34 C
Phnom Penh

ជន​រងគ្រោះ​ក្នុង​សំណុំរឿង​ប៉ុនប៉ង​មនុស្ស​ឃាត​ដុត​ទាំង​រស់ ខក​ចិត្ត​នឹង​សាលាដំបូង​ខេត្ត​ព្រះសីហនុ​ដោះលែង​ជនល្មើស

ដោយ ឌឹ ខេមបូឌា ដេលី

បទវិភាគ

ជន​រងគ្រោះ​ម្នាក់​ក្នុង​ករណី​ប៉ុនប៉ង​មនុស្ស​ឃាត​ចាក់​សាំង​ដុត​ទាំង​រស់​នៅ​ឯ​ខេត្ត​ព្រះសីហនុ កំពុង​ទន្ទឹង​រង់ចាំ និង​ដង្ហោយ​រក​យុត្តិធម៌​សម្រាប់​ខ្លួន​គាត់ បន្ទាប់ពី​សំណុំរឿង​របស់​គាត់​ត្រូវ​បាន​សាលាដំបូង​ខេត្ត​ព្រះសីហនុ បាន​ផ្អឹប​ទុក​ចោល​ជិត ៣​ឆ្នាំ​មក​ហើយ។

លោក ស៊ុយ ប៊ុនថាន់ ជា​ជន​រងគ្រោះ បាន​ឲ្យ​សារព័ត៌មាន The Cambodia Daily ដឹង​នៅ​ថ្ងៃ​ទី​៥ វិច្ឆិកា ថា រូបលោក​ត្រូវ​ជន​ដៃដល់​ឈ្មោះ លី ស្រេង រស់នៅ​ភូមិ​២ សង្កាត់​លេខ២ ក្រុង​ព្រះសីហនុ ចាប់​ដុត​ទាំង​រស់​កាលពី​ថ្ងៃ​ទី​២១ ខែ​មករា ឆ្នាំ​២០១៩ នៅ​ចំពោះ​មុខ​មន្ត្រី​ចុះ​អនុវត្ត​សាលក្រម​ក្នុង​វិវាទ​ដីធ្លី​មួយ​កន្លែង កាលពី​ជិត ៣​ឆ្នាំ​មុន អំឡុង​ពេល​សមត្ថកិច្ច​ចុះ​អនុវត្ដ​សាលក្រម ហើយ​ករណី​ប៉ុនប៉ង​មនុស្ស​ឃាត​នេះ បាន​បណ្តាល​ឲ្យ​លោក​ឆេះ​រលាក​ពេញ​ខ្លួន​រង​របួស​ធ្ងន់។

លោក​បញ្ជាក់​ថា បាន​បន្ត​ដង្ហោយ​រក​អន្តរាគមន៍​ពី​រដ្ឋមន្ត្រី​ក្រសួង​យុត្តិធម៌ ដោយសារតែ​សំណុំរឿង​ប៉ុនប៉ង​មនុស្ស​ឃាត​មក​លើ​រូបលោក ត្រូវ​បាន​មន្ត្រី​មាន​តួនាទី​ខ្ពស់​នៅ​ក្នុង​សាលាដំបូង​ខេត្ត​ព្រះសីហនុ និង​សមត្ថកិច្ច​កង​រាជ​អាវុធហត្ថ​ខេត្ត​ព្រះសីហនុ សម្រួល​ឲ្យ​ជនល្មើស​អាច​រួច​ផុត​ពី​ជាប់​ពន្ធនាគារ។

លោក ស៊ុយ ប៊ុនថាន់ បាន​ឲ្យ​ដឹង​ថា សំណុំរឿង​របស់​គាត់​ត្រូវ​បាន​គេ​ផ្អឹប​ទុក​ចោល​ជិត ៣​ឆ្នាំ គឺ​ទើប​ត្រូវ​បាន​សាលាដំបូង​ខេត្ត​ព្រះសីហនុ បិទ​បញ្ចប់​សវនាការ​សួរ​ដេញដោល​លើ​អង្គ​ហេតុ​អំពី​សកម្មភាព​ប៉ុនប៉ង​មនុស្ស​ឃាត កាលពី​ថ្ងៃ​ទី​២៧ ខែ​តុលា ឆ្នាំ​២០២១ ថ្មីៗ​នេះ ដោយ​មិន​មាន​វត្តមាន​ជនល្មើស​ឡើយ គឺ​មាន​តែ​មេធាវី​តំណាង​តែប៉ុណ្ណោះ។ លោក​បញ្ជាក់​ថា សំណុំរឿង​នេះ​នឹង​ប្រកាស​សាលក្រម​នៅ​ថ្ងៃ​ទី​២៣ ខែ​វិច្ឆិកា ខាងមុខ​នេះ។

ប្រភព​ដដែល​បាន​ថ្លែង​រៀបរាប់​ថា ករណី​ប៉ុនប៉ង​មនុស្ស​ឃាត​មក​លើ​រូបលោក ធ្វើឡើង​ខណៈ​រូបលោក​កំពុង​បញ្ជា​គ្រឿងចក្រ​អេស្កាវ៉ាទ័រ​កាលពី​ថ្ងៃ​ទី​២១ ខែ​មករា ឆ្នាំ​២០១៩ ក៏​ស្រាប់​តែ​ឈ្មោះ លី ស្រេង ស្ទុះ​មក​បើក​ទ្វារ​គ្រឿងចក្រ​របស់​លោក ហើយ​បាន​យក​សាំង​ជះ​ដុត រួច​បិទ​ទ្វារ​ខ្ទប់​រូបលោក​ឲ្យ​ជាប់​នៅ​ក្នុង​អេស្កាវ៉ាទ័រ​នោះ ក្នុង​ចេតនា​ដុត​ឲ្យ​ស្លាប់​តែម្តង។ លោក​ថ្លែង​បន្ត​ថា ភ្លាមៗ​នោះ​ក៏​ត្រូវ​បាន​សមត្ថកិច្ច​ជួយ​សង្គ្រោះ និង​បញ្ជូន​ទៅកាន់​មន្ទីរពេទ្យ​បាន​ទាន់​ពេល។

ទោះ​យ៉ាងណា លោក ប៊ុនថាន់ កាលពី​ថ្ងៃ​ទី​១៦ ខែ​កក្កដា ឆ្នាំ​២០២០ បាន​ដាក់​ពាក្យ​បណ្តឹង​ប្តឹង​មន្ត្រី​ជាន់ខ្ពស់​ចំនួន ៤​រូប រួម​មាន​លោក ហេង ប៊ុនទី មេបញ្ជាការ​កង​រាជ​អាវុធហត្ថ​ខេត្ត​ព្រះសីហនុ លោក សៀង សុខ ព្រះរាជអាជ្ញា​អម​សាលាដំបូង​ខេត្ត​ព្រះសីហនុ លោក សុខ កល្យាណ ប្រធាន​សាលាដំបូង​ខេត្ត​ព្រះសីហនុ និង​លោក តាក់ គឹមសៀ អនុប្រធាន​សាលាដំបូង​ខេត្ត​ព្រះសីហនុ ទៅ​កាន់​លោក ឱម យ៉ិនទៀង ប្រធាន​អង្គភាព​ប្រឆាំង​អំពើពុករលួយ ដោយ​ចោទប្រកាន់​អ្នក​ទាំង ៤​នាក់​មាន​ចេតនា​ការពារ​ឧក្រិដ្ឋជន​ឈ្មោះ លី ស្រេង ឲ្យ​រួច​ផុត​ពី​ការ​ជាប់​ពន្ធនាគារ។

សាលាដំបូង​ខេត្ត​ព្រះសីហនុ

ប្រភព​ដដែល​បញ្ជាក់​ថា ក្នុង​ហេតុការណ៍​នេះ កម្លាំង​កង​រាជ​អាវុធហត្ថ​ខេត្ត​ព្រះសីហនុ បាន​ចាប់​វាយ​ខ្នោះ​ឈ្មោះ លី ស្រេង នៅ​នឹង​កន្លែង​កើត​ហេតុ​ភ្លាមៗ ប៉ុន្តែ​មិន​ដឹង​មូលហេតុ​អ្វី​បាន​ជា​មន្ត្រី​កង​រាជ​អាវុធហត្ថ​ខេត្ត​ព្រះសីហនុ មិនព្រម​បញ្ជូន​ជន​ដៃដល់​ឈ្មោះ លី ស្រេង ទៅកាន់​អយ្យការ​អម​សាលាដំបូង​ខេត្ត​ព្រះសីហនុ។ មិន​ត្រឹម​តែប៉ុណ្ណោះ បាន​បិទ​សំណុំរឿង​មនុស្ស​ឃាត​ជាក់ស្តែង​នេះ​ចោល​ថែមទៀត។

លោក ស៊ុយ ប៊ុនថាន់ បាន​ឲ្យ​ដឹង​ថា លោក​នឹង​បន្ត​ប្តឹង​ទាមទារ​រក​យុត្តិធម៌​ទៅ​កាន់​តុលាការ​កំពូល ដើម្បី​ស្វែងរក​យុត្តិធម៌​សម្រាប់​ខ្លួន​លោក​បន្ត​ទៀត។

ចំណែក​មេធាវី​ការពារ​ជន​រងគ្រោះ​លោក កៅ ភូ បញ្ជាក់​ថា ទោះបី​កូនក្ដី​របស់​លោក​ជា​ជន​ក្រីក្រ​ក្តី ក៏​តុលាការ​គ្មាន​ហេតុផល​ណា​ត្រូវ​លើកលែង​ទោស​ឲ្យ​ជនល្មើស​ឈ្មោះ លី ស្រេង នោះ​ទេ ព្រោះ​សំណុំរឿង​នេះ​ជា​បទឧក្រិដ្ឋ​ធ្ងន់ធ្ងរ ហើយ​ជនល្មើស​អាច​ប្រឈម​ជាប់​ពន្ធនាគារ ១៥​ឆ្នាំ។

ទោះ​ជា​បែប​នេះ​ក្តី សារព័ត៌មាន The Cambodia Daily នៅ​មិនទាន់​អាច​ទាក់ទង​ប្រភព​ពាក់ព័ន្ធ​នានា​ដើម្បី​បំភ្លឺ​លើ​សំណុំរឿង​ខាងលើ​បាន​ទេ នៅ​រសៀល​ថ្ងៃ​ទី​៥ ខែ​វិច្ឆិកា ខណៈ​មាន​មន្ត្រី​ខ្លះ​បាន​ផ្លាស់ប្ដូរ​តួនាទី ឬ​កន្លែង​ធ្វើការ​រួច​ហើយ​នោះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស