28 C
Phnom Penh

លោក ​ហ៊ុន សែន​ ជំ​រុញក្នុងកិច្ច​ប្រ​ជុំ​កំពូល​​ឲ្យអាស៊ាន​​​​សាមគ្គីគ្នា 

ដោយ ឌឹ ខេមបូឌា ដេលី

បទវិភាគ

នាឱកាសបើក​កិច្ច​ប្រ​ជុំ​កំពូល​អាស៊ាន​​លើក​ទី​២០​ក្នុង​រាជ​ធានី​​ភ្នំ​ពេញ កាល​ពី​ម្សិល​មិញ​​ លោក​នាយក​រដ្ឋ​មន្ត្រី ហ៊ុន ​សែន ​​​បាន​អំពាវ​នាវឲ្យ​បណ្តា​មេដឹក​នាំ​​ក្នុង​​តំបន់​អាស៊ី​អាគ្នេយ៍​ ​កាត់​បន្ថយ​​​គម្លាត​រវាង​ប្រទេស​​អ្នក​មាន​ និង​ប្រទេស​​ក្រី​​​ក្រ​នៅ​ក្នុង​តំបន់​ តាម​រយ:​ការ​ដក​​របាំង​​ពាណិជ្ជ​​កម្ម​​ ដោយ​ធ្វើ​ការ​​​វិនិ​យោគ​​បន្ថែម​ទៀត​​ទៅ​លើ​ហេដ្ឋា​រច​នា​សម្ព័ន្ធ​​ និង​បង្កើន​​រំហូរ​​​ការ​ងារដោយ​​សេរី​។

ប៉ុន្តែ​ចំណុច​​គួរ​ឲ្យ​កត់​សម្គាល់​ ដែល​លោក​ ហ៊ុន សែន​​ ​​មិន​បាន​លើក​ឡើង​នោះ​ គឺ​បញ្ហា​​វិវាទ​​ទឹក​ដី​​នៅ​ក្នុង​សមុទ្រ​ចិន​ខាង​ត្បូង​ រវាង​ប្រទេសមួយ​ចំនួន​ដែល​ជា​សមា​ជិកអាស៊ាន​ និង​ប្រទេសចិនជា​ប្រ​ធាន​បទ​មួយ ​ដែល​ត្រូវ​បាន​លើក​មក​ពិភាក្សា​យ៉ាង​ក្តៅ​គគុក​នៅ​ខាង​ក្រៅ​កិច្ច​ប្រជុំ​កំពូល​នេះ​ និង​នៅ​ក្នុង​​កិច្ច​ប្រ​ជុំ​លើក​មុនៗ។

ទោះ​បី​ជា​ប្រទេស​ហ្វីលីពីន ​បាន​បង្ហាញ​ពី​បំណង​​របស់​ខ្លួន ​​ចង់​ពិភាក្សា​ពី​បញ្ហា​​​​សមុទ្រ​ចិន​ខាង​ត្បូង​​​​ក្នុង​កិច្ច​ប្រ​ជុំ​កំពូល​​នេះ​​​ក្តី​ ​​ក៏​​កម្ពុជា​​​ឈរ​លើ​​គោល​​ជំហរ​របស់​ខ្លួន​ជា​ប្រ​​​​ធាន​អាស៊ាន​​​ ​បាន​និយាយ​ថា ​បញ្ហា​នេះ​មិន​ស្ថិត​​ក្នុង​របៀប​វារៈ​នៃ​កិច្ច​ប្រជុំ​ឆ្នាំ​នេះ​ទេ។

លោក​ ហ៊ុន សែន​​ បាន​​លើក​ឡើង​ក្នុង​សុន្ទរ​កថា​​​បើក​​កិច្ច​ប្រ​ជុំ​កំពូល​អាស៊ាន​នៅឯ​ការិយា​ល័យ​របស់​លោក​ក្នុង​រាជ​ធានី​ភ្នំ​ពេញ​​ថា “ យើង​ត្រូវ​​តែ​​ផ្តោតការ​​​​យក​ចិត្ត​ទុក​ដាក់​ជា​ពិសេស​​លើ​ការ​កាត់​បន្ថយ​គម្លាត​ការ​អភិវឌ្្ឍក្នុង​ចំណោម​​​ប្រទេស​​ជា​សមាជិក​អាស៊ានទាំង​អស់​”។

លោក​បាន​មាន​ប្រ​សាសន៍​ទៅ​​កាន់​​​ឥស្សរ​ជន​ ​​និង​​គណ:ប្រតិ​ភូ​​រាប់​រយ​​រូប​​មក​ពី​ទូទាំង​តំបន់​ថា “ ​យើង​គួរ​តែ​ដាក់​អាទិភាព​ទៅលើ​ការ​បង្កើត​​​​​សហ​គមន៍​​សេដ្ឋ​កិច្ច​​អាស៊ានឲ្យ​បាន​ត្រឹម​ឆ្នាំ​២០១៥​​ ដើម្បី​ប្រែក្លាយ​អាស៊ាន​ឲ្យ​ទៅ​ជា​​ទី​ផ្សារ ​និង​មូលដ្ឋា​ន​ផលិត​កម្ម​​តែ​មួយ​ ​ដែល​មាន​រំហូរ​​​​សេរី​ផ្នែក​សេវា​កម្ម​ ទំនិញការ​វិនិយោគ​​និង​ការ​ងារជំនាញ”។

បញ្ហា​មួ​យ​ក្នុង​ចំណោម​បញ្ហា​ធំ​ៗ​បំផុត​សម្រាប់​តំបន់​អាស៊ាន​ គឺ​ត្រូវ​បិទ​គម្លាត​​ការ​អភិវឌ្ឍ​​​​​រវាង​ប្រទេស​អ្នក​មាន​ដូច​ជា​​​សិង្ហ​បុរីនិង​​ថៃ​ ​​និង​ប្រទេស​​​​ក្រី​ក្រ​ ដូចជា​​​កម្ពុជា ​​ភូមានិង​​​​លាវ​​ជាដើម។

​អាស៊ាន​បាន​កំណត់​គោល​ដៅ​​ឆ្នាំ​២០១៥​​​ដើម្បី​​អនុវត្ត​​វិ​ធាន​ការ​​នានា​ដែលធ្វើ​ឲ្យ​មាន​រំហូរ​សេរីនៃ​ទំនិញ​ ការ​វិនិយោគ​ ប្រ​ជាជ​ន​ និង​​មូលធន។ ​ប៉ុន្តែ​​សេដ្ឋ​វិទូ​នានា​​និយាយ​ថា ប្រទេស​ក្រី​​ក្រ​​​អាច​នឹង​ត្រូវ​គេ​មិនអើ​ពើ​​​ប្រ​សិន​បើ​​ឧស្សាហ​កម្ម​របស់​ប្រទេស​ទាំង​នោះ ​​មិន​អាច​ប្រ​កួត​ប្រជែងជាមួយ​ឧស្សា​ហ​កម្ម​​នៅក្នុង​ប្រទេស​​អភិវឌ្ឍន៍ជា​ច្រើន​ទៀតទេ​នោះ​។

លោក​ ហ៊ុន​ សែន ​​​បាន​មាន​ប្រ​សាស​ន៍​ថា ​​ដើម្បី​ឈាន​ឲ្យ​ដល់​គោល​ដៅឆ្នាំ​​២០១៥​​ដែល​អាស៊ានបាន​កំណត់​​​​​​នោះ ​បណ្តា​​​​រដ្ឋ​មន្ត្រី​​ក្រសួង​ហិរញ្ញ​វត្ថុ​គួរ​តែ​ធ្វើ​ការ​ជិត​ស្និទ្ធ​​​ជា​មួយ​វិទ្យា​ស្ថាន​ស្រាវ​​ជ្រាវ​សេដ្ឋ​កិច្ច​សម្រាប់​​​អាស៊ាន​និង​អាស៊ី​ខាង​កើត​ ហៅ​កាត់​ថា ERIA ​ដែល​មាន​មូល​ដ្ឋាន​នៅ​ក្នុង​ទីក្រុង​ហ្សាការតា។

លោក​បាន​មាន​ប្រ​សា​សន៍​ថា “ នៅ​​ក្នុង​​តំបន់​​ ទោះ​បី​ជា​​មាន​គម្លាត​​ការអភិវឌ្ឍ​​ក្នុង​ចំណោម​​ប្រទេស​ជា​សមា​ជិក​​​អាស៊ាន​​ត្រូវ​បាន​​កាត់​​បន្ថយ​​គួរឲ្យ​កត់​​សម្គាល់​​ក្តី​ ​​​ក៏​វា​នៅតែ​​ធំ​នៅ​ឡើយ។ បញ្ហា​នេះ​​តម្រូវ​ឲ្យ​​យើង​បង្កើន​កិច្ច​ខំប្រឹង​ប្រែង​​​ទ្វេ​ដង​​ ដើម្បី​ជំរុញឲ្យ​មាន​​កំណើន​បន្ថែម​ទៀត​”។

ឯកសា​រ​មួយ​រៀប​រៀង​ដោយវិទ្យា​ស្ថាន​ស្រាវ​​ជ្រាវ​សេដ្ឋ​កិច្ច​សម្រាប់​​​អាស៊ាន​ និង​អាស៊ី​ខាង​កើត​ ដែល​ត្រូវ​បាន​ធ្វើ​បទ​បង្ហាញ​ក្នុង​កិច្ច​ប្រ​ជុំ​​​ស្តីពី​សហ​គមន៍សេដ្ឋកិច្ច​អាស៊ាន​​​កាល​ពី​ថ្ងៃ​ច័ន្ទ បង្ហាញ​ថា​ ប្រ​សិន​បើ​បណ្តា​ប្រទេស​ជា​សមាជិក​អាស៊ាន​​​លើក​លែង​ការ​យក​ពន្ធ​ កាត់​បន្ថយ​​ពន្ធ​​ និង​​កាត់​​បន្ថយ​ការ​ពន្យារ​ពេល​ក្នុង​ការ​នាំ​ចូល​នាំ​ចេញ​ទំនិញ​​​​នោះ ប្រទេស​នានា​នឹងមាន​កំណើន​ផលិត​ផល​ក្នុង​ស្រុកសរុបច្រើន។

យោង​តាម​របាយ​ការណ៍​នេះ​បាន​ឲ្យ​ដឹង​ថា ប្រសិន​បើ​​អនុវត្ត​​វិធាន​ការ​ទាំង​នោះ ​​កំណើន​ផលិត​ផល​ក្នុង​ស្រុក​សរុបរបស់​កម្ពុជា​​នឹង​កើន​ឡើង​​​៤,៤​ភាគ​រយបន្ថែម​ទៀត​​ ចន្លោះ​​ពីឆ្នាំ​២០១១​ដល់​ឆ្នាំ​២០១៥។​ប្រ​ទេសវៀត​ណាម នឹង​ទទួល​បាន​កំណើន​បន្ថែម​ចំនួន​៣,៥​ភាគ​រយ​ ហើយ​លាវ ​នឹង​ទទួល​បាន​២,៣​ភាគរយ​បន្ថែម​ទៀត។

​ប៉ុន្តែ​លោកឡៅម៉ុង​ហៃ ​អ្នក​វិភាគ​នយោ​បាយ​ឯក​រាជ្យ​​​​ មាន​ចម្ងល់​អំពី​បំណង​​ប្រាថ្នា​របស់​លោកហ៊ុនសែនចង់​​ជំរុញ​ពាណិជ្ជ​កម្ម​សេរី​​នៅ​ក្នុង​អាស៊ាន​នេះ ​ដោយ​​​​មាន​ប្រ​សា​សន៍​ថា ​​វិធាន​ការ​​បែប​នេះមិន​​​អាច​​កើត​មាន​ក្នុង​ពេល​ឆាប់ៗ​​នេះ​​សម្រាប់​​ប្រទេស​នានា​ដូច​ជា​​​កម្ពុជា ព្រោះ​​ឧស្សាហ​កម្ម​នាំ​ចេញ​របស់​​ខ្លួន​នៅ​មាន​កម្រិត​ និង​មិន​អាច​​ប្រកួត​ប្រជែងជា​មួយ​​​ប្រ​ទេស​ផ្សេងៗ​នៅ​ក្នុង​តំបន់​នេះ​បាន​ទេ។

លោក​បាន​មាន​ប្រ​សាសន៍​ថា “ យើង​ត្រូវ​ការ​ពេល​វេលា​បន្ថែម​ទៀត​ ឬ​ដំណើរ​ការ​សន្សឹមៗ។បើ​មិន​ដូច្នោះ​ទេ​ យើង​​នឹង​ជួប​បញ្ហា​ដោយ​សារ​​​មាន​បុគ្គលិក​ជំ​នាញ​ច្រើន​​​មក​ពី​ប្រទេស​​ផ្សេងៗ​ និង​ទំនិញ​នាំចូល​​ពី​បណ្តា​សេដ្ឋ​កិច្ច​រីក​ចម្រើន​ជាង​។ប្រ​ការ​នេះនឹង​​រារាំង​ផលិត​កម្ម​​​ និង​​ឧស្សា​ហកម្ម​ក្នុង​ស្រុក​របស់​យើង”៕

​ប្រែសម្រួល​ដោយ តែមសុខុម

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស