 ដែលបានចាត់វិធានការលើរឿងពុករលួយរបស់ប្រធានការិយាល័យរដ្ឋបាលនៃមន្ទីរសុខាភិបាលខេត្តក្រចេះ លោក ទឺ ប៊ុនឡេង ចាត់ការតាមច្បាប់រកយុត្តិធម៌ឲ្យមន្ត្រីសុខាភិបាល និងក្រុមគ្រូពេទ្យជាប់កិច្ចសន្យា។){kind=link}
ថ្នាក់ដឹកនាំ និងមន្ត្រីរាជការផ្នែកសុខាភិបាលទូទាំងខេត្តក្រចេះ សាទរចំពោះក្រសួងសុខាភិបាល ជាពិសេសអង្គភាពប្រឆាំងអំពើពុករលួយ (ACU) ដែលបានចាត់វិធានការលើរឿងពុករលួយរបស់ប្រធានការិយាល័យរដ្ឋបាលនៃមន្ទីរសុខាភិបាលខេត្តក្រចេះ លោក ទឺ ប៊ុនឡេង ចាត់ការតាមច្បាប់រកយុត្តិធម៌ឲ្យមន្ត្រីសុខាភិបាល និងក្រុមគ្រូពេទ្យជាប់កិច្ចសន្យា។
វិធានការច្បាប់របស់មន្ត្រីអង្គភាពប្រឆាំងអំពើពុករលួយទៅលើឈ្មោះ ទឺ ប៊ុនឡេង គឺធ្វើឡើងបន្ទាប់ពីមន្ត្រីសុខាភិបាល និងគ្រូពេទ្យដាក់លិខិតស្នើសុំកិច្ចអន្តរាគមន៍ប្ដឹងទៅលោក ម៉ម ប៊ុនហេង រដ្ឋមន្ត្រីក្រសួងសុខាភិបាល និងលោកអភិបាលខេត្តក្រចេះ ជាពិសេសបានផ្ញើសំណូមពរតាមប្រព័ន្ធផ្សព្វផ្សាយជូនទៅលោកនាយករដ្ឋមន្ត្រី ហ៊ុន សែន ឲ្យជួយបើការស៊ើបអង្កេតពីការប្រព្រឹត្តជនពុករលួយរូបនេះ។
ប្រភពពីមន្ត្រីសុខាភិបាលដែលសុំមិនបញ្ចេញឈ្មោះ បានបញ្ជាក់ថា បច្ចុប្បន្នរឿងអាស្រូវពុករលួយរបស់លោក ទឺ ប៊ុនឡេង ត្រូវបានអង្គភាពប្រឆាំងអំពើពុករលួយចុះស៊ើបអង្កេតហើយ ព្រមទាំងចាប់បង្ខំឲ្យលោក ទឺ ប៊ុនឡេង ត្រូវសងលុយទៅឲ្យមន្ត្រីជាប់កិច្ចសន្យាចំនួន ១៣០នាក់នោះវិញ។
ទោះយ៉ាងណា ក្នុងលិខិតរបស់មន្ត្រីសុខាភិបាលនៅទូទាំងខេត្តក្រចេះ បានសរសេររៀបរាប់អំពីចរិតមិនសមរម្យរបស់លោក ទឺ ប៊ុនឡេង ដែលតែងធ្វើសកម្មភាពសម្លុត គំរាមកំហែង គាបសង្កត់ពួកគាត់ ហើយបង្កើតបក្ខពួកពុករលួយ។
មិនត្រឹមតែប៉ុណ្ណោះ លោក ទឺ ប៊ុនឡេង ហៅមន្ត្រីស្ម័គ្រចិត្តដែលបម្រើការក្នុងបេសកកម្មប្រឆាំងជំងឺ Covid-19 ចំនួន ១២៩នាក់យកទៅគាប ឬគោះយកលុយក្នុងម្នាក់ៗចាប់ពី ១ម៉ឺនដុល្លារទៅ ១ម៉ឺន ៣ពាន់ដុល្លារអាមេរិក ដើម្បីជាថ្នូរបានជាប់ជាមន្ត្រីក្របខ័ណ្ឌរដ្ឋពេញសិទ្ធិ។
លោក ទឺ ប៊ុនឡេង ហៅថា «ពេទ្យ ទូច» ត្រូវមន្ត្រីបម្រើការងារនៅតាមមន្ទីរពេទ្យបង្អែកស្រុកប្រតិបត្តិ និងមណ្ឌលសុខភាពទាំងអស់នៃខេត្តក្រចេះ ចោទថាជាដៃជើងរកលុយឱ្យលោក ឈ្នាង សុវុត្ថា ប្រធានមន្ទីរសុខាភិបាលខេត្តក្រចេះ។
លិខិតអនាមិករបស់មន្ត្រីសុខាភិបាលខេត្តក្រចេះ ចុះថ្ងៃទី១៩ ខែមិថុនា ចោទលោក ទឺ ប៊ុនឡេង ថាយកតំណែងជាប្រធានការិយាល័យរដ្ឋបាលនៃមន្ទីរសុខាភិបាលខេត្តក្រចេះ ទៅធ្វើជាមុខរបរ ដោយផ្លាស់ប្ដូរទីកន្លែងធ្វើការរបស់បុគ្គលិកមន្ត្រីស្រេចតែអំពើចិត្ត មិនឆ្លងយោបល់ ឬការដឹងឮពីអ្នកគ្រប់គ្រងនៅថ្នាក់ក្រោមនោះទេ។
ប្រភពដដែលឲ្យដឹងថា រាល់ការផ្លាស់ប្ដូរកន្លែងធ្វើការរបស់មន្ត្រីសុខាភិបាលនីមួយៗ គឺបុគ្គលរូបនេះតម្រូវឲ្យបង់ប្រាក់ជូនជនពុករលួយរូបនេះក្នុងម្នាក់ចាប់ពី ៣ពាន់ដុល្លារទៅ ៤ពាន់ដុល្លារ។
លិខិតអនាមិករបស់មន្ត្រីសុខាភិបាលខេត្តក្រចេះ ដដែលនេះបានរៀបរាប់ពីឥរិយាបថខុសឆ្គងរបស់លោក ទឺ ប៊ុនឡេង ដែលធ្វើការតាមរយៈការក្លែងបន្លំឯកសារសាធារណៈរបស់មន្ត្រីសុខាភិបាល ដូចជាការប្រព្រឹត្តអំពើពុករលួយ និងបក្ខពួកនិយមយ៉ាងសន្ធឹកសន្ធាប់ ដោយរាប់ចាប់តាំងពីការជ្រើសរើសបុគ្គលិក ឬកម្មករផ្នែកសុខាភិបាលជាដើម។ ចំណែកតម្លៃនៃអំពើពុករលួយដែលមន្ត្រីសុខាភិបាលបានចោទប្រកាន់នោះ មានចន្លោះពី ១ពាន់ដុល្លារទៅរហូតដល់ជាង ១ម៉ឺនដុល្លារ តាមតួនាទី និងប្រភេទការងារដែលមន្ត្រីរូបនោះអាចទារបាន។
ទោះជាយ៉ាងណាក៏ដោយ កន្លងមក លោក ទឺ ប៊ុនឡេង ហៅ «ពេទ្យ ទូច» ធ្លាប់បានបដិសេធថា រូបលោកមិនបានយកលុយពីមន្ត្រីស្ម័គ្រចិត្តជាប់កិច្ចសន្យាបម្រើការងារក្នុងបេសកកម្មប្រឆាំងជំងឺ Covid-19 ដូចការចោទនោះទេ ប៉ុន្តែចំពោះការបំពេញប្រវត្តិរូបបុគ្គលិកជាប់កិច្ចសន្យាឲ្យចូលក្របខ័ណ្ឌរដ្ឋ រូបលោកពិតជាបានធ្វើរំលងប្រធានស្រុកប្រតិបត្តិប្រាកដមែន។
ចំណែកលោក ឈ្នាង សុវុត្ថា ប្រធានមន្ទីរសុខាភិបាលខេត្តក្រចេះ បានប្រាប់ប្រព័ន្ធផ្សព្វផ្សាយក្នុងស្រុកថា ចំពោះករណីលោក ទឺ ប៊ុនឡេង គឺត្រូវបានមន្ត្រីអង្គភាពប្រឆាំងអំពើពុករលួយបើកការស៊ើបអង្កេតរួចហើយ ចំពោះលទ្ធផលបែបណានោះ ត្រូវរង់ចាំការសម្រេចពីអង្គភាពប្រឆាំងអំពើពុករលួយ។
ទោះជាបែបនេះក្តី សារព័ត៌មាន The Cambodia Daily នៅមិនទាន់អាចទាក់ទងលោក ទឺ ប៊ុនឡេង ប្រធានការិយាល័យនៃមន្ទីរសុខាភិបាលខេត្តក្រចេះ ដើម្បីបំភ្លឺបន្ថែមជុំវិញការចោទប្រកាន់ខាងលើបានទេ នៅល្ងាចថ្ងៃចន្ទ ទី៣០ ខែសីហា ឆ្នាំ២០២១។ ខណៈលោក ម៉ម ប៊ុនហេង រដ្ឋមន្ត្រីក្រសួងសុខាភិបាល និងអ្នកស្រីវេជ្ជបណ្ឌិត ឱ វណ្ណឌីន អ្នកនាំពាក្យក្រសួងសុខាភិបាល ក៏មិនទាន់អាចទាក់ទងដើម្បីបំភ្លឺបាននៅឡើយដែរ៕