ក្រុមអ្នកតស៊ូមតិសម្ដែងការព្រួយបារម្ភថា វៀតណាមអាចនឹងបន្តព្យាយាមលេងល្បែងនយោបាយឈ្លានពានកម្ពុជាបន្តទៀតតាមរូបភាពបង្កើតឲ្យមានគណបក្សប្រឆាំងមួយនៅកម្ពុជា ដើម្បីឲ្យពួកគេអាចកាច់ចង្កូតរបស់កម្ពុជាបានទាំងស្រុង និងកាន់តែរឹងមាំនៅពេលអនាគត។
អ្នកវិភាគនយោបាយ សង្គម និងជាអនុប្រធានក្រុមប្រឹក្សាភិបាលនៃចលនានិស្សិតដើម្បីលទ្ធិប្រជាធិបតេយ្យ លោក គឹម សុខ បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីថ្ងៃទី១៩ ខែកក្កដា ឆ្នាំ២០២១ ថា នៅពេលនេះចៅហ្វាយចាស់របស់លោក ហ៊ុន សែន គឺរដ្ឋាភិបាលក្រុងហាណូយ បានដឹងយ៉ាងច្បាស់ថា មេដឹកនាំកម្ពុជាដែលខ្លួនបានលើកបន្តុបកាលពីឆ្នាំ១៩៨៥ នោះ បានងាកទៅរកមហាអំណាចចិនពាក់កណ្តាលទៅហើយ ដែលមិនស្ថិតក្រោមឥទ្ធិពលពួកគេ ១០០% ដូចកាលពីពេលមុនទៀតនោះទេ។
លោកអះអាងថា កម្លាំងវៀតណាមដែលកំពុងបង្កប់នៅបណ្ដាញផ្ទៃក្នុងរបស់រដ្ឋាភិបាលកម្ពុជាសព្វថ្ងៃទាំងស៊ីវិល និងកងទ័ព ព្រមទាំងបណ្ដាញវៀតណាមទាំងនៅថ្នាក់រាជធានី រហូតដល់អ្នករស់នៅតាមដងទន្លេ គឺពិតជាច្រើនណាស់ ហើយកម្លាំងនេះគឺអាចគាំទ្របក្សប្រឆាំងដែលគេបង្កើតឡើងឲ្យមានកៅអីនៅក្នុងរដ្ឋសភាកម្ពុជា ដើម្បីបន្លំភ្នែកពលរដ្ឋខ្មែរបានយ៉ាងងាយ។
លោក គឹម សុខ បញ្ជាក់ថា ប្រសិនរដ្ឋាភិបាលក្រុងហាណូយ អាចរៀបផែនការចូលផ្ទៃក្នុងកម្ពុជាបានដល់កម្រិតនេះ នោះវាគឺជាគ្រោះថ្នាក់ធំណាស់សម្រាប់កម្ពុជា ពីព្រោះជនជាតិវៀតណាមហ៊ានធ្វើគ្រប់យ៉ាងដើម្បីផលប្រយោជន៍ប្រទេសជាតិ ប្រជាជន និងការសម្រេចមហិច្ឆតាឈ្លានពានទឹកដីរបស់ពួកគេផងដែរ។
លោកបញ្ជាក់ថា ជាក់ស្តែងមុនថ្ងៃទី៧ ខែមករា ឆ្នាំ១៩៧៩ វៀតណាមបានបញ្ចុះបញ្ចូលឲ្យព្រះអង្គម្ចាស់ នរោត្តម រណឫទ្ធិ ដឹកនាំចលនាដែលរដ្ឋាភិបាលក្រុងហាណូយបានបង្កើតឡើង ដើម្បីឈ្លានពានកម្ពុជានៅពេលនោះ ប៉ុន្តែព្រះអង្គម្ចាស់ នរោត្តម រណឫទ្ធិ មិនព្រម ដូច្នេះវៀតណាម ក៏បានជ្រើសរើសក្រុមខ្មែរវៀតម៉ិញ ជាពិសេសក្រុមលោក ហ៊ុន សែន ជាអ្នកអនុវត្តផែនការរបស់ពួកគេជំនួសវិញរហូតដល់សព្វថ្ងៃនេះតែម្តង។
មន្ត្រីជាន់ខ្ពស់បក្សប្រឆាំង លោក មាជ សុវណ្ណារ៉ា បានប្រាប់សារព័ត៌មាន The Cambodia Daily នៅថ្ងៃទី២១ ខែកក្កដា ថា បទពិសោធន៍ប្រវត្តិសាស្ត្ររបស់គណបក្សប្រជាជនកម្ពុជា ដែលដឹកនាំដោយក្រុមលោក ហ៊ុន សែន គឺជាគណបក្សដែលវៀតណាម ជាអ្នកបង្កើតឡើងកាលពីឆ្នាំ១៩៥១ មកម្ល៉េះ។
លោកសម្ដែងការព្រួយបារម្ភថា កងទ័ពវៀតណាមជាង ២០ម៉ឺននាក់ដែលឈ្លានពានចូលកម្ពុជា វាយរំលំរបបខ្មែរក្រហមកាលពីឆ្នាំ១៩៧៩ មិនដឹងថាពួកគេបានចេញពីកម្ពុជា ឬក៏អត់នោះទេ ហើយបើពួកគេមិនវិលត្រឡប់ទៅប្រទេសវៀតណាម វិញទេ ដោយបន្តរស់នៅកម្ពុជាទៀត តើពួកគេនឹងមានកូនចៅច្រើនប៉ុនណា ស្របពេលដែលសមាគមវៀតណាមនៅកម្ពុជា បានយកចិត្តទុកដាក់លើការរស់នៅរបស់អ្នកទាំងនោះរហូតមក។
លោក មាជ សុវណ្ណារ៉ា បញ្ជាក់ថា មហិច្ឆតាឈ្លានពានទឹកដីរបស់ប្រទេសវៀតណាម គឺមិនមានថ្ងៃបញ្ឈប់នោះទេ ដូច្នេះមធ្យោបាយដែលពួកគេអាចឈ្លានពានដោយស្ងាត់ៗ និងកាន់តែចាក់ឫសចូលជ្រៅទៅក្នុងកិច្ចការជាតិរបស់ខ្មែរ នោះគឺក្មេងជំនាន់ក្រោយដែលជាកូនៗរបស់អតីតទាហានវៀតណាមនៅកម្ពុជា ដែលត្រូវបានបណ្តុះបណ្តាលឲ្យជ្រៀតចូលកាន់តែជ្រៅក្នុងសរសៃឈាមក្រសួងស្ថាប័នជាតិ ដើម្បីគ្រប់គ្រងកិច្ចការកម្ពុជាទាំងមូលតែម្តងទៅថ្ងៃមុខ។
គណបក្សប្រជាជនកម្ពុជា ដែលមានឈ្មោះដើមថា គណបក្សប្រជាជនបដិវត្តន៍កម្ពុជា ត្រូវបានបង្កើតឡើងក្នុងឆ្នាំ១៩៥១ ដោយលោក សឺន ង៉ុកមិញ ហៅអាចារ្យ មាន ដែលមានឈ្មោះជាភាសាវៀតណាមថា ផាម វ៉ាន់ ហួ (Phạm Văn Hua)។
ប៉ុន្តែលោក ផាម វ៉ាន់ ហួ ឬអាចារ្យ មាន នេះមានប្រវត្តិពិតជាអតីតសមាជិកបក្សកុម្មុយនីស្តឥណ្ឌូចិន ដែលត្រូវបានបង្កើតឡើងដោយមេដឹកនាំវៀតណាម លោក ហូ ជីមិញ (Ho Chi Minh) តាំងពីឆ្នាំ១៩៣០ មកម្ល៉េះ។ ក្រុមអ្នកឃ្លាំមើលសង្គមរិះគន់ថា បើនៅតែដឹកនាំប្រទេសតាមរបៀបលោក ហ៊ុន សែន ដូចសព្វថ្ងៃនេះ យួននឹងនៅតែបន្តឈ្លានពានលើបូរណភាពទឹកដីខ្មែររហូតគ្មានថ្ងៃបញ្ចប់នោះទេ៕