 ដើម្បីការពារកុំឱ្យមានហេតុការណ៍នេះកើតឡើងបន្តទៀតនៅពេលក្រោយ។){kind=link}
តំណាងក្រុមហ៊ុនសម្លៀកបំពាក់បរទេស ADIDAS ជំរុញឱ្យរដ្ឋាភិបាលកម្ពុជាស៊ើបអង្កេតលើសកម្មភាពរបស់អាជ្ញាធរខ្មែរដែលបានចាប់ខ្លួនថ្នាក់ដឹកនាំសហជីព អំឡុងពេលមានវិវាទរវាងកម្មករ និងក្រុមហ៊ុន ខេន ស្ព័ត ស៊ូ (Can Sports Shoes) ដើម្បីការពារកុំឱ្យមានហេតុការណ៍នេះកើតឡើងបន្តទៀតនៅពេលក្រោយ។
តំណាងក្រុមហ៊ុនសម្លៀកបំពាក់បរទេស ADIDAS លោក វីល្លៀម អាឌឺសាន់ បានផ្ញើលិខិតទៅកាន់រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក អ៊ិត សំហេង កាលពីថ្ងៃទី១៤ ខែមិថុនា ឆ្នាំ២០២២ នេះថា ការចាប់ខ្លួនសមាជិកសហជីពដោយមិនមានការចោទប្រកាន់ពីតុលាការ គឺជាការរឹតត្បិតលើសេរីភាពសមាគម ដែលរដ្ឋាភិបាលកម្ពុជាគួរតែចាត់វិធានការដោយការណែនាំដ៏សមស្របមួយ ដើម្បីការពារនូវហានិភ័យដែលកើតចេញពីការចាប់ខ្លួនសមាជិកសហជីពដែលបានកើតមាននោះ។
ប្រភពដដែលលើកឡើងថា ការចាប់ខ្លួនសហជីព អាចបង្កើតជាបរិយាកាសបំភិតបំភ័យ និងបង្កឱ្យមានការខ្លាចរអាយ៉ាងធ្ងន់ធ្ងរ ដែលនាំឱ្យមានការប៉ះពាល់ដល់ដំណើរការទូទៅរបស់សហជីព ហើយវិធានការដកហូតសិទ្ធិសហជីពដោយហេតុផលពាក់ព័ន្ធទៅនឹងសកម្មភាពរបស់ពួកគេដែលតវ៉ាទាមទារដើម្បីសិទ្ធិការងារ គឺត្រូវបានចាត់ទុកថាជាការបង្កឧបសគ្គដល់ការអនុវត្តសិទ្ធិរបស់សហជីពយ៉ាងខ្លាំងផងដែរ។
កាលពីថ្ងៃទី៣១ ខែឧសភា ឆ្នាំ២០២២ កម្មករកម្មការិនីប្រមាណជា ៨ពាន់នាក់ដែលបម្រើការនៅក្រុមហ៊ុន ខេន ស្ព័ត ស៊ូ ស្ថិតក្នុងស្រុកសាមគ្គីមានជ័យ ខេត្តកំពង់ឆ្នាំង បានតវ៉ាបិទកំណាត់ផ្លូវជាតិលេខ៥ ដើម្បីទាមទារឱ្យថៅកែរោងចក្រដោះស្រាយបញ្ហាជាច្រើនឱ្យពួកគេ។
ការតវ៉ានេះ ធ្វើឡើងដើម្បីទាមទារឱ្យក្រុមហ៊ុនអនុញ្ញាតឱ្យមានអ្នកលក់ម្ហូបអាហារក្នុងបរិវេណរោងចក្រប្រមាណ ២០០នាក់ឡើងវិញ និងទាមទារឱ្យក្រុមហ៊ុនបើកប្រាក់ដំណាច់ឆ្នាំដែលនៅសល់ឈ្នួលជូនកម្មករកម្មការិនីឱ្យអស់។ លើសពីនេះ ក៏ទាមទារកុំឱ្យបញ្ឈប់កម្មករដែលមិនអាចធ្វើការងារថែមម៉ោងផងដែរ។
ក្រៅពីនេះ កម្មករនិយោជិតទាំងនោះបានទាមទារឱ្យរោងចក្របើកប្រាក់ឈ្នួលឱ្យកម្មករដែលខាងក្រុមហ៊ុនបានជំពាក់ថែមទៀត។ លើសពីនេះ ពួកគេក៏បានទាមទារឱ្យក្រុមហ៊ុនដកប្រធានផ្នែកនៅអគារ SIPCA4 ចេញពីក្រុមហ៊ុន ដោយសារតែប្រធានផ្នែករូបនេះបានបង្ខំឱ្យកម្មករធ្វើការថែមម៉ោង ទោះបីជាកម្មករនោះមានជំងឺប្រចាំកាយក៏ដោយ។
ក្នុងអំឡុងពេលកម្មករធ្វើកូដកម្ម និងធ្វើការចរចាជាមួយនៅថ្ងៃទី៣១ ខែឧសភា ថ្នាក់ដឹកនាំសហជីព ២រូបត្រូវបានសមត្ថកិច្ចចាប់ឃុំខ្លួននៅស្នងការខេត្តកំពង់ឆ្នាំង ទាំងដែលគ្មានដីការបស់តុលាការ។
បែបនេះក្តី នៅថ្ងៃបន្ទាប់ កម្មករនិយោជិតបានប្រមូលផ្ដុំគ្នាជាថ្មី ដើម្បីធ្វើកូដកម្មអហិង្សាបន្តទៀត។ យ៉ាងណាក៏ដោយ ថ្នាក់ដឹកនាំសហជីព ៣នាក់ផ្សេងទៀតត្រូវអាជ្ញាធរចាប់ខ្លួនផងដែរ ប៉ុន្តែពួកគេត្រូវស្នងការខេត្តកំពង់ឆ្នាំង ដោះលែងវិញ បន្ទាប់ពីពួកគេបានចុះហត្ថលេខាលើកិច្ចសន្យាថានឹងមិនដឹកនាំធ្វើកូដកម្មបន្តទៀតនោះ។
នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា បានប្រាប់សារព័ត៌មាន The Cambodia Daily នៅថ្ងៃទី១៦ មិថុនា នេះថា វាជារឿងដែលគួរឱ្យអាម៉ាស់ជាទីបំផុតសម្រាប់កម្ពុជា នៅពេលដែលក្រុមហ៊ុនបញ្ជាទិញរបស់បរទេសមកណែនាំឱ្យរដ្ឋាភិបាលខ្មែរបញ្ឈប់ការចាប់ខ្លួនកម្មករដោយបង្ខំឱ្យចុះកិច្ចព្រមព្រៀងកុំឱ្យធ្វើកូដកម្ម ដើម្បីធានានូវការអនុវត្តសិទ្ធិការងារដោយស្របច្បាប់កម្ពុជាទៅវិញនោះ។
លោក មឿន តុលា លើកឡើងថា បញ្ហានៅកម្ពុជាចំពោះកម្មករបានកើតឡើងដដែលៗ ប៉ុន្តែដំណោះស្រាយនៅតែមិនអាចកើតមាន ខណៈការបង្ក្រាបទៅលើកម្មករដែលប្រើសិទ្ធិដោយស្របច្បាប់នៅតែត្រូវបានលើកទឹកចិត្តពីសំណាក់រដ្ឋាភិបាលជាហូរហែរហូតមក។ ជាងនេះទៅទៀត កម្មករដែលសម្ដែងមតិស្របច្បាប់ការងាររបស់កម្ពុជាខ្លះទៀត បែរជាត្រូវចោទថាបង្កភាពវឹកវរធ្ងន់ធ្ងរដល់សន្តិសុខសង្គមទៅវិញ។
ក្រុមអ្នកឃ្លាំមើលសង្គមលើកឡើងថា ក្រសួងការងារមាននាយកដ្ឋានអធិការកិច្ចដើម្បីត្រួតពិនិត្យអំពីការអនុវត្តច្បាប់របស់ក្រុមហ៊ុនទាំងអស់នៅកម្ពុជា ហើយប្រសិនបើរកឃើញថា ក្រុមហ៊ុនមិនបានអនុវត្តត្រឹមត្រូវតាមច្បាប់ទេ ក្រសួងត្រូវតែដាក់ពិន័យលើក្រុមហ៊ុននោះដោយគ្មានករណីលើកលែងដាច់ខាត ប៉ុន្តែកន្លងមក ក្រុមហ៊ុនមិនដែលអនុវត្តទៅតាមច្បាប់ និងតួនាទីរបស់ខ្លួននោះឡើយ ដែលនាំឱ្យមានការរិះគន់ថា ក្រសួងការងារជួយការពារផលប្រយោជន៍ឱ្យក្រុមហ៊ុនជាថ្នូរនឹងលាភសក្ការៈដែលក្រសួងតែងតែទទួលបានពីក្រុមហ៊ុនរហូតមកនោះ។
លក្ខខណ្ឌនៃការអនុវត្តអនុសញ្ញាអង្គការពលកម្មអន្តរជាតិ (ILO) បានបញ្ជាក់ថា ការចាប់ខ្លួនថ្នាក់ដឹកនាំសហជីពដែលអនុវត្តសកម្មភាពស្របតាមច្បាប់ទាក់ទងនឹងសិទ្ធិសមាគម ទោះជាក្នុងរយៈពេលខ្លីក៏ដោយ ក៏ត្រូវបានចាត់ទុកថាជាការបំពានលើគោលការណ៍សេរីភាពសមាគមយ៉ាងធ្ងន់ធ្ងរផងដែរ៕