ក្រសួងអប់រំ ឯកភាពឱ្យបង្កើតដេប៉ាតឺម៉ង់ភាសាវៀតណាម ឬថ្នាក់មូលដ្ឋានភាសាវៀតណាម ក្នុងសាកលវិទ្យាល័យភូមិន្ទភ្នំពេញ ដើម្បីងាយស្រួលក្នុងការផ្លាស់ប្ដូរនិស្សិតអាហារូបករណ៍ទៅវិញទៅមករវាងប្រទេសទាំងពីរ។
រដ្ឋលេខាធិការប្រចាំការដែលតំណាងឱ្យលោក ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា គឺលោក ពិត ចំណាន បានលើកឡើងក្នុងជំនួបដើម្បីរឹតចំណងមិត្តភាពលើវិស័យអប់រំជាមួយអនុរដ្ឋមន្ត្រីក្រសួងអប់រំនៃសាធារណរដ្ឋសង្គមនិយមវៀតណាម លោក ងឿន វ៉ាន់ ហ្វុក កាលពីថ្ងៃទី១០ ខែសីហា ឆ្នាំ២០២២ នេះថា ការបង្កើតដេប៉ាតឺម៉ង់ភាសាវៀតណាមនេះ គឺជាការជួយឱ្យនិស្សិតរបស់កម្ពុជាអាចចេះភាសាបរទេសមួយបន្ថែមទៀត។
លោក ពិត ចំណាន អះអាងថា តាមរយៈនៃការដាក់ចូលដេប៉ាតឺម៉ង់ភាសាវៀតណាម ទៅក្នុងវិស័យអប់រំរបស់កម្ពុជានេះ ជាផ្នែកមួយក្នុងការជំរុញឱ្យភាគីវៀតណាម ជួយសម្រួលដល់និស្សិតអាហារូបករណ៍កម្ពុជាដែលកំពុងស្នាក់នៅ ទទួលទាន និងការសិក្សាឱ្យបានកាន់តែល្អប្រសើរបន្ថែមទៀតនៅប្រទេសវៀតណាម ទៅថ្ងៃមុខ។
រដ្ឋលេខាធិការនៃក្រសួងអប់រំ យុវជន និងកីឡាកម្ពុជារូបនេះបញ្ជាក់ថា ការស្នើចង់បង្កើតដេប៉ាតឺម៉ង់ភាសាវៀតណាម ក្នុងសាកលវិទ្យាល័យភូមិន្ទភ្នំពេញ ក្រសួងអប់រំរបស់កម្ពុជាមិនមានការជំទាស់នោះទេ ដោយហេតុថា ភាសាទាំងអស់ក្នុងសាកលវិទ្យាល័យភូមិន្ទភ្នំពេញនេះគ្មានការប្រកាន់គ្នានោះឡើយ ហើយក៏ជាវិធីសាស្ត្រឱ្យសិស្សានុសិស្សអាចបន្តការរៀនសូត្របានកាន់តែទូលំទូលាយថែមទៀត។
អនុរដ្ឋមន្ត្រីក្រសួងអប់រំនៃសាធារណរដ្ឋសង្គមនិយមវៀតណាម លោក ងឿន វ៉ាន់ ហ្វុក បានថ្លែងអំណរគុណដល់ក្រសួងអប់រំកម្ពុជា ជាពិសេសសាកលវិទ្យាល័យភូមិន្ទភ្នំពេញ ដែលបានផ្តល់ឱកាសឱ្យវៀតណាម បានបង្កើតដេប៉ាតឺម៉ង់ភាសាវៀតណាមមួយនៅកម្ពុជា។
លោក ងឿន វ៉ាន់ ហ្វុក បន្ថែមថា ភាគីវៀតណាមនឹងប្ដេជ្ញាចិត្តបន្តផ្តល់អាហារូបករណ៍ដល់និស្សិតកម្ពុជាឱ្យបានកាន់តែច្រើនថែមទៀត ដើម្បីជាការបង្កើនកិច្ចសហប្រតិបត្តិការឱ្យកាន់តែល្អរវាងវិស័យអប់រំនៃប្រទេសទាំងពីរ។
ទាក់ទិននឹងបញ្ហានេះ ក្នុងរយៈពេលប៉ុន្មានថ្ងៃចុងក្រោយនេះក៏មានការផ្សព្វផ្សាយលើបណ្ដាញសង្គមហ្វេសប៊ុកព្រោងព្រាតផងដែរនូវរូបថតមួយសន្លឹក ដែលបានសរសេរជាអក្សរខ្មែរធំៗថា សាលាបឋមសិក្សាមិត្តភាពខ្មែរ-វៀតណាម ស្ថិតក្នុងភូមិទី៦ ឃុំព្រែកខ្សាយ ស្រុកពាមរក៍ ខេត្តព្រៃវែង ដែលបានដាក់សញ្ញាទង់ជាតិកម្ពុជា និងទង់ជាតិវៀតណាម ផងដែរ។
ជុំវិញបញ្ជ្រាបភាសាវៀតណាមចូលក្នុងវិស័យអប់រំរបស់កម្ពុជានេះ ក៏មានការបង្រៀនភាសាខ្មែរដល់ជនជាតិវៀតណាម ដែលកំពុងរស់នៅលើទឹកដីកម្ពុជាផងដែរ។ ជាក់ស្តែង កាលពីថ្ងៃទី៣០ ខែធ្នូ ឆ្នាំ២០២០ អគ្គកុងស៊ុលវៀតណាម លោក Vu Ngoc Ly អះអាងថា សមាគមវៀតណាមនៅកម្ពុជាទទួលបានជោគជ័យក្នុងការបើកវគ្គសិក្សាបង្រៀនអក្សរខ្មែរដល់ជនជាតិវៀតណាម ដែលកំពុងរស់នៅកម្ពុជាសព្វថ្ងៃនេះ ហើយវគ្គសិក្សានេះបានធ្វើឡើងក្នុងខេត្តមួយចំនួន ដូចជាខេត្តព្រះសីហនុ កំពត កែប កោះកុង កំពង់ស្ពឺ ជាពិសេសខេត្តដែលនៅជាប់ព្រំប្រទល់ប្រទេសវៀតណាមតែម្តង ដូចជាខេត្តតាកែវ ជាដើម។
អគ្គកុងស៊ុលវៀតណាមរូបនេះបញ្ជាក់ថា ការបើកវគ្គសិក្សានេះមានគោលបំណងផ្តល់ការគាំទ្រចាំបាច់ដល់ជនជាតិវៀតណាមដែលកំពុងរស់នៅកម្ពុជា ឲ្យពួកគេអាចទទួលបានសញ្ជាតិកម្ពុជាពេញលេញទៅថ្ងៃមុខ ដែលអាចចេះអាន និងសរសេរអក្សរខ្មែរពេញលេញ។
វិទ្យាស្ថានភាសាបរទេសនៃសាកលវិទ្យាល័យភូមិន្ទភ្នំពេញ មានបង្រៀនថ្នាក់បរិញ្ញាបត្រ និងបរិញ្ញាបត្រជាន់ខ្ពស់ មាន ៧ដេប៉ាតឺម៉ង់ គឺ៖
- ទី១ ដេប៉ាតឺម៉ង់ភាសាអង់គ្លេស
- ទី២ ដេប៉ាតឺម៉ង់ភាសាបារាំង
- ទី៣ ដេប៉ាតឺម៉ង់ភាសាជប៉ុន
- ទី៤ ដេប៉ាតឺម៉ង់ភាសាកូរ៉េ
- ទី៥ ដេប៉ាតឺម៉ង់សិក្សាអន្តរជាតិ
- ទី៦ ដេប៉ាតឺម៉ង់ភាសាចិន
- ទី៧ ដេប៉ាតឺម៉ង់ភាសាថៃ៕