34 C
Phnom Penh

ក្រុម​តស៊ូ​មតិ៖ សម្ដី​កូនប្រុស​លោក ស ខេង ឆ្លុះបញ្ចាំង​សកម្មភាព​នយោបាយ​ទុច្ចរិត​របស់​មេដឹកនាំ​ធំៗ​នៅ​កម្ពុជា

ដោយ ឌឹ ខេមបូឌា ដេលី

បទវិភាគ

បញ្ញវន្ត​ខ្មែរ​នៅ​ក្រៅ​ស្រុក អះអាង​ថា ការ​លើកឡើង​របស់​កូនប្រុស​លោក ស ខេង គឺ​លោក ស សុខា ជា​គំនិត​ល្អ​ដែល​សុំ​ឲ្យ​អ្នក​នយោបាយ​ជំនាន់​មុន​ធ្វើ​ជា​គំរូ​ល្អ​ដល់​អ្នក​ជំនាន់​ក្រោយ​នោះ ហាក់​ឆ្លុះបញ្ចាំង​ឲ្យ​ឃើញ​នូវ​សកម្មភាព​នយោបាយ​ទុច្ចរិត​របស់​មេដឹកនាំ​ធំៗ​នៅ​កម្ពុជា ដែល​បាន​ធ្វើ​កន្លងមក​រហូត​ដល់​សព្វថ្ងៃ​នេះ។

ប្រធាន​ក្រុមប្រឹក្សា​ឃ្លាំមើល​កម្ពុជា និង​ជា​ប្រធាន​ក្រុមប្រឹក្សាភិបាល​នៃ​ចលនា​និស្សិត​ដើម្បី​លទ្ធិប្រជាធិបតេយ្យ លោក ម៉ែន ណាត បាន​ប្រាប់​សារព័ត៌មាន The Cambodia Daily នៅ​ថ្ងៃ​ទី​១ ខែ​កញ្ញា ឆ្នាំ​២០២១ ថា មេដឹកនាំ​ដែល​ត្រូវតែ​ធ្វើ​ជា​គំរូ​ល្អ​សម្រាប់​ក្មេង​ជំនាន់​ក្រោយ គឺ​មេដឹកនាំ​បក្ស​កាន់​អំណាច​តែម្តង ព្រោះថា​លោក ហ៊ុន សែន ក្នុង​នាម​ជា​មេដឹកនាំ​ប្រទេស គឺ​ពិតជា​មាន​ឥទ្ធិពល​ខ្លាំង​ណាស់​ក្នុង​ការ​រុញ​សង្គម​កម្ពុជា​ឱ្យ​ឆ្ពោះ​ទៅ​រក​សង្គម​ថ្លៃថ្នូរ ឬ​អាច​ទាញ​សង្គម​មួយ​នេះ​ឲ្យ​ធ្លាក់​ចុះ​ទៅ​ជា​សង្គម​អន់ថយ។

លោក​បន្ត​ថា ផ្អែក​តាម​លក្ខខណ្ឌ​របស់​កម្ពុជា​ដែល​ទទួល​យក​របប​ប្រជាធិបតេយ្យ​សេរី​ពហុ​បក្ស មិន​គួរ​ប្រមុខ​រដ្ឋាភិបាល​កម្ពុជា​ប្រព្រឹត្ត​នូវ​ទង្វើ​ដែល​ប្រាសចាក​ពី​ខ្លឹមសារ​រដ្ឋធម្មនុញ្ញ​របស់​ខ្លួន ដែល​ចែង​ពី​សិទ្ធិ​មូលដ្ឋាន​របស់​ពលរដ្ឋ​នោះ​ទេ។

សកម្មភាព​ប្រាសចាក​ដែល​ពលរដ្ឋ​មើលឃើញ​ជាក់ស្ដែង​ក្រៅពី​ល្បិច​នយោបាយ​ខ្មៅ​កខ្វក់ ដូចជា​ការ​បង្ក្រាប​ទៅលើ​សកម្មជន​បរិស្ថាន និង​សកម្មជន​សិទ្ធិមនុស្ស ជាដើម ដែល​បង្ហាញ​ពី​គំរូ​ដ៏​អាក្រក់​មួយ​របស់​មេដឹកនាំ​ខ្មែរ​ទៅកាន់​ពិភពលោក។

លោក ម៉ែន ណាត បញ្ជាក់​ថា ក្រៅពី​ការ​បង្ក្រាប​ប្រជាពលរដ្ឋ​ខ្លួនឯង លោក ហ៊ុន សែន បាន​បង្ក្រាប​ទៅលើ​មន្ត្រី​ជាន់ខ្ពស់​នៅ​ក្នុង​បក្ស​របស់​ខ្លួន ដោយ​ការ​រំលោភ​សិទ្ធិ​សម្រេច​ផ្សេងៗ​ដើម្បី​ការពារ​អំណាច​ផ្ទាល់ខ្លួន ដែល​នេះ​ក៏​ជា​គំរូ​អាក្រក់​មួយ​ថែមទៀត​ក្នុង​ការ​ដឹកនាំ​ក្នុង​បក្ស​នយោបាយ​របស់​ខ្លួន ដែល​បង្ហាញ​ពី​ការ​ក្រាញ​អំណាច និង​ការ​ល្មោភ​អំណាច​របស់​មេដឹកនាំ​ខ្មែរ​រូប​នេះ។

ការ​អះអាង​របស់​លោក ម៉ែន ណាត ធ្វើឡើង​បន្ទាប់ពី​រដ្ឋលេខាធិការ​ក្រសួង​អប់រំ យុវជន និង​កីឡា លោក ស សុខា បាន​សរសេរ​លើ​គណនី Facebook របស់​លោក កាលពី​ថ្ងៃ​ទី​៣១ ខែ​សីហា ឆ្នាំ​២០២១ ថា ក្នុង​នាម​ជា​អ្នក​នយោបាយ​ជំនាន់​មុន គួរ​គប្បី​ធ្វើ​ជា​គំរូ​ល្អ​សម្រាប់​អ្នក​នយោបាយ​ជំនាន់​ក្រោយ​រៀនសូត្រ​តាម ជាពិសេស​ត្រូវ​បណ្ដុះ​មនសិការ​ស្រឡាញ់​ជាតិ ជួយ​ជ្រោមជ្រែង​ជាតិ​ដោយ​ពិតប្រាកដ ចៀសវាង​ការ​ធ្វើ​នយោបាយ​ប្រជាភិថុតិ​ចំពោះ​ពលរដ្ឋ​ខ្លួនឯង។

មន្ត្រី​រដ្ឋាភិបាល​រូប​នេះ​លើកឡើង​ដែរ​ថា ក្នុង​នាម​លោក​ជា​យុវជន​ជំនាន់​ក្រោយ​មួយ​រូប លោក​ស្នើសុំ​ឲ្យ​អ្នក​នយោបាយ​ប្រឆាំង​ដែល​កំពុង​បោកប្រាស់​ពលរដ្ឋ​ខ្លួនឯង បញ្ឈប់​ទង្វើ​ទុច្ចរិត​របស់​ខ្លួន​តទៅទៀត ព្រោះថា​ល្បែង​នយោបាយ​ប្រជាភិថុតិ​ទាំងនោះ​មិន​មាន​អ្នក​ជឿជាក់​ទៀត​នោះ​ឡើយ។

ការ​លើកឡើង​ជា​សំណេរ​របស់​កូនប្រុស​របស់​លោក ស ខេង គឺ​លោក ស សុខា នេះ ធ្វើឡើង​បន្ទាប់ពី​មាន​ព័ត៌មាន​ចចាមអារ៉ាម​បំផុស​បំផុល​ព្រឹត្តិការណ៍​នយោបាយ ដែល​ត្រូវ​គេ​មើលឃើញ​ថា​ជា​ល្បិច​នយោបាយ​របស់​មេដឹកនាំ​ក្រុម​ប្រឆាំង លោក សម រង្ស៊ី អំពី​ការ​បង្កើត​រដ្ឋាភិបាល​ក្រៅ​ប្រទេស ដែល​ផ្សារភ្ជាប់​ទៅ​នឹង​ដំណើរ​ទស្សនកិច្ច​របស់​លោក ស ខេង ទៅ​ប្រទេស​បារាំង កាលពី​ពេល​ថ្មីៗ​នេះ។

រដ្ឋលេខាធិការ​ក្រសួង​អប់រំ យុវជន និង​កីឡា លោក ស សុខា

ជុំវិញ​បញ្ហា​នេះ ក្រុម​អ្នក​សង្កេតការណ៍​រិះគន់​ថា មេដឹកនាំ​នយោបាយ​កំពូលៗ​ទាំង​លោក សម រង្ស៊ី និង​លោក ហ៊ុន សែន ហាក់​មិន​បាន​បន្សល់​គំរូ​ល្អ​ដល់​អ្នក​នយោបាយ​ជំនាន់​ក្រោយ​នោះ​ទេ ព្រោះថា​អំណាច​របស់​លោក ហ៊ុន សែន ដែល​កាន់កាប់​សព្វថ្ងៃ​នេះ គឺ​បាន​មក​តែ​ពី​ការ​ប្លន់​អ្នក​ដទៃ​តែប៉ុណ្ណោះ។

ក្រៅពី​នេះ លោក ហ៊ុន សែន ក៏​ត្រូវ​គេ​មើលឃើញ​ថា​ជា​មេ​ឧក្រិដ្ឋជន​នៅ​កម្ពុជា​ផង​ដែរ ក្រោយ​ការ​បាញ់​សម្លាប់​សកម្មជន​សង្គម​ល្បីៗ ដូចជា​លោក ឈុត វុទ្ធី និង​បណ្ឌិត កែម ឡី ជាដើម ដែល​គេ​អះអាង​ថា​សុទ្ធសឹងតែ​ជា​ឃាតកម្ម​ដែល​មាន​ជាប់​ពាក់ព័ន្ធ​នឹង​មេដឹកនាំ​ខ្មែរ​រូប​នេះ​ផង​ដែរ។

ដោយឡែក​លោក សម រង្ស៊ី ដែល​ជា​អតីត​មេដឹកនាំ​បក្ស​ប្រឆាំង ក៏​ត្រូវ​បាន​សមាជិក​បក្ស​របស់​ខ្លួន​ដែល​ឈប់​គាំទ្រ​ខ្លះ លាតត្រដាង​ថា​គឺជា​ក្រុម​ដែល​ពូកែ​លាប​ពណ៌ និង​ក្រុម​ដែល​ពូកែ​ជេរប្រមាថ​ចំពោះ​ក្រុម​ណា ឬ​បុគ្គល​ណា​ដែល​រិះគន់​ចំណុច​ខ្សោយ​របស់​ពួកគេ ដោយ​រៀបចំ​បណ្ដាញ​ដើម្បី​លាប​ពណ៌​អ្នក​ទាំងនោះ​ថា​ជា​មនុស្ស​អាក្រក់ ជាដើម។

ជាង​នេះ​ទៅ​ទៀត ភាគី​លោក សម រង្ស៊ី បាន​សាង​កំហុស​នយោបាយ​ថ្នាក់​ជាតិ​ជាច្រើន ដូចជា​ការ​ដក​ពាក្យ​បណ្តឹង​ពី​តុលាការ​ក្រុង​ញូវយ៉ក ដែល​បាន​ប្តឹង​លោក ហ៊ុន សែន ករណី​បោក​គ្រាប់បែក​ដៃ​ខាងមុខ​រដ្ឋសភា​ជាតិ​កាលពី​ឆ្នាំ​១៩៩៧ ការចូលរួម​កែ​រដ្ឋធម្មនុញ្ញ​ពី ២/៣ មក ៥០%+1 អំពី​ការ​បង្កើត​រដ្ឋាភិបាល និង​ការ​ដក​អភ័យឯកសិទ្ធិ​សមាជិក​សភា និង​កំហុស​ផ្សេងៗ​ជាច្រើន​ទៀត៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស