មន្ត្រីជាន់ខ្ពស់បក្សប្រឆាំង លើកឡើងថា ការណែនាំរបស់អតីតមេបក្សប្រឆាំង លោក សម រង្ស៊ី ទៅកាន់អ្នកគាំទ្រឱ្យបញ្ឈប់ការវាយប្រហារគ្នាជាលក្ខណៈបុគ្គល គឺជារឿងល្អ ប៉ុន្តែការអំពាវនាវនៅពេលនេះហាក់ហួសពេលទៅហើយសម្រាប់ការស្ដារកម្លាំងបក្សប្រឆាំងឲ្យប្រជាពលរដ្ឋមានទំនុកចិត្តឡើងវិញនោះ។
ការអះអាងរបស់មន្ត្រីបក្សប្រឆាំងបែបនេះ ធ្វើឡើងបន្ទាប់ពីលោក សម រង្ស៊ី អតីតប្រធានគណបក្សសង្គ្រោះជាតិ បានណែនាំទៅកាន់សមាជិកគណបក្សសង្គ្រោះជាតិ ក្នុងនៅរដ្ឋ California សហរដ្ឋអាមេរិក ឲ្យឈប់ជេរប្រមាថបន្តទៀតកាលពីពេលថ្មីៗនេះ។
មន្ត្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណារ៉ា បានប្រាប់សារព័ត៌មាន The Cambodia Daily នៅថ្ងៃទី២៤ ខែសីហា ថា ក្រោយបក្សប្រឆាំងត្រូវបានរំលាយ មន្ត្រីគណបក្សសង្គ្រោះជាតិភាគីលោក សម រង្ស៊ី តែងប្រើវប្បធម៌ជេរប្រមាថ លាបពណ៌ ដែលធ្វើឲ្យមានការបែកបាក់ផ្ទៃក្នុងក្រុមប្រឆាំងយ៉ាងធ្ងន់ធ្ងរ ដោយការចោទប្រកាន់ដែលគ្មានភស្តុតាងកន្លងមក ដូចជាការចោទមកលើមន្ត្រីបក្សប្រឆាំងដូចគ្នាថា «ស៊ីឈ្នួលជាប់គុក» ជាដើម។
លោកអះអាងថា ក្នុងនាមជាបក្សប្រឆាំង មិនត្រូវបង្កើតឲ្យមានវប្បធម៌មិនល្អដូចបក្សកាន់អំណាចនោះទេ ព្រោះថាកិច្ចការរបស់បក្សប្រឆាំង គឺត្រូវដឹកនាំពលរដ្ឋអនុវត្តលើផ្លូវត្រឹមត្រូវ លើភាពថ្លៃថ្នូរ ដើម្បីផ្តល់ទំនុកចិត្តដល់ពលរដ្ឋនៅពេលដែលខ្លួនឈ្នះឆ្នោតទៅដឹកនាំប្រទេសជាតិ មិនប្រឆាំងដើម្បីតែការជេរប្រមាថ ឬលាបពណ៌នោះទេ។
លោក មាជ សុវណ្ណារ៉ា បញ្ជាក់ថា បើបក្សប្រឆាំងគ្រាន់តែចេះជេរប្រមាថ ឬលាបពណ៌អ្នកដទៃ នោះមិនមែនជាមធ្យោបាយក្នុងការកសាងកម្លាំងដឹកនាំប្រទេសឡើយ ជាងនេះទៀតក៏នាំឲ្យមានការបែកបាក់ផ្ទៃក្នុងខ្លួនឯងកាន់តែខ្លាំងផងដែរ ព្រោះកម្លាំងរួបរួមរបស់ជាតិ គឺពឹងផ្អែកលើអំពើល្អ មិនមែនពឹងផ្អែកលើការប្រព្រឹត្តអំពើទុច្ចរិតនោះឡើយ។
ចំណែកអ្នកវិភាគនយោបាយ សង្គម និងជាអនុប្រធានក្រុមប្រឹក្សាភិបាលនៃចលនានិស្សិតដើម្បីលទ្ធិប្រជាធិបតេយ្យ លោក គឹម សុខ បានសរសេរលើគណនី Facebook របស់លោកនៅថ្ងៃទី២៤ សីហា ថា ដើម្បីឲ្យការអំពាវនាវរបស់លោក សម រង្ស៊ី អាចយកជាការបាន មេដឹកនាំប្រឆាំងរូបនេះត្រូវហ៊ានទទួលស្គាល់ថា ការបែកបាក់កន្លងមកគឺមកពីការប្រជែងមុខមាត់គ្នារវាងពួកមេដឹកនាំកំពូលៗ និងអ្នកហែហមដែលមិនចេះគោរពច្បាប់ផ្ទៃក្នុងគណបក្សដែលខ្លួនបានបង្កើតកន្លងមក។
លោកអះអាងថា លោក សម រង្ស៊ី ត្រូវហ៊ានទទួលស្គាល់កំហុសក្នុងនាមខ្លួនជាប្រមុខចលនានយោបាយមួយ ក្នុងនោះត្រូវហៅមេដឹកនាំផ្សេងទៀតដែលមានវិវាទនឹងគ្នាកន្លងមក ដើម្បីសម្រុះសម្រួលគ្នាឲ្យកាន់តែឆាប់ បើទោះបីជាពួកគេបានចេញទៅបើកបក្សថ្មី និងអ្នកដែលសម្ងំមិនទាន់បើកបក្សថ្មីក៏ដោយ។
លោក គឹម សុខ អះអាងថា ដំណាក់កាលនេះនៅសល់ពេលតិចតួចណាស់ ដូច្នេះប្រសិនបើមេដឹកនាំរូបនេះនៅតែប្រើសារនយោបាយត្រឹមតែអង្អែលចិត្តអ្នកគាំទ្រ ដូចការអះអាងថា «សម រង្ស៊ី និងលោក កឹម សុខា ជាមនុស្សតែមួយ» ដូចពេលកន្លងមក ហើយមិនធ្វើសកម្មភាពឲ្យប្រាកដប្រជានោះ អាចនឹងអស់ពេលវេលាសម្រាប់លុបស្នាមរបួសដែលបែកបាក់គ្នាជាក់ជាមិនខាន។
កាលពីថ្ងៃទី២៣ ខែសីហា ឆ្នាំ២០២១ អតីតមេដឹកនាំបក្សប្រឆាំង លោក សម រង្ស៊ី បានអំពាវនាវទៅកាន់អ្នកគាំទ្រក្នុងពិធីជួបសំណេះសំណាលជាមួយសមាជិកគណបក្សសង្គ្រោះជាតិ ប្រចាំនៅរដ្ឋ California សហរដ្ឋអាមេរិក ឱ្យបញ្ឈប់ការវាយប្រហារគ្នាជាលក្ខណៈបុគ្គល ហើយងាកមកគិតពីប្រយោជន៍ជាតិ ពង្រឹងផ្ទៃក្នុងបក្ស ដើម្បីជំរុញដំណើរការប្រជាធិបតេយ្យឲ្យមានឡើងវិញនៅកម្ពុជា។
ក្រុមអ្នកសង្កេតការណ៍រិះគន់ថា មិនមែនតែសមាជិកបក្សប្រឆាំងប៉ុណ្ណោះទេដែលត្រូវបញ្ឈប់ការជេរប្រមាថដែលនាំឲ្យបែកបាក់ផ្ទៃក្នុងបក្ស សូម្បីលោក សម រង្ស៊ី ខ្លួនឯងក៏ត្រូវបញ្ឈប់ការជេរប្រមាថព្រះមហាក្សត្រដែលនាំឲ្យបែកបាក់ជាតិផងដែរ ព្រោះថាទង្វើរបស់លោក គឺជាគំរូសម្រាប់អ្នកគាំទ្រដើម្បីយកទៅអនុវត្តទៅថ្ងៃមុខ។
កាលពីអំឡុងឆ្នាំ២០២០ សមាជិកបក្សប្រឆាំងភាគីលោក សម រង្ស៊ី បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily ថា បណ្ដាញសមាជិកបក្សប្រឆាំងភាគីលោក សម រង្ស៊ី បានបង្កើតក្រុមជេរប្រមាថ លាបពណ៌ចំពោះបុគ្គលណាដែលមិនស្របនឹងគំនិតពួកគេ សូម្បីព្រះមហាក្សត្រខ្មែរក៏ពួកគេមិនលើកលែងនោះដែរ៕