26 C
Phnom Penh

កម្ពុជា​ហាម​អ្នក​ដំណើរ​ពី​ប្រទេស​១០​នៅ​ទ្វីប​អាហ្វ្រិក​ចូល​កម្ពុជា ដើម្បី​ទប់ស្កាត់​វីរុស​ថ្មី អូមីក្រុង

បទវិភាគ

រដ្ឋមន្ត្រី​ក្រសួង​សុខាភិបាល​កម្ពុជា បាន​សម្រេច​ហាមឃាត់​អ្នកដំណើរ​ទៅ​ពី​ប្រទេស​ចំនួន​១០ នៅ​ទ្វីប​អាហ្វ្រិក ចូល​កម្ពុជា ដើម្បី​ទប់ស្កាត់​ការ​ឆ្លង​ជំងឺ Covid-19 ប្រភេទ​ថ្មី​ឈ្មោះ អូមីក្រុង ដែល​មាន​សមត្ថភាព​ក្នុង​ការ​ចម្លង​លឿន និង​រហ័ស​ជាង​វីរុស Covid-19 បំប្លែង​ខ្លួន​ថ្មី​មុនៗ​រហូត​ដល់​រាប់​សិប​ដង។

រដ្ឋមន្ត្រី​ក្រសួង​សុខាភិបាល លោក ម៉ម ប៊ុនហេង បាន​ចេញ​សេចក្តី​ប្រកាស​ព័ត៌មាន​កាលពី​ថ្ងៃ​ទី​២៩ ខែ​វិច្ឆិកា ឆ្នាំ​២០២១ ថា កម្ពុជា​សម្រេច​ហាមឃាត់​អ្នកដំណើរ និង​អ្នក​ដែល​បាន​ឆ្លងកាត់ ឬ​មាន​ប្រវត្តិ​ធ្វើ​ដំណើរ​ទៅ​ប្រទេស​ទាំង​១០ នៅ​ទ្វីប​អាហ្វ្រិក ៣​សប្តាហ៍ មុន​ចូល​ទៅ​កម្ពុជា ដូចជា​អាហ្វ្រិក​ខាងត្បូង ហ្ស៊ីមបាវ៉េ និង​ប្រទេស​ម៉ាឡាវី ជាដើម ទាំង​ផ្លូវអាកាស និង​ផ្លូវគោក ដោយ​គ្មាន​ការ​កំណត់​រហូត​មាន​សេចក្តី​ជូនដំណឹង​ថ្មី ដែល​នឹង​ត្រូវ​អនុវត្ត​ចាប់ពី​ដើម​ខែ​ធ្នូ ឆ្នាំ​២០២១ នេះ​តទៅ។

លោក​បន្ត​ថា ការ​ហាមឃាត់​បែប​នេះ ដោយសារ​អង្គការ​សុខភាព​ពិភពលោក (WHO) បាន​បង្ហាញ​របាយការណ៍​ពី​ការ​រក​ឃើញ​វីរុស​បំប្លែង​ថ្មី​នៅ​បណ្តា​ប្រទេស​មួយ​ចំនួន​ក្នុង​ទ្វីប​អាហ្វ្រិក ដែល​បាន​កំណត់​ឈ្មោះ​ថា អូមីក្រុង (Omicron) កាលពី​ពេល​ថ្មីៗ​នេះ ប៉ុន្តែ​ឥទ្ធិពល​របស់​វីរុស​ថ្មី​នេះ​មាន​កម្រិត​ខ្ពស់​ប៉ុនណា​នោះ ក្រសួង​សុខាភិបាល​មិនទាន់​បាន​ផ្សព្វផ្សាយ​ជូន​សាធារណជន​បាន​នៅឡើយ​ទេ។

ការ​ចេញ​សេចក្តី​ប្រកាស​ព័ត៌មាន​នេះ ធ្វើឡើង​ដើម្បី​ផ្សព្វផ្សាយ​ដល់​ពលរដ្ឋ​ខ្មែរ​ឲ្យ​បង្កើន​ការ​ប្រុងប្រយ័ត្ន និង​ការពារ​ខ្លួន​ចំពោះ​វីរុស Covid-19 បំប្លែង​ថ្មី​ឈ្មោះ អូមីក្រុង ដែល​អង្គការ​សុខភាព​ពិភពលោក រក​ឃើញ​កាលពី​ពេល​កន្លងទៅ​នេះ។

អង្គការ​សុខភាព​ពិភពលោក (WHO) បាន​ឲ្យ​ដឹង​កាលពី​ថ្ងៃ​ចន្ទ នៅ​ទីក្រុង​ហ្សឺណែវ ថា មេរោគ COVID-19 បំប្លែង​ថ្មី​ឈ្មោះ អូមីក្រុង ជា​វីរុស​មាន​ហានិភ័យ​ខ្ពស់​ដែល​គួរ​ឱ្យ​ព្រួយបារម្ភ ហើយ​ការ​ចាត់​វិធានការ​ភ្លាមៗ​របស់​ប្រទេស​នីមួយៗ គឺ​ត្រូវ​បាន​ចាត់ទុក​ជា​ការ​រួម​ចំណែក​ជួយ​ទប់ទល់​នៅ​ក្នុង​ដំណាក់កាល​បឋម ដើម្បី​កុំ​ឲ្យ​វីរុស​ថ្មី​នេះ​បន្ត​រីក​រាលដាល​ទៅ​ប្រទេស​ផ្សេងៗ​ទៀត។

អង្គការ​សុខភាព​ពិភពលោក បាន​ណែនាំ​ប្រទេស​ជា​សមាជិក​ទាំង​១៩៤ របស់​ខ្លួន​ថា ការ​កើន​ឡើង​នៃ​ករណី​ឆ្លង​ណា​មួយ​ដែល​បង្ក​ឡើង​ដោយ​វីរុស Covid-19 អូមីក្រុង អាច​នឹង​ក្លាយ​ជា​ករណី​ធ្ងន់ធ្ងរ​ដែល​មាន​សក្ដានុពល​បង្ក​ឲ្យ​មាន​សោកនាដកម្ម​នៃ​ជំងឺ​រាតត្បាត​សកល COVID-19 កាន់តែ​រីកធំ​ឡើងៗ។

នាយក​ប្រតិបត្តិ​មជ្ឈមណ្ឌល​សម្ព័ន្ធភាព​ការងារ និង​សិទ្ធិមនុស្ស លោក មឿន តុលា បាន​ប្រាប់​សារព័ត៌មាន The Cambodia Daily នៅ​ថ្ងៃ​ទី​៣០ វិច្ឆិកា ដោយ​អបអរ​សាទរ​ទៅ​នឹង​វិធានការ​របស់​រដ្ឋាភិបាល​កម្ពុជា ប៉ុន្តែ​ការ​អនុវត្ត​ត្រូវតែ​ប្រកប​ដោយ​ប្រសិទ្ធភាព ជាពិសេស​គឺ​ត្រួតពិនិត្យ​អ្នក​ធ្វើ​ដំណើរ​មក​ពី​ក្រៅ​ប្រទេស​ឱ្យ​បាន​ហ្មត់ចត់​ជាទីបំផុត បើ​មិន​ដូច្នោះ​ទេ កម្ពុជា​នឹង​រង​ការ​វាយលុក​ដល់​សហគមន៍​ដូច​ជំងឺ​វីរុស Covid-19 កាលពី​លើកដំបូង​ជា​មិនខាន។

លោក មឿន តុលា បញ្ជាក់​ថា ប្រសិនបើ​រដ្ឋាភិបាល​មាន​វិធានការ​បិទ​ខ្ទប់ ឬ​ផ្អាក​អាជីវកម្ម​ប្រភេទ​ណា​មួយ​នោះ រដ្ឋ​គួរតែ​គិតគូរ និង​យកចិត្ត​ទុកដាក់​ខ្ពស់​ចំពោះ​ពលរដ្ឋ ម្ចាស់​អាជីវកម្ម និង​កម្មករ ដោយ​ការ​ផ្តល់​នូវ​ជំនួយ​សង្គម​ដែល​អាច​ឱ្យ​ពួកគេ​មាន​ជីវភាព​សមរម្យ ដើម្បី​ធានា​នូវ​ការ​ទប់ស្កាត់​ការ​ឆ្លង​វីរុស Covid-19 ថ្មី អូមីក្រុង នេះ​ផង និង​អាច​រក្សា​ស្ថិរភាព​អាជីវកម្ម​របស់​ពួកគេ​បាន​ផង​ដែរ។

កាលពី​ថ្ងៃ​ទី​២៧ ខែ​វិច្ឆិកា ឆ្នាំ​២០២១ កន្លងទៅ តំណាង​អង្គការ​សុខភាព​ពិភពលោក ប្រចាំ​នៅ​កម្ពុជា អ្នកស្រី Li Ailan អះអាង​ថា វីរុស​បំប្លែង​ខ្លួន​ថ្មី​នេះ​បង្ក​ឱ្យ​មាន​ហានិភ័យ​ខ្ពស់​ជាង​វីរុស​បំប្លែង​ថ្មី​មុនៗ ហើយ​អង្គការ​សុខភាព​ពិភពលោក ក៏​មិន​ដឹង​អំពី​ប្រសិទ្ធភាព​របស់​វ៉ាក់សាំង​ចំពោះ​វីរុស​បំប្លែង​ខ្លួន​ថ្មី​នេះ​នៅឡើយ​ទេ។ ប៉ុន្តែ​អ្នក​ស្រាវជ្រាវ​កំពុង​ពិនិត្យ​មើល​ឥទ្ធិពល​របស់​វីរុស​បំប្លែង​ខ្លួន​ថ្មី​នេះ​ទៅ​លើ​វ៉ាក់សាំង និង​ឧបករណ៍​ផ្សេងៗ​ទៀត ហើយ​ក៏​កំពុង​ធ្វើការ​ឈ្វេងយល់​បន្ថែម​ថា តើ​ការ​បំប្លែង​ខ្លួន និង​ផល​ប៉ះពាល់​របស់​វីរុស​បំប្លែង​ខ្លួន​ថ្មី អូមីក្រុង នេះ មាន​កម្រិត​ខ្ពស់​កម្រិត​ណា​ផង​ដែរ​នោះ៕

© 2021, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស