តំណាងយុវជនអតីតគណបក្សសង្គ្រោះជាតិប្រចាំប្រទេសន័រវែស លោក អៀ ចាន់ណា ត្រូវបានសមត្ថកិច្ចឃុំខ្លួននៅពន្ធនាគារព្រៃស នៅថ្ងៃអង្គារ ទី៣១ ឧសភា នេះ តាមដីការបស់តុលាការដែលបានចោទប្រកាន់ពីបទរួមគំនិតក្បត់កាលពីឆ្នាំ២០២០ កន្លងទៅ។
តំណាងយុវជនអតីតគណបក្សសង្គ្រោះជាតិប្រទេសន័រវែស (Norway) លោក អៀ ចាន់ណា នៅថ្ងៃទី៣១ ខែឧសភា ឆ្នាំ២០២២ នេះ ត្រូវបានអាជ្ញាធរចាប់ខ្លួននៅក្បែរផ្សារអេអន ក្នុងទីក្រុងភ្នំពេញ បន្ទាប់ពីលោកបានចូលរួមសកម្មភាពនយោបាយជាមួយគណបក្សភ្លើងទៀន និងហែក្បួនឃោសនាគណបក្សនេះកាលពីពេលថ្មីៗនេះ។
ការចាប់ខ្លួននេះ ធ្វើឡើងតាមសាលដីកាសាលាដំបូងក្រុងភ្នំពេញដែលបានបង្គាប់ឱ្យឃុំខ្លួនតំណាងយុវជនអតីតគណបក្សសង្គ្រោះជាតិរូបនេះភ្លាមៗ បន្ទាប់ពីលោកបានចូលទៅប្រទេសកម្ពុជានៅចុងខែឧសភា។
កាលពីថ្ងៃទី៣០ ខែឧសភា ឆ្នាំ២០២២ ចៅក្រមស៊ើបសួរសាលាដំបូងរាជធានីភ្នំពេញ លោក ស៊ិន សុវណ្ណរ័ត្ន បានចេញដីកាបង្គាប់ឱ្យចាប់ខ្លួនតំណាងយុវជននៃអតីតគណបក្សសង្គ្រោះជាតិប្រចាំប្រទេសន័រវែស លោក អៀ ចាន់ណា ពីបទរួមគំនិតក្បត់ដែលបានប្រព្រឹត្តនៅប្រទេសកម្ពុជាកាលពីឆ្នាំ២០២០ និងពេលបន្តបន្ទាប់មកទៀតតាមមាត្រា៤៥៣ នៃក្រមព្រហ្មទណ្ឌ។
ដីកាបង្គាប់ឱ្យចាប់ខ្លួនលោក អៀ ចាន់ណា ដែលត្រូវបានផ្សព្វផ្សាយលើបណ្ដាញសង្គមហ្វេសប៊ុកនៅថ្ងៃទី៣១ ឧសភា នេះ បានបង្គាប់ឱ្យភ្នាក់ងារមានសមត្ថកិច្ចធ្វើការនាំខ្លួនតំណាងយុវជនអតីតគណបក្សសង្គ្រោះជាតិរូបនេះទៅប្រគល់ឱ្យប្រធានមណ្ឌលអប់រំកែប្រែទី១ (ម១) ដោយធ្វើការឃុំខ្លួនជាបណ្ដោះអាសន្នរហូតដល់មានបទបញ្ជាថ្មីដែលសម្រេចផ្សេងពីនេះ។
មុននឹងឈានដល់ការចាប់ខ្លួននេះ តុលាការក្រុងភ្នំពេញធ្លាប់បានចេញដីកាបង្គាប់ឱ្យចាប់ខ្លួនរូបលោកកាលពីចុងខែធ្នូ ឆ្នាំ២០២០ ម្តងរួចមកហើយ ប៉ុន្តែមិនបានសម្រេច។
អនុប្រធានវេទិកាពលរដ្ឋ លោក ម៉ែន ណាត ប្រាប់សារព័ត៌មាន The Cambodia Daily នៅថ្ងៃទី៣១ ឧសភា នេះថា លោកអំពាវនាវឱ្យរដ្ឋាភិបាលកម្ពុជាពិចារណាដោះលែងលោក អៀ ចាន់ណា ឱ្យលោកមានសេរីភាពឡើងវិញ ព្រោះថាបើចាប់សកម្មជននយោបាយអតីតគណបក្សសង្គ្រោះជាតិបន្តទៀត មានតែបន្ថែមបន្ទុកលើខ្លួនឯងតែប៉ុណ្ណោះ ត្បិតកម្ពុជានៅពេលនេះកំពុងរងការរិះគន់ជុំទិសពីមជ្ឈដ្ឋានជាតិ និងអន្តរជាតិជុំវិញការរឹតត្បិតសេរីភាពនយោបាយរបស់ក្រុមប្រឆាំងសព្វថ្ងៃនេះ។
លោក ម៉ែន ណាត អះអាងថា កិច្ចការដែលរដ្ឋាភិបាលប្រទេសកម្ពុជាអាចស្ដារលទ្ធិប្រជាធិបតេយ្យ លើកស្ទួយការគោរពសិទ្ធិមនុស្ស និងផ្សះផ្សាជាតិឡើងវិញនៅពេលនេះ លោក ហ៊ុន សែន មិនត្រឹមតែមិនត្រូវចាប់សកម្មជនបក្សប្រឆាំងនោះទេ ប៉ុន្តែត្រូវដោះលែងអ្នកទោសមនសិការទាំងអស់។ បន្ថែមលើនេះទៀត ត្រូវបើកសិទ្ធិសេរីភាពនយោបាយឱ្យមេដឹកនាំបក្សប្រឆាំង លោក កឹម សុខា ឱ្យលោកអាចចូលរួមសកម្មភាពនយោបាយឡើងវិញផងដែរ ដើម្បីធានាបាននូវការអនុវត្តច្បាប់នានាស្តីអំពីសិទ្ធិមនុស្ស និងលទ្ធិប្រជាធិបតេយ្យដូចដែលមានចែងក្នុងធម្មនុញ្ញនៃអង្គការសហប្រជាជាតិ។
អនុប្រធានវេទិកាពលរដ្ឋរូបនេះបញ្ជាក់ថា សកម្មភាពរបស់គណបក្សភ្លើងទៀន ដែលបានចូលរួមការបោះឆ្នោតនៅពេលនេះ គឺកំពុងតែជួយលុបលាងទង្វើខុសច្បាប់រដ្ឋាភិបាលច្រើនណាស់ជុំវិញការប្លន់ប្រព័ន្ធបោះឆ្នោតនៅអាណត្តិទី៥ នេះ។ ដូច្នេះ រដ្ឋាភិបាលមិនគួរចាប់ខ្លួនសកម្មជននយោបាយ លោក អៀ ចាន់ណា នោះទេ ព្រោះគាត់ក៏មិនមែនជាមេដឹកនាំល្បីល្បាញដែលធ្វើឱ្យបក្សកាន់អំណាចមានការព្រួយបារម្ភនោះដែរ។
លោក អៀ ចាន់ណា គឺជាតំណាងយុវជនអតីតគណបក្សសង្គ្រោះជាតិដែលបានភៀសខ្លួនទៅរស់នៅប្រទេសន័រវែស ក្នុងទីក្រុងគ្រីសស្ទានសាន់ កាលពីឆ្នាំ២០០៥ បន្ទាប់ពីរដ្ឋាភិបាលលោក ហ៊ុន សែន បានធ្វើទុក្ខបុកម្នេញទាក់ទងនឹងរឿងព្រំដែន ប៉ុន្តែនៅឆ្នាំ២០២០ លោកត្រូវបានតុលាការក្រុងភ្នំពេញចោទប្រកាន់ពីបទក្បត់ជាតិតាមមាត្រា៤៥៣ នៃក្រមព្រហ្មទណ្ឌ និងចេញដីកាឱ្យចាប់ខ្លួនកាលពីចុងខែធ្នូ ឆ្នាំ២០២០ កន្លងទៅផងដែរ៕