អតីតមេបក្សប្រឆាំង លោក សម រង្ស៊ី ចង់ឱ្យមានការរួបរួមជាមួយនឹងគណបក្សកាន់អំណាចរបស់លោក ហ៊ុន សែន ដើម្បីជាតិខ្មែររុងរឿង និងខ្លាំងក្លាទៅថ្ងៃអនាគត ខណៈសកម្មជនបក្សប្រឆាំងឯកភាពនឹងការរួបរួមនេះ ប៉ុន្តែត្រូវតែរួបរួមដើម្បីដោះស្រាយវិបត្តិនយោបាយសម្រាប់កម្ពុជា មិនមែនរួបរួមដើម្បីបុគ្គល ឬក្រុមណាមួយនោះទេ។
អតីតប្រធានគណបក្សសង្គ្រោះជាតិ លោក សម រង្ស៊ី បានអះអាងនៅក្នុងពិធីជួបជុំអ្នកគាំទ្ររបស់ខ្លួននៅសហរដ្ឋអាមេរិក កាលពីពេលថ្មីៗនេះថា លោកចង់ឱ្យមានការរួបរួមរវាងខ្មែរនិងខ្មែរ ដើម្បីរៀបចំប្រទេសមួយដែលអាចការពារពលរដ្ឋស្លូតត្រង់ពីអំពើអយុត្តិធម៌ក្នុងសង្គមជាតិ ហើយនាំគ្នាកសាងអំពើល្អសម្រាប់ពលរដ្ឋរបស់ខ្លួនឱ្យបានកាន់តែច្រើន។
លោក សម រង្ស៊ី អះអាងថា បើទោះបីជាលោកត្រូវបានរដ្ឋាភិបាលកម្ពុជាចោទប្រកាន់ ឬស្អប់យ៉ាងណាក៏ដោយ ប៉ុន្តែជំហររួបរួមដែលលោកចង់បាន គឺការរួបរួមគ្នាលើអំពើល្អ ដើម្បីចូលរួមគ្នាអភិវឌ្ឍកម្ពុជាឱ្យក្លាយជាសង្គមមួយដែលពោរពេញទៅដោយយុត្តិធម៌ត្រឹមត្រូវ និងរីកចម្រើន ហើយលោកសង្ឃឹមថា គណបក្សកាន់អំណាចនឹងយល់ពីបំណងល្អរបស់លោកចំពោះជាតិមាតុភូមិ និងពលរដ្ឋខ្មែរ។
ការអះអាងនេះ ធ្វើឡើងស្របពេលដែលកម្ពុជាកំពុងជាប់គាំងវិបត្តិនយោបាយយ៉ាងធ្ងន់ធ្ងរ ដែលបង្កឡើងដោយបក្សកាន់អំណាចសព្វថ្ងៃនេះ។
សកម្មជនគណបក្សសង្គ្រោះជាតិ លោក ហ៊ុន កុសល បានប្រាប់សារព័ត៌មាន The Cambodia Daily នៅថ្ងៃទី២២ វិច្ឆិកា នេះថា ការរួបរួមគ្នារវាងខ្មែរនិងខ្មែរ គឺជារឿងល្អប្រសើរ និងចាំបាច់បំផុតសម្រាប់ប្រទេសជាតិ ហើយលោកក៏មិនបដិសេធការរួបរួមសាមគ្គីនេះដែរ ទោះភាគីខ្មែរណាក៏ដោយ ឲ្យតែមានការរីកចម្រើន និងមានវឌ្ឍនភាពដល់ប្រទេសកម្ពុជា។
លោកបន្តថា ប្រសិនបើមានការរួបរួមរវាងភាគីលោក សម រង្ស៊ី និងគណបក្សកាន់អំណាចដូចការអំពាវនាវនោះ ត្រូវតែរួបរួមដើម្បីដោះស្រាយវិបត្តិនយោបាយសម្រាប់កម្ពុជា មិនមែនរួបរួមដើម្បីបុគ្គល ឬក្រុមណាមួយនោះទេ។
លោក ហ៊ុន កុសល បញ្ជាក់ថា ប្រភពដែលនាំឲ្យជាប់គាំងនយោបាយនៅកម្ពុជា គឺការចាប់ខ្លួនប្រធានគណបក្សសង្គ្រោះជាតិ លោក កឹម សុខា ដាក់គុក និងការរំលាយគណបក្សសង្គ្រោះជាតិទាំងអយុត្តិធម៌ ដូច្នេះដំណោះស្រាយល្អសម្រាប់ស្ថានភាពជាតិ គឺការស្ដារ និងសងនូវលទ្ធិប្រជាធិបតេយ្យដល់ពលរដ្ឋខ្មែរវិញ នោះទើបជាការរួបរួមដែលត្រឹមត្រូវ។
ជុំវិញបញ្ហានេះ ប្រមុខរដ្ឋាភិបាលកម្ពុជាកាលពីពាក់កណ្តាលខែកញ្ញា ឆ្នាំ២០២១ បានអះអាងថា លោកបានធ្វើច្រើនណាស់ក្នុងការដឹកនាំជាតិរកការបង្រួបបង្រួមជាតិរវាងខ្មែរនិងខ្មែរ ប៉ុន្តែភាគីនយោបាយក្រុមប្រឆាំងមិនយល់អំពីការបង្រួបបង្រួមជាតិនេះទេ ហើយនៅពេលនេះគ្មានកិច្ចការនយោបាយណាដែលត្រូវដោះស្រាយដោយការចរចាជាមួយក្រុមប្រឆាំងនោះដែរ។
លោក ហ៊ុន សែន ព្រមានថា សូមឈប់ស្រមើស្រមៃបន្តទៀតទៅថា គណបក្សសង្គ្រោះជាតិនឹងរស់ឡើងវិញ ហើយលោកនឹងលើកលែងទោសឱ្យក្រុមប្រឆាំងទាំងនោះ ឬនឹងធ្វើការចរចារកដំណោះស្រាយនយោបាយ ព្រោះតែលោកខ្លាចអន្តរជាតិនោះ។ ប៉ុន្តែពួកអ្នកដែលមានទោស ត្រូវទៅទទួលទោសជាប់គុកពីរភាគបីសិន ទើបអាចគិតដល់រឿងការលើកលែងទោស ឬបន្ធូរបន្ថយទោស។
ជុំវិញការដោះស្រាយវិបត្តិនយោបាយនៅកម្ពុជានេះ សហភាពអឺរ៉ុប និងបណ្តាប្រទេសលោកសេរីជាច្រើន នៅតែជំរុញឱ្យអ្នកនយោបាយខ្មែរវិលទៅរកការចរចាបញ្ចប់ជម្លោះនយោបាយ ដោយតម្កល់ផលប្រយោជន៍ជាតិឱ្យធំជាងផលប្រយោជន៍បុគ្គល ឬបក្សរបស់ខ្លួន។ ប៉ុន្តែមកទល់ពេលនេះ ពន្លឺនៃកិច្ចចរចានយោបាយនៅកម្ពុជានៅមិនទាន់មាននៅឡើយទេ៕