កាលពីសប្ដាហ៍មុន តុលាការឧក្រិដ្ឋកម្មអន្តរជាតិ ICC បានបើកសវនាការបឋមទៅលើសំណុំរឿងដែលប្ដឹងដោយរដ្ឋាភិបាលអាហ្វ្រិកខាងត្បូង ករណីចោទអ៊ីស្រាអែល ពាក់ព័ន្ធនឹងអំពើប្រល័យពូជសាសន៍ទៅលើប្រជាជនប៉ាឡេស្ទីន ក្នុងសង្គ្រាមអ៊ីស្រាអែល វាយសងសឹកលើពួកហាម៉ាស់។
ក្នុងសវនាការរបស់ ICC ប្រព្រឹត្តទៅនៅទីក្រុងឡាអេ ប្រទេសហូឡង់ ពួកចៅក្រម ICC បានចាប់ផ្ដើមបើកនីតិវិធីដំបូងដើម្បីសិក្សាអំពីបទចោទរបស់អាហ្រ្វិកខាងត្បូងទៅលើប្រទេសអ៊ីស្រាអែល ថាតើបទចោទដូចនេះមានភស្តុតាង និងពាក់ព័ន្ធនឹងច្បាប់ឧក្រិដ្ឋកម្មអន្តរជាតិ ឬបទប្រល័យពូជសាសន៍ដែរឬទេ។
ការជំនុំជម្រះក្ដីបឋមរបស់ ICC គឺជាការឆ្លើយតបបណ្ដឹងរបស់រដ្ឋាភិបាលអាហ្រ្វិកខាងត្បូង ប៉ុន្តែតុលាការនៅពេលនោះមិនទាន់សម្រេចថាតើអ្វីដែលអាហ្រ្វិកខាងត្បូងប្ដឹងអ៊ីស្រាអែល នេះ វាឆ្លើយតបនឹងស្ថានភាពជាក់ស្ដែងហើយឬនៅ។
នៅក្នុងសវនាការនេះមានការជជែកគ្នាយ៉ាងតានតឹងរវាងអ្នកច្បាប់មកពីអាហ្វ្រិកខាងត្បូង និងអ្នកច្បាប់មកពីប្រទេសអ៊ីស្រាអែល។ អ្នកច្បាប់អាហ្វ្រិកខាងត្បូងបង្ហាញពន្យល់ច្បាប់អន្តរជាតិជាច្រើន ដែលបង្ខំឲ្យអ៊ីស្រាអែល ទទួលស្គាល់ថាខ្លួនកំពុងតែប្រព្រឹត្តអំពើប្រល័យពូជសាសន៍ទៅលើជាតិសាសន៍ប៉ាឡេស្ទីន ក្នុងករណីសង្គ្រាមនៅតំបន់ Gaza នៅពេលនេះ ប៉ុន្តែអ្នកច្បាប់អ៊ីស្រាអែល បានឡើងការពារខ្លួន។ អ្នកច្បាប់អ៊ីស្រាអែល បានចង្អុលមុខអ្នកច្បាប់អាហ្រ្វិកខាងត្បូងថា សំណុំរឿងរបស់ក្រុងព្រីតូរីយ៉ា ជាលក្ខណៈនយោបាយ។ វាមានន័យថា សំណុំរឿងនេះវាទាក់ទងនឹងភូមិសាស្ត្រច្រើនជាងអ្វីដែលអាហ្រ្វិកខាងត្បូងថាអ៊ីស្រាអែលរំលោភច្បាប់អន្តរជាតិ។
អ្នកច្បាប់អ៊ីស្រាអែល បានចោទអាហ្វ្រិកខាងត្បូងនៅចំពោះមុខចៅក្រមតុលាការ ICC ដែលថា អាហ្វ្រិកខាងត្បូងនេះជាប្រទេសមួយដែលផ្ដល់ធនធាន ហិរញ្ញវត្ថុ និងអាវុធទៅឲ្យពួកហាម៉ាស់-ប៉ាឡេស្ទីន ធ្វើឲ្យក្រុមប្រដាប់អាវុធនេះមានសមត្ថភាពក្នុងការបង្កើតហិង្សានៅតាមព្រំដែនហ្កាហ្សា និងអ៊ីស្រាអែល។
ភាពតានតឹងបានផ្ទុះឡើងមួយរំពេច ធ្វើឲ្យបរិយាកាសក្នុងសវនាការក្នុង ICC កាន់តែស្មុគស្មាញ និងជំរុញឲ្យចៅក្រម ICC ស្វែងរកភស្តុតាងថ្មីៗនូវអ្វីដែលអ៊ីស្រាអែល ចោទអាហ្វ្រិកខាងត្បូង។
យ៉ាងណា ចៅក្រម ICC មិនបានធ្វើសេចក្ដីសម្រេចថាតើអ៊ីស្រាអែល ពិតជាប្រព្រឹត្តអំពើប្រល័យពូជសាសន៍លើប្រជាជនប៉ាឡេស្ទីន យ៉ាងណានោះទេ ធ្វើឲ្យចៅក្រម ICC បន្តនីតិវិធីបឋមរបស់ខ្លួនទៅថ្ងៃខាងមុខទៀត។ តែបែបនេះក្ដី គេថាយ៉ាងហោចណាស់ អាហ្វ្រិកខាងត្បូងជោគជ័យដំណាក់កាលដំបូងដែលអូសអ៊ីស្រាអែល មកតតាំងក្ដីនៅចំពោះមុខតុលាការ ICC ជាជាងទុកឲ្យអ៊ីស្រាអែល នៅក្រៅយុត្តាធិការរបស់ ICC។
ជាមួយគ្នានេះ អ្នកសង្កេតការណ៍ និងអ្នកវិភាគមើលឃើញថា សំណុំរឿងរបស់អាហ្វ្រិកខាងត្បូង ដែលអូសអ៊ីស្រាអែល ឡើង ICC នេះ វាជាសំណុំរឿងពាក់ព័ន្ធនឹងភូមិសាស្ត្រនយោបាយយ៉ាងពិតប្រាកដ ព្រោះអាហ្វ្រិកខាងត្បូងបើធ្វើដូចនេះទៅលើប្រទេសរុស្ស៊ី ក៏អាចអូសរុស្ស៊ី ឡើង ICC បានដែរករណីសំណុំរឿងរបស់អ៊ីស្រាអែល នេះ គឺមិនខុសអីនឹងរុស្ស៊ីប្រព្រឹត្តទៅលើប្រជាជនអ៊ុយក្រែន នោះទេ។ អាហ្វ្រិកខាងត្បូងធ្វើមិនកើត ដោយសារអ្វី ធ្វើមិនបានដោយសារអ្វី។ រឿងនេះគេអាចមើលឃើញច្រើនករណី៖
- ទី១ អាហ្វ្រិកខាងត្បូងបម្រើភូមិសាស្ត្រនយោបាយទៅឲ្យរុស្ស៊ី ព្រោះអាហ្វ្រិកខាងត្បូងជាប្រទេសសម្ព័ន្ធភាពនៃអង្គការសហប្រតិបត្តិការសេដ្ឋកិច្ចហៅកាត់ថា BRICS។ អង្គការ BRICS នេះគឺមានប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូងខ្លួនគេផ្ទាល់។
- ទី២ គេកត់សម្គាល់ឃើញអាហ្វ្រិកខាងត្បូង មិនដែលបោះឆ្នោតថ្កោលទោសរុស្ស៊ី ឈ្លានពានអ៊ុយក្រែន ម្ដងណានោះទេ។ នៅឯមហាសន្និបាតអង្គការសហប្រជាជាតិ អាហ្វ្រិកខាងត្បូងតែងតែបោះឆ្នោតអនុប្បវាទ ដោយទាមទារថា ខ្លួនឈរនៅចំណុចកណ្ដាលមិនលម្អៀងខាងណានោះទេរវាងអ៊ុយក្រែន និងរុស្ស៊ី ប៉ុន្តែប្រទេសជាង ១២០ប្រទេសបោះឆ្នោតថ្កោលទោសរុស្ស៊ី ហើយមានតែជាង ៣០ប្រទេសប៉ុណ្ណោះបោះឆ្នោតអនុប្បវាទ ក្នុងនោះមានអាហ្វ្រិកខាងត្បូងផងដែរនេះ។
បើអាហ្វ្រិកខាងត្បូងថ្កោលទោសរុស្ស៊ីឈ្លានពានអ៊ុយក្រែន មានន័យថា ទីក្រុងព្រីតូរីយ៉ា ប្រឆាំងរុស្ស៊ី ឈ្លានពានអ៊ុយក្រែន ហើយក្រុងព្រីតូរីយ៉ា នេះ ក៏អាចអូសរុស្ស៊ី ឡើងតុលាការ ICC ផងដែរ។
ចុះហេតុអ្វីបានជាអាហ្វ្រិកខាងត្បូង មិនអាចធ្វើបានទៅលើរុស្ស៊ី? វាមានតែរឿងនយោបាយនៅពីក្រោយអាហ្វ្រិកខាងត្បូងតែប៉ុណ្ណោះ។ ដូច្នេះហើយ គេហៅអាហ្វ្រិកខាងត្បូងអូសអ៊ីស្រាអែល ឡើង ICC តែអាហ្វ្រិកខាងត្បូងភ្លេចរុស្ស៊ី កំពុងបង្កើតវិនាសកម្ម និងអំពើប្រល័យពូជសាសន៍ទៅលើប្រជាជនអ៊ុយក្រែន។
សំណុំរឿងនេះ គឺប្រធានាធិបតីរុស្ស៊ី វ៉្លាឌីមៀរ ពូទីន កំពុងតែរងដីកាចាប់ខ្លួនរបស់តុលាការអន្តរជាតិ ICC រួចទៅហើយពាក់ព័ន្ធនឹងឧក្រិដ្ឋកម្មសង្គ្រាម ឧក្រិដ្ឋកម្មប្រឆាំងមនុស្សជាតិ និងអំពើប្រល័យពូជសាសន៍លើជាតិសាសន៍អ៊ុយក្រែន។ យ៉ាងនេះហើយបានជាអ្នកច្បាប់អន្តរជាតិ និងរដ្ឋអាជ្ញា ICC កំពុងសហការគ្នាជាមួយរដ្ឋអាជ្ញារបស់អ៊ុយក្រែន កសាងសំណុំរឿងឧក្រិដ្ឋកម្មទាំង ៣ប្រភេទនេះប្រឆាំងនឹងរបបនៅទីក្រុងមូស្គូ ហើយកំពុងតែដាក់សម្ពាធឲ្យក្រុងមូស្គូ ទទួលស្គាល់ថាកំពុងតែប្រព្រឹត្តអំពើវិនាសកម្មយ៉ាងធ្ងន់ធ្ងរប្រឆាំងនឹងជាតិសាសន៍ និងប្រទេសជាតិអ៊ុយក្រែន។
អ្នកច្បាប់អន្តរជាតិធំៗមកពីជាង ៤០ប្រទេស បានសហការគ្នាដើម្បីឈានទៅដល់ការបង្កើតសាលាក្ដីពិសេសមួយនៅអឺរ៉ុប ឬនៅលើទឹកដីអ៊ុយក្រែន ផ្ទាល់ ដើម្បីបើកសំណុំរឿងឧក្រិដ្ឋកម្មសង្គ្រាម និងអំពើប្រឆាំងមនុស្សជាតិ ប្រល័យពូជសាសន៍ប្រឆាំងនឹងរបបនៅទីក្រុងមូស្គូ ដែលប្រធានាធិបតីរុស្ស៊ី វ៉្លាឌីមៀរ ពូទីន ជាជនជាប់ចោទរបស់ ICC រួចទៅហើយនេះ។
ដូច្នេះហើយបានជាអ្នកច្បាប់អ៊ីស្រាអែល ចោទសួរអាហ្វ្រិកខាងត្បូងថា ហេតុអ្វីបានជាអ្នកកសាងសំណុំរឿងប្រឆាំងអ៊ីស្រាអែល បែបនេះ? ថាតើអាហ្វ្រិកខាងត្បូង មានដឹងថាសំណុំរឿងរបស់ខ្លួនជាទម្រង់នៃនីតិវិធីភូមិសាស្ត្រនយោបាយដែរឬទេ?៕