31 C
Phnom Penh

កម្ពុជា​ប្ដេជ្ញា​លើក​កម្ពស់​សេរីភាព​បញ្ចេញមតិ​និង​ប្រព័ន្ធ​ផ្សព្វផ្សាយ​ឱ្យ​កាន់តែ​ទូលំទូលាយ

ដោយ ឌឹ ខេមបូឌា ដេលី

បទវិភាគ

ស្ថាន​បេសកកម្ម​អចិន្ត្រៃយ៍​កម្ពុជា​ប្រចាំ​អង្គការ​សហប្រជាជាតិ ក្នុង​ក្រុង​ហ្សឺណែវ អះអាង​ថា រដ្ឋាភិបាល​កម្ពុជា​ប្ដេជ្ញាចិត្ត​ឥត​ងាករេ​ក្នុង​ការ​លើក​កម្ពស់​សេរីភាព​បញ្ចេញមតិ និង​ប្រព័ន្ធ​ផ្សព្វផ្សាយ​នៅ​កម្ពុជា​ឱ្យ​កាន់តែ​ទូលំទូលាយ​បន្ត​ទៀត។

ស្ថាន​បេសកកម្ម​អចិន្ត្រៃយ៍​របស់​កម្ពុជា​ក្នុង​ទីក្រុង​ហ្សឺណែវ បាន​ចេញ​សេចក្តី​ថ្លែងការណ៍​ព័ត៌មាន​កាលពី​ថ្ងៃទី​៦ ខែ​តុលា ឆ្នាំ​២០២២ បន្ទាប់ពី​ចូលរួម​កិច្ច​សន្ទនា​អន្តរជាតិ​ជាមួយ​អ្នក​រាយការណ៍​ពិសេស​ស្ដីពី​ស្ថានភាព​សិទ្ធិមនុស្ស​នៅ​កម្ពុជា ថា ប្រព័ន្ធ​ផ្សព្វផ្សាយ​រិះគន់​រដ្ឋាភិបាល​មាន​ការ​ផ្សព្វផ្សាយ​យ៉ាង​ទូលំទូលាយ និង​មាន​ភាព​រស់​រវើក​ដោយ​ការ​ធ្វើ​ប្រតិបត្តិការ​លើ​ការងារ​របស់​ពួកគេ ដែល​មាន​រហូត​ដល់​ទៅ​ជាង ២​ពាន់​អង្គភាព​ក្នុង​ពេល​បច្ចុប្បន្ន​នេះ ដោយ​គ្មាន​ការ​ត្រួតពិនិត្យ​ពី​សំណាក់​រដ្ឋាភិបាល​ជា​មុន​នោះ​ទេ​នា​ពេល​កន្លងមក។

ប្រភព​ដដែល​លើកឡើង​ថា ពលរដ្ឋ​ខ្មែរ​អាច​ទទួល​បាន​ប្រភព​ព័ត៌មាន​ចម្រុះ ហើយ​ការ​ផ្តល់​ព័ត៌មាន​ដោយ​សេរី​ក៏​មាន​សន្ទុះ​កាន់តែ​ខ្លាំង​ឡើងៗ​ផង​ដែរ ដោយសារតែ​កម្ពុជា​បាន​ធ្វើ​ឱ្យ​តម្លៃ​អ៊ីនធឺណិត​ស្ថិត​ក្នុង​កម្រិត​ទាប ក្នុង​គោលបំណង​ជួយ​ឱ្យ​ពលរដ្ឋ​អាច​មាន​លទ្ធភាព​ប្រើប្រាស់​ទូរស័ព្ទ​កាន់តែ​ច្រើន ដើម្បី​ទទួល​បាន​នូវ​ការ​ផ្សព្វផ្សាយ​នានា​ឱ្យ​កាន់តែ​ទូលំទូលាយ​ក្នុង​ពេល​បច្ចុប្បន្ន​នេះ។

អតីត​អ្នកទោស​នយោបាយ និង​ជា​មន្ត្រី​ជាន់ខ្ពស់​គណបក្ស​សង្គ្រោះ​ជាតិ លោក មាជ សុវណ្ណារ៉ា ប្រាប់​សារព័ត៌មាន The Cambodia Daily នៅ​ថ្ងៃទី​៧ តុលា នេះ​ថា របាយការណ៍​ស្ថាន​បេសកកម្ម​អចិន្ត្រៃយ៍​កម្ពុជា មិនមែន​ជា​ការ​លើកឡើង​ឆ្លុះបញ្ចាំង​ពី​ការពិត​នៃ​ការ​បញ្ចេញមតិ​នៅ​កម្ពុជា​នោះ​ទេ គ្រាន់តែ​ជា​របាយការណ៍​បិទបាំង​ការពិត​ដែល​រដ្ឋាភិបាល​កំពុង​អនុវត្ត​នូវ​ការ​រាំង​ខ្ទប់​សិទ្ធិ​មូលដ្ឋាន​របស់​ពលរដ្ឋ​ប៉ុណ្ណោះ។

លោក មាជ សុវណ្ណារ៉ា លើកឡើង​ថា ទោះជា​រដ្ឋាភិបាល​ព្យាយាម​បិទបាំង​នូវ​អំពើ​ទុច្ចរិត​របស់​ខ្លួន​ដែល​កំពុង​ធ្វើ​ទុក្ខបុកម្នេញ​លើ​ពលរដ្ឋ ដោយ​ការ​ប្រើ​អំពើ​ហិង្សា​នានា​ដើម្បី​បំបិទ​សេរីភាព​របស់​ពលរដ្ឋ​យ៉ាងណាក៏ដោយ ក៏​មិន​អាច​លាក់​បាំង​បាន​រហូត​នោះ​ដែរ ព្រោះ​ថា​សហគមន៍​ជាតិ និង​អន្តរជាតិ​សុទ្ធតែ​បាន​ដឹង​ពី​ទង្វើ​នៃ​ការ​រំលោភ​បំពាន​សិទ្ធិ​ពលរដ្ឋ​យ៉ាង​ច្បាស់​ពី​សំណាក់​រដ្ឋាភិបាល​ឯក​បក្ស​សព្វថ្ងៃ​នេះ ជាពិសេស​គឺ​ការ​ចាប់​ខ្លួន​សកម្មជន​សង្គម សកម្មជន​នយោបាយ​ដែល​កំពុង​ត្រូវ​បាន​ឃុំ​ខ្លួន​សព្វថ្ងៃ​នេះ ជាដើម។

ក្រុម​អ្នក​សង្កេតការណ៍​លើកឡើង​ថា សេរីភាព​បញ្ចេញមតិ​នានា​នៅ​កម្ពុជា​ត្រូវ​បាន​រាំង​ខ្ទប់​ទាំងស្រុង ហើយ​សកម្មជន​នយោបាយ សកម្មជន​សិទ្ធិមនុស្ស និង​សកម្មជន​សង្គម ដូចជា​កញ្ញា សេង ធារី យុវជន ថែល ធីលែន លោក អៀរ ចាន់ណា លោក សៀម ភ្លុក ជាដើម កំពុង​ត្រូវ​បាន​ឃុំ​ខ្លួន​ទាំង​អយុត្តិធម៌​នៅ​ពេល​នេះ ខណៈ​សកម្មជន​សង្គម​ផ្សេង​ទៀត​ដូចជា លោក ថុន រដ្ឋា កញ្ញា ឡុង គន្ធា និង​កញ្ញា ភួន កែវរស្មី ដែល​ការពារ​បរិស្ថាន​កន្លង​មក ក៏​ត្រូវ​តុលាការ​ដាក់​ឱ្យ​ស្ថិត​ក្នុង​ការ​ស៊ើបអង្កេត​ក្នុង​ពេល​បច្ចុប្បន្ន​នេះ​ផង​ដែរ។

អង្គការ​អ្នក​សារព័ត៌មាន​គ្មាន​ព្រំដែន (Reporters Without Borders) បាន​ដាក់​ចំណាត់ថ្នាក់​សេរីភាព​សារព័ត៌មាន​នៅ​កម្ពុជា​សម្រាប់​ឆ្នាំ​២០២២ ស្ថិត​ក្នុង​លំដាប់​លេខ​រៀង​ទី​១៤២ ក្នុង​ចំណោម​ប្រទេស​១៨០ ដែល​ជា​ចំណាត់ថ្នាក់​មិន​ល្អ​ដដែល ព្រោះ​ថា​ប្រព័ន្ធ​ផ្សព្វផ្សាយ​ឯករាជ្យ​នៅ​កម្ពុជា​ត្រូវ​បាន​បំផ្លិចបំផ្លាញ និង​បោស​សម្អាត​ដោយ​រដ្ឋាភិបាល​កម្ពុជា ចាប់តាំងពី​អំឡុង​ឆ្នាំ​២០១៧ និង​ឆ្នាំ​២០១៨ រហូត​មក ដែល​ធ្វើ​ឱ្យ​សេរីភាព​សារព័ត៌មាន​នៅ​ប្រទេស​កម្ពុជា​បន្ត​ធ្លាក់​ចុះ ៤​ឆ្នាំ​ជាប់ៗ​គ្នា​ចាប់តាំងពី​ឆ្នាំ​២០១៨ រហូត​ដល់​ឆ្នាំ​២០២១ កន្លងទៅ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស