ក្រសួងមហាផ្ទៃ អះអាងថា ក្នុងរយៈពេល ៥ថ្ងៃដើមខែកញ្ញា ឆ្នាំ២០២២ នេះ សមត្ថកិច្ចបានបើកប្រតិបត្តិការរំដោះជនរងគ្រោះចំនួន ២៣នាក់ពីអំពើជួញដូរមនុស្សនៅកម្ពុជា។
អ្នកនាំពាក្យក្រសួងមហាផ្ទៃ លោក ខៀវ សុភ័គ អះអាងនៅថ្ងៃទី៦ ខែកញ្ញា នេះថា ចាប់ពីថ្ងៃទី០១ ដល់ថ្ងៃទី០៥ ខែកញ្ញា ឆ្នាំ២០២២ នេះ ក្រសួងមហាផ្ទៃបានទទួលពាក្យបណ្តឹងសរុបចំនួន ១៧ករណីពាក់ព័ន្ធនឹងការស្នើឲ្យអន្តរាគមន៍ជួយសង្គ្រោះពីការបង្ខាំង និងជួញដូរកម្លាំងពលកម្មនៅកម្ពុជាសព្វថ្ងៃនេះ។
អ្នកនាំពាក្យដដែលឲ្យដឹងថា សមត្ថកិច្ចបានបើកប្រតិបត្តិការរំដោះជនរងគ្រោះចំនួន ២៣នាក់ពីអំពើជួញដូរមនុស្សដែលមានជនជាតិចិនតៃវ៉ាន់ចំនួន ១៥នាក់ ជនជាតិវៀតណាម ៧នាក់ រួមទាំងជនជាតិឥណ្ឌូនេស៊ីម្នាក់ផងដែរ។
អ្នកនាំពាក្យក្រសួងមហាផ្ទៃរូបនេះបញ្ជាក់ថា រដ្ឋាភិបាលកម្ពុជាបានបន្តប្ដេជ្ញាចិត្តប្រកបដោយឆន្ទៈមោះមុតក្នុងការអនុវត្តតាមច្បាប់ជាធរមាន ដើម្បីប្រយុទ្ធប្រឆាំងអំពើឆបោក ជំរិតទារប្រាក់តាមប្រព័ន្ធបច្ចេកវិទ្យា បទល្មើសគ្រឿងញៀន បទល្មើសសម្អាតប្រាក់ល្បែងស៊ីសងអនឡាញខុសច្បាប់ ព្រមទាំងបន្តផ្តល់ការគាំពារ និងជួយសង្គ្រោះទាំងពលរដ្ឋកម្ពុជាដែលរងគ្រោះដោយអំពើជួញដូរមនុស្សនៅឯបរទេស និងសង្គ្រោះជនបរទេសដែលរងគ្រោះដោយអំពើជួញដូរមនុស្សនៅកម្ពុជាផងដែរ។
ក្រសួងការបរទេសអាមេរិកកាលពីថ្ងៃទី១៩ ខែកក្កដា បានបញ្ចេញរបាយការណ៍ប្រចាំឆ្នាំ២០២២ ស្ដីពីការជួញដូរមនុស្ស ដោយទម្លាក់កម្ពុជា វៀតណាម តំបន់ម៉ាកាវ និងប្រទេសផ្សេងទៀតពីបញ្ជីស្ថិតក្រោមការឃ្លាំមើលនៅកម្រិតពីរ (Tier 2 Watch List) ទៅកម្រិត៣ ដែលធ្វើឲ្យកម្ពុជាស្ថិតនៅក្នុងបញ្ជីខ្មៅនៃការជួញដូរមនុស្សធ្ងន់ធ្ងរសព្វថ្ងៃនេះ។
យ៉ាងណាក៏ដោយ រដ្ឋលេខាធិការក្រសួងមហាផ្ទៃ អ្នកស្រី ជូ ប៊ុនអេង កាលពីថ្ងៃទី២២ ខែសីហា ឆ្នាំ២០២២ ធ្លាប់បានបដិសេធថា ភ្ញៀវទេសចរដែលធ្វើដំណើរមកកម្ពុជា ហើយមិនឃើញត្រឡប់ទៅមាតុភូមិវិញ មិនប្រាកដថាជួបប្រទះអំពើជួញដូរមនុស្សនោះទេ ហើយបើស្រាវជ្រាវមិនទាន់ឃើញ ក៏មិនប្រាកដថាជាករណីជួញដូរមនុស្សកើតឡើងនៅកម្ពុជានោះដែរ។
ទោះជាបែបនេះក្តី កាលពីថ្ងៃទី២០ ខែសីហា ឆ្នាំ២០២២ សារព័ត៌មាន Taipei Times បានចុះផ្សាយថា នគរបាលក្រុងតៃប៉ិ នៃកោះតៃវ៉ាន់ កាលពីពាក់កណ្តាលខែសីហា ឆ្នាំ២០២២ នេះ បានសន្និដ្ឋានថា មានជនជាតិចិនតៃវ៉ាន់ចន្លោះពី ២ពាន់នាក់ទៅ ៥ពាន់នាក់ ត្រូវបានរងគ្រោះដោយសារអំពើជួញដូរនៅកម្ពុជា ក្នុងនោះជនជាតិចិនតៃវ៉ាន់ដែលត្រូវបានជួយសង្គ្រោះពីការឃុំឃាំងនៅកម្ពុជា បានអះអាងថា ពួកគេបានរងការវាយធ្វើបាបតាមមធ្យោបាយផ្សេងៗដោយអ្នកជួញដូរមនុស្សនៅក្នុងសណ្ឋាគារមួយចំនួនក្នុងខេត្តព្រះសីហនុ។
ជុំវិញបញ្ហានេះ កាលពីថ្ងៃទី២៦ ខែសីហា ឆ្នាំ២០២២ កន្លងទៅ រដ្ឋមន្ត្រីក្រសួងមហាផ្ទៃ លោក ស ខេង បានសម្ដែងការសោកស្តាយក្រោយរកឃើញថាមានអំពើជួញដូរមនុស្សធ្ងន់ធ្ងរនៅកម្ពុជា ដែលមានពលរដ្ឋបរទេសមួយចំនួនធំត្រូវបានក្រុមឧក្រិដ្ឋជន និងបក្សពួកនៅកម្ពុជាប្រើបណ្ដាញទំនាក់ទំនងសង្គម ធ្វើការឆបោកឱ្យឆ្លងដែនដោយខុសច្បាប់ចូលទៅកម្ពុជា ក្រោមការសន្យាផ្តល់ការងារដែលទទួលបានប្រាក់ឈ្នួលខ្ពស់។
ទាក់ទិននឹងបញ្ហានេះ កាលពីចុងខែសីហា ឆ្នាំ២០២២ កន្លងទៅ ក្រសួងមហាផ្ទៃបានចេញផ្សាយរបាយការណ៍របស់ខ្លួនថា គិតត្រឹមថ្ងៃទី១ ខែមករា រហូតដល់ថ្ងៃទី២០ ខែសីហា ឆ្នាំ២០២២ អាជ្ញាធរកម្ពុជាបានរកឃើញ និងជួយសង្គ្រោះជនបរទេសដែលប្រកាសថាជាជនរងគ្រោះពីអំពើជួញដូរមនុស្សមានចំនួន ៨៧ករណី ដែលមានជនរងគ្រោះចំនួន ៨៦៥នាក់ ខណៈសំណុំរឿងដែលបានបញ្ជូនទៅតុលាការមានចំនួន ១៧ករណីដែលមានជនសង្ស័យសរុបចំនួន ៦០នាក់ផងដែរ៕