អ្នកសារព័ត៌មានទូរទស្សន៍ MSJ TV ប្រចាំខេត្តព្រះសីហនុ និងជាជនរងគ្រោះក្នុងអំពើហិង្សាពីឈ្មួញដីធ្លីម្នាក់នៅខេត្តព្រះសីហនុ បានរិះគន់មន្ត្រីសាលាឧទ្ធរណ៍ដែលបានផ្អឹបទុកសំណុំរឿងរបស់គាត់អូសបន្លាយពេលជិត ២ឆ្នាំទៅហើយ មិនទាន់មានដំណោះស្រាយ និងមិនទាន់ទទួលបានយុត្តិធម៌នៅឡើយ។
ជនរងគ្រោះឈ្មោះ ដួង ច័ន្ទបូរិទ្ធ ដែលជាអ្នកយកព័ត៌មានប្រចាំទូរទស្សន៍អនឡាញ MSJ TV បានឲ្យដឹងថា បានប្តឹងអ្នកស្រី ជា សុខឡេង និងកូនប្រុសដែលបានប្រើអំពើហិង្សាមកលើរូបលោក កាលពីល្ងាចថ្ងៃទី២១ ខែកុម្ភៈ ឆ្នាំ២០២០ ដោយអ្នកទាំងពីរបានវាយគាត់ក្នុងពេលចុះទៅយកព័ត៌មានករណីទំនាស់ដីធ្លីមួយកន្លែង នៅភូមិ៤ ឃុំអូរត្រេះ ស្រុកស្ទឹងហាវ ខេត្តព្រះសីហនុ។
លោក ដួង ច័ន្ទបូរិទ្ធ បានថ្លែងទៀតថា ករណីប្រើហិង្សាលើរូបលោក គឺមិនទាន់ទទួលបានយុត្តិធម៌នៅឡើយ ហើយលោកចង់ឃើញសាលាឧទ្ធរណ៍ខេត្តព្រះសីហនុ លើកយកសំណុំរឿងលេខ៤២៥ ចុះថ្ងៃទី១៤ ខែឧសភា ឆ្នាំ២០២០ មកដោះស្រាយបន្តទៀត ព្រោះរូបគាត់បានទន្ទឹងរង់ចាំយុត្តិធម៌អស់រយៈពេលជិត ២ឆ្នាំមកហើយ គិតត្រឹមថ្ងៃទី៤ ខែវិច្ឆិកា ឆ្នាំ២០២១ នេះ។
លោក ដួង ច័ន្ទបូរិទ្ធ បានឲ្យដឹងថា ក្នុងរយៈពេលជិត ២ឆ្នាំនេះ ជនបង្កទាំងពីរនាក់ម្តាយនិងកូន នៅមានសេរីភាពដើរហើរជាធម្មតា មិនត្រឹមតែប៉ុណ្ណោះ នៅធ្វើទង្វើមួយចំនួនគំរាមដល់សុវត្ថិភាពលោកផងដែរ។
លោកបន្តថា សំណុំរឿងនេះត្រូវបានសាលាដំបូងខេត្តព្រះសីហនុ សម្រេចក្តីកាលពីថ្ងៃទី២៤ ខែតុលា ឆ្នាំ២០២០ ដោយបង្គាប់ឲ្យភាគីជនបង្ក គឺអ្នកស្រី ជា សុខឡេង សងជំងឺចិត្តមករូបលោកចំនួន ១លានរៀល ដោយមិនតម្រូវឲ្យជនបង្កហិង្សាអនុវត្តទោសឡើយ ទើបរូបលោកកើតទុក្ខមិនសុខចិត្ត ក៏សម្រេចដាក់ពាក្យបណ្តឹងប្តឹងបន្តមកសាលាឧទ្ធរណ៍ខេត្តព្រះសីហនុ ប៉ុន្តែគិតមកត្រឹមថ្ងៃទី៤ ខែវិច្ឆិកា ឆ្នាំ២០២១ នេះ រូបលោកនៅមិនទាន់បានទទួលដំណឹងពីដំណើរការក្ដីនេះនៅឡើយ។
ទោះជាបែបនេះក្តី សារព័ត៌មាន The Cambodia Daily នៅមិនទាន់អាចទាក់ទងប្រធានសាលាឧទ្ធរណ៍ខេត្តព្រះសីហនុ ដើម្បីបំភ្លឺជុំវិញសំណុំរឿងខាងលើបានទេនៅថ្ងៃទី៤ ខែវិច្ឆិកា ខណៈអ្នកស្រី ជា សុខឡេង ក៏មិនទាន់អាចទាក់ទងដើម្បីស្នើការបំភ្លឺបាននៅឡើយដែរ។
ក្នុងរយៈពេលចុងក្រោយនេះ អ្នកសារព័ត៌មានត្រូវរងការគំរាមកំហែង និងធ្វើទុក្ខបុកម្នេញពីអ្នកមានអំណាច និងឈ្មួញទុច្ចរិតជាដើម ដើម្បីបំបិទមាត់អ្នកសារព័ត៌មានដែលបានរាយការណ៍ព័ត៌មានត្រឹមត្រូវប៉ះពាល់ដល់មុខជំនួញពួកគេ។
របាយការណ៍ស្ដីពីសន្ទស្សន៍សេរីភាពសារព័ត៌មានពិភពលោក ឆ្នាំ២០២០ អះអាងថា សេរីភាពសារព័ត៌មាននៅកម្ពុជាបានថយចុះជាលំដាប់ ពោលគឺទទួលបានចំណាត់ថ្នាក់លេខ១៤៤ ក្នុងចំណោមប្រទេសទាំង១៨០។
ដោយឡែករបាយការណ៍ស្ដីពីនីតិរដ្ឋ ឆ្នាំ២០២១ នៃគម្រោងយុត្តិធម៌ពិភពលោក (The World Justice Project) ក៏បានរកឃើញថា កម្ពុជាបានជាប់ចំណាត់ថ្នាក់លេខទី១៣៨ ក្នុងចំណោមប្រទេស១៣៩ ដោយសារតែការដឹកនាំគ្មានតម្លាភាព មានការគំរាមកំហែងសិទ្ធិជាមូលដ្ឋានរបស់ពលរដ្ឋ និងការមិនធានាបាននូវប្រព័ន្ធយុត្តិធម៌របស់ខ្លួនតាមផ្លូវតុលាការជាដើម៕