31 C
Phnom Penh

បក្ស​ភ្លើង​ទៀន​អំពាវនាវ​ឱ្យ​អាជ្ញាធរ​បញ្ឈប់​ការ​គំរាម​កំហែង​សមាជិក​ក្រុមប្រឹក្សា​ឃុំ​សង្កាត់​ខ្លួន​ចុះ​ចូល​បក្ស​កាន់​អំណាច

ដោយ ឌឹ ខេមបូឌា ដេលី

បទវិភាគ

គណបក្ស​ភ្លើង​ទៀន​អំពាវនាវ​ទៅ​អាជ្ញាធរ​គ្រប់​ជាន់ថ្នាក់ ឲ្យ​បញ្ឈប់​នូវ​រាល់​សកម្មភាព​គំរាមកំហែង និង​បង្ខិតបង្ខំ​សមាជិក​សមាជិកា​ក្រុមប្រឹក្សា​ឃុំ-សង្កាត់​របស់​ខ្លួន ក្នុង​ការ​ចេញ​ញត្តិ​ថ្កោលទោស​លោក សម រង្ស៊ី បន្ត​ទៀត។

បក្ស​មួយ​នេះ​ចាត់ទុក​ការ​គំរាមកំហែង និង​បង្ខិតបង្ខំ​ទាំងឡាយ ផ្ទុយ​ពី​ស្មារតី​នៃ​រដ្ឋធម្មនុញ្ញ និង​ច្បាប់​ជា​ធរមាន។

បើ​តាម​សារ​សំឡេង​បាន​បែកធ្លាយ​ដែល​មាន​រយៈពេល​ជិត ១​នាទី លោក ស្រេង សុខា អភិបាល​ស្រុក​បាណន់ ខេត្ត​បាត់ដំបង បាន​បញ្ជា​ឲ្យ​មេឃុំ​ទាំង ៨ នៅ​ក្នុង​ស្រុក​នេះ ចេញ​ញត្តិ​ថ្កោលទោស​លោក សម រង្ស៊ី ដាក់​ក្នុង​ផេក​ហ្វេសប៊ុក​សាលា​ឃុំ​នីមួយៗ​ចាប់ពី​ទទួល​បាន​បទបញ្ជា។

សារ​សំឡេង​ដែល​បែកធ្លាយ​នោះ បាន​ប្រាប់​ទៅ​សមាជិក​ក្រុមប្រឹក្សា​ឃុំ និង​ជំទប់​ទី​ពីរ​ឃុំ​ដែល​បាន​ចូលរួម​ជាមួយ​បក្ស​ប្រជាជន​កម្ពុជា ឲ្យ​ចេញ​ញត្តិ​ថ្កោលទោស​លោក សម រង្ស៊ី ហើយ​សារភាព​ចុះចូល​ជាមួយ​បក្ស​កាន់​អំណាច ប៉ុន្តែ​បើសិនជា​គណបក្ស​ភ្លើង​ទៀន​ត្រូវ​បាន​រំលាយ​មែន នោះ​សមាជិក​សមាជិកា​ក្រុមប្រឹក្សា​បក្ស​ភ្លើង​ទៀន​នឹង​បាត់​ឱកាស។

សេចក្ដី​ថ្លែងការណ៍​របស់​គណបក្ស​ភ្លើង​ទៀន​ចេញ​ផ្សាយ​នៅ​ថ្ងៃទី​២៨ ខែ​តុលា ឆ្នាំ​២០២២ ឲ្យ​ដឹង​ថា ការ​គំរាមកំហែង និង​ការ​បង្ខិតបង្ខំ​សមាជិក​សមាជិកា​ក្រុមប្រឹក្សា​ឃុំ-សង្កាត់​បក្ស​ភ្លើង​ទៀន​នៅ​ទូទាំង​ប្រទេស​នា​ពេលនេះ វា​ជា​ការ​រំលោភបំពាន​យ៉ាង​ធ្ងន់ធ្ងរ​ទៅ​លើ​រដ្ឋធម្មនុញ្ញ និង​កតិកាសញ្ញា​អន្តរជាតិ​ស្ដីពី​សិទ្ធិ​ពលរដ្ឋ និង​សិទ្ធិ​នយោបាយ ពាក់ព័ន្ធ​នឹង​សេរីភាព​នៃ​ការ​បញ្ចេញមតិ​របស់​ពលរដ្ឋ។

គណបក្ស​ភ្លើង​ទៀន​អះអាង​ថា ក្នុង​ពេល​ថ្មីៗ​នេះ សមាជិក​សមាជិកា​ក្រុមប្រឹក្សា​ឃុំ-សង្កាត់​នៃ​បក្ស​របស់​ខ្លួន​នៅ​ទូទាំង​ប្រទេស បាន​រង​នូវ​ការ​គំរាមកំហែង និង​ការ​បង្ខិតបង្ខំ​ពី​សំណាក់​អាជ្ញាធរ​មូលដ្ឋាន​ឲ្យ​ចូលរួម​អនុម័ត និង​ចុះហត្ថលេខា​លើ​ញត្តិ​ដែល​រៀបចំ​ដោយ​អាជ្ញាធរ​មាន​សមត្ថកិច្ច ដែល​ផ្ទុយ​ពី​ឆន្ទៈ​របស់​ពួកគេ។

គណបក្ស​ភ្លើង​ទៀន​អំពាវនាវ​ដល់​អាជ្ញាធរ​រាជធានី-ខេត្ត​ក្រុង ឲ្យ​បញ្ឈប់​នូវ​រាល់​សកម្មភាព​គំរាមកំហែង និង​បង្ខិតបង្ខំ​សមាជិក​សមាជិកា​ក្រុមប្រឹក្សា​ឃុំ-សង្កាត់​មកពី​គណបក្ស​ភ្លើង​ទៀន​ទូទាំង​ប្រទេស ដែល​ធ្វើ​អ្វី​ផ្ទុយ​ពី​ឆន្ទៈ​របស់​ខ្លួន និង​ប្រាសចាក​ពី​រដ្ឋធម្មនុញ្ញ និង​ច្បាប់​ជា​ធរមាន​នានា​បន្ត​ទៀត។

មួយ​វិញ​ទៀត គណបក្ស​នេះ​ក៏​ស្នើសុំ​ក្រសួង​មហាផ្ទៃ ធ្វើ​សេចក្ដី​ណែនាំ​ទៅ​អាជ្ញាធរ​មូលដ្ឋាន​គ្រប់​លំដាប់​ថ្នាក់​ឲ្យ​បញ្ឈប់​សកម្មភាព​គំរាមកំហែង និង​បង្ខិតបង្ខំ​សមាជិក​សមាជិកា​ក្រុមប្រឹក្សា​ឃុំ-សង្កាត់​មកពី​គណបក្ស​ភ្លើង​ទៀន​តទៅទៀត ដើម្បី​ធានា​បរិយាកាស​ល្អ​ប្រសើរ​ដល់​ដំណើរការ​បោះឆ្នោត​ជ្រើស​តាំង​តំណាងរាស្ត្រ​នីតិកាល​ទី​៧ ឆ្នាំ​២០២៣ ខាងមុខ​នេះ ឲ្យ​ប្រព្រឹត្ត​ទៅ​ដោយ​សេរី ត្រឹមត្រូវ និង​យុត្តិធម៌។

ការ​អំពាវនាវ និង​ស្នើសុំ​បែប​នេះ គណបក្ស​ភ្លើង​ទៀន​សំអាង​ថា ខ្លួន​បាន​បញ្ជាក់​នូវ​ជំហរ​របស់​ខ្លួន​រួច​ហើយ​ពាក់ព័ន្ធ​នឹង​ការ​ថ្កោលទោស​បុគ្គល​ទាំងឡាយ​ណា​ដែល​មាន​ចេតនា​ប្រមាថ ឬ​រំលោភ​បំពាន​ដល់​អង្គ​ព្រះមហាក្សត្រ តាមរយៈ​សេចក្ដី​ថ្លែងការណ៍​ថ្ងៃទី​២៧ ខែ​តុលា ឆ្នាំ​២០២២ ក្នុង​នោះ​លោក ហ៊ុន សែន ក៏​បាន​អបអរ​សាទរ និង​គាំទ្រ​ចំពោះ​សេចក្ដី​ថ្លែងការណ៍​របស់​គណបក្ស​ភ្លើង​ទៀន​ដែរ។

យ៉ាងណា ក្រោយពី​មាន​ចេញ​សេចក្ដី​ថ្លែងការណ៍ នៅ​ថ្ងៃ​នេះ សមាជិក​ក្រុមប្រឹក្សា​ឃុំ-សង្កាត់​គណបក្ស​ភ្លើង​ទៀន​នៅ​តាម​បណ្ដា​រាជធានី-ខេត្ត​មួយ​ចំនួន បាន​នាំគ្នា​ប្រកាស​មិន​គាំទ្រ​ញត្តិ​ថ្កោលទោស​លោក សម រង្ស៊ី ជា​ជន​ក្បត់​ជាតិ​នោះ​ទេ។

ក្រៅពី​ប្រកាស​មិន​គាំទ្រ​ហើយ ពួកគេ​ក៏​បដិសេធ​មិន​ចូលរួម​ប្រជុំ​តាម​ការ​កោះហៅ​របស់​រដ្ឋបាល​ឃុំ-សង្កាត់ ដោយ​សំអាង​ថា ថ្នាក់​ដឹកនាំ​បក្ស​ភ្លើង​ទៀន​បាន​ចេញ​សេចក្ដី​ថ្លែងការណ៍​រួច​ហើយ ថែម​ទាំង​មាន​ការ​អបអរ​សាទរ​ពី​បុរស​ខ្លាំង​លោក ហ៊ុន សែន ផង​ដែរ។

កាលពី​ថ្ងៃទី​២៦ ខែ​តុលា ឆ្នាំ​២០២២ គណបក្ស​ភ្លើង​ទៀន​បាន​ចេញ​សេចក្ដី​ថ្លែងការណ៍​មួយ​បដិសេធ​ទំនាក់ទំនង​ជាមួយ​លោក សម រង្ស៊ី និង​ថ្កោលទោស​បុគ្គល​ទាំងឡាយ​ណា​ដែល​មាន​ចេតនា​ប្រមាថ ឬ​រំលោភ​បំពាន​រដ្ឋធម្មនុញ្ញ អង្គ​ព្រះមហាក្សត្រ និង​របប​រាជា​និយម​អាស្រ័យ​រដ្ឋធម្មនុញ្ញ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស