 នៅច្រកទ្វារអន្តរជាតិទាំងអស់ ដែលត្រូវគេមើលឃើញថាជាឱកាសសម្រាប់អតីតមេដឹកនាំប្រឆាំង លោក សម រង្ស៊ី ដើម្បីវិលទៅកម្ពុជាដោយគ្រាន់តែទិញសំបុត្រយន្តហោះប៉ុណ្ណោះ។){kind=link}
រដ្ឋាភិបាលរបស់លោក ហ៊ុន សែន សម្រេចដាក់ឱ្យកម្ពុជាដំណើរការឡើងវិញនូវការផ្តល់ទិដ្ឋាការនៅពេលមកដល់ (VISA ON ARRIVAL) នៅច្រកទ្វារអន្តរជាតិទាំងអស់ ដែលត្រូវគេមើលឃើញថាជាឱកាសសម្រាប់អតីតមេដឹកនាំប្រឆាំង លោក សម រង្ស៊ី ដើម្បីវិលទៅកម្ពុជាដោយគ្រាន់តែទិញសំបុត្រយន្តហោះប៉ុណ្ណោះ។
ក្រសួងទេសចរណ៍កម្ពុជា បានចេញសេចក្តីប្រកាសព័ត៌មានកាលពីថ្ងៃទី១៧ ខែមីនា ឆ្នាំ២០២២ ថា កម្ពុជានឹងដាក់ឱ្យដំណើរការឡើងវិញនូវការផ្តល់ទិដ្ឋាការនៅពេលមកដល់ (VISA ON ARRIVAL) នៅច្រកទ្វារអន្តរជាតិទាំងអស់ ទាំងផ្លូវទឹក ផ្លូវគោក និងផ្លូវអាកាស ដោយគ្រាន់តែបំពេញលក្ខខណ្ឌនានាដែលកម្ពុជាធ្លាប់បានអនុវត្តមុនពេលនៃការរីករាលដាលជំងឺកូវីដ-១៩។
ការចេញសេចក្តីប្រកាសព័ត៌មាននេះ គឺជាហេតុផលមួយដែលគេមើលឃើញថា ជាការបើកផ្លូវសម្រាប់អ្នកនយោបាយប្រឆាំង ជាពិសេសភាគីលោក សម រង្ស៊ី ដែលទាមទារឱ្យរដ្ឋាភិបាលកម្ពុជាបើកផ្លូវឱ្យពួកគេវិលទៅកម្ពុជាវិញនាពេលកន្លងមក។
មន្ត្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណារ៉ា បានប្រាប់សារព័ត៌មាន The Cambodia Daily នៅថ្ងៃទី១៨ មីនា ថា ការបើកឱ្យដំណើរការឡើងវិញនូវទិដ្ឋាការនៅពេលមកដល់ ឬហៅថា VISA ON ARRIVAL បែបនេះ គឺពិតជាឱកាសសម្រាប់មន្ត្រីបក្សប្រឆាំងដែលមានបំណងចូលស្រុកវិញយ៉ាងពិតប្រាកដ ប៉ុន្តែមិនដឹងថាតើពួកគេក្លាហានហ៊ានចូលស្រុកវិញតាមការទាមទាររបស់ពួកគេនាពេលកន្លងមកដែរឬក៏អត់នោះទេ។
មន្ត្រីបក្សប្រឆាំងរូបនេះរំឭកថា កាលពីពេលកន្លងទៅ មន្ត្រីជាន់ខ្ពស់បក្សប្រឆាំងភាគីលោក សម រង្ស៊ី ដូចជាអ្នកស្រី មូរ សុខហួរ រួមទាំងលោក សម រង្ស៊ី ផង ទាមទារឱ្យរដ្ឋាភិបាលកម្ពុជាផ្តល់ទិដ្ឋាការឱ្យខ្លួនដើម្បីចូលមកកម្ពុជាវិញ ជាពិសេសដើម្បីចូលមកតតាំងក្តីនៅក្នុងតុលាការរបស់ពួកគេ។ ដូច្នេះ ឱកាសនៃការបើកទិដ្ឋាការនៅពេលមកដល់ ឬហៅថា VISA ON ARRIVAL នេះ គឺជាពេលវេលាល្អខ្លាំងណាស់សម្រាប់ពួកគាត់វិលមកកម្ពុជាវិញ តាមបំណងដែលពួកគេចង់បានជាយូរមកហើយនោះ។
លោក មាជ សុវណ្ណារ៉ា លើកឡើងថា ពួកគេអាចចូលមកកម្ពុជាដើម្បីតស៊ូតាមផ្លូវច្បាប់នៅពេលដែលរដ្ឋាភិបាលកម្ពុជាបើកឱ្យមាន VISA ON ARRIVAL បែបនេះ។ លោកថា បើទោះបីជាតុលាការអនុវត្តច្បាប់ដោយមានភាពលម្អៀងក៏ដោយ ក៏គង់តែមជ្ឈដ្ឋានជាតិ និងអន្តរជាតិ ជាពិសេសពលរដ្ឋខ្មែរអាចមើលឃើញពីភាពក្លាហានរបស់មន្ត្រីបក្សប្រឆាំងនៅក្រៅប្រទេសទាំងនោះដែរ ចៀសវាងនាំគ្នាសម្ងំនៅបរទេសដូចសព្វថ្ងៃនេះ។
ជុំវិញបញ្ហានេះ មន្ត្រីជាន់ខ្ពស់ប្រឆាំងភាគីលោក សម រង្ស៊ី ធ្លាប់បានប្រកាសធ្វើមាតុភូមិនិវត្តន៍ចំនួនពីរលើករួចមកហើយ ប៉ុន្តែត្រូវបរាជ័យទាំងអស់ លើកទី១ គឺនៅថ្ងៃទី៩ ខែវិច្ឆិកា ឆ្នាំ២០១៩ និងលើកទី២ នៅថ្ងៃទី៤ ខែមករា ឆ្នាំ២០២១ ដែលដឹកនាំដោយអនុប្រធានគណបក្សសង្គ្រោះជាតិ អ្នកស្រី មូរ សុខហួរ។
យ៉ាងណាក៏ដោយ ក្រុមមន្ត្រីបក្សប្រឆាំងភាគីលោក សម រង្ស៊ី កាលពីខែវិច្ឆិកា ឆ្នាំ២០២១ បានប្រកាសថា ខ្លួននឹងដាក់សំណើទៅកាន់ស្ថានទូតកម្ពុជាប្រចាំនៅសហរដ្ឋអាមេរិក ក្នុងបំណងស្នើសុំឱ្យក្រសួងមហាផ្ទៃផ្តល់សុពលភាពលិខិតឆ្លងដែនរបស់ពួកគេវិញ ដើម្បីឱ្យខ្លួនអាចវិលត្រឡប់ទៅកម្ពុជាវិញបានដោយគ្មានភាពរាំងស្ទះ។
យ៉ាងណាក៏ដោយ រហូតមកទល់នឹងពេលនេះ រដ្ឋាភិបាលកម្ពុជាមិនទាន់ប្រកាសផ្តល់សុពលភាពទិដ្ឋាការដល់មន្ត្រីបក្សប្រឆាំងដែលកំពុងនៅក្រៅប្រទេសនៅឡើយទេ ប៉ុន្តែការប្រកាសដំណើរការឡើងវិញនូវការផ្តល់ទិដ្ឋាការនៅពេលមកដល់ (VISA ON ARRIVAL) នៅពេលនេះ គឺជាហេតុផលមួយដែលគេមើលឃើញថាជាឱកាសសម្រាប់មន្ត្រីបក្សប្រឆាំងទាំងនោះអាចនាំគ្នាចូលទៅកម្ពុជាវិញបាន។
កាលពីខែវិច្ឆិកា ឆ្នាំ២០១៩ កន្លងទៅ ក្រសួងការបរទេសកម្ពុជា បានសម្រេចបញ្ចប់សុពលភាពលិខិតឆ្លងដែនរបស់មន្ត្រីជាន់ខ្ពស់បក្សប្រឆាំងចំនួន ១២រូប រួមមាន អ្នកស្រី មូរ សុខហួរ លោក អេង ឆៃអ៊ាង ជាដើម ក្រោមហេតុផលថា ដោយសារអ្នកទាំងនោះគឺជាអ្នកទោសដែលរត់គេចខ្លួន៕