អ្នកតស៊ូមតិខ្មែររស់នៅក្រៅស្រុក អះអាងថា បក្សកាន់អំណាចបានបង្កើតឧក្រិដ្ឋកម្មបោះឆ្នោតដើម្បីប្លន់ឆន្ទៈរបស់ពលរដ្ឋដែលបានចូលរួមការបោះឆ្នោតឃុំ-សង្កាត់ នៅថ្ងៃទី៥ ខែមិថុនា ឆ្នាំ២០២២ ខាងមុខនេះ។
អនុប្រធានវេទិកាពលរដ្ឋ លោក ម៉ែន ណាត បានសរសេរលើគណនីហ្វេសប៊ុករបស់លោកនៅថ្ងៃទី២៦ ឧសភា នេះថា គណបក្សកាន់អំណាចរបស់លោក ហ៊ុន សែន តែងប្រើឧបាយកលទុច្ចរិតគ្រប់សព្វរាល់អាណត្តិ ដូចជាការបង្ខិតបង្ខំពលរដ្ឋនៅមូលដ្ឋាន គំរាមសុវត្ថិភាពពលរដ្ឋ និងរៀបខ្សែបណ្ដាញក្នុងក្រសួងស្ថាប័នជាតិដោយការគាបសង្កត់ឲ្យបោះឆ្នោតគាំទ្រខ្លួន នៅពេលដែលច្បាប់ជាតិនៅមានភាពល្អប្រសើរជាងពេលបច្ចុប្បន្ននេះ។
លោក ម៉ែន ណាត ពន្យល់ថា ដោយឡែកការប្លន់ប្រព័ន្ធនៃការបោះឆ្នោត គឺជាសកម្មភាពក្រុមចោរដែលធ្វើឡើងដោយបើកចំហ បង្ហាញមុខត្រង់ៗ មិនកោតញញើតច្បាប់របស់ប្រទេស គឺបក្សកាន់អំណាចរបស់បុរសខ្លាំងកម្ពុជា លោក ហ៊ុន សែន បានអនុវត្តដោយឥតអៀនខ្មាស និងយ៉ាងស្ទាត់ជំនាញក្នុងរយៈពេលចុងក្រោយនេះ។ លោកថា ពួកគេបានកែប្រែច្បាប់បោះឆ្នោត ច្បាប់ស្ដីពីគណបក្សនយោបាយ និងច្បាប់ស្ដីពីការគ្រប់គ្រងគណៈកម្មាធិការជាតិរៀបចំការបោះឆ្នោត ជាដើម ដើម្បីសម្រេចតាមគោលបំណងរបស់ពួកគេ បន្ទាប់ពីបាត់ការគាំទ្រពីពលរដ្ឋកាលពីការបោះឆ្នោតឃុំ-សង្កាត់ឆ្នាំ២០១៧ កន្លងទៅ។
អនុប្រធានវេទិកាពលរដ្ឋរូបនេះបញ្ជាក់ថា សកម្មភាពប្លន់ដែលកាន់តែព្រៃផ្សៃ ងាយនឹងមើលឃើញនោះ គឺបានកើតមានរាប់មិនអស់ ដូចជាការបញ្ជាកម្លាំងពីសំណាក់លោក ហ៊ុន សែន ឲ្យចាប់ខ្លួនប្រធានគណបក្សសង្គ្រោះជាតិ លោក កឹម សុខា បន្ទាប់មកប្លន់យកកៅអីរដ្ឋសភា សមាជិកក្រុមប្រឹក្សាឃុំ-សង្កាត់របស់ក្រុមប្រឆាំងតាមទំនើងចិត្ត ក្រោមបទចោទដែលពួកគេបានប្រឌិតឡើងទាំងគ្មានភស្តុតាង។
លោកបន្ថែមថា សកម្មភាពប្លន់កាន់តែគឃ្លើននោះ គឺបក្សកាន់អំណាចរបស់លោក ហ៊ុន សែន បានតម្រូវឲ្យគណៈកម្មាធិការជាតិរៀបចំការបោះឆ្នោត បំប៉ោងចំនួនអ្នកទៅបោះឆ្នោត និងកាត់តម្រឹមលទ្ធផលបោះឆ្នោតទៅតាមបំណងបក្សកាន់អំណាចកាលពីការបោះឆ្នោតជាតិឆ្នាំ២០១៨ កន្លងទៅ ដើម្បីប្រកាសឲ្យពលរដ្ឋម្ចាស់ឆ្នោត និងសហគមន៍អន្តរជាតិទទួលស្គាល់ថា ខ្លួនជាអ្នកឈ្នះឆ្នោតដោយស្របច្បាប់។
លោក ម៉ែន ណាត បញ្ជាក់ថា គេអាចវាយតម្លៃបានថា ការបោះឆ្នោតឃុំ-សង្កាត់ ឆ្នាំ២០២២ ខាងមុខនេះ គឺបក្សកាន់អំណាចក្រោមការត្រួតត្រារបស់លោក ហ៊ុន សែន ជាអ្នកចាត់ចែងទាំងស្រុង។
ការអះអាងនេះ ធ្វើឡើងស្របពេលដែលកម្ពុជាកំពុងរៀបចំឲ្យមានការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥ ទៅតាមអាណត្តិដែលធ្វើឡើង ៥ឆ្នាំម្តងសម្រាប់ឆ្នាំ២០២២ នេះ។
ការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥ ឆ្នាំ២០២២ នឹងប្រព្រឹត្តទៅនៅថ្ងៃទី៥ ខែមិថុនា ឆ្នាំ២០២២ ដែលនៅសល់ពេលត្រឹមតែ ៩ថ្ងៃទៀតប៉ុណ្ណោះ ខណៈគណបក្សនយោបាយដែលបានចូលរួមការបោះឆ្នោតនេះមានចំនួន ១៧គណបក្ស។
ប៉ុន្តែការបោះឆ្នោតត្រូវគេរិះគន់ថា ជាការបោះឆ្នោតដែលមិនត្រឹមត្រូវ ព្រោះជាការបោះឆ្នោតដែលរៀបចំដោយបក្សកាន់អំណាច ខណៈគណៈកម្មាធិការអាជ្ញាកណ្ដាល ឬ គ.ជ.ប សុទ្ធសឹងតែមានសមាសភាពមកពីគណបក្សកាន់អំណាចទាំងអស់។
ក្រុមអ្នកសង្កេតការណ៍លើកឡើងថា គណបក្សក្រៅរដ្ឋាភិបាលទាំងអស់មិនគួរចូលរួមការបោះឆ្នោតដែលកម្ពុជាកំពុងមានវិបត្តិនយោបាយធ្ងន់ធ្ងរនោះឡើយ ត្បិតគណបក្សកាន់អំណាចបានរំលោភច្បាប់រំលាយគណបក្សសង្គ្រោះជាតិយ៉ាងអយុត្តិធម៌ ដូច្នេះពួកគេគួរតែជំរុញឱ្យបក្សកាន់អំណាចរកដំណោះស្រាយសមស្របណាមួយជាមុនសិន ព្រោះការធ្វើដូច្នេះក៏ជាការព្រមានកុំឱ្យបក្សកាន់អំណាចហ៊ានរំលោភច្បាប់រំលាយគណបក្សផ្សេងទៅថ្ងៃក្រោយបន្តទៀតដែរ៕