ានបាននិយាយថា ដល់ពេលសហគមន៍អឺរ៉ុបដកទណ្ឌកម្មសេដ្ឋកិច្ចពីប្រទេសភូមាហើយ
នៅឯកិច្ចប្រជុំកំពូលអាស៊ាននៅក្នុងរាជធានីភ្នំពេញកាលពីម្សិលមិញមេដឹកនាំអាស៊ានបានជំរុញឲ្យមានការដកទណ្ឌកម្មសេដ្ឋកិច្ចមកលើប្រទេសភូមា ខណៈពេលដែលប្រធានាធិបតីភូមា បានធ្វើសេចក្ដីថ្លែងការណ៍ជាសាធារណៈអំពីការបោះឆ្នោតបំពេញបន្ថែមថ្នាក់ជាតិ របស់ខ្លួននាពេលថ្មីៗនេះដោយចាត់ទុកការបោះឆ្នោតនេះថាជា“ជោគជ័យដ៏ធំធេង”។
លោកម៉ាទីណាតាឡេហ្គាវ៉ារដ្ឋមន្ត្រីការបរទេសឥណ្ឌូណេសុី បានមានប្រសាសន៍ថា“អាស៊ានបានទាមទារដដែលៗអំពីការដកទណ្ឌកម្មសេដ្ឋកិច្ច បុ៉ន្តែពេលនេះល្មមដល់ពេលដកហើយ។ប្រសិនបើមិនដកពេលនេះទេតើពេលណា? ពេលខ្លះវាបានក្លាយជាវិធី
ដើម្បីធ្វើការតវ៉ាទៅហើយ។ខ្ញុំគិតថានេះជាវិធីមួយ ដើម្បីព្យាយាមធ្វើឲ្យមានឥទ្ធិពលដល់ព្រឹត្តិការណ៍នានា។ការដកទណ្ឌកម្មសេដ្ឋកិច្ចនេះនឹងបង្ហាញឲ្យឃើញសញ្ញាយា៉ងច្បាស់ថាបញ្ហានានា កំពុងតែផ្លាស់ប្ដូរហើយ”។
ខណៈពេលអាស៊ានបានគាំទ្រជាយូរមកហើយឲ្យមានការបញ្ចប់ការដាក់ទណ្ឌកម្មសេដ្ឋកិច្ចមកលើប្រទេសភូមានោះ ការផា្លស់ប្ដូរមិនច្បាស់លាស់ ពីសំណាក់អតីតរដ្ឋាភិបាលយោធា កាលពីឆ្នាំមុននោះបានធ្វើឲ្យភូមាសម្រេចបានជោគជ័យជាងពេលណាៗទាំងអស់។ ទោះបីជាសហរដ្ឋអាមេរិកនិយាយថាខ្លួនមិនអាចធ្វើការសន្យាបែបនេះភ្លាមៗក៏ដោយ ក៏សហភាពអឺរ៉ុប និងអូស្ត្រាលីបានលើកឡើងនាពេលថ្មីៗនេះ ដោយព្រលយពាក្យឲ្យដឹងថា ខ្លួនសុខចិត្តដកទណ្ឌកម្មទាំងនេះបន្ទាប់ពីមានការបោះឆ្នោតជាប្រវត្តិសាស្ត្រ កាលពីថ្ងៃអាទិត្យ។
លោកកៅគឹមហួនរដ្ឋលេខាធិការក្រសួងការបរទេសបានថ្លែងថា“យើងជឿជាក់ថាការដកទណ្ឌកម្មនេះនឹងរួមចំណែកដល់ដំណើរការលទ្ធិប្រជាធិបតេយ្យ និងការលូតលាស់ផ្នែកសេដ្ឋកិច្ច។មេដឹកនាំអាស៊ានក៏បានយល់ព្រមឲ្យមានការដកទណ្ឌកម្មលើប្រទេសភូមាទាំងអស់ផងដែរ”។
មានប្រសាសន៍យ៉ាងខ្លីទៅកាន់អ្នកយកព័ត៌មាន នៅខាងក្រៅកិច្ចប្រជុំកំពូលនេះលោកថេនសេនប្រធានាធិបតីភូមាបានថ្លែងថា ការបោះឆ្នោត ដែលគណបក្សគាំទ្រលទ្ធិប្រជាធិបតេយ្យបានដណ្ដើមអាសនៈស្ទើរតែទាំងអស់នេះគឺជាជោគជ័យមួយ។
នៅពេលសួរថា តើការបោះឆ្នោតនេះមានលក្ខណៈសេរី...
លោក ហ៊ុន សែន ជំរុញក្នុងកិច្ចប្រជុំកំពូលឲ្យអាស៊ានសាមគ្គីគ្នា
នាឱកាសបើកកិច្ចប្រជុំកំពូលអាស៊ានលើកទី២០ក្នុងរាជធានីភ្នំពេញ កាលពីម្សិលមិញ លោកនាយករដ្ឋមន្ត្រី ហ៊ុន សែន បានអំពាវនាវឲ្យបណ្តាមេដឹកនាំក្នុងតំបន់អាស៊ីអាគ្នេយ៍ កាត់បន្ថយគម្លាតរវាងប្រទេសអ្នកមាន និងប្រទេសក្រីក្រនៅក្នុងតំបន់ តាមរយ:ការដករបាំងពាណិជ្ជកម្ម ដោយធ្វើការវិនិយោគបន្ថែមទៀតទៅលើហេដ្ឋារចនាសម្ព័ន្ធ និងបង្កើនរំហូរការងារដោយសេរី។
ប៉ុន្តែចំណុចគួរឲ្យកត់សម្គាល់ ដែលលោក ហ៊ុន សែន មិនបានលើកឡើងនោះ គឺបញ្ហាវិវាទទឹកដីនៅក្នុងសមុទ្រចិនខាងត្បូង រវាងប្រទេសមួយចំនួនដែលជាសមាជិកអាស៊ាន និងប្រទេសចិនជាប្រធានបទមួយ ដែលត្រូវបានលើកមកពិភាក្សាយ៉ាងក្តៅគគុកនៅខាងក្រៅកិច្ចប្រជុំកំពូលនេះ និងនៅក្នុងកិច្ចប្រជុំលើកមុនៗ។
ទោះបីជាប្រទេសហ្វីលីពីន បានបង្ហាញពីបំណងរបស់ខ្លួន ចង់ពិភាក្សាពីបញ្ហាសមុទ្រចិនខាងត្បូងក្នុងកិច្ចប្រជុំកំពូលនេះក្តី ក៏កម្ពុជាឈរលើគោលជំហររបស់ខ្លួនជាប្រធានអាស៊ាន បាននិយាយថា បញ្ហានេះមិនស្ថិតក្នុងរបៀបវារៈនៃកិច្ចប្រជុំឆ្នាំនេះទេ។
លោក ហ៊ុន សែន បានលើកឡើងក្នុងសុន្ទរកថាបើកកិច្ចប្រជុំកំពូលអាស៊ាននៅឯការិយាល័យរបស់លោកក្នុងរាជធានីភ្នំពេញថា “ យើងត្រូវតែផ្តោតការយកចិត្តទុកដាក់ជាពិសេសលើការកាត់បន្ថយគម្លាតការអភិវឌ្្ឍក្នុងចំណោមប្រទេសជាសមាជិកអាស៊ានទាំងអស់”។
លោកបានមានប្រសាសន៍ទៅកាន់ឥស្សរជន និងគណ:ប្រតិភូរាប់រយរូបមកពីទូទាំងតំបន់ថា “ យើងគួរតែដាក់អាទិភាពទៅលើការបង្កើតសហគមន៍សេដ្ឋកិច្ចអាស៊ានឲ្យបានត្រឹមឆ្នាំ២០១៥ ដើម្បីប្រែក្លាយអាស៊ានឲ្យទៅជាទីផ្សារ និងមូលដ្ឋានផលិតកម្មតែមួយ ដែលមានរំហូរសេរីផ្នែកសេវាកម្ម ទំនិញការវិនិយោគនិងការងារជំនាញ”។
បញ្ហាមួយក្នុងចំណោមបញ្ហាធំៗបំផុតសម្រាប់តំបន់អាស៊ាន គឺត្រូវបិទគម្លាតការអភិវឌ្ឍរវាងប្រទេសអ្នកមានដូចជាសិង្ហបុរីនិងថៃ និងប្រទេសក្រីក្រ ដូចជាកម្ពុជា ភូមានិងលាវជាដើម។
អាស៊ានបានកំណត់គោលដៅឆ្នាំ២០១៥ដើម្បីអនុវត្តវិធានការនានាដែលធ្វើឲ្យមានរំហូរសេរីនៃទំនិញ ការវិនិយោគ ប្រជាជន និងមូលធន។ ប៉ុន្តែសេដ្ឋវិទូនានានិយាយថា ប្រទេសក្រីក្រអាចនឹងត្រូវគេមិនអើពើប្រសិនបើឧស្សាហកម្មរបស់ប្រទេសទាំងនោះ មិនអាចប្រកួតប្រជែងជាមួយឧស្សាហកម្មនៅក្នុងប្រទេសអភិវឌ្ឍន៍ជាច្រើនទៀតទេនោះ។
លោក ហ៊ុន សែន បានមានប្រសាសន៍ថា ដើម្បីឈានឲ្យដល់គោលដៅឆ្នាំ២០១៥ដែលអាស៊ានបានកំណត់នោះ បណ្តារដ្ឋមន្ត្រីក្រសួងហិរញ្ញវត្ថុគួរតែធ្វើការជិតស្និទ្ធជាមួយវិទ្យាស្ថានស្រាវជ្រាវសេដ្ឋកិច្ចសម្រាប់អាស៊ាននិងអាស៊ីខាងកើត ហៅកាត់ថា ERIA ដែលមានមូលដ្ឋាននៅក្នុងទីក្រុងហ្សាការតា។
លោកបានមានប្រសាសន៍ថា “ នៅក្នុងតំបន់ ទោះបីជាមានគម្លាតការអភិវឌ្ឍក្នុងចំណោមប្រទេសជាសមាជិកអាស៊ានត្រូវបានកាត់បន្ថយគួរឲ្យកត់សម្គាល់ក្តី ក៏វានៅតែធំនៅឡើយ។ បញ្ហានេះតម្រូវឲ្យយើងបង្កើនកិច្ចខំប្រឹងប្រែងទ្វេដង ដើម្បីជំរុញឲ្យមានកំណើនបន្ថែមទៀត”។
ឯកសារមួយរៀបរៀងដោយវិទ្យាស្ថានស្រាវជ្រាវសេដ្ឋកិច្ចសម្រាប់អាស៊ាន និងអាស៊ីខាងកើត ដែលត្រូវបានធ្វើបទបង្ហាញក្នុងកិច្ចប្រជុំស្តីពីសហគមន៍សេដ្ឋកិច្ចអាស៊ានកាលពីថ្ងៃច័ន្ទ បង្ហាញថា ប្រសិនបើបណ្តាប្រទេសជាសមាជិកអាស៊ានលើកលែងការយកពន្ធ កាត់បន្ថយពន្ធ និងកាត់បន្ថយការពន្យារពេលក្នុងការនាំចូលនាំចេញទំនិញនោះ ប្រទេសនានានឹងមានកំណើនផលិតផលក្នុងស្រុកសរុបច្រើន។
យោងតាមរបាយការណ៍នេះបានឲ្យដឹងថា ប្រសិនបើអនុវត្តវិធានការទាំងនោះ កំណើនផលិតផលក្នុងស្រុកសរុបរបស់កម្ពុជានឹងកើនឡើង៤,៤ភាគរយបន្ថែមទៀត ចន្លោះពីឆ្នាំ២០១១ដល់ឆ្នាំ២០១៥។ប្រទេសវៀតណាម នឹងទទួលបានកំណើនបន្ថែមចំនួន៣,៥ភាគរយ ហើយលាវ...
របាយការណ៍បានបង្ហាញថា អង្គការក្រៅរដ្ឋាភិបាលជាង៦៥ ភាគរយគ្មានសកម្មភាព
យោងតាមរបាយការណ៍មួយេចញផ្សាយ កាលពីម្សិលមិញ ដោយគណៈកម្មាធិការសហប្រតិបត្តិការដើម្បីកម្ពុជា ដែលជាបណ្ដាញរបស់អង្គការក្រៅរដ្ឋាភិបាលបានឲ្យដឹងថាអង្គការក្រៅរដ្ឋាភិបាលក្នុងស្រុក និងអន្ដរជាតិប្រមាណជា៦៥ភាគរយ ដែលបានចុះឈ្មោះរួចចំនួន៣.៤៩២ គ្មានសកម្មភាពឡើយ ដោយមានតែអង្គការក្រៅរដ្ឋាភិបាលប្រមាណ១.៣៥០ប៉ុណ្ណោះ ដែលមានសកម្មភាពនៅក្នុងប្រទេសនេះ។
របាយការណ៍ស្ដីពីការជួយអភិវឌ្ឍប្រទេសកម្ពុជាឆ្នាំ២០១១តាមរយៈអង្គការសង្គមស៊ីវិល ក៏លើកឡើងផងដែរថា ទឹកប្រាក់ប្រមាណ៥៥០លានដុល្លារ ត្រូវបានប្រើប្រាស់ក្នុងគម្រោងអភិវឌ្ឍប្រទេស តាមរយៈសកម្មភាព របស់អង្គការក្រៅរដ្ឋាភិបាល ដែលមានពលរដ្ឋកម្ពុជាប្រមាណ៥២.០០០នាក់ ទទួលបានការងារធ្វើ។
របាយការណ៍នេះលើកឡើងថា “ ចាប់តាំងពីពាក់កណ្ដាលទសវត្សរ៍ឆ្នាំ១៩៩០មក ចំនួនអង្គការសង្គមស៊ីវិល ក្នុងប្រទេសកម្ពុជាបានកើនឡើងយ៉ាងខ្លាំង។ បច្ចុប្បន្នមានអង្គការអន្ដរជាតិ និងក្នុងស្រុកចំនួន៣.៤៩២ បានចុះបញ្ជី ដោយធ្វើឲ្យអ្នកសង្កេតការណ៍ខ្លះនិយាយថា មានច្រើនហួសហេតុពេក ហើយមិនសមរម្យឡើយ”។
ទោះជាយ៉ាងណា របាយការណ៍នេះបន្ដលើកឡើងថា តួលេខរបស់រដ្ឋាភិបាលស្ដីពីចំនួនអង្គការក្រៅរដ្ឋាភិបាលនោះ “មិនស្របគ្នានឹងតួលេខបច្ចុប្បន្ននេះទេ”។
យោងតាមរបាយការណ៍នេះបានឲ្យដឹងថា អង្គការក្រៅរដ្ឋាភិបាលក្នុងស្រុកចំនួន ៧០ភាគរយដែលបានចុះបញ្ជីជាមួយក្រសួងមហាផ្ទៃ និងក្រសួងការបរទេស គ្មានសកម្មភាពឬ “ ឈប់ធ្វើសកម្មភាព”តែម្តង។អង្គការក្រៅរដ្ឋាភិបាលអន្ដរជាតិ ដែលចុះបញ្ជីរួចហើយ មានចំនួនប្រមាណ៣៧ភាគរយ ក៏គ្មានសកម្មភាពដែរ។
លោក លន់ បូរិទ្ធី នាយកប្រតិបត្តិរបស់គណៈកម្មាធិការសហប្រតិបត្តិការដើម្បីកម្ពុជា បានលើកឡើងអំឡុងការប្រកាសរបាយការណ៍ក្នុងរាជធានីភ្នំពេញថា “ យើងមិនជំទាស់ចំពោះតួលេខរបស់រដ្ឋាភិបាលទេ។ អ្វីដែលយើងកំពុងនិយាយនោះគឺយើង
ចង់បានចំនួនអង្គការក្រៅរដ្ឋាភិបាល ដែលមានសកម្មភាពពិតប្រាកដនៅក្នុងប្រទេសកម្ពុជា ដើម្បីបម្រើដល់ការអភិវឌ្ឍ”។
លោក បូរិទ្ធីបានមានប្រសាសន៍បន្ថែមថាវាមានសារៈសំខាន់ណាស់ ដែលក្រុមឯករាជ្យពីរដ្ឋាភិបាលអាចពិនិត្យតាមដានមើលសកម្មភាពរបស់អង្គការក្រៅរដ្ឋាភិបាល។
លោក បូរិទ្ធីបានលើកឡើងថា “ វាបង្ហាញថាយើងយកចិត្តទុកដាក់អំពីផ្នែកនេះ ហើយយើងមានឯកសារដើម្បីបំភ្លឺនូវអ្វីដែលយើងបានធ្វើ”។ លោកបានថ្លែងថា “ ពេលនេះយើងមានចំណុចត្រូវលើកឡើងមួយនៃចំនួនអង្គការក្រៅរដ្ឋាភិបាល ដែលបានចុះបញ្ជីរួចហើយ ដើម្បីប្រៀបធៀបទៅនឹងសកម្មភាពអង្គការក្រៅរដ្ឋាភិបាល និងសកម្មភាពដែលយើងកំពុងធ្វើវាជាការប៉ាន់ប្រមាណមិនត្រឹមត្រូវមកលើយើង”។
លោក កែវ ផល្លា អ្នកសម្របសម្រួលផ្នែកសេវាកម្មនៅឯគណៈកម្មាធិការសហប្រតិបត្តិការដើម្បីកម្ពុជា បានថ្លែងថា ការរកឃើញចំនួនប្រែប្រួលក្នុងចំណោមអង្គការក្រៅរដ្ឋាភិបាល ដែលមានសកម្មភាពនៅក្នុងប្រទេស អាចជួយធ្វើឲ្យសហគមន៍អង្គការក្រៅរដ្ឋាភិបាលអាចប្រកែកទៅនឹងការអនុវត្តសេចក្ដីព្រាងច្បាប់ដ៏ចម្រូងចម្រាស
មួយ ដែលនឹងដាក់កម្រិតលើអង្គការក្រៅរដ្ឋាភិបាលនៅក្នុងប្រទេសនេះ។
លោក ផល្លា បានថ្លែងថា “ ពេលនេះប្រសិនបើយើងប្រៀបធៀបចំនួនអង្គការក្រៅរដ្ឋាភិបាល ដែលគាំទ្រការជំទាស់របស់យើងទៅនឹងសេចក្តីព្រាងច្បាប់ស្ដីពីអង្គការក្រៅរដ្ឋាភិបាល កាលពីឆ្នាំទៅ អាចបង្ហាញឲ្យឃើញថា ពេលនេះមានអង្គការក្រៅរដ្ឋាភិបាលជាង៥០ភាគរយ”។ លោកបានថ្លែងថាសេចក្ដីប្រកាសនេះឲ្យដឹងថាមានអង្គការក្រៅរដ្ឋាភិបាលជាង៧០០បានចុះឈ្មោះជាហត្ថលេខី។
លោកឈិត សំអាតនាយកប្រតិបត្តិនៃវេទិកានៃអង្គការមិនមែនរដ្ឋាភិបាល(NGO Forum)បានថ្លែងថា របាយការណ៍នេះល្អទាំងអស់ ប៉ុន្ដែខ្វះសេចក្ដីលម្អិត អំពីប្រភពផ្ដល់មូលនិធិរបស់អង្គការក្រៅរដ្ឋាភិបាល។ លោក សំអាតបានថ្លែងថា“វាសំខាន់ណាស់ក្នុងការបង្ហាញប្រាប់រដ្ឋាភិបាលថា អង្គការសង្គមស៊ីវិល កំពុងដើរតួនាទីយ៉ាងសំខាន់បំផុតក្នុងការជួយដល់រដ្ឋាភិបាលកម្ពុជា។ យើងនឹងគាំទ្ររដ្ឋាភិបាលកម្ពុជាតាមរយៈផ្នែកផ្សេងៗ”។
លោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រីបានថ្លែងថាបើទោះជាលោកមិនបានអានរបាយការណ៍នេះក៏ដោយ ក៏គួរតែផ្ទៀងផ្ទាត់ព័ត៌មានសិន មុនពេលជឿលើតួលេខ។ លោក ស៊ីផាន បានបដិសេធចំពោះតួលេខនៃចំនួនអង្គការក្រៅរដ្ឋាភិបាល ដែលរបាយការណ៍នេះអះអាងថា កំពុងតែប្រតិបត្តិការនៅក្នុងប្រទេសកម្ពុជា។ លោកបានថ្លែងថា “ ពួកគេគួរតែពិនិត្យមើលចំនួនអង្គការក្រៅរដ្ឋាភិបាល ដែលចុះបញ្ជីនៅឯទីស្ដីការគណៈរដ្ឋមន្ត្រីផងដែរ។ ចំនួនទាំងនេះមិនផ្លូវការទេ”៕ប្រែសម្រួលដោយ ចេវប៊ុននី
សម្ពន្ធសហជីពកម្ពុជាសំណូមពរឲ្យថៅកែរោងចក្របើកប្រាក់ខែឲ្យកម្មករឲ្យបានមុនចូលឆ្នាំខ្មែរ
សម្ពន្ធសហជីពកម្ពុជា បានផ្ញើលិខិតមួយច្បាប់ជូនក្រសួងការងារ កាលពីម្សិលមិញ ដើម្បីស្នើសុំឲ្យម្ចាស់រោងចក្រទាំងអស់ក្នុងប្រទេសកម្ពុជា បើកប្រាក់ខែឲ្យកម្មករ កម្មការិនីឲ្យបានមុនបុណ្យចូលឆ្នាំខ្មែរប្រពៃណីជាតិ។
ជាធម្មតា ថៅកែរោងចក្រតែងតែបើកប្រាក់ខែឲ្យកម្មករ កម្មការិនីក្នុងរង្វង់ពីថ្ងៃទី៥ ដល់ថ្ងៃទី១០នៃខែនីមួយៗ សម្រាប់ការងារដែលខ្លួនបានធ្វើពេញមួយខែមុន។ប៉ុន្តែសម្ពន្ធសហជីពកម្ពុជា កំពុងតែស្នើសុំឲ្យកម្មករ កម្មការិនីអាចទទួលបានប្រាក់បន្ថែម សម្រាប់រយ:ពេល១៣ថ្ងៃ ដែលពួកគេធ្វើការរហូតដល់បុណ្យចូលឆ្នាំខ្មែរប្រពៃណីជាតិដែលនឹងចាប់ផ្តើមនៅថ្ងៃទី១៣ ទី១៤ និងទី១៥ខែមេសា។
លោកស្រី យ៉ាំងសោភ័ណ នាយិកាសម្ពន្ធសហជីពកម្ពុជា បានមានប្រសាសន៍ថា “ ខ្ញុំស្នើសុំឲ្យនិយោជកទាំងអស់ មេត្តាបើកប្រាក់ខែឲ្យកម្មករ កម្មការិនី សម្រាប់រយ:ពេលពីថ្ងៃទី១ដល់ថ្ងៃទី១៣ខែមេសា បន្ថែមពីលើប្រាក់ខែក្នុងខែមីនា ដើម្បីឲ្យពួកគេមានប្រាក់វិលទៅលេងស្រុកកំណើត”។
ដោយសារតែរថយន្តក្រុង រថយន្តតួរីសនិងរថយន្ដតាក់ស៊ី តែងតែឡើងថ្លៃ អំឡុងពិធីបុណ្យចូលឆ្នាំខ្មែរប្រពៃណីជាតិ លោកស្រីបានមានប្រសាសន៍ថា “ កម្មករ កម្មការិនីមួយចំនួនមានប្រាក់គ្រប់គ្រាន់សម្រាប់តែសោហ៊ុយធ្វើដំណើរទៅស្រុកប៉ុណ្ណោះ ហើយគ្មានប្រាក់ចាយវាយសម្រាប់ពិធីបុណ្យនេះទេ ដោយសារតែអ្វីៗសុទ្ធតែឡើងថ្លៃទាំងអស់”។
លោក អ៊ុំ មាន រដ្ឋលេខាធិការក្រសួងការងារ បានមានប្រសាសន៍ថា ក្រសួងមិនអាចតម្រូវឲ្យរោងចក្រ បើកប្រាក់ខែឲ្យកម្មករ កម្មការិនីមុនពេលបានទេ។លោកបានមានប្រសាសន៍ថា “ នៅក្នុងច្បាប់ការងារមិនតម្រូវឲ្យនិយោជក បើកប្រាក់ខែឲ្យកម្មករ កម្មការិនី សម្រាប់ការងារ ដែលពួកគេធ្វើមិនបានមួយខែនោះឡើយ។ប៉ុន្តែប្រសិនបើពួកគេចង់ពួកគេអាចធ្វើបាន”។
លោក វ៉ាន់ ស៊ូអៀង ប្រធានសមាគមរោងចក្រកាត់ដេរនៅកម្ពុជា ក៏បានមានប្រសាសន៍ដែរថា ការបើកប្រាក់ខែមុនពេលកំណត់ឲ្យកម្មករ កម្មការិនីសម្រាប់ប្រាក់ខែក្នុងខែមេសា អាចធ្វើទៅរួចឬក៏អត់នោះវាស្ថិតនៅលើការសម្រេចចិត្តរបស់រោងចក្រនីមួយៗ។លោកបានមានប្រសាសន៍ថា “ រោងចក្រនីមួយៗមានរំហូរសាច់ប្រាក់ផ្ទាល់ខ្លួន។ប្រសិនបើពួកគេអាចលៃលកបើកប្រាក់ខែមុនពេលកំណត់បាននោះ គួរធ្វើទៅចុះ ប៉ុន្តែបើគ្មានលទ្ធភាពទេ មិនចាំបាច់ធ្វើទេ ព្រោះគ្មានច្បាប់ណាចែងថា ពួកគេត្រូវតែបើកប្រាក់ខែឲ្យមុនពេលកំណត់ឡើយ”។
លោកយ៉ិនណាក់ ប្រធានរដ្ឋបាលនៅក្រុមហ៊ុនរោងចក្រកាត់ដេរ អិមអេនវីអន្តរជាតិ បានលើកឡើងថា រោងចក្ររបស់លោកនឹងបើកប្រាក់ខែឲ្យកម្មករ កម្មការិនីនៅថ្ងៃទី១០ខែមេសា សម្រាប់ប្រាក់ខែក្នុងខែមីនា ប៉ុន្តែការបើកប្រាក់ខែមុនពេលកំណត់ គឺមិនអាចទៅរួចឡើយ។ លោកបាននិយាយថា “ យើងមិនអាចបើកប្រាក់ខែសម្រាប់ខែមេសា ឲ្យមុនបានទេ ពីព្រោះកម្មករ កម្មការិនីមិនទាន់បានធ្វើការពេញមួយខែនៅឡើយទេ”៕
(រាយការណ៍បន្ថែមដោយ Claire Luke)
ប្រែសម្រួលដោយតែមសុខុម
គ្រួសាររងគ្រោះដោយគម្រោងស្តារផ្លូវដែក ដាក់ញត្តិដល់ធនាគារអភិវឌ្ឍន៍អាស៊ី
អ្នកភូមិជាង១៥០នាក់ ដែលត្រូវបានបណ្តេញពីខណ្ឌឫស្សីកែវ រាជធានីភ្នំពេញ ដើម្បីទុកផ្លូវឲ្យគម្រោងស្តារផ្លូវរថភ្លើងឡើងវិញ បានធ្វើពាក្យបណ្តឹងមួយកាលពីម្សិលមិញ ដាក់ជូនទៅធនាគារអភិវឌ្ឍន៍អាស៊ី ដែលជាស្ថាប័នហិរញ្ញវត្ថុមួយ ក្នុងចំណោមស្ថាប័នបានផ្តល់ហិរញ្ញវត្ថុច្រើនជាងគេចំនួនពីរសម្រាប់គម្រោងនេះ ដោយលើកឡើងថា ទីតាំងលំនៅថ្មីរបស់ពួកគេ មិនសមរម្យទេហើយនាំឲ្យពួកគេជំពាក់បំណុលទៀតផង។
អ្នកស្រីអឿនសារ៉នជាអ្នកភូមិមា្នក់ក្នុងចំណោមអ្នកភូមិ១៦៦នាក់ ដែលបានប្តឹងទៅធនាគារនេះបានលើកឡើងថា សំណងជាប្រាក់ចំនួន៤០០ដុល្លារ ដែលអ្នកស្រីបានទទួលសម្រាប់ការរើទៅនៅកន្លែងថ្មី ក្នុងសង្កាត់ត្រពាំងក្រសាំង ខណ្ឌពោធិ៍សែនជ័យ មិនគ្រប់គ្រាន់សម្រាប់ចំណាយលើការសាងសង់ផ្ទះថ្មីមួយខ្នងឡើយ តែថែមទាំងបានធ្វើឲ្យអ្នកស្រីពិបាកសងបំណុល ដែលចេះតែកើនឡើងមិនឈប់ឈរ។
អ្នកស្រី សារ៉ន អាយុ៣០ឆ្នាំ ដែលបានទៅរស់នៅលើទីតាំងថ្មីកាលពីខែកញ្ញាឆ្នាំ២០១១ បានជំពាក់បំណុលអ្នកចងការប្រាក់ចំនួន៤៥០ដុល្លារ រួចទៅហើយនោះបានមានប្រសាសន៍ថា “ យើងចង់បានសំណង៣.០០០ដុល្លារសម្រាប់គ្រួសារនីមួយៗ ពីព្រោះយើងគ្មានប្រាក់គ្រប់គ្រាន់ ដើម្បីសងការប្រាក់ទេហើយយើងបារម្ភថា អ្នកចងការប្រាក់នឹងរឹបអូសយកដីរបស់យើង”។
កាលពីសប្តាហ៍មុន ធនាគារអភិវឌ្ឍន៍អាស៊ីបានចេញផ្សាយលទ្ធផល នៃការសិក្សាមួយ ដែលបង្ហាញថា អត្រាសំណងត្រូវផ្តល់ឲ្យប្រជាពលរដ្ឋបាត់បង់ទីជម្រក ដោយគម្រោងស្តារផ្លូវដែក ដែលផ្តល់មូលនិធិដោយធនាគារអភិវឌ្ឍន៍អាស៊ី សហការជាមួយទីភ្នាក់ងារអូស្ត្រាលី សម្រាប់ការអភិវឌ្ឍអន្តរជាតិ គឺផ្អែកទាំងស្រុងលើតម្លៃក្នុងឆ្នាំ២០០៦ ហើយវាមិនស្របជាមួយតម្លៃអតិផរណាឡើយ។
យោងតាមអង្គការស្ពានទៅកាន់សន្តិភាព ដែលបានរិះគន់ចំពោះកញ្ចប់ថវិកាសម្រាប់ ចំណាយលើសំណងនោះ បានឲ្យដឹងថាសំណងផ្តល់ឲ្យគ្រួសារទាំងនោះ ជាមធ្យមគឺត្រឹម៧៥៦ដុល្លារ ប៉ុន្តែតម្លៃសាងសង់ផ្ទះឈើទំហំ៤គុណ៤ម៉ែត្រ នាពេលបច្ចុប្បន្ននេះ គឺកើនឡើងដល់ចំនួន១.៩២៥ដុល្លារ។លោក អៀង វុទ្ធី ប្រធានកម្មវីធីត្រួតពិនិត្យការអភិវឌ្ឍ របស់អង្គការស្ពានទៅកាន់សន្តិភាព បានមានប្រសាសន៍ថា “ផែនការនេះមិនស្របតាមតម្លៃទីផ្សារបច្ចុប្បន្ន
ទេ ហើយពេលនេះ អ្នកគ្មានការងារធ្វើ និងអ្នកគ្មានប្រាក់ចំណូល ត្រូវខ្ចីប្រាក់គេដើម្បីសង់ផ្ទះរបស់ខ្លួនឡើងវិញ។
រដ្ឋាភិបាល និងធនាគារអភិវឌ្ឍន៍អាស៊ីធ្លាប់បានធានាថា នៅទីនោះ មានឱកាសការងារគ្រប់គ្រាន់ ក៏ប៉ុន្តែតាមពិត វាមិនដូចការសន្យានោះទេ”។
នៅក្នុងសេចក្តីប្រកាសមួយ ធនាគារអភិវឌ្ឍន៍អាស៊ី បានលើកឡើងថា ខ្លួនកំពុងពិនិត្យលើបញ្ហា ដែលបានលើកឡើងនៅក្នុងការតវ៉ានេះ ដោយបន្ថែមថា កម្មវិធីសម្រាប់បង្កើតឱកាសរកប្រាក់ចំណូលសម្រាប់អ្នកភូមិកំពុងតែដំណើរការហើយ។
សេចក្្តីប្រកាសនេះ បានលើកឡើងថា“ប្រជាពលរដ្ឋទាំងនេះនឹងទទួលបានការបណ្តុះបណ្តាលផ្នែកជំនាញ និងទទួលបានទុនសម្រាប់ចាប់ផ្តើមមុខរបរ ព្រមទាំងទទួលបានការធានាពីបេឡាមូលនិធិសុវត្ថិភាពសង្គម សម្រាប់ពេលមានវិបត្តិនេះ និងមានអាសន្នផងដែរ។ ធនាគារអភិវឌ្ឍន៍អាស៊ី កំពុងតែពង្រឹងយន្តការ ដើម្បីជួយដោះស្រាយបញ្ហាដែលប៉ះពាល់ដល់ជីវភាពរស់នៅប្រចាំថ្ងៃ”។
លោកវុទ្ធី បានលើកឡើងថាក្នុងចំណោមប្រជាពលរដ្ឋ ដែលរងផលប៉ះពាល់ដោយសារគម្រោងស្តារផ្លូវដែក ជុំវិញរាជធានីភ្នំពេញ មានប្រជាពលរដ្ឋចំនួន៤.០០០នាក់ បានរើទៅកាន់ទីកន្លែងតាំងលំនៅថ្មីរួចហើយ៕
ប្រែសម្រួលដោយ ចេវប៊ុននី
ប្រជាពលរដ្ឋសហគមន៍បឹងកក់សំុអន្តរាគមន៍ពីលោក ហ៊ូ ជីនថាវ
កាលពីម្សិលមិញ នៅឯស្ថានទូតចិនក្នុងរាជធានីភ្នំពេញ មានអ្នកតំណាងប្រជាពលរដ្ឋប្រាំនាក់មកពីសហគមន៍បឹងកក់បានប៉ុនប៉ងដាក់ញត្តិមួយជូនប្រធានាធិបតី ហ៊ូ ជីនថាវ ដែលកំពុងបំពេញទស្សនកិច្ចនៅកម្ពុជាពាក់ព័ន្ធនឹងគម្រោងអភិវឌ្ឍន៍អចលនទ្រព្យ និងការបណ្ដេញពួកគាត់ចេញពីតំបន់បឹងកក់ ។
ស្ត្រីទាំងប្រាំនាក់ដែលត្រូវបានគេណែនាំឲ្យត្រឡប់ទៅលំនៅដ្ឋានវិញនោះ បានឲ្យដឹងថា នៅឯស្ថានទូត ពួកគាត់បានជួបមន្ត្រីនគរបាល១០នាក់ ដែលបានប្រាប់ពួកគាត់ថាស្ថានទូតបិទទ្វារមិនធ្វើការទេថ្ងៃនេះហើយបានប្រាប់ឲ្យពួកគាត់មើលសេចក្តីប្រកាសមួយដាក់នៅទ្វារចូល ដែលសេចក្តីប្រកាសនោះសរសេរថា ស្ថានទូតនឹងចូលធ្វើការវិញនៅថ្ងៃទី៥ខែមេសា។
ចេង ឡេ លេខាទី៣ ប្រចាំស្ថានទូតចិនបានបញ្ជាក់ថា ស្ថានទូតមិនធ្វើការទេ ពីព្រោះក្រុមមន្ត្រីកំពុងជាប់រវល់ជាមួយនឹងដំណើរទស្សនកិច្ចរបស់លោក ហ៊ូ ជីនថាវ ប៉ុន្តែបានបដិសេធថា មិនមែនបិទដើម្បីរារាំងអ្នកតវ៉ាមិនឲ្យបង្ហាញពីកង្វល់របស់ពួកគាត់នោះទេ។ លោក ហ៊ូ ជីនថាវ បានចាកចេញពីប្រទេសកម្ពុជាកាលពីម្សិលមិញ។
បន្ទាប់ពីលោកនាយករដ្ឋមន្ត្រី ហ៊ុន សែនបានលៃទុកដី១២,៤៤ហិកតាសម្រាប់គ្រួសារដែលត្រូវបានបណ្ដេញចេញពីបឹងកក់ដោយសារគម្រោងរបស់ក្រុមហ៊ុន ស៊ូកាគុ អុីនដែលមានលោក ឡៅ ម៉េងឃិន សមាជិកព្រឹទ្ធសភាមកពីគណបក្សប្រជាជន ជាប្រធាននិងឧបត្ថម្ភដោយក្រុមហុ៊នវិនិយោគទុនចិននោះតំណាងសហគមន៍ទាំងប្រាំរូបនេះ ថ្លែងថាមានបញ្ហាជាច្រើនមិនទាន់បានដោះស្រាយ។
ញតិ្តដែលមានស្នាមមេដៃអ្នកភូមិចំនួន២៩នាក់នេះ បានជំរុញឲ្យលោក ហ៊ូ ជិនថាវធ្វើយ៉ាងណាឲ្យប្រជាពលរដ្ឋ៩៤គ្រួសារដែលត្រូវបានបណ្តេញចេញពីដីទំហំ១២, ៤៤ហិកតានេះ ទទួលបានប័ណ្ណកម្មសិទ្ធិដី និងឲ្យមានការកំណត់ព្រំប្រទល់ដី១២,៤៤ហិកតានេះឲ្យបានច្បាស់លាស់។ អ្នកស្រី ទេព វន្នី តំណាងអ្នកភូមិសហគមន៍បឹងកក់និយាយថា “យើងចង់ឲ្យលោក ហ៊ូ ជីនថាវ ប្រធានាធិបតីនៃសាធារណរដ្ឋចិន ជួយជំរុញរដ្ឋាភិបាល ក្រុមហ៊ុនចិននេះនិងក្រុមហ៊ុន ស៊ូកាគុ អុីនឲ្យដោះស្រាយបញ្ហាដែលមិនទាន់ចប់នេះ"៕
ប្រែសម្រួលដោយហម សុផាណ្ណា
វិនិយោគិនបរទេសចង់ជ្រួតជ្រាបថែមទៀត អំពីឱកាសដាក់ទុនរកស៊ីក្នុងប្រទេសភូមា
បណ្តាវិនិយោគិនបរទេស ដែលមានចំណាប់អារម្មណ៍ខ្លាំង ចំពោះប្រទេសភូមានៅពេលមានការសន្យាថា ធ្វើកំណែទម្រង់នយោបាយ និងសេដ្ឋកិច្ចនោះ ប្រាកដជាកាន់តែមានចំណាប់អារម្មណ៍ កាលពីម្សិលមិញបន្ទាប់ពីមេដឹកនាំគណបក្សគាំទ្រលទ្ធិប្រជាធិបតេយ្យ គឺលោកស្រី អ៊ុង សាន ស៊ូជី បានទទួលជ័យជម្នះក្នុងការបោះឆ្នោតបំពេញអាសនៈសភា និងបន្ទាប់ពីមានព័ត៌មានថាធនាគារកណ្តាលរបស់ប្រទេសភូមាបានកែសម្រួលថ្លៃរូបិយប័ណ្ណ ចាត ធៀបនឹងរូបិយប័ណ្ណដុល្លារ ជាលើកដំបូង។
ប៉ុន្តែចំណាប់អារម្មណ៍កាន់តែខ្លាំងឡើងៗរបស់វិនិយោគិនចំពោះប្រទេសភូមា ឬហៅម្យា៉ងទៀតថា មីយ៉ាន់ម៉ា មានសន្ទុះខ្លាំងពេក ជាហេតុធ្វើឲ្យមានការលំបាកក្នុងការវាយតម្លៃឲ្យប្រាកដនិយម អំពីការត្រៀមខ្លួនរបស់ប្រទេសនេះ ក្នុងការផ្តល់ឲ្យម្ចាស់អាជីវកម្មនូវបរិយាកាសសន្តិសុខ ដែលពួកគេត្រូវការជាចាំបាច់សម្រាប់ការវិនិយោគ។
ដើម្បីឲ្យមានការយល់ដឹងកាន់តែច្បាស់អំពីបញ្ហានេះ និងអំពីបរិយាកាសវិនិយោគនៅក្នុងប្រទេសមីយា៉ន់មា៉ ក្រុមវិនិយោគិនឯកជន និងមន្ត្រីជាន់ខ្ពស់មកពីប្រទេសភូមាបានជួបពិភាក្សាគ្នា ក្នុងរាជធានីភ្នំពេញ កាលពីម្សិលមិញ ក្នុងកិច្ចប្រជុំកំពូលសហភាពអឺរ៉ុប-អាស៊ាន ស្តីពីវិស័យពាណិជ្ជកម្ម។
តើកិច្ចពិភាក្សានេះបានបញ្ចប់ទៅ ដោយទទួលបានលទ្ធផលបែបណា? តើប្រទេសភូមា បានត្រៀមខ្លួនហើយឬនៅ? ចម្លើយគឺហ្វីលីពីនជំទាស់ដោយបានលើកឡើងថា“ខ្លួនសង្ឃឹមថា ក្រមសីល ធម៌នេះនឹងត្រូវបានបង្កើតឡើង ហើយមិនមែនគ្រាន់តែជាទម្រង់បែបបទមួយទេ ប៉ុន្តែត្រូវតែជាឯកសារអាចផ្តល់សារៈសំខាន់ដល់ការអនុវត្ត”។
លោក កៅគឹមហួនរដ្ឋលេខាធិការ ក្រសួងការបរទេស បានគូសបញ្ជាក់ថាសំណើមួយនេះមិនទទួលបានការគាំទ្រនោះទេ។ លោក គឹមហួនបានលើកឡើងនៅក្រៅកិច្ចប្រជុំនោះថា “ ចំពោះអ្វី ដែលរដ្ឋមន្ត្រីក្រសួងការបរទេសហ្វីលីពីន បានស្នើសុំ គឺសម្រាប់បម្រើផលប្រយោជន៍ប្រទេសខ្លួនច្រើនជាង ប៉ុន្តែសម្រាប់អ្វីដែលបណ្តាប្រទេសជាសមាជិកអាស៊ានចង់បាននៅក្នុងកិច្ចព្រមព្រៀង គឺជារឿងមួយផ្សេង”។ លោកបានបន្តថា “ អ្វីដែលយើងចង់បានបំផុត គឺមិនត្រូវធ្វើឲ្យជម្លោះនៅសមុទ្រចិនខាងត្បូង ក្លាយទៅជារឿងអន្តរជាតិនោះទេ”។
នៅក្នុងសេចក្តីថ្លែងការណ៍រួមរបស់ចិន និងកម្ពុជា ដែលចេញកាលពីម្សិលមិញ បានលើកឡើងថា ប្រទេសទាំងពីរមិនបាននិយាយអំពីក្រមសីលធម៌ ដែលគេទន្ទឹងរង់ចំាជាយូរមកហើយនោះទេ។ តែផ្ទុយមកវិញសេចក្តីថ្លែងការណ៍នោះបានលើកឡើងថា “ ភាគីទាំងពីរ បានព្រមព្រៀងថា ប្រទេសចិននិងបណ្តាប្រទេសជាសមាជិកអាស៊ាន និងបន្តអត់ធ្មត់ដើម្បីដោះស្រាយបញ្ហាឲ្យសមស្រមតាមគោលការណ៍ និងស្មារតីនៃសេចក្តីប្រកាសអំពីក្រមសីលធម៌នេះ។
លោកអែនទ្រូខ័ក (Andrew Cock) អ្នកស្រាវជ្រាវមកពីវិទ្យាស្ថានសម្រាប់ការសិក្សាជាន់ខ្ពស់ ស្តីអំពីតំបន់អាស៊ីនៅមហាវិទ្យាល័យតូក្យូ បាននិយាយថា វាគឺជារឿងធម្មតាទេសម្រាប់ប្រធានកិច្ចប្រជុំកំពូលអាស៊ាន ក្នុងការកំណត់អំពីរបៀបវារៈទៅតាមការសម្រេចចិត្តរបស់ខ្លួន។
លោក ខ័ក បានបន្តទៀតថា “ សម្រាប់ប្រទេសកម្ពុជា ការសម្រេចចិត្តខ្លះ គឺម្យ៉ាងសម្រាប់បណ្តាប្រទេសជាសមាជិកអាស៊ាន ដែលត្រូវមកចូលរួមក្នុងកិច្ចប្រជុំ និងម្យ៉ាងទៀតគឺសម្រាប់រក្សាទំនាក់ទំនងល្អរបស់ខ្លួនជាមួយនឹងប្រទេសមហាអំណាច”៕គិតថានយោបាយអាស៊ាននេះមិនអាចធ្វើឲ្យខូចនូវទំនាក់ទំនងការទូតដ៏សំខាន់បំផុតរបស់ប្រទេសកម្ពុជានោះទេ”៕
ប្រែសម្រួលដោយ ស៊ា ស៊ុយឈាង
រដ្ឋាភិបាលឲ្យសាលាបិទទ្វាមួយរយៈ ដើម្បីជួយសម្រួលដល់ចរាចរណ៍របស់ប្រតិភូអាស៊ាន
យោងតាមច្បាប់ថតចម្លងនៃបទបញ្ជារបស់ក្រសួងអប់រំបានឲ្យដឹងថាក្រសួងអប់រំយុវជននិងកីឡា បានជូនដំណឹងឲ្យសាលានិងសាកលវិទ្យាល័យចំនួន១២នៅក្នុងរាជធានីភ្នំពេញបិទសាលារបស់ខ្លួនរយៈពេលបីថ្ងៃ ចាប់ពីថ្ងៃនេះទៅ ដើម្បីកាត់បន្ថយការកកស្ទះចរាចរណ៏អំឡុងពេលកិច្ចប្រជុំកំពូលអាស៊ានដែលនឹងចាប់ផ្តើមនៅថ្ងៃអង្គារ។
លោកអឹុមសិទ្ធីរដ្ឋមន្ត្រីក្រសួងអប់រំយុវជននិងកីឡាបានសរសេរនៅក្នុងសេចក្តីជូនដំណឹងថា “ ខ្ញុំសូមជម្រាបដល់សាកលវិទ្យាធិការឲ្យបានជ្រាបថាដើម្បីរក្សាសណ្តាប់ធ្នាប់ចរាចរណ៏សម្រាប់កិច្ចប្រជុំអាស៊ាននៅពេលខាងមុខនេះសាលាមួយចំនួនត្រូវបិទទ្វារជាបណ្តោះអាសន្នចាប់ពីថ្ងៃទី២ដល់ថ្ងៃទី៤ខែមេសា”។
សាកលវិទ្យាល័យភូមិន្ទភ្នំពេញអនុវិទ្យាល័យព្រះនរោត្តមសាលាបឋមសិក្សាហាំងងោ៉ស្រះចកនិងវិទ្យាល័យព្រះស៊ីសុវត្ថិ ស្ថិតក្នុងចំណោមសាលាទាំង១២ដែលត្រូវបានបញ្ជាឲ្យបិទជាបណ្តោះអាសន្នសម្រាប់កិច្ចប្រជុំនេះ។
លោករ៉ុងឈុនប្រធានសមាគមគ្រូបង្រៀនកម្ពុជាឯករាជ្យ បានមានប្រសាសន៍ថាលោកជំទាស់នឹងបទបញ្ជារបស់ក្រសួងឲ្យបិទសាលាជាបណ្តោះអាសន្ននេះ ហើយបានមានប្រសាសន៍ថាសាលាមួយចំនួនក្នុងចំណោមសាលាទាំងនេះមិនស្ថិតនៅជិតទីកន្លែងប្រជុំកំពូលអាស៊ានទេ។
លោកបានមានប្រសាសន៍ថា “ ក្រសួងអប់រំមិនបានផ្តល់ហេតុផលឲ្យបានច្បាស់លាស់ចំពោះការបិទទ្វារសាលាបណ្តោះអាសន្ននេះទេ។ខ្ញុំមិនគាំទ្រទេ ដែលក្រសួងអនុញ្ញាតឲ្យសាលាមួយចំនួនបិទទ្វារបែបនេះ”។
ទោះជាយ៉ាងណា សាលាដែលប្រឈមនឹងការបិទទ្វារនេះបានលើកឡើងថាការបិទទ្វារសាលារយៈពេលបីថ្ងៃនេះមានផលប៉ះពាល់តិចតួចបំផុត។លោក មុី សុមុន្នី ជាគ្រូបង្រៀននៅវិទ្យាល័យ ហ៊ុនសែន បុរី១០០ខ្នងថ្លែងថា “យើងដែលជាប្រទេសម្ចាស់ផ្ទះនៃកិច្ចប្រជុំនេះ ត្រូវតែរក្សាកិត្តិយស សន្តិសុខ និងសណ្តាប់ធ្នាប់សម្រាប់កិច្ចប្រជុំកំពូលអាស៊ាននេះ”។ លោកបានថ្លែងបន្ថែមថា “ សាលារបស់ខ្ញុំស្ថិតនៅតាមបណ្តោយមហាវិថីសហព័ន្ធរុស្សី ដែលជាផ្លូវសំខាន់សម្រាប់ការធ្វើដំណើររបស់គណៈប្រតិភូកិច្ចប្រជុំកំពូលអាស៊ាននេះ”៕
ប្រែសម្រួលដោយ ឌឿងសាវតា
អង្គការក្រៅរដ្ឋាភិបាលនៃបណ្តាប្រទេសអាស៊ានអះអាងថា សិទ្ធិរបស់ខ្លួនត្រូវបានរំលោភ
សមាជិកនៃវេទិកាប្រជាពលរដ្ឋអាស៊ានជាសម្ពន្ធអង្គការក្រៅរដ្ឋាភិបាលដែលបានមកជួបជុំគ្នាក្នុងរាជធានីភ្នំពេញកាលពីសប្តាហ៍មុននោះ បានប្រកាសកាលពីម្សិលមិញថា សិទ្ធិរបស់ពួកគាត់ត្រូវបានរំលោភបំពានបន្ទាប់ពីសិក្ខាសាលាចំនួនបួនលើកស្តីអំពីបញ្ហារសើបនោះត្រូវបានលុបចោលដោយសារតែគ្មានទីកន្លែងប្រជុំ។
នៅក្នុងសេចក្តីថ្លែងការណ៍របស់តំណាងឲ្យគណៈប្រតិភូជាង១.២០០នាក់មកពីបណ្តាប្រទេសជាសមាជិកអាស៊ាន អង្គការនេះបានលើកឡើងថា រដ្ឋាភិបាលអាស៊ានបានរំលោភសិទ្ធិរបស់ខ្លួនពាក់ព័ន្ធសេរីភាពនៃការបញ្ចេញមតិ និងសេរីភាពនៃការជួបជុំគ្នា ដោយការបដិសេធមិនព្រមអនុញ្ញាតឲ្យរៀបចំសិក្ខាសាលាចំនួនបួនលើក ផ្តោតលើបញ្ហាសិទ្ធិមនុស្ស ការបណ្តេញចេញជាទ្រង់ទ្រាយធំ បញ្ហាបរិស្ថាន និងបញ្ហានៅក្នុងប្រទេសភូមា ព្រមទាំងបានរារាំងគណៈប្រតិភូមកពីប្រទេសលាវមិនឲ្យចូលរួមវេទិកានេះទៀតផង។
សេចក្តីថ្លែងការណ៍នេះបានឲ្យដឹងថា"យើងកត់សម្គាល់ឃើញថា មានការខ្វែងគំនិតគ្នាយ៉ាងខ្លាំង ដែលកើតឡើងអំឡុង ប្រជុំតាមរយៈការដាក់កំហិតហួសហេតុមកលើសិទ្ធិសេរីភាពនៃការបញ្ចេញមតិ និងការជួបជុំរបស់អ្នកចូលរួមជាដើម"។ សេចក្តីថ្លែងការណ៍នេះបានបន្តទៀតថា"យើងជំរុញឲ្យរដ្ឋាភិបាលនៃបណ្តាប្រទេសជាសមាជិកអាស៊ាន សូមគោរពឯករាជភាពរបស់អាស៊ាន ជាជាងព្យាយាមប្រើអំណាចផ្តាច់ការមកលើការងារ តួនាទី និងអ្នកតំណាងរបស់ខ្លួន"។
សិក្ខាទាំងបួននេះត្រូវបានលុបចោលកាលពីថ្ងៃសុក្របន្ទាប់ពីម្ចាស់សណ្ឋាគារ ឡាក់គី ស្តារស្ថិតក្នុងខណ្ឌទួលគោក បានប្រាប់អ្នករៀបចំសិក្ខាសាលាថាបញ្ហាដែលគ្រោងនឹងលើកយកពិភាក្សានោះ គឺជាបញ្ហារសើបពាក់ព័ន្ធនឹងនយោបាយ។
បុគ្គលិកនៅសណ្ឋាគារនេះក៏បានប្រាប់វេទិកាប្រជាពលរដ្ឋអាស៊ានឲ្យដឹងផងដែរថា អាជ្ញាធរមូលដ្ឋានបានគាបសង្កត់ពួកគេកុំអនុញ្ញាតឲ្យរៀបចំវេទិកានេះឲ្យសោះ។
វេទិកានេះមិនត្រូវបានរៀបចំដោយរដ្ឋាភិបាលកម្ពុជាទេ ដែលផ្ទុយទៅវិញបានរៀបចំឡើងស្ទើរតែដូចគ្នាបេះបិទឈ្មោះ "វេទិកាប្រជាពលរដ្ឋអាស៊ាន" នៅសាលសន្និសីទចតុមុខ ដែលត្រូវបានឧបត្ថម្ភ និងចូលរួមដោយមន្ត្រីរដ្ឋាភិបាលនៅមុនកិច្ចប្រជុំកំពូលអាស៊ាននៅសប្តាហ៍ក្រោយនេះ។
រដ្ឋាភិបាលលាវបានរារាំងអង្គការក្រៅរដ្ឋាភិបាលនានាមិនឲ្យចូលរួមវេទិកាឯករាជ្យសម្រាប់ពលរដ្ឋអាស៊ាន ដោយបានបង្ខំពួកគេឲ្យទៅចូលរួមវេទិកា ដែលឧបត្ថម្ភដោយរដ្ឋាភិបាលវិញ។
មានតែអ្នកតំណាងមកពីវេទិកាដែលរៀបចំដោយរដ្ឋាភិបាលប៉ុណ្ណោះ នឹងត្រូវអញ្ជើញឲ្យទៅចូលរួមកិច្ចប្រជុំប្រចាំឆ្នាំរវាងថ្នាក់ដឹកនាំអាស៊ាននិងអង្គការសង្គមស៊ីវិល ដែលគ្រោងធ្វើនៅថ្ងៃអង្គារ។
លោកស្រីធីតាឃិះនាយិកាអង្គការក្រៅរដ្ឋាភិបាលក្នុងស្រុកឈ្មោះ សីលការ និងជានាយិកានៃគណៈកម្មាធិការរៀបចផែនការសម្រាប់វេទិកានេះបានមានប្រសាសន៍ថា"រដ្ឋាភិបាលនៃបណ្តាប្រទេសអាស៊ានទាំងនេះគួរទទួលខុសត្រូវចំពោះ ដោយការជ្រើសតាំងអ្នកតំណាងពីរនាក់ ហើយលូកដៃក្នុងដំណើរការរបស់សង្គមស៊ីវិលទៀត។ នេះឆ្លុះបញ្ចាំងឲ្យឃើញពីភាពគ្មានហេតុផល និងអសន្តិសុខ វាជាការជួបជុំគ្នាដ៏ធំ ហើយព័ត៌មានត្រូវផ្សាយចេញពីវេទិកា គឺជាបញ្ហាដែលថ្នាក់ដឹកនាំអាស៊ានអាចត្រូវប្រឈម"។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី កាលពីម្សិលមិញបានបដិសេធជាថ្មីម្តងទៀតចំពោះការលើកឡើងថា រដ្ឋាភិបាលជាអ្នកទទួលខុសត្រូវក្នុងការបិទសិក្ខាសាលាទាំងនេះ ហើយបានបន្ទោសលោកស្រី ធីតាឃិះ ថាជា "អ្នកបង្កបញ្ហា"ដែលបានប្រមូលអង្គការសង្គមស៊ីវិលក្នុងតំបន់ឲ្យមានការប្រឆាំងគ្នាទៅវិញទៅមក។
លោកផៃស៊ីផានបានមានប្រសាសន៍ថា"ប្រសិនបើពួកគេគិតថារដ្ឋាភិបាលជាសត្រូវរបស់ពួកគេនោះអ៊ីចឹងពួកគេមិនគួររស់នៅទីនេះទេ។ពួគគេគ្មានសិទ្ធិធ្វើពហិការអ្វីទាំងអស់ ពួកគេមិនគួរធ្វើដើម្បីតែផលប្រយោជន៍សង្គមស៊ីវិលសោះឡើយ"។
លោកស្រីពង្សឈីវហ្គិចនាយិកាអង្គការសិទ្ធិមនុស្សលីកាដូដែលបានចូលរួមវេទិការបស់លោកស្រីធីតាឃិះដែរនោះបានមានប្រសាសន៍ថាការបដិសេធមិនព្រមចូលរួមរបស់រដ្ឋាភិបាលក្នុងបំណងបង្អាក់វេទិកានេះគឺ "ជាការគិតដោយគ្មានសមហេតុសមផលឡើយ"។
លោកស្រីធីតាឃិះបានមានប្រសាសន៍ថាលោកស្រីនឹងបញ្ជូនអនុសាសន៍របស់ក្រុមអង្គការក្រៅរដ្ឋាភិបាលរបស់លោកស្រីព្រមទាំងខិតខំជំរុញឲ្យបានខ្លាំងក្លាជាងនេះថែមទៀត ដើម្បីការពារសិទ្ធិពលករចំណាកស្រុកលុបបំបាត់ការទន្ទ្រានយកដីធ្លីនិងការបណ្តេញចេញដោយបង្ខំហើយបើកដំណើរការព្រាងសេចក្តីថ្លែងការណ៍ស្តីពីសិទ្ធិសមនុស្សនៅក្នុងសមាគមន៍អាស៊ានផ្ញើទៅលេខាធិការដ្ឋានអាស៊ាននិងស្ថានទូតនានាក្នុងរាជធានីភ្នំពេញនៅថ្ងៃនេះ។ “ខ្ញុំមិនយល់ថាតើនឹងមានបញ្ហាឬទេ។យើងនឹងចាំមើលថា តើនឹងមានអ្វីកើតឡើង"៕ ប្រែសម្រួលដោយសោមសារុន
អ្នកភូមិនាំគ្នាបិទផ្លូវជាតិលេខ៧៦អា ដើម្បីតវ៉ាក្រុមហ៊ុនសម្បទានចំនួនបីនៅក្នុងខេត្តក្រចេះ
ក្រុមមន្ត្រីបាននិយាយកាលពីម្សិលមិញថា អ្នកតវ៉ាប្រមាណ៥០០នាក់បានដាក់របាំងបិទផ្លូវជាតិលេខ៧៦អាក្នុងស្រុកស្នួល ខេត្តក្រចេះ កាលពីថ្ងៃសៅរ៍ដើម្បីតវ៉ាចំពោះការបាត់បង់ដីស្រែចម្ការនិងផ្ទះរបស់ខ្លួន ដោយសារក្រុមហ៊ុនកសិ-ឧស្សាហកម្មចំនួន៣ទន្ទ្រានយក គឺក្រុមហ៊ុន សុវណ្ណឫទ្ធី ក្រុមហ៊ុនសំណាងអង្គរ និងក្រុមហ៊ុន ដាយ ណាមកម្ពុជា (Dai Nam Cambodia)។
ការតវ៉ាដោយសន្តិវិធីនេះបានរារាំងមិនឲ្យមានការធ្វើចរាចរណ៍ឆ្លងកាត់ផ្លូវជាតិនេះចាប់ពីថ្ងៃត្រង់ រហូតដល់ម៉ោង៧និង៣០នាទីយប់ ដែលនៅពេលនោះក្រុមបាតុករបានបញ្ឈប់ការបិទផ្លូវ បន្ទាប់ពីអាជ្ញាធរមូលដ្ឋានសន្យាដោះស្រាយបញ្ហាកើតទុក្ខមិនសុខចិត្តរបស់ប្រជាកសិករ។ លោក អ៊ុំ ភី ស្នងការរងនគរបាលខេត្តបានមានប្រសាសន៍ថា ចរាចរណ៍មានការរំខានតិចតួចប៉ុណ្ណោះ ពីព្រោះនគរបាលបានបើកផ្លូវមួយនៅកន្លែងបិទនោះ ព្រោះការបិទផ្លូវនេះធ្វើឲ្យស្ទះដល់ការដឹកជញ្ជូន។ “ គ្មានការស្ទះចរាចរណ៍ច្រើនទេ នៅពេលអ្នកភូមិបិទផ្លូវនោះ ពីព្រោះ យើងបានបើកផ្លូវមួយទៀតដើម្បីសម្រួលចរាចរណ៍”។
អ្នកតវ៉ាឈ្មោះ ហេងអូន អាយុ៤៨ឆ្នាំ បានមានប្រសាសន៍ថា អ្នកភូមិសម្រេចបិទផ្លូវជាតិនេះពីព្រោះមន្ត្រីមូលដ្ឋានមិនអើពើចំពោះការសុំឲ្យជួយអន្តរាគមន៍ក្នុងវិវាទដីរវាងប្រជាកសិកររាប់រយនាក់ និងក្រុមហ៊ុនទាំងបីនេះ ហើយការបិទផ្លូវកាលពីថ្ងៃសៅរ៍នេះគឺជាលើកទីបួនហើយ។ លោកបាន
មានប្រសាសន៍ថា “ យើងបានតវ៉ាឲ្យក្រុមហ៊ុនដែលបានចាប់យកដីរបស់យើង ប្រគល់លំនៅដ្ឋាន និងដីឲ្យយើងវិញ”។ លោកបានបន្ថែមថា ការតវ៉ាត្រូវបានបញ្ឈប់ បន្ទាប់ពីមន្ត្រីស្រុកស្នួល បានសន្យារៀបចំកិច្ចប្រជុំមួយដើម្បីពិភាក្សាអំពីការបាត់បង់ដីរបស់អ្នកភូមិទាំងនេះនៅថ្ងៃអង្គារ។
ទោះជាយ៉ាងណាលោកអុីវ សាភុំ អភិបាលស្រុកស្នួល បានថ្លែងថាកិច្ចប្រជុំនេះនឹងត្រូវធ្វើឡើង ដើម្បីកំណត់ថាតើអ្នកតវ៉ាប៉ុន្មាននាក់មានសិទ្ធិស្របច្បាប់ទាមទារដី ហើយលោកអភិបាលជឿថា មានអ្នកតវ៉ាមួយចំនួនតូចប៉ុណ្ណោះ ដែលមានសិទ្ធិទាមទារដី។
លោក សាភុំ បានថ្លែងថា “ ចំណោមបាតុករទាំងនោះ មានតែប៉ុន្មាននាក់ប៉ុណ្ណោះ ដែលរងប៉ះពាល់ដោយសារក្រុមហ៊ុនទាំងនេះ។ក្រុមហ៊ុនមានគោលការណ៍មួយដើម្បីដោះស្រាយវិវាទដីធ្លីជាមួយពួកគេ”។ លោកបានថ្លែងថា “ វាជាទង្វើខុសច្បាប់ដែលពួកគេតវ៉ាដោយការបិទផ្លូវជាតិលេខ៧៦អា និងបណ្តាលឲ្យស្ទះចរាចរណ៍”។លោក បានបន្ថែមថា មន្ត្រីថ្នាក់ស្រុកនិងថ្នាក់ខេត្ត នឹងស៊ើបអង្កេតការទាមទាររបស់អ្នកភូមិ៕
ប្រែសម្រួលដោយ...
Latest news
© 2021, ដេលី. All rights reserved.