រដ្ឋាភិបាលកម្ពុជាសម្រេចដាក់ចេញនូវផែនការមេដើម្បីអភិវឌ្ឍវិស័យទេសចរណ៍ខេត្តមណ្ឌលគិរី ពីឆ្នាំ២០២១ រហូតដល់ឆ្នាំ២០៣៥ ដើម្បីជំរុញការអភិវឌ្ឍខេត្តនេះឲ្យទៅជាខេត្តគោលដៅទេសចរណ៍លំដាប់អន្តរជាតិ និងជាខេត្តដ៏សំខាន់ក្នុងការរួមចំណែកធ្វើឱ្យតំបន់ភូមិភាគឦសានដែលមានខេត្តមណ្ឌលគិរី ជាស្នូលក្លាយជាប៉ូលសេដ្ឋកិច្ចទី៤ របស់កម្ពុជា។
ក្រសួងទេសចរណ៍កម្ពុជា បានសរសេរលើទំព័រ Facebook របស់ខ្លួនដោយភ្ជាប់ជាមួយខ្លឹមសារសង្ខេបប្រតិបត្តិនៃការអភិវឌ្ឍវិស័យទេសចរណ៍ខេត្តមណ្ឌលគិរី ថា រដ្ឋាភិបាលកម្ពុជាមានគោលបំណងលើកកម្ពស់ការអភិវឌ្ឍវិស័យទេសចរណ៍ខេត្តមណ្ឌលគិរី ឱ្យក្លាយជាវិស័យអាទិភាពមួយ ដើម្បីរួមចំណែកបង្កើនប្រាក់ចំណូល បង្កើនការងារ និងកាត់បន្ថយភាពក្រីក្ររបស់ពលរដ្ឋខ្មែរ។
ប្រភពដដែលអះអាងថា ដើម្បីធានាប្រសិទ្ធភាពនៃការអនុវត្តផែនការអភិវឌ្ឍន៍នេះ រដ្ឋាភិបាលនឹងវាយតម្លៃផែនការមេនេះជា ៣ដំណាក់កាលរៀងរាល់ ៥ឆ្នាំម្តង ដោយគណៈកម្មការអន្តរក្រសួង គឺលើកទី១ នៅឆ្នាំ២០២៥ លើកទី២ នៅឆ្នាំ២០៣០ និងលើកទី៣ នៅឆ្នាំ២០៣៥ ដើម្បីដាក់ចេញនូវផែនការសម្រាប់រយៈពេលបន្ទាប់។
ក្រសួងទេសចរណ៍ បញ្ជាក់ថា ដើម្បីសម្រេចគោលដៅនេះ រដ្ឋាភិបាលសម្រេចដាក់ចេញនូវទិសដៅយុទ្ធសាស្ត្រអាទិភាពមួយចំនួន ដូចជា៖
- ការកំណត់តំបន់ទេសចរណ៍អាទិភាពសម្រាប់ការអភិវឌ្ឍ
- អភិវឌ្ឍផលិតផលទេសចរណ៍
- ពង្រឹងគុណភាពធនធានមនុស្ស
- និងការធ្វើសមាហរណកម្មក្នុងក្របខ័ណ្ឌជាតិ និងតំបន់ជាដើម។
ការដាក់ចេញនូវគម្រោងនេះ ធ្វើឡើងដើម្បីជំរុញវិស័យទេសចរណ៍នៅខេត្តមណ្ឌលគិរី ឲ្យកាន់តែមានសក្ដានុពល ជាពិសេសវិស័យអេកូទេសចរណ៍ដែលមានភាពទាក់ទាញជាច្រើនទម្រង់ និងច្រើនប្រភេទក្នុងពេលបច្ចុប្បន្ននេះ។
នៅចុងឆ្នាំ២០២១ នេះ រាជរដ្ឋាភិបាលកម្ពុជាសម្រេចដាក់ចេញនូវផែនការមេអភិវឌ្ឍវិស័យទេសចរណ៍ខេត្តមណ្ឌលគិរី ចាប់ពីឆ្នាំ២០២១ រហូតដល់ឆ្នាំ២០៣៥ ដើម្បីអភិវឌ្ឍខេត្តនេះឲ្យទៅជាខេត្តគោលដៅទេសចរណ៍មួយក្នុងការរួមចំណែកការអភិវឌ្ឍប្រកបដោយនិរន្តរភាព និងការអភិរក្សធនធានធម្មជាតិផងដែរ។
ក្រសួងទេសចរណ៍ បានព្យាករកាលពីពេលថ្មីៗនេះផងដែរថា នៅឆ្នាំ២០៣៥ ចំនួនភ្ញៀវអន្តរជាតិទៅកាន់ខេត្តមណ្ឌលគិរី នឹងកើនឡើងប្រមាណ ៩០ម៉ឺននាក់ ស្របពេលដែលចំនួនភ្ញៀវក្នុងស្រុកនឹងកើនឡើងដល់ជាង ២លាននាក់ ដែលនឹងបង្កើតការងារប្រមាណ ៨ម៉ឺនកន្លែង និងបង្កើតចំណូលដោយផ្ទាល់ប្រមាណ ៥០០លានដុល្លារ និងដោយប្រយោលប្រមាណ ១ពាន់លានដុល្លារក្នុង១ឆ្នាំៗ។
ប្រធានក្រុមប្រឹក្សាភិបាលនៃចលនានិស្សិតដើម្បីលទ្ធិប្រជាធិបតេយ្យ លោក ម៉ែន ណាត បានប្រាប់សារព័ត៌មាន The Cambodia Daily នៅថ្ងៃទី១៧ សីហា ថា ជាធម្មតាការលើកឡើងពីគម្រោងរបស់រដ្ឋាភិបាលកម្ពុជាក្នុងការអភិវឌ្ឍ គឺតែងបង្ហាញពីភាពវិជ្ជមានជានិច្ច ប៉ុន្តែការអនុវត្តជាក់ស្តែង គឺតែងតែផ្ទុយស្រឡះពីការលើកឡើងរបស់ពួកគេទាំងស្រុង។
លោកលើកឡើងថា ការរៀបចំអភិវឌ្ឍ គឺជារឿងល្អសម្រាប់លើកស្ទួយសេដ្ឋកិច្ចជាតិ និងប្រជាជន ប៉ុន្តែរដ្ឋាភិបាលត្រូវសិក្សាឲ្យបានច្បាស់លាស់ពីផលប៉ះពាល់ទៅលើជីវភាពរស់នៅរបស់ពលរដ្ឋ ប្រសិនបើផលប៉ះពាល់នោះមានទំហំធំធេងដែលមិនអាចជួសជុលបាន រដ្ឋត្រូវតែបញ្ឈប់ការអភិវឌ្ឍនោះជាបន្ទាប់ ដើម្បីចៀសវាងពីការអភិវឌ្ឍមួយដែលមិនបានជួយដល់ពលរដ្ឋឲ្យប្រសើរឡើង តែបែរជារុញឲ្យប្រជាជនកាន់តែរងគ្រោះទៅវិញ។
លោក ម៉ែន ណាត បញ្ជាក់ថា លោកមានការព្រួយបារម្ភយ៉ាងខ្លាំង ព្រោះថាគម្រោងអភិវឌ្ឍន៍កន្លងមកតែងតែធ្វើឲ្យពលរដ្ឋរងគ្រោះស្ទើរគ្រប់ទីកន្លែង ដោយសាររដ្ឋាភិបាលចេះតែបំពាន បើទោះបីជាខ្លួនដឹងថាការអភិវឌ្ឍនោះនឹងផ្តល់ផលប៉ះពាល់ជាអវិជ្ជមានធ្ងន់ធ្ងរដល់ពលរដ្ឋទៅថ្ងៃមុខក៏ដោយ ជាក់ស្តែងដូចការសាងសង់ទំនប់វារីអគ្គិសនីសេសានក្រោម២ ជាដើម ដែលធ្វើឲ្យពលរដ្ឋនៅទីនោះរងគ្រោះទឹកជំនន់រៀងរាល់ឆ្នាំ។
ខេត្តមណ្ឌលគិរី គឺជាខេត្តមួយស្ថិតក្នុងតំបន់ភ្នំ និងតំបន់ខ្ពង់រាបនៅភាគឦសាននៃប្រទេសកម្ពុជា ដែលមានទំហំផ្ទៃដីសរុបជាង ១ម៉ឺន ៤ពាន់គីឡូម៉ែត្រក្រឡា ជាខេត្តមួយដែលមានតំបន់ទេសចរណ៍ធម្មជាតិច្រើន ដូចជារមណីយដ្ឋានទឹកជ្រោះប៊ូស្រា រមណីយដ្ឋានទឹកជ្រោះសែនមនោរម្យ និងរមណីយដ្ឋានសមុទ្រឈើ និងវាលស្មៅ ជាដើម៕