អគ្គលេខាធិការអង្គការណាតូ (NATO) លោក Jens Stoltenberg នៅថ្ងៃពុធ ទី២៩ ខែមិថុនា នេះ រំពឹងថា ប្រទេសស៊ុយអែត និងហ្វាំងឡង់ នឹងទទួលបានសច្ចាប័នយ៉ាងឆាប់រហ័សទៅលើពាក្យស្នើសុំចូលជាសមាជិកអង្គការ NATO របស់ពួកគេ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃពុធ ទី២៩ ខែមិថុនា។
លោក Stoltenberg បានប្រាប់ក្រុមអ្នកសារព័ត៌មាននៅថ្ងៃទីពីរនៃកិច្ចប្រជុំកំពូលរបស់អង្គការ NATO ក្នុងទីក្រុងម៉ាឌ្រីដ ប្រទេសអេស្ប៉ាញ ថា ក្រុមណាតូនឹងធ្វើការសម្រេចចិត្តនៅក្នុងកិច្ចប្រជុំកំពូល ដើម្បីទទួលយកប្រទេសស៊ុយអែត និងហ្វាំងឡង់ ឱ្យចូលជាសមាជិករបស់ណាតូ បន្ទាប់ពីប្រទេសទាំងពីរបានដាក់ពាក្យសុំចូល NATO កាលពីពីពាក់កណ្តាលខែឧសភា។
ប្រធាន NATO រូបនេះបានបន្ថែមថា បន្ទាប់ពីនេះ គឺត្រូវការដំណើរការផ្តល់សច្ចាប័នដោយត្រូវការពេលវេលាខ្លះ តែលោករំពឹងថានឹងដំណើរការទៅមុខយ៉ាងឆាប់រហ័ស ពីព្រោះសម្ពន្ធមិត្តទាំងអស់បានត្រៀមខ្លួនរួចជាស្រេច ដើម្បីព្យាយាមធ្វើឱ្យដំណើរការផ្តល់សច្ចាប័ននេះកើតឡើងឱ្យបានលឿនតាមដែលអាចធ្វើទៅបាន។
ប្រទេសហ្វាំងឡង់ និងស៊ុយអែត បានសម្រេចដាក់ពាក្យសុំចូលជាសមាជិកអង្គការ NATO បន្ទាប់ពីសង្គ្រាមបានផ្ទុះឡើងរវាងអ៊ុយក្រែន និងរុស្ស៊ី ដែលជាសង្គ្រាមរុស្ស៊ីឈ្លានពានអ៊ុយក្រែន។
សេចក្ដីថ្លែងការណ៍របស់លោក Stoltenberg កើតមានបន្ទាប់ពីប្រទេសតួកគី ដែលជាសមាជិកមួយរបស់ NATO បានសម្រេចចិត្តលុបចោលសិទ្ធិវេតូរបស់ខ្លួនកាលពីថ្ងៃអង្គារ គឺនៅមុនតែប៉ុន្មានម៉ោងប៉ុណ្ណោះមុននឹងមេដឹកនាំណាតូ ៣០ប្រទេសចូលប្រជុំ។ ការដែលតួកគី ទម្លាក់ចោលគំនិតរាំងខ្ទប់ដូចនេះ គឺជាការបើកផ្លូវឱ្យហ្វាំងឡង់ និងស៊ុយអែត ក្លាយជាសមាជិកភាពនៃបក្សសម្ព័ន្ធយោធាយ៉ាងឆាប់បំផុត។
ប្រធានាធិបតីប្រទេសតួកគី Recep Tayyip Erdogan បានជួបខាងក្រៅជំនួបកំពូលណាតូជាមួយសមភាគីហ្វាំងឡាំង Sauli Niinisto និងនាយករដ្ឋមន្ត្រីស៊ុយអែត Magdalena Andersson។ ក្នុងជំនួបនេះ មេដឹកនាំប្រទេសទាំង៣ បានយល់ព្រមការពារសន្តិសុខនឹងគ្នាទៅវិញទៅមក។
លោក ចូ បៃដិន ប្រធានាធិបតីសហរដ្ឋអាមេរិកបានថ្លែងសាទរប្រទេសស៊ុយអែត និងហ្វាំងឡង់ ដែលនឹងក្លាយជាសមាជិកណាតូទី៣១ និង៣២ ដ៏ឆាប់ៗនេះ។ លោក បៃដិន បានសរសើរប្រធានាធិបតីតួកគី ដែលសម្រេចឲ្យមានគំនិតរួបរួមជាមួយគ្នា។ លោក បៃដិន បានហៅសមាជិកថ្មីនេះ គឺជាការពង្រីកកម្លាំងរួមគ្នាថែមទៀតសម្រាប់សន្តិសុខអឺរ៉ុបទាំងមូល។ សម្រាប់អាមេរិក លោក បៃដិន សន្យាបន្ថែមសព្វាវុធ និងកងទ័ពថែមទៀតទៅកាន់ប្រទេសជាសមាជិកណាតូនៅអឺរ៉ុបខាងកើត។
តែយ៉ាងណា ចំពោះប្រទេសអ៊ុយក្រែន ដែលចង់ក្លាយជាសមាជិកណាតូជាច្រើនឆ្នាំមកនេះ បានបញ្ជាក់តាមរយៈរដ្ឋមន្ត្រីការបរទេស Dmitry Kuleba ថា ប្រទេសអ៊ុយក្រែនមិនបានបោះបង់ចោលផែនការសុំចូលសមាជិកណាតូនៅឡើយទេ។ តែលោកថា នៅពេលនេះ អ៊ុយក្រែនមិនទាន់បានគិតពិចារណាឡើងវិញចំពោះផែនការចូលជាសមាជិករបស់អង្គការណាតូនៅឡើយទេ។
ក្នុងបទសម្ភាសន៍មួយជាមួយប្រព័ន្ធផ្សព្វផ្សាយរបស់ប្រទេសបារាំង លោក Kuleba បានបង្ហាញការមិនយល់ស្របចំពោះការលើកឡើងដែលថា ទីក្រុងគៀវ បោះបង់ចោលគម្រោងចូលអង្គការ NATO។ លោកបញ្ជាក់ថា សំណួរនៃការចូលជាសមាជិករបស់អង្គការ NATO ត្រូវបានចែងក្នុងរដ្ឋធម្មនុញ្ញរួចហើយ។ បន្ថែមពីលើនេះ រចនាសម្ព័ន្ធរបស់បក្សសម្ព័ន្ធយោធាមួយនេះ គឺជាយន្តការសន្តិសុខដ៏មានប្រសិទ្ធភាពបំផុតនៅអឺរ៉ុប។
យ៉ាងណា សម្រាប់អ៊ុយក្រែន ត្រូវគេរំពឹងថានឹងក្លាយជាសមាជិកសហភាពអឺរ៉ុប នៅប៉ុន្មានខែទៀតនេះ ព្រោះមេដឹកនាំអឺរ៉ុប បានសម្រេចទទួលស្គាល់បេក្ខភាពរបស់អ៊ុយក្រែន ជាសមាជិករបស់ខ្លួនទៅហើយ។ ជាមួយគ្នានេះ លោក Jens Stoltenberg អគ្គលេខាធិការអង្គការណាតូ បានជំរុញឲ្យក្រុមមេដឹកនាំរបស់សម្ពន្ធមិត្តណាតូ ត្រូវរក្សាការគាំទ្រដល់ប្រទេសអ៊ុយក្រែន ក្នុងគ្រាដែលប្រទេសនេះកំពុងប្រឈមនឹងការវាយលុកដ៏ឃោរឃៅពីរុស្ស៊ី។
លោក Stoltenberg បានថ្លែងមុនកិច្ចប្រជុំនេះថា គឺសំខាន់ណាស់ដែលត្រូវត្រៀមខ្លួនបន្តផ្តល់ការគាំទ្រ ព្រោះឥឡូវនេះ អ៊ុយក្រែនកំពុងប្រឈមនឹងអំពើសាហាវព្រៃផ្សៃដែលមិនធ្លាប់បានឃើញពីមុននៅទ្វីបអឺរ៉ុប ចាប់តាំងពីសង្គ្រាមលោកលើកទី២ មក។
លោក Stoltenberg បានបញ្ជាក់ថា បក្សសម្ព័ន្ធយោធាមួយនេះ នឹងបង្កើនចំនួនកងទ័ពដែលត្រូវដាក់ឱ្យប្រុងជើងការខ្ពស់ដល់ ៣០ម៉ឺននាក់ ខណៈកំពុងត្រៀមអនុម័តយុទ្ធសាស្ត្រថ្មីមួយដែលចាត់ទុករុស្ស៊ីបានកំពុងគំរាមកំហែងដោយផ្ទាល់។
បើតាមលោក Stoltenberg បច្ចុប្បន្ននេះ កងទ័ពណាតូមាន ៤ម៉ឺននាក់ដែលបានដាក់ពង្រាយនៅលើដែនដីនៃប្រទេសសមាជិកណាតូដែលមានជាប់ព្រំដែនរុស្សី និងអ៊ុយក្រែន។
យ៉ាងណា គេរំពឹងថាកងទ័ពណាតូបន្ថែមដល់ទៅ ៣០ម៉ឺននាក់នេះ នឹងអាចទៅដាក់ពង្រាយនៅប្រទេសលីទុយអានី ប៉ូឡូញ អេស្តូនី ឡាតវី ម៉ុលហ្គារី រូម៉ានី សាធារណរដ្ឋឆេក ស្លូវើនៀ ហើយអាចនឹងដាក់ពង្រាយនៅលើទឹកដីហ្វាំងឡង់ និងស៊ុយអែត នៅពេលប្រទេសពីរនេះក្លាយជាសមាជិកណាតូជាផ្លូវការនៅពេលខាងមុខនេះ។
ប្រទេសទាំងអស់នេះសុទ្ធតែមានព្រំដែនជាប់នឹងរុស្ស៊ីផង និងអ៊ុយក្រែនផង។ សម្រាប់ហ្វាំងឡាំង មានព្រំដែនជាប់នឹងរុស្ស៊ីដល់ទៅ ១៣០០គីឡូម៉ែត្រ៕