បញ្ញវន្តខ្មែរនៅក្រៅប្រទេស ប្រតិកម្មថា លិខិតដែលបានបង្កប់នូវខ្លឹមសារទុច្ចរិតរបស់ក្រសួងមហាផ្ទៃ មិនបានឆ្លុះបញ្ចាំងពីកំហុសរបស់សកម្មជនបរិស្ថានទាំងនោះទេ តែបានបង្ហាញយ៉ាងច្បាស់ពីការការពារនូវអំពើទុច្ចរិតរបស់រដ្ឋាភិបាលលោក ហ៊ុន សែន ទៅវិញ។
ការប្រតិកម្មនេះ ធ្វើឡើងបន្ទាប់ពីក្រសួងមហាផ្ទៃ បានចេញសេចក្តីប្រកាសព័ត៌មានរបស់ខ្លួនថា យុវជនបរិស្ថានទាំងនោះបានសារភាពថា ពួកគេពិតជាមានគម្រោងផ្តួលរំលំរដ្ឋាភិបាល ដោយជ្រកក្រោមស្លាកអង្គការមាតាធម្មជាតិពិតប្រាកដមែន។
ប្រធានក្រុមប្រឹក្សាឃ្លាំមើលកម្ពុជា និងជាប្រធានក្រុមប្រឹក្សាភិបាលនៃចលនានិស្សិតដើម្បីលទ្ធិប្រជាធិបតេយ្យ លោក ម៉ែន ណាត បានប្រាប់សារព័ត៌មាន The Cambodia Daily នៅថ្ងៃទី២៤ ខែមិថុនា ថា ការចេញសេចក្តីប្រកាសព័ត៌មានរបស់ក្រសួងមហាផ្ទៃ នេះ គឺមានចេតនាអាក្រក់ដើម្បីទម្លាក់កំហុសលើក្រុមអ្នកឃ្លាំមើលសិទ្ធិមនុស្ស និងអ្នកធ្វើកិច្ចការសង្គមដទៃទៀតដែលតែងទាមទារឲ្យរដ្ឋាភិបាលកម្ពុជា គោរពសិទ្ធិមនុស្សទៅវិញ។
លោកអះអាងថា ការចេញលិខិតរបស់ក្រសួងមហាផ្ទៃ នេះ មានចេតនាបំបាក់ស្មារតីសកម្មជនបរិស្ថាន សកម្មជនការពារព្រៃឈើ និងសកម្មជនដទៃទៀតផងដែរ។ លើសពីនេះ ក៏ដើម្បីបង្ហាញទៅដល់រដ្ឋមន្ត្រីការបរទេសអង់គ្លេស ដែលបានទៅទស្សនកិច្ចនៅកម្ពុជា កាលពីពេលថ្មីៗនេះទៀតផងថា ការចាប់ខ្លួនយុវជនបរិស្ថានទាំងនោះ គឺដោយសារតែពួកគេពិតជាបានប្រព្រឹត្តល្មើសច្បាប់ប្រាកដមែន។
លោក ម៉ែន ណាត អំពាវនាវឲ្យរដ្ឋាភិបាលកម្ពុជា ទម្លាក់ចោលរាល់បទចោទទាំងអស់លើសកម្មជនបរិស្ថានទាំងនោះ និងអ្នកទោសមនសិការដទៃទៀតដែលអាជ្ញាធរកម្ពុជាបានចាប់ឃុំខ្លួននាពេលកន្លងមក បើមិនដូច្នោះទេ រដ្ឋាភិបាលលោក ហ៊ុន សែន នៅតែរងការរិះគន់ពីពលរដ្ឋខ្មែរ និងមជ្ឈដ្ឋានអន្តរជាតិជារៀងរហូត ហើយរដ្ឋាភិបាលនេះនឹងបាត់បង់ទំនុកចិត្តពីពលរដ្ឋជាបន្តបន្ទាប់ទៀត។
ក្រសួងមហាផ្ទៃ បានចេញសេចក្តីប្រកាសព័ត៌មានកាលពីថ្ងៃទី២៣ ខែមិថុនា ឆ្នាំ២០២១ ថា យុវជនទាំង ៣នាក់នោះរួមមាន លោក លី ចាន់ដារ៉ាវុទ្ធ កញ្ញា ស៊ុន រដ្ឋា និងលោក យឹម លាងហ៊ី បានសារភាពថា ពួកគេពិតជាបានធ្វើសកម្មភាពក្រោមស្លាកអង្គការមាតាធម្មជាតិ ប៉ុន្តែការពិត គឺចង់ឲ្យមានការងើបបះបោរប្រឆាំង ហើយឈានទៅរកការផ្ដួលរំលំរដ្ឋាភិបាលបច្ចុប្បន្នប្រាកដមែន។
ការចេញសេចក្តីប្រកាសព័ត៌មាននេះ ធ្វើឡើងបន្ទាប់ពីយុវជនបរិស្ថានទាំងនោះត្រូវបានសមត្ថកិច្ចចាប់ខ្លួនអស់រយៈពេល ១សប្តាហ៍ ដែលបានចោទប្រកាន់ពីបទប្រមាថអង្គព្រះមហាក្សត្រ និងរួមគំនិតក្បត់តាមមាត្រា ៤៣៧ និងមាត្រា ៤៥៣ នៃក្រមព្រហ្មទណ្ឌ។
ព្រះរាជអាជ្ញារងសាលាដំបូងរាជធានីភ្នំពេញ លោក សេង ហៀង បានចេញដីកាកាលពីថ្ងៃទី១៦ ខែមិថុនា ឲ្យយុវជនបរិស្ថានរបស់អង្គការចលនាមាតាធម្មជាតិចំនួន ៣នាក់ ក្នុងនោះរួមមាន លោក លី ចាន់ដារ៉ាវុទ្ធ កញ្ញា ស៊ុន រដ្ឋា និងលោក យឹម លាងហ៊ី ចូលខ្លួនដើម្បីសាកសួរពីដំណើររឿងអំពើបង្កឲ្យមានអសន្តិសុខសង្គម។
អ្នកនាំពាក្យសមាគមការពារសិទ្ធិមនុស្សរបស់សមាគមអាដហុក លោក ស៊ឹង សែនករុណា បានប្រាប់សារព័ត៌មាន The Cambodia Daily នៅថ្ងៃទី២៤ ខែមិថុនា ថា ក្រោមការឃ្លាំមើលរបស់អង្គការសង្គមស៊ីវិលលើសកម្មភាពរបស់យុវជនបរិស្ថានទាំងនោះកន្លងមក លោកមើលឃើញថា សកម្មភាពរបស់ពួកគេមិនមានគម្រោងផ្ដួលរំលំរដ្ឋាភិបាលនោះទេ។
លោកអះអាងថា សកម្មភាពរបស់សកម្មជនបរិស្ថានទាំងនេះត្រូវបានគេទទួលស្គាល់គ្រប់ៗគ្នាពីមជ្ឈដ្ឋានមហាជនទាំងក្នុង និងក្រៅប្រទេស ថាអ្នកទាំងនោះគ្រាន់តែធ្វើសកម្មភាពការពារបរិស្ថាន ការពារធនធានធម្មជាតិ និងចូលរួមការពារព្រៃឈើដែលកំពុងរងការធ្វើទុក្ខបុកម្នេញពីឈ្មួញទុច្ចរិតតែប៉ុណ្ណោះ។
លោក ស៊ឹង សែនករុណា បញ្ជាក់ថា ជុំវិញការចាប់ខ្លួនសកម្មជនបរិស្ថាននេះ រដ្ឋាភិបាលបានរងការរិះគន់ពីមតិជាតិ និងអន្តរជាតិយ៉ាងធ្ងន់ធ្ងរ ព្រោះថាការចោទប្រកាន់លើយុវជនទាំងនោះធ្វើឡើងមិនស្របគ្នាជាមួយនឹងសកម្មភាពដែលពួកគេបានប្រព្រឹត្តកន្លងមកនោះទេ ដូច្នេះដើម្បីចៀសផុតការរិះគន់ពីគ្រប់មជ្ឈដ្ឋាន និងបង្កើតជំនឿចិត្តរបស់ពលរដ្ឋលើប្រព័ន្ធយុត្តិធម៌នៅកម្ពុជា រដ្ឋាភិបាលគួរតែពិនិត្យពីការអនុវត្តច្បាប់របស់ខ្លួនឡើងវិញជាបន្ទាន់។
កាលពីចុងឆ្នាំ២០២០ របាយការណ៍មួយរបស់គម្រោងយុត្តិធម៌ពិភពលោក (World Justice Project) ស្ដីពីនីតិរដ្ឋនៅកម្ពុជា បានផ្តល់ពិន្ទុឲ្យកម្ពុជាជាប់លេខរៀងទី១២៧ ក្នុងចំណោមប្រទេសចំនួន១២៨ នៅជុំវិញពិភពលោក ដោយបង្ហាញថា ប្រព័ន្ធយុត្តិធម៌នៅកម្ពុជាអាក្រក់បំផុតនៅក្នុងលោក ប៉ុន្តែល្អជាងតែប្រទេសវេណេហ្ស៊ុយអេឡា តែមួយប៉ុណ្ណោះ៕