26 C
Phnom Penh

អ្នក​ឃ្លាំមើល​ព្រៃឈើ៖ អាជ្ញាធរ​ឃុំ​ត្រពាំងធំ​ខាងត្បូង​ឃុបឃិត​លក់​ដី​ព្រៃ​សហគមន៍​ទៅ​ឲ្យ​ក្រុមហ៊ុន និង​អ្នក​មាន​លុយ

បទវិភាគ

ប្រជា​សហគមន៍​ព្រៃឈើ អះអាង​ថា អាជ្ញាធរ​ឃុំ​ត្រពាំងធំ​ខាងត្បូង ស្រុក​ត្រាំកក់ ខេត្ត​តាកែវ បាន​ឃុបឃិត​គ្នា​ជា​ប្រព័ន្ធ​លក់​ដី​ព្រៃ​សហគមន៍​ឲ្យ​ទៅ​អ្នក​មាន​លុយ និង​ក្រុមហ៊ុន ដើម្បី​យក​លុយ​ចែក​គ្នា​ដោយ​ខុសច្បាប់។

ពួកគេ​អះអាង​បែប​នេះ បន្ទាប់ពី​រក​ឃើញ​ថា អាជ្ញាធរ​មូលដ្ឋាន​នៅ​ក្នុង​ឃុំ​ត្រពាំងធំ​ខាងត្បូង បាន​ឃុបឃិត​គ្នា​លក់​ដី​ព្រៃ​សហគមន៍​ទៅ​ឲ្យ​អ្នក​មាន​លុយ​អស់​រាប់​សិប​ហិកតារ​កាលពី​ពេល​ថ្មីៗ​នេះ។

លោក សំ សារូ ប្រធាន​សហគមន៍​ព្រៃឈើ​ត្រពាំងធំ​ខាងត្បូង បាន​ប្រាប់​សារព័ត៌មាន The Cambodia daily នៅ​ថ្ងៃ​ទី​៦ ខែ​កក្កដា ថា ព្រៃ​សហគមន៍​ត្រពាំងធំ​ខាងត្បូង ត្រូវ​បាន​ថែទាំ​ដោយ​ប្រជា​សហគមន៍​យ៉ាង​យកចិត្ត​ទុកដាក់ ដែល​អាច​រក្សា​ព្រៃឈើ​បាន​ល្អ ប៉ុន្តែ​ចាប់តាំង​ពី​ខែ​តុលា ឆ្នាំ​២០២០ រហូត​ដល់​ខែ​កក្កដា ឆ្នាំ​២០២១ នេះ ដី​ព្រៃ​សហគមន៍​ទាំងនេះ​ត្រូវ​អាជ្ញាធរ​ភូមិ-ឃុំ​សហការ​គ្នា​លក់​ទៅ​ឲ្យ​ឈ្មួញ​អ្នក​មាន​លុយ​ជាបន្តបន្ទាប់។

លោក​អះអាង​ថា មក​ទល់នឹង​ពេល​នេះ ដី​ព្រៃ​សហគមន៍​ត្រពាំងធំ​ខាងត្បូង នេះ ត្រូវ​អាជ្ញាធរ​កាត់​លក់​អស់​ជិត ១០០​ហិកតារ​ហើយ ប៉ុន្តែ​អាជ្ញាធរ​ថ្នាក់លើ​ដូចជា​អាជ្ញាធរ​ស្រុក អាជ្ញាធរ​ខេត្ត និង​មន្ទីរ​បរិស្ថាន ហាក់​មិន​មាន​ចំណាត់ការ​ទប់ស្កាត់​បទល្មើស​នេះ​ទាល់តែសោះ ផ្ទុយទៅវិញ​នៅ​ពេល​ដែល​មាន​បណ្តឹង​ពី​ពលរដ្ឋ​លើ​បញ្ហា​នេះ ពួកគេ​បែរជា​ឆ្លើយ​ដាក់​គ្នា​ទៅវិញ។

លោក​បញ្ជាក់​ថា នៅ​ពេល​ដែល​ប្រជា​សហគមន៍​ទាមទារ​ឲ្យ​មេ​ភូមិ និង​មេឃុំ​ស្រាវជ្រាវ​រក​អ្នក​ដែល​ទិញ​លក់​ដី​ព្រៃ​សហគមន៍​ត្រពាំងធំ​ខាងត្បូង នេះ អាជ្ញាធរ​មូលដ្ឋាន​ទាំងនោះ​ឆ្លើយ​ថា ពួកគេ​មិន​ស្គាល់​អ្នក​ទិញ ឬ​អ្នក​លក់​ដី​សហគមន៍​ទាំងនោះ​ទេ ដូច្នេះ​ក៏​មិន​ដឹង​ថា តើ​ត្រូវ​វែក​មុខ​អ្នក​ទិញ និង​អ្នក​លក់​ដី​សហគមន៍​នោះ​តាម​វិធី​ណា​ដែរ។

លោក សំ សារូ បន្ត​ថា មេភូមិ​ព្រៃព្រាល អ្នកស្រី យស វណ្ណី និង​អនុភូមិ លោក ខឹម ណែវ គឺជា​អ្នក​ចេញ​មុខ​ជួល​ពលរដ្ឋ​ឲ្យ​កាប់​ឆ្ការ​ព្រៃ​សហគមន៍​នោះ​ដោយ​ផ្ទាល់។ ពលរដ្ឋ​ទាំងនោះ​ទទួល​បាន​ថ្លៃឈ្នួល​ក្នុង​ម្នាក់ ២៥​ម៉ឺន​រៀល​ក្នុង ១​ហិកតារ ដោយឡែក​សមាជិក​ក្រុមប្រឹក្សា​ឃុំ​ត្រពាំងធំ​ខាងត្បូង លោក ណិប អង ក៏​ជា​អ្នក​កាង​គ្រឿងចក្រ​ឈូស​ឆាយ​ព្រៃ​សហគមន៍​នេះ ដើម្បី​យក​ដី​លក់​ទៅ​ឲ្យ​ក្រុមហ៊ុន​ផង​ដែរ។

កាលពី​ខែ​កុម្ភៈ ឆ្នាំ​២០១៣ ក្រសួង​កសិកម្ម រុក្ខាប្រមាញ់ និង​នេសាទ បាន​ចេញ​ប្រកាស​ឲ្យ​បង្កើត​ព្រៃ​សហគមន៍​ត្រពាំងធំ​ខាងត្បូង ដែល​មាន​ទំហំ​ផ្ទៃដី​សរុប ៥៨៣​ហិកតារ ស្ថិត​ក្នុង​ឃុំ​ត្រពាំងធំ​ខាងត្បូង ស្រុក​ត្រាំកក់ ខេត្ត​តាកែវ ដើម្បី​ប្រើប្រាស់​អនុផល​ព្រៃឈើ និង​អភិរក្ស​ជីវចម្រុះ និង​អភិវឌ្ឍ​ព្រៃ​សហគមន៍​នេះ​ឲ្យ​មាន​និរន្តរភាព។

ព្រៃ​សហគមន៍​ក្នុង​ខេត្ត​តាកែវ ដែល​បាន​បង្កើត​ឡើង​ក្នុង​ឆ្នាំ​២០១៣ មាន ៦​សហគមន៍ និង​ត្រូវ​បាន​បែងចែក​ជា ៧​កន្លែង ដែល​មាន​ទំហំ​ផ្ទៃដី​សរុប​ជាង ៦៣០០​ហិកតារ ក្នុង​នោះ​រួម​មាន ព្រៃ​សហគមន៍​ត្រពាំងធំ​ខាងត្បូង ព្រៃ​សហគមន៍​មហាសី និង​ព្រៃ​សហគមន៍​ប៉ាយ៉ង់ការ ជាដើម។

ប្រធាន​គណៈកម្មាធិការ​នាយក​គណបក្ស​ប្រជាធិបតេយ្យ​មូលដ្ឋាន បណ្ឌិត យ៉ង សាំងកុមារ បាន​ប្រាប់​សារព័ត៌មាន The Cambodia Daily នៅ​ថ្ងៃ​ទី​៦ ខែ​កក្កដា នេះ​ថា លោក​ធ្លាប់​បាន​ចូលរួម​ជួយ​ប្រជា​សហគមន៍​ក្នុង​ការ​ថែរក្សា​ដី​ព្រៃ​សហគមន៍​នេះ​ផង​ដែរ​នា​ពេល​កន្លងមក ដែល​ធ្វើ​ឲ្យ​ព្រៃ​សហគមន៍​ទាំងនោះ​ដុះ​លូតលាស់​បាន​ល្អ​ដោយ​គ្មាន​ការ​កាប់​ទន្ទ្រាន​ធ្វើ​ជា​កម្មសិទ្ធិ​ពី​បុគ្គល​ណា​ម្នាក់​ឡើយ។

លោក​អះអាង​ថា បញ្ហា​នេះ ប្រសិនបើ​អាជ្ញាធរ​មូលដ្ឋាន​ចេញ​មុខ​ស្រាវជ្រាវ​ប្រាកដ​ជា​អាច​រក​ឃើញ​អ្នក​ទិញ និង​អ្នក​លក់​ដី​ព្រៃ​សហគមន៍​នេះ​ជាមិនខាន ព្រោះ​ថា​ការ​ទិញ​លក់​ដី​មិន​អាច​រំលង​មេភូមិ និង​មេឃុំ​នោះ​ទេ បើ​ពួកគាត់​មិន​ចេញ​លិខិត​បញ្ជាក់​សម្គាល់​កម្មសិទ្ធិ ក៏​មិន​មាន​អ្នក​ណា​ម្នាក់​ហ៊ាន​ទិញ ឬ​លក់​ដី​ទាំងនោះ​ឡើយ។

ជុំវិញ​បញ្ហា​នេះ សកម្មជន​ឃ្លាំមើល​ព្រៃឈើ រិះគន់​ថា អាជ្ញាធរ​ខ្មែរ​ក្រៅពី​ពូកែ​ខាង​តែ​ឆ្លើយ​ថា មិន​ដឹង ឆ្លើយ​ដាក់​គ្នា ពូកែ​ខាង​ប្រកែក និង​ច្រានចោល​ព័ត៌មាន គឺ​គ្មាន​ជំនាញ​អ្វី​ផ្សេង​នោះ​ទេ ប៉ុន្តែ​នៅ​ពេល​ដែល​មាន​ភស្តុតាង​ជាក់ស្តែង ពួកគេ​តែង​ប្រើ​លេស​ថា កំពុង​រង់ចាំ​ចំណាត់ការ​ពី​ថ្នាក់លើ ជាដើម។

សារព័ត៌មាន The Cambodia Daily នៅ​មិន​ទាន់​អាច​ទាក់ទង​មេឃុំ​ត្រពាំងធំ​ខាងត្បូង លោក សាន់ គឿន ដើម្បី​បំភ្លឺ​ពី​ការ​ចោទ​ប្រកាន់​នេះ​បាន​នៅឡើយ​ទេ នៅ​ថ្ងៃ​ទី​០៦ ខែ​កក្កដា៕

© 2021, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

សេចក្ដីរាយការណ៍ពិសេស