សេចក្តីរាយការណ៍ជាច្រើនកន្លងមកអំពីលុយដុល្លារហោះចេញពីព្រះរាជាណាចក្រកម្ពុជាទៅលាក់ខ្លួនពួនកប់ក្នុងគំនរអចលនទ្រព្យឯបរទេស។ ធនធានទាំងអស់នោះ ភោគវ័ន្ត ឬម្ចាស់ទ្រព្យជាសមាជិកបក្សប្រជាជនកម្ពុជា មានតំណែង មុខងារ ឋានន្តរស័ក្តិក្នុងរាជរដ្ឋាភិបាលឯកបក្ស ទាំងខាងយោធា ទាំងខាងក្រសួងស៊ីវិល។
កាសែតអូស្ត្រាលី The Australian ផ្សាយកាលពីថ្ងៃទី២២ ខែសីហា កន្លងទៅថា ក្នុងរយៈកាល ១០ឆ្នាំកន្លងមកនេះមានជនជាតិពីប្រទេសកម្ពុជាយ៉ាងតិច ៨០នាក់ ទទួលបានទិដ្ឋាការក្នុងក្របខ័ណ្ឌទិដ្ឋាការមាស ឬទិដ្ឋាការវិនិយោគិនពិសេស Golden Visa ឬ Significant Investor Visas តាមរយៈការដាក់ទុនទិញអចលនទ្រព្យក្នុងទឹកប្រាក់ទុនម្នាក់ៗ ៥លានដុល្លារអូស្ត្រាលី ដើម្បីបានសិទ្ធិរស់នៅជាអចិន្ត្រៃយ៍ ធ្វើការងារផង រៀនផង ធានាបងប្អូនទៅរស់នៅជាមួយ និងអាចសុំចូលសញ្ជាតិអូស្ត្រាលី។
តាមច្បាប់អូស្ត្រាលី វិនិយោគិនម្នាក់ដាក់ទុន ៥លានដុល្លារ អាចនាំសមាជិកគ្រួសារជាមធ្យមចំនួន ៤នាក់ទៅរស់នៅជាមួយនៅប្រទេសនោះ។
សមាជិកសភា និងសមាជិករដ្ឋាភិបាលអូស្ត្រាលី ចាប់ផ្តើមមានក្តីបារម្ភក្រែងសហគមន៍អន្តរជាតិចាត់ទុកប្រទេសអូស្ត្រាលី ជាប្រទេសលាងលុយ និងលាក់លុយកខ្វក់ពីរបរឧក្រិដ្ឋកម្ម។ វិធីទាក់ទាញវិនិយោគទុនបរទេសជារបៀបផ្តល់សិទ្ធិរស់នៅ ផ្តល់សញ្ជាតិដូចនៅអូស្ត្រាលី ត្រូវបានប្រទេសជាច្រើនជុំវិញពិភពលោកលុបចោលអស់ហើយ ដើម្បីបញ្ឈប់ពួកមន្ត្រីពុករលួយលួចលុយជាតិយកទៅតម្កល់ទុកជាគ្រួសាររបស់គេនាកន្លែងសុខសាន្ត ដែលសល់អូស្ត្រាលីមួយជាបស្ចិមប្រទេសជឿនលឿនបន្តដើរតាមវិធីនេះ។
យោងតាមប្រភពកាសែត ពួកមន្ត្រីមានលុយទិញអចលនទ្រព្យក្នុងប្រទេសអូស្ត្រាលី មានលោក អូន ព័ន្ធមុនីរតន៍ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងភរិយា អ៊ិម ប៉ូលីកា ទិញយកអគារផ្ទះល្វែងប្រណីតនៅក្រុងស៊ីដនី ឈ្មោះ One Central Park នាឆ្នាំ២០១៤ តម្លៃជាង ២លានដុល្លារ ហើយនិងអគារផ្ទះល្វែងឈ្មោះ Waterfall Waterloo តម្លៃ ៣លានដុល្លារ នាឆ្នាំ២០១៧។ នៅក្នុងបរិវេណតែមួយដដែល ឧត្តមសេនីយ៍ទោ ឡាវ វ៉ាន់ កូនប្រុសឧកញ៉ា ឡាវ ម៉េងឃិន ពីប្រពន្ធមុន ធ្វើការក្នុងកងអង្គរក្សនាយករដ្ឋមន្ត្រី និងភរិយា ជឹង សុគន្ធាវី កូនស្រីអ្នកស្រី ជឹង សុភាព ហៅយាយភូ ពីប្តីមុន ទិញយកអគារផ្ទះល្វែងមួយតម្លៃជិត ៤លានដុល្លារ ថែមទៅនឹងអគារផ្ទះល្វែងតម្លៃ ៤លានដុល្លារនៅឆ្នេរខាងត្បូងទីក្រុងម៉ែលប៊ន។
គួរកត់សម្គាល់ថា បក្សប្រជាជនកម្ពុជាបានបែងចែកប្រទេសអូស្ត្រាលី ជា ៧តំបន់ ចាត់តាំង គ្រប់គ្រងដោយនាយទាហានសមាជិកបក្ស ហើយ ឡាវ វ៉ាន់ ជាមេបញ្ជាការតំបន់២ ម៉ែលប៊ន។
ពួកមន្ត្រីទុច្ចរិតសម្លឹងឃើញប្រទេសអូស្ត្រាលីជាប្រទេសគេយកធនធានទៅលាក់ទុកបាន ខណៈសហគមន៍អន្តរជាតិកំពុងអនុវត្តច្បាប់រឹតបន្តឹង បោសសម្អាតសកម្មភាពលាងលុយកខ្វក់ និងស្វែងរកប្រភពរកក្រុមឧក្រិដ្ឋជនធ្វើចរាចរណ៍លុយ។
សភាសហភាពអឺរ៉ុប បានទាមទារឲ្យបិទកម្មវិធីដាក់ទុនយកទិដ្ឋាការ ព្រោះថាវាអាចជួយដល់ពួកឧក្រិដ្ឋជនជ្រៀតចូលធ្វើសកម្មភាពក្នុងទ្វីបអឺរ៉ុប។ នាយកដ្ឋានត្រួតពិនិត្យការលាងលុយកខ្វក់នៃប្រទេសអូស្ត្រាលី ព្រមានថា អ្នកចេញមុខខាងនយោបាយ politically exposed person គឺមន្ត្រីមានអំណាចក្នុងរដ្ឋាភិបាល ជាអ្នកសម្រេចកិច្ចការរដ្ឋ ហើយក៏ជាអ្នកងាយពុករលួយស៊ីសំណូកដែរ។
គេមិនទាន់ដឹងច្បាស់ថា តើរដ្ឋាភិបាលលោក Anthony Albanese នឹងពិចារណាសើរើរឿងដាក់ទុនទិញទិដ្ឋាការ ឬវីហ្សា ហើយនឹងស៊ើបអង្កេតរឿងសកម្មភាពមន្ត្រីខ្មែរក្នុងបក្សប្រជាជនកម្ពុជា ដូចជារឿងលាងលុយដែរ ឬយ៉ាងណានៅឡើយទេ៕