25 C
Phnom Penh

សមត្ថកិច្ច​គ្រោង​បណ្ដេញ​ជនជាតិ​ចិន​និង​វៀតណាម​ខុស​ច្បាប់​១៤១​នាក់​ចេញពី​កម្ពុជា

ដោយ ឌឹ ខេមបូឌា ដេលី

បទវិភាគ

សមត្ថកិច្ច​ចម្រុះ​ខេត្ត​ព្រះសីហនុ ឃាត់​ខ្លួន​ជន​អន្តោប្រវេសន៍​ខុស​ច្បាប់​ជិត ៥០០​នាក់ ដែល​មាន ៤​សញ្ជាតិ ក្នុង​នោះ​មាន​ជនជាតិ​ចិន និង​វៀតណាម ១៤១​នាក់ នឹង​ត្រូវ​បណ្ដេញ​ចេញពី​កម្ពុជា ខណៈ​ជនបរទេស ២៧​នាក់​ទៀត​ពាក់ព័ន្ធ​នឹង​ប្រព្រឹត្ត​បទល្មើស​បង្ខាំង​ធ្វើ​ទារុណកម្ម និង​ជួញដូរ​មនុស្ស។

ក្នុង​សេចក្ដី​ប្រកាស​ព័ត៌មាន​របស់​រដ្ឋបាល​ខេត្ត​ព្រះសីហនុ ចុះ​ថ្ងៃទី​១៨ ខែ​កញ្ញា បាន​ឱ្យ​ដឹង​ថា ក្នុង​យុទ្ធនាការ​ចុះ​បង្ក្រាប​បទល្មើស​នៅ​ទីតាំង​ចំនួន ៣​អគារ​ចាប់ពី​ថ្ងៃទី​១៣ ដល់​ថ្ងៃទី​១៧ ខែ​កញ្ញា ឆ្នាំ​២០២២ សមត្ថកិច្ច​ចម្រុះ​ខេត្ត​ព្រះសីហនុ បាន​ឃាត់​ខ្លួន​ជនអន្តោប្រវេសន៍​ខុស​ច្បាប់​ចំនួន ៤៩៥​នាក់​ដែល​មាន ៤​សញ្ជាតិ។

សេចក្ដី​ប្រកាស​ដដែល​បញ្ជាក់​ថា សមត្ថកិច្ច​ឃាត់​ខ្លួន​ជនបរទេស​ទាំង ៤៩៥​នាក់​នៅ​ទីតាំង​ឈ្មោះ ស៊ឹង សានទីង (ហៅ ឆាងឆឹង) ចំនួន ៣​អគារ (A,B,C) ស្ថិត​នៅ​ដី​ឡូត៍​មួយ​កន្លែង​នៅ​ភូមិ​៣ សង្កាត់​លេខ​៣ ក្រុង​ព្រះសីហនុ ខេត្ត​ព្រះសីហនុ។

ក្នុង​ចំណោម​ជនបរទេស​ទាំង ៤៩៥​នាក់​ដែល​សមត្ថកិច្ច​បាន​ឃាត់​ខ្លួន​នោះ មាន​ជនអន្តោប្រវេសន៍​ខុស​ច្បាប់​ចំនួន ១៤១​នាក់ ក្នុង​នោះ​ជនជាតិ​ចិន​ចំនួន ១៣០​នាក់ និង​ជនជាតិ​វៀតណាម ១១​នាក់ ត្រូវ​បាន​បញ្ជូន​ទៅ​នាយកដ្ឋាន​ស៊ើបអង្កេត និង​អនុវត្ត​នីតិវិធី​នៃ​អគ្គនាយកដ្ឋាន​អន្តោប្រវេសន៍​ដើម្បី​បណ្តេញ​ចេញពី​កម្ពុជា។

ចំណែក​ជនបរទេស​ចំនួន ២៦២​នាក់​ចូល​មក​ធ្វើ​ការងារ​ក្នុង​ប្រទេស​កម្ពុជា​ដោយ​គ្មាន​ប័ណ្ណ​ការងារ ហើយ​អាជ្ញាធរ​ក៏​បាន​ផាក​ពិន័យ​តាម​ផ្លូវច្បាប់​ចំនួន ៧៨៨៤០​ដុល្លារ ហើយ​ចំណែក​ជនបរទេស​ចំនួន ២៧​នាក់​ទៀត​ត្រូវ​បាន​គេ​រក​ឃើញ​ថា ពួកគេ​ប្រព្រឹត្ត​បទល្មើស​ល្បែងស៊ីសង​ខុស​ច្បាប់ បទល្មើស​បង្ខាំង និង​ធ្វើ​ទារុណកម្ម​មនុស្ស​ដោយ​ខុស​ច្បាប់ បទល្មើស​កាន់កាប់ និង​រក្សា​ទុក​អាវុធ​ខុស​ច្បាប់ បទល្មើស​សញ្ចរកម្ម និង​ជួញដូរ​មនុស្ស។

ករណី​នេះ រដ្ឋបាល​ខេត្ត​ព្រះសីហនុ​បាន​ដាក់​ចេញ​នូវ​វិធានការ​មួយ​ចំនួន​ផង​ដែរ ដូចជា៖

  • សម្រេច​ធ្វើ​កិច្ចសន្យា​អប់រំ​ដល់​ជនបរទេស​ដែល​ស្រប​ច្បាប់ និង​ជនបរទេស​ដែល​ត្រូវ​បាន​ផាក​ពិន័យ​រួច​ឱ្យ​ចាកចេញ​ពី​ទីតាំង​ទៅ​រក​កន្លែង​ថ្មី​តាម​ការ​ស្ម័គ្រចិត្ត
  • បិទ​អាជីវកម្ម​ទាំងអស់​ដែល​នៅ​បរិវេណ​ទីតាំង​ឈ្មោះ ស៊ឹង សានទីង (ហៅ ឆាងឆឹង)
  • បិទ​អគារ A, B និង C ដើម្បី​បន្ត​ស៊ើបអង្កេត​រហូត​ដល់​កិច្ច​ស៊ើបអង្កេត​ត្រូវ​បាន​បញ្ចប់
  • បន្ត​ស៊ើបអង្កេត​បទល្មើស​សម្អាត​ប្រាក់ ការ​រក្សា​អាវុធ​ខុស​ច្បាប់
  • និង​ស្រាវជ្រាវ​ចាប់​ជនសង្ស័យ​ម្នាក់​ដែល​ជា​មេខ្លោង​ក្នុង​សំណុំរឿង​នេះ​ផង​ដែរ។

កាលពី​ថ្ងៃទី​៩ ខែ​កញ្ញា ឆ្នាំ​២០២២ តាមរយៈ​ក្រសួង​យុត្តិធម៌ ក៏​បាន​បង្កើត​ក្រុម​ការងារ​ចំពោះ​កិច្ច​ប្រឆាំង​គ្រប់​ទម្រង់​នៃ​អំពើ​ជួញដូរ​មនុស្ស ជួញដូរ​ពលកម្ម និង​អាជីវកម្ម​ផ្លូវភេទ និង​ការ​សម្អាត​ប្រាក់ ជាដើម។

ក្រសួង​យុត្តិធម៌ បញ្ជាក់​ថា ក្រុម​ការងារ​ថ្មី​នេះ​មាន​តួនាទី​ត្រួតពិនិត្យ​ជនបរទេស​តាម​បណ្ដា​គោលដៅ​សង្ស័យ ដើម្បី​ឈាន​ទៅ​ដល់​ការ​ឃាត់​ខ្លួន​ជនល្មើស ជំរុញ និង​ពង្រីក​ការ​ស៊ើបអង្កេត ការ​ចោទប្រកាន់ ការ​ស៊ើបសួរ និង​ការ​ផ្ដន្ទាទោស​អ្នក​ពាក់ព័ន្ធ​បទឧក្រិដ្ឋ​ទាំងនោះ រួម​ទាំង​បទល្មើស​សម្អាត​ប្រាក់​ផង​ដែរ។

វិធានការ​ចុះ​បង្ក្រាប​របស់​កម្លាំង​សមត្ថកិច្ច​ចម្រុះ​នា​ពេលនេះ បន្ទាប់ពី​មាន​បញ្ជា​ពី​រដ្ឋមន្ត្រី​ក្រសួង​មហាផ្ទៃ លោក ស ខេង ក្រោយពី​សហរដ្ឋ​អាមេរិក​បាន​ទម្លាក់​ចំណាត់ថ្នាក់​កម្ពុជា​ទៅ​ក្នុង​បញ្ជី​ខ្មៅ​នៃ​ការ​ជួញដូរ​មនុស្ស និង​សហភាព​អឺរ៉ុប​ក៏​បាន​ដាក់​កម្ពុជា​ក្នុង​បញ្ជី​ប្រផេះ​នៃ​ការ​លាង​លុយ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស