31 C
Phnom Penh

ប្រធាន​ព្រឹទ្ធសភា​កម្ពុជា​ទៅ​ទស្សនកិច្ច​នៅ​វៀតណាម​៣​ថ្ងៃ​ដើម្បី​ពង្រឹង​ចំណង​មិត្តភាព​ប្រទេស​ទាំង​ពីរ

ដោយ ឌឹ ខេមបូឌា ដេលី

បទវិភាគ

ប្រធាន​ព្រឹទ្ធសភា​នៃ​រាជាណាចក្រ​កម្ពុជា លោក សាយ ឈុំ ដឹកនាំ​គណៈប្រតិភូ​ទៅ​បំពេញ​ទស្សនកិច្ច​ជា​ផ្លូវការ​នៅ​សាធារណរដ្ឋ​សង្គម​និយម​វៀតណាម រយៈពេល ៣​ថ្ងៃ ដើម្បី​ពង្រឹង​ចំណង​មិត្តភាព សាមគ្គីភាព​រវាង​ប្រទេស​ទាំង​ពីរ និង​អបអរ​សាទរ​ខួប​អនុស្សាវរីយ៍​លើក​ទី​៥៥ នៃ​ថ្ងៃ​បង្កើត​ទំនាក់ទំនង​ការទូត​រវាង​ប្រទេស​ទាំង​ពីរ។

ការ​ទៅ​បំពេញ​ទស្សនកិច្ច​នេះ ធ្វើឡើង​តប​តាម​ការ​អញ្ជើញ​របស់​លោក វឿង ឌិញហ្វេ ប្រធាន​រដ្ឋសភា​នៃ​សាធារណរដ្ឋ​សង្គម​និយម​វៀតណាម។

សេចក្ដី​ប្រកាស​ព័ត៌មាន​ពី​ព្រឹទ្ធសភា​កម្ពុជា ចុះ​ថ្ងៃទី​២៤ ខែ​តុលា ឆ្នាំ​២០២២ បាន​ឲ្យ​ដឹង​ថា ប្រធាន​ព្រឹទ្ធសភា លោក សាយ ឈុំ ទៅ​បំពេញ​ទស្សនកិច្ច​ជា​ផ្លូវការ​នៅ​សាធារណរដ្ឋ​សង្គម​និយម​វៀតណាម ចាប់ពី​ថ្ងៃទី​២៤ ដល់​ថ្ងៃទី​២៦ ខែ​តុលា។

ប្រភព​ដដែល​ថា ការ​ទៅ​បំពេញ​ទស្សនកិច្ច​នេះ ដើម្បី​ពង្រឹង​ពង្រីក​ចំណង​មិត្តភាព សាមគ្គីភាព និង​កិច្ច​សហប្រតិបត្តិការ​រវាង​ប្រជាជន និង​ប្រទេស​ទាំង​ពីរ និង​រវាង​ព្រឹទ្ធសភា​ប្រទេស​ទាំង​ពីរ ព្រមទាំង​ចូលរួម​អបអរ​សាទរ​ក្នុង​ឱកាស​ខួប​អនុស្សាវរីយ៍​លើក​ទី​៥៥ នៃ​ថ្ងៃ​បង្កើត​ទំនាក់ទំនង​ការទូត​រវាង​ប្រទេស​កម្ពុជា និង​វៀតណាម និង​ជា​ឆ្នាំ​មិត្តភាព​កម្ពុជា-វៀតណាម។

បើ​តាម​សេចក្ដី​ប្រកាស​ព័ត៌មាន ថា ក្នុង​ដំណើរ​ទស្សនកិច្ច​នេះ លោក សាយ ឈុំ នឹង​ជួប​ពិភាក្សា​ការងារ​ជាមួយ​ថ្នាក់​ដឹកនាំ​ជាន់ខ្ពស់​នៃ​សាធារណរដ្ឋ​សង្គម​និយម​វៀតណាម ក្នុង​នោះ​មាន​អគ្គលេខាធិការ​នៃ​គណៈកម្មាធិការ​មជ្ឈិម​បក្ស​កុម្មុយនីស្ត​វៀតណាម លោក ង្វៀង ហ៊្វុចុង ហើយ​ប្រធាន​រដ្ឋ​វៀតណាម លោក ង្វៀង ស៊ួនហ៊្វុក និង​ប្រធាន​រដ្ឋសភា​វៀតណាម លោក វឿង ឌិញហ្វេ។

ក្រៅពី​ជួប​ប្រធាន​ព្រឹទ្ធសភា និង​រដ្ឋសភា​ហើយ ប្រធាន​ព្រឹទ្ធសភា​កម្ពុជា លោក សាយ ឈុំ ក៏​នឹង​ជួប​នាយករដ្ឋមន្ត្រី​វៀតណាម លោក ផាម មីញជីញ ព្រមទាំង​ឥស្សរជន​ជាន់ខ្ពស់​វៀតណាម​មួយ​ចំនួន​ទៀត​ផង​ដែរ។

មិនមែន​តែ​ប្រធាន​ព្រឹទ្ធសភា​កម្ពុជា លោក សាយ ឈុំ ដែល​ភាគី​វៀតណាម​ហៅ​ទៅ​បំពេញ​ទស្សនកិច្ច​នោះ​ទេ កាលពី​អំឡុង​ខែ​កញ្ញា ឆ្នាំ​២០២២ ប្រធាន​រដ្ឋសភា​កម្ពុជា លោក ហេង សំរិន ក៏​បាន​ទៅ​បំពេញ​ទស្សនកិច្ច​នៅ​ប្រទេស​វៀតណាម​ដែរ ដោយ​ថា​ដើម្បី​ពង្រឹង​ចំណង​មិត្តភាព​ជាមួយ​វៀតណាម ខណៈ​អភិបាល​រាជធានី​ភ្នំពេញ លោក ឃួង ស្រេង ក៏​ត្រូវ​បាន​ភាគី​វៀតណាម​អញ្ជើញ​ទៅ​ទស្សនកិច្ច​ដែរ។

ក្នុង​ជំនួប​ទ្វេភាគី​អំឡុង​ពេល​ទស្សនកិច្ច​នោះ មេដឹកនាំ​វៀតណាម បាន​ស្នើ​ទៅ​អភិបាល​រាជធានី​ភ្នំពេញ លោក ឃួង ស្រេង ឲ្យ​ជួយ​យកចិត្ត​ទុកដាក់​ពលរដ្ឋ​វៀតណាម​បន្ថែម​ទៀត ក្រោយពី​ជម្លៀស​ជនជាតិ​វៀតណាម​ចេញពី​ផ្ទះ​បណ្ដែត​ទឹក​នៅ​រាជធានី​ភ្នំពេញ កាលពី​ខែ​មិថុនា ឆ្នាំ​២០២១។

ជា​រឿយៗ មេដឹកនាំ​វៀតណាម តែងតែ​ស្នើ​ឲ្យ​រាជរដ្ឋាភិបាល​កម្ពុជា​ដែល​ដឹកនាំ​ដោយ​លោក ហ៊ុន សែន យកចិត្ត​ទុកដាក់ និង​ផ្ដល់​ភាព​ស្រប​ច្បាប់​ដល់​ពលរដ្ឋ​ខ្លួន​ដែល​កំពុង​រស់នៅ​កម្ពុជា​ដោយ​ខុស​ច្បាប់ ខណៈ​អ្នក​ឃ្លាំមើល​ចាត់ទុក​ការ​ទាមទារ​ផ្ដល់​ភាព​ស្រប​ច្បាប់​នេះ នឹង​បង្ក​ហានិភ័យ​ដល់​ប្រទេស​ជាតិ ដោយសារតែ​វៀតណាម​មាន​ព្រំដែន​ជាប់​ខ្មែរ ហើយ​វៀតណាម​ក៏​ធ្លាប់​ឈ្លានពាន​ទឹកដី​ខ្មែរ​តាំងពី​សម័យ​ដើម​ក្នុង​ប្រវត្តិសាស្ត្រ ហើយ​រហូត​ដល់​បច្ចុប្បន្ន ក៏​នៅតែ​ចិញ្ចឹម​ចិត្ត​ចង់​បាន​ទឹកដី​ប្រទេស​កម្ពុជា​ដែរ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស