ក្រុមជនជាតិដើមភាគតិចព្នង រាប់រយគ្រួសាររស់នៅភូមិពូលូង សង្កាត់រមនា ក្រុងសែនមនោរម្យ ខេត្តមណ្ឌលគិរី នៅតែបន្តស្រែកដង្ហោយឱ្យរដ្ឋាភិបាលដកហូតដីភ្នំចំនួន២ ពីអតីតមេប៉េអិមខេត្តរតនគិរី គឹម រស្មី និងស្នងការនគរបាលរាជធានីភ្នំពេញ លោក ស ថេត ជាសម្បត្តិរដ្ឋវិញ ព្រោះដីតំបន់នោះជាកន្លែងអាស្រ័យផលយ៉ាងសំខាន់របស់ជនជាតិដើមភាគតិចព្នង។
តំណាងជនជាតិដើមភាគតិចព្នង ថ្លែងក្នុងលក្ខខណ្ឌមិនបញ្ចេញឈ្មោះ ឲ្យដឹងថា ស្នងការរាជធានីភ្នំពេញ លោក ស ថេត និងអតីតមេបញ្ជាការអាវុធហត្ថខេត្តរតនគិរី លោក គឹម រស្មី បានទិញដីភ្នំទ្រីង និងភ្នំពពេល ដោយខុសច្បាប់ ព្រោះដីតំបន់នោះជាដីសាធារណៈរបស់រដ្ឋ ដែលអ្នកភូមិធ្វើចម្ការវិលជុំ ឃ្វាលគោ និងអាស្រ័យផលតាំងពីដើមរៀងមក។
អ្នកភូមិថា ក្នុងពេលដែលពលរដ្ឋតវ៉ាទាមទារដំណោះស្រាយ អាជ្ញាធរមិនត្រឹមតែមិនដោះស្រាយសំណើរបស់ពួកគាត់ទេ តែបែរជាអនុញ្ញាតឱ្យក្រុមអ្នកមានអំណាចទាំងនេះសាងសង់របង និងសំណង់រឹងមាំ និងផ្ទះលម្ហែព័ទ្ធជុំវិញភ្នំទាំងពីរនេះលើផ្ទៃដីជិត ២០ហិកតារ។ រីឯជនជាតិដើមភាគតិច មិនអាចចេញចូលតំបន់នោះបានទេ។
កាលពីចុងខែមិថុនា កន្លងទៅ តំណាងជនជាតិដើមភាគតិចព្នង ៤នាក់ បានធ្វើដំណើរទៅដាក់ញត្តិនៅក្រសួងមហាផ្ទៃ និងក្រសួងដែនដី នៅរាជធានីភ្នំពេញ ដើម្បីជំរុញឱ្យស្ថាប័នកំពូលថ្នាក់ជាតិទាំងនេះដកហូតដីទាំងនោះប្រគល់ជូនប្រជាសហគមន៍ប្រើប្រាស់រួម ដើម្បីប្រកបរបរចិញ្ចឹមជីវិតដូចដើមវិញ។
ខ្លឹមសារញត្តិ ឱ្យដឹងថា លោក ស ថេត និងលោក គឹម រស្មី បានទិញដីខុសច្បាប់នៅតំបន់នោះ ប៉ះពាល់ជីវភាពរស់នៅ និងកន្លែងអាស្រ័យផលចិញ្ចឹមជីវិតរបស់ជនជាតិដើមព្នងរាប់រយគ្រួសារ។ មកទល់ពេលនេះ បុគ្គលទាំងនេះបានព័ទ្ធរបងលួសជុំវិញភ្នំចំនួន២ ទំហំជិត ២០ហិកតារ ហើយដុតបំផ្លាញផ្ទះសហគមន៍ជាច្រើនខ្នង។
The Cambodia Daily នៅមិនទាន់អាចសុំការបំភ្លឺរឿងនេះពីអតីតមេបញ្ជាការអាវុធហត្ថខេត្តរតនគិរី លោក គឹម រស្មី និងស្នងការរាជធានីភ្នំពេញ លោក ស ថេត បាននៅឡើយទេ។
តំណាងជនជាតិដើមភាគតិចព្នង អ្នកស្រី ម៉ុប ឈីង បានប្រាប់ក្រុមយុវជនស្នេហាបរិស្ថានថា ដីភ្នំទាំងនេះជាឆ្នាំងបាយ និងជាកន្លែងធ្វើកសិកម្មដាំដុះរួមរបស់ជនជាតិដើមភាគតិច ប្រសិនបើរបូតទៅបុគ្គលមានអំណាច អ្នកភូមិនឹងគ្មានទីកន្លែងបង្កបង្កើនផលទៀតនោះទេ។
អ្នកស្រីថា មកទល់ពេលនេះ អាជ្ញាធរជាតិនៅមិនទាន់បញ្ឈប់សកម្មភាពសាងសង់សំណង់រឹងមាំ និងរបងរំលោភយកដីភ្នំទាំងពីរនេះនៅឡើយទេ។
សហគមន៍ជនជាតិដើមភាគតិច ឱ្យដឹងថា កន្លងទៅ មានពលរដ្ឋ ៣នាក់បានឃុបឃិតគ្នាលក់ដីភ្នំទ្រីង និងភ្នំពពេល ជាប្រភេទសមូហភាពរបស់អ្នកភូមិជិត ២០ហិកតារ (១៩) ទៅឱ្យលោក ស ថេត និងលោក គឹម រស្មី ទាំងរំលោភច្បាប់។ បញ្ហានេះ អ្នកភូមិបានស្វែងរកដំណោះស្រាយពីអាជ្ញាធរមូលដ្ឋានរហូតដល់ថ្នាក់ជាតិ នៅមិនទាន់ទទួលបានផលនៅឡើយទេ។
ភ្នំទ្រីង និងភ្នំពពេល មានផ្ទៃដីជិត ២០ហិកតារ មានទេសភាពស្រស់បំព្រង មានព្រៃឈើដុះព័ទ្ធជុំវិញជើងភ្នំ ទឹកអូរធម្មជាតិ មានវាលស្មៅខៀវស្រងាត់ និងមានចម្ការវិលជុំដែលជនជាតិដើមភាគតិចព្នងជាច្រើនគ្រួសារដាំដុះ និងចិញ្ចឹមគោក្របីតាំងពីដូនតាមក៕