បញ្ញវន្តខ្មែរនៅក្រៅស្រុក ប្រតិកម្មថា ចិត្តសាស្ត្រនយោបាយរបស់វៀតណាម គឺមានបំណងបំបែកបំបាក់ស្មារតីខ្មែរឲ្យច្របូកច្របល់ សង្ស័យគ្នា ចោទប្រកាន់គ្នា និងវាយប្រហារគ្នាទៅវិញទៅមក។
អ្នកវិភាគនយោបាយ និងសង្គម អះអាងបែបនេះបន្ទាប់ពីឯកអគ្គរដ្ឋទូតចប់អាណត្តិនៃសាធារណរដ្ឋសង្គមនិយមវៀតណាម ប្រចាំនៅកម្ពុជា បានអះអាងថា គណបក្ស រដ្ឋាភិបាល និងប្រជាជនវៀតណាម នៅតែចងចាំ និងដឹងគុណជានិច្ចចំពោះប្រជាជនកម្ពុជា។
អ្នកវិភាគនយោបាយ សង្គម និងជាអនុប្រធានក្រុមប្រឹក្សាភិបាលនៃចលនានិស្សិតដើម្បីលទ្ធិប្រជាធិបតេយ្យ លោក គឹម សុខ បានប្រាប់សារព័ត៌មាន The Cambodia Daily នៅថ្ងៃទី៣០ ខែមិថុនា ថា ចិត្តសាស្ត្រនយោបាយវៀតណាម គឺបានបង្កប់នូវភាពពិសពុល មានចេតនាបំបែកបំបាក់សាមគ្គីខ្មែរឲ្យច្របូកច្របល់ពេញប្រទេស ព្រោះថាពួកគេឃើញខ្មែរកំពុងតែវង្វេងនឹងសមរភូមិ និងចិត្តសាស្ត្រក្នុងបរិបទនយោបាយខ្លួនឯង។
លោកអះអាងថា សម្ដីមន្ត្រីរដ្ឋាភិបាលយួនបញ្ជាក់អំពីការចាក់ឫសយ៉ាងជ្រៅនៅក្នុងសង្គមខ្មែរ ប៉ុន្តែពួកមេដឹកនាំខ្មែរមានគំនិតងាយៗ និយាយធូរៗ និងគ្មានសមត្ថភាពធ្វើនយោបាយតទល់នឹងរដ្ឋាភិបាលកុម្មុយនីស្តវៀតណាមឡើយ ព្រោះថារដ្ឋាភិបាលកម្ពុជានេះតែងតែអនុវត្តតាមខ្សែញាក់របស់វៀតណាមជានិច្ច ក្រោយការលើកបន្តុបកាលពីឆ្នាំ១៩៨៥ មក។
លោក គឹម សុខ បញ្ជាក់ថា រដ្ឋាភិបាលកុម្មុយនីស្តវៀតណាម តែងប្រើយុទ្ធសាស្ត្រចងសម្ព័ន្ធមិត្តជាមួយកម្ពុជាផង និងគំរាមផង ប៉ុន្តែក្នុងគោលបំណងជាក់លាក់ដើម្បីសម្រេចផែនការឈ្លានពានលើអធិបតេយ្យភាពរបស់កម្ពុជាតែប៉ុណ្ណោះ ត្បិតប្រទេសកុម្មុយនីស្តមួយនេះបានរៀបចំរដ្ឋាភិបាលស្របច្បាប់មួយទុកនៅកម្ពុជាជាយូរមកហើយ ដើម្បីជួយបម្រើការឈ្លានពានរបស់ពួកគេទៅថ្ងៃអនាគត។
កាលពីថ្ងៃទី២៩ ខែមិថុនា ឆ្នាំ២០២១ ឯកអគ្គរដ្ឋទូតចប់អាណត្តិនៃសាធារណរដ្ឋសង្គមនិយមវៀតណាមប្រចាំនៅកម្ពុជា លោក វ៉ូ ក្វាង មិញ បានអះអាងថា គណបក្ស រដ្ឋាភិបាល និងប្រជាជនវៀតណាម នៅតែចងចាំ និងដឹងគុណជានិច្ចចំពោះប្រជាជនកម្ពុជាដែលបានជួយគាំទ្រដល់ការតស៊ូរបស់ពលរដ្ឋវៀតណាម ដើម្បីឯករាជ្យជាតិ ការរំដោះ និងការបង្រួបបង្រួមប្រទេសជាតិរហូតដល់ពេលបច្ចុប្បន្ននេះ។
ការអះអាងនេះ ធ្វើឡើងក្នុងជំនួបរវាងឯកអគ្គរដ្ឋទូតវៀតណាមប្រចាំនៅកម្ពុជា លោក វ៉ូ ក្វាង មិញ និងប្រធានព្រឹទ្ធសភាកម្ពុជា លោក សាយ ឈុំ នៅវិមានព្រឹទ្ធសភាជាតិ ដើម្បីជម្រាបលាក្នុងការបញ្ចប់អាណត្តិរបស់ខ្លួនកាលពីថ្ងៃទី២៩ ខែមិថុនា ឆ្នាំ២០២១ នេះ។
ក្នុងជំនួបនេះ ប្រធានព្រឹទ្ធសភាកម្ពុជា លោក សាយ ឈុំ បានវាយតម្លៃខ្ពស់ចំពោះបេសកកម្មការទូតប្រកបដោយជោគជ័យរបស់ឯកអគ្គរដ្ឋទូតវៀតណាមប្រចាំនៅកម្ពុជា លោក វ៉ូ ក្វាង មិញ ដែលបានខិតខំរួមចំណែកពង្រឹង និងពង្រីកចំណងមិត្តភាព សាមគ្គីភាព និងកិច្ចសហប្រតិបត្តិការលើគ្រប់វិស័យកាន់តែរឹងមាំថែមទៀតរវាងកម្ពុជា-វៀតណាម ហើយក៏នឹងនាំមកនូវផលប្រយោជន៍ទៅវិញទៅមកសម្រាប់ប្រជាជន និងប្រទេសទាំងពីរ ទាំងពេលបច្ចុប្បន្ន និងទៅអនាគត។
បែបនេះក្តី កាលពីថ្ងៃទី៥ ខែមករា ឆ្នាំ២០២១ ស្ថានទូតវៀតណាម ប្រចាំនៅកម្ពុជា បានសរសេរលើទំព័រ Facebook របស់ខ្លួនថា រយៈពេល ៤១ឆ្នាំបន្ទាប់ពីទទួលបានជ័យជម្នះលើរបបប្រល័យពូជសាសន៍ខ្មែរក្រហម ដោយមានការជួយជ្រោមជ្រែងពីសំណាក់កងទ័ពស្ម័គ្រចិត្តនៃប្រជាជនវៀតណាម ថ្នាក់ដឹកនាំគណបក្សប្រជាជនកម្ពុជា ដែលដឹកនាំដោយលោកនាយករដ្ឋមន្ត្រី ហ៊ុន សែន និងប្រទេសកម្ពុជា អាចទទួលបានសមិទ្ធផលយ៉ាងច្រើនសន្ធឹកសន្ធាប់ក្នុងពេលបច្ចុប្បន្ននេះ។
ស្ថានទូតវៀតណាម បញ្ជាក់ថា ជ័យជម្នះនៅថ្ងៃទី៧ ខែមករា ឆ្នាំ១៩៧៩ បានជួយសង្គ្រោះប្រជាជនកម្ពុជា ពីអំពើប្រល័យពូជសាសន៍ ដោយបានទទួលមកវិញនូវសិទ្ធិរស់រានមានជីវិត និងសិទ្ធិជាមនុស្ស គឺដោយសារបក្សកុម្មុយនីស្តវៀតណាមជាមួយកងទ័ព និងប្រជាជនវៀតណាម បានអនុវត្តសិទ្ធិស្របច្បាប់ជួយសង្គ្រោះប្រជាជនកម្ពុជាពីរបបប្រល័យពូជសាសន៍ខ្មែរក្រហមមួយនេះ។
យ៉ាងណាក៏ដោយ ក្រុមអ្នកឃ្លាំមើលសង្គមរិះគន់ថា បើនៅតែដឹកនាំប្រទេសតាមរបៀបលោកនាយករដ្ឋមន្ត្រី ហ៊ុន សែន សព្វថ្ងៃនេះ មិនត្រឹមតែវៀតណាមមិនដឹងគុណខ្មែរទេ វៀតណាមនឹងនៅតែបន្តឈ្លានពានលើបូរណភាពទឹកដីខ្មែររហូតដូចដែលពួកគេធ្លាប់ធ្វើកន្លងមក បើទោះបីពេលខ្លះពួកគេនិយាយថា កម្ពុជាមានគុណជួយពួកគេក៏ដោយ៕