មន្ត្រីជាន់ខ្ពស់បក្សប្រឆាំង ចោទអតីតមេដឹកនាំប្រឆាំងលោក សម រង្ស៊ី ថាមិនចេះរក្សាកម្លាំងគាំទ្រនៅក្នុងស្រុកដែលមានជិតកន្លះនគរ ដើម្បីយកទៅប្រកួតប្រជែងជាមួយបក្សកាន់អំណាច តែបែរជាបំបែកកម្លាំងអ្នកប្រជាធិបតេយ្យដោយនាំគ្នាទៅបើកបក្សតូចៗដើម្បីចូលរួមកំដរបក្សកាន់អំណាចក្នុងទីលាននយោបាយដ៏អយុត្តិធម៌ទៅវិញ។
មន្ត្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណារ៉ា បានប្រាប់សារព័ត៌មាន The Cambodia Daily នៅថ្ងៃទី១៧ មីនា នេះថា គេដុតបំផ្លាញគណបក្សសង្គ្រោះជាតិ ដោយបំពានលើច្បាប់គ្រប់បែបយ៉ាងរួចទៅហើយ គួរណាស់មន្ត្រីបក្សប្រឆាំងទាំងនោះនាំគ្នាក្រោកឈរតវ៉ាគ្រប់មធ្យោបាយ ដើម្បីទាមទារយកគណបក្សរបស់ខ្លួនមកវិញ មិនគួរនាំគ្នាបង្កើតបក្សថ្មី ហើយសុំភាពស្របច្បាប់ពីអ្នកដុតបំផ្លាញគណបក្សរបស់ខ្លួននោះទេ។
លោកបន្តថា លោកមើលមិនឃើញថាគណបក្សតូចៗទាំងអស់ រួមទាំងគណបក្សភ្លើងទៀន ដែលមានលោក សម រង្ស៊ី នៅពីក្រោយផងនោះ អាចយកឈ្នះបក្សកាន់អំណាចបាននោះទេ។ លោកថា ការបែកចេញពីស្មារតីសង្គ្រោះជាតិរបស់មន្ត្រីបក្សប្រឆាំងទាំងនោះ គឺជាការបំបែកកម្លាំងអ្នកប្រជាធិបតេយ្យដែលជាក្តីសង្ឃឹមរបស់ពលរដ្ឋខ្មែរយ៉ាងធ្ងន់ធ្ងរ។
លោក មាជ សុវណ្ណារ៉ា រិះគន់ថា ថ្នាក់ដឹកនាំគណបក្សសង្គ្រោះជាតិដែលនាំគ្នាលោតចេញពីនាវាសង្គ្រោះជាតិ ដែលជាដៃគូប្រកួតប្រជែងដ៏ធំរបស់នាវាបក្សកាន់អំណាច ដោយនាំគ្នាហក់ឡើងជិះទូកតូចៗដើម្បីចូលរួមប្រកួតប្រជែងជាមួយបក្សកាន់អំណាចវិញនោះ គ្រាន់តែជាការចូលរួមកំដរបក្សកាន់អំណាចក្នុងទីលាននយោបាយដ៏អយុត្តិធម៌មួយដែលគេបានរៀបចំទុកប៉ុណ្ណោះ។
មន្ត្រីដដែលបញ្ជាក់ថា ការធ្វើដូច្នេះ គឺជាសញ្ញានៃការបំបែកបំបាក់កម្លាំងអ្នកប្រជាធិបតេយ្យ ដែលចង់បានការផ្លាស់ប្ដូរតាមរយៈនៃការបោះឆ្នោតផង និងជាសញ្ញានៃការជួយកំដរបក្សកាន់អំណាចឱ្យសម្រេចនូវគោលដៅនៃការបោះឆ្នោតមួយ ដែលគេមើលឃើញថាជាការបោះឆ្នោតដ៏អយុត្តិធម៌ដែលអវត្តមានគណបក្សសង្គ្រោះជាតិនៅពេលនេះផងដែរ។
ការអះអាងនេះ ធ្វើឡើងបន្ទាប់ពីអតីតមេដឹកនាំបក្សប្រឆាំង លោក សម រង្ស៊ី ត្រូវសមាជិករបស់ខ្លួនលាតត្រដាងថា បាននៅពីក្រោយនៃការចូលរួមការបោះឆ្នោតរបស់គណបក្សភ្លើងទៀន ដែលបានបែកចេញពីសម្ពន្ធភាពជាមួយគណបក្សសិទ្ធិមនុស្សរបស់លោក កឹម សុខា ដែលបានរួបរួមគ្នាបង្កើតបានជាគណបក្សសង្គ្រោះជាតិកាលពីពេលកន្លងទៅនោះ។
កាលពីចុងឆ្នាំ២០២០ លោក សម រង្ស៊ី ធ្លាប់បានរិះគន់ថា មន្ត្រីបក្សប្រឆាំងដែលបានសុំសិទ្ធិធ្វើនយោបាយឡើងវិញ ហើយនាំគ្នាទៅបង្កើតបក្សថ្មី គឺជាការចាញ់បោក និងលក់ខ្លួនឲ្យលោក ហ៊ុន សែន តែប៉ុណ្ណោះ ខណៈលោក សម រង្ស៊ី នៅពេលនេះ ត្រូវគេមើលឃើញថា កំពុងនៅពីក្រោយគណបក្សភ្លើងទៀន ដើម្បីចូលរួមការបោះឆ្នោតជាមួយបក្សកាន់អំណាចទៅវិញ។
ជុំវិញបញ្ហានេះ អតីតតំណាងរាស្ត្រគណបក្សសង្គ្រោះជាតិ លោក សួន សុរីដា ធ្លាប់បានអះអាងកាលពីថ្ងៃទី៨ ខែមីនា ឆ្នាំ២០២២ ថា លោកទទួលបានព័ត៌មានពីប្រភពច្បាស់ការពីអតីតមន្ត្រីជាន់ខ្ពស់បក្សប្រឆាំងភាគីលោក សម រង្ស៊ី ថាការចូលរួមរបស់គណបក្សភ្លើងទៀនក្នុងការបោះឆ្នោតខែមិថុនា ខាងមុខនេះ គឺជាថ្នូរនឹងការទទួលបានសិទ្ធិធ្វើនយោបាយឡើងវិញ និងការមិនដាក់លក់ឡាយឡុងផ្ទះរបស់លោក សម រង្ស៊ី ពីសំណាក់មេដឹកនាំបក្សកាន់អំណាចផងដែរ។
លោក សួន សុរីដា អះអាងថា ផ្អែកលើហេតុផលនៅពេលនេះ គឺមានភាពស្របគ្នាយ៉ាងខ្លាំង ដោយសារភាគីលោក សម រង្ស៊ី បានដំណើរការគណបក្សភ្លើងទៀនឲ្យចូលរួមការបោះឆ្នោត ខណៈភាគីលោក ហ៊ុន សែន ក៏មិនដាក់លក់ឡាយឡុងផ្ទះរបស់លោក សម រង្ស៊ី ផងដែរ។ បន្ថែមពីនេះ ប្រសិនបើក្រោយការបោះឆ្នោតឆ្នាំ២០២២ និងឆ្នាំ២០២៣ មានការលើកលែងទោសដល់លោក សម រង្ស៊ី និងក្រុមរបស់គាត់មែន នោះមានន័យថា ការអង្វរសុំសិទ្ធិធ្វើនយោបាយពីលោក ហ៊ុន សែន របស់ក្រុមលោក សម រង្ស៊ី គឺជារឿងពិតប្រាកដដែលមិនអាចប្រកែកបាននោះទេ។
ជុំវិញបញ្ហានេះ កាលពីថ្ងៃទី៩ ខែមីនា ឆ្នាំ២០២២ សារសំឡេងរបស់មេដឹកនាំបក្សកាន់អំណាច លោក ហ៊ុន សែន ត្រូវគេទម្លាយតាមប្រព័ន្ធបណ្ដាញសង្គមតេឡេក្រាម ដែលបានលើកឡើងពីការអនុញ្ញាតឱ្យមន្ត្រីបក្សប្រឆាំងភាគីលោក សម រង្ស៊ី ទាក់ទងទៅស្នើសុំលោកដោយផ្ទាល់នៅពេលដែលពួកគេចង់បានសិទ្ធិធ្វើនយោបាយឡើងវិញ។
ពាក់ព័ន្ធការអំពាវនាវរបស់លោក ហ៊ុន សែន គេក៏ឃើញមន្ត្រីបក្សប្រឆាំងមួយចំនួននាំគ្នាចូលរួមជាមួយគណបក្សភ្លើងទៀតជាហូរហែ បន្ទាប់ពីពួកគេទទួលបានសិទ្ធិធ្វើនយោបាយឡើងវិញនាពេលកន្លងមកនោះ៕